Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "shanaas"

Nazm MATCHES FOR "shanaas"

Nazm

jawed ke nam

dayaar-e-ishq me.n apnaa maqaam paidaa kar
nayaa zamaana na.e sub.h o shaam paidaa kar
KHudaa agar dil-e-fitrat-shanaas de tujh ko
sukuut-e-laala-o-gul se kalaam paidaa kar
uThaa na shiishagaraan-e-fara.ng ke ehsaa.n
sifaal-e-hind se miinaa o jaam paidaa kar
mai.n shaaKH-e-taak huu.n merii Gazal hai meraa samar
mire samar se mai-e-laala-faam paidaa kar
miraa tariiq amiirii nahii.n faqiirii hai
KHudii na bech Gariibii me.n naam paidaa kar

Allama Iqbal
Nazm

iblis ki majlis-e-shura

ibliis
ye anaasir kaa puraanaa khel ye duniyaa-e-duu.n
saakinaan-e-arsh-e-aazam kii tamannaa.o.n kaa KHuu.n
is kii barbaadii pe aaj aamaada hai vo kaarsaaz
jis ne is kaa naam rakhaa thaa jahaan-e-kaaf-o-nuu.n
mai.n ne dikhlaayaa fara.ngii ko muluukiyat kaa KHvaab
mai.n ne to.Daa masjid-o-dair-o-kaliisaa kaa fusuu.n
mai.n ne naadaaro.n ko sikhlaayaa sabaq taqdiir kaa
mai.n ne mun.im ko diyaa sarmaaya daarii kaa junuu.n
kaun kar saktaa hai is kii aatish-e-sozaa.n ko sard
jis ke ha.ngaamo.n me.n ho ibliis kaa soz-e-daruu.n
jis kii shaaKHe.n ho.n hamaarii aabiyaarii se buland
kaun kar saktaa hai is naKHl-e-kuhan ko sar-niguu.n
pahlaa mushiir
is me.n kyaa shak hai ki mohkam hai ye ibliisii nizaam
puKHta-tar is se hu.e KHuu-e-Gulaamii me.n avaam
hai azal se in Gariibo.n ke muqaddar me.n sujuud
in kii fitrat kaa taqaazaa hai namaaz-e-be-qayaam
aarzuu avval to paidaa ho nahii.n saktii kahii.n
ho kahii.n paidaa to mar jaatii hai yaa rahtii hai KHaam
ye hamaarii sa.ii-e-paiham kii karaamat hai ki aaj
suufii-o-mullaa muluukiyyat ke bande hai.n tamaam
tab-e-mashriq ke liye mauzuu.n yahii afyuun thii
varna qavvaalii se kuchh kam-tar nahii.n ilm-e-kalaam
hai tavaaf-o-haj kaa ha.ngaama agar baaqii to kyaa
kund ho kar rah ga.ii momin kii teG-e-be-niyaam
kis kii nau-miidii pe hujjat hai ye farmaan-e-jadiid
hai jihaad is daur me.n mard-e-musalmaa.n par haraam
duusraa mushiir
KHair hai sulataanii-e-jamhuur kaa GauGaa ki shar
tuu jahaa.n ke taaza fitno.n se nahii.n hai baa-KHabar
pahlaa mushiir
huu.n magar merii jahaa.n-biinii bataatii hai mujhe
jo muluukiyat kaa ik parda ho kyaa is se KHatar
