Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "KHuddaar"

Nazm MATCHES FOR "KHuddaar"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

diwane ki jannat

meraa ye KHvaab ki tum mere qariib aa.ii ho
apne saa.e se jhijaktii hu.ii ghabraatii hu.ii
apne ehsaas kii tahriik pe sharmaatii hu.ii
apne qadmo.n kii bhii aavaaz se katraatii hu.ii
apnii saa.nso.n ke mahakte hu.e andaaz liye
apnii KHaamoshii me.n gahnaa.e hu.e raaz liye
apne ho.nTo.n pe ik anjaam kaa aaGaaz liye
dil kii dha.Dkan ko bahut roktii samjhaatii hu.ii
apnii paa.el kii Gazal-KHvaanii pe jhallaatii hu.ii
narm shaano.n pe javaanii kaa nayaa baar liye
shoKH aa.nkho.n me.n hijaabaat se inkaar liye
tez nabzo.n me.n mulaaqaat ke aasaar liye
kaale baalo.n se bikhartii hu.ii champaa kii mahak
surKH aariz pe damakte hu.e shaalo.n kii chamak
niichii nazro.n me.n samaa.ii hu.ii KHuddaar jhijak
nuqra.ii jism pe vo chaa.nd kii kirno.n kii phuvaar
chaa.ndnii raat me.n bujhtaa hu.aa palko.n kaa sitaar
fart-e-jazbaat se mahkii hu.ii saa.nso.n kii qataar
duur maazii kii bad-anjaam rivaayaat liye
niichii nazre.n vahii ehsaas-e-mulaaqaat liye
vahii maahaul vahii taaro.n bharii raat liye
aaj tum aa.ii ho dohraatii hu.ii maazii ko
meraa ye KHvaab ki tum mere qariib aa.ii ho
kaash ik KHvaab rahe talKH haqiiqat na bane
ye mulaaqaat bhii diivaane kii jannat na bane

Waseem Barelvi
Nazm

ban-bas

mai.n ki KHud apnii hii aavaaz ke sho.alo.n kaa asiir
mai.n ki KHud apnii hii zanjiir kaa zindaanii huu.n
kaun samjhegaa jahaa.n me.n mire zaKHmo.n kaa hisaab
kis ko KHush aa.egaa is dahr me.n ruuho.n kaa azaab
kaun aa kar mire miTne kaa tamaashaa dekhe
kis ko fursat ki uja.Dtii hu.ii duniyaa dekhe
kaun bha.Dkii hu.ii is aag ko apnaa.egaa
jo bhii aa.egaa mire saath hii jal jaa.egaa
vo gha.Dii kaun thii jab mujh ko milaa thaa ban-baas
ek jho.nkaa bhii havaa kaa na vatan se aayaa
ne ko.ii nik.hat-e-gul aur na ko.ii mauj-e-nasiim
phir ko.ii Dhuu.nDne mujh ko na chaman se aayaa
mai.n vo ik laal huu.n jo bik gayaa baazaaro.n me.n
phir ko.ii puuchhne mujh ko na yaman se aayaa
yaad karte hu.e ik yuusuf-e-gum-gashta ko
kuchh dino.n ro.ii to hogii mire ghar kii diivaar
kuchh dino.n gaa.nv kii galiyo.n me.n udaasii hogii
kuchh dino.n khul na sake ho.nge tire haar si.nghaar
kuchh dino.n ke liye sunsaan saa lagtaa hogaa
aam ke baaG me.n bechain phirii hogii bahaar
mai.n ne ik pe.D pe jo naam likhaa thaa apnaa
kuchh dino.n zaKHm ke maanind vo taaza hogaa
mere sab dost use dekh ke kahte ho.nge
jaane kis des me.n bechaara bhaTaktaa hogaa
umr bhar kaun kise yaad kiyaa kartaa hai
ek ik kar ke mujhe sab ne bhulaayaa hogaa
haa.e un ko bhii KHabar kyaa ki vo ik zaKHm-nasiib
zindagii ke liye niklaa thaa jo raahii ban kar
aaj tak paa na sakaa chashma-e-aab-e-haivaa.n
us ko suuraj bhii mile hai.n to siyaahii ban kar
ghar se laayaa thaa jo kuchh tab-e-ravaa.n zehn-e-rasaa
saath us ke rahe asbaab-e-tabaahii ban kar
meraa ye jurm ki mai.n saahab-e-idraak-o-shu.uur
meraa ye aib ki ik shaa.ir o fankaar huu.n mai.n
mujh ko ye zid hai ki mai.n sar na jhukaa.uu.ngaa kabhii
mujh ko israar ki jiine kaa sazaa-vaar huu.n mai.n
mujh ko ye faKHr ki mai.n haqq-o-sadaaqat kaa amii.n
mujh ko ye zo.am KHud-aagaah huu.n KHuddaar huu.n mai.n
ek ik mo.D pe aalaam o masaa.ib ke pahaa.D
ek ik gaam pe aafaat se Takraayaa huu.n
ek ik zahr ko ha.ns ha.ns ke piyaa hai mai.n ne
ek ik zaKHm ko chun chun ke uThaa laayaa huu.n
ek ik lamhe kii zanjiir se mai.n uljhaa huu.n
ek ik saa.ns pe KHud aap se sharmaayaa huu.n
yuu.n to kahne kii nahii.n baat magar kahtaa huu.n
pyaar kaa naam kitaabo.n me.n likhaa dekhaa hai
jab kabhii haath ba.Dhaayaa hai kisii kii jaanib
faasla aur bhii kuchh ba.Dhtaa hu.aa dekhaa hai
buu.nd bhar de na sakaa ko.ii mohabbat kii sharaab
yuu.n to mai-KHaane kaa mai-KHaana luTaa dekhaa hai

