Search result for "aamad-o-raft" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "aamad-o-raft"

Nazm MATCHES FOR "aamad-o-raft"

Nazm

ajab hai khel carrom ka

har ik khelne vaale kii bas ik hii tamannaa hai
isii carrom ke kono.n me.n jo chhoTe chhoTe kamre hai.n
unhe.n aabaad karnaa hai kaniizo.n se aur raanii se
khilaa.Dii chaal chaltaa hai stricker kii madad se
aamad-o-raft un kaniizo.n kii
lagii rahtii hai kamro.n me.n
kahii.n gorii kahii.n kaalii kabhii raanii
ajab hai khel carrom kaa

Ibn-e-Mufti

Nazm

KHud-kushi karne ka agla mansuba

khi.Dkii se baahar pukaar rahaa thaa aasmaan
magar chiTKHinii aur frame ne jaka.D liyaa
ek duusre kaa haath
aur habs ba.Dhtaa gayaa
logo.n kii aamad-o-raft ke saath

Sidra Sahar Imran

Nazm

ba-izzat tariqe se jine ke jatan

is ke baavajuud hamaarii aa.nkhe.n
a.ndhere me.n dekh saktii hai.n
dekh saktii hai.n ki daa.e.n baa.e.n rahne vaalo.n ne
aa.nkho.n ko badan me.n Gair-zaruurii samjhaa
aur mahal vaalo.n ko atiyya kar dii.n
agar is baras bairuunii gaahako.n kii aamad-o-raft
mahduud rahii to ain mumkin hai
hamaarii juutiyaa.n hamaare saro.n se utaar kar
pairo.n me.n pahnaa dii jaa.e.n

Sidra Sahar Imran

Nazm

dars-e-mohabbat

dost milaa thaa tujh ko kaisaa haif itnaa bhii yaad nahii.n
jaan fidaa kartaa thaa jis par dil me.n us kii yaad nahii.n
gardish-e-dauraa.n ne jab us ko aah shikasta-haal kiyaa
dekh kar us ke haal-e-zabuu.n ko tuu ne kuchh na malaal kiyaa
kaun shikasta-haal kahaa.n hai ye bhii dhyaan aayaa na tujhe
aah tasavvur ne aise mohsin ke ta.Dpaayaa na tujhe
paas thaa apne qaul kaa jis ko tuu ne kuchh us kaa paas kiyaa
aamad-o-raft-e-deriina kaa bhuul ke bhii ehsaas kiyaa
us ke dard se vaaqif ho kar tuu ne KHabar kyaa lii us kii
qarz mohabbat jaan ke dil se kyaa ko.ii KHidmat kii us kii
dil tere us dost kaa naahaq vaqf-e-sahar-e-lisaanii thaa
merii samajh me.n ab aayaa vo jam-o-KHarch zabaanii thaa
naadaa.n insaan terii daulat tere saath na jaa.egii
lailaa-e-matlab duur rahegii tere paas na aa.egii
hasr faqat tujh hii par kiyaa hai tuu hii ik zar-dost nahii.n
dost bahut milte hai.n lekin un me.n aksar dost nahii.n
dost nahii.n jo naam kii KHaatir apne dost ke kaam aa.e
dost vo hai logo.n kii zabaa.n par jis kaa misaalan naam aa.e

Ali Manzoor Hyderabadi

Nazm

gang-o-jaman

sarmaaya-e-nashaat sahii aamad-e-bahaar
lekin use nasiib tiraa baa.nkpan kahaa.n

Shatir Hakeemi

Nazm

nala-e-firaq

zarra mere dil kaa KHurshiid-aashnaa hone ko thaa
aa.ina TuuTaa hu.aa aalam-numaa hone ko thaa
naKHl merii aarzuu.o.n kaa haraa hone ko thaa
aah! kyaa jaane ko.ii mai.n kyaa se kyaa hone ko thaa!
abr-e-rahmat daaman-az-gulzaar-e-man barchiid-o-raft
a.ndkai bar-Guncha haa.e aarzuu baariid-o-raft

