Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "suurmaa"

Nazm MATCHES FOR "suurmaa"

Nazm

saba viran

sulaimaa.n sar-ba-zaanuu aur sabaa viiraa.n
sabaa viiraa.n, sabaa aaseb kaa maskan
sabaa aalaam kaa ambaar-e-be-paayaa.n!
gayaah o sabza o gul se jahaa.n KHaalii
havaa.e.n tishna-e-baaraa.n,
tuyuur is dasht ke minqaar-e-zer-e-par
tuu surma var guluu insaa.n
sulaimaa.n sar-ba-zaanuu aur sabaa viiraa.n!
sulaimaa.n sar-ba-zaanuu tursh-ruu Gam-gii.n, pareshaa.n-muu
jahaa.n-girii, jahaa.n-baanii faqat tarraara-e-aahuu
mohabbat shola-e-paraa.n havas buu-e-gul be-buu
za-raaz-e-dahr kam-tar-go!
sabaa viiraa.n ke ab tak is zamii.n par hai.n
kisii ayyaar ke Gaarat-garo.n ke naqsh-e-paa baaqii
sabaa baaqii, na mahru-e-sabaa baaqii!
sulaimaa.n sar-ba-zaanuu
ab kahaa.n se qaasid-e-farKHanda-pai aa.e?
kahaa.n se, kis subuu se kaasa-e-piirii me.n mai aa.e?

Noon Meem Rashid
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chii۔n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

israfil ki maut

marg-e-israafiil par aa.nsuu bahaa.o
vo KHudaa.o.n kaa muqarrab vo KHudaavand-e-kalaam
saut-e-insaanii kii ruuh-e-jaavedaa.n
aasmaano.n kii nidaa-e-be-karaa.n
aaj saakit misl-e-harf-e-naa-tamaam
marg-e-israafiil par aa.nsuu bahaa.o
aa.o israafiil ke is KHvaab-e-be-ha.ngaam par aa.nsuu bahaa.e.n
aaramiida hai vo yuu.n qarnaa ke paas
jaise tuufaa.n ne kinaare par ugal Daalaa use
reg-e-saahil par chamaktii dhuup me.n chup chaap
apne suur ke pahluu me.n vo KHvaabiida hai
us kii dastaar us ke gesuu us kii riish
kaise KHaak-aaluuda hai.n
the kabhii jin kii tahe.n buud-o-nabuud
kaise is kaa suur is ke lab se duur
apnii chiiKHo.n apnii fariyaado.n me.n gum
jhilmilaa uThte the jis se dair-o-zuud
marg-e-israafiil par aa.nsuu bahaa.o
vo mujassam hamhama thaa vo mujassam zamzama
vo azal se taa abad phailii hu.ii Gaibii sadaa.o.n kaa nishaa.n
marg-e-israafiil se
halqa dar halqa farishte nauha gar
ibn-e-aadam zulf-dar-KHaak-o-nazaar
hazrat-e-yazdaa.n kii aa.nkhe.n Gam se taar
aasmaano.n kii safiir aatii nahii.n
aalam-e-laahuut se ko.ii nafiir aatii nahii.n
marg-e-israafiil se
is jahaa.n par band aavaazo.n kaa rizq
mutribo.n kaa rizq aur saazo.n kaa rizq
ab muGannii kis tarah gaa.egaa aur gaa.egaa kyaa
sun.ne vaalo.n ke dilo.n ke taar chup
ab ko.ii raqqaas kyaa thirkegaa lahraa.egaa kyaa
bazm ke farsh-o-dar-o-diivaar chup
ab KHatiib-e-shahr farmaa.egaa kyaa
masjido.n ke aastaan-o-gumbad-o-miinaar chup
fikr kaa sayyaad apnaa daam phailaa.egaa kyaa
taa.iraan-e-manzil-o-kohsaar chup
marg-e-israafiil hai
gosh-e-shanvaa kii lab-e-goyaa kii maut
chashm-e-biinaa kii dil-e-daanaa kii maut
thii isii ke dam se durvesho.n kii saarii haav-huu
ahl-e-dil kii ahl-e-dil se guftuguu
ahl-e-dil jo aaj gosha-giir-o-surma-dar-guluu
ab tanaa taa-huu bhii Gaa.eb aur yaa-rab haa bhii gum
ab galii kuucho.n kii har aavaa bhii gum
ye hamaaraa aaKHirii maljaa bhii gum
marg-e-israafiil se
is jahaa.n kaa vaqt jaise so gayaa pathraa gayaa
jaise ko.ii saarii aavaazo.n ko yaksar khaa gayaa
aisii tanhaa.ii ki husn-e-taam yaad aataa nahii.n
aisaa sannaaTaa ki apnaa naam yaad aataa nahii.n
marg-e-israafiil se
dekhte rah jaa.e.nge duniyaa ke aamir bhii
zabaa.n-bandii ke KHvaab
jis me.n majbuuro.n kii sargoshii to ho
us KHudaavandii ke KHvaab

