Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "utran"

Nazm MATCHES FOR "utran"

Nazm

hubb-e-watan

baiThe be-fikr kyaa ho ham-vatano
uTho ahl-e-vatan ke dost bano
mard ho tum kisii ke kaam aa.o
varna khaa.o piyo chale jaa.o
jab ko.ii zindagii kaa lutf uThaa.o
dil ko dukh bhaa.iyo.n ke yaad dilaa.o
pahno jab ko.ii umda tum poshaak
karo daaman se taa garebaa.n chaak
khaanaa khaa.o to jii me.n tum sharmaa.o
ThanDaa paanii piyo to ashk bahaa.o
kitne bhaa.ii tumhaare hai.n naadaar
zindagii se hai jin kaa dil bezaar
naukaro.n kii tumhaare jo hai Gizaa
un ko vo KHvaab me.n nahii.n miltaa
jis pe tum juutiyo.n se phirte ho
vaa.n mayassar nahii.n vo o.Dhne ko
khaa.o to pahle lo KHabar un kii
jin pe biptaa hai niistii kii pa.Dii
pahno to pahle bhaa.iyo.n ko pahnaa.o
ki hai utran tumhaarii jin kaa banaav
ek Daalii ke sab hai.n barg-o-samar
hai ko.ii un me.n KHushk aur ko.ii tar
sab ko hai ek asl se paivand
ko.ii aazurda hai ko.ii KHursand
muqbilo mudabbiro.n ko yaad karo
KHush-dilo Gam-zado.n ko shaad karo
jaagne vaale Gaafilo.n ko jagaa.o
tairne vaalo Duubto.n ko tiraa.o
hai.n mile tum ko chashm o gosh agar
lo jo lii jaa.e kor-o-kar kii KHabar
tum agar haath paa.nv rakhte ho
la.ng.De luulo.n ko kuchh sahaaraa do
tandurustii kaa shukr kiyaa hai bataa.o
ra.nj biimaar bhaa.iyo.n kaa haTaa.o
tum agar chaahte ho mulk kii KHair
na kisii ham-vatan ko samjho Gair
ho musalmaan us me.n yaa hinduu
bodh maz.hab ho yaa ki ho brahamuu
ja.afrii hove yaa ki ho hanafii
jiin-mat hove yaa ho vaishnavii
sab ko miiThii nigaah se dekho
samjho aa.nkho.n kii putliyaa.n sab ko
mulk hai.n ittifaaq se aazaad
shahr hai.n ittifaaq se aabaad
hind me.n ittifaaq hotaa agar
khaate Gairo.n kii Thokare.n kyuu.nkar
qaum jab ittifaaq kho baiThii
apnii puu.njii se haat dho baiThii
ek kaa ek ho gayaa bad-KHvaah
lagii Gairo.n kii pa.Dne tum pe nigaah
phir ga.e bhaa.iyo.n se jab bhaa.ii
jo na aanii thii vo balaa aa.ii
paa.nv iqbaal ke ukha.Dne lage
mulk par sab ke haath pa.Dne lage
kabhii tuuraaniyo.n ne ghar luuTaa
kabhii durraaniyo.n ne zar luuTaa
kabhii naadir ne qatl-e-aam kiyaa
kabhii mahmuud ne Gulaam kiyaa
sab se aaKHir ko le ga.ii baazii
ek shaa.ista qaum maGrib kii
ye bhii tum par KHudaa kaa thaa in.aam
ki pa.Daa tum ko aisii qaum se kaam
varna dum maarne na paate tum
pa.Dtii jo sar pe vo uThaate tum
mulk rau.nde ga.e hai.n pairo.n se
chain kis ko milaa hai Gairo.n se