Allama Iqbal

Nazm

guftugu

mai.n ne kahaa janaab se mah.ngaa.ii hai bahut
bole tumhaarii aamad-e-baalaa.ii hai bahut

Nashtar Amrohvi

Nazm

ek taswir

raah-e-ulfat kii rivaayaat-e-kuhan zinda hai.n
sar-ba-kaf ahl-e-vafaa bahr-e-tamaasha guzre
dard kii raat vahii karb kaa ehsaas vahii
aamad-e-sub.h-e-tamanna kaa gumaa.n kyaa guzre
KHauf kaliyo.n kaa tabassum bhii churaa letaa hai
ufuq-e-jabr a.ndhero.n kaa pataa detaa hai

Muslim Shameem

Nazm

aap kaun

takallufaat ke parde zaraa haTaa.iye to
fasaana-e-Gam-e-pinhaa.n hame.n sunaa.iye to
ye kaisii aamad-e-be-vaqt hai bataa.iye to
na aur kiijiye hairaan ham nahii.n samjhe
mu.aaf kiijiye shriimaan ham nahii.n samjhe

Hilal Rizvi

Nazm

rah-e-taKHayyul

KHvaabo.n kii rahguzar sahii
socho.n kaa qaafila sahii
mai.n aamad-e-rafiiq ko
ik aks-e-baa-kamaal duu.n

Ishrat moin Seemaa

Nazm

gul-farosh

ye naaznii.n ki jise qaasid-e-bahaar kahe.n
javaa.n hasiina ki fitrat kaa shaahkaar kahii.n
payaam-e-aamad-e-fasl-e-bahaar detii hai
junuu.n-nasiib dilo.n kii du.aa.e.n letii hai
ise chaman ke har ik phuul se mohabbat hai
ise bahaar kii ra.anaa.iyo.n se ulfat hai
gulo.n me.n phirtii hai yuu.n jaise tiitarii ko.ii
chaman kii sair kare yaa hasii.n parii ko.ii
jo phuul chunte hu.e naGme gungunaatii hai
ye shaayad apnii javaanii ke giit gaatii hai
shabaab ne jo ise tamkanat sikhaa dii hai
Gariib hii sahii phuulo.n kii shaahzaadii hai
jahaan vaalo.n kaa husn-e-suluuk dekhaa hai
ise zamaane kii be-rahmiyo.n se shikva hai
guzar rahe hai.n shab-o-roz kitne bhaarii se
shabaab kaaT rahii hai hazaar KHvaarii se
KHudii kaa dars hai afsaana-e-hayaat is kaa
javaab paidaa karegii na kaa.enaat is kaa
ise zamaane kii naira.ngiyo.n kaa hosh nahii.n
mirii nazar me.n ye devii hai gul-farosh nahii.n
sitam-zariifii-e-fitrat ko aaj sharmaa.uu.n
jo haar guu.ndhe hai.n aaj usii ko pahnaa.uu.n

Nazeer Mirza Barlas

Nazm

masjid

yaa abaabiil ko.ii aamad-e-sarmaa ke qariib
us ko maskan ke liye Dhuu.nD liyaa kartii hai
aur mehraab-e-shikasta me.n simaT kar pahro.n
daastaa.n sard mumaalik kii kahaa kartii hai

Akhtarul Iman

Nazm

ye kis dayar-e-adam mein

nahii.n hai yuu.n to nahii.n hai ki ab nahii.n paidaa
kasii ke husn me.n shamshiir-e-aaftaab kaa husn
nigaah jis se milaa.o to aa.nkh dukhne lage
kisii adaa me.n adaa-e-KHiraam-e-baad-e-sabaa
jise KHayaal me.n laa.o to dil sulagne lage
nahii.n hai yuu.n to nahii.n hai ki ab nahii.n baaqii
jahaa.n me.n bazm-gah-e-husn-o-ishq kaa mela
binaa-e-lutf-o-mohabbat, rivaaj-e-mehr-o-vafaa
ye kas dayaar-e-adam me.n muqiim hai.n ham tum
jahaa.n pe muz.daa-e-diidaar-e-husn-e-yaar to kyaa
naved-e-aamad-e-roz-e-jazaa nahii.n aatii
ye kis KHumaar-kade me.n nadiim hai.n ham tum
jahaa.n pe shorish-e-rindaan-e-mai-gusaar to kyaa
shikast-e-shiisha-e-dil kii sadaa nahii.n aatii

