Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "utaaruu.n"

Nazm MATCHES FOR "utaaruu.n"

Nazm

wo bagh mein mera muntazir tha

haatho.n me.n liye diye kii thaalii
us ke qadmo.n me.n jaa ke baiThii
aa.ii thii ki aartii utaaruu.n
saare jiivan ko daan kar duu.n!

Parveen Shakir
Nazm

saugandhi

jhuuT kii ye kaalii diivaare.n
jhuuT kaa farsh aur chhat hai
jhuuT kaa bistar jhuuT ke saathii
jhuuT kii har sa.ngat hai
jhuuT bichhaa.uu.n, jhuuT lapeTuu.n
jhuuT utaaruu.n, pahnuu.n
jhuuT pahan kar jism ke viiraane me.n dau.Dtii jaa.uu.n
sach ke jugnuu bol kahaa.n hai
kab se tujhe bulaa.uu.n
is lambii taariik sa.Dak par kab tak chaltii jaa.uu.n
kyuu.n nahii.n zehn kii diivaaro.n se
Takraa.uu.n, mar jaa.uu.n

Kumar Pashi
Nazm

calendar

dhyaan kii diivaaro.n se
ga.e dino.n kii yaade.n kaise utaaruu.n
is calendar me.n jitnii tasviire.n hai.n
sab mujh ko jaan se pyaarii hai.n
is me.n pahlii tasviir jo hai
ye meraa sahmaa sahmaa KHauf-zada bachpan
jis ke pas-manzar me.n jiivan
sautelii maa.o.n jaisii saffaakii se mujh ko taktaa hai
mahruumii mere gaal masal kar
roTii kaa Tuk.Daa detii hai
aur bhuuk Tahokaa detii hai
is me.n duujii tasviir jo hai
ye sabz la.Dakpan kii dahliiz pe
na.nge paa.nv
phaTe libaade
KHvaabo.n kii ujlii pariyo.n kii sa.ngat me.n
ik bachchii dau.Dii jaatii hai
ik KHvaahish u.Dtii jaatii hai
ra.ngiin Gubaaro.n kii suurat
jo haatho.n se chhuT jaate hai.n
us me.n aglii tasviir jo hai
ye bhor samay kii duurii par
ik bastii kii
jis bastii me.n
ik aa.ngan hai
jis aa.ngan me.n
ik phuul sadaa se khilaa hu.aa
ik aag musalsal raushan hai
vo aag
ki jis ko hijr kii andhii raate.n bhii kajlaa na sakii.n
vo phuul
ki jis ko dukh kii garm havaa.e.n bhii kumhlaa na sakii.n
in tasviiro.n me.n zinda hai
in tasviiro.n me.n raushan hai

