Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ajzaa"

Nazm MATCHES FOR "ajzaa"

Nazm

mohabbat

uruus-e-shab kii zulfe.n thii.n abhii naa-aashnaa KHam se
sitaare aasmaa.n ke be-KHabar the lazzat-e-ram se
qamar apne libaas-e-nau me.n begaana saa lagtaa thaa
na thaa vaaqif abhii gardish ke aa.iin-e-musallam se
abhii imkaa.n ke zulmat-KHaane se ubhrii hii thii duniyaa
mazaaq-e-zindagii poshiida thaa pahnaa-e-aalam se
kamaal-e-nazm-e-hastii kii abhii thii ibtidaa goyaa
huvaidaa thii nagiine kii tamannaa chashm-e-KHaatam se
sunaa hai aalam-e-baalaa me.n ko.ii kiimiyaa-gar thaa
safaa thii jis kii KHaak-e-paa me.n ba.Dh kar saaGar-e-jam se
likhaa thaa arsh ke paa.e pe ik iksiir kaa nusKHa
chhupaate the farishte jis ko chashm-e-ruuh-e-aadam se
nigaahe.n taak me.n rahtii thii.n lekin kiimiyaa-gar kii
vo is nusKHe ko ba.Dh kar jaantaa thaa ism-e-aazam se
ba.Dhaa tasbiih-KHvaanii ke bahaane arsh kii jaanib
tamannaa-e-dilii aaKHir bar aa.ii sa.i-e-paiham se
phiraayaa fikr-e-ajzaa ne use maidaan-e-imkaa.n me.n
chhupegii kyaa ko.ii shai baargaah-e-haq ke mahram se
chamak taare se maa.ngii chaa.nd se daaG-e-jigar maa.ngaa
u.Daa.ii tiirgii tho.Dii sii shab kii zulf-e-barham se
ta.Dap bijlii se paa.ii huur se paakiizgii paa.ii
haraarat lii nafas-haa-e-masiih-e-ibn-e-maryam se
zaraa sii phir rubuubiyat se shaan-e-be-niyaazii lii
malak se aajizii uftaadgii taqdiir shabnam se
phir in ajzaa ko gholaa chashma-e-haivaa.n ke paanii me.n
murkkab ne mohabbat naam paayaa arsh-e-aazam se
muhavvis ne ye paanii hasti-e-nau-KHez par chhi.Dkaa
girah kholii hunar ne us ke goyaa kaar-e-aalam se
hu.ii jumbish ayaa.n zarro.n ne lutf-e-KHvaab ko chho.Daa
gale milne lage uTh uTh ke apne apne hamdam se
KHiraam-e-naaz paayaa aaftaabo.n ne sitaaro.n ne
chaTak Guncho.n ne paa.ii daaG paa.e laala-zaaro.n ne

Allama Iqbal
Nazm

jahan zad

so ab ham
jo sadiyo.n kii lambii masaafat se lauTe hai.n
to apne ranjuur kuuzo.n me.n jhojhaa hu.aa hai
ye teraa qusuur aur na merii KHataa hai
ko.ii kuuza-gar to hamaaraa bhii hogaa
so ye us kii hikmat
ki us ne hame.n chaak par Dhaalte vaqt
lamho.n kaa pher is nazaakat se rakhaa
ki ham apnii apnii jagah sirf shashdar kha.De the
ka.ii dast-e-chaabuk ke be-jaan putle
mare aur tire darmiyaa.n saj ga.e the
so ye us kii hikmat
magar vaqt is darja saffaak kyo.n hai
ye mashshaata-e-zindagii itnii chaalaak kyo.n hai
mare aur tire darmiyaa.n nau baras jis ne laa kar bichhaa.e
ye nau saal kis taur mai.n ne bitaa.e
ki saahil se kashtii tak aate hu.e
jaise taKHte ke hamraah dil Dagmagaa.e
vahii nau baras jo mire aur tire darmiyaa.n
vaqt kii kirchiyaa.n hai.n
zamaana bhii kaisii ajab kahkashaa.n hai
ye duniyaa.e sayyaargaa.n hai ki jis me.n hazaaro.n kavaakib
musalsal kisii chaak par ghuumte hai.n
ye ajsaam ke gird ajsaam kaa raqs hii zindagii hai mirii jaa.n
mirii jaan tuu chaak ke saath miTTii ke rishte ko pahchaantaa thaa
hasan tuu ne miTii ke be-jaan putlo.n se
taKHliiq ke jaa.n-gusil marhalo.n me.n
sadaa guftuguu sau tarah guftuguu kii
zahaanat ke putle mohabbat ke KHaaliq faqat ye bataa de
ki tere anaasir ke ajzaa-e-tarkiib me.n vaahima kaise aayaa
hasan tuu vahaa.n jho.npa.De me.n
akelaa gale mil ke royaa thaa kis se
labiib aur tuu aur mai.n aur haqiiqat me.n ko.ii nahii.n thaa
tarah vaahima mere lab mere gesuu se lipTaa rahaa thaa
labiib ek saayaa jise tuu ne rog apnii jaa.n kaa banaayaa
ye saayaa kahii.n gar haqiiqat bhii hotaa
to aaKHir ko tuu is haqiiqat se kyo.n be-KHabar thaa
ki har jism ke saath ik aaftaab aur mahtaab laazim
ye tasliis qaa.em hai qaa.em rahegii

