Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "arab"

Nazm MATCHES FOR "arab"

Nazm

tarana-e-milli

chiin-o-arab hamaaraa hindostaa.n hamaaraa
muslim hai.n ham vatan hai saaraa jahaa.n hamaaraa
tauhiid kii amaanat siino.n me.n hai hamaare
aasaa.n nahii.n miTaanaa naam-o-nishaa.n hamaaraa
duniyaa ke but-kado.n me.n pahlaa vo ghar KHudaa kaa
ham is ke paasbaa.n hai.n vo paasbaa.n hamaaraa
teGo.n ke saa.e me.n ham pal kar javaa.n hu.e hai.n
KHanjar hilaal kaa hai qaumii nishaa.n hamaaraa
maGrib kii vaadiyo.n me.n guu.njii azaa.n hamaarii
thamtaa na thaa kisii se sail-e-ravaa.n hamaaraa
baatil se dabne vaale ai aasmaa.n nahii.n ham
sau baar kar chukaa hai tuu imtihaa.n hamaaraa
ai gulistaan-e-undulus vo din hai.n yaad tujh ko
thaa terii Daaliyo.n me.n jab aashiyaa.n hamaaraa
ai mauj-e-dajla tuu bhii pahchaantii hai ham ko
ab tak hai teraa dariyaa afsaana-KHvaa.n hamaaraa
ai arz-e-paak terii hurmat pe kaT mare ham
hai KHuu.n tirii rago.n me.n ab tak ravaa.n hamaaraa
saalaar-e-kaarvaa.n hai miir-e-hijaaz apnaa
is naam se hai baaqii aaraam-e-jaa.n hamaaraa
'iqbaal' kaa taraana baa.ng-e-daraa hai goyaa
hotaa hai jaada-paimaa phir kaarvaa.n hamaaraa

Allama Iqbal
Nazm

hindustani bachchon ka qaumi git

chishtii ne jis zamii.n me.n paiGaam-e-haq sunaayaa
naanak ne jis chaman me.n vahdat kaa giit gaayaa
taataariyo.n ne jis ko apnaa vatan banaayaa
jis ne hijaaziyo.n se dasht-e-arab chhu.Daayaa
meraa vatan vahii hai meraa vatan vahii hai
yunaaniyo.n ko jis ne hairaan kar diyaa thaa
saare jahaa.n ko jis ne ilm o hunar diyaa thaa
miTTii ko jis kii haq ne zar kaa asar diyaa thaa
turko.n kaa jis ne daaman hiiro.n se bhar diyaa thaa
meraa vatan vahii hai meraa vatan vahii hai
TuuTe the jo sitaare faaras ke aasmaa.n se
phir taab de ke jis ne chamkaa.e kahkashaa.n se
vahdat kii lai sunii thii duniyaa ne jis makaa.n se
miir-e-arab ko aa.ii ThanDii havaa jahaa.n se
meraa vatan vahii hai meraa vatan vahii hai
bande kaliim jis ke parbat jahaa.n ke siinaa
nuuh-e-nabii kaa aa kar Thahraa jahaa.n safiinaa
rif.at hai jis zamii.n kii baam-e-falak kaa ziinaa
jannat kii zindagii hai jis kii fazaa me.n jiinaa
meraa vatan vahii hai meraa vatan vahii hai

Allama Iqbal
Nazm

tariq ki dua

(undulus ke maidaan-e-ja.ng me.n)
ye Gaazii ye tere pur-asraar bande
jinhe.n tuu ne baKHshaa hai zauq-e-KHudaa.ii
do-niim un kii Thokar se sahraa o dariyaa
simaT kar pahaa.D un kii haibat se raa.ii
do-aalam se kartii hai begaana dil ko
ajab chiiz hai lazzat-e-aashnaa.ii
shahaadat hai matluub-o-maqsuud-e-momin
na maal-e-Ganiimat na kishvar-kushaa.ii
KHayaabaa.n me.n hai muntazir laala kab se
qabaa chaahiye us ko KHuun-e-arab se
kiyaa tuu ne sahraa-nashiino.n ko yaktaa
KHabar me.n nazar me.n azaan-e-sahar me.n
talab jis kii sadiyo.n se thii zindagii ko
vo soz us ne paayaa unhii.n ke jigar me.n
kushaad-e-dar-e-dil samajhte hai.n us ko
halaakat nahii.n maut un kii nazar me.n
dil-e-mard-e-momin me.n phir zinda kar de
vo bijlii ki thii naara-e-laa-tazar me.n
azaa.em ko siino.n me.n bedaar kar de
nigaah-e-musalmaa.n ko talvaar kar de

