Search result for "tho.dii" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "tho.dii"

Nazm MATCHES FOR "tho.dii"

Nazm

wo jo shaer tha

haa.n, vahii, vo ajiib saa shaa.er
raat ko uTh ke kuhniyo.n ke bal
chaa.nd kii Tho.Dii chuumaa kartaa hai!!

Gulzar

Nazm

pandrah august

yahii jagah thii yahii din thaa aur yahii lamhaat
yahii.n to dekhaa thaa ik KHvaab sochii thii ik baat
musaafiro.n ke dilo.n me.n KHayaal aataa hai
har ik zamiir ke aage savaal aataa hai
vo baat yaad hai ab tak hame.n ki bhuul ga.e
vo KHvaab ab bhii salaamat hai yaa fuzuul ga.e
chale the dil me.n liye jo iraade puure hu.e
ye kaun hai ki jo yaado.n me.n charKHaa kat.taa hai
ye kaun hai jo hame.n aaj bhii bataataa hai
hai va.ada KHud se nibhaanaa hame.n agar apnaa
to kaarvaa.n nahii.n ruk paa.e bhuul kar apnaa
hai tho.Dii duur abhii sapno.n kaa nagar apnaa
musaafiro abhii baaqii hai kuchh safar apnaa

Javed Akhtar

Nazm

mohabbat

uruus-e-shab kii zulfe.n thii.n abhii naa-aashnaa KHam se
sitaare aasmaa.n ke be-KHabar the lazzat-e-ram se
qamar apne libaas-e-nau me.n begaana saa lagtaa thaa
na thaa vaaqif abhii gardish ke aa.iin-e-musallam se
abhii imkaa.n ke zulmat-KHaane se ubhrii hii thii duniyaa
mazaaq-e-zindagii poshiida thaa pahnaa-e-aalam se
kamaal-e-nazm-e-hastii kii abhii thii ibtidaa goyaa
huvaidaa thii nagiine kii tamannaa chashm-e-KHaatam se
sunaa hai aalam-e-baalaa me.n ko.ii kiimiyaa-gar thaa
safaa thii jis kii KHaak-e-paa me.n ba.Dh kar saaGar-e-jam se
likhaa thaa arsh ke paa.e pe ik iksiir kaa nusKHa
chhupaate the farishte jis ko chashm-e-ruuh-e-aadam se
nigaahe.n taak me.n rahtii thii.n lekin kiimiyaa-gar kii
vo is nusKHe ko ba.Dh kar jaantaa thaa ism-e-aazam se
ba.Dhaa tasbiih-KHvaanii ke bahaane arsh kii jaanib
tamannaa-e-dilii aaKHir bar aa.ii sa.i-e-paiham se
phiraayaa fikr-e-ajzaa ne use maidaan-e-imkaa.n me.n
chhupegii kyaa ko.ii shai baargaah-e-haq ke mahram se
chamak taare se maa.ngii chaa.nd se daaG-e-jigar maa.ngaa
u.Daa.ii tiirgii tho.Dii sii shab kii zulf-e-barham se
ta.Dap bijlii se paa.ii huur se paakiizgii paa.ii
haraarat lii nafas-haa-e-masiih-e-ibn-e-maryam se
zaraa sii phir rubuubiyat se shaan-e-be-niyaazii lii
malak se aajizii uftaadgii taqdiir shabnam se
phir in ajzaa ko gholaa chashma-e-haivaa.n ke paanii me.n
murkkab ne mohabbat naam paayaa arsh-e-aazam se
muhavvis ne ye paanii hasti-e-nau-KHez par chhi.Dkaa
girah kholii hunar ne us ke goyaa kaar-e-aalam se
hu.ii jumbish ayaa.n zarro.n ne lutf-e-KHvaab ko chho.Daa
gale milne lage uTh uTh ke apne apne hamdam se
KHiraam-e-naaz paayaa aaftaabo.n ne sitaaro.n ne
chaTak Guncho.n ne paa.ii daaG paa.e laala-zaaro.n ne