Ishrat Afreen
Nazm

kal jab daraKHt na honge

kal ham ko
sab aaraam mayassar ho.nge
lekin
ham KHush-baKHt na ho.nge
shaayad
jiine kii sarsabz tamannaa
Daalii Daalii
sisak sisak kar
mar jaa.egii
ye taaj aur taKHt na ho.nge
shaayad
viiraan samay
baarish ko tarse.nge
har-suu aag ke sho.ale ho.nge
tab ham par
dhu.e.n kaalak
aur
carbon ke ajzaa barse.nge
jiinaa hai to baahar aa.o
apne liye
aur aane vaalii naslo.n kii
KHaatir
daraKHt lagaa.o
baahar aa.o
aaj parinde aur jaanvar
mushkil me.n hai.n
jald hamaarii baarii hai
dekho
sar pe maut kha.Dii hai
aur ban par
vahshat taarii hai
pahle
jahaa.n nadii bahtii thii
ab ke vahaa.n par
KHuun kaa dariyaa jaarii hai
fasle.n Galla aur
daraKHt hai.n
sab kii zaruurat
kisaan hai
yaa ko.ii haarii hai
maa.ng sabhii kii
gosht hai
duudh aur phal hai.n
sabzii aur tarkaarii hai
vo ghar bhii
kyaa ghar hai jahaa.n par
phal phuul hai.n
na phulvaarii hai
kal jab daraKHt nahii.n ho.nge
ham KHush-baKHt nahii.n ho.nge

Ashraf Jawed Malik
Nazm

mohabbat

mohabbat KHudaa kii haqiiqat kaa nuur
mohabbat kisii kaa payaam-e-zuhuur
mohabbat ke paiGaambar ambiyaa
mohabbat ke zer-e-asar auliyaa
mohabbat nuquush-e-bayaaz-e-vajuud
tar-o-taaza is se riyaaz-e-shuhuud
mohabbat nahii.n to nahii.n zindagii
mohabbat se hai dil-nashii.n zindagii
mohabbat se har zarra paivasta hai
tarab zaa mohabbat kaa guldasta hai
nashaat-e-mohabbat rafiiq-e-hayaat
kiye us ne hal zindagii ke nikaat
mohabbat se har ik haqiiqat ayaa.n
mohabbat se maa.n kii faziilat ayaa.n
mohabbat se shaan-e-pidar sar-buland
mohabbat se vasf-e-pisar arjumand
mohabbat se mazbuut ajzaa-e-qaum
mohabbat se marbuut aaraa-e-qaum
mohabbat se qaa.em nizaam-e-hayaat
taGayyur me.n bhii un kaa nuur-e-sabaat
mohabbat nahii.n hai to kuchh bhii nahii.n
mohabbat hii hai asal duniyaa-o-dii.n

