ہم کس کو دکھاتے شب فرقت کی اداسی

سب خواب میں تھے رات کو بیدار ہمیں تھے

جس طرف بیٹھتے تھے وصل میں آپ

اسی پہلو میں درد رہتا ہے

وہ کھڑے کہتے ہیں میری لاش پر

ہم تو سنتے تھے کہ نیند آتی نہیں

کبھی تو شہیدوں کی قبروں پہ آؤ

یہ سب گھر تمہارے بسائے ہوئے ہیں

میں باغ میں ہوں طالب دیدار کسی کا

گل پر ہے نظر دھیان میں رخسار کسی کا

آمد آمد ہے خزاں کی جانے والی ہے بہار

روتے ہیں گل زار کے در باغباں کھولے ہوئے

پڑ گئی کیا نگہ مست ترے ساقی کی

لڑکھڑاتے ہوئے مے خوار چلے آتے ہیں

مجھ سے کیا پوچھتے ہو داغ ہیں دل میں کتنے

تم کو ایام جدائی کا شمار آتا ہے

بہت مضر دل عاشق کو آہ ہوتی ہے

اسی ہوا سے یہ کشتی تباہ ہوتی ہے

مجھ سے لاکھوں خاک کے پتلے بنا سکتا ہے تو

میں کہاں سے ایک تیرا سا خدا پیدا کروں

ہر طرف حشر میں جھنکار ہے زنجیروں کی

ان کی زلفوں کے گرفتار چلے آتے ہیں

بار خاطر ہی اگر ہے تو عنایت کیجے

آپ کو حسن مبارک ہو مرا دل مجھ کو

وہ انتہا کے ہیں نازک میں سخت جاں ہوں کمال

عجب طرح کی مصیبت پڑی ہے خنجر پر

منتظر تیرے ہیں چشم خوں فشاں کھولے ہوئے

بیٹھے ہیں دل بیچنے والے دکاں کھولے ہوئے

تمام عمر کمی کی کبھی نہ پانی نے

عجب کریم کی رحمت ہے دیدۂ تر پر

چراغ داغ میں دن سے جلائے بیٹھا ہوں

سنا ہے جو شب فرقت سیاہ ہوتی ہے

بڑھتے بڑھتے آتش رخسار لو دینے لگی

رفتہ رفتہ کان کے موتی شرارے ہو گئے

نجد سے جانب لیلیٰ جو ہوا آتی ہے

دل مجنوں کے دھڑکنے کی صدا آتی ہے

اٹھتے جاتے ہیں بزم عالم سے

آنے والے تمہاری محفل کے

دیتے پھرتے تھے حسینوں کی گلی میں آواز

کبھی آئینہ فروش دل حیران ہم تھے

قافلے رات کو آتے تھے ادھر جان کے آگ

دشت غربت میں جدھر اے دل سوزاں ہم تھے

جلوں گا میں کہ دل اس بت کا غیر پر آیا

اڑے گی آگ کہ پتھر گرا ہے پتھر پر

شعلۂ حسن سے تھا دود دل اپنا اول

آگ دنیا میں نہ آئی تھی کہ سوزاں ہم تھے

موج دریا سے بلا کی چاہئے کشتی مجھے

ہو جو بالکل نا موافق وہ ہوا پیدا کروں

گیا شباب پر اتنا رہا تعلق عشق

دل و جگر میں تپک گاہ گاہ ہوتی ہے

وحشت دل یہ بڑھی چھوڑ دیے گھر سب نے

تم ہوئے خانہ نشیں ہو گئیں گلیاں آباد

صاف دیکھا ہے کہ غنچوں نے لہو تھوکا ہے

موسم گل میں الٰہی کوئی دلگیر نہ ہو

مجھے ہے فکر خط بھیجا ہے جب سے اس گل تر کو

ہزاروں بلبلیں روکیں گی رسی میں کبوتر کو