اے شام ہجر یار مری تو گواہی دے

میں تیرے ساتھ ساتھ رہا گھر نہیں گیا

دینے والے تو مجھے نیند نہ دے خواب تو دے

مجھ کو مہتاب سے آگے بھی کہیں جانا ہے

لباس دیکھ کے اتنا ہمیں غریب نہ جان

ہمارا غم تری املاک سے زیادہ ہے

اسی لیے تو ہار کا ہوا نہیں ملال تک

وہ میرے ساتھ ساتھ تھا عروج سے زوال تک

تو نے بھی سارے زخم کسی طور سہ لیے

میں بھی بچھڑ کے جی ہی لیا مر نہیں گیا

بازار آرزو میں کٹی جا رہی ہے عمر

ہم کو خرید لے وہ خریدار چاہئے

خیال آتا ہے اکثر اتار پھینکوں بدن

کہ یہ لباس مری خاک سے زیادہ ہے

سڑک کے پار چلا جا رہا ہے بچتا ہوا

کسی کا ہاتھ کوئی مہربان تھامے ہوئے

کس لیے خود کو سمجھتا ہے وہ پتھر کی لکیر

اس کا انکار بھی اقرار میں آ سکتا ہے

چمن اجاڑنے والو تمہیں خدا سمجھے

تمہیں نہ آئی حیا پھول تو ہمارے گئے

دھند میں کھو کے رہ گئیں صورتیں مہر و ماہ سی

وقت کی گرد نے انہیں خواب و خیال کر دیا

سر پہ سورج ہے تو پھر چھاؤں سے محظوظ نہ ہو

دھوپ کا رنگ بھی دیوار میں آ سکتا ہے

ان سے بھی پوچھئے کبھی اپنی زمیں کا کرب

جو ساحلوں کو چھوڑ کے دریا میں آ گئے

سب معجزوں کے باب میں یہ معجزہ بھی ہو

جو لوگ مر گئے ہیں انہیں خاک سے اٹھا

کیا ڈھونڈنے نکلی ہے کسی قیس کو پاگل

اس درجہ جو یہ باد بیابانی ہوئی ہے

آہن و سنگ کو زہراب فنا چاٹ گیا

پہلے دیوار شکستہ ہوئی پھر باب گرا