Ishrat Afreen
Nazm

KHwab

hisaar-e-ra.nj me.n rahte hu.e tujhe chaahuu.n
Gubaar-e-raah-e-yaqii.n me.n sadaa tujhe dekhuu.n
jabiin-e-vaqt pe har-aan bas tujhe likkhuu.n
charaaG-e-hijr banuu.n raat-bhar tirii aa.nkho.n
ke ja.ngalo.n me.n karuu.n raushnii u.Daa.uu.n tirii
sunahrii nii.nd a.ndhero.n bhare makaano.n me.n
tire vajuud se apnaa vajuud baa.ndh ke mai.n
samundaro.n me.n karuu.n raqs jal-parii kii tarah
sunaa.uu.n shaa.irii tujh par likhii Gazaalo.n ko
banaa.uu.n lams tiraa itr me.n karuu.n niilaam
tamaam-shahr ke aage use bane jannat
har ik dariicha khule jo qabaa tirii hii mahak
uThe jahaa.n se bhii guzruu.n faqat tirii KHushbuu
kare tavaaf miraa kuu-ba-kuu faqat to ho
ai shaKHs tere jamaal-e-javaan kii saugand
dha.Dak rahaa hai hamesha mirii rago.n me.n tuu
tiraa saraapaa adab kii kitaab jaisaa hai
tujhe pa.Dhuu.n tujhe likkhuu.n tujhe sunuu.n har-vaqt
kisii sahiife kii tafsiir tarjuma tiraa jism
kisii qadiim qalam se likhaa hu.aa tiraa ism
kisii charaaG se miltaa hu.aa tiraa chehra
kisii dahaktii hu.ii shaam sii tirii aa.nkhe.n
kisii bikhartii hu.ii daastaan sii zulfe.n
kisii gulaab se aaraasta tape hu.e gaal
larazte ho.nT shikasta-suKHan Daraa lahja
chamakte haath sulagtii hu.ii jabii.n pe jamii
Gamo.n kii gard mujhe ki rahii hai chuum ke mai.n
niDhaal pair tire aable ginuu.n saare
thakaan saarii utaaruu.n tirii dabaa.uu.n sar
pilaa.uu.n sharbat-e-sandal sa.nvaar ke tire baal
karuu.n mai.n pyaar se ka.nghii likhuu.n safar pe tire
mai.n aisii nazm ko.ii jo tujhe rakhe sarsabz
tirii bujhii hu.ii aa.nkhe.n bharuu.n mai.n KHvaabo.n se
tire dukho.n kaa sukho.n se sadaa ilaaj karuu.n
sunaa.uu.n nazm tumhe.n mai.n gale lagaa ke na.ii
tumhaarii shirt pe me.n aa.nsu.o.n se kaaj karuu.n

Sadiya Safdar Saadi
Nazm

surur

dekh ke tujh ko ye aataa hai ki likkhuu.n mai.n Gazal
sochtaa huu.n mai.n yahii phir ki zaruurat kyaa hai
husn pe tere ye ra.anaa.ii tirii shaan jo hai
ye tirii zulfo.n me.n KHam jo hai saraape kii shabiih
tere naino.n kii kajii jo hai adaa.o.n pe uruuj
surKHii-e-lab ki jo mazbah hai tamannaa.o.n kaa
teraa joban ki jo sharminda-e-sad-fitna hai
sukr ye tere huzuurii kaa bayaa.n kaise ho
jis kii mastii me.n muqayyad hai.n sabhii ke az.haan
sher-o-naGme isii sarshaarii ke do-gaane hai.n
tum to KHud hii ho Gazal jis pe taGazzul hai nisaar
aur use pa.Dhnaa jo chaahuu.n to na is kaa itmaam
aur lafzo.n me.n utaaruu.n to har ik lafz suruur

Akhlaq Ahmad Ahan
Nazm

soKHta jism ka libas

libaas jal kar mire badan par chipak gayaa hai
badan musalsal sulag rahaa hai
kahii.n kahii.n bhuule bhaTke sho.ale
uThaa ke lau sar kii ab bhii
baahar ko jhuulte hai.n
jinhe.n mai.n apnii
jalii hathelii kii pusht se KHud dabaa rahaa huu.n
alaav se baahar aa ke
dahshat-zada nigaaho.n se dekhtaa huu.n
kahii.n se ab ambulance aa.egii merii jaanib
ko.ii masiihaa-nafas sambhaalegaa aage ba.Dh kar
magar yahaa.n to
ko.ii masiihaa-nafas nahii.n hai
mai.n chiiKHtaa huu.n ko.ii to hogaa
ko.ii to be-iKHtiyaar merii taraf bhii aa.e
badan se chimTii qabaa ko KHud hii
bachii khuchii u.ngliyo.n kii poro.n
se chhuu ke mahsuus kar rahaa huu.n
ki jism hai yaa jalaa hu.aa pairahan hai meraa
jo merii miTTii me.n dha.ns rahaa hai
aziyyato.n kii gavaahii detaa hai KHaliya KHaliya
jaka.D chukaa huu.n mai.n is kii parto.n me.n chaahtaa huu.n
ki khii.nch Daaluu.n
utaar phe.nkuu.n ise magar ab
ise utaaruu.n
to khaal merii hii khii.nch legaa
aur in sulagtii
bachii khuchii u.ngliyo.n kii poro.n se naaKHuno.n se
kurednaa bhii nahii.n hai bas me.n
jo pairahan thaa
vo pairahan ab miraa qafas hai
jo pairahan thaa
vo pairahan ab miraa badan hai