Allama Iqbal

Nazm

chand ke tamannai

shahr-e-dil kii galiyo.n me.n
shaam se bhaTakte hai.n
chaa.nd ke tamannaa.ii
be-qaraar saudaa.ii
dil-gudaaz taariikii
ruuh-o-jaa.n ko Dastii hai
ruuh-o-jaa.n me.n bastii hai
shahr-e-dil kii galiyo.n me.n
taak shab kii belo.n par
shabnamii.n sarishko.n kii
be-qaraar logo.n ne
be-shumaar logo.n ne
yaadgaar chho.Dii hai
itnii baat tho.Dii hai

Ibn۔e۔Insha

Nazm

nanhi pujaran

ik nannhii munnii sii pujaaran
patlii baa.nhe.n patlii gardan
bhor bha.e mandir aa.ii hai
aa.ii nahii.n hai maa.n laa.ii hai
vaqt se pahle jaag uThii hai
niind abhii aa.nkho.n me.n bharii hai
Tho.Dii tak laT aa.ii hu.ii hai
yuu.nhii sii lahraa.ii hu.ii hai
aa.nkho.n me.n taaro.n kii chamak hai
mukh.De pe chaa.ndii kii jhalak hai
kaisii sundar hai kyaa kahiye
nannhii sii ik siitaa kahiye
dhuup cha.Dhe taaraa chamkaa hai
patthar par ik phuul khilaa hai
chaa.nd kaa Tuk.Daa phuul kii Daalii
kam-sin siidhii bholii bhaalii
haath me.n piital kii thaalii hai
kaan me.n chaa.ndii kii baalii hai
dil me.n lekin dhyaan nahii.n hai
puujaa kaa kuchh gyaan nahii.n hai
kaisii bholii chhat dekh rahii hai
maa.n ba.Dh kar chuTkii letii hai
chupke chupke ha.ns detii hai
ha.nsnaa ronaa us kaa maz.hab
us ko puujaa se kyaa matlab
KHud to aa.ii hai mandir me.n
man us kaa hai gu.Diyaa-ghar me.n

Asrarul Haq Majaz

Nazm

janam din

saal me.n ik baar aataa hai
aate hii mujh se kahtaa hai
''kaise ho
achchhe to ho
laa.o is baat pe cake khilaa.o
raat ke khaane me.n kyaa hai
aur kaho kyaa chaltaa hai''
phir idhar udhar kii baate.n kartaa rahtaa hai
phir gha.Dii dekh ke kahtaa hai
''achchhaa to mai.n jaataa huu.n
pyaare ab mai.n
ek saal ke baa'd aa.uu.ngaa
cake banaa ke rakhnaa
saath me.n machhlii bhii khaa.u.ngaa''
aur chalaa jaataa hai!
us se mil kar
tho.Dii der mazaa aataa hai!
lekin phir mai.n sochtaa huu.n
KHaas mazaa to tab aa.egaa
jab vo aa kar
mujh ko Dhuu.nDhtaa rah jaa.egaa!!

Mohammad Alvi

Nazm

chand ke tamannai

shahr-e-dil kii galiyo.n me.n
shaam se bhaTakte hai.n
chaa.nd ke tamannaa.ii
be-qaraar saudaa.ii
dil-gudaaz taariikii
jaa.n-gudaaz tanhaa.ii
ruuh-o-jaa.n ko Dastii hai
ruuh-o-jaa.n me.n bastii hai
shahr-e-dil kii galiyo.n me.n
taak shab kii belo.n par
shabnamii.n sarishko.n kii
be-qaraar logo.n ne
be-shumaar logo.n ne
yaadgaar chho.Dii hai
itnii baat tho.Dii hai
sad-hazaar baate.n thii.n
hiila-e-shakebaa.ii
suurato.n kii zebaa.ii
qaamato.n kii ra.anaa.ii
un siyaah raato.n me.n
ek bhii na yaad aa.ii
jaa-ba-jaa bhaTakte hai.n
kis kii raah takte hai.n
chaa.nd ke tamannaa.ii
ye nagar kabhii pahle
is qadar na viiraa.n thaa
kahne vaale kahte hai.n
qarya-e-nigaaraa.n thaa
KHair apne jiine kaa
ye bhii ek saamaa.n thaa
aaj dil me.n viiraanii
abr ban ke ghir aa.ii
aaj dil ko kyaa kahiye
baa-vafaa na harjaa.ii
phir bhii log diivaane
aa ga.e hai.n samjhaane
apnii vahshat-e-dil ke
bun liye hai.n afsaane
KHush-KHayaal duniyaa ne
garmiyaa.n to jaatii hai.n
vo rute.n bhii aatii hai.n
jab maluul raato.n me.n
dosto.n kii baato.n me.n
jii na chain paa.egaa
aur uub jaa.egaa
aahaTo.n se guu.njegii
shahr-e-dil kii pinhaa.ii
aur chaa.nd-raato.n me.n
chaa.ndnii ke shaidaa.ii
har bahaane nikle.nge
aarzuu kii giiraa.ii
Dhuu.nDne ko rusvaa.ii
sard sard raato.n ko
zard chaa.nd baKHshegaa
be-hisaab tanhaa.ii
be-hijaab tanhaa.ii
shahr-e-dil kii galiyo.n me.n