Noon Meem Rashid
Nazm

mazdur ki bansuri

mazduur hai.n ham, mazduur hai.n ham, majbuur the ham, majbuur hai.n ham
insaaniyat ke siine me.n ristaa hu.aa ik naasuur hai.n ham
daulat kii aa.nkho.n kaa surma bantaa hai hamaarii haDDii se
mandir ke diye bhii jalte hai.n mazduur kii pighlii charbii se
ham se baazaar kii raunaq hai, ham se chehro.n kii laalii hai
jaltaa hai hamaare dil kaa diyaa duniyaa kii sabhaa ujyaalii hai
daulat kii sevaa karte hai.n Thukraa.e hu.e ham daulat ke
mazduur hai.n ham, mazduur hai.n ham sautele beTe qismat ke
sone kii chaTaa.ii tak bhii nahii.n, ham zaat ke itne heTe hai.n
ye sejo.n par sone vaale shaayad bhagvaan ke beTe hai.n
ham me.n nahii.n ko.ii tabdiilii jaa.De kii paalii raato.n me.n
baisaakh ke tapte mausam me.n, saavan kii bharii barsaato.n me.n
kap.De kii zaruurat hii kyaa hai mazduuro.n ko, haivaano.n ko
kyaa bahs hai, sardii garmii se lohe ke bane insaano.n ko
hone do charaaGaa.n mahlo.n me.n, kyaa ham ko agar diivaalii hai
mazduur hai.n ham, mazduur hai.n ham, mazduur kii duniyaa kaalii hai
mazduur ke bachche takte hai.n jab hasrat se duukaano.n ko
mazduur kaa dil detaa hai du.aa devtaa.o.n ko, bhagvaano.n ko
khaayaa miTTii ke bartan me.n, so.e to bichhaune ko tarse
muKHtaaro.n par tanqiide.n hai.n, be-chaargiyaa.n majbuuro.n kii
suukhaa chehra dahqaano.n kaa, zaKHmii piiThe.n mazduuro.n kii
vo bhuuko.n ke an-daataa hai.n, haq un kaa hai be-daad kare.n
ham kis darvaaze par jaa.e.n kis se jaa kar fariyaad kare.n
baazaar-e-tamaddun bhii un kaa duniyaa-e-siyaasat bhii un kii
maz.hab kaa iraada bhii un kaa, duniyaa-e-siyaasat bhii un kii
paaband hame.n karne ke liye sau raahe.n nikaalii jaatii hai.n
qaanuun banaa.e jaate hai.n, zanjiire.n Dhaalii jaatii hai.n
phir bhii aaGaaz kii shoKHii me.n anjaam dikhaa.ii detaa hai
ham chup hai.n lekin fitrat kaa insaaf duhaa.ii detaa hai