Ali Manzoor Hyderabadi
Nazm

jahan-zad

ai hasan-kuuzaa-gar
tuu ne jaanaa ki mai.n
jism-o-jaa.n ke ta'alluq kii raushan guzargaah se
ik jahaa.n kaa safar jhel kar
is rifaaqat kii dahliiz tak aa.ii huu.n
ai hasan kaash tuu jaan saktaa
ki is sahn-e-KHaana se dahliiz tak ke safar me.n
jahaa.n-zaad ko kyo.n zamaane lage hai.n
hasan
is safar me.n jahaa.n-zaad ko ek ik gaam par
vaqt ke taaziyaane lage hai.n
hasan
vaqt maalik bhii hai devtaa bhii
muhaafiz bhii hai aur KHvaaja-saraa bhii
ye dekhaa hai mai.n ne
ki jab bhii dariicho.n me.n taaza shaguufa khilaa hai
havaa se vo ha.ns kar zaraa saa gale bhii milaa hai
to KHvaaja-saraa kii nazar se kahaa.n bach sakaa hai
magar dekh mujh ko
ki mai.n ne yahaa.n Thiik nau saal tak
phuul kaa.Dhe hai.n KHvaabo.n ke bistar pe lekin
abhii tak ko.ii in pe soyaa nahii.n
phuul taaza shagufta aur aazurda hai.n
mai.n ne nau saal suurat-garii kii hai tere har ik lams kii
raat bhar mai.n ne aa.nkhe.n bhigo.ii hai.n kuuzo.n me.n aur sub.h-dam
halq ko tar kiyaa aa.nsu.o.n se bahut
ye masaafat
ye nau saal kii be-mahaabaa masaafat
tire dar ke aage mujhe khii.nch laa.ii
magar tuu yahaa.n chaak par apnii dhun me.n magan hai
nigaahe.n uThaa
dekh to mai.n jahaa.n-zaad terii tire saamne huu.n
magar tuu ne sach hii kahaa thaa
zamaana jahaa.n-zaad vo chaak hai
jis pe miina-o-jaam-o-subuu aur faanuus-o-gul-daa.n kii maanind
bante biga.Dte hai.n insaa.n
so ab ham jo sadiyo.n kii lambii masaafat se lauTe hai.n
tuu apne ranjuur kuuzo.n me.n juujhaa hu.aa hai
ye teraa qusuur aur na merii KHataa hai
ko.ii kuuza-gar to hamaaraa bhii hogaa
so ye us kii hikmat
ki us ne hame.n chaak par Dhaalte vaqt
lamho.n kaa pher is nazaakat se rakkhaa
ki ham apnii apnii jagah sirf shashdar kha.De the
ka.ii dast-e-chaabuk ke be-jaan putle
mire aur tire darmiyaa.n saj ga.e the
so ye us kii hikmat
magar vaqt is darja saffaak kyo.n hai
ye mashshaata-e-zindagii itnii chaalaak kyo.n hai
mire aur tire darmiyaa.n nau baras jis ne laa kar bichhaa.e
ye nau saal kis tarh mai.n ne bitaa.e
ki saahil se kashtii tak aate hu.e
jaise taKHte ke hamraah dil Dagmagaa.e
vahii nau baras
jo mire aur tire darmiyaa.n vaqt kii kirchiyaa.n hai.n
zamaana bhii kaisii 'ajab kahkashaa.n hai
ye duniyaa-e-sayyaargaa.n hai ki jis me.n
hazaaro.n kavaakib
musalsal kisii chaak par ghuumte hai.n
ye ajsaam ke gird ajsaam kaa raqs hii zindagii hai mirii jaa.n
mirii jaan tuu chaak ke saath miTTii ke rishte ko pahchaantaa thaa
hasan tuu ne miTTii ke be-jaan putlo.n se
taKHliiq ke jaa.n-gusil marhalo.n me.n
sadaa guftuguu
sau tarah guftuguu kii
zihaanat ke putle mohabbat ke KHaaliq
faqat ye bataa de
ki tere 'anaasir ke ajzaa-e-tarkiibii me.n
vaahima kaise aayaa
hasan tuu vahaa.n jho.npa.De me.n
akelaa gale mil ke royaa thaa kis se
labiib aur tuu aur mai.n
aur haqiiqat me.n ko.ii nahii.n thaa
tiraa vaahima
mere lab mere gesuu se lipTaa rahaa thaa
labiib ek saayaa
jise tuu ne rog apnii jaa.n kaa banaayaa
ye saayaa kahii.n gar haqiiqat bhii hotaa
to aaKHir ko tuu is haqiiqat se kyo.n be-KHabar thaa
ki har jism ke saath ik aaftaab aur mahtaab laazim
ye tasliis qaa.em hai qaa.em rahegii
hasan mai.n tire saamne aa.ina thii
tire hijr aur vasl kaa aa.ina
inhimaak-o-ta'alluq kii miTTii se guu.ndhe hu.e jism ko
terii aa.nkho.n kii hiddat ne chamkaayaa thaa
terii KHalvat kii hairat ne vo rang-o-roGan kiye the
ki aa.iine shashdar kha.De rah ga.e the
magar terii KHalvat kii hairat me.n vahshat kaa jo shaa.iba thaa
nigaaho.n se merii kahaa.n chhup sakaa thaa