Ibn۔e۔Insha

Nazm

jaane kyun aisa hun main

lambe vaqt se soch rahaa huu.n
jaane kyuu.n aisaa huu.n mai.n
milne se ghabraataa huu.n mai.n jhuuT nahii.n kah paataa huu.n
us ke shikve us kii shikaayat jhag.De se Dar jaataa huu.n
idhar-udhar kii baate.n mujh ko zaraa na KHush kar paatii hai.n
jaane kyuu.n aisaa huu.n mai.n
dost nahii.n ban paate mere
rishte nahii.n sambhalte hai.n
bejaa mohabbat bejaa takalluf
dono.n ochhe lagte hai.n
auro.n kii kamiyo.n ko bilkul
achchhaa nahii.n kah paataa huu.n
jaane kyuu.n aisaa huu.n mai.n
achchhe bhale kaamo.n me.n aksar
der bahut kar detaa huu.n
ammii se baate.n karnii huu.n beTii ke school ho jaanaa
ko.ii nayaa novel pa.Dhnaa ho ko.ii kahaanii likhnii ho
sab ko Taaltaa rahtaa huu.n
jaane kyuu.n aisaa huu.n mai.n
bhii.D bhare shahro.n se mujh ko
vahshat sii ho jaatii hai
gaa.nv jangal sunsaan jag.he.n
aksar KHush aa jaatii hai.n
ko.ii alha.D chehra dekhuu.n man ko vo bhaa jaataa hai
jaane kyuu.n aisaa huu.n mai.n
pe.Do.n ke pairaahan dekhuu.n phuulo.n kii KHushbuu ko suu.nghuu.n
ra.ng-bira.ngii titliyaa.n pak.Duu.n halkii halkii buu.nde.n bhii
ThanDii naram havaa.e.n jab jab chupke se chhuu jaatii hai.n
yaa koyal kii bolii sun luu.n man byaakul ho jaataa hai
jaane kyuu.n aisaa huu.n mai.n
naT banjaaran sanyaasii aur khel-tamaashe vaale log
kha.nDar viiraana jaltii dhuup phuulii sarso.n dhaan ke khet
laal pata.ng aur piilii mainaa indr-dhanush aur nadii kii dhaar
aate hai.n jab KHvaab me.n mere diivaana ho jaataa huu.n
jaane kyuu.n aisaa huu.n mai.n
bahut mujhe achchhaa kahte hai.n buraa bhii ko.ii kahtaa hai
saamne merii mad.h-saraa.ii piichhe gaalii detaa hai
hamdardii hai ko.ii dikhaataa ko.ii saazish kartaa hai
phir bhii chup chup saa rahtaa huu.n jaise bahut anjaan huu.n mai.n
jaane kyuu.n aisaa huu.n mai.n
tho.Dii sii aazaadii mujh ko tho.Daa bahut vaqt kaa ziyaa.n
kabhii kabhaar kii achchhii baate.n kisii kisii kaa sachchaa pyaar
chhoTii-moTii ko.ii sharaarat khilkhilaa kar ha.nsnaa bhii
ye sab KHush kar jaate hai.n jab to
lagtaa hai ki zinda huu.n
jaane kyuu.n aisaa huu.n mai.n

