جانتا اس کو ہوں دوا کی طرح

چاہتا اس کو ہوں شفا کی طرح

کیا جانیں ان کی چال میں اعجاز ہے کہ سحر

وہ بھی انہیں سے مل گئے جو تھے ہمارے لوگ

حقارت کی نگاہوں سے نہ فرش خاک کو دیکھو

امیروں کا فقیروں کا یہی آخر کو بستر ہے

ٹوٹیں وہ سر جس میں تیری زلف کا سودا نہیں

پھوٹیں وہ آنکھیں کہ جن کو دید کا لپکا نہیں

یا اس سے جواب خط لانا یا قاصد اتنا کہہ دینا

بچنے کا نہیں بیمار ترا ارشاد اگر کچھ بھی نہ ہوا

خوب مل کر گلے سے رو لینا

اس سے دل کی صفائی ہوتی ہے

تھوڑی تکلیف سہی آنے میں

دو گھڑی بیٹھ کے اٹھ جائیے گا

مجھے اب موت بہتر زندگی سے

وہ کی تم نے ستم گاری کہ توبہ

کی کسی پر نہ جفا میرے بعد

خوب روئے وہ سنا میرے بعد

بند قبا پہ ہاتھ ہے شرمائے جاتے ہیں

کمسن ہیں ذکر وصل سے گھبرائے جاتے ہیں

چار دن کی بہار ہے ساری

یہ تکبر ہے یار جانی ہیچ

کھلی جو آنکھ مری سامنا قضا سے ہوا

جو آنکھ بند ہوئی سابقہ خدا سے ہوا

بت کو پوجوں گا صنم خانوں میں جا جا کے تو میں

اس کے پیچھے مرا ایمان رہے یا نہ رہے

چھا گئی ایک مصیبت کی گھٹا چار طرف

کھلے بالوں جو وہ دریا سے نہا کر نکلے

عشق کے پھندے سے بچئے اے حقیرؔ خستہ دل

اس کا ہے آغاز شیریں اور ہے انجام تلخ

ساقیا ایسا پلا دے مے کا مجھ کو جام تلخ

زندگی دشوار ہو اور ہو مجھے آرام تلخ

جب سے کچھ قابو ہے اپنا کاکل خم دار پر

سانپ ہر دم لوٹتا ہے سینۂ اغیار پر

دیکھا بغور عیب سے خالی نہیں کوئی

بزم جہاں میں سب ہیں خدا کے سنوارے لوگ

کیوں نہ کعبہ کو کہوں اللہ کا اور بت کا گھر

وہ بھی میرے دل میں ہے اور یہ بھی میرے دل میں ہے

بت کدے میں بھی گیا کعبہ کی جانب بھی گیا

اب کہاں ڈھونڈھنے تجھ کو ترا شیدا جاتا

بہ خدا سجدے کرے گا وہ بٹھا کر بت کو

اب حقیرؔ آگے مسلمان رہے یا نہ رہے

یک بہ یک ترک نہ کرنا تھا محبت مجھ سے

خیر جس طرح سے آتا تھا وہ آتا جاتا