Khalilur Rahman Azmi
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

mirza ghaalib

maadar-e-hind ke fankaar the mirzaa 'Gaalib'
apne fan me.n ba.De hushyaar the mirzaa 'Gaalib'
aap kaa naam asadullaah thaa nau-shaah laqab
mirzaa Gaalib se hu.e baad me.n maaruuf-e-adab
aaj bhii pa.Dh ke kalaam aap kaa hairat me.n hai.n sab
zulf-e-urdu me.n giraftaar the mirzaa Gaalib
maadar-e-hind ke fankaar the mirzaa Gaalib
akbarabad me.n paidaa hu.e dehlii me.n rahe
ahd-e-tiflii hii se duniyaa ke ba.De zulm sahe
ab bhii har ahl-e-suKHan aap ko ustaad kahe
saare sho.araa ke alam-daar the mirzaa Gaalib
maadar-e-hind ke fankaar the mirzaa 'Gaalib'
ta.ng-dastii me.n bhii chho.Daa na vafaa kaa daaman
muflisii me.n bhii na apnaa.e KHushaamad ke chalan
KHuun-e-jazbaat se shaadaab kiyaa baaG-e-suKHan
fitratan shaa.er-e-KHuddaar the mirzaa 'Gaalib'
maadar-e-hind ke fankaar the mirzaa Gaalib
aap par faarsii sho.araa kaa bhii thaa KHuub asar
mas.ala KHidmat-e-urdu kaa bhii thaa pesh-e-nazar
apne ash.aar kii azmat se bhii vaaqif the magar
'miir' jii ke bhii taraf-daar the mirzaa 'Gaalib'
maadar-e-hind ke fankaar the mirzaa 'Gaalib'
KHat-naviisii kaa diyaa ek anokhaa andaaz
guu.nj uThii bazm-e-adab me.n ye niraalii aavaaz
aap maidaan-e-suKHan me.n bhii the sab se mumtaaz
saath hii ik ba.De nassaar the mirzaa 'Gaalib'
maadar-e-hind ke fankaar the mirzaa 'Gaalib'
be-niyaaz-e-Gam-o-aalaam har ik fikr se duur
ho musiibat me.n bhii rahte the hamesha masruur
aaj bhii jin ke latiife hai.n jahaa.n me.n mash.huur
muskuraate hu.e kirdaar the mirzaa 'Gaalib'
maadar-e-hind ke fankaar the mirzaa 'Gaalib'

Kaif Ahmed Siddiqui
Nazm

nai duniya

jahaa.n jazbaat ahl-e-dil ke Thukraa.e na jaate ho.n
jahaa.n baaGii na kahtaa ho ko.ii KHuddaar insaa.n ko
jahaa.n barsaa.e jaate ho.n na kuu.De zehn-e-insaa.n par
KHayaalo.n ko jahaa.n zanjiir pahnaa.ii na jaatii ho

