کسی کے تم ہو کسی کا خدا ہے دنیا میں

مرے نصیب میں تم بھی نہیں خدا بھی نہیں

تو کہانی ہی کے پردے میں بھلی لگتی ہے

زندگی تیری حقیقت نہیں دیکھی جاتی

زندگی کیا ہوئے وہ اپنے زمانے والے

یاد آتے ہیں بہت دل کو دکھانے والے

یہ دشت وہ ہے جہاں راستہ نہیں ملتا

ابھی سے لوٹ چلو گھر ابھی اجالا ہے

کون جینے کے لیے مرتا رہے

لو، سنبھالو اپنی دنیا ہم چلے

بند کر دے کوئی ماضی کا دریچہ مجھ پر

اب اس آئینے میں صورت نہیں دیکھی جاتی

دشمن جاں ہی سہی ساتھ تو اک عمر کا ہے

دل سے اب درد کی رخصت نہیں دیکھی جاتی

زندگی چھین لے بخشی ہوئی دولت اپنی

تو نے خوابوں کے سوا مجھ کو دیا بھی کیا ہے

آ کہ میں دیکھ لوں کھویا ہوا چہرہ اپنا

مجھ سے چھپ کر مری تصویر بنانے والے

ہم نے مانا اک نہ اک دن لوٹ کے تو آ جائے گا

لیکن تجھ بن عمر جو گزری کون اسے لوٹائے گا

بہت قریب رہی ہے یہ زندگی ہم سے

بہت عزیز سہی اعتبار کچھ بھی نہیں

مرا فسانہ ہر اک دل کا ماجرا تو نہ تھا

سنا بھی ہوگا کسی نے تو کیا سنا ہوگا

یہ بے سبب نہیں آئے ہیں آنکھ میں آنسو

خوشی کا لمحہ کوئی یاد آ گیا ہوگا

مجھے اب دیکھتی ہے زندگی یوں بے نیازانہ

کہ جیسے پوچھتی ہو کون ہو تم جستجو کیا ہے

بہیں نہ آنکھ سے آنسو تو نغمگی بے سود

کھلیں نہ پھول تو رنگینئ فغاں کیا ہے

میں سفر میں ہوں مگر سمت سفر کوئی نہیں

کیا میں خود اپنا ہی نقش کف پا ہوں کیا ہوں

نگاہیں منتظر ہیں کس کی دل کو جستجو کیا ہے

مجھے خود بھی نہیں معلوم میری آرزو کیا ہے

کس جرم آرزو کی سزا ہے یہ زندگی

ایسا تو اے خدا میں گنہ گار بھی نہیں

کس کو فرصت تھی کہ اخترؔ دیکھتا میری طرف

میں جہاں جس بزم میں جب تک رہا تنہا رہا

بند رکھوگے دریچے دل کے یارو کب تلک

کوئی دستک دے رہا ہے اٹھ کے دیکھو تو سہی

اسی موڑ پر ہم ہوئے تھے جدا

ملے ہیں تو دم بھر ٹھہر جائیے

زمانہ عشق کے ماروں کو مات کیا دے گا

دلوں کے کھیل میں یہ جیت ہار کچھ بھی نہیں

ہر موج گلے لگ کے یہ کہتی ہے ٹھہر جاؤ

دریا کا اشارہ ہے کہ ہم پار اتر جائیں

چراغ لے کے اسے ڈھونڈنے چلا ہوں میں

جو آفتاب کی مانند اک اجالا ہے

ناامیدی حرف تہمت ہی سہی کیا کیجئے

تم قریب آتے نہیں ہو اور خدا ملتا نہیں

کھلی آنکھوں نظر آتا نہیں کچھ

ہر اک سے پوچھتا ہوں وہ گیا کیا

یہ بستی اس قدر سنسان کب تھی

دل شوریدہ تھک کر سو گیا کیا

سفر ہی شرط سفر ہے تو ختم کیا ہوگا

تمہارے گھر سے ادھر بھی یہ راستہ ہوگا