Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "aabe"

Nazm MATCHES FOR "aabe"

Nazm

daraKHt-e-zard

nahii.n ma.aluum 'zaryuun' ab tumhaarii umr kyaa hogii
vo kin KHvaabo.n se jaane aashnaa naa-aashnaa hogii
tumhaare dil ke is duniyaa se kaise silsile ho.nge
tumhe.n kaise gumaa.n ho.nge tumhe.n kaise gile ho.nge
tumhaarii sub.h jaane kin KHayaalo.n se nahaatii ho
tumhaarii shaam jaane kin malaalo.n se nibhaatii ho
na jaane kaun doshiiza tumhaarii zindagii hogii
na jaane us kii kyaa baayastagii shaa.istagii hogii
use tum phone karte aur KHat likhte rahe hoge
na jaane tum ne kitnii kam Galat urdu likhii hogii
ye KHat likhnaa to daqyaanuus kii pii.Dhii kaa qissa hai
ye sinf-e-nasr ham naa-baaliGo.n ke fan kaa hissa hai
vo ha.nstii ho to shaayad tum na rah paate ho haalo.n me.n
ga.Dhaa nanhaa saa pa.D jaataa ho shaayad us ke gaalo.n me.n
gumaa.n ye hai tumhaarii bhii rasaa.ii naa-rasaa.ii ho
vo aa.ii ho tumhaare paas lekin aa na paa.ii ho
vo shaayad maa.ide kii gand biryaanii na khaatii ho
vo naan-e-be-KHamiir-e-maida kam-tar hii chabaatii ho
vo doshiiza bhii shaayad daastaano.n kii ho dil-daada
use ma.aluum hogaa 'zaal' thaa 'sohraab' kaa daadaa
tahamtan ya.anii 'rustam' thaa giraamii 'saam' kaa vaaris
giraamii 'saam' thaa sulb-e-nar-e-'maanii' kaa KHush-zaada
(ye merii ek KHvaahish hai jo mushkil hai)
vo 'najm'-aafa.ndi-e-marhuum ko to jaantii hogii
vo nauho.n ke adab kaa tarz to pahchaantii hogii
use kad hogii shaayad un sabhii se jo lapaa.Dii ho.n
na ho.nge KHvaab us kaa jo gavayye aur khilaa.Dii ho.n

Jaun Eliya
Nazm

ai ishq hamein barbaad na kar

har dam abadii raahat kaa samaa.n dikhlaa ke hame.n dil-giir na kar
lillaah habaab-e-aab-e-ravaa.n par naqsh-e-baqaa tahriir na kar
maayuusii ke ramte baadal par ummiid ke ghar ta.amiir na kar

Akhtar Shirani
Nazm

etiraf

ab mire paas tum aa.ii ho to kyaa aa.ii ho

Asrarul Haq Majaz
Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal
Nazm

KHizr-e-rah

shaa'ir
saahil-e-dariyaa pe mai.n ik raat thaa mahv-e-nazar
gosha-e-dil me.n chhupaa.e ik jahaan-e-iztiraab
shab sukuut-afzaa havaa aasuuda dariyaa narm sair
thii nazar hairaa.n ki ye dariyaa hai yaa tasviir-e-aab
jaise gahvaare me.n so jaataa hai tifl-e-shiir-KHvaar
mauj-e-muztar thii kahii.n gahraa.iyo.n me.n mast-e-KHvaab
raat ke afsuu.n se taa.ir aashiyaano.n me.n asiir
anjum-e-kam-zau giraftaar-e-tilism-e-maahtaab
dekhtaa kyaa huu.n ki vo paik-e-jahaa.n-paimaa KHizr
jis kii piirii me.n hai maanind-e-sahar ra.ng-e-shabaab
kah rahaa hai mujh se ai juuyaa-e-asraar-e-azal
chashm-e-dil vaa ho to hai taqdiir-e-aalam be-hijaab
dil me.n ye sun kar bapaa ha.ngaama-e-mahshar hu.aa
mai.n shahiid-e-justujuu thaa yuu.n suKHan-gustar hu.aa
ai tirii chashm-e-jahaa.n-bii.n par vo tuufaa.n aashkaar
jin ke hangaame abhii dariyaa me.n sote hai.n KHamosh
kashtii-e-miskiin-o-jaan-e-paak-o-diivaar-e-yatiim
ilm-e-muusaa bhii hai tire saamne hairat-farosh
chho.D kar aabaadiyaa.n rahtaa hai tuu sahraa-navard
zindagii terii hai be-roz-o-shab-o-fardaa-o-dosh
zindagii kaa raaz kyaa hai saltanat kyaa chiiz hai
aur ye sarmaaya-o-mehnat me.n hai kaisaa KHarosh
ho rahaa hai asia kaa KHirqa-e-deriina chaak
naujavaa.n aqvaam-e-nau-daulat ke hai.n pairaaya-posh
garche askandar rahaa mahruum-e-aab-e-zindagii
fitrat-e-askandarii ab tak hai garm-e-naa.o-nosh
bechtaa hai haashmii naamuus diin-e-mustafaa
KHaak-o-KHuu.n me.n mil rahaa hai turkamaan-e-saKHt-kosh
aag hai aulaad-e-ibraahiim hai namruud hai
kyaa kisii ko phir kisii kaa imtihaa.n maqsuud hai
javaab-e-KHizr
sahraa-navardii

