āñkheñ ḳhudā ne baḳhshī haiñ rone ke vāste

do kashtiyāñ milī haiñ Dubone ke vāste

aankhen KHuda ne baKHshi hain rone ke waste

do kashtiyan mili hain Dubone ke waste

surḳhī shafaq kī zard ho gāloñ ke sāmne

paanī bhare ghaTā tire bāloñ ke sāmne

surKHi shafaq ki zard ho galon ke samne

pani bhare ghaTa tere baalon ke samne

jaatī hai duur baat nikal kar zabān se

phirtā nahīñ vo tiir jo niklā kamān se

jati hai dur baat nikal kar zaban se

phirta nahin wo tir jo nikla kaman se

ehsān nahīñ ḳhvāb meñ aa.e jo mire paas

chorī kī mulāqāt mulāqāt nahīñ hai

ehsan nahin KHwab mein aae jo mere pas

chori ki mulaqat mulaqat nahin hai

bosa hoñToñ kā mil gayā kis ko

dil meñ kuchh aaj dard mīThā hai

bosa honTon ka mil gaya kis ko

dil mein kuchh aaj dard miTha hai

ustād ke ehsān kā kar shukr 'munīr' aaj

kī ahl-e-suḳhan ne tirī tārīf baḌī baat

ustad ke ehsan ka kar shukr 'munir' aaj

ki ahl-e-suKHan ne teri tarif baDi baat

dekhā hai āshiqoñ ne barahman kī aañkh se

har but ḳhudā hai chāhne vāloñ ke sāmne

dekha hai aashiqon ne barahman ki aankh se

har but KHuda hai chahne walon ke samne

bose haiñ be-hisāb har din ke

va.ade kyuuñ Tālte ho gin gin ke

bose hain be-hisab har din ke

wade kyun Talte ho gin gin ke

kabhī payām na bhejā butoñ ne mere paas

ḳhudā haiñ kaise ki paiġhāmbar nahīñ rakhte

kabhi payam na bheja buton ne mere pas

KHuda hain kaise ki paighambar nahin rakhte

zāhido puujā tumhārī ḳhuub hogī hashr meñ

but banā degī tumheñ ye haq-parastī ek din

zahido puja tumhaari KHub hogi hashr mein

but bana degi tumhein ye haq-parasti ek din

us but ke nahāne se huā saaf ye paanī

motī bhī sadaf meñ tah-e-dariyā nazar aayā

us but ke nahane se hua saf ye pani

moti bhi sadaf mein tah-e-dariya nazar aaya

mahrūm huuñ maiñ ḳhidmat-e-ustād se 'munīr'

kalkatta mujh ko gor se bhī tañg ho gayā

mahrum hun main KHidmat-e-ustad se 'munir'

