hai mire pahlū meñ aur mujh ko nazar aatā nahīñ

us parī kā sehr yaaro kuchh kahā jaatā nahīñ

hai mere pahlu mein aur mujh ko nazar aata nahin

us pari ka sehr yaro kuchh kaha jata nahin

saaqī hameñ qasam hai tirī chashm-e-mast kī

tujh bin jo ḳhvāb meñ bhī piyeñ mai harām ho

saqi hamein qasam hai teri chashm-e-mast ki

tujh bin jo KHwab mein bhi piyen mai haram ho

donoñ terī justujū meñ phirte haiñ dar dar tabāh

dair hindū chhoḌ kar ka.aba musalmāñ chhoḌ kar

donon teri justuju mein phirte hain dar dar tabah

dair hindu chhoD kar kaba musalman chhoD kar

dair meñ ka.abe meñ maiḳhāne meñ aur masjid meñ

jalva-gar sab meñ mirā yaar hai allāh allāh

dair mein kabe mein maiKHane mein aur masjid mein

jalwa-gar sab mein mera yar hai allah allah

na kiije vo ki miyāñ jis se dil koī ho malūl

sivā.e is ke jo jī chāhe so kiyā kiije

na kije wo ki miyan jis se dil koi ho malul

siwae is ke jo ji chahe so kiya kije

in do ke sivā koī falak se na huā paar

yā tiir mirī aah kā yā us kī nazar kā

in do ke siwa koi falak se na hua par

ya tir meri aah ka ya us ki nazar ka

dostī chhūTe chhuḌā.e se kisū ke kis tarah

band hotā hī nahīñ rasta diloñ kī raah kā

dosti chhuTe chhuDae se kisu ke kis tarah

band hota hi nahin rasta dilon ki rah ka

ka.abe meñ vahī ḳhud hai vahī dair meñ hai aap

hindū kaho yā us ko musalmān vahī hai

kabe mein wahi KHud hai wahi dair mein hai aap

hindu kaho ya us ko musalman wahi hai

kuchh na dekhā kisī makān meñ ham

kahte haiñ lā-makān meñ kuchh hai

kuchh na dekha kisi makan mein hum

kahte hain la-makan mein kuchh hai

ba-tasḳhīr-e-butāñ tasbīh kyuuñ zāhid phirāte haiñ

ye lohe ke chane vallāh āshiq hī chabāte haiñ

ba-tasKHir-e-butan tasbih kyun zahid phiraate hain

ye lohe ke chane wallah aashiq hi chabaate hain

barahman dair ko raahī huā aur shaiḳh ka.abe ko

nikal kar us dorāhe se maiñ kū-e-yār meñ aayā

barahman dair ko rahi hua aur shaiKH kabe ko

nikal kar us dorahe se main ku-e-yar mein aaya

shaiḳh kahte haiñ mujhe dair na jā ka.aba chal

barhaman kahte haiñ kyuuñ yaañ bhī ḳhudā hai ki nahīñ

shaiKH kahte hain mujhe dair na ja kaba chal

barhaman kahte hain kyun yan bhi KHuda hai ki nahin

jo apne jīte-jī ko kuñ.eñ meñ Duboiye

to chaah meñ kisī kī giraftār hoiye

jo apne jite-ji ko kunen mein Duboiye

to chah mein kisi ki giraftar hoiye

jab nashe meñ ham ne kuchh mīThe kī ḳhvāhish us se kī

tursh ho bolā ki kyuuñ be tū bhī is laa.eq huā

jab nashe mein hum ne kuchh miThe ki KHwahish us se ki

tursh ho bola ki kyun be tu bhi is laeq hua

rahīm o raam kī sumran hai shaiḳh o hindū ko

dil us ke naam kī raTnā raTe hai kyā kiije

rahim o ram ki sumran hai shaiKH o hindu ko

dil us ke nam ki raTna raTe hai kya kije

kāfir huuñ gar maiñ naam bhī ka.abe kā luuñ kabhī

vo sañg-dil sanam jo kabhū mujh se raam ho

kafir hun gar main nam bhi kabe ka lun kabhi

wo sang-dil sanam jo kabhu mujh se ram ho

ishq jab daḳhl kare hai dil-e-insāñ meñ 'muhib'

vāhime sab bashariyyat ke kare hai iḳhrāj

ishq jab daKHl kare hai dil-e-insan mein 'muhib'