ham ne KHud shaahii ko pahnaayaa hai jamhuurii libaas
jab zaraa aadam hu.aa hai KHud-shanaas-o-KHud-nigar
kaarobaar-e-shahryaarii kii haqiiqat aur hai
ye vajuud-e-miir-o-sultaa.n par nahii.n hai munhasir
majlis-e-millat ho yaa parvez kaa darbaar ho
hai vo sultaa.n Gair kii khetii pe ho jis kii nazar
tuu ne kyaa dekhaa nahii.n maGrib kaa jamhuurii nizaam
chehra raushan andaruu.n cha.ngez se taariik-tar
tiisraa mushiir
ruuh-e-sultaanii rahe baaqii to phir kyaa iztiraab
hai magar kyaa is yahuudii kii sharaarat kaa javaab
vo kaliim-e-be-tajallii vo masiih-e-be-saliib
niist paiGambar va-lekin dar baGal daarad kitaab
kyaa bataa.uu.n kyaa hai kaafir kii nigaah-e-parda-soz
mashriq-o-maGrib kii qaumo.n ke liye roz-e-hisaab
is se ba.Dh kar aur kyaa hogaa tabii.at kaa fasaad
to.D dii bando.n ne aaqaa.o.n ke KHemo.n kii tanaab
chauthaa mushiir
to.D is kaa ruumat-ul-kubraa ke aivaano.n me.n dekh
aal-e-ceaser ko dikhaayaa ham ne phir ceaser kaa KHvaab
kaun bahr-e-ruum kii maujo.n se hai lipTaa hu.aa
gaah baalad-chuu.n-sanobar gaah naalad-chuu.n-rubaab
tiisraa mushiir
mai.n to is kii aaqibat-biinii kaa kuchh qaa.il nahii.n
jis ne afra.ngii siyaasat ko kyaa yuu.n be-hijaab
paa.nchvaa.n mushiir ibliis ko muKHaatab kar ke
ai tire soz-e-nafas se kaar-e-aalam ustuvaar
tuu ne jab chaahaa kiyaa har pardagii ko aashkaar
aab-o-gil terii haraarat se jahaan-e-soz-o-saaz
ablah-e-jannat tirii ta.aliim se daanaa-e-kaar
tujh se ba.Dh kar fitrat-e-aadam kaa vo mahram nahii.n
saada-dil bando.n me.n jo mash.huur hai parvardigaar
kaam thaa jin kaa faqat taqdiis-o-tasbiih-o-tavaaf
terii Gairat se abad tak sar-niguu.n-o-sharmsaar
garche hai.n tere muriid afra.ng ke saahir tamaam
ab mujhe un kii faraasat par nahii.n hai e'tibaar
vo yahuudii fitna-gar vo ruuh-e-mazdak kaa buruuz
har qabaa hone ko hai is ke junuu.n se taar taar
zaaG dashtii ho rahaa hai ham-sar-e-shaahiin-o-charG
kitnii sur.at se badaltaa hai mizaaj-e-rozgaar
chhaa ga.ii aashufta ho kar vus.at-e-aflaak par
jis ko naadaanii se ham samjhe the ik musht-e-Gubaar
fitna-e-fardaa kii haibat kaa ye aalam hai ki aaj
kaa.npte hai.n kohsaar-o-murG-zaar-o-juu.ebaar
mere aaqaa vo jahaa.n zer-o-zabar hone ko hai
jis jahaa.n kaa hai faqat terii siyaadat par madaar