Faisal Azeem
Nazm

ek nazm

kis tasavvur ke raqs me.n go
tirii sadaa kaa vajuud mujh ko milaa nahii.n hai
kisii kitaab-e-kuhan me.n chaltii aziim daanish ke naqsh-e-paa me.n
tire badan kaa nishaan mujh ko milaa nahii.n hai
mai.n chaar samto.n se puuchhtaa huu.n
anaasiro.n ke taGayyuro.n se
me.n saltanat ke najuumiyo.n se
ye puuchhtaa huu.n
ki kaun hai tuu
jo mere KHvaabo.n ke silsile me.n
mire tafakkur ke raasto.n me.n
na.e tanaazo.n kaa biij bo kar chalii ga.ii hai
kahaa.n ki mujh ko pataa nahii.n hai
zamii.n ke naqshe pe aabnaa.o ke saath chal kar
kabhii sadaa se bhii tez chalte jahaaz ke daa.ere dariiche se sar lagaa kar
me.n arGavaanii sharaab thaame
dabiiz shiisho.n kii duurbii.n se
nigaah kii aaKHirii hado.n tak tire tasavvur ko dekhtaa thaa
magar KHalaa ke sivaa kahii.n kuchh nazar na aayaa
ye sochtaa huu.n ki mai.n tasavvur ke aa.iine me.n
saliis baato.n ke pairahan me.n
tujhe utaaruu.n to kis tarah mai.n
jo zindagii ke tazaad me.n hai
jo aarzuu ke fasaad me.n hai

Anees Nagi
Nazm

apna apna rang

tuu hai ik taa.nbe kaa thaal
jo suuraj kii garmii me.n saaraa saal tape
ko.ii halkaa niilaa baadal jab us par buu.nde.n barsaa.e
ek chhanaakaa ho aur buu.nde.n baadal ko u.D jaa.e.n
taa.nbaa jaltaa rahe
vo hai ik bijlii kaa taar
jis ke andar tez aur aatishnaak ik barqii-rau dau.De
jo bhii us ke paas se guzre
us kii jaanib khii.nchtaa jaa.e
us ke saath chimaT ke maut ke jhuule jhuule
barqii-rau vaisii hii sur.at aur tezii se dau.Dtii jaa.e
mai.n ho.n barg-e-shajar
suuraj chamke mai.n us kii kirno.n ko apne ruup me.n dhaaruu.n
baadal barse mai.n us kii buu.nde.n apnii rag rag me.n utaaruu.n
baad chale mai.n us kii lahro.n ko naGmo.n me.n Dhaaluu.n
aur KHizaa.n aa.e to us ke mu.nh me.n apnaa ras Tapkaa kar pe.D se utruu.n
dhartii me.n mudGam ho jaa.uu.n
dhartii jab mujh ko ugle to paudaa ban kar phuuTuu.n

Ejaz Farooqi
Nazm

samundar ka ugla hua jhag

pyaas ke
gahre dariyaa.o.n ke biich
mai.n ik jaziire me.n baiThaa
KHud apnii hii aa.nkho.n kaa
sadiyo.n se huu.n muntazir
ek din
un ko ehsaas kii naav par
bahte jharno.n ke piichhe
ravaana kiyaa thaa
ki vo miiThe paanii se
hissa miraa maa.ng laa.e.n
to mai.n qarz
tishna-labii kaa utaaruu.n
magar ab ye lagtaa hai
bahte hu.e paaniyo.n me.n kahii.n
bahte KHvaabo.n ke hamraah
aa.nkhe.n mirii bah ga.ii hai.n
ki meraa muqaddar
samundar kaa uglaa hu.aa jhaag hai

