Search result for "shakhs-e-maamuulii" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "shakhs-e-maamuulii"

Nazm MATCHES FOR "shakhs-e-maamuulii"

Nazm

ye kaun aaya

KHaakistar-e-dil ko hai phir shola-ba-jaa.n honaa
hairat kaa jahaa.n honaa hasrat kaa nishaa.n honaa
ai shaKHs jo tuu aakar yuu.n dil me.n samaayaa hai
tuu dard ki darmaa.n hai to dhuup ki saayaa hai?
nainaa.n tire jaaduu hai.n gesuu tire KHushbuu hai.n
baate.n kisii jangal me.n bhaTkaa hu.aa aahuu hai.n
maqsuud-e-vafaa sun le kyaa saaf hai saada hai
jiine kii tamannaa hai marne kaa iraada hai

Ibn۔e۔Insha

Nazm

dil-ashob

tire lutf-o-ataa kii dhuum sahii mahfil mahfil
ik shaKHs thaa inshaa naam-e-mohabbat me.n kaamil
ye shaKHs yahaa.n paamaal rahaa, paamaal gayaa

Ibn۔e۔Insha

Nazm

akaD shah

aka.D shaah ik shaKHs-e-naadaan thaa
vo is baat se lekin anjaan thaa

Mohammad Osama Sarsari

Nazm

mashwara

tum sar-e-shaaKH-e-saman baaG me.n aayaa na karo
baaG me.n manchale bhau.nre bhii u.Daa karte hai.n
vo hadaf tum ko banaa le.nge to phir kyaa hogaa

Salam Machhli shahri

Nazm

maulwiyon ka shaghl-e-takfir

ik maulvii saahab se kahaa mai.n ne ki kyaa aap
kuchh haalat-e-europe se KHabar-daar nahii.n hai.n
aamaada-e-islaam hai.n london me.n hazaaro.n
har chand abhii maa.il-e-iz.haar nahii.n hai.n
taqliid ke phando.n se hu.e jaate hai.n aazaad
vo log bhii jo daaKHil-e-israar nahii.n hai.n
jo naam se islaam ke ho jaate hai.n barham
un me.n bhii ta.assub ke vo aasaar nahii.n hai.n
afsos magar ye hai ki vaa.iz nahii.n paidaa
yaa hai.n to ba-qaul aap ke dii.n-daar nahii.n hai.n
kyaa aap ke zumre me.n kisii ko nahii.n ye dard
kyaa aap bhii us ke liye tayyaar nahii.n hai.n
jhallaa ke kahaa ye ki ye kyaa suu-e-adab hai
kahte ho vo baate.n jo sazaa-vaar nahii.n hai.n
karte hai.n shab-o-roz musalmaano.n kii takfiir
baiThe hu.e kuchh ham bhii to be-kaar nahii.n hai.n

Shibli Nomani

Nazm

hijr-zad

mire dukh kaa ahd taviil hai
miraa naam lauh-e-firaaq par hai likhaa hu.aa
mai.n janm janm se kisii me.n aks-e-mushaabahat kii talaash me.n
phir apne KHvaab saraab saath liye hu.e
gayaa shahar shahar nagar nagar
thii.n ajiib bastiyaa.n raah me.n merii jiit merii shikast kii
kisii duusre kii sadaaqate.n mirii raahbar marii raahzan
liye saath saath qadam qadam
kabhii pesh-e-KHalvat-aa.iina
kabhii sub.h-o-shaam kii KHilqato.n ke juluus me.n
ka.ii zaahiro.n, ka.ii baatino.n ke badalte ruup me.n munqasim
mujhe kar ga.ii.n
mai.n dhu.aa.n saa aatish-e-asl kaa
u.Daa aur KHud se bichha.D gayaa
mujhe har qadam pe lagaa ki mai.n
safar-aazmaa.n huu.n magar mujhe mirii samt kii bhii KHabar nahii.n
mai.n haliif apne Ganiim kaa
huu.n jahaa.n bhii raah-e-ziyaa.n me.n huu.n
mai.n KHayaal-parvar-e-shauq shahr-e-misaal kaa
mujhe har maqaam pe yuu.n lagaa
ki haqiiqato.n ke sagaan-e-kucha-navard mujh pe jhapaT pa.De.nge yahii.n kahii.n
mujhe duniyaa-daar pachhaa.D de.nge mufaahamat kii zamiin par
mire haath bhiige hu.e sadaa.o.n ke KHauf se
mirii saa.ns larzii hu.ii havaa kii machaan par
ye faraar thaa
ki anaa kaa saaya-o-saa.ebaa.n
liyaa jis ne apne bachaav me.n
mai.n ravaa.n rahaa kisii be-numuud sii raushnii ke bahaav me.n
meraa paa-e-shauq-e-sazaa kahii.n pe rukaa nahii.n
ye nasheb-e-shaam hai aur mai.n huu.n ravaa.n-davaa.n
ye nahii.n ki mujh ko amaa.n milegii shab-e-abad ke pa.Daav me.n
zaraa intizaar ki jab vajuud kaa kuuza-gar
mujhe phir se KHaak banaa chuke
to ye dekhnaa
ki shabiih-e-shaKHs-e-digar me.n lauT ke aa.uu.ngaa
usii shahr me.n
miraa naam lauh-e-firaaq par hai likhaa hu.aa
mire dukh kaa ahd taviil hai