Allama Iqbal
Nazm

iqbaal

aayaa hamaare des me.n ik KHush-navaa faqiir
aayaa aur apnii dhun me.n Gazal-KHvaa.n guzar gayaa
sunsaan raahe.n KHalq se aabaad ho ga.ii.n
viiraan mai-kado.n kaa nasiiba sa.nvar gayaa
thii.n chand hii nigaahe.n jo us tak pahu.nch sakii.n
par us kaa giit sab ke dilo.n me.n utar gayaa
ab duur jaa chukaa hai vo shaah-e-gadaa-numaa
aur phir se apne des kii raahe.n udaas hai.n
chand ik ko yaad hai ko.ii us kii adaa-e-KHaas
do ik nigaahe.n chand aziizo.n ke paas hai.n
par us kaa giit sab ke dilo.n me.n muqiim hai
aur us ke lai se saika.Do.n lazzat-shanaas hai.n

Faiz Ahmad Faiz
Nazm

karl marx

us kii daanaa.ii kaa haasil naaKHuun-e-uqda-kushaa
taabnaaki-e-zamiir-o-ziirakii kaa aaftaab
chaahne vaalo.n kaa us kii zikr hii kyaa kiijiye
us ke dushman bhii sirhaane rakhte hai.n us kii kitaab
maaddii taariiKH-e-aalam jis kii taaliif-e-aziim
taas kaipiTaal hai yaa ziist kaa lubb-e-lubaab
pa.Dh ke jis ke ho ga.ii.n hushyaar aqvaam-e-Gulaam
ishtiraakii falsafa kaa khul gayaa har dil me.n baab
kitne dozaKH us ke ik manshuur se jannat bane
kitne sahraa.o.n ko jis ne kar diyaa shahr-e-gulaab
marx ne science o insaa.n ko kiyaa hai ham-kanaar
zehn ko baKHshaa shu.uur-e-zindagaanii kaa nisaab
us kii biinish us kii vajdaanii-nigaah-e-haq-shanaas
kar ga.ii jo chehra-e-iflaas-e-zar ko be-naqaab
'Gasab-e-ujrat' ko diyaa 'sarmaayaa' kaa jis ne laqab
be-hisaab us kii basiirat us kii mantiq laa-javaab
aaftaab taaza kii us ne bashaarat dii hame.n
us kii har peshan-go.ii hai barafganda naqaab
ko.ii quvvat us kii sadd-e-raah ban saktii nahii.n
vaqt kaa farmaan jab aataa hai ban kar inqilaab
ahl-e-daanish kaa rajaz aur siina-e-dahqaa.n kii Dhaal
lashkar mazduur ke hai.n ham-safiir o ham-rikaab
kaaTtii hai sehr-e-sultaanii ko jab muusaa kii zarb
satvat-e-firaun ho jaatii hai az KHud Garq-e-aab
aaj kii fir.auniyat bhii kuchh isii andaaz se
rafta rafta hotii jaa.egii shikaar-e-inqilaab
la.D rahaa hai ja.ng aaKHir kiisa-e-sarmaaya-daar
jauhrii hathiyaar se kartaa nahii.n jo ijtinaab
apne mustaqbil se taaGuutii tamaddun ko hai yaas
diidanii hai dushman-e-insaaniyat kaa iztiraab
hazrat-e-iqbaal kaa ibliis-e-kochak KHauf se
larza-bar-andaam yuu.n shaitaa.n se kartaa hai KHitaab
panDit o mullaa o raahib be-zarar Thahre magar
TuuTne vaalaa hai tujh par ik yahuudii kaa itaab
vo kaliim-e-be-tajallii vo masiih-e-be-saliib
niist paiGambar o lekin dar baGal daarad kitaab

Wamiq Jaunpuri
Nazm

bhagat-singh ke nam

kahii.n jab sarfaroshii kii
mohabbat istaqaamat kii
shahaadat kii vatan kii baat chaltii hai
mujhe tum yaad aate ho
ye dhaare ruk nahii.n sakte
sitaare jhuk nahii.n sakte
kinaare dekhte rahnaa
nazaare ruk nahii.n sakte
havaa bahtii hii rahtii hai
samundar se samundar tak
lahuu daryaaft kartaa hai
na.ii tahriik kaa manshuur
ye kirne.n darj kartii hai.n
har ik dhartii pe hone kaa nayaa dastuur
har ik raste pe hai.n daar-o-rasan ke niilguu.n saa.e
lahuu se aag kii lapTe.n nikaltii hai.n
qataaro.n me.n dar-e-zindaa.n pe har lamha
ajab sii bhii.D rahtii hai
ye kaisii aag hai jo sard hone ko nahii.n aatii
ye kaisaa KHvaab hai ta.abiir aa.nkhe.n chhiin letii hai
shujaa.at qarz hotii hai
mohabbat farz hotii hai
kisii colonel ke qatl-e-aam se lashkar nahii.n rukte
saliibo.n se nahii.n Darte
lahuu ke dhaare me.n bahte sitaare ruk nahii.n sakte
abad ke aasmaano.n se ishaare ruk nahii.n sakte
ajab hii log hote hai.n
KHud apnii miTTii kii KHaatir jo jaan-o-tan luTaate hai.n
Gazab hii log hote hai.n
ki jo taariiKH ke dhaare ke ruKH ko mo.D dete hai.n
mohabbat karne vaale log paagal log hote hai.n
kisii se jo nahii.n Darte
ye vo dariyaa hai.n jin kii aaKHirii manzil
abad kaa aaKHirii saahil
ye vo dariyaa samundar jin kaa rasta hai
samundar kis se kab tasKHiir hotaa hai
samundar hai zamaana
aur zamaana kis se kab zanjiir hotaa hai