Allama Iqbal
Nazm

zindan ki ek sham

shaam ke pech-o-KHam sitaaro.n se
ziina ziina utar rahii hai raat
yuu.n sabaa paas se guzartii hai
jaise kah dii kisii ne pyaar kii baat
sehn-e-zindaa.n ke be-vatan ashjaar
sar-niguu.n mahv hai.n banaane me.n
daaman-e-aasmaa.n pe naqsh-o-nigaar
shaana-e-baam par damaktaa hai
mehrbaa.n chaa.ndnii kaa dast-e-jamiil
KHaak me.n ghul ga.ii hai aab-e-nujuum
nuur me.n ghul gayaa hai arsh kaa niil
sabz gosho.n me.n niil-guu.n saa.e
lahlahaate hai.n jis tarah dil me.n
mauj-e-dard-e-firaaq-e-yaar aa.e

Faiz Ahmad Faiz
Nazm

ban-bas

mai.n ki KHud apnii hii aavaaz ke sho.alo.n kaa asiir
mai.n ki KHud apnii hii zanjiir kaa zindaanii huu.n
kaun samjhegaa jahaa.n me.n mire zaKHmo.n kaa hisaab
kis ko KHush aa.egaa is dahr me.n ruuho.n kaa azaab
kaun aa kar mire miTne kaa tamaashaa dekhe
kis ko fursat ki uja.Dtii hu.ii duniyaa dekhe
kaun bha.Dkii hu.ii is aag ko apnaa.egaa
jo bhii aa.egaa mire saath hii jal jaa.egaa
vo gha.Dii kaun thii jab mujh ko milaa thaa ban-baas
ek jho.nkaa bhii havaa kaa na vatan se aayaa
ne ko.ii nik.hat-e-gul aur na ko.ii mauj-e-nasiim
phir ko.ii Dhuu.nDne mujh ko na chaman se aayaa
mai.n vo ik laal huu.n jo bik gayaa baazaaro.n me.n
phir ko.ii puuchhne mujh ko na yaman se aayaa
yaad karte hu.e ik yuusuf-e-gum-gashta ko
kuchh dino.n ro.ii to hogii mire ghar kii diivaar
kuchh dino.n gaa.nv kii galiyo.n me.n udaasii hogii
kuchh dino.n khul na sake ho.nge tire haar si.nghaar
kuchh dino.n ke liye sunsaan saa lagtaa hogaa
aam ke baaG me.n bechain phirii hogii bahaar
mai.n ne ik pe.D pe jo naam likhaa thaa apnaa
kuchh dino.n zaKHm ke maanind vo taaza hogaa
mere sab dost use dekh ke kahte ho.nge
jaane kis des me.n bechaara bhaTaktaa hogaa
umr bhar kaun kise yaad kiyaa kartaa hai
ek ik kar ke mujhe sab ne bhulaayaa hogaa
haa.e un ko bhii KHabar kyaa ki vo ik zaKHm-nasiib
zindagii ke liye niklaa thaa jo raahii ban kar
aaj tak paa na sakaa chashma-e-aab-e-haivaa.n
us ko suuraj bhii mile hai.n to siyaahii ban kar
ghar se laayaa thaa jo kuchh tab-e-ravaa.n zehn-e-rasaa
saath us ke rahe asbaab-e-tabaahii ban kar
meraa ye jurm ki mai.n saahab-e-idraak-o-shu.uur
meraa ye aib ki ik shaa.ir o fankaar huu.n mai.n
mujh ko ye zid hai ki mai.n sar na jhukaa.uu.ngaa kabhii
mujh ko israar ki jiine kaa sazaa-vaar huu.n mai.n
mujh ko ye faKHr ki mai.n haqq-o-sadaaqat kaa amii.n
mujh ko ye zo.am KHud-aagaah huu.n KHuddaar huu.n mai.n
ek ik mo.D pe aalaam o masaa.ib ke pahaa.D
ek ik gaam pe aafaat se Takraayaa huu.n
ek ik zahr ko ha.ns ha.ns ke piyaa hai mai.n ne
ek ik zaKHm ko chun chun ke uThaa laayaa huu.n
ek ik lamhe kii zanjiir se mai.n uljhaa huu.n
ek ik saa.ns pe KHud aap se sharmaayaa huu.n
yuu.n to kahne kii nahii.n baat magar kahtaa huu.n
pyaar kaa naam kitaabo.n me.n likhaa dekhaa hai
jab kabhii haath ba.Dhaayaa hai kisii kii jaanib
faasla aur bhii kuchh ba.Dhtaa hu.aa dekhaa hai
buu.nd bhar de na sakaa ko.ii mohabbat kii sharaab
yuu.n to mai-KHaane kaa mai-KHaana luTaa dekhaa hai