Rajendra Nath Rahbar
Nazm

mini-bus ka safar

conveyance kuchh bhii jab nazar aayaa na daa.e.n baa.e.n
sochaa ki aaj ham bhii mini-bus me.n baiTh jaa.e.n
jaanaa thaa laaluu-khet cha.Dhe the sadr se ham
ruKHsat hu.e the sar-ba-kafan apne ghar se ham
har raah bus kii shahr-e-KHamoshaa.n kii raah thii
har seat bus kii aaKHirii aaraam-gaah thii
raqqaas-e-KHush-adaa kii tarah hil rahii thii bus
naa-aashnaa Truck se gale mil rahii thii bus
footpath se bhii haath milaatii hu.ii chalii
Thumka qadam qadam pe lagaatii hu.ii chalii
purza har ek maz.har-e-cha.ng-o-raubaab thaa
is bus kaa ittifaaq se bho.npuu KHaraab thaa
Dhiilii kamaaniyo.n me.n tarannum balaa kaa thaa
dekhaa utar ke bus se to jho.nkaa havaa kaa thaa
gaane me.n Thiik-Thaak the chalne me.n weak the
is mahfil-e-samaa.a me.n pahiye shariik the
naazuk samaa.ato.n pe sitam Dhaa rahii thii bus
ulTe suro.n me.n ko.ii Gazal gaa rahii thii bus
ho to ga.e the bus me.n musaafir sab adjust
Dar thaa ki ho na jaa.e kahii.n tyro.n me.n burst
bus me.n siku.D ke thaan se chit ho ga.e the ham
purze the aur machine me.n fiT ho ga.e the ham
jo kuchh bhii mil rahaa thaa liye jaa rahe the ham
dhakko.n kii ge.nd catch kiye jaa rahe the ham
majbuur ho ga.e the jamiil o hasiin log
murGaa bane hu.e the mu.azziz-tariin log
bus me.n misaal-e-shaaKH-e-samar jhuk ga.e the log
KHuddaar o sar-buland the par jhuk ga.e the log
kuchh shauqiya the kuchh ba-iraada jhuke hu.e
azmat-miyaa.n the sab se zyaada jhuke hu.e
aazaad tab.a vaaqif-e-garaje hii na thii
signal kii battiyo.n kii to muhtaaj hii na thii
stop se chalii to rukii ik dukaan me.n
aaKHir use panaah milii saa.ebaan me.n
vo log chal diye jo sar-e-rahguzar na the
''manzil unhe.n milii jo shariik-e-safar na the''

Khalid Irfan
Nazm

jazbaat-e-aftab

phir zaruurat hai javaa.n mardo.n kii ai maadar-e-hind
raanaa-prataap se KHuddaar bashar paidaa kar

Lala Anoop Chand Aaftab Panipati
Nazm

fankar

is bhare shahr me.n har chiiz kii qiimat Thahrii
dard bik jaate hai.n jazbaat bikaa karte hai.n
jagmagaate hu.e sikko.n ke evaz duniyaa me.n
kitne shaa.er hai.n jo din raat bikaa karte hai.n
ik tiraa shaa.er-e-KHuddaar nahii.n bik saktaa
merii mahbuub tiraa pyaar nahii.n bik saktaa
mere KHaako.n me.n tire husn kii tasviire.n hai.n
jumbish-e-zulf tirii jumbish-e-lab terii hai
meraa haq kyaa hai jo niilaam uThaa.uu.n in kaa
mere ash.aar vo daulat hai jo ab terii hai
ab ye sarmaya-e-ash.aar nahii.n bik saktaa
merii mahbuub tiraa pyaar nahii.n bik saktaa
apne she.ro.n kaa chaman nazr kiyaa hai tujh ko
apnaa andaaz-e-suKHan nazr kiyaa hai tujh ko
dha.Dkane.n mere javaa.n dil kii basii hai.n jis me.n
mai.n ne vo fikr vo fan nazr kiyaa hai tujh ko
kisii fankaar kaa kirdaar nahii.n bik saktaa
merii mahbuub tiraa pyaar nahii.n bik saktaa

Sabir Dutt
Nazm

shair

ai mire dil tujhe us tarah dh.Daknaa hogaa
ye sipaahii ye mire desh ke KHuddaar javaa.n
jin ke haatho.n me.n hai.n aazaadi-e-insaa.n ke nishaa.n
mujh ko mahsuus ho mai.n bhii huu.n unhii.n me.n shaamil
ai mire dil tujhe is tarah dh.Daknaa hogaa
ilm-o-science ke aflaak ke raushan mahtaab
jin kii aa.nkho.n me.n palaa karte hai.n taKHliiq ke KHvaab
mujh ko mahsuus ho mai.n bhii huu.n unhii.n me.n shaamil
ai mire dil tujhe is tarah dh.Daknaa hogaa
ye mire desh ke mazduur ye dahqaa.n ye avaam
jin ke haatho.n me.n hai ta.amiir-o-taraqqii kii lagaam
mujh ko mahsuus ho mai.n bhii huu.n unhii.n me.n shaamil
mai.n tahii-dast huu.n kyaa pesh-e-vatan nazr karuu.n
jaan-o-dil fikr-o-nazar azmat-e-fan nazr karuu.n