Saba Ikram
Nazm

ek nazm

aa.nkhe.n andhe ku.e.n kii maanind duur a.ndhere rasto.n par paanii ko khurach rahii hai.n
gahrii dhund kii chaadar o.Dhe kaun abhaagan
phuuT phuuT ke ro bhii na paa.ii
sabr kii roTii chup kaa saalan sab zaa.iqo.n se ka.Dvaa zahr gale ke andar
kund chhurii kii maanind aTke
kyaa bole saare lafz apne lahuu kii gardish se be-parvaa
lab par utre.n
ma.aanii ke chhilko.n ko utaaruu.n na.ngii ruuhe.n kuchh na kahe.ngii
duniyaa sab kuchh us ko
vaapas kuchh bhii na lenaa haath tumhaare sadaa hii bhare rahe.nge jazbo.n ke phuulo.n se
mat kuchh kahnaa varna saaraa malba tumhaare uupar aan giregaa
kachchii diivaaro.n ke naate tasviiro.n ke ra.ngo.n se bhii kachche
haatho.n aur zabaano.n par guzrii baato.n ke saare sukh ik ik kar ke miTte jaate hai.n
man kii saarii shaktii biich samundar Duub ga.ii hai
havaa me.n aa.nsuu-gas ke gole chhuuTe.n to sab ronaa ek hii vaqt ro le.n
tyaag kaa lambaa rasta baa.nhe.n phailaa.e apnii or bulaataa hai
aage jaa.o sab kuchh suno
aa.o is aavaaz ke raste par chalte jaa.e.n
diivaar duur se duur

Shaista Habeeb
Nazm

aadarsh

ye ik sitaaraa
jo duur a.ndhere kii god me.n jagmagaa rahaa hai
kisii kaa ghar hai
kisii kaa aabaad-o-pur-sukuu.n ghar
ye usii kaa ghar hai
jo merii maanind dar-ba-dar hai na be-sahaaraa
magar vo laakho.n zamiin-zaade
ki jin ke bosiida ghar charaaGo.n kii raushnii ko
taras rahe hai.n
ki jin ke diivaar-o-dar inhii.n mausamo.n kii shiddat
masaa.ib-o-Gam ke sail-e-be-mehr me.n
tahaffuz na de sake hai.n na de sake.nge
ki jin ke bachcho.n ne bhuuk se aur anaaj ugaane se
paa.ii fursat to dars-gaaho.n ke KHvaab dekhe
kahaa.n har ik shaKHs kaa muqaddar qalam chhu.e aur kitaab dekhe
ye KHvaab KHvaabo.n se ba.Dh na paa.e
vo likhne pa.Dhne kii aarzuu le kar mar ga.e aur pa.Dh na paa.e
magar vo laakho.n zamiin-zaade
jo shahr kii jagmagaatii sa.Dko.n pe
mauj-dar-mauj besh-qiimat javaahir-o-pairahan kii is daa.imii numaa.ish ko
roz-o-shab hasrat-o-tahayyur se dekhte hai.n
phir un kii nazre.n KHud apne malbuus par
mashiino.n ke tel ke daaG Dhuu.nDhtii hai.n
to phir ye hairat kii baat kab hai
ki mai.n bhii laakho.n zamiin-zaado.n kii tarah aabaad shaah-raaho.n pe
zindagii aur raushnii Dhuu.nDne kii KHaatir bhaTak rahaa huu.n
mai.n dar-ba-dar ho ke un ke ghar
KHushbu.o.n se aur raushnii se bhar duu.n
mai.n dar-ba-dar ho ke
un ke bachcho.n pe marhale zindagii ke
mumkin hai sahl kar duu.n
mai.n un ke KHvaabo.n ko sach kar duu.n
aur harf-o-aahang kii madad se
unhe.n naved-e-bahaar duu.n
sub.h kii tamanna dilo.n me.n un ke utaaruu.n
kaash mai.n ufuq par
sunahre alfaaz me.n bashaarat likhuu.n sahar kii
ye ho sake to mujhe tamanna nahii.n hai ghar kii

Hasan Akbar Kamal
Nazm

shayad

mire ehsaas ke is KHvaab kaa anjaam kyaa hogaa
ye mere andaruun-e-zaat ke taaraaj-gar