Jameel Mazhari
Nazm

wasiyyat

mire beTe mirii aa.nkhe.n mire baa'd un ko de denaa
jinho.n ne ret me.n sar gaa.D rakkhe hai.n
aur aise mutma.in hai.n jaise un ko
na ko.ii dekhtaa hai aur na ko.ii dekh saktaa hai
magar ye vaqt kii jaasuus nazre.n
jo piichhaa kartii hai.n sab kaa zamiiro.n ke a.ndhere tak
a.ndheraa nuur par rahtaa hai Gaalib bas savere tak
saveraa hone vaalaa hai
(2)
mire beTe mirii aa.nkhe.n mire baa'd un ko de denaa
kuchh andhe suurmaa jo tiir a.ndhere me.n chalaate hai.n
sadaa dushman kaa siina taakte KHud zaKHm khaate hai.n
lagaa kar jo vatan ko daav par kursii bachaate hai.n
bhunaa kar khoTe sikke dharm ke jo pun kamaate hai.n
jataa do un ko aise Thag kabhii pak.De bhii jaate hai.n
(3)
mire beTe unhe.n tho.Dii sii KHuddaarii bhii de denaa
jo haakim qarz le ke is ko apnii jiit kahte hai.n
jahaa.n rakhte hai.n sonaa rehn KHud bhii rehn rahte hai.n
aur is ko bhii vo apnii jiit kahte hai.n
shariik-e-jurm hai.n ye sun ke jo KHaamosh rahte hai.n
qusuur apnaa ye kyaa kam hai ki ham sab un ko sahte hai.n
(4)
mire beTe mire baa'd un ko meraa dil bhii de denaa
ki jo shar rakhte hai.n siine me.n apne dil nahii.n rakhte
hai un kii aastii.n me.n vo bhii jo qaatil nahii.n rakhte
jo chalte hai.n unhii.n rasto.n pe jo manzil nahii.n rakhte
ye majnuu.n apnii nazro.n me.n ko.ii mahmil nahii.n rakhte
ye apne paas kuchh bhii faKHr ke qaabil nahii.n rakhte
taras khaa kar jinhe.n jantaa ne kursii par biThaayaa hai
vo KHud se to na uTThe.nge unhe.n tum hii uThaa denaa
ghaTaa.ii hai jinho.n ne itnii qiimat apne sikke kii
ye zimma hai tumhaaraa un kii qiimat tum ghaTaa denaa
jo vo phailaa.e.n daaman ye vasiyyat yaad kar lenaa
unhe.n har chiiz de denaa par un ko vote mat denaa

Kaifi Azmi
Nazm

mastana hijDa

tennis ke baal
kastii a.ngiyaa me.n
ghus-ghusaa ke
pistaan ban ga.e the
shahvat ke surKH Dore
surma lagaane vaalii
aa.nkho.n me.n tan ga.e the

Saqi Faruqi
Nazm

meri shaeri

mirii shaa.erii shahsavaaro.n kii duniyaa
bahaadur jarii suurmaa aur jiyaale
qazaa jin kii Dhaale.n qadar jin ke bhaale
tahavvur ke gho.Do.n kii baage.n sambhaale
chale hai.n suu-e-razm-gah azm vaale
mire sher hai.n Gaaziyo.n ke risaale
mirii shaa.erii shahsavaaro.n kii duniyaa

Hafeez Jalandhari
Nazm

watan ka rag

vatan-parast shahiido.n kii KHaak laa.e.nge
ham apnii aa.nkh kaa surma use banaa.e.nge

Chakbast Braj Narayan
Nazm

aaj bhi

aaj bhii ashk-e-KHuu.n miraa qashqa jabiin-e-naaz kaa
aaj bhii KHaak-e-dil mirii surma-e-chashm-e-gul-ruKHaa.n

Asrarul Haq Majaz
Nazm

alamiya-e-naqd

ye hai biis sau kaa magar sau se halkaa
hai baariik itnaa ki surma kharal kaa
currency kii aa.nkho.n kaa paanii hai Dhalkaa
ye ruupya agar mil bhii jaa.e to kyaa hai