Khalilur Rahman Azmi
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chii۔n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

ai dil-e-be-KHabar

ai dil-e-be-KHabar
jo havaa jaa chukii ab nahii.n aa.egii
jo shajar TuuT jaataa hai phaltaa nahii.n
vaapsii mausamo.n kaa muqaddar to hai
jo samaa.n biit jaa.e palaTtaa nahii.n
jaane vaale nahii.n lauTte umr bhar
ab kise Dhuu.nDhtaa hai sar-e-rahguzar
ai dil-e-kam-nazar ai mire be-KHabar ai mire ham-safar
vo to KHushbuu thaa agle nagar jaa chukaa
chaa.ndnii thaa hu.aa sarf-e-ra.ng-e-qamar
KHvaab thaa aa.nkh khulte hii ojhal hu.aa
pe.D thaa rut badalte hu.aa be-samar
ai dil-e-be-asar ai mire chaara-gar
ye hai kis ko KHabar!
kab havaa-e-safar kaa ishaara mile!
kab khule.n saahilo.n par safiino.n ke par
kaun jaane kahaa.n manzil-e-mauj hai!
kis jaziire pe hai shaah-zaadii kaa ghar ai mire chaara-gar
ai dil-e-be-KHabar kam-nazar mo'tabar
tuu ki muddat se hai zer-e-baar-e-safar
be-qaraar-e-safar
rail kii be-hunar pTriyo.n kii tarah
aas ke be-samar mausamo.n kii tarah
be-jahat manzilo.n kii masaafat me.n hai
rasta bhuule hu.e rahravo.n kii tarah
chob-e-naar-e-safar
e'tibaar-e-nazar kis gumaa.n par kare.n
ai dil-e-be-basar
ye to saahil pe bhii dekhtii hai bha.nvar
ret me.n kisht kartii hai aab-e-baqaa
kholtii hai havaa.o.n me.n baab-e-asar
tujh ko rakhtii hai ye zebdaar-e-safar be-qaraar-e-safar
ai dil-e-be-hunar
garm saa.nso.n kii vo KHushbu.e.n bhuul jaa
vo chahaktii hu.ii dha.Dkane.n bhuul jaa
bhuul jaa narm ho.nTo.n kii shaadaabiyaa.n
harf-e-iqraar kii lazzate.n bhuul jaa
bhuul jaa vo havaa bhuul jaa vo nagar
kaun jaane kahaa.n raushnii kho ga.ii
luT gayaa hai kahaa.n kaarvaan-e-sahar
ab kahaa.n gesu.o.n ke vo saa.e kahaa.n
us kii aahaT se chamke hu.e baam-o-dar ai dil-e-be-basar
ra.ng-e-aasuudgii ke tamaashe kahaa.n
jhuTpuTaa hai yahaa.n rahguzar rahguzar
vo to KHushbuu thaa agle nagar jaa chukaa
ab kise Dhuu.nDhtaa hai are be-KHabar
jaane vaale nahii.n lauTte umr bhar
ai dil-e-kam-nazar ai mire chaara-gar ai mire ham-safar

Amjad Islam Amjad
Nazm

mujhe apne jine ka haq chahiye

mujhe apne jiine kaa haq chaahiye
zamii.n jis pe mere qadam Tik sake.n
aur taaro.n bharaa kuchh falak chaahiye
mujhe apne jiine kaa haq chaahiye
nemate.n jo mere rab ne dhartii ko dii.n
saaf paanii havaa baarishe.n chaa.ndnii
ye to har ibn-e-aadam kii jaagiir hai.n
ye hamaarii tumhaarii kisii kii nahii.n
mujh ko ta.aliim sehat aur ummiid kii
saat ra.ngo.n bharii ik dhanak chaahiye
mujhe apne jiine kaa haq chaahiye
na havaa saaf hai na fazaa saaf hai
vo jo aab-e-baqaa thaa vo naa-saaf hai
zamii.n ho samundar ho yaa aasmaa.n
ik zaraa sochiye ab ki kyaa saaf hai
maut se pur-KHatar hai ye aaluudgii
dosto dil me.n tho.Dii kasak chaahiye
mujhe apne jiine kaa haq chaahiye