wahime sab bashariyyat ke kare hai iKHraj

tamām ḳhalq-e-ḳhudā zer-e-āsmāñ kī sameT

zamīñ ne khaa.ī va-lekin bharā na us kā peT

tamam KHalq-e-KHuda zer-e-asman ki sameT

zamin ne khai wa-lekin bhara na us ka peT

raqīb jam ke ye baiThā ki ham uThe nā-chār

ye patthar ab na haTā.e haTe hai kyā kiije

raqib jam ke ye baiTha ki hum uThe na-chaar

ye patthar ab na haTae haTe hai kya kije

jo az-ḳhud-rafta hai gumrāh hai vo rahnumā merā

jo ik aalam se hai begāna hai vo āshnā merā

jo az-KHud-rafta hai gumrah hai wo rahnuma mera

jo ek aalam se hai begana hai wo aashna mera

ḳhat kā ye javāb aayā ki qāsid gayā jī se

sar ek taraf loTe hai aur ek taraf dhaḌ

KHat ka ye jawab aaya ki qasid gaya ji se

sar ek taraf loTe hai aur ek taraf dhaD

ba-ma.anī kufr se islām kab ḳhālī hai ai zāhid

nikal sub.he se rishta sūrat-e-zunnār ho paidā

ba-mani kufr se islam kab KHali hai ai zahid

nikal subhe se rishta surat-e-zunnar ho paida

are o ḳhāna-ābād itnī ḳhūñ-rezī ye qattālī

ki ik āshiq nahīñ kūcha tirā vīrān suunā hai

are o KHana-abaad itni KHun-rezi ye qattali

ki ek aashiq nahin kucha tera viran suna hai

girte haiñ dukh se terī judā.ī ke varna ḳhair

chañge bhale haiñ kuchh nahīñ āzār hai hameñ

girte hain dukh se teri judai ke warna KHair

change bhale hain kuchh nahin aazar hai hamein

kaash ham nākām bhī kaam aa.eñ tere ishq meñ

mutlaqan nākāra haiñ duniyā-o-dīñ ke kaam se

kash hum nakaam bhi kaam aaen tere ishq mein

mutlaqan nakara hain duniya-o-din ke kaam se

tire kalām ne kaisā asar kiyā vaa.iz

ki dil ziyāda-tar āvāra ho gayā vaa.iz

tere kalam ne kaisa asar kiya waiz

ki dil ziyaada-tar aawara ho gaya waiz

jaun se raste vo ho nikle udhar pahroñ talak

ho hujūm-e-ḳhalq se kūcha galī bāzār band

jaun se raste wo ho nikle udhar pahron talak

ho hujum-e-KHalq se kucha gali bazar band

shaiḳh hai tujh ko hī inkār sanam mere se

varna har shaḳhs ko iqrār hai allāh allāh

shaiKH hai tujh ko hi inkar sanam mere se

warna har shaKHs ko iqrar hai allah allah

phūloñ kī sej dost kī ḳhātir 'muhib' bichhāo

kāñTe rakho babūl ke a.adāoñ ke tale

phulon ki sej dost ki KHatir 'muhib' bichhao

kanTe rakho babul ke aadaon ke tale

tum gaao apne raag ko us paas vā.izo

mushtāq jo gadhā ho tumhāre alaap kā

tum gao apne rag ko us pas waizo

mushtaq jo gadha ho tumhaare alap ka

ai dil tujhe karnī hai agar ishq se bai.at

zinhār kabhū chhoḌiyo mat silsila-e-dard

ai dil tujhe karni hai agar ishq se baiat

zinhaar kabhu chhoDiyo mat silsila-e-dard

maiñ huuñ aur saaqī ho aur hoñ raas o chup ye vo baham

jaam dast-e-chup ke paas aur shīsha dast-e-rās paas

main hun aur saqi ho aur hon ras o chup ye wo baham

jam dast-e-chup ke pas aur shisha dast-e-ras pas

vo jo lailā hai mire dil meñ sune us kā jo shor

qais nikle gor se bāhar kafan ko chīr-phāḌ

wo jo laila hai mere dil mein sune us ka jo shor

qais nikle gor se bahar kafan ko chir-phaD

raag apnā gā hamārā zikr mat kar ai raqīb