Fay Seen Ejaz
Nazm

sabza-e-begana

hasab-nasab hai na taariiKH o jaa-e-paidaa.ish
kahaa.n se aayaa thaa maz.hab na valdiyat ma.aluum
maqaamii chhoTe se KHairaatii aspataal me.n vo
kahii.n se laayaa gayaa thaa vahaa.n ye hai marquum
mariiz raato.n ko chillaataa hai ''mire andar
asiir zaKHmii parinda hai ik, nikaalo ise
guluu-girafta hai ye habs-e-dam hai KHaa.if hai
sitam-rasiida hai mazluum hai bachaa lo ise''
mariiz chiiKHtaa hai dard se karaahtaa hai
ye vietnam, kabhii dominican, kabhii kashmiir
zar-e-kasiir, siyah qaume.n, KHaam madniyaat
kasiif tel ke chashme, avaam, istehsaal
zamii.n kii maut bahaa.im, fizaa.ii ja.ng, sitam
ijaara-daarii, subuk gaam, dilrubaa, atfaal
sarod-o-naGma, adab, sher, amn, barbaadii
janaaza ishq kaa, daf kii sadaa.e.n, murda KHayaal
taraqqii, ilm ke gahvaare, ruuh kaa madfan
KHudaa kaa qatl, ayaa.n zer-e-naaf zohra jamaal
tamaam raat ye be-rabt baate.n kartaa hai
mariiz saKHt pareshaanii kaa sabab hai yahaa.n
Garaz ki jo thaa shikaayat kaa ek daftar thaa
natiija ye hai usii roz muntaqil karke
use ik aur shifaa-KHaane ko ravaana kiyaa
sunaa gayaa hai vahaa.n nafsiyaat ke maahir
tabiib haaziq o nabbaaz doctor kitne
talab kiye ga.e aur sab ne ittifaaq kiyaa
ye ko.ii zehnii maraz hai, mariiz ne shaayad
kabhii parinda ko.ii paalaa hogaa lekin vo
adam-e-tavajjohii yaa ittifaaq se yuu.nhii
bichaara mar gayaa us maut kaa asar hai ye
ajiib chiiz hai taht-e-shu.uur insaa.n kaa
ye aur kuchh nahii.n ehsaas-e-jurm hai jis ne
dil o dimaaG pe qabza kiyaa hai is darja
mariiz qaatil o mujrim samajhtaa hai KHud ko!
kisii kii raa.e thii pasmaa.nda qaum kaa ik fard
mariiz hogaa isii vaaste siyah qaume.n
Gariib ke liye ik taboo ban ga.ii.n afsos
ko.ii ye kahtaa thaa ye asal me.n hai hubb-e-vatan
mariiz chaahtaa thaa ham kafiil ho.n apne
kisii bhii qaum ke aage na haath phailaa.e.n
yahii.n pe tel ke chashme hai.n, vo kare.n daryaaft!
gumaan kuchh ko thaa ye shaKHs ko.ii shaa.er hai
jo chaahtaa thaa jahaa.n-gardii me.n guzaare vaqt
hasiin aurte.n maa.il ho.n lutf-o-aish rahe
qalam ke zor se shohrat mile zamaane me.n
zar-e-kasiir bhii haath aa.e is bahaane se
magar Gariib kii sab koshishe.n ga.ii.n naakaam
shikast-e-paiham o ehsaas-e-naa-rasaa.ii ne
ye haal kar diyaa majruuh hoga.e a.asaab
Garaz ki nukta-rassii me.n guzar gayaa sab vaqt
vo chiiKHtaa hii rahaa dard kii davaa na milii
nashist baa'd nashist aur mu.aa.ene shab o roz
inhii.n me.n vaqt guzartaa gayaa shifaa na milii
phir ek shaam vahaa.n surma-dar-guluu aa.ii
jo us ke vaaste goyaa tabiib-e-haaziq thii
kisii ne phir na sunii dard se bharii aavaaz
karaahtaa thaa jo KHaamosh ho gayaa vo saaz