Altaf Hussain Hali
Nazm

mohabbat kya hai

mere nazdiik mohabbat ilhaamii shai hai
ye aasmaano.n se utartii hai
dil kii paak shaffaaf zamiin par
ye mohabbat azaan-e-fajr ke baad utartii hu.ii paak sahar hai
ye itnii paak hai jitnaa jis kaa taKHayyul paak hai
mohabbat is qadar paakiiza hotii hai jitnaa jis kaa KHuun paak hotaa hai
mohabbat us ko kahte hai.n jab roza-daar iftaar ke vaqt
ik paanii kaa gilaas saamne rakhe us aavaaz kaa intizaar kartaa hai ki kab hukm ho
us aavaaz kaa intizaar mohabbat hai
mohabbat vo manzil hai jis ke raaste pe chalne vaale dil aab-e-zamzam se dhule hote hai.n
mohabbat rizq hai un aa.nkho.n kaa jo mahbuub kaa diidaar baa-vazuu ho kar kartii hai.n
un logo.n ke chahaar-jaanib bahaar-e-mohabbat ke gulaab khilte hai.n jin pe KHizaa.n nahii.n aatii
mohabbat kaa gulshan
izzat kii KHushbuu se mahaktaa hai
ye mohabbat vo jazba hai jis ke tahat garmii kii shiddat pyaas kii hiddat me.n
chhaa.nv kii jagah par parindo.n ko paanii rakhaa jaa.e
ye mohabbat vo manzil hai jis pe pahu.nchne ke liye ik pyaase kutte ko paanii pilaanaa pa.Dtaa hai
mohabbat naam zabaan pe aane se pahle soch ko baa-vazuu ho jaanaa chaahiye
aur jinho.n ne naam-e-mohabbat ko utran kii tarah pahnaa hai
jinho.n ne mohabbat ko hii dhoka diyaa hai
un pe phir mohabbat azaab ban ke utartii hai
mohabbat ruuTh jaatii hai
kyuu.nki ye izzat hai
aisii izzat jo mohabbat se pahle dil kii sarzamiin pe utre
aur izzate.n buland rahe.n hamesha mohabbato.n se
jahaa.n izzat kii sar-bulandii rahegii vahaa.n mohabbat hamesha zinda rahegii
aur jin logo.n ne
mohabbat ko kaarobaar banaayaa hai
vo log mohabbat kii miim se naa-balad hai.n
un ke vaaste mohabbat naam ke chand din hote hai.n
phir bahaane aur apnii Galiiz fitrat ke pesh-e-nazar
kabhii ik dar kabhii duusraa dar
kabhii yahaa.n jhukaa kabhii vahaa.n jhukaa
are suno
mohabbat ke naam pe ta'alluqaat ko libaas se jald badalne vaale insaan
tauhiin mat karo mohabbat kii
is ilhaamii shai ko is paak jazbe ko paak rahne do
aur yaad rakho tauhiin-e-mohabbat ke murtakib
tum se to ab nafrat bhii mere shaayaan-e-shaan nahii.n

Omainuz Zahra Sayyad
Nazm

kaTas

kamaal karte hai.n ishq vaale
ye daastaa.n hai quruun-e-uula se peshtar kii
jab ek la.Dkii se devtaa ne birog paayaa
to aa.nsuu.o.n kaa mahal banaayaa
ye ishq thaa so
zamii.n kii buniyaad hil ga.ii thii
sa.Dak ke taaro.n se mil ga.ii thii
ye ishq thaa so
na us ne lamho.n se maat khaa.ii
na us ko sadiyaa.n bigaa.D paa.ii.n
kaTaas ab bhii vahii.n kha.Daa hai
har ek patthar gavaah ban kar vahii.n pa.Daa hai
ye KHaak pahle hii muztarib thii
ab aur hairaan ho ga.ii hai
pujaariyo.n ke nafas kii utran
havaa musalmaan ho ga.ii hai
mohabbato.n se bhare sahiife to taaqcho.n me.n sajaa diye hai.n
aqiidato.n ne shivaa ke aa.nsuu vuzuu ke qaabil banaa diye hai.n
nasiib vaale hii aa.nsuu.o.n se vuzuu kare.nge
qabaa-e-girya rafuu kare.nge
kaTaas apne hii aap me.n gum
adam se ilhaaq kar rahaa hai
ka.ii mazaahib kii lau jalaa.e
sadaa-e-ilhaad kar rahaa hai
aur is jhamele ke paas baiThaa
ko.ii tumhe.n yaad kar rahaa hai
ajab masaafat se chuur hai ye
ajiib fariyaad kar rahaa hai
ise nikaalo ye is jagah kaa
sukuun barbaad kar rahaa hai
kamaal karte hai.n ishq vaale
ye daastaa.n hai quruun-e-uula se peshtar kii jab ek la.Dkii
se devtaa ne birog paayaa
to aa.nsuu.o.n kaa mahal banaayaa