Allama Iqbal
Nazm

KHizr-e-rah

kyaa sunaataa hai mujhe turk-o-arab kii daastaa.n
mujh se kuchh pinhaa.n nahii.n islaamiyo.n kaa soz-o-saaz
le ga.e tasliis ke farzand miiraas-e-KHaliil
KHisht-e-buniyaad-e-kaliisaa ban ga.ii KHaak-e-hijaaz
ho ga.ii rusvaa zamaane me.n kulaah-e-laala-ra.ng
jo saraapaa naaz the hai.n aaj majbuur-e-niyaaz
le rahaa hai mai-faroshaan-e-fara.ngistaan se paars
vo mai-e-sarkash haraarat jis kii hai miinaa-gudaaz
hikmat-e-maGrib se millat kii ye kaifiyyat hu.ii
Tuk.De Tuk.De jis tarah sone ko kar detaa hai gaaz
ho gayaa maanind-e-aab arzaa.n musalmaa.n kaa lahuu
muztarib hai tuu ki teraa dil nahii.n daanaa-e-raaz
guft ruumii har banaa-e-kuhanaa ki-aabaadaa.n kunand
mii na-daanii avval aa.n buniyaad raa viiraa.n kunand
mulk haatho.n se gayaa millat kii aa.nkhe.n khul ga.ii.n
haq tiraa chashme 'ataa kar dast-e-Gaafil dar nigar
momyaa.ii kii gadaa.ii se to behtar hai shikast
mor-e-be-par haajate pesh-e-sulaimaane mabar
rabt-o-zabt-e-millat-e-baizaa hai mashriq kii najaat
asia vaale hai.n is nukte se ab tak be-KHabar
phir siyaasat chho.D kar daaKHil hisaar-e-dii.n me.n ho
mulk-o-daulat hai faqat hifz-e-haram kaa ik samar
ek huu.n muslim haram kii paasbaanii ke liye
niil ke saahil se le kar taa-ba-KHaak-e-kaashGar
jo karegaa imtiyaaz-e-ra.ng-o-KHuu.n miT jaa.egaa
turk-e-KHargaahii ho yaa aaraabii-e-vaalaa-guhar
nasl agar muslim kii maz.hab par muqaddam ho ga.ii
u.D gayaa duniyaa se tuu maanind-e-KHaak-e-raah-guzar
taa-KHilaafat kii binaa duniyaa me.n ho phir ustuvaar
laa kahii.n se Dhuu.nD kar aslaaf kaa qalb-o-jigar
ai ki na-shinaasii KHafii raa az jalii hushiyaar baash
ai giraftaar-e-abuu-bakr-o-alii hushiyaar-baash
'ishq ko fariyaad laazim thii so vo bhii ho chukii
ab zaraa dil thaam kar fariyaad kii taasiir dekh
tuu ne dekhaa satvat-e-raftaar-e-dariyaa kaa 'uruuj
mauj-e-muztar kis tarah bantii hai ab zanjiir dekh
'aam hurriyat kaa jo dekhaa thaa KHvaab islaam ne
ai musalmaa.n aaj tuu us KHvaab kii taa'biir dekh
apnii KHaakistar samundar ko hai saamaan-e-vajuud
mar ke phir hotaa hai paidaa ye jahaan-e-piir dekh
khol kar aa.nkhe.n mire aa.iina-e-guftaar me.n
aane vaale daur kii dhundlii sii ik tasviir dekh
aazmuuda fitna hai ik aur bhii garduu.n ke paas
saamne taqdiir ke rusvaa.ii-e-tadbiir dekh
muslim astii siina raa az aarzuu-aabaad daar
har zamaa.n pesh-e-nazar laa-yuKHlif-ul-mii.aad daar