Akhtarul Iman
Nazm

bachchon ka KHat chacha KHarru shechof aur mamun candy

ai chachaa KHarruu shichof ai maamuu.n candy assalaam
ek hii KHat hai ye maamuu.n aur chachaa dono.n ke naam
aap dono.n kaa adab karnaa hamaaraa farz hai
phir bhii sun liije jo chhoTii sii hamaarii arz hai
aap dono.n hai.n bahaadur suurmaa kyaa is me.n shak
ek baadal kii garaj hai ek sho.ale kii lapak
aap dono.n ke bayaa.n sun sun ke Dar jaate hai.n ham
dham se aa girte hai.n ham bachcho.n pe ye lafzo.n ke bam
Dar ke chhup jaate hai.n apnii maa.o.n ke aaGosh me.n
kaash ham behosh ho kar phir na aa.e.n hosh me.n
aap dono.n la.D pa.De to jaane kyaa ho jaa.egaa
do minute me.n is jahaa.n kaa KHaatma ho jaa.egaa
aag lag jaa.egii is duniyaa ko mar jaa.e.nge sab
jo bayaa.n dete hai.n vo KHaamosh ho jaa.e.nge lab
do minute zinda rahe.nge ham bhii marne ke liye
kaun phir baaqii rahegaa raaj karne ke liye
aisaa lagtaa hai ki kuchh din aur jiinaa hai muhaal
gar nahii.n apnaa to bachcho.n hii kaa kuchh kiije KHayaal
ik taraf nafrat kha.Dii hai duusrii jaanib Guruur
qahr kii chakkii me.n pis jaa.e.n na bachche be-qusuur
le chuke hai.n aap to jii bhar ke duniyaa ke maze
ham ko in se duur rakhnaa chaahte hai.n kis liye
gar ijaazat ho to ham bachche bhii duniyaa dekh le.n
chaar din ham bhii ye bhaaluu kaa tamaashaa dekh le.n
kuchh bhii to school aur ghar ke sivaa dekhaa nahii.n
aap kahiye aap ne duniyaa me.n kyaa dekhaa nahii.n
ja.ng mat kiije na duniyaa kii imaarat Dhaa.iye
sochiye kuchh Gaur kiije dekhiye baaz aa.iye
aap ne duniyaa sajaa.ii thii miTaane ke liye
aql kii sham.e.n jalaa.ii thii.n bujhaane ke liye
ilm-o-hikmat science ne kii thii taraqqii ke liye
aql kii sham.e.n jalaa.ii thii.n bujhaane ke liye
ilm-o-hikmat science ne kii thii taraqqii kis liye
niist-o-naabuud aaj ham kar de.n use kyaa is liye
ham ne maanaa aap kaa aapas me.n hai kuchh iKHtilaaf
ik jagah ham baiTh kar kar le.n na kyuu.n dil apne saaf
apnii is duniyaa kii haalat is qadar jab zaar hai
is ko dekhe.n chaa.nd me.n jaanaa abhii be-kaar hai
duur kiije dil se nafrat aur gale mil liijiye
zindagii kii justujuu me.n KHud-kushii mat kiijiye
ja.ng karnii hai to kiije ho magar aisii vo ja.ng
aasmaa.n bhii ja.ng aisii dekh kar ho jaa.e da.ng

Raja Mehdi Ali Khan
Nazm

udaipur

jis kii KHaatir pii ga.e jaam-e-shahaadat suurmaa
raajputo.n kaa vo ka.aba dekhne aayaa huu.n mai.n

JaiKrishn Chaudhry Habeeb
Nazm

watan

bahut aziiz hai mujh ko vatan aziiz vatan
vatan kii KHaak hai ambar mirii nigaaho.n me.n
vatan ke qatre samundar mirii nigaaho.n me.n
vatan ke zarre hai.n gauhar mirii nigaaho.n me.n
vatan ke KHaar gul-e-tar mirii nigaaho.n me.n
bahut aziiz hai mujh ko vatan aziiz vatan
mirii nigaaho.n me.n vaq.at hai tuur-e-siinaa kii
mirii nigaaho.n me.n azmat hai arsh-e-aalii kii
mirii nigaaho.n me.n izzat hai saarii duniyaa kii
magar hai KHaak-e-vatan surma chashm-e-biinaa kii
bahut aziiz hai mujh ko vatan aziiz vatan
mire vatan me.n hai gautam kaa faiz-e-ruuhaanii
mire vatan me.n hai giitaa kii sham-e-nuuraanii
mire vatan me.n hai gangaa kii paak-daamaanii
mire vatan me.n hai nuur-e-azal kii arzaanii
bahut aziiz hai mujh ko vatan aziiz vatan
vatan kii gard vatan kii zamii.n vatan kii havaa
vatan kii shaam vatan kii sahar vatan kii fazaa
vatan ke kuuche vatan ke chaman vatan kii adaa
hai yaad un kii ilaaj apne ranj-e-Gurbat kaa
bahut aziiz hai mujh ko vatan aziiz vatan
buland-rutba-e-garduu.n se kaar-gaah-e-vatan
buland-hausla-e-dil se baargaah-e-vatan
kaliim-e-dil ke liye tuur-e-jalva-gaah-e-vatan
nashaat-e-ruuh kii zaamin hai sajda-gaah-e-vatan
bahut aziiz hai mujh ko vatan aziiz vatan