Rifat Sarosh
Nazm

shair ki duniya

gul-o-gulzaar ke manzar vo shero.n me.n dikhaataa hai
vo apne hii KHayaalo.n kii na.ii duniyaa basaataa hai
fazaa-e-qudrat-e-haq me.n sadaa aabaad hotaa hai
KHudaa kii qudrato.n ko dekh kar dil shaad hotaa hai
vo goyaa ek kuuze me.n hii dariyaa band kartaa hai
vo do lafzo.n me.n qudrat kaa tamaashaa band kartaa hai
gulistaa.n me.n kabhii bulbul-sifat mahv-e-tarannum hai
kabhii mahfil me.n jaa jaa kar vo masruuf-e-takallum hai
sadaa raah-e-KHudaa me.n baKHshne kaa hai KHayaal us ko
kafan ke vaaste kau.Dii bhii rakhnii hai muhaal us ko
kisii ko dard me.n dekhe to dil me.n dard paidaa ho
kisii majbuurii-e-haalat pe aah-e-sard paidaa ho
nahii.n dil me.n tamanna us ke kuchh shaan-e-amiirii kii
sadaa dil shaad rakhtii hai use lazzat faqiirii kii
zamaane ne nahii.n dekhaa ko.ii KHuddaar shaa.ir saa
Garaz ko.ii nahii.n ehsaan-naa-bardaar shaa.ir saa
rifaaqat desh kii kartaa hai us kaa aashnaa ban kar
dikhaataa qaum ko rasta hai us kaa rahnumaa ban kar

Narayan Das Puri
Nazm

KHuddari

teraa ye kahte hu.e siine me.n dil hiltaa nahii.n
ham-nashii.n kyo.n KHud-parastaaro.n se mai.n miltaa nahii.n
puuchhtaa hai mujh se is mohmal se fiqre kaa javaab
sun kiye detaa huu.n mai.n saarii haqiiqat be-naqaab
siina-e-shaa.ir me.n pinhaa.n jazba-e-KHuddaar hai
aa.nkh bhii raushan hai merii ruuh bhii bedaar hai
un ke aage ruuh merii pech-o-KHam khaatii rahii
phabtiyaa.n kastaa rahaa dil ruuh sharmaatii rahii
sard-mehrii se tamannaa-e-dilii shal ho ga.ii
baar-e-Gam se Gairat-e-taqdiir bojhal ho ga.ii
garmii-e-KHurshiid se sonaa pighaltaa hai kahii.n
jauharii bhii nuqs ke saa.nche me.n Dhaltaa hai kahii.n
jab ra.uunat chhe.Dtii hai KHud-parastii kaa sitaar
bhes me.n aaho.n ke dil hotaa hai meraa naGma-baar
qalb meraa daulat-e-ehsaas kho saktaa nahii.n
aab-o-taab-e-zar me.n KHuddaarii Dubo saktaa nahii.n
miT nahii.n saktaa miTaa.e se Gayuuraana-shikoh
kyaa banaa saktaa hai aKHlaaqii darindo.n kaa giroh
jazba-e-Gairat kisii ke paa.nv pa.D saktaa nahii.n
mar to saktaa huu.n zamii.n me.n zinda ga.D saktaa nahii.n
rahzan-e-insaaniyat rahte hai.n har dam ghaat me.n
apnii azmat kaa ko.ii rakhte hai.n pahluu baat me.n
Gairat-e-muKHlis halaak-e-jazba-e-pindaar ho
ai hariif-e-zehn-o-dil bedaar ho bedaar ho
un kii behis khaal par ko.ii asar hotaa nahii.n
tang-nazro.n me.n haqiiqat kaa guzar hotaa nahii.n
merii taariiKH-o-adab hii me.n nahii.n alfaaz-e-laaf
banda-parvar hai mujhe kam-maa.egii kaa e'tiraaf
aisii haalat me.n kisii se jhuk ke milnaa hai gunaah
ye KHuluus-e-be-mahal kartaa hai ruuho.n ko siyaah
apnaa dil apne hii haatho.n se masal saktaa nahii.n
ham-nashii.n mai.n apnii fitrat ko badal saktaa nahii.n