Faheem Shanas Kazmi
Nazm

tamasha-gah-e-lala-zar

tamaashaa-gah-e-laala-zaar
magar nauha-KHvaanii kii ye sargiraanii kahaa.n tak?
ki manzil hai dushvaar Gam se Gam-e-jaavedaa.n tak!
vo sab the kushaada-dil o hosh-ma.nd o parastaar-e-rabb-e-kariim
vo sab KHair ke raah-daa.n raah-shanaas
hame.n aaj mohsin-kush o naa-sipaas
vo shaahanshahaan-e-aaziim
vo pindaar-e-rafta kaa jaah-o-jalaal-e-qadiim
hamaarii haziimat ke sab be-bahaa taar-o-puu the
fanaa un kii taqdiir ham un kii taqdiir ke nauhagar hai.n
usii kii tamannaa me.n phir sogvaar
tamaashaa-gah-e-laala-zaar!

Noon Meem Rashid
Nazm

ai mubaraz-talab

ishq kii tund-KHezii ke auqaat aaKHir hu.e
ai mubaaraz-talab zindagii
alvidaa
alvidaa..... apne auqaat aaKHir hu.e
KHvaab kii lahr me.n
dard ke shahr me.n
gard..... raKHt-e-safar
dil lahuu me.n hai tar
zindagii kaT ga.ii teG kii dhaar par
sajda karte jabii.n kitnii zaKHmii hu.ii
aur KHudaa aaj tak ham se raazii nahii.n
aur zamii.n saKHt hai
manzile.n gard hai.n

Faheem Shanas Kazmi
Nazm

na-shanas

kitne lahjo.n kii kaTaare.n mirii gardan pe chalii.n
kitne alfaaz kaa siisa mire kaano.n me.n ghulaa
jis me.n ik samt dhu.ndalkaa thaa aur ik samt Gubaar
us taraazuu pe mire dard kaa saamaan tulaa
kam-nigaahii ne basiirat pe uThaa.e neze
vahm kii nahr me.n pairaahan-e-afkaar dhulaa
qaht aisaa thaa ki barpaa na hu.ii majlis-e-ishq
habs aisaa thaa ki tahqiiq kaa parcham na khulaa

Mustafa Zaidi
Nazm

taKHrib-karon ki shahadat

ek din jannat me.n bolaa ik shahiid-e-haq-shanaas
maslak-e-haq par nahii.n hai merii jannat kii asaas

Khalid Irfan
Nazm

rah-o-rasm-e-ashnai

zamii.n na.ii thii, falak naa-shanaas thaa jab ham
tirii galii se nikal kar suu-e-zamaana chale
nazar jhukaa ke ba-andaaz-e-mujrimaana chale

Mustafa Zaidi
Nazm

wo aur main

us ko mire KHvaabo.n kaa rasta
jaane kis ne dikhaayaa hai
mai.n jab aadhii raat ko thak kar
apne-aap pe girtaa huu.n
vo chupke se aa jaatii hai
sabz sunahre KHvaab liye
narm gulaabii haatho.n se mire baalo.n ko suljhaatii hai
dhiime suro.n me.n
'faiz' kii nazm sunaatii hai
mai.n us ko dekhtaa rahtaa huu.n

Faheem Shanas Kazmi
Nazm

rakh

miraa KHayaal thaa un zar-nigaar mahlo.n me.n
vo dil-kashii hai ki mai.n tujh ko bhuul jaa.uu.ngii
nashaat-e-taaza ke ehsaas kii shu.aa.o.n se
shabaab-o-husn kii raaho.n ko jagmagaa.uungii