Jaun Eliya
Nazm

iblis ki majlis-e-shura

ibliis
ye anaasir kaa puraanaa khel ye duniyaa-e-duu.n
saakinaan-e-arsh-e-aazam kii tamannaa.o.n kaa KHuu.n
is kii barbaadii pe aaj aamaada hai vo kaarsaaz
jis ne is kaa naam rakhaa thaa jahaan-e-kaaf-o-nuu.n
mai.n ne dikhlaayaa fara.ngii ko muluukiyat kaa KHvaab
mai.n ne to.Daa masjid-o-dair-o-kaliisaa kaa fusuu.n
mai.n ne naadaaro.n ko sikhlaayaa sabaq taqdiir kaa
mai.n ne mun.im ko diyaa sarmaaya daarii kaa junuu.n
kaun kar saktaa hai is kii aatish-e-sozaa.n ko sard
jis ke ha.ngaamo.n me.n ho ibliis kaa soz-e-daruu.n
jis kii shaaKHe.n ho.n hamaarii aabiyaarii se buland
kaun kar saktaa hai is naKHl-e-kuhan ko sar-niguu.n
pahlaa mushiir
is me.n kyaa shak hai ki mohkam hai ye ibliisii nizaam
puKHta-tar is se hu.e KHuu-e-Gulaamii me.n avaam
hai azal se in Gariibo.n ke muqaddar me.n sujuud
in kii fitrat kaa taqaazaa hai namaaz-e-be-qayaam
aarzuu avval to paidaa ho nahii.n saktii kahii.n
ho kahii.n paidaa to mar jaatii hai yaa rahtii hai KHaam
ye hamaarii sa.ii-e-paiham kii karaamat hai ki aaj
suufii-o-mullaa muluukiyyat ke bande hai.n tamaam
tab-e-mashriq ke liye mauzuu.n yahii afyuun thii
varna qavvaalii se kuchh kam-tar nahii.n ilm-e-kalaam
hai tavaaf-o-haj kaa ha.ngaama agar baaqii to kyaa
kund ho kar rah ga.ii momin kii teG-e-be-niyaam
kis kii nau-miidii pe hujjat hai ye farmaan-e-jadiid
hai jihaad is daur me.n mard-e-musalmaa.n par haraam
duusraa mushiir
KHair hai sulataanii-e-jamhuur kaa GauGaa ki shar
tuu jahaa.n ke taaza fitno.n se nahii.n hai baa-KHabar
pahlaa mushiir
huu.n magar merii jahaa.n-biinii bataatii hai mujhe
jo muluukiyat kaa ik parda ho kyaa is se KHatar
ham ne KHud shaahii ko pahnaayaa hai jamhuurii libaas
jab zaraa aadam hu.aa hai KHud-shanaas-o-KHud-nigar
kaarobaar-e-shahryaarii kii haqiiqat aur hai
ye vajuud-e-miir-o-sultaa.n par nahii.n hai munhasir
majlis-e-millat ho yaa parvez kaa darbaar ho
hai vo sultaa.n Gair kii khetii pe ho jis kii nazar
tuu ne kyaa dekhaa nahii.n maGrib kaa jamhuurii nizaam
chehra raushan andaruu.n cha.ngez se taariik-tar
tiisraa mushiir
ruuh-e-sultaanii rahe baaqii to phir kyaa iztiraab
hai magar kyaa is yahuudii kii sharaarat kaa javaab
vo kaliim-e-be-tajallii vo masiih-e-be-saliib
niist paiGambar va-lekin dar baGal daarad kitaab
kyaa bataa.uu.n kyaa hai kaafir kii nigaah-e-parda-soz
mashriq-o-maGrib kii qaumo.n ke liye roz-e-hisaab
is se ba.Dh kar aur kyaa hogaa tabii.at kaa fasaad
to.D dii bando.n ne aaqaa.o.n ke KHemo.n kii tanaab
chauthaa mushiir
to.D is kaa ruumat-ul-kubraa ke aivaano.n me.n dekh
aal-e-ceaser ko dikhaayaa ham ne phir ceaser kaa KHvaab
kaun bahr-e-ruum kii maujo.n se hai lipTaa hu.aa
gaah baalad-chuu.n-sanobar gaah naalad-chuu.n-rubaab
tiisraa mushiir
mai.n to is kii aaqibat-biinii kaa kuchh qaa.il nahii.n
jis ne afra.ngii siyaasat ko kyaa yuu.n be-hijaab
paa.nchvaa.n mushiir ibliis ko muKHaatab kar ke
ai tire soz-e-nafas se kaar-e-aalam ustuvaar
tuu ne jab chaahaa kiyaa har pardagii ko aashkaar
aab-o-gil terii haraarat se jahaan-e-soz-o-saaz
ablah-e-jannat tirii ta.aliim se daanaa-e-kaar
tujh se ba.Dh kar fitrat-e-aadam kaa vo mahram nahii.n
saada-dil bando.n me.n jo mash.huur hai parvardigaar
kaam thaa jin kaa faqat taqdiis-o-tasbiih-o-tavaaf
terii Gairat se abad tak sar-niguu.n-o-sharmsaar
garche hai.n tere muriid afra.ng ke saahir tamaam
ab mujhe un kii faraasat par nahii.n hai e'tibaar
vo yahuudii fitna-gar vo ruuh-e-mazdak kaa buruuz
har qabaa hone ko hai is ke junuu.n se taar taar
zaaG dashtii ho rahaa hai ham-sar-e-shaahiin-o-charG
kitnii sur.at se badaltaa hai mizaaj-e-rozgaar
chhaa ga.ii aashufta ho kar vus.at-e-aflaak par
jis ko naadaanii se ham samjhe the ik musht-e-Gubaar
fitna-e-fardaa kii haibat kaa ye aalam hai ki aaj
kaa.npte hai.n kohsaar-o-murG-zaar-o-juu.ebaar
mere aaqaa vo jahaa.n zer-o-zabar hone ko hai
jis jahaa.n kaa hai faqat terii siyaadat par madaar