Aftab Iqbal Shamim

Nazm

KHwahish

ko.ii shaam kii aahaT se pahle
ko.ii shaam kii aahaT se pahle
Dhaltii hu.ii sah-pahar me.n
phone kar ke bulaa.e mujhe
kahii.n kisii
sarsabz lawn me.n biThaa kar
achchhii sii chaa.e pilaa.e mujhe
aur
chaa.e ke saath
ik mahfil jame
kuchh naGme barse.n
kuchh sher u.De.n
kuchh khaTTii miiThii sii
dhiimii dhiimii sii
baate.n bane.n
aur baato.n baato.n me.n
thaam kar haath meraa
vo dhiime se ik sargoshii kare
mujh se mohabbat kaa dam bhare
mai.n uljhaa uljhaa soche jaa.uu.n
us pal ko sadiyaa.n sau.npe jaa.uu.n
phir soch kar kuchh kahuu.n us se
jo kahaa hai
phir se dohraa.oge
sach kaho mere ho jaa.oge
vo dabaa kar nichlaa lab apnaa
bhar ke aa.nkho.n me.n
sab kuchh apnaa
dhiime se sar hilaa.e
haule se meraa haath dabaa.e
aur
muskuraa kar kahe
haa.n mujhe tum se mohabbat hai
aur is iqraar ke baad achaanak se
kaale baadal ghir kar chhaa.e.n
ThanDii sii purvaa.ii chale
aur
aasmaan is iqraar ke sadqe
ham pe
bhiige bhiige phuul barsaa.e
aur us tez baarish me.n
ham dono.n
duur kisii baaG ke goshe me.n
bhiige bhiige lipTe kha.De ho.n
ko.ii to aisaa bhii shaKHs aa.e
shaam kii aahaT se pahle
Dhaltii hu.ii sah-pahar me.n
phone kar ke bulaa.e mujhe

Faisal Malik

Nazm

jashn-e-id

ba-faiz-e-'iid bhii paidaa hu.ii na yak-ra.ngii
ko.ii maluul ko.ii Gam se be-niyaaz rahaa

Shakeb Jalali

Nazm

wardat

shakeb-o-sabr mohabbat me.n kho chukaa jab se
jigar me.n taab na dil me.n qaraar baaqii hai

Mehdi Machli Shahri

Nazm

kangan bele ka

us ne mere haath me.n baa.ndhaa
ujlaa ka.ngan bele kaa
pahle pyaar se thaamii kalaa.ii
ba.ad is ke haule haule pahnaayaa
gahnaa phuulo.n kaa
phir jhuk kar haath ko chuum liyaa
phuul to aaKHir phuul hii the
murjhaa hii ga.e
lekin merii raate.n un kii KHushbuu se ab tak raushan hai.n
baa.nho.n par vo lams abhii tak taaza hai
shaaKH-e-sanobar par ik chaa.nd damaktaa hai
phuul kaa gahnaa
prem kaa kangan
pyaar kaa bandhan
ab tak merii yaad ke haath se lipTaa hu.aa hai

Parveen Shakir

Nazm

mere gham-KHwar

kitne pyaare hamsaa.e hai.n
alag alag bhii shaiKH-o-barahman

Abul Fitrat Meer Zaidi

Nazm

Tipu ki aawaz

KHvaab-e-giraa.n se Guncho.n kii aa.nkhe.n na khul sakii.n
go shaaKH-e-gul se naGma baraabar uThaa kiyaa

Aale Ahmad Suroor

Nazm

tambih

dosto mere himaala kii taraf mat aanaa
varna barf aag ke sho'lo.n me.n badal jaa.egii
shaaKH-e-gul zahr kii shamshiir me.n Dhal jaa.egii