Qaisar Amravatwi
Nazm

udasi

abhii ja.ng jaarii hai
jalne lagii.n bastiyaa.n
uTh rahaa hai dhu.aa.n
ek KHuu.n-rez dariyaa daraKHto.n ko sairaab kartaa hai
ja.ngal mai-e-naab se kitnaa masruur hai
ja.ngal jaarii kahaa.n hai
vo dekho pahaa.Do.n ke daro.n me.n bhagda.D machii hai
bikhartii hu.ii fauj ke suurmaa
piiTh par zaKHm khaane ke shaidaa
unhii.n kii hai miiraas saarii udaasii
jo bastii ke kheto.n me.n
gandum ke KHosho.n me.n chhup kar
shikam me.n utartii hai
taariik kamro.n me.n mu.nh ko chhupaatii hai
aavaaz de ko.ii aavaaz de
aa.o barfiilii choTii pe dau.De.n
samundar me.n Gote lagaa.e.n
ta.aaqub kare.n maut kaa
aur aisaa bhii ho
zindagii tohfa-e-ja.ng
dau.Daate gho.De se
baa.nho.n me.n le kar nikal jaa.e.n sarpaT kahii.n
do-gha.Dii ke liye
abhii ja.ng jaarii hai
ja.ngal ko sairaab kartaa hai KHuu.n-rez dariyaa
ki jangal kaa qaanuun bhii to yahii hai

Abrarul Hasan
Nazm

ek surma ke nam

aane vaale din ke aaKHir par
suuraj TuuTii hu.ii Dhaal kii tarah
ufuq par chaspaa.n ek hunuut kiyaa hu.aa sar
kisii suurmaa kaa
jo vaqt se haar gayaa!

Ahmad Javaid
Nazm

dastan-go

miir-baaqir-alii
tum ne phir biich me.n daastaa.n rok dii
shaah-e-gul-faam gunjal tilismo.n kii gutthiyo.n ko suljhaataa
sarsaar jangal ke sho.ala nafas azdaho.n se nimaTtaa
bayaabaan-e-hairat kii be-ant vus.at ko sar kar ke
pahre pe maamuur yak-chashm devo.n kii nazre.n bachaa
sabz qile kii uu.nchii kagar phaa.nd kar
mah-jabii.n ke mu.ambar shabistaan tak aan pahu.nchaa hai
aur is taraf haq-o-taaGuut madd-e-muqaabil hai.n
aa.nkhe.n jidhar dekhtii hai.n kulhaa.Do.n kii nezo.n kii barchho.n kii fasle.n kha.Dii lahlahaatii nazar aa rahii hai.n
jarii suurmaa aamne saamne hinhinaate alif hote gho.Do.n pe zaanuu jamaa.e hu.e muntazir hai.n
abhii tabl par thaap pa.Dne ko hai
aur idhar shaahzaada tilismii mahal ke hasii.n duudhiyaa burj me.n shaah-zaadii ke hajle ke andar
abhii laajvardii chhapar-khaT kaa zar-baft parda uThaa hii rahaa hai
magar miir-baaqir-alii tum ne phir biich me.n daastaa.n rok dii
raahdaarii munaqqash dar-o-baam sat-rang qaaliin billor qindiil favvaara barbat sunaataa
jharoko.n pe lahraate pardo.n kii qaus-e-quzah
memana maysara qalb saaqa jinaah
aahanii KHuud se jhaa.nktii murta.ish putliyaa.n
razm-gah kii ka.Dii dhuup me.n ek saakit phareraa
chhapar-khaT pe so.ii hu.ii shaah-zaadii ke pairo.n pe meh.ndii kii bele.n
fasaahat ke dariyaa bahaate chale jaa rahe ho
balaaGat ke motii luTaate chale jaa rahe ho
magar miir-baaqir-alii daastaa.n-go suno
daastaa.n sun.ne vaale to sadiyaa.n hu.ii.n uTh ke jaa bhii chuke hai.n
tum apne tilismaatii qisse ke pur-pech taago.n me.n aise lipaTte ga.e ho
ki tum ko KHabar hii nahii.n
saamne vaalii nukka.D pe ik aane kii biscope aa ga.ii hai