mire aur tire darmiyaa.n vasl kii har gha.Dii me.n
na jaane kahaa.n se
vahii soKHta-baKHt terii
ki jo jaa.n-fishaanii ke sho'lo.n se dahke hu.e
zindagii ke abad-taab tannuur par
u.ngliyaa.n tere bachcho.n kii thaame kha.Dii
bhuuk se barsar-e-jang thii
jis ke nazdiik ye
tere kuuze tiraa fan tirii aag sab
merii aa.nkhe.n mire phuul aur KHvaab sab
zindagii ke abad-taab tannuur kii raakh the
terii is soKHta-baKHt ko kyaa KHabar
jab zamii.n apne mehvar kii tajdiid me.n
harf-e-laa se guzar jaa.egii
to hazaaro.n baras baa'd bhii
ye azal ke gharo.ndo.n kii miTTii me.n madfuun
phuul aur buuTe ye kuuze
aur un me.n unhii qaaf aa.nkho.n se chhalke hu.e
surKH paanii kii talchhaT
kisii kuuza-gar ke javaa.n lams se jii uThe to
jahaa.n-zaad us ke liye phir janam legii
aur nau baras raqs karte guzar jaa.e.nge
terii is soKHta-baKHt ko kyaa KHabar
vo raat
vo halab kii kaarvaa.n-saraa kaa hauz
jis ko mai.n ne jism-o-jaa.n kii KHushbu.e.n kashiid kar ke
qatra-qatra nau baras me.n aa.nsu.o.n se pur kiyaa
vo ek raat sirf ek raat me.n
tamaam KHushk ho gayaa
ham apne vasl kii tamaazato.n me.n aise jal-bujhe
ki raakh tak nahii.n bachii
ye ek jaa.n kii tishnagii
mujhe tujhe ba-yak-zamaa.n
bhalaa kahaa.n kahaa.n na khii.nchtii phirii
magar ye tuu ne kyaa kahaa
ki tere jaisii 'aurate.n jahaan-zaad
aisii uljhane.n hai.n jin ko aaj tak ko.ii nahii.n suljhaa sakaa
ki 'aurato.n kii saaKHt hai vo tanz apne aap par
javaab jin kaa ham nahii.n
to phir ye jaam-o-miinaa-o-subuu-o-hauz-o-ruud-e-niil
is zamii.n kii god me.n
azal ke harf-giir taabnaak KHvaab ke liye
kahii.n bhii kuchh raqam nahii.n
ai hasan
chaak par se zaraa apnii nazre.n haTaa
tuu mire nau baras tak banaa.e ga.e phuul to dekh le
phuul taaza shagufta aur aazurda hai.n
yuu.n na ho ki inhe.n
bhuuk aur muflisii ke sataa.e hu.e
mere bachche bhii niilaam kar aa.e.n jaa kar kahii.n
tere kuuzo.n ke maanind baGdaad me.n
ai hasan
daaman-e-vaqt par jitne phuul aur buuTe saje hai.n
jahaa.n-zaad kii zaKHmii poro.n ne
rang un me.n apne junuu.n ke bhare hai.n
ye taavaan hai.n champa.ii u.ngliyo.n kaa
tire jaam-o-miinaa pe
jis KHaal-o-KHad kii nazaakat kii parchhaa.iiyaa.n thii.n
tujhe kyaa KHabar ye kin aa.nkho.n kii biinaa.iyaa.n thii.n
hasan ye mohabbat
ki jis ko tirii soKHta-baKHt gardaantii hai
amiiro.n kii baazii
to mere ta.ii.n ye amiiro.n kii baazii kahaa.n
sirf baaziigarii thii
mohabbat hamesha se muflis kaa sarmaaya-e-jaa.n rahii hai
yahii to vo puu.njii hai
jis tak amiiro.n ke haath ab bhii pahu.nche nahii.n hai.n
tujhe ye gumaa.n thaa
ki 'aurat mohabbat kii baazii me.n be-jaan patte kii suurat
kisii dast-e-chaabuk kii marhuun-e-minnat
vo is khel me.n ek mohre kii suurat
ki jab jis ne chaahaa
ise ek ghar se uThaa kar
kisii duusre ghar kaa maalik banaayaa
ki 'aurat faqat ek patthar kii muurat
ye tasviir-e-hairat
yuu.nhii chup kha.Dii hai
yuu.nhii chup rahegii
magar yuu.n nahii.n hai
hasan tuu ne dekhaa
ki mai.n qaid-e-auhaam o band-e-rivaayaat me.n
buu.Dhe 'attaar yuusuf kii dukkaan par
apnii aa.nkhe.n tujhe nazr kartii rahii
buu.Dhaa 'attaar vo kiimiyaa-gar
ki jis ne zamaano.n ke jangal se
chehro.n ke phuul aur buuTe chune
vo mujhe aur tujhe jaantaa thaa magar
mai.n ne baazaar me.n
tujh se aa.nkho.n kaa aur dil kaa saudaa kiyaa
ai hasan
mere ek ik dariiche pe
kohna rivaayaat o zaalim 'aqaa.ed kaa jangal ugaa thaa
hasan
kaash tuu merii aa.nkho.n se mere dariiche ko taktaa
to ye jaan saktaa
jahaa.n tuu kha.Daa thaa vahaa.n ek ik darz se
merii aa.nkhe.n miraa jism
chhan chhan ke
kaT kaT ke girtaa rahaa thaa

