دیکھو تو ہر اک رنگ سے ملتا ہے مرا رنگ

سوچو تو ہر اک بات ہے اوروں سے جدا بھی

رات آنگن میں چاند اترا تھا

تم ملے تھے کہ خواب دیکھا تھا

غم گساری کے لئے اب نہیں آتا ہے کوئی

زخم بھر جانے کا امکاں نہ ہوا تھا سو ہوا

ہو گئی شام ڈھل گیا سورج

دن کو شب میں بدل گیا سورج

لوگ قسمت پہ چھوڑ دیتے ہیں

بات بنتی نہیں ہے جب کچھ بھی

اب آ بھی جاؤ کہ اک دوسرے میں گم ہو جائیں

وصال و ہجر کا قصہ بہت پرانا ہوا

کوئی نہیں ہے ایسا کہ اپنا کہیں جسے

کیسا طلسم ٹوٹا ہے اپنے گمان کا

لوگ کیا سادہ ہیں امید وفا رکھتے ہیں

جیسے معلوم نہیں ان کو حقیقت تیری

تو ہر اک کا ہے اور کسی کا نہیں

لوگ کہتے رہیں ہمارا چاند

یہ انقلاب زمانہ نہیں تو پھر کیا ہے

امیر شہر جو کل تھا وہ ہے فقیروں میں

سکون قلب تو کیا ہے قرار جاں بھی لٹا

تمہاری یاد بھی آئی تو راہزن کی طرح

جو دیکھتا ہوں زمانے کی نا شناسی کو

یہ سوچتا ہوں کہ اچھا تھا بے ہنر رہتا

تجھ سے بچھڑ کے ہم تو یہی سوچتے رہے

یہ گردش حیات نہ آئے گی راس کیا

کس درجہ مرے شہر کی دل کش ہے فضا بھی

مانوس ہر اک چیز ہے مٹی بھی ہوا بھی

یہ اپنا اپنا مقدر ہے اس کو کیا کہئے

تجھے سراب تو دریا بنا دیا ہے مجھے

آدمی کا عمل سے رشتہ ہے

کام آتا نہیں نسب کچھ بھی

جب بھی ملتا ہے مسکراتا ہے

خواہ اس کا ہو اب سبب کچھ بھی

کوئی ملے نہ ملے بیقرار رہتا ہے

کہ دل کا حال بھی اک موج آب جیسا ہے

کٹا نہ کوہ الم ہم سے کوہ کن کی طرح

بدل سکا نہ زمانہ ترے چلن کی طرح

جو دیکھیے تو زمانہ ہے تیز رو کتنا

طلوع صبح ابھی ہے تو وقت شام ابھی

دل نے گو لاکھ یہ چاہا کہ بھلا دوں تجھ کو

یاد نے تیری مگر آج بھی مارا شب خوں

وہ عشق جس کی زمانے کو بھی خبر نہ رہی

ترے بچھڑنے سے رسوا نگر نگر میں رہا