Allama Iqbal
Nazm

mohabbat ki ek nazm

mohabbat kii ek nazm
agar kabhii merii yaad aa.e
to chaa.nd raato.n kii narm dil-giir raushnii me.n
kisii sitaare ko dekh lenaa
agar vo naKHl-e-falak se u.D kar
tumhaare qadmo.n me.n aa gire
to ye jaan lenaa vo isti.aara thaa mere dil kaa
agar na aa.e
magar ye mumkin hii kis tarah hai
ki tum kisii par nigaah Daalo
to us kii diivaar-e-jaa.n na TuuTe
vo apnii hastii na bhuul jaa.e
agar kabhii merii yaad aa.e
gurez kartii havaa kii lahro.n pe haath rakhnaa
mai.n KHushbu.o.n me.n tumhe.n miluu.ngaa
mujhe gulaabo.n kii pattiyo.n me.n talaash karnaa
mai.n os-qatro.n ke aa.iino.n me.n tumhe.n miluu.ngaa
agar sitaaro.n me.n os-qatro.n me.n KHushbu.o.n me.n na paa.o mujh ko
to apne qadmo.n me.n dekh lenaa mai.n gard hotii masaafato.n me.n tumhe.n miluu.ngaa
kahii.n pe raushan charaaG dekho
to jaan lenaa ki har pata.nge ke saath mai.n bhii bikhar chukaa huu.n
tum apne haatho.n se un pata.ngo.n kii KHaak dariyaa me.n Daal denaa
mai.n KHaak ban kar samundaro.n me.n safar karuu.ngaa
kisii na dekhe hu.e jaziire pe
ruk ke tum ko sadaa.e.n duu.ngaa
samundaro.n ke safar pe niklo
to us jaziire pe bhii utarnaa