Amjad Islam Amjad
Nazm

aaj ki raat na ja

zindagii lutf bhii hai zindagii aazaar bhii hai
saaz-o-aaha.ng bhii zanjiir kii jhankaar bhii hai
zindagii diid bhii hai hasrat-e-diidaar bhii hai
zahr bhii aab-e-hayaat-e-lab-o-ruKHsaar bhii hai
zindagii KHaar bhii hai zindagii daar bhii hai
aaj kii raat na jaa

Makhdoom Mohiuddin
Nazm

barkha-rut

garmii kii tapish bujhaane vaalii
sardii kaa payaam laane vaalii
qudrat ke ajaa.ibaat kii kaa.n
aarif ke liye kitaab-e-irfaa.n
vo shaaKH-o-daraKHt kii javaanii
vo mor-o-malaKH kii zindagaanii
vo saare baras kii jaan barsaat
vo kaun-e-KHudaa kii shaan barsaat
aa.ii hai bahut du.aa.o.n ke ba.ad
vo saik.Do.n iltijaa.o.n ke ba.ad
vo aa.ii to aa.ii jaan me.n jaa.n
sab the ko.ii din ke varna mehmaa.n
garmii se ta.Dap rahe the jaan-daar
aur dhuup me.n tap rahe the kohsaar
bhuubal se sivaa thaa reg-e-sahraa
aur khaul rahaa thaa aab-e-dariyaa
saa.nDe the bilo.n me.n mu.nh chhupaa.e
aur haa.np rahe the chaarpaa.e
thii.n loma.Diyaa.n zabaa.n nikaale
aur luu se hiran hu.e the kaale
chiito.n ko na thii shikaar kii sudh
hirno.n ko na thii qataar kii sudh
the sher pa.De kachhaar me.n sust
gha.Diyaal the ruud-baar me.n sust
Dhoro.n kaa hu.aa thaa haal patlaa
bailo.n ne diyaa thaa Daal kandhaa
bhai.nso.n ke lahuu na thaa badan me.n
aur duudh na thaa ga.uu ke than me.n
gho.Do.n kaa chhuTaa thaa ghaas daana
thaa pyaas kaa un pe taaziyaana
garmii kaa lagaa hu.aa thaa bhabkaa
aur ans nikal rahaa thaa sab kaa
tuufaan the aa.ndhiyo.n ke barpaa
uThtaa thaa baguule par baguulaa
aare the badan pe luu ke chalte
sho.ale the zamiin se nikalte
thii aag kaa de rahii havaa kaam
thaa aag kaa naam muft bad-naam
rasto.n me.n savaar aur paidal
sab dhuup ke haath se the bekal
gho.Do.n ke na aage uThte the paa.nv
miltii thii kahii.n jo ruukh kii chhaa.nv
thii sab kii nigaah suu-e-aflaak
paanii kii jagah barastii thii KHaak