Naresh Kumar Shad
Nazm

tujhe kya KHabar

tirii aarzuu
jise mai.n ne sab se alag rakkhaa
use dil ke narm Gilaaf se
kabhii jhaa.nkne bhii nahii.n diyaa
ki ye KHvaahisho.n ke hujuum me.n
kahii.n apnii qadar ga.nvaa na de
tirii chhoTii chhoTii nishaaniyo.n ko
ba.De qariine se poTlii me.n lapeT kar
kabhii koTharii me.n chhupaa diyaa
kabhii Taa.nD par rakhe degche me.n giraa diyaa
ki pare pare rahe.n chashm-e-charKH-e-kabuud se
kabhii zer-e-lab tiraa naam bhii
kahii.n le liyaa
to tamaam shab usii vasvase me.n guzar ga.ii
ki KHamoshiyo.n me.n Dhalaa hu.aa ye suruud-e-Gam
kisii kam-shanaas ne sun liyaa
to na bach sakegaa vaqaar-e-hurmat
usii ehtiyaat me.n kaT ga.ii hai mirii hayaat kii dopahar
mire chaaragar tujhe kyaa KHabar
mujhe aaj bhii tirii laaj kaa vahii pahle jaisaa KHayaal hai
na to fikr-e-shaam-e-firaaq hai
na umiid-e-sub.h-e-visaal hai

Talib Ansari
Nazm

KHud-kushi ke pul par

KHud-kushii ke pul par
samundar kii lahro.n me.n bahtii
fasurda o naakaam
jismo.n kii ruuhe.n
bulaatii hai.n mujh ko
chale aa.o har Gam se daaman chhu.Daa lo
miTaa do
fanaa hone vaale badan ko miTaa do
fanaa se na Darnaa
yahii asl me.n zindagii hai
isii me.n haqiiqii KHushii hai
samundar kii lahro.n me.n
sayyaal ruuho.n ke
giito.n me.n behad kashish hai

Faheem Shanas Kazmi
Nazm

la bhi hai ek guman

tum ne kyaa dekhaa yahaa.n kuchh bhii nahii.n
ham ne kyaa paayaa yahaa.n kuchh bhii nahii.n
''be-kasii haa.e tamannaa ki na duniyaa hai na dii.n''
''laa'' se aaGaaz fasaane kaa hu.aa
''laa'' se tahziib zamaane kii hu.ii
''laa'' kii tafsiir nahii.n hai mumkin
''laa'' hii se ishq kaa aaGaaz hu.aa
ishq hai ek balaa
ishq saffaak o havasnaak dariida-daaman
jis ke qadmo.n se bipharte hu.e dariyaa umDe
jis kii aa.nkho.n se dahakte hu.e hiire nikle
jis ke haatho.n pe chamakte hu.e mahtaab utre
ishq vo aag ki jo aur jilaa de jaa.e
ishq vo KHvaab ki jo nii.nd u.Daa le jaa.e
is qadar sarkash o saffaak ki bas
dasht-e-kaashaan se dillii kaa safar
''nigah-e-jalva-parast aur nafas-e-sidq-guzii.n''
ik ''ubhai-chand mire naama-e-a.amaal me.n hai
aalam-e-kul KHvaab me.n hai
sa.ng-e-marmar kii usii masjid ke
surKH ziino.n pe lahuu bahtaa hai
aaj bhii kal kii tarah ha.nstaa hai
kufr masjid me.n bahaataa hai lahuu
ishq sajde me.n kahe ''shukr-allaah''
shaahabaad bhii tuufaan me.n bahtaa jaa.e
aur 'daaraa' hai kisii soch me.n Garq
masnad-e-adl sipah-saalaar aur taKHt me.n ham-fikrii hai
ek hai ''mullaa-qavii''

Faheem Shanas Kazmi
Nazm

sab khel-tamasha KHatm hua

jab shaam kii palke.n tharraa.ii.n
yaado.n kii aa.nhke.n bhar aa.ii.n
har lahr me.n ek samundar thaa
jo dil ko bahaa le jaataa thaa
saahil se duur jaziiro.n par
dil bahte bahte Duub gayaa
phir raat hu.ii
phir havaa me.n aa.nsuu ghulne lage
phir KHvaabo.n kii mehraabo.n me.n
mai.n ghar kaa rasta bhuul gayaa
phir saa.ns se pahle maut aa.ii
aur khel-tamaashaa KHatm hu.aa
mai.n biich galii me.n kaise gir kar
TuuT gayaa