Nakhshab Jaarchawi
Nazm

dars-e-KHudi

shabnam sii zindagii kyaa
behtar hai mar hii jaanaa
KHuddaar ho jahaa.n me.n
hiire kaa jaise Tuk.Daa
KHurshiid kaa ho partav
saamaan KHud baqaa kaa
ban aah laKHt-e-aadam
almaas kaa tuu Tuk.Daa
hiire kaa ek Tuk.Daa
tashbiih hai KHudii kaa

Asghar Hasan Mujibi
Nazm

ban-bas

haa.e un ko bhii KHabar kyaa ki vo ik zaKHm-nasiib
zindagii ke liye niklaa thaa jo raahii ban kar
aaj tak paa na sakaa chashma-e-aab-e-haivaa.n
us ko suuraj bhii mile hai.n to siyaahii ban kar
ghar se laayaa thaa jo kuchh tab'-e-ravaa.n zehn-e-rasaa
saath us ke rahe asbaab-e-tabaahii ban kar

Khalilur Rahman Azmi
Nazm

gharib naujawan

tuufaa.n me.n bahne vaalaa
har jabr sahne vaalaa
kuchh bhii na kahne vaalaa
KHud.daar rahne vaalaa
ik bad-nasiib huu.n mai.n
ya.anii Gariib huu.n mai.n

Sahar Rampuri
Nazm

ek haqiqat

kise marg-e-'bismil' kaa ehsaas hogaa
vo bekas bhii thaa aur KHud.daar bhii thaa
gavaaraa na thii us ko zabt-e-mohabbat
numuud-e-mohabbat se inkaar bhii thaa
use kuchh shikaayat thii ik naaznii.n se
vo usluub-e-duniyaa se bezaar bhii thaa
naved-e-junuu.n jis kii tarz-e-jafaa thii
usii paikar-e-naaz se pyaar bhii thaa
mai-e-laala-guu.n par thii jaan us kii sadqe
vo dil-daada-e-chashm-e-biimaar bhii thaa
javaanii kaa aur ruup kaa vo pujaarii
‘uruus-e-hayaa kaa parastaar bhii thaa
vo aaGosh-e-daulat me.n paidaa hu.aa thaa
magar naam-e-daulat se bezaar bhii thaa
thii mahbuub use 'ishq kii KHud-sataa.ii
vo KHaatir zaraa naaz-bardaar bhii thaa
ye hastii thii us ke liye baar-e-KHaatir
vo shaa'ir thaa daanaa-e-asraar bhii thaa

Bismil Dehlavi
Nazm

fareb aur fareb ke darmiyan

mutriba saaz uThaa mujh ko magar nai de de
mere ehsaas ko naazuk sii ko.ii shai de de
terii KHud.daar tabii'at kaa taqaazaa hai yahii
aaj kii raat ye maa'luum hu.aa
meraa maazii mire auhaam se zyaada to nahii.n
mujh ko ye vahm thaa har shai ko mirii haajat hai
mujh ko ye vahm thaa har shai se mujhe ulfat hai
mujh ko ye vahm thaa mai.n ‘aalam-e-maujuud kaa mustaqbil huu.n
is ke bar-'aks
tab'-e-insaan se bargashta huu.n
apnii zid aap hai.n auhaam mire maz.hab ke
mai.n bhii majmuu'a-e-azdaad banaa baiThaa huu.n
mujh ko ye vahm hai har chiiz yahaa.n faanii hai
mujh ko ye vahm hai mai.n KHud bhii fasaana huu.n yahaa.n
mujh ko ye vahm hai har KHvaab miraa jhuuTaa hai

Mohammad Shamimuzzaman
Nazm

saza

tum jis zamiin par ho mai.n us kaa KHudaa nahii.n
pas sar-ba-sar aziyyat o aazaar hii raho
bezaar ho ga.ii ho bahut zindagii se tum
jab bas me.n kuchh nahii.n hai to bezaar hii raho
tum ko yahaa.n ke saaya o partav se kyaa Garaz
tum apne haq me.n biich kii diivaar hii raho

Jaun Eliya
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

wa-yabqa-wajh-o-rabbik (hum dekhenge)

jab bijlii ka.D-ka.D ka.Dkegii
jab arz-e-KHudaa ke ka.abe se
sab but uThvaa.e jaa.e.nge
ham ahl-e-safaa marduud-e-haram
masnad pe biThaa.e jaa.e.nge
sab taaj uchhaale jaa.e.nge
sab taKHt giraa.e jaa.e.nge
bas naam rahegaa allaah kaa
jo Gaa.eb bhii hai haazir bhii
jo manzar bhii hai naazir bhii
uTThegaa anal-haq kaa na.ara
jo mai.n bhii huu.n aur tum bhii ho

Faiz Ahmad Faiz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now