Altaf Hussain Hali
Nazm

muslim uniwersity aligarh se KHitab

ai aligarh ai javaa.n-qismat dabistaan-e-kuhan
aql ke faanuus se raushan hai terii anjuman
hashr ke din tak phalaa-phuulaa rahe teraa chaman
tere paimaano.n me.n larzaa.n hai sharaab-e-ilm-o-fan
ruuh-e-'sir-sayyad' se raushan teraa mai-KHaana rahe
rahtii duniyaa tak tiraa gardish me.n paimaana rahe
ek din ham bhii tirii aa.nkho.n ke biimaaro.n me.n the
terii zulf-e-KHam najam ke nau-giraftaaro.n me.n the
terii jins-e-ilm-parvar ke KHariidaaro.n me.n the
jaan-o-dil se tere jalvo.n ke parastaaro.n me.n the
mauj-e-kausar thaa tiraa sail-e-adaa apne liye
aab-e-haivaa.n thii terii aab-o-havaa apne liye
ilm kaa pahlaa sabaq tuu ne pa.Dhaayaa thaa hame.n
kis tarah jiite hai.n tuu ne hii bataayaa thaa hame.n
KHvaab se tiflii ke tuu ne hii jagaayaa thaa hame.n
naaz se parvaan tuu ne hii cha.Dhaayaa thaa hame.n
mausam-e-gul keii KHabar terii zabaanii aa.ii thii
tere baaGo.n me.n havaa khaa kar javaanii aa.ii thii
lekin ai ilm-o-jasaarat ke daraKHshaa.n aaftaab
kuchh ba-alfaaz-e-digar bhii tujh se karnaa hai KHitaab
go ye dha.Dkaa hai ki huu.ngaa murid-e-qahr-o-itaab
kah bhii duu.n jo kuchh hai dil me.n taa-kujaa ye pech-o-taab
ban pa.De jo sa.ii apne se vo karnaa chaahiye
mard ko kahne ke mauqa pe na Darnaa chaahiye
ai aligarh ai halaak-e-taabish-e-vaz.a-e-fara.ng
'thames' hai aaGosh me.n tere bajaa.e mauj-e-ga.ng
vaadii-e-maGrib me.n gum hai tere dil keii har uma.ng
valvalo.n me.n tere shaayad arsa-e-mashriq hai ta.ng
kab hai maGrib ka.aba-e-haajat-ravaa tere liye
aa ki hai bechain ruuh-e-asia tere liye
kushta-e-maGrib nigaar-e-sharq ke abruu bhii dekh
saaz-e-be-ra.ngii ke juuyaa soz-e-rang-o-buu bhii dekh
nargis-e-arzaq ke shaidaa diida-e-aahuu bhii dekh
ai sunahrii zulf ke qaidii siyah gesuu bhii dekh
kar chukaa sair asl markaz par to aanaa chaahiye
apne ghar keii samt bhii aa.nkhe.n uThaanaa chaahiye
puKHta-kaarii siikh ye aa.iin-e-KHaamii taa-kujaa
jaada-e-afrang par yuu.n tez-gaamii taa-kujaa
soch tuu jii me.n ye jhuuTii nek-naamii taa-kujaa
maGribii tahziib kaa tauq-e-Gulaamii taa-kujaa
mard agar hai Gair keii taqliid karnaa chho.D de
chho.D de lillaah bil-aqsaat marnaa chho.D de

