Today's top 5 Urdu Shayari

badan meñ jaise lahū tāziyāna ho gayā hai

use gale se lagā.e zamāna ho gayā hai

badan mein jaise lahu taziyana ho gaya hai

use gale se lagae zamana ho gaya hai

dil ābād kahāñ rah paa.e us kī yaad bhulā dene se

kamra vīrāñ ho jaatā hai ik tasvīr haTā dene se

dil aabaad kahan rah pae us ki yaad bhula dene se

kamra viran ho jata hai ek taswir haTa dene se

husn ke samajhne ko umr chāhiye jānāñ

do ghaḌī kī chāhat meñ laḌkiyāñ nahīñ khultīñ

husn ke samajhne ko umr chahiye jaanan

do ghaDi ki chahat mein laDkiyan nahin khultin

mire junūñ kā natīja zarūr niklegā

isī siyāh samundar se nuur niklegā

mere junun ka natija zarur niklega

isi siyah samundar se nur niklega

kabhī kisī ko mukammal jahāñ nahīñ miltā

kahīñ zamīn kahīñ āsmāñ nahīñ miltā

kabhi kisi ko mukammal jahan nahin milta

kahin zamin kahin aasman nahin milta