Ishrat Afreen
Nazm

qasida kya hai

faarsii arabii me.n guu.njii is kii sadaa
shaan me.n baadshaaho.n kii likkhaa gayaa
lafzo.n kii shaan-o-shaukat milegii yahaa.n
baa-vaqaar is kaa hotaa hai bachcho bayaa.n
hai qasiide me.n tanz aur taariif bhii
kaifiyat is me.n hotii hai ik nazm sii
is me.n dekhoge tum naqsha maahaul kaa
paa.oge shero.n me.n saaya maahaul kaa
sinf hai ik puraanii qasiida miyaa.n
KHaas aur aam kii hai ye KHud tarjumaa.n
is ke ajzaa me.n tashbiib hai aur gurez
madh-o-zam mudda.aa aur du.aa naGma-rez
maahir-e-fan na ho gar qasiida-nigaar
to qasiida na likkhegaa vo shaandaar
hai qasiide me.n saudaa kaa mash.huur naam
ruuh-e-saudaa ko 'haafiz' hamaaraa salaam

Hafiz Karnataki
Nazm

zindagi aur maut

maut ik KHvaab hai ajzaa-e-badan kaa hamdam
zindagii naam hai ehsaas kii bedaarii kaa
maut jis rahguzar-e-shauq me.n rahzan kii naqaab
zindagii raKHt usii raah-e-talab-gaarii kaa

Fazlurrahman
Nazm

sada ba-sahra

suruur-e-justajuu maGrib kii matvaalii havaa.o.n kaa
sabhii paayaa magar darmaan-e-dard bebasii mushkil
ye ik aasuudgii chehre pe ye Thahraav aa.nkho.n me.n
ye ashko.n se bharii chhaagal ye be-parda-o-KHud-sar dil
chaTaane.n dahr kii aatish ko chhuu kar bhii nahii.n pighlii.n
na jaane kaun se ajzaa hai.n is uftaad me.n shaamil

Shafiq Fatima Shera
Nazm

zindagi aur maut

maut ik KHvaab hai ajzaa-e-badan kaa hamdam
zindagii naam hai ehsaas kii bedaarii kaa
maut jis rah-guzar-e-shauq me.n rahzan kaa naqaab
zindagii raKHt isii raah-e-talab-gaarii kaa
zindagii jism-o-dil-o-jaa.n kii munazzam quvvat
maut iz.haar pareshaanii-o-laachaarii kaa
maut sahraa.o.n me.n bikhre hu.e zarro.n kaa Gubaar
zindagii naqsh unhii zarro.n kii chaman kaarii kaa
maut be-maa.egii daamaan-e-zamii.n kii goyaa
zindagii silsila baadal kii guhar-baarii kaa
zindagii qaafila-e-sa.ii kii paiham tag-o-dau
maut dam-bhar ke liye vaqfa hai bekaarii kaa
zindagii kaa jise ma.aluum ho matlab us ko
maut kaa KHauf na garduu.n kii tabah-kaarii kaa