Josh Malihabadi
Nazm

goristan-e-shahi

aasmaa.n baadal kaa pahne KHirqa-e-deriina hai
kuchh mukaddar saa jabiin-e-maah kaa aa.iina hai
chaa.ndnii phiikii hai is nazzaara-e-KHaamosh me.n
sub.h-e-saadiq so rahii hai raat kii aaGosh me.n
kis qadar ashjaar kii hairat-fazaa hai KHaamushii
barbat-e-qudrat kii dhiimii sii navaa hai KHaamushii
baatin-e-har-zarra-e-aalim saraapaa dard hai
aur KHaamoshii lab-e-hastii pe aah-e-sard hai
aah jaulaa.n-gaah-e-aalam-giir yaanii vo hisaar
dosh par apne uThaa.e saik.Do.n sadiyo.n kaa baar
zindagii se thaa kabhii ma.amuur ab sunsaan hai
ye KHamoshii us ke ha.ngaamo.n kaa goristaan hai
apne sukkaan-e-kuhan kii KHaak kaa dil-daada hai
koh ke sar par misaal-e-paasbaa.n istaada hai
abr ke rauzan se vo baalaa-e-baam-e-aasmaa.n
naazir-e-aalam hai najm-e-sabz-faam-e-aasmaa.n
KHaak-baazii vus.at-e-duniyaa kaa hai manzar use
daastaa.n naakaami-e-insaa.n kii hai azbar use
hai azal se ye musaafir suu-e-manzil jaa rahaa
aasmaa.n se inqilaabo.n kaa tamaashaa dekhtaa
go sukuu.n mumkin nahii.n aalam me.n aKHtar ke liye
faatiha-KHvaanii ko ye Thahraa hai dam bhar ke liye
ra.ng-o-aab-e-zinagii se gul-ba-daaman hai zamii.n
saik.Do.n KHuu.n-gashta tahziibo.n kaa madfan hai zamii.n
KHvaab-gah shaaho.n kii hai ye manzil-e-hasrat-fazaa
diida-e-ibrat KHiraaj-e-ashk-e-gul-guu.n kar adaa
hai to goristaa.n magar ye KHaak-e-garduu.n-paaya hai
aah ik bargashta qismat qaum kaa sarmaaya hai
maqbaro.n kii shaan hairat-aafrii.n hai is qadar
jumbish-e-mizhgaa.n se hai chashm-e-tamaashaa ko hazar
kaifiyat aisii hai naakaamii kii is tasviir me.n
jo utar saktii nahii.n aa.iina-e-tahriir me.n
sote hai.n KHaamosh aabaadii ke ha.ngaamo.n se duur
muztarib rakhtii thii jin ko aarzuu-e-naa-subuur
qabr kii zulmat me.n hai in aaftaabo.n kii chamak
jin ke darvaazo.n pe rahtaa hai jabii.n-gustaar falak
kyaa yahii hai in shahanshaaho.n kii azmat kaa ma.aal
jin kii tadbiir-e-jahaa.nbaanii se Dartaa thaa zavaal
rob-e-faGfuurii ho duniyaa me.n ki shaan-e-qaisarii
Tal nahii.n saktii Ganiim-e-maut kii yuurish kabhii
baadshaaho.n kii bhii kisht-e-umr kaa haasil hai gor
jaada-e-azmat kii goyaa aaKHirii manzil hai gor
shorish-e-bazm-e-tarab kyaa uud kii taqriir kyaa
dardmandaan-e-jahaa.n kaa naala-e-shab-giir kyaa
arsa-e-paikaar me.n ha.ngaama-e-shamshiir kyaa
KHuun ko garmaane vaalaa naara-e-takbiir kyaa
ab ko.ii aavaaz soto.n ko jagaa saktii nahii.n
siina-e-viiraa.n me.n jaan-e-rafta aa saktii nahii.n
ruuh-e-musht-e-KHaak me.n zahmat-kash-e-bedaad hai
kuucha gard-e-nai hu.aa jis dam nafas fariyaad hai
zindagii insaa.n kii hai maanind-e-murG-e-KHush-navaa
shaaKH par baiThaa ko.ii dam chahchahaayaa u.D gayaa
aah kyaa aa.e riyaaz-e-dahr me.n ham kyaa ga.e
zindagii kii shaaKH se phuuTe khile murjhaa ga.e
maut har shaah o gadaa ke KHvaab kii taabiir hai
is sitamgar kaa sitam insaaf kii tasviir hai
silsila hastii kaa hai ik bahr-e-naa-paidaa-kanaar
aur is dariyaa-e-be-paayaa.n kii mauje.n hai.n mazaar