kalkatta mujh ko gor se bhi tang ho gaya

garmī-e-husn kī mid.hat kā silā lete haiñ

mish.aleñ aap ke saa.e se jalā lete haiñ

garmi-e-husn ki midhat ka sila lete hain

mishalen aap ke sae se jala lete hain

shaiḳh le hai raah ka.abe kī barahman dair kī

ishq kā rasta judā hai kufr aur islām se

shaiKH le hai rah kabe ki barahman dair ki

ishq ka rasta juda hai kufr aur islam se

bosa-e-lab ġhair ko dete ho tum

muñh mirā mīThā kiyā jaatā nahīñ

bosa-e-lab ghair ko dete ho tum

munh mera miTha kiya jata nahin

dīdār kā mazā nahīñ baal apne bāñdh lo

kuchh mujh ko sūjhtā nahīñ añdhiyārī raat hai

didar ka maza nahin baal apne bandh lo

kuchh mujh ko sujhta nahin andhiyari raat hai

jaan kar us but kā ghar ka.aba ko sajda kar liyā

ai barahman mujh ko baitullāh ne dhokā diyā

jaan kar us but ka ghar kaba ko sajda kar liya

ai barahman mujh ko baitullah ne dhoka diya

ai but ye hai namāz ki hai ghaat qatl kī

niyyat adā kī hai ki ishāre qazā ke haiñ

ai but ye hai namaz ki hai ghat qatl ki

niyyat ada ki hai ki ishaare qaza ke hain

āñkhoñ meñ nahīñ silsila-e-ashk shab-o-roz

tasbīh paḌhā karte haiñ din raat tumhārī

aankhon mein nahin silsila-e-ashk shab-o-roz

tasbih paDha karte hain din raat tumhaari

chehra tamām surḳh hai mahram ke rañg se

añgiyā kā paan dekh ke muñh laal ho gayā

chehra tamam surKH hai mahram ke rang se

angiya ka pan dekh ke munh lal ho gaya

bismiloñ se bosa-e-lab kā jo va.ada ho gayā

ḳhud-ba-ḳhud har zaḳhm kā añgūr mīThā ho gayā

bismilon se bosa-e-lab ka jo wada ho gaya

KHud-ba-KHud har zaKHm ka angur miTha ho gaya

maiñ justujū se kufr meñ pahuñchā ḳhudā ke paas

ka.abe tak in butoñ kā mujhe naam le gayā

main justuju se kufr mein pahuncha KHuda ke pas

kabe tak in buton ka mujhe nam le gaya

shabnam kī hai añgiyā tale añgiyā kī pasīna

kyā lutf hai shabnam tah-e-shabnam nazar aa.ī

shabnam ki hai angiya tale angiya ki pasina

kya lutf hai shabnam tah-e-shabnam nazar aai

shukr hai jaama se bāhar vo huā ġhusse meñ

jo ki parde meñ bhī uryāñ na huā thā so huā

shukr hai jama se bahar wo hua ghusse mein

jo ki parde mein bhi uryan na hua tha so hua

jab baḌh ga.ī umr ghaT ga.ī ziist

jo had se ziyāda ho vo kam hai

jab baDh gai umr ghaT gai zist

jo had se ziyaada ho wo kam hai

bhaTke phire do amla-e-dair-o-haram meñ ham

is samt kufr us taraf islām le gayā

bhaTke phire do amla-e-dair-o-haram mein hum

is samt kufr us taraf islam le gaya

khāte haiñ añgūr piite haiñ sharāb

bas yahī mastoñ kā āb-o-dāna hai

khate hain angur pite hain sharab

bas yahi maston ka aab-o-dana hai

aate nahīñ haiñ dīda-giryāñ ke sāmne

bādal bhī karte haiñ mirī barsāt kā lihāz

aate nahin hain dida-giryan ke samne

baadal bhi karte hain meri barsat ka lihaz

uljhā hai magar zulf meñ taqrīr kā lachhā

suljhī huī ham ne na sunī baat tumhārī

uljha hai magar zulf mein taqrir ka lachha

suljhi hui hum ne na suni baat tumhaari

hijr-e-jānāñ ke alam meñ ham farishte ban ga.e

dhyān muddat se chhuTā āb-o-ta.ām-o-ḳhvāb kā

hijr-e-jaanan ke alam mein hum farishte ban gae

dhyan muddat se chhuTa aab-o-taam-o-KHwab ka

mastoñ meñ phuuT paḌ ga.ī aate hī yaar ke

laḌtā hai aaj shīshe se shīsha sharāb kā

maston mein phuT paD gai aate hi yar ke

laDta hai aaj shishe se shisha sharab ka

iḳhtilāt apne anāsir meñ nahīñ

jo hai mere jism meñ begāna hai

iKHtilat apne anasir mein nahin

jo hai mere jism mein begana hai

paayā tabīb ne jo tirī zulf kā marīz

shāmil davā meñ mushk-e-shab-e-tār kar diyā

paya tabib ne jo teri zulf ka mariz

shamil dawa mein mushk-e-shab-e-tar kar diya

be-ilm shā.iroñ kā gila kyā hai ai 'munīr'

hai ahl-e-ilm ko tirā tarz-e-bayāñ pasand

be-ilm shairon ka gila kya hai ai 'munir'