Fazlurrahman
Nazm

rishta-e-dosti

yaum-e-alast kii baat hai
iqraar sabhii jab kar chuke the
ahd bhii pakke ho chuke the
phir unhii tauhiid lamho.n me.n
ruuh merii ne
sahme sahme jhijhakte lahje
ye jhuk ke apne kariim rab se
kahaa ki maalik navaaz mujh ko
taviil taariik kaThin safar me.n
hayaat jis kaa hai naam rakkhaa
ik aisaa anmol pyaaraa rishta
dostii hai naam jis kaa
ye sun ke har-suu sukuut thaa chhaayaa
jumuud taarii thaa har ek shai par
hairaa.n malaa.ik ye sochte the
ye ruuh sazaa kii hai mustahiq ab
rahiim rab ko jo pyaar aaya
to merii jaanib
ik rahmato.n kaa hisaar aaya
ye farmaan malaa.ik ko hu.aa yakaayak
vafaa kii miTTii ko guu.ndh rakho
phir milaa.o chaahat kaa uud-o-ambar
be-riyaa.ii unDelo is me.n
karo be-laus vafaa.o.n kaa araq shaamil
yak-jaan ho.n jab sabhii ye ajzaa
to har ruuh-e-insaa.n me.n kar do shaamil
ye buniyaad thii rishta-e-dostii kii
rishto.n ke is hujuum me.n monaa
merii KHush-nasiibii ki kariim rab ne
dostii ke kitne meherbaa.n sitaare
mere aasmaan-e-zindagii pe zau-fishaa.n kiye hai.n
to ai mehr-o-vafaa kii miTTii me.n gu.ndhe mere dosto
ye nazm merii tumhaare naam
ki mohabbato.n ne tumhaarii mujhe maalaa-maal kiyaa
aur is dostii ne
merii hastii ko be-misaal kiyaa

Mona Shahzad
Nazm

mohabbat

mohabbat
naam hai garche
KHayaalo.n kii zamiino.n par
kisii ke naam kii titlii
ke rango.n kaa nikhar jaanaa
kisii kii aa.nkh me.n
Dhalte hu.e
manzar kaa tham jaanaa
kisii kii saa.ns me.n
bahte hu.e
pal kaa dha.Dak jaanaa
mohabbat dar-haqiiqat
zaat kii taa'miir kaa
'umda fasaana hai
mohabbat
ek qaasid hai
agar ruk jaa.e
ye qaasid
tumhaare baam ke uupar
to phir tum
ye samajh lenaa
tumhaarii zaat me.n pinhaa.n
ka.ii ajzaa-e-tarkiibii
mohabbat
lene aa.ii hai
mohabbat dar-haqiiqat
zaat kii taKHriib
kaa 'umda bahaana hai

Neelam Bhatti
Nazm

mahfuz asasa

aafaat kaa tuufaan mu.Daa jab mirii jaanib
taaraaj kiyaa ghar ko mire chashm-zadan me.n
aisii mire maskan kii hu.ii shakl-o-shabaahat
jaise ko.ii paamaal-shuda laash ho ran me.n
sab ho ga.e ajzaa-e-makaa.n KHaak me.n shaamil
baiThaa huu.n liye dil me.n Gam-e-saqf-o-dar-o-taaq
hamraah makaa.n ke ga.ii har chiiz bhii ghar kii
mahfuuz hai.n lekin mire diivaan ke auraaq

Akhtar Bastavi
Nazm

chakbast

ajzaa-e-pareshaa.n ke liye daar-e-fanaa hai
tartiib-e-'anaasir hii me.n insaa.n kii baqaa hai