Amjad Islam Amjad
Nazm

urdu zaban

ye kaisaa ishq hai urdu zabaa.n kaa,
mazaa ghultaa hai lafzo.n kaa zabaa.n par
ki jaise paan me.n mah.ngaa qimaam ghultaa hai
ye kaisaa ishq hai urdu zabaa.n kaa....
nasha aataa hai urdu bolne me.n
gilaurii kii tarah hai.n mu.nh lagii sab istelaahe.n
lutf detii hai, halaq chhuutii hai urdu to, halaq se jaise mai kaa gho.nT utartaa hai
ba.Dii aristocracy hai zabaa.n me.n
faqiirii me.n navaabii kaa mazaa detii hai urdu
agarche ma.anii kam hote hai urdu me.n
alfaaz kii ifraat hotii hai
magar phir bhii, buland aavaaz pa.Dhiye to bahut hii mo'tabar lagtii hai.n baate.n
kahii.n kuchh duur se kaano.n me.n pa.Dtii hai agar urdu
to lagtaa hai ki din jaa.Do.n ke hai.n khi.Dkii khulii hai, dhuup andar aa rahii hai
ajab hai ye zabaa.n, urdu
kabhii kahii.n safar karte agar ko.ii musaafir sher pa.Dh de 'miir', 'Gaalib' kaa
vo chaahe ajnabii ho, yahii lagtaa hai vo mere vatan kaa hai
ba.Dii shaa.ista lahje me.n kisii se urdu sun kar
kyaa nahii.n lagtaa ki ek tahziib kii aavaaz hai, urdu

Gulzar
Nazm

Diary

ek aur safhe pe yuu.n likhaa hai:
''kabhii kabhii raat kii siyaahii,
kuchh aisii chehre pe jam sii jaatii hai
laakh rag.Duu.n,
sahar ke paanii se laakh dho.uu.n
magar vo kaalak nahii.n utartii
milogii jab tum pata chalegaa
mai.n aur bhii kaalaa ho gayaa huu.n
ye haashiye me.n likhaa hu.aa hai:
''mai.n dhuup me.n jal ke itnaa kaalaa nahii.n hu.aa thaa
ki jitnaa is raat mai.n sulag ke siyah hu.aa huu.n''

Gulzar
Nazm

ek laDki

gulaab chehre pe muskuraahaT
chamaktii aa.nkho.n me.n shoKH jazbe
vo jab bhii college kii sii.Dhiyo.n se
saheliyo.n ko liye utartii
to aise lagtaa thaa jaise dil me.n utar rahii ho
kuchh is tayaqqun se baat kartii thii jaise duniyaa
usii kii aa.nkho.n se dekhtii ho
vo apne raste me.n dil bichhaatii hu.ii nigaaho.n se ha.ns ke kahtii
tumhaare jaise bahut se la.Dko.n se mai.n ye baate.n
bahut se barso.n se sun rahii huu.n
mai.n saahilo.n kii havaa huu.n niile samundaro.n ke liye banii huu.n
vo saahilo.n kii havaa sii la.Dkii
jo raah chaltii to aise lagtaa thaa jaise dil me.n utar rahii ho
vo kal milii to usii tarah thii
chamaktii aa.nkho.n me.n shoKH jazbe gulaab chehre pe muskuraahaT
ki jaise chaa.ndii pighal rahii ho
magar jo bolii to us ke lahje me.n vo thakan thii
ki jaise sadiyo.n se dasht-e-zulmat me.n chal rahii ho