Ikram Basra
Nazm

ai zamistan ki hawa tez na chal

ai zamistaa.n kii hu.aa tez na chal
is qadar tez na ho mauj-e-subuk-KHez kii rau
kahii.n ashjaar ke KHemo.n kii tanaabe.n kaT jaa.e.n
zard patte hai.n abhii gulshan-e-hastii kaa si.nghaar
kah rahii hai ye abhii ahd-e-guzashta kii bahaar
ra.ng-rafta huu.n magar aaj bhii tasviir me.n huu.n
murtasim hai.n mirii shaaKHo.n pe mirii yaad ke chaa.nd
mai.n hanuuz apne KHayaalaat kii zanjiir me.n huu.n
abhii patto.n pe chamak uThtaa hai ra.ngo.n kaa Gubaar
abhii shaaKHo.n me.n lahak jaatii hai bulbul kii pukaar
barg-riizaa.n se kaho shahar se baahar Thahre
shahar ke baaG se bustaan-e-dabistaa.n se pare
barg-e-larzaa.n me.n ta.Daptaa hai abhii zauq-e-numuu
par-e-taa.uus me.n hai raqs kii KHvaahish ab bhii
abhii kartaa hai chaman chaak-e-garebaa.n ko rafuu
yuu.n to qaanuun hai.n fitrat ke aTal
ai zamistaa.n kii havaa tez na chal
sa.ii-e-malbuus me.n hai.n kitne nago.n baKHt-e-zabuu.n
zindagii jin ke liye sahn-e-saman-posh nahii.n
duur ke des se aa.ii hu.ii utran ke liye
mard-o-zan kuucha-o-baazaar me.n rusvaa hai.n abhii
jaise ho qahr-e-mujassam tirii yaKH-basta jabii.n
terii aahaT me.n ho jaise kisii dahshat kaa payaam
terii dastak se larazte hai.n makaa.n aur makii.n
vo makaa.n jin ke dar-o-baam dar-o-baam nahii.n
vo makii.n jin ke liye ishrat-e-ayyaam nahii.n
jin ke lahjo.n me.n nahii.n lazzat-e-guftaar kaa ra.ng
jin kii aavaaz me.n hai.n tiira-nasiibii ke azaab
jin se tahziib liyaa kartii hai jiine kaa KHiraaj
jin kii har saa.ns hai andesha-e-fardaa kaa nisaab
is qadar tund na ho dekh sambhal
ai zamistaa.n kii hu.aa tez na chal

Aslam Ansari
Nazm

tanhai mera libas hai

rishte mere man kii
utran hai
qurbato.n kaa lams
daa.imii nahii.n
tanhaa.ii kaa lams
sachchaa hai
par man paglaa hai
bachche jaise rotaa hai
mohabbat pahannaa chaahtaa hai
dil kii mohabbat
raat ko sa.Dko.n pe bikte
Gubaaro.n jaise hotii hai
jis kii gas
aadhii raat ko ghar pahu.nchne tak
nikal jaatii hai
jaantii huu.n
par man paglaa hai
bachche jaise rotaa hai

Shabnam Ashai
Nazm

ye kaisa raegan sa

intizaar sau.npaa hai tum ne
na ko.ii harf-e-dildaarii
ki jis ko dohraate hu.e
sabhii phiike se din
kaasnii belo.n se
Dhak jaa.e.n
na ko.ii lams kii utran
ki
jis ko o.Dh ke
mai.n shaam ke pahluu me.n
baiThii tumhaare vasl
ke kuchh KHvaab hii
kaa.Dhuu.n
na ko.ii bosa-e-ummiid
mere maathe pe mahkaa
ki jis kii lau me.n
merii nazme.n
raat bhar raqs kartii ho.n
tumhe.n yaad kartii ho.n
mire mahbuub
kaisaa raa.egaa.n saa
intizaar sau.npaa hai

Sania Shaikh
Nazm

goshwara

ek nazm
vaqt kii jeb kaaTii ga.ii aur churaa.ii hu.ii saa.ate.n
zindagaanii ke niilaam-ghar me.n mohabbat kii utran kaa bhaav
chukaane me.n KHarchii ga.ii.n
ham ne fursat kaa sonaa luTaa kar
vo rishte KHariide
jinhe.n ghar ke sanduuqche kaa
tahaffuz mayassar nahii.n aa sakaa
kab talak aise rishte girah me.n liye ghuumnaa
be-KHayaalii me.n tabdiil hote hu.e pairahan me.n
kisii din ye saamaan rah jaa.egaa
dil ke kone me.n matruuk chiizo.n ke
bikhre hu.e Dher par
cigareto.n se udhaaraa dhu.aa.n khii.nch kar
be-nishaanii kii chaadar cha.Dhaane ko jitnaa samay chaahiye
vo hathelii kii uljhii lakiiro.n se la.Dne me.n lag jaa.egaa
in KHayaalo.n kii laa-yaaniyat
surKH aa.nkho.n me.n ghulte hu.e be-vaj.h rat-jago.n
phepha.Do.n me.n utarte hu.e zahr me.n dafn hai
jaise gaa.nv se aaya hu.aa ik musaafir
ba.De shahr me.n
oh ba.De shahr se yaad aaya
savaa tiin bajne ko hai.n in churaa.ii hu.ii saa.ato.n se agar kuchh bachaa hai use poTlii me.n rakho