Faiz Ahmad Faiz

Nazm

hasil

vo lamha
vo pur-shauq o pur-soz lamha
jo hamraah tere guzaaraa thaa mai.n ne
vahii zindagii thaa
aur ab ye jo muddat se hai aamad-o-shud nafas kii
usii ek lamha kii qiimat hai shaayad

Iftikhar Aazmi

Nazm

wapsi

paa.nv dahliiz pe chaukhaT pe rakhe dono.n haath
baal bikhraa.e hu.e shaano.n par
raushnii pusht pe haale kii tarah
saa.ns kii aamad-o-shud thii na ko.ii jumbish-e-jism
jaise tasviir lagii ho
jaise aasan pe kha.Dii ho devii

Habib Tanvir

Nazm

fawwara

aah favvaare tire dil me.n hai kitnaa iztiraab
har gha.Dii hai zindagii terii rahiin-e-inqalaab
kis qadar hai dil me.n tere iltihaab-o-inshiqaaq
kyaa tujhe bhii hai kisii se shikva-e-ranj-e-firaaq
hai tirii hastii bhii kyaa andoh kii sarmaaya-daar
kyaa tiraa dil bhii vafuur-e-ranj se hai be-qaraar
kyaa tujhe bhii intizaar-e-aamad-e-mahbuub hai
kyo.n pareshaa.n is qadar hai kyaa tujhe matluub hai
uf tire motii se aa.nsuu jaa rahe hai.n raa.egaa.n
haa.n magar tujh ko mohabbat me.n KHayaal is kaa kahaa.n
haa.n magar pinhaa.n hai in ashko.n me.n ik raaz-e-hayaat
de rahaa hai qurb ke paudo.n ko tuu apne sabaat
kaash lete tujh se ye insaan bhii dars-e-amal
phir dimaaGo.n me.n na rahtaa is qadar un ke KHalal

Saqib Kanpuri

Nazm

baz-amad --- ek muntaj

ik parinda kisii ik pe.D kii Tahnii pe chahaktaa hai kahii.n
ek gaataa hu.aa yuu.n jaataa hai dhartii se falak kii jaanib
puurii quvvat se ko.ii ge.nd uchhaale jaise
ik phudaktaa hai sar-e-shaaKH pe jis tarah ko.ii
aamad-e-fasl-e-bahaarii kii KHushii me.n naache
guu.ndnii bojh se apne hii jhukii pa.Dtii hai
naaznii.n jaise hai ko.ii ye bharii mahfil me.n
aur kal haath hu.e hai.n piile
koyale.n kuuktii hai.n
jaamune.n pakkii hai.n, aamo.n pe bahaar aa.ii hai
arGanuu.n bajtaa hai yakjaa.ii kaa
niim ke pe.Do.n me.n jhuule hai.n jidhar dekho udhar
saavanii gaatii hai.n sab la.Dkiyaa.n aavaaz milaa kar har-suu
aur is aavaaz se guu.nj uTThii hai bastii saarii
mai.n kabhii ek kabhii duusre jhuule ke qarii.n jaataa huu.n
ek hii kam hai, vahii chehra nahii.n
aaKHirash puuchh hii letaa huu.n kisii se ba.Dh kar
kyuu.n habiiba nahii.n aa.ii ab tak?
khilkhilaa pa.Dtii hai.n sab la.Dkiyaa.n sun kar ye naam
lo ye sapne me.n hai.n, ik kahtii hai
baaolii sapnaa nahii.n, shahr se aa.e hai.n abhii
duusrii Toktii hai
baat se baat nikal chaltii hai
ThaaT kii aa.ii thii baaraat, chambelii ne kahaa
band-baajaa bhii thaa, diipaa bolii
aur dulhan pe hu.aa kitnaa bikher
kuchh na kuchh kahtii rahii.n sab hii magar mai.n ne sirf
itnaa puuchhaa vo nadii bahtii hai ab bhii, ki nahii.n
jis se vaabasta hai.n ham aur ye bastii saarii?
kyuu.n nahii.n bahtii, chambelii ne kahaa
aur vo bargad kaa ghanaa pe.D kinaare us ke?
vo bhii qaa.em hai abhii tak yuu.nhii
va.ada kar ke jo 'habiiba' nahii.n aatii thii kabhii
aa.nkhe.n dhotaa thaa nadii me.n jaakar
aur bargad kii ghanii chhaa.nv me.n so jaataa thaa

