tū ne kahā na thā ki maiñ kashtī pe bojh huuñ

āñkhoñ ko ab na Dhāñp mujhe Dūbte bhī dekh

tu ne kaha na tha ki main kashti pe bojh hun

aankhon ko ab na Dhanp mujhe Dubte bhi dekh

bad-qismatī ko ye bhī gavārā na ho sakā

ham jis pe mar miTe vo hamārā na ho sakā

bad-qismati ko ye bhi gawara na ho saka

hum jis pe mar miTe wo hamara na ho saka

koī bhūlā huā chehra nazar aa.e shāyad

ā.īna ġhaur se tū ne kabhī dekhā hī nahīñ

koi bhula hua chehra nazar aae shayad

aaina ghaur se tu ne kabhi dekha hi nahin

aaj bhī shāyad koī phūloñ kā tohfa bhej de

titliyāñ mañDlā rahī haiñ kāñch ke gul-dān par

aaj bhi shayad koi phulon ka tohfa bhej de

titliyan manDla rahi hain kanch ke gul-dan par

socho to silvaToñ se bharī hai tamām ruuh

dekho to ik shikan bhī nahīñ hai libās meñ

socho to silwaTon se bhari hai tamam ruh

dekho to ek shikan bhi nahin hai libas mein