Abu Bakr Abbad

Nazm

in logon se KHwabon mein milna hi achchha rahta hai

tho.Dii der ko saath rahe kisii dhu.ndle shahr ke naqshe par
haath me.n haath diye ghuume kahii.n duur daraaz ke raste par
be-parda asthaano.n par do u.Dte hu.e giito.n kii tarah
Gusse me.n kabhii la.Dte hu.e kabhii lipTe hu.e pe.Do.n kii tarah
apnii apnii raah chale phir aaKHir shab ke maidaa.n me.n
apne apne ghar ko jaate do hairaa.n bachcho.n kii tarah

Muneer Niyazi

Nazm

alwida

ye maanaa zindagii ham ko bahut masruuf kar degii
hamaare zehn ko duniyaa ke andaazo.n se bhar degii
hazaaro.n mas.alo.n par daavat-e-fikr-o-nazar degii
ki jab tho.Dii sii mohlat gardish-e-shaam-o-sahar degii

Abdul Ahad Saaz

Nazm

mujhe apne jine ka haq chahiye

mujhe apne jiine kaa haq chaahiye
zamii.n jis pe mere qadam Tik sake.n
aur taaro.n bharaa kuchh falak chaahiye
mujhe apne jiine kaa haq chaahiye
nemate.n jo mere rab ne dhartii ko dii.n
saaf paanii havaa baarishe.n chaa.ndnii
ye to har ibn-e-aadam kii jaagiir hai.n
ye hamaarii tumhaarii kisii kii nahii.n
mujh ko ta.aliim sehat aur ummiid kii
saat ra.ngo.n bharii ik dhanak chaahiye
mujhe apne jiine kaa haq chaahiye
na havaa saaf hai na fazaa saaf hai
vo jo aab-e-baqaa thaa vo naa-saaf hai
zamii.n ho samundar ho yaa aasmaa.n
ik zaraa sochiye ab ki kyaa saaf hai
maut se pur-KHatar hai ye aaluudgii
dosto dil me.n tho.Dii kasak chaahiye
mujhe apne jiine kaa haq chaahiye

Amjad Islam Amjad

Nazm

shayad

mujh par ye KHauf ab chhaayaa hai
mai.n kis se milne jaa.uu.ngaa
mai.n kis ko paas bulaa.uu.ngaa
aa.ndhii hai, garm havaa hai, aag barastii hai
kuchh der hu.ii
ik suurat, shabnam sii suurat
is taptii raah se guzrii thii
do bachche pe.D ke patto.n me.n chhup kar baiThe the
ha.nste shor machaate the
ik dost puraanaa
barso.n baa'd milaa mujh ko
us jalte din kii
sub.h kuchh aisii raushan thii
jab baad-e-sabaa vaarafta-rau
KHushbu.o.n, naGmo.n, nannhii-munnii baato.n kaa
andaaz liye aa.ngan me.n chalii
mai.n zinda huu.n
ye soch ke KHush ho jaataa huu.n
vo tho.Dii der to mere paas se guzrii thii
vo mere dil me.n utrii thii
is be-mahram se mausam me.n
shaayad vo kal bhii aa.egii
shaayad vo kal bhii merii raah se guzregii

Balraj Komal

Nazm

shahr mera

shahr meraa udaas ga.ngaa saa
ko.ii bhii aa.e aur apne paap
kho ke jaataa hai dhoke jaataa hai
aag kaa khel khelne vaale
ye nahii.n jaante ki paanii kaa
aag se bair hai hamesha kaa
aag kitnii hii KHaufnaak sahii
us kii lapTo.n kii umr tho.Dii hai
aur ga.ngaa ke saaf paanii ko
aaj bahnaa hai kal bhii bahnaa hai
jaane kis kis kaa dard sahnaa hai
shahr meraa udaas ga.ngaa saa