Adnan Mohsin
Nazm

purane coat

haathii kaan galaa hai jis kaa
astar udh.Daa daaman khiskaa
aaKHir tum kyaa doge us kaa
itne kam silvaa.ii de do
paa.nch nahii.n to Dhaa.ii de do
fii silvaT nau paa.ii de do
ye lo ghunDii kaise vaalaa
aage piichhe ga.Dba.D-jhaalaa
jaahil hai naa hindii kaalaa
buDDhaa tuu kyaa soch rahaa hai
mo.nchho.n ko kyuu.n noch rahaa hai
shaayad jaa.Daa kuuch rahaa hai
aa sardii se pinD kaTaa le
ko.ii uunii coat chukaa le
us din ko bhagvaan uThaa le
jis din ye pahnaavaa chho.Duu.n
janm ke saathii se mu.nh mo.Duu.n
naa-samjho.n se kyaa sar pho.Duu.n
rassii jis tahziib kii Dhiilii
botal ho jis chaak me.n giilii
sab jaltii hai suukhii giilii
ye jis kii bhii utran hogii
yaa bha.ngan yaa kanchan hogii
beva baa.njh girahstan hogii
german aurat kaa har daaman
jab jhaTkaa khaa.e kaa kundan
bilke.nge be-gintii jiivan
merii ye khaddar kii pinDii
uun se uu.nchii ruu.ii kii manDii
un coato.n ko kaalii jhan.Dii

Shaad Aarfi
Nazm

utran pahnoge

utran pahnoge
ghaaT ghaaT se dhul kar aa.ii
utran pahnoge
jaane kis kis zaat ke lams hai.n
is utran ke baKHiyo.n me.n
kis kis nasl kii diimak is ke daaman se hai lagii hu.ii
kitne ra.ng-rezo.n ne us par
apne rang cha.Dhaa.e hai.n
kitnii baar kii dhulii hu.ii
jagah jagah se chhidii hu.ii
anjaane ho.nTo.n ke nam se dhaagaa dhaagaa ladii hu.ii
sau sau tarah kii KHushbu.o.n me.n basii hu.ii
utran pahnoge

Ayub Khawar
Nazm

mujhe mojiz-bayan kar do

mirii atraaf me.n bikhre hu.e raushan-jabii.n lafzo
mujhe Dhuu.nDo
ajab aashob hai
mere qalam me.n raushnaa.ii suukhtii jaatii hai
aur soche.n na.ii ashkaal me.n Dhalne se qaasir hai.n
jo sochuu.n likh nahii.n paataa
jo likkhuu.n vo cliche hai
muravvaj isti.aaro.n aur tashbiiho.n kii utran se
mirii nazmo.n ke pairaahan nahii.n bante
ta.affun se bhare pairaaya-e-iz.haar se
iblaaG kaa siina nahii.n khultaa
mai.n likhne baiThtaa huu.n
to mire haatho.n kii larzish saath hotii hai
agar kuchh bolnaa chaahuu.n
to luknat rok letii hai
kisii vijdaan kii suurat
kisii ilhaam kii suurat
dar-e-ib.haam ko kholo
mire afkaar kaa kashkol
apnii jagmagaatii raushnii se is tarah bhar do
ki mere zehn ke aa.ngan me.n
puure chaa.nd kii raunaq utar aa.e
jo ab tak maa-varaa-e-saut hai
us ko ayaa.n kar do
mujhe mojiz-bayaa.n kar do

Salman Basit
Nazm

bichhDa hua maujud hai

tere kaaTe hu.e mausam se ko.ii dhajjii agar
haath aa.e to zaKHiira use kar letaa huu.n
terii utran se uThaataa huu.n na.ii dhaj kaa javaaz
tere dekhe hu.e KHvaabo.n pe mujhe nii.nd aa.e