jab satāvegā hameñ tab leñge ham ik dhol thaap

rag apna ga hamara zikr mat kar ai raqib

jab satawega hamein tab lenge hum ek dhol thap

dars-e-ilm-e-ishq se vāqif nahīñ mutlaq faqīh

nahv hī meñ mahv hai yā sarf hī meñ sarf hai

dars-e-ilm-e-ishq se waqif nahin mutlaq faqih

nahw hi mein mahw hai ya sarf hi mein sarf hai

islām meñ ye kaisā inkār kufr se hai

tasbīh meñ piro.e zunnār hai ta.ajjub

islam mein ye kaisa inkar kufr se hai

tasbih mein piroe zunnar hai tajjub

ai banda-parvar itnā lāzim hai kyā takalluf

uThiye ġharīb-ḳhāne chaliye bilā-takalluf

ai banda-parwar itna lazim hai kya takalluf

uThiye gharib-KHane chaliye bila-takalluf

ye dāḌhī mohtasib ne duḳht-e-raz ke phaaḌ khāne ko

liyā hai muñh par apne Daal burqā be-hayā.ī kā

ye daDhi mohtasib ne duKHt-e-raz ke phaD khane ko

liya hai munh par apne Dal burqa be-hayai ka

na tai ek raka.at kī manzil huī

safar shaiḳh-jī ke vuzū ne kiyā

na tai ek rakat ki manzil hui

safar shaiKH-ji ke wuzu ne kiya

us ke kūche hī meñ aa niklūñ huuñ jā.ūñ jis taraf

maiñ to dīvāna huuñ apne is dil-e-gumrāh kā

us ke kuche hi mein aa niklun hun jaun jis taraf

main to diwana hun apne is dil-e-gumrah ka

ka.aba jaane kī havas shaiḳh hameñ bhī hai vale

kūcha-e-yār qayāmat hai havā-dār aziiz

kaba jaane ki hawas shaiKH hamein bhi hai wale

kucha-e-yar qayamat hai hawa-dar aziz

'muhib' tum but-parastī ko na chhoḌo

tumhārā yaañ huvaidā ho.egā rab

'muhib' tum but-parasti ko na chhoDo

tumhaara yan huwaida hoega rab

ho gad.he par savār jā ka.aba

shaiḳh ye kuuch hai salāmat kā

ho gadhe par sawar ja kaba

shaiKH ye kuch hai salamat ka

zāhidā tū sohbat-e-rindāñ meñ aayā hai to sun

tark gaalī kā na kar pagḌī utarne se na Dar

zahida tu sohbat-e-rindan mein aaya hai to sun

tark gali ka na kar pagDi utarne se na Dar

suḳhan jin ke ki sūrat juuñ guhar hai bahr-e-ma.anī meñ

abas ġhaltāñ rakhe hai fikr un ke āb-o-dāne kā

suKHan jin ke ki surat jun guhar hai bahr-e-mani mein

abas ghaltan rakhe hai fikr un ke aab-o-dane ka

charāġh-e-ka.aba-o-dair ek sā hai chashm-e-haq-bīñ meñ

'muhib' jhagḌā hai korī ke sabab shaiḳh o barhaman kā

charagh-e-kaba-o-dair ek sa hai chashm-e-haq-bin mein

'muhib' jhagDa hai kori ke sabab shaiKH o barhaman ka

ka.aba o dair meñ jab vo but-e-kāfir na milā

ba-ḳhudā ham ne bahut nālā-e-nāqūs kiye

kaba o dair mein jab wo but-e-kafir na mila

ba-KHuda hum ne bahut nala-e-naqus kiye

raat āḳhir hai yahāñ aayā nazar āsār-e-sub.h

sham.a kī phīkī hai lau hoñToñ kī hai laalī hai udaas

raat aaKHir hai yahan aaya nazar aasar-e-subh

shama ki phiki hai lau honTon ki hai lali hai udas

diiñ se paidā kufr hai aur nuur shakl-e-nār hai

rishta jab sub.he se niklā sūrat-e-zunnār hai

din se paida kufr hai aur nur shakl-e-nar hai

rishta jab subhe se nikla surat-e-zunnar hai

dariyā-e-mohabbat se 'muhib' le hī ke chhoḌī

mujh ashk ne āḳhir dur-e-nāyāb kī mīrās

dariya-e-mohabbat se 'muhib' le hi ke chhoDi

mujh ashk ne aaKHir dur-e-nayab ki miras