Amjad Islam Amjad
Nazm

chalo chhoDo

chalo chho.Do
mohabbat jhuuT hai
ahd-e-vafaa ik shaGl hai be-kaar logo.n kaa
talab suukhe hu.e patto.n kaa be-raunaq jaziira hai
KHalish diimak-zada auraaq par bosiida satro.n kaa zaKHiira hai
KHummaar-e-vasl taptii dhuup ke siine pe u.Dte baadalo.n kii raa.egaa.n baKHshish!
Gubaar-e-hijr-e-sahraa me.n saraabo.n se aTe mausam kaa KHamyaaza
chalo chho.Do
ki ab tak mai.n a.ndhero.n kii dhamak me.n saa.ns kii zarbo.n pe
chaahat kii binaa rakh kar safar kartaa rahaa huu.ngaa
mujhe ehsaas hii kab thaa
ki tum bhii mausamo.n ke saath apne pairahan ke rang badlogii
chalo chho.Do
vo saare KHvaab kachchii bharbharii miTTii ke be-qiimat gharau.nde the
vo saare zaa.iqe merii zabaa.n par zaKHm ban kar jam ga.e ho.nge
tumhaarii u.ngliyo.n kii naram pore.n pattharo.n par naam likhtii thii.n miraa lekin
tumhaarii u.ngliyaa.n to aadatan ye jurm kartii thii.n
chalo chho.Do
safar me.n ajnabii logo.n se aise haadse sarzad hu.aa karte hai.n sadiyo.n se
chalo chho.Do
miraa honaa na honaa ik baraabar hai
tum apne KHaal-o-KHad ko aa.iine me.n phir nikharne do
tum apnii aa.nkh kii bastii me.n phir se ik nayaa mausam utarne do
mire KHvaabo.n ko marne do
na.ii tasviir dekho
phir nayaa maktuub likho
phir na.e mausam na.e lafzo.n se apnaa silsila jo.Do
mire maazii kii chaahat raa.egaa.n samjho
mirii yaado.n se kachche raabte to.Do
chalo chho.Do
mohabbat jhuuT hai
ahd-e-vafaa ik shaGl hai be-kaar logo.n kaa

Mohsin Naqvi
Nazm

tum hi kaho kya karna hai

jab dukh kii nadiyaa me.n ham ne
jiivan kii naav Daalii thii
thaa kitnaa kas-bal baa.nho.n me.n
lohuu me.n kitnii laalii thii
yuu.n lagtaa thaa do haath lage
aur naav puuram paar lagii
aisaa na hu.aa, har dhaare me.n
kuchh an-dekhii ma.njdhaare.n thii.n
kuchh maa.njhii the anjaan bahut
kuchh be-parkhii parvaare.n thii.n
ab jo bhii chaaho chhaan karo
ab jitne chaaho dosh dharo
nadiyaa to vahii hai, naav vahii
ab tum hii kaho kyaa karnaa hai
ab kaise paar utarnaa hai
jab apnii chhaatii me.n ham ne
is des ke ghaav dekhe the
thaa vedo.n par vishvaash bahut
aur yaad bahut se nusKHe the
yuu.n lagtaa thaa bas kuchh din me.n
saarii biptaa kaT jaa.egii
aur sab ghaav bhar jaa.e.nge
aisaa na hu.aa ki rog apne
kuchh itne Dher puraane the
ved in kii Toh ko paa na sake
aur ToTke sab be-kaar ga.e
ab jo bhii chaaho chhaan karo
ab jitne chaaho dosh dharo
chhaatii to vahii hai, ghaav vahii
ab tum hii kaho kyaa karnaa hai
ye ghaav kaise bharnaa hai

Faiz Ahmad Faiz
Nazm

ret par safar ka lamha

kabhii ham KHuub-suurat the
kitaabo.n me.n basii
KHushbuu kii suurat
saa.ns saakin thii
bahut se an-kahe lafzo.n se
tasviire.n banaate the
parindo.n ke paro.n par nazm likh kar
duur kii jhiilo.n me.n basne vaale
logo.n ko sunaate the
jo ham se duur the
lekin hamaare paas rahte the
na.e din kii masaafat
jab kiran ke saath
aa.ngan me.n utartii thii
to ham kahte the
ammii titliyo.n ke par
bahut hii KHuub-suurat hai.n
hame.n maathe pe bosaa do
ki ham ko titliyo.n ke
jugnu.o.n ke des jaanaa hai
hame.n ra.ngo.n ke jugnuu
raushnii kii titliyaa.n aavaaz detii hai.n
na.e din kii masaafat
ra.ng me.n Duubii havaa ke saath
khi.Dkii se bulaatii hai
hame.n maathe pe bosaa do
hame.n maathe pe bosaa do

Ahmed Shamim
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now