Muneer Jafri
Nazm

faqiron ki basti

ye KHairaat hii kii karaamat hai aaqaa
ye parde haTaa de
ba.De baadshaaho.n kii sa.ngat hai
saalaana KHairaat kaa mo.aamla hai
to tamGe sajaa mere aaqaa tirii haazirii hai
vo tamGe jo mashriq ke malbuus par tanz hai.n
vo tamGe jihaado.n ke jin ke patte jel-KHaano.n me.n fariyaad-KHvaa.n hai.n
vo ja.nge.n nishaa.n jin ke sarhad ke andar kahii.n dafan hai.n
ye KHairaat hii kii karaamat hai
utran se maanuus maahaul me.n
riit aisii chalii hai ki har marhale fikr me.n
sirf imdaad imdaad kii gu.Dgu.Daatii sadaa hai
har ik fard KHairaat ke shauq me.n sargiraa.n hai
ye parde haTaa mere aaqaa
ki tuu bhii faqiir aur mai.n bhii

Abrarul Hasan
Nazm

kuDe-dan

khule niile aakaash kii katran
pairaahan-e-KHvaab kii dhajjiyaa.n
shiisha-e-dil dil kii kirchiyaa.n
reshmii jismo.n kii utran
daastaan-e-ishq ke pareshaa.n auraaq
visaal-e-yaar ke kaTe-phaTe aur baasii aKHbaar
rusvaa.ii kii diivaaro.n ke gande ishtihaar
mailaa kuchailaa dard
phaTaa puraanaa firaaq
husn-o-ra.anaa.ii ke shikasta jaam
bhuule-bisre naam
gahrii kaalii aa.nkho.n ke bujhe charaaG
daaman-e-yaad ke bad-numaa daaG
saarii chiize.n behis duniyaa ne
mujh ko kuu.De-daan samajh kar
mere andar
Daal dii hai.n

Ehtisham Akhtar
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

daraKHt-e-zard

nahii.n ho tum mire aur meraa fardaa bhii nahii.n meraa
so mai.n ne saahat-e-diiroz me.n Daalaa hai ab Deraa
mire diiroz me.n zahr-e-halaahal teG-e-qaatil hai
mire ghar kaa vahii sarnaam-tar hai jo bhii bismil hai
guzasht-e-vaqt se paimaan hai apnaa ajab saa kuchh
so ik ma.amuul hai imraan ke ghar kaa ajab saa kuchh

Jaun Eliya
Nazm

tarana-e-hindi

saare jahaa.n se achchhaa hindostaa.n hamaaraa
ham bulbule.n hai.n is kii ye gulsitaa.n hamaaraa
Gurbat me.n ho.n agar ham rahtaa hai dil vatan me.n
samjho vahii.n hame.n bhii dil ho jahaa.n hamaaraa
parbat vo sab se uu.nchaa ham-saaya aasmaa.n kaa
vo santarii hamaaraa vo paasbaa.n hamaaraa
godii me.n kheltii hai.n is kii hazaaro.n nadiyaa.n
gulshan hai jin ke dam se rashk-e-jinaa.n hamaaraa
ai aab-ruud-e-ga.ngaa vo din hai yaad tujh ko
utraa tire kinaare jab kaarvaa.n hamaaraa
maz.hab nahii.n sikhaataa aapas me.n bair rakhnaa
hindii hai.n ham vatan hai hindostaa.n hamaaraa
yuunaan o misr o ruumaa sab miT ga.e jahaa.n se
ab tak magar hai baaqii naam-o-nishaa.n hamaaraa
kuchh baat hai ki hastii miTtii nahii.n hamaarii
sadiyo.n rahaa hai dushman daur-e-zamaa.n hamaaraa
'iqbaal' ko.ii mahram apnaa nahii.n jahaa.n me.n
maaluum kyaa kisii ko dard-e-nihaa.n hamaaraa

Allama Iqbal
Nazm

tu hindu banega na musalman banega

qudrat ne to baKHshii thii hame.n ek hii dhartii
ham ne kahii.n bhaarat kahii.n iiraan banaayaa

Sahir Ludhianvi
Nazm

shishon ka masiha koi nahin

shaayad ki inhii.n Tuk.Do.n me.n kahii.n
vo saaGar-e-dil hai jis me.n kabhii
sad-naaz se utraa kartii thii
sahbaa-e-Gam-e-jaanaa.n kii parii

Faiz Ahmad Faiz
Nazm

ai mere sare logo

mirii bastii se pare bhii mire dushman ho.nge
par yahaa.n kab ko.ii aGyaar kaa lashkar utraa
aashnaa haath hii aksar mirii jaanib lapke
mere siine me.n sadaa apnaa hii KHanjar utraa

Ahmad Faraz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now