ai havas KHuu.n ro ki hai ye zindagii be-e'tibaar
ye sharaare kaa tabassum ye KHas-e-aatish-savaar
chaa.nd jo suurat-gar-e-hastii kaa ik ejaaz hai
pahne siimaabii qabaa mahv-e-KHiraam-e-naaz hai
charKH-e-be-anjum kii dahshatnaak vus.at me.n magar
bekasii is kii ko.ii dekhe zaraa vaqt-e-sahar
ik zaraa saa abr kaa Tuk.Daa hai jo mahtaab thaa
aaKHirii aa.nsuu Tapak jaane me.n ho jis kii fanaa
zindagii aqvaam kii bhii hai yuu.nhii be-e'tibaar
ra.ng-haa-e-rafta kii tasviir hai un kii bahaar
is ziyaa.n-KHaane me.n ko.ii millat-e-garduu.n-vaqaar
rah nahii.n saktii abad tak baar-e-dosh-e-rozgaar
is qadar qaumo.n kii barbaadii se hai KHuugar jahaa.n
dekhtaa be-e'tinaa.ii se hai ye manzar jahaa.n
ek suurat par nahii.n rahtaa kisii shai ko qaraar
zauq-e-jiddat se hai tarkiib-e-mizaaj-e-rozgaar
hai nagiin-e-dahr kii ziinat hamesha naam-e-nau
maadar-e-giitii rahii aabastan-e-aqvaam-e-nau
hai hazaaro.n qaafilo.n se aashnaa ye rahguzar
chashm-e-koh-e-nuur ne dekhe hai.n kitne taajvar
misr o baabul miT ga.e baaqii nishaa.n tak bhii nahii.n
daftar-e-hastii me.n un kii daastaa.n tak bhii nahii.n
aa dabaayaa mehr-e-iiraa.n ko ajal kii shaam ne
azmat-e-yuunaan-o-ruumaa luuT lii ayyaam ne
aah muslim bhii zamaane se yuu.nhii ruKHsat hu.aa
aasmaa.n se abr-e-aazaarii uThaa barsaa gayaa
hai rag-e-gul sub.h ke ashko.n se motii kii la.Dii
ko.ii suuraj kii kiran shabnam me.n hai uljhii hu.ii
siina-e-dariyaa shu.aa.o.n ke liye gahvaara hai
kis qadar pyaaraa lab-e-juu mehr kaa nazzaara hai
mahv-e-ziinat hai sanobar juu.ebaar-e-aa.iina hai
Guncha-e-gul ke liye baad-e-bahaar-e-aa.iina hai
na.ara-zan rahtii hai koyal baaG ke kaashaane me.n
chashm-e-insaa.n se nihaa.n patto.n ke uzlat-KHaane me.n
aur bulbul mutrib-e-ra.ngii.n navaa-e-gulsitaa.n
jis ke dam se zinda hai goyaa havaa-e-gulsitaa.n
ishq ke ha.ngaamo.n kii u.Dtii hu.ii tasviir hai
KHaama-e-qudrat kii kaisii shoKH ye tahriir hai
baaG me.n KHaamosh jalse gulsitaa.n-zaado.n ke hai.n
vaadi-e-kohsaar me.n na.are shabaa.n-zaado.n ke hai.n
zindagii se ye puraanaa KHaak-daa.n ma.amuur hai
maut me.n bhii zindagaanii kii ta.Dap mastuur hai
pattiyaa.n phuulo.n kii girtii hai.n KHizaa.n me.n is tarah
dast-e-tifl-e-KHufta se ra.ngii.n khilaune jis tarah
is nashaat-aabaad me.n go aish be-andaaza hai
ek Gam yaanii Gam-e-millat hamesha taaza hai
dil hamaare yaad-e-ahd-e-rafta se KHaalii nahii.n
apne shaaho.n ko ye ummat bhuulne vaalii nahii.n
ashk-baarii ke bahaane hai.n ye uj.De baam o dar
girya-e-paiham se biinaa hai hamaarii chashm-e-tar
dahr ko dete hai.n motii diida-e-giryaa.n ke ham
aaKHirii baadal hai.n ik guzre hu.e tuufaa.n ke ham
hai.n abhii sad-haa guhar is abr kii aaGosh me.n
barq abhii baaqii hai is ke siina-e-KHaamosh me.n
vaadi-e-gul KHaak-e-sahraa ko banaa saktaa hai ye
KHvaab se ummiid-e-dahqaa.n ko jagaa saktaa hai ye
ho chukaa go qaum kii shaan-e-jalaalii kaa zuhuur
hai magar baaqii abhii shaan-e-jamaalii kaa zuhuur