Waseem Barelvi

Nazm

ham-sae ke nam

kuchh tum socho
kuchh mai.n sochuu.n
kyuu.n uu.nchii hai.n ye diivaare.n
kab tak ham in par sar maare.n
kab tak ye a.ndhere rahne hai.n
kiina ke ye ghere rahne hai.n
chalo apne darvaaze khole.n
aur ghar ke baahar aa.e.n ham
dil Thahre jahaa.n hai.n barso.n se
vo ik nukka.D hai nafrat kaa
kab tak is nukka.D par Thahre.n
ab is ke aage jaa.e.n ham
bas tho.Dii duur ik dariyaa hai
jahaa.n ek ujaalaa bahtaa hai
vaa.n lahro.n lahro.n hai.n kirne.n
aur kirno.n kirno.n hai.n lahre.n
in kirno.n me.n
in lahro.n me.n
ham dil ko KHuub nahaane de.n
siino.n me.n jo ik patthar hai
us patthar ko ghul jaane de.n
dil ke ik kone me.n bhii chhupii
gar tho.Dii sii bhii nafrat hai
is nafrat ko dhul jaane de.n
dono.n kii taraf se jis din bhii
iz.haar nadaamat kaa hogaa
tab jashn mohabbat kaa hogaa

Javed Akhtar

Nazm

shahkar

ab un ra.ngiin ruKHsaaro.n me.n tho.Dii zardiyaa.n bhar de
Hijaab-aaluud nazro.n me.n zaraa bebaakiyaa.n bhar de

Sahir Ludhianvi

Nazm

bachchon ki qawwali

halve ke liye phir aaj bhii ham ik aas lagaa.e baiThe hai.n
jo baat zabaa.n par laa na sake vo dil me.n chhupaa.e baiThe hai.n
tho.Dii sii miThaa.ii taaq pe thii muTThii me.n churaa.e baiThe hai.n
abbuu ke bhagaa.e bhaage the ammii ke bulaa.e baiThe hai.n
kuchh bach bhii ga.ii hai.n piTne se kuchh maar bhii khaa.e baiThe hai.n
tujh se to hame.n ko.ii shikva ai KHaaliq-e-sub.h-o-shaam nahii.n
school hii aisaa hai ki jahaa.n kuchh chain nahii.n aaraam nahii.n
is vaqt agarche sar me.n kisii ke dard baraa.e naam nahii.n
har vaqt magar pa.Dhte rahnaa kam-umro.n kaa to kaam nahii.n
sab apnii apnii kursii par sudh-budh bisraa.e baiThe hai.n
ik baar kahii.n se mil jaataa ham sab ko charaaG-e-chain agar
bas saal me.n ik din pa.Dh lete darje kii kitaabe.n far far far
phir KHvaab hii dilchaspii rahtii phir KHuub maza aataa din bhar
school me.n jaanaa kyuu.n hotaa har roz ye rahtaa kyuu.n chakkar
ummiid nahii.n lekin phir bhii ummiid lagaa.e baiThe hai.n
lekin ye zamaana ilm kaa hai ye vaqt hai aage ba.Dhne kaa
mil-jul ke kare.nge gar mehnat ho jaa.egaa har sapnaa puuraa
himmat se hu.ii hai.n taamiire.n jur.at se hu.aa hai kaam nayaa
jab azm-o-amal achchhaa hogaa achchhaa hii natiija bhii hogaa
ham log yahaa.n halva khaa kar ik sham.a jalaa.e baiThe hai.n

Shaukat Pardesi

Nazm

iztirab

jahaa.n me.n iztiraab hai
nahii.n nahii.n
jahaa.n hii iztiraab hai
hazaar-haa kavaakib-o-nujuum-haa-e-kahkashaa.n se
atomo.n kii kokh tak
madaar-dar-madaar har vajuud be-qaraar hai
ye mehr-o-maah o mushtarii se har electron tak
ye jhuum jhuum ghuumne me.n jis tarah kaa raqs hai
mujhe samajh me.n aa gayaa
jahaan teraa aks hai
vo aks jo jagah jagah qadam qadam rythm pe hai
jahaan ain sur me.n hai jahaan ain sum pe hai
jahaa.n tarannumo.n kii list me.n se intiKHaab hai
jo tujh hasii.n dimaaG ke hasiin laa-shu.uur me.n banaa ho
aisaa KHvaab hai
jahaan iztiraab hai
mujhe samajh me.n aa gayaa hai ye jahaa.n
KHalaa makaa.n zamaa.n ke chand taar se banaa hu.aa sitaar hai
use kaho kisii tarah sitaar chhe.Dtii rahe
use kaho ki tho.Dii der aur boltii rahe