Zafar Sayyad
Nazm

maha-bhaarat

bin-laaden
toraa-boraa me.n hotaa
to aisii mahsharii maar
jis se
pahaa.D surma ban ga.e
zamiin raakh ho ga.ii
aasmaan siyaah pa.D gayaa
kab kaa KHatm ho chukaa hotaa
magar kurra-e-arz par jagah jagah
haibatnaak aatishii.n phu.nkaare.n
karbnaak dil-doz chiiKHe.n
is haqiiqat kii Gammaaz hai.n
ki bin-laaden
miraa nahii.n
zinda hai
ye phu.nkaare.n aur chiiKHe.n
is baat kii bhii daliil hai.n
ki laaden
toraa-boraa ke alaava
duusre KHitto.n me.n bhii maujuud hai
savaal ye hai ki
laaden KHatm kyuu.n nahii.n hu.aa
kyaa vo vaaqa.ii itnaa zabardast hai
ki saare jahaan kii majmuu.ii taaqat bhii
us ke aage hech hai
kyaa us ne aab-e-hayaat pii lii hai
ki kabhii mar nahii.n saktaa
kyaa vo qafas bin gayaa hai
ki apnii KHaakistar se phir paidaa ho jaataa hai
kyaa vo shud sikandarii hai
ki yaajuuj-maajuuj kii zabaane.n
use puurii tarah chaaT nahii.n paatii.n
kyaa vo raavan hai
ki us kaa ek sar afghanistan me.n
to baaqii nau duusre jahaa.n me.n
aur kyaa us ne ko.ii vardaan paa liyaa hai
ki sar kaT kar phir dha.D se aa lagtaa hai
kyaa vo bhisham-pitaama hai
ki apnii achchhaa ke baGair mar nahii.n saktaa
kyaa us ne apnaa clone banaa liyaa hai
ki us kaa KHaatma naa-mumkin ho gayaa hai
savaal ye bhii hai
ki miizaa.ilo.n kaa nishaana chuuk kyuu.n jaataa hai
kyaa un ke purze Dhiile hai.n
ki vo apnaa tavaazun kho baiThtii hai.n
be-samtii kaa shikaar ho jaatii hai.n
kyaa vo andhii hai.n
ki bin-laaden ko dekh nahii.n paatii.n
kyaa un kii biinaa.ii kamzor hai
ki vo laaden aur Gair-laaden me.n tamiiz nahii.n kar paatii.n
bin laaden ko.ii sach to nahii.n
ki shakunii kii chaal us ke aage naakaam ho jaa.e
vo laakshaa girah se bach kar nikal jaa.e
agyaat-bass se vaapas aa jaa.e
us kaa chiir-haran na ho sake
tiiro.n kii shayyaa par zinda rah jaa.e
kahii.n aisaa to nahii.n
ki missile.n use maarnaa hii nahii.n chaahatii.n
agar aisaa hai
to ye mahsharii maar
kis ke liye
ye musalsal yalGaar
kyuu.n
hairaan-o-pareshaan arjun
krukshetra me.n chiiKHtaa phir rahaa hai
magar aaj kii mahaa-bhaarat me.n
in savaalo.n kaa javaab dene vaalaa
ko.ii kirshn nahii.n
ko.ii kirshn nahii.n

Ghazanfar
Nazm

mathe ka jhumar

shahnaa.ii bajaataa hu.aa ik nanhaa saa machchhar
pahu.nchaa kisii maidaan me.n naale se nikal kar
maidaan me.n kuchh der bhaTaktaa rahaa machchhar
kuchh kaam nahii.n thaa to maTaktaa rahaa machchhar
mausuuf ne ik bail ko baiThaa hu.aa paayaa
tab dil me.n savaarii kaa zaraa shauq samaayaa
aaraam se vo baiTh gayaa sii.ng ke uupar
phir apne KHayaalaat me.n gum ho gayaa machchhar
do ghanTe guzar jaane pe mausuuf ne sochaa
is bail ko be-jurm-o-KHataa mai.n ne dabochaa
ye bail pichak jaa.egaa sochaa nahii.n mai.n ne
ab kuchlaa gayaa piisaa gayaa mere badan se
ye dabtaa rahaa surma banaa TuuTii qayaamat
lekin ko.ii shikva na kiyaa vaah sharaafat

Abdul Qadir
Nazm

samay

mere saamne
ka.ii kau.ndhtii talvaare.n TuuTii.n
dekhte dekhte
ka.ii suurmaa shahiid hu.e
KHirad-o-junuu.n kii mai.n ne
ka.ii ja.nge.n dekhii.n
mai.n ne dekhaa
surya-putra ko bebas hote
ka.ii shaaho.n ke au.ndhe pa.De parcham dekhe
ye aur baat ki
KHaamoshii merii fitrat hai
merii aa.nkhe.n lekin kabhii band nahii.n hotii.n
ba.De tariiqe se mai.n sab pe vaar kartaa huu.n
mujhe parakhne kii zaruurat kyaa hai
ki
mai.n to samay huu.n

Afroz Alam
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now