Allama Iqbal
Nazm

tarana-e-reKHta

dariyaa hai.n 'miir'-o-'Gaalib' har lab pe jo ravaa.n hai.n
'faiz' o 'firaaq' aur 'daaG' har dil pe hukmaraa.n hai.n
aur 'kirshn-chandr' 'manto' zinda kahaaniyaa.n hai.n
lafzo.n ke aa.ine me.n husn-e-bayaa.n kaa jaaduu

Farhat Ehsas
Nazm

aaj ki raat

kis qadar dil-nashii.n hai.n lab tere
baada-e-ahmarii.n hai.n lab tere
tere ho.nTo.n kaa ras nahii.n hai ye
aab-e-kausar hai a.ngbii.n hai ye
shahad ke ghuu.nT pii rahaa huu.n mai.n
aaj kii raat jii rahaa huu.n mai.n
aaj kii raat phir na aa.egii!

Hafeez Hoshiarpuri
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

basanti tarana

lo phir basant aa.ii
phuulo.n pe rang laa.ii
chalo be-dara.ng
lab-e-aab-e-ga.ng
baje jal-tara.ng
man par uma.ng chhaa.ii
phuulo.n pe rang laa.ii
lo phir basant aa.ii

Hafeez Jalandhari
Nazm

paisa

naqsh yaa.n jis ke miyaa.n haath lagaa paise kaa
us ne tayyaar har ik ThaaTh kiyaa paise kaa
ghar bhii paakiiza imaarat se banaa paise kaa
khaanaa aaraam se khaane ko milaa paise kaa
kap.Daa tan kaa bhii milaa zeb-fazaa paise kaa
jab hu.aa paise kaa ai dosto aa kar sanjog
ishrate.n paas hu.ii.n duur hu.e man ke rog
khaa.e jab maal-puu.e duudh dahii mohan-bhog
dil ko aanand hu.e bhaag ga.e rog aur dhog
aisii KHuubii hai jahaa.n aanaa hu.aa paise kaa
saath ik dost ke ik din jo mai.n gulshan me.n gayaa
vaa.n ke sarv-o-suman-o-laala-o-gul ko dekhaa
puuchhaa us se ki ye hai baaG bataa.o kis kaa
us ne tab gul kii tarah ha.ns diyaa aur mujh se kahaa
mehrbaa.n mujh se ye tum puuchhaa ho kyaa paise kaa
ye to kyaa aur jo hai.n is se ba.De baaG-o-chaman
hai.n khile kiyaariyo.n me.n nargis-o-nasriin-o-suman
hauz favvaare hai.n ba.nglo.n me.n bhii parde chalvan
jaa-ba-jaa qumrii-o-bulbul kii sadaa shor-afgan
vaa.n bhii dekhaa to faqat gul hai khilaa paise kaa
vaa.n ko.ii aayaa liye ek murassaa pi.nj.Daa
laal dastaar-o-dupaTTaa bhii haraa juu.n-totaa
is me.n ik baiThii vo mainaa ki ho bulbul bhii fidaa
mai.n ne puuchhaa ye tumhaaraa hai rahaa vo chupkaa
niklii minqaar se mainaa ke sadaa paise kaa
vaa.n se niklaa to makaa.n ik nazar aayaa aisaa
dar-o-diivaar se chamke thaa pa.Daa aab-e-talaa
siim chuune kii jagah us kii thaa ii.nTo.n me.n lagaa
vaah-vaa kar ke kahaa mai.n ne ye hogaa kis kaa
aql ne jab mujhe chupke se kahaa paise kaa
ruuThaa aashiq se jo maashuuq ko.ii haT kaa bharaa
aur vo minnat se kisii taur nahii.n hai mantaa
KHuubiyaa.n paise kii ai yaaro kahuu.n mai.n kyaa kyaa
dil agar sang se bhii us kaa ziyaada thaa ka.Daa
mom-saa ho gayaa jab naam sunaa paise kaa
jis gha.Dii hotii hai ai dosto paise kii numuud
har tarah hotii hai KHush-vaqti-o-KHuubii bahbuud
KHush-dilii taazgii aur KHurmii kartii hai duruud
jo KHushii chaahiye hotii hai vahii.n aa maujuud
dekhaa yaaro to ye hai aish-o-mazaa paise kaa
paise vaale ne agar baiTh ke logo.n me.n kahaa
jaisaa chaahuu.n to makaa.n vaisaa hii Daaluu.n banvaa
harf-e-takraar kisii kii jo zabaa.n par aayaa
us ne banvaa ke diyaa jaldii se vaisaa hii dikhaa
us kaa ye kaam hai ai dosto yaa paise kaa
naach aur raag kii bhii KHuub-sii tayyaarii hai
husn hai naaz hai KHuubii hai tarah-daarii hai
rabt hai pyaar hai aur dostii hai yaarii hai
Gaur se dekhaa to sab aish kii bisyaarii hai
ruup jis vaqt hu.aa jalva-numaa paise kaa
daam me.n daam ke yaaro jo miraa dil hai asiir
is liye hotii hai ye merii zabaa.n se taqriir
jii me.n KHush rahtaa hai aur dil bhii bahut aish-paziir
jis qadar ho sakaa mai.n ne kiyaa tahriir 'naziir'
vasf aage mai.n likhuu.n taa-ba-kujaa paise kaa

Nazeer Akbarabadi
Nazm

nazm

tah-ba-tah dil kii kuduurat
merii aa.nkho.n me.n uma.nD aa.ii to kuchh chaara na thaa
chaara-gar kii maan lii
aur mai.n ne gard-aaluud aa.nkho.n ko lahuu se dho liyaa
mai.n ne gard-aaluud aa.nkho.n ko lahuu se dho liyaa
aur ab har shakl-o-suurat
aalam-e-maujuud kii har ek shai
merii aa.nkho.n ke lahuu se is tarah ham-ra.ng hai
KHurshiid kaa kundan lahuu
mahtaab kii chaa.ndii lahuu
sub.ho.n kaa ha.nsnaa bhii lahuu
raato.n kaa ronaa bhii lahuu
har shajar miinaar-e-KHuu.n har phuul KHuun-diida hai
har nazar ik taar-e-KHuu.n har aks KHuu.n-baaliida hai
mauj-e-KHuu.n jab tak ravaa.n rahtii hai us kaa surKH ra.ng
jazba-e-shauq-e-shahaadat dard, Gaiz o Gam kaa ra.ng
aur tham jaa.e to kajlaa kar
faqat nafrat kaa shab maut kaa
har ik rang ke maatam kaa ra.ng
chaara-gar aisaa na hone de
kahii.n se laa ko.ii sailaab-e-ashk
aab-e-vazuu
jis me.n dhul jaa.e.n to shaayad dhul sake
merii aa.nkho.n merii gard-aaluud aa.nkho.n kaa lahuu

Faiz Ahmad Faiz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now