Sohaib Mugheera Siddiqi

Nazm

Khaali bore mein zaKHmi billa

jaan-mohamaad-KHaan
safar aasaan nahii.n
dhaan ke is KHaalii bore me.n
jaan ulajhtii hai
paT-san kii mazbuut salaaKHe.n dil me.n ga.Dii hai.n
aur aa.nkho.n ke zard kaToro.n me.n
chaa.nd ke sikke chhan-chhan girte hai.n
aur badan me.n raat phailtii jaatii hai...
aaj tumhaarii na.ngii piiTh par
aag jalaa.e kaun
a.ngaare dahkaa.e kaun
jidd-o-johd ke
KHuunii.n phuul khilaa.e kaun
mere shola-gar panjo.n me.n jaan nahii.n
aaj safar aasaan nahii.n
tho.Dii der me.n ye pagDanDii
TuuT ke ik gande taalaab me.n gir jaa.egii
mai.n apne taabuut kii tanhaa.ii se lipaT kar
so jaa.uu.ngaa
paanii paanii ho jaa.uu.ngaa
aur tumhe.n aage jaanaa...
ik... gahrii niind me.n chalte jaanaa hai
aur tumhe.n is nazar na aane vaale bore...
...apne KHaalii bore kii pahchaan nahii.n
jaan-mohamaad-KHaan
safar aasaan nahii.n

Saqi Faruqi

Nazm

wasiyyat

mire beTe mirii aa.nkhe.n mire baa'd un ko de denaa
jinho.n ne ret me.n sar gaa.D rakkhe hai.n
aur aise mutma.in hai.n jaise un ko
na ko.ii dekhtaa hai aur na ko.ii dekh saktaa hai
magar ye vaqt kii jaasuus nazre.n
jo piichhaa kartii hai.n sab kaa zamiiro.n ke a.ndhere tak
a.ndheraa nuur par rahtaa hai Gaalib bas savere tak
saveraa hone vaalaa hai
(2)
mire beTe mirii aa.nkhe.n mire baa'd un ko de denaa
kuchh andhe suurmaa jo tiir a.ndhere me.n chalaate hai.n
sadaa dushman kaa siina taakte KHud zaKHm khaate hai.n
lagaa kar jo vatan ko daav par kursii bachaate hai.n
bhunaa kar khoTe sikke dharm ke jo pun kamaate hai.n
jataa do un ko aise Thag kabhii pak.De bhii jaate hai.n
(3)
mire beTe unhe.n tho.Dii sii KHuddaarii bhii de denaa
jo haakim qarz le ke is ko apnii jiit kahte hai.n
jahaa.n rakhte hai.n sonaa rehn KHud bhii rehn rahte hai.n
aur is ko bhii vo apnii jiit kahte hai.n
shariik-e-jurm hai.n ye sun ke jo KHaamosh rahte hai.n
qusuur apnaa ye kyaa kam hai ki ham sab un ko sahte hai.n
(4)
mire beTe mire baa'd un ko meraa dil bhii de denaa
ki jo shar rakhte hai.n siine me.n apne dil nahii.n rakhte
hai un kii aastii.n me.n vo bhii jo qaatil nahii.n rakhte
jo chalte hai.n unhii.n rasto.n pe jo manzil nahii.n rakhte
ye majnuu.n apnii nazro.n me.n ko.ii mahmil nahii.n rakhte
ye apne paas kuchh bhii faKHr ke qaabil nahii.n rakhte
taras khaa kar jinhe.n jantaa ne kursii par biThaayaa hai
vo KHud se to na uTThe.nge unhe.n tum hii uThaa denaa
ghaTaa.ii hai jinho.n ne itnii qiimat apne sikke kii
ye zimma hai tumhaaraa un kii qiimat tum ghaTaa denaa
jo vo phailaa.e.n daaman ye vasiyyat yaad kar lenaa
unhe.n har chiiz de denaa par un ko vote mat denaa