Akhtarul Iman

Nazm

ek taswir

raah-e-ulfat kii rivaayaat-e-kuhan zinda hai.n
sar-ba-kaf ahl-e-vafaa bahr-e-tamaashaa guzre
dard kii raat vahii karb kaa ehsaas vahii
aamad-e-sub.h-e-tamanna kaa gumaa.n kyaa guzre
KHauf kaliyo.n kaa tabassum bhii churaa letaa hai
ufuq-e-jabr a.ndhero.n kaa pataa detaa hai
ek tasviir jo aavezaa.n thii aivaano.n me.n
KHuun kaa Gaaza male husn-e-sitam ho jaise
paikar-e-tamkanat-o-naaz-o-Guruur-e-baatil
dar-e-zindaa.n pe tashaddud kaa alam ho jaise
ab vo tasviir kisii gosha-e-aivaa.n me.n nahii.n
zikr us but kaa kisii bazm-e-shabistaa.n me.n nahii.n

Muslim Shameem

Nazm

kuchh der pahle nind se

mai.n jin ko chho.D aayaa thaa shanaasaa.ii kii bastii ke vo saare raaste aavaaz dete hai.n
nahii.n maaluum ab kis vaaste aavaaz dete hai.n
lahuu me.n KHaak u.Dtii hai
badan KHvaahish-ba-KHvaahish Dah rahaa hai
aur nafas kii aamad-o-shud dil kii naa-hamvaariyo.n par bain kartii hai
vo saare KHvaab ek ik kar ke ruKHsat ho chuke hai.n jin se aa.nkhe.n jaagtii thii.n
aur ummiido.n ke rauzan shahr-e-aa.inda me.n khilte the
bahut aahista aahista
a.ndheraa dil me.n, aa.nkho.n me.n, lahuu me.n, bahte bahte jam gayaa hai
vaqt jaise tham gayaa hai

Iftikhar Arif

Nazm

zahrili taKHliq

ek pal me.n KHatm ho saktii hai vus.at dahr kii
choTiyo.n se choTiyo.n tak raasta
aage KHalaa
aur KHalaa kii tiirgii me.n duur se aa.ii hu.ii kirno.n ke ra.ngo.n kii numuud
aasmaa.n ke paa.nv par mahtaab o anjum ke sujuud
aur zamii.n kii raunaqo.n kaa vahm fikr-e-raft-o-uud
bun diye kis ne ye taar-o-puud
kis ke haath me.n aayaa nizaam-e-kaa.enaat
kis ke zarre ban ga.e duniyaa sitaare aaftaab
kis ne aavaara-KHayaalii ko pilaa.ii fikr-e-shiirii.n kii sharaab
kis ne ye sab kuchh banaayaa
aur KHud taariik pardo.n me.n kahii.n baiThaa rahaa
kyaa ye sab phailaav mere vaaste hai.n
yaa mai.n KHud us kii puraanii ruuh me.n baiThaa hu.aa
gin rahaa huu.n us ke ashko.n kii qataar
po.nchhtaa huu.n us ke aa.nsuu maa.ngtaa huu.n us se bhiik
(chaahtaa huu.n ruuh kii KHaatir sukuu.n)
vo to KHud is KHair-o-shar ke jaal me.n uljhaa hu.aa
dard se betaab taKHliiq-e-aziyyat se niDhaal
chiiKH kar kahtaa hai ''mujh ko maar Daal''

Shahzad Ahmad

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now