افق کے آخری منظر میں جگمگاؤں میں

حصار ذات سے نکلوں تو خود کو پاؤں میں

کچھ تعلق بھی نہیں رسم جہاں سے آگے

اس سے رشتہ بھی رہا وہم و گماں سے آگے

ضمیر و ذہن میں اک سرد جنگ جاری ہے

کسے شکست دوں اور کس پہ فتح پاؤں میں

میں بجھ گیا تو کون اجالے گا تیرا روپ

زندہ ہوں اس خیال میں مرتا ہوا سا میں

اجملؔ سفر میں ساتھ رہیں یوں صعوبتیں

جیسے کہ ہر سزا کا سزا وار میں ہی تھا

لہو رشتوں کا اب جمنے لگا ہے

کوئی سیلاب میرے گھر بھی آئے

کوئی صدا کوئی آوازۂ جرس ہی سہی

کوئی بہانہ کہ ہم جاں نثار کرتے رہیں

کس سے میں ان کا ٹھکانا پوچھتا

سامنے خالی مکاں تھا اور میں

زندہ کوئی کہاں تھا کہ صدقہ اتارتا

آخر تمام شہر ہی خاشاک ہو گیا

یہ غم مرا ہے تو پھر غیر سے علاقہ کیا

مجھے ہی اپنی تمنا کا بار ڈھونے دے

کہتے ہیں کہ اٹھنے کو ہے اب رسم محبت

اور اس کے سوا کوئی تماشا بھی نہیں ہے

اسی کے ہونٹوں کے پھول باب قبول چومیں

سو ہم اٹھا لائیں اب کے حرف دعا اسی کا

یوں خوش نہ ہو اے شہر نگاراں کے در و بام

یہ وادئ سفاک بھی رہنے کی نہیں ہے

وہ میرے خواب چرا کر بھی خوش نہیں اجملؔ

وہ ایک خواب لہو میں جو پھیل جانا تھا

کیوں بام پہ آوازوں کا دھمال ہے اجملؔ

اس گھر پہ تو آسیب کا سایہ بھی نہیں ہے

بجائے گل مجھے تحفہ دیا ببولوں کا

میں منحرف تو نہیں تھا ترے اصولوں کا