hai ahl-e-ilm ko tera tarz-e-bayan pasand

tārīf roz lete ho apne ġhurūr kī

mujh ko barahman-e-but-e-pindār kar diyā

tarif roz lete ho apne ghurur ki

mujh ko barahman-e-but-e-pindar kar diya

āshiq banā ke ham ko jalāte haiñ sham.a-rū

parvāna chāhiye unheñ parvāna chāhiye

aashiq bana ke hum ko jalate hain shama-ru

parwana chahiye unhen parwana chahiye

jaan detā huuñ magar aatī nahīñ

maut ko bhī nāz-e-ma.ashūqāna hai

jaan deta hun magar aati nahin

maut ko bhi naz-e-mashuqana hai

vahāñ pahuñch nahīñ saktīñ tumhārī zulfeñ bhī

hamāre dast-e-talab kī jahāñ rasā.ī hai

wahan pahunch nahin saktin tumhaari zulfen bhi

hamare dast-e-talab ki jahan rasai hai

leTe jo saath haath lagā bosa-e-dahan

aayā amal meñ ilm-e-nihānī palañg par

leTe jo sath hath laga bosa-e-dahan

aaya amal mein ilm-e-nihani palang par

āñkhoñ meñ khaTaktī hī rahī daulat-e-duniyā

har sikke kī machhlī meñ bhī kāñTā nazar aayā

aankhon mein khaTakti hi rahi daulat-e-duniya

har sikke ki machhli mein bhi kanTa nazar aaya

sabr kab tak raah paidā ho ki ai dil jaan jaa.e

ek Takkar maar kar sar phoḌ yā dīvār toḌ

sabr kab tak rah paida ho ki ai dil jaan jae

ek Takkar mar kar sar phoD ya diwar toD

bigḌī huī hai saarī hasīnoñ kī banāvaT

allāh-re aalam tire be-sāḳhta-pan kā

bigDi hui hai sari hasinon ki banawaT

allah-re aalam tere be-saKHta-pan ka

rindoñ ko pābandī-e-duniyā kahāñ

kashtī-e-mai ko nahīñ lañgar kī chaah

rindon ko pabandi-e-duniya kahan

kashti-e-mai ko nahin langar ki chah

garmī meñ tere kūcha-nashīnoñ ke vāste

pañkhe haiñ qudsiyoñ ke paroñ ke bahisht meñ

garmi mein tere kucha-nashinon ke waste

pankhe hain qudsiyon ke paron ke bahisht mein

farz hai dariyā-diloñ par ḳhāksāroñ kī madad

farsh sahrā ke liye lāzim huā sailāb kā

farz hai dariya-dilon par KHaksaron ki madad

farsh sahra ke liye lazim hua sailab ka

kab paan raqīboñ ko ināyat nahīñ hote

kis roz mire qatl kā biiḌā nahīñ uThtā

kab pan raqibon ko inayat nahin hote

kis roz mere qatl ka biDa nahin uThta

mujh ko apne saath hī tere sulāne kī havas

is tarah hai baḳht-e-ḳhufta ke jagāne kī havas

mujh ko apne sath hi tere sulane ki hawas

is tarah hai baKHt-e-KHufta ke jagane ki hawas

kufr-o-islām ne maqsad ko pahuñchne na diyā

ka.aba-o-dair ko sañg-e-rah-e-manzil samjhā

kufr-o-islam ne maqsad ko pahunchne na diya

kaba-o-dair ko sang-e-rah-e-manzil samjha

kalkatta meñ har dam hai 'munīr' aap ko vahshat

har koThī meñ har bañgle meñ jañglā nazar aayā

kalkatta mein har dam hai 'munir' aap ko wahshat

har koThi mein har bangle mein jangla nazar aaya

kartā rahā luġhāt kī tahqīq umr bhar

a.amāl-nāma nusḳha-e-farhañg ho gayā

karta raha lughat ki tahqiq umr bhar

aamal-nama nusKHa-e-farhang ho gaya