Faheem Shanas Kazmi
Nazm

sabr ki chadar tah kar di

ko.ii aag piye ki zahr piye
yaa saa.np Dase kii maut mare
ab dhuup ke jal-thal dariyaa se
ko.ii apne mu.nh me.n ret bhare
ham ne to piyaala ulaT diyaa
aur ulaT diyaa
har ik manzar
jab shaam kii aa.nhke.n KHuun hu.ii.n
aur buudla boTii boTii thii
ye bastii zulm kii zulmat me.n
tab kachchii dhuup chabaatii thii
aur dariyaa piitii jaatii thii
misvaak zamiin me.n gaa.D dii hai
ab raat se raat nikaalii hai
aur aag me.n Daalii mast dhamaal
aur raakh me.n raakh milaa dii hai
ab KHair kii KHatm hu.ii ummiid
ab phaa.nko ret
aur dhuup piyo
yaa saa.np Dase kii maut maro
ham ne to piyaala ulaT diyaa
aur sabr kii chaadar tah kar dii

Faheem Shanas Kazmi
Nazm

jazb-e-ghairat

vafaa kaa zauq diyaa hai tirii mohabbat ne
dilo.n ko fat.h kiyaa jazba-e-sharaafat ne
tirii hayaa se taqaddus hai aadamiyat kaa
kiyaa hai tujh ko sar-afraaz jazb-e-Gairat ne
chaman me.n jis se hai izn-e-shaguft-e-Guncha-o-gul
gudaaz qalb vo baKHshaa hai tujh ko qudrat ne
bahut hii kam hai.n vo shaa.ista-e-nazar jin ko
KHiraaj-e-shauq diyaa zindagii kii azmat ne
har ek be-kas-o-mazluum kii himaayat kaa
tujhe shu.uur diyaa hai KHudaa kii rahmat ne
faroG-e-bazm-e-suKHan terii sarparastii se
adab shanaas kiyaa hai tirii aqiidat ne
shaguftagii dil-e-barbaad ko ataa kii hai
tire KHayaal tire yaad kii lataafat ne

Masood Akhtar Jamal
Nazm

qissa tamam

KHaak me.n KHaak milii
aur hu.aa qissa tamaam
aag me.n aag mile to bha.Dke
aab me.n aab mile to machle
KHaak me.n KHaak mile
aur ho sab qissa tamaam
jaise saa.e pe giraa ho saaya
jaise chhaa jaa.e shaam
garm pur-shor se din kaa ye bhayaanak anjaam

Faheem Shanas Kazmi
Nazm

karachi ke mushaere mein Daka

ye kis ne bazm-e-adab ke sukuun ko taakaa
mushaa.eron me.n bhii pa.Dne lagaa hai ab Daaka
mushaa.ere me.n Dakaitii kaa shauq rakhte hai.n
hamaare ahd ke Daaku bhii zauq rakhte hai.n
adab-navaaz the Daaku suKHan-shanaas the vo
mire vatan kii siyaasat kaa iqtibaas the vo
ajab Dakait the jin kaa nasiib phuuTaa thaa
jinho.n ne shahr ke in mufliso.n ko luuTaa thaa
pa.Daa vo ran ki ik ustaad sher bhuul gayaa
kisii nahiif se shaa.er kaa saa.ns phuul gayaa
bayaaz apnii kisii ne uchhaal kar rakh dii
bajaa.e cash rubaa.ii nikaal kar rakh dii
udhar Dakait sambhaale the gun u.Daa.ii hu.ii
udhar vo pel rahaa thaa Gazal churaa.ii hu.ii
ye kis ne bazm-e-suKHan luuT lii KHudaa jaane
''tamaam shahr ne pahne hu.e hai.n dastaane''
mushaa.ere me.n na sonaa thaa aur na chaa.ndii thii
suKHan-varo.n kii to har chiiz hii puraanii hai
jo sab se qiimtii shai hai vo shervaanii hai
ye apne sher sunaate hii phuuT lete hai.n
mushaa.ere ko tarannum se luuT lete hai.n
hamaare sher sune.n aur sher-bii.n ho jaa.e.n
KHudaa kare ki ye Daaku bhii saama.ii.n ho jaa.e.n

Khalid Irfan
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now