Salam Machhli shahri

Nazm

hawa jam-e-sehat tajwiz karti hai

mujhe maaluum thaa
ye din bhii dukh kii kokh se phuuTaa hai
merii maatamii chaadar
nahii.n tabdiil hogii aaj ke din bhii
jo raakh u.Dtii thii KHvaabo.n kii badan me.n
yuu.nhii aashufta rahegii
aur udaasii kii yahii suurat rahegii
mai.n apne sog me.n maatam-kunaa.n
yuu.n sar-ba-zaanuu raat tak baiThii rahuu.ngii
aur mire KHvaabo.n kaa pursa aaj bhii ko.ii nahii.n degaa
magar ye kaun hai
jo yuu.n mujhe baahar bulaataa hai
ba.Dii narmii se kahtaa hai
ki apne hujra-e-Gam se nikal kar baaG me.n aa.o
zaraa baahar to dekho
duur tak sabza bichhaa hai
aur harii shaaKHo.n pe naaranjii shaguufe muskuraate hai.n
mulaa.em sabz patto.n par pa.Dii shabnam
sunahrii dhuup me.n hiire kii suurat jagmagaatii hai
daraKHto.n me.n chhupii naddii
bahut dhiime suro.n me.n gungunaatii hai
chamakte zard phuulo.n se ladii nannhii pahaa.Dii ke aqab me.n
nuqra.ii chashma KHushii se khilkhilaataa hai
parind-e-KHush-guluu
shaaKH-e-shagufta par chahaktaa hai
ghane jangal me.n baarish kaa Gubaar-e-sabz
sat.h-e-shiisha-e-dil par
mulaa.em u.ngliyo.n se marhabaa ke lafz likhtaa hai
ko.ii aataa hai
aa kar chaadar-e-Gam ko ba.Dii aahistagii se
mere shaano.n se haTaa kar
saat rango.n kaa dupaTTa khol kar mujh ko u.Daataa hai
mai.n khul kar saa.ns letii huu.n
mire andar
ko.ii pairo.n me.n ghu.nghruu baa.ndhtaa hai
raqs kaa aaGaaz kartaa hai
mire kaano.n ke aavezo.n ko ye kis ne chhu.aa
jis se lave.n phir se gulaabii ho ga.ii hai.n
ko.ii sargoshiyo.n me.n phir se meraa naam letaa hai
fazaa kii naGmagii aavaaz detii hai
havaa jaam-e-sehat tajviiz kartii hai

Parveen Shakir

Nazm

itna malum hai!

naam bhuule se jo meraa kahii.n aayaa hogaa
Gair-mahsuus tariiqe se vo chau.nkaa hogaa
ek jumle ko ka.ii baar sunaayaa hogaa
baat karte hu.e sau baar vo bhuulaa hogaa
ye jo la.Dkii na.ii aa.ii hai kahii.n vo to nahii.n
us ne har chehra yahii soch ke dekhaa hogaa
jaan-e-mahfil hai magar aaj faqat mere baGair
haa.e kis darja vahii bazm me.n tanhaa hogaa
kabhii sannaaTo.n se vahshat jo hu.ii hogii use
us ne be-saaKHta phir mujh ko pukaaraa hogaa
chalte chalte ko.ii maanuus sii aahaT paa kar
dosto.n ko bhii kis uzr se rokaa hogaa
yaad kar ke mujhe nam ho ga.ii ho.ngii palke.n
''aa.nkh me.n pa.D gayaa kuchh'' kah ke ye Taalaa hogaa
aur ghabraa ke kitaabo.n me.n jo lii hogii panaah
har satar me.n miraa chehra ubhar aayaa hogaa
jab milii hogii use merii alaalat kii KHabar
us ne aahista se diivaar ko thaamaa hogaa
soch kar ye ki bahal jaa.e pareshaanii-e-dil
yuu.nhii be-vaj.h kisii shaKHs ko rokaa hogaa!

