terī sūrat ko liye āñkhoñ meñ ab so jā.eñge

zindagī ko yuuñ taḌaptā 'umr bhar dekhegā kaun

teri surat ko liye aankhon mein ab so jaenge

zindagi ko yun taDapta 'umr bhar dekhega kaun

chāñd niklā phir gagan kī oT se

dil meñ sulgā jaane an-jānoñ kā ġham

chand nikla phir gagan ki oT se

dil mein sulga jaane an-jaanon ka gham

band kamre meñ mujhe qaid kiyā hai kis ne

maiñ huuñ ik chīḳh fazāoñ meñ bikharne do mujhe

band kamre mein mujhe qaid kiya hai kis ne

main hun ek chiKH fazaon mein bikharne do mujhe

sham' tanhā aur parvānoñ kā ġham

zindagī bhar kitne afsānoñ kā ġham

sham' tanha aur parwanon ka gham

zindagi bhar kitne afsanon ka gham

aap be-kār hī karte haiñ fasīleñ ūñchī

ham to āvāz haiñ chhan jā.eñge dīvāroñ se

aap be-kar hi karte hain fasilen unchi

hum to aawaz hain chhan jaenge diwaron se

añdhere meñ añdherā ban ke aayā bhī to kyā hāsil

koī jugnū banā hotā koī taara banā hotā

andhere mein andhera ban ke aaya bhi to kya hasil

koi jugnu bana hota koi tara bana hota

der tak chamkegā bhīgī ghaas par merā lahū

der tak in jangaloñ meñ bheḌiye ġhurrā.eñge

der tak chamkega bhigi ghas par mera lahu

der tak in jangalon mein bheDiye ghurraenge

ye kaalī saḌak ye surḳh lahū ai chāñd tumhīñ kuchh batlāo

tum shab bhar jāgte rahte ho ye raaz tumhīñ samjhāoge

ye kali saDak ye surKH lahu ai chand tumhin kuchh batlao

tum shab bhar jagte rahte ho ye raaz tumhin samjhaoge

jaane kitnī lambī masāfat tai karke vo aayā thā

maiñ ne piile chāñd ko dekhā haañp rahā thā pichhlī raat

jaane kitni lambi masafat tai karke wo aaya tha

main ne pile chand ko dekha hanp raha tha pichhli raat

kahāñ haiñ nau-javānān-e-'alam-bardār kuchh bolo

chale aao ki in āñkhoñ meñ kab se ḳhvāb jalte haiñ

kahan hain nau-jawanan-e-'alam-bardar kuchh bolo

chale aao ki in aankhon mein kab se KHwab jalte hain

Dhalte hue sūraj mujhe ham-rāh liye chal

is shahr meñ luT jaane ke āsār bahut haiñ

Dhalte hue suraj mujhe ham-rah liye chal

is shahr mein luT jaane ke aasar bahut hain

le ke maiñ tanhā hī niklūñgā baġhāvat kā 'alam

maslahat kī god meñ jab falsafī so jā.eñge

le ke main tanha hi niklunga baghawat ka 'alam

maslahat ki god mein jab falsafi so jaenge

koī baiThā thā yaqīnan yahāñ sahrā vaalā

ret dariyā kī yūñhī sho'la-ba-dāmāñ na huī

koi baiTha tha yaqinan yahan sahra wala

ret dariya ki yunhi sho'la-ba-daman na hui

jalā rahī hai nasheman ko barq rah rah kar

mire parinde tirī zindagī kahāñ pahuñchī

jala rahi hai nasheman ko barq rah rah kar

mere parinde teri zindagi kahan pahunchi

ai dost kahāñ se aate ho kyuuñ dhuul jamī hai chehre par

ye koh-e-nidā kī sarhad hai ab aur kahāñ tak jāoge

ai dost kahan se aate ho kyun dhul jami hai chehre par

ye koh-e-nida ki sarhad hai ab aur kahan tak jaoge

parcham-e-dard uThāo koī fariyād karo

itnā cīḳho ki pahāḌoñ kā jigar kaT jaa.e

parcham-e-dard uThao koi fariyaad karo

itna ciKHo ki pahaDon ka jigar kaT jae

jitne bādal haiñ chale jaate haiñ shahroñ kī taraf

gaañv rote haiñ ki un par ab guhar-bārī nahīñ

jitne baadal hain chale jate hain shahron ki taraf

ganw rote hain ki un par ab guhar-bari nahin

sahrāoñ meñ jaane vaale saath safīne le jaa.eñ

aise bhī kuchh dariyā haiñ jo ret ke nīche bahte haiñ

sahraon mein jaane wale sath safine le jaen

aise bhi kuchh dariya hain jo ret ke niche bahte hain

soch rahā huuñ sūraj ko bhī TukḌe TukḌe kar Dālūñ

tārīkī meñ sab hī shāyad apne jaise lagte haiñ

soch raha hun suraj ko bhi TukDe TukDe kar Dalun

tariki mein sab hi shayad apne jaise lagte hain