Metaphors of Karbala in Urdu Shayari

mere siine se zarā kaan lagā kar dekho

saañs chaltī hai ki zanjīr-zanī hotī hai

mere sine se zara kan laga kar dekho

sans chalti hai ki zanjir-zani hoti hai

qatl-e-husain asl meñ marg-e-yazīd hai

islām zinda hotā hai har karbalā ke ba.ad

qatl-e-husain asl mein marg-e-yazid hai

islam zinda hota hai har karbala ke baad

havā-e-zulm sochtī hai kis bhañvar meñ aa ga.ī

vo ik diyā bujhā to saiñkaḌoñ diye jalā gayā

hawa-e-zulm sochti hai kis bhanwar mein aa gai

wo ek diya bujha to sainkaDon diye jala gaya

buland hāthoñ meñ zanjīr Daal dete haiñ

ajiib rasm chalī hai duā na māñge koī

buland hathon mein zanjir Dal dete hain

ajib rasm chali hai dua na mange koi

pā-ba-gil sab haiñ rihā.ī kī kare tadbīr kaun

dast-basta shahr meñ khole mirī zanjīr kaun

pa-ba-gil sab hain rihai ki kare tadbir kaun

dast-basta shahr mein khole meri zanjir kaun

salām un pe tah-e-teġh bhī jinhoñ ne kahā

jo terā hukm jo terī razā jo tū chāhe

salam un pe tah-e-tegh bhi jinhon ne kaha

jo tera hukm jo teri raza jo tu chahe

havā-e-kūfa-e-nā-mehrbāñ ko hairat hai

ki log ḳhema-e-sabr-o-razā meñ zinda haiñ

hawa-e-kufa-e-na-mehrban ko hairat hai

ki log KHema-e-sabr-o-raza mein zinda hain

dil hai pyāsā husain ke mānind

ye badan karbalā kā maidāñ hai

dil hai pyasa husain ke manind

ye badan karbala ka maidan hai

jab bhī zamīr-o-zarf kā saudā ho dosto

qaa.em raho husain ke inkār kī tarah

jab bhi zamir-o-zarf ka sauda ho dosto

qaem raho husain ke inkar ki tarah

husain-ibn-e-alī karbalā ko jaate haiñ

magar ye log abhī tak gharoñ ke andar haiñ

husain-ibn-e-ali karbala ko jate hain

magar ye log abhi tak gharon ke andar hain

saañs letā huuñ to rotā hai koī siine meñ

dil dhaḌaktā hai to mātam kī sadā aatī hai

sans leta hun to rota hai koi sine mein

dil dhaDakta hai to matam ki sada aati hai

sāhil tamām ashk-e-nadāmat se aT gayā

dariyā se koī shaḳhs to pyāsā palaT gayā

sahil tamam ashk-e-nadamat se aT gaya

dariya se koi shaKHs to pyasa palaT gaya

tanhā tire mātam meñ nahīñ shām-e-siyah-posh

rahtā hai sadā chaak garebān-e-sahar bhī

tanha tere matam mein nahin sham-e-siyah-posh

rahta hai sada chaak gareban-e-sahar bhi

kal jahāñ zulm ne kaaTī thiiñ saroñ kī fasleñ

nam huī hai to usī ḳhaak se lashkar niklā

kal jahan zulm ne kaTi thin saron ki faslen

nam hui hai to usi KHak se lashkar nikla

tanhā khaḌā huuñ maiñ bhī sar-e-karbalā-e-asr

aur sochtā huuñ mere taraf-dār kyā hue

tanha khaDa hun main bhi sar-e-karbala-e-asr

aur sochta hun mere taraf-dar kya hue

ishrat-e-qatl-gah-e-ahl-e-tamannā mat pūchh

īd-e-nazzāra hai shamshīr kā uryāñ honā

ishrat-e-qatl-gah-e-ahl-e-tamanna mat puchh

id-e-nazzara hai shamshir ka uryan hona

tum jo kuchh chāho vo tārīḳh meñ tahrīr karo

ye to neza hī samajhtā hai ki sar meñ kyā thā

tum jo kuchh chaho wo tariKH mein tahrir karo

ye to neza hi samajhta hai ki sar mein kya tha

zavāl-e-asr hai kuufe meñ aur gadāgar haiñ

khulā nahīñ koī dar bāb-e-iltijā ke sivā

zawal-e-asr hai kufe mein aur gadagar hain

khula nahin koi dar bab-e-iltija ke siwa

sīna-kūbī se zamīñ saarī hilā ke uTThe

kyā alam dhuum se tere shohadā ke uTThe

sina-kubi se zamin sari hila ke uTThe

kya alam dhum se tere shohada ke uTThe

'mus.hafī' karb-o-balā kā safar āsān nahīñ

saiñkaḌoñ basra-o-baġhdād meñ mar jaate haiñ

'mushafi' karb-o-bala ka safar aasan nahin

sainkaDon basra-o-baghdad mein mar jate hain