Fatima wasia Jayasi
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

daraKHt-e-zard

tumhe.n mujh se jo nafrat hai vahii to merii raahat hai
mirii jo bhii aziyyat hai vahii to merii lazzat hai
ki aaKHir is jahaa.n kaa ek nizaam-e-kaar hai aaKHir
jazaa kaa aur sazaa kaa ko.ii to hanjaar hai aaKHir
mai.n KHud me.n jhe.nktaa huu.n aur siine me.n bha.Daktaa huu.n
mire andar jo hai ik shaKHs mai.n us me.n pha.Daktaa huu.n
hai merii zindagii ab roz-o-shab yak-majlis-e-Gam-haa
azaa-haa marsiya-haa girya-haa aashob-e-maatam-haa

Jaun Eliya
Nazm

mere hamdam mere dost!

gar mujhe is kaa yaqii.n ho mire hamdam mire dost
gar mujhe is kaa yaqii.n ho ki tire dil kii thakan
tirii aa.nkho.n kii udaasii tere siine kii jalan
merii dil-juu.ii mire pyaar se miT jaa.egii
gar miraa harf-e-tasallii vo davaa ho jis se
jii uThe phir tiraa uj.Daa hu.aa be-nuur dimaaG
terii peshaanii se Dhal jaa.e.n ye tazliil ke daaG
terii biimaar javaanii ko shifaa ho jaa.e
gar mujhe is kaa yaqii.n ho mire hamdam mare dost
roz o shab shaam o sahar mai.n tujhe bahlaataa rahuu.n
mai.n tujhe giit sunaataa rahuu.n halke shiirii.n
aabshaaro.n ke bahaaro.n ke chaman-zaaro.n ke giit
aamad-e-sub.h ke, mahtaab ke, sayyaaro.n ke giit
tujh se mai.n husn-o-mohabbat kii hikaayaat kahuu.n
kaise maGruur hasiinaa.o.n ke barfaab se jism
garm haatho.n kii haraarat me.n pighal jaate hai.n
kaise ik chehre ke Thahre hu.e maanuus nuquush
dekhte dekhte yak-laKHt badal jaate hai.n
kis tarah aariz-e-mahbuub kaa shaffaaf bilor
yak-ba-yak baada-e-ahmar se dahak jaataa hai
kaise gulchii.n ke liye jhuktii hai KHud shaaKH-e-gulaab
kis tarah raat kaa aivaan mahak jaataa hai
yuu.nhii gaataa rahuu.n gaataa rahuu.n terii KHaatir
giit buntaa rahuu.n baiThaa rahuu.n terii KHaatir
par mire giit tire dukh kaa mudaavaa hii nahii.n
naGma jarraah nahii.n muunis-o-Gam KHvaar sahii
giit nashtar to nahii.n marham-e-aazaar sahii
tere aazaar kaa chaara nahii.n nashtar ke sivaa
aur ye saffaak masiihaa mire qabze me.n nahii.n
is jahaa.n ke kisii zii-ruuh ke qabze me.n nahii.n
haa.n magar tere sivaa tere sivaa tere sivaa

Faiz Ahmad Faiz
Nazm

muhasara

mai.n kaT giruu.n ki salaamat rahuu.n yaqii.n hai mujhe
ki ye hisaar-e-sitam ko.ii to giraa.egaa
tamaam umr kii iizaa-nasiibiyo.n kii qasam
mire qalam kaa safar raa.egaa.n na jaa.egaa

Ahmad Faraz
Nazm

parchhaiyan

adaa-e-ijz-o-karam se uThaa rahii ho tum
suhaag-raat jo Dholak pe gaa.e jaate hai.n

Sahir Ludhianvi
Nazm

thak jaogi

paagal aa.nkho.n vaalii la.Dkii
itne mah.nge KHvaab na dekho
thak jaa.ogii
kaa.nch se naazuk KHvaab tumhaare
TuuT ga.e to
pachhtaa.ogii
soch kaa saaraa ujlaa kundan
zabt kii raakh me.n ghul jaa.egaa
kachche-pakke rishto.n kii KHushbuu kaa resham
khul jaa.egaa
tum kyaa jaano
KHvaab safar kii dhuup ke teshe
KHvaab adhuurii raat kaa dozaKH
KHvaab KHayaalo.n kaa pachhtaavaa
KHvaabo.n kii manzil rusvaa.ii
KHvaabo.n kaa haasil tanhaa.ii
tum kyaa jaano
mah.nge KHvaab KHariidnaa ho.n to
aa.nkhe.n bechnaa pa.Dtii hai.n yaa
rishte bhuulnaa pa.Dte hai.n

Mohsin Naqvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now