Parveen Shakir

Nazm

naTak

titlii ma.asuumaana hairat se sarshaar
siyah shaaKHo.n ke halqe se niklii
sadiyo.n ke jak.De hu.e reshmii par phailaa.e aur u.Dne lagii
khulii fazaa kaa zaa.iqa chakkhaa
narm havaa kaa giit sunaa
an-dekhe kohsaaro.n kii qaamat naapii
raushniyo.n kaa lams piyaa
KHushbuu ke har rang ko chhuu kar dekhaa
lekin rang havaa aur KHushbuu kaa vijdaan adhuuraa thaa
ki raqs kaa mausam Thahar gayaa
rut badlii
aur suuraj kii kirno.n kaa taaj pighalne lagaa
chaa.nd ke haath du.aa ke harf hii bhuul ga.e
havaa ke lab barfiile sumo.n me.n niile pa.D kar apnii sadaa.e.n kho baiThe
patto.n kii baa.nho.n ke sar be-rang hu.e
aur tanhaa rah ga.e phuulo.n ke haath
barf kii lahr ke haatho.n titlii ko lauT aane kaa paiGaam gayaa
bhau.nre shabnam kii zanjiire.n le kar dau.De
aur bechain paro.n me.n an-chakhii parvaazo.n kii aashufta pyaas jalaa dii
apne kaale naaKHuuno.n se
titlii ke par noch ke bole
ahmaq la.Dkii
ghar vaapas aa jaa.o
naaTak KHatm hu.aa
KHvaatiin kaa aalamii saal

Parveen Shakir

Nazm

rafiq-e-nadida

ik nidaa aa.ii bahut duur se kaano.n me.n mire
phir KHayaal aayaa ki ye vahm miraa ho shaayad
mere uljhe hu.e KHvaabo.n ke sanam KHaane hai.n
mere anfaas kii mauhuum sadaa ho shaayad
mai.n tasavvur ke KHalaa.o.n me.n bhaTaktaa huu.n sadaa
shabnamii soch kii raas aatii nahii.n mujh ko havaa
jo mire shauq-e-takallum kii talabgaar na ho
is se qurbat kii tamannaa kaa taqaazaa be-suud
KHvaab jo aa.nkho.n me.n maj.huul nazaara ho jaa.e
us ke sach hone kaa be-ma.anii dilaasaa be-suud
be-nidaa KHvaahish lailaa se mujhe kyaa haasil
aisii naadiida zuleKHaa se mujhe kyaa haasil
kyaa KHabar is ke taKHayyul me.n miraa naam na ho
mujh se milne kii himaaqat se vo katraa jaa.e
kyaa pataa merii rifaaqat use manzuur na ho
mujh se mil baiThe magar jald hii uktaa jaa.e
vasl maamuura-e-ehsaas ke KHvaabo.n me.n rahe
hasrat sharaf mulaaqaat saraabo.n me.n rahe
kyaa pataa us ko mire qurb kii KHvaahish hii na ho
baat karnii bhii na ho us ko gavaaraa mujh se
kyaa KHabar pahlii mulaaqaat pe vo ye kah de
rakhnaa ummiid na milne kii dobaara mujh se
ye tasavvur mire pindaar se Takraate hai.n
mere jazbaat isii KHauf se mar jaate hai.n
jo sadaa duur se aa.ii hai faqat vahm se vo
vahm ke saa.e se ummiid lagaanaa hai fuzuul
dahr kii talKH haqiiqat ko nazar me.n rakh kar
ret par KHvaabo.n kii tasviir banaanaa hai fuzuul
aisii tasviir kaa har rang utar jaataa hai
vaqt ke saath KHalaa.o.n me.n bikhar jaataa hai

Shamsi Tasneem

Nazm

katik ka chand

jii me.n aatii hai ki kamre me.n bulaa le.n is ko
chaa.nd kab se hai sar-e-shaaKH-e-sanobar aTkaa
raat us ko bhii nigal jaa.egii bolo bolo
baam par aur na aa.egaa kisii kaa chehraa

Ibn۔e۔Insha

Nazm

aurat ki taKHliq

shaaKH-e-gul kii nazaakat ubaalii ga.ii
narm baa.nho.n ke saa.nche me.n Dhaalii ga.ii

Izhaar Malihabadi

Nazm

kal kya hoga

kal kyaa hogaa
aa.nkh khulii to kal kyaa hogaa
KHvaab ko vaapas nii.nd me.n rakh kar
nii.nd ko chho.D ke bistar mai.n
jab bistar ko tum chho.Doge
to duniyaa hogii
sub.h kii duniyaa
kaan azaa.n se bharne vaalii
piir dharoge dhartii par to
arsh ko sar pe dharne vaalii
sar se arsh Dhalakte lamhe ghar aa.e to
darvaaze par duniyaa hogii
raat kii duniyaa
aa.nkh me.n nii.nd aur nii.nd ko KHvaab se bhar saktii hai
is ma.amuul se haT kar duniyaa aur amal kyaa kar saktii hai
hairat hii uktaa jaa.e to ko.ii mu.amma hal kyaa hogaa
KHvaab me.n ab ke aa.nkh khulii to Gaur se taknaa
kal jab tum ne aa.nkh na kholii kal kyaa hogaa

Syed Mubarak Shah

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now