Kaifi Azmi

Nazm

amanat

ye maazii jo mirii tanhaa.iyo.n ke saath rahtaa hai
ye ik naadaan bachche kii tarah tanhaa.ii ko
ishaara kartaa hai Tho.Dii paka.D kar aur kahtaa hai
vo dekho gaa.nv ke siine pe sar rakkhe hu.e sarso.n
tumhaarii kam-sinii khelii hai jis kii god me.n barso.n
nuquush-e-paa se ab tak har galii kii maa.ng raushan hai
abhii tak god phailaa.e hu.e Dere kaa aa.ngan hai
rasiilii jaamuno.n ke pe.D kii kamzor shaaKHo.n ne
tumhaarii u.ngliyo.n kaa har nishaa.n mahfuuz rakkhaa hai
labo.n par jhiil kii gahraa.iyo.n ke hai bas ik shikva
ki jab se tum ga.e ho ko.ii bhii ham tak nahii.n pahu.nchaa
kinaare jhiil ke vo pe.D ab tak muntazir saa hai
kab aa.oge yahaa.n kap.De utroge nahaa.o.ge
ye maazii jo mirii tanhaa.iyo.n ke saath rahtaa hai
ye ik naadaan bachche kii tarah tanhaa.ii ko
ishaara kartaa hai Tho.Dii paka.D kar aur kahtaa hai
vo dekho gaa.nv ke khaliyaano.n me.n soyaa hu.aa jaaduu
nashiilii raat kii raanii vo lau detii hu.ii KHushbuu
diyo.n kaa dhiimii dhiimii raushnii denaa dhu.aa.n denaa
shikasta jho.npa.Do.n kaa zindagii ko loriyaa.n denaa
khanaktii hai.n raso.ii ghar me.n alha.D chuu.Diyaa.n ab tak
bharaa kii poliyaa.n laatii hai.n sar par buu.Dhiyaa.n ab tak
ke kinaare kachchii ii.nTo.n se banaa mandir
sulagte kanDo.n se uThtii dhu.e.n kii malgajii chaadar
hare kheto.n kii me.nDo.n par sulagte jism ke saa.e
larazte ho.nTh ghabraa.ii hu.ii saa.nso.n ke afsaane
lachaktii aam kii shaaKHo.n pe bal khaa.e hu.e jhuule
kisii kaa bhaagnaa ye kah ke ko.ii hai hame.n chhuu le
ye dekho zindagii kitnii hasii.n hai kitnii bholii hai
usii aaGosh me.n aa jaa.o jis me.n aa.nkh kholii hai
ye maazii jo mirii tanhaa.iyo.n ke saath rahtaa hai
ye kahtaa hai ki mai.n guzrii hu.ii baato.n me.n kho jaa.uu.n
tumhaarii zulf se mahkii hu.ii raato.n me.n kho jaa.uu.n
ise mai.n kaise samjhaa.uu.n ki ab ye saa.ns kaa Doraa
ik aisii dhaar kii talvaar hai jis par guzarnaa hai
mujhe aur zindagii ke zaKHm ko Taa.nke lagaanaa hai.n
ise mai.n kaise samjhaa.uu.n ki ye maazii kii tasviire.n
ab ik aisii amaanat hai.n jise mai.n rakh nahii.n sakta
agar rakkhuu.n to naakaara nikammaa kah ke ye duniyaa
mujhe Thokar lagaa de aur KHud aage ko ba.Dh jaa.e
mirii pasmaandgii par har nazar uTThe taras khaa.e
mujhe murda ajaa.ib-ghar kii aisii muurtii samjhe
jo sab ko is liye pyaarii hai ki kaafii puraanii hai
ye maazii jo mirii tanhaa.iyo.n ke saath rahtaa hai
ise mai.n kaise samjhaa.uu.n ki ye maazii kii tasviire.n
ab ik aisii amaanat hai.n jise mai.n rakh nahii.n sakta

Waseem Barelvi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now