Allama Iqbal
Nazm

zauq o shauq

qalb o nazar kii zindagii dasht me.n sub.h kaa samaa.n
chashma-e-aaftaab se nuur kii naddiyaa.n ravaa.n!
husn-e-azal kii hai numuud chaak hai parda-e-vajuud
dil ke liye hazaar suud ek nigaah kaa ziyaa.n!
surKH o kabuud badliyaa.n chho.D gayaa sahaab-e-shab!
koh-e-izam ko de gayaa ra.ng-ba-ra.ng tailisaa.n!
gard se paak hai havaa barg-e-naKHiil dhul ga.e
reg-e-navaah-e-kaazima narm hai misl-e-parniyaa.n
aag bujhii hu.ii idhar, TuuTii hu.ii tanaab udhar
kyaa KHabar is maqaam se guzre hai.n kitne kaarvaa.n
aa.ii sadaa-e-jibra.iil teraa maqaam hai yahii
ahl-e-firaaq ke liye aish-e-davaam hai yahii
kis se kahuu.n ki zahr hai mere liye mai-e-hayaat
kohna hai baz-e-kaa.inaat taaza hai.n mere vaardaat!
kyaa nahii.n aur Gaznavii kaargah-e-hayaat me.n
baiThe hai.n kab se muntazir ahl-e-haram ke somnaat!
zikr-e-arab ke soz me.n, fikr-e-ajam ke saaz me.n
ne arabii mushaahidaat, ne ajamii taKHaiyyulaat
qaafilaa-e-hijaaz me.n ek husain bhii nahii.n
garche hai taab-daar abhii gesuu-e-dajla-o-furaat!
aql o dil o nigaah kaa murshid-e-avvalii.n hai ishq
ishq na ho to shar-o-dii.n butkada-e-tasavvuraat!
sidq-e-KHaliil bhii hai ishq sabr-e-husain bhii hai ishq!
ma.arka-e-vajuud me.n badr o hunain bhii hai ishq!
aaya-e-kaa.enaat kaa ma.anii-e-der-yaab tuu!
nikle tirii talaash me.n qaafila-haa-e-ra.ng-o-buu!
jalvatiyaan-e-madrasa kor-nigaah o murda-zauq
jalvatyaan-e-maikada kam-talab o tahii-kaduu!
mai.n ki mirii Gazal me.n hai aatish-e-rafta kaa suraaG
merii tamaam sarguzisht kho.e hu.o.n kii justujuu!
baad-e-sabaa kii mauj se nash-o-numaa-e-KHaar-o-KHas!
mere nafas kii mauj se nashv-o-numaa-e-aarzuu!
KHuun-e-dil o jigar se hai merii navaa kii parvarish
hai rag-e-saaz me.n ravaa.n saahib-e-saaz kaa lahuu!
fursat-e-kashmukash me.n ii.n dil be-qaraar raa
yak do shikan zyaada kun gesuu-e-taabdaar raa
lauh bhii tuu, qalam bhii tuu, teraa vajuud al-kitaab!
gumbad-e-aabgiina-ra.ng tere muhiit me.n habaab!
aalam-e-aab-o-KHaak me.n tere zuhuur se faroG
zarra-e-reg ko diyaa tuu ne tuluu-e-aaftaab!
shaukat-e-sanjar-o-saliim tere jalaal kii numuud!
faqr-e-'juned'-o-'baayaziid' teraa jamaal be-naqaab!
shauq tiraa agar na ho merii namaaz kaa imaam
meraa qayaam bhii hijaab! meraa sujuud bhii hijaab!
terii nigaah-e-naaz se dono.n muraad paa ga.e
aql, Gayaab o justujuu ishq, huzuur o iztiraab!
tiira-o-taar hai jahaa.n gardish-e-aaftaab se!
tab-e-zamaana taaza kar jalva-e-be-hijaab se!
terii nazar me.n hai.n tamaam mere guzishta roz o shab
mujh ko KHabar na thii ki hai ilm-e-naKHiil be-rutab!
taaza mire zamiir me.n ma.arka-e-kuhan hu.aa!
ishq tamaam mustafaa! aql tamaam buu-lahab!
gaah ba-hiila mii-barad, gaah ba-zor mii-kashad
ishq kii ibtidaa ajab ishq kii intihaa ajab!
aalam-e-soz-o-saaz me.n vasl se ba.Dh ke hai firaaq
vasl me.n marg-e-aarzuu! hijr me.n lazzat-e-talab!
ain-e-visaal me.n mujhe hausla-e-nazar na thaa
garche bahaana-juu rahii merii nigaah-e-be-adab!
garmii-e-aarzuu firaaq! shorish-e-haa-o-huu firaaq!
mauj kii justujuu firaaq! qatre kii aabruu firaaq!

Allama Iqbal
Nazm

urdu ka janaza hai zara dhum se nikle

urdu kaa Gam-e-marg subuk bhii hai garaa.n bhii
hai shaamil-e-arbaab-e-azaa shaah-e-jahaa.n bhii
miTne ko hai aslaaf kii 'azmat kaa nishaa.n bhii
ye mayyat-e-Gam dehli-e-marhuum se nikle
urdu kaa janaaza hai zaraa dhuum se nikle

Rais Amrohvi
Nazm

KHak-e-hind

is KHaak-e-dil-nashii.n se chashme hu.e vo jaarii
chiin o arab me.n jin se hotii thii aabiyaarii

Chakbast Braj Narayan
Nazm

filistini arab se

زمانہ اب بھي نہيں جس کے سوز سے فارغ
ميں جانتا ہوں وہ آتش ترے وجود ميں ہے
تري دوا نہ جنيوا ميں ہے ، نہ لندن ميں
فرنگ کي رگ جاں پنجہ يہود ميں ہے
سنا ہے ميں نے ، غلامي سے امتوں کي نجات
خودي کي پرورش و لذت نمود ميں ہے

Allama Iqbal
Nazm

nashat-e-umid

ai mirii ummiid merii jaa.n-navaaz
ai mirii dil-soz merii kaarsaaz
merii sipar aur mire dil kii panaah
dard-o-musiibat me.n mirii takiya-gaah
aish me.n aur ranj mai.n merii shafiiq
koh me.n aur dasht me.n merii rafiiq
kaaTne vaalii Gam-e-ayyaam kii
thaamne vaalii dil-e-naakaam kii
dil pa pa.Daa aan ke jab ko.ii dukh
tere dilaase se milaa ham ko sukh
tuu ne na chho.Daa kabhii Gurbat me.n saath
tuu ne uThaayaa na kabhii sar se haath
jii ko ho kabhii agar usrat kaa ra.nj
khol diye tuu nai qanaa.at ke ganj
tujh se hai mohtaaj kaa dil be-hiraas
tujh se hai biimaar ko jiine kii aas
KHaatir-e-ranjuur kaa darmaa.n hai tuu
aashiq-e-mahjuur kaa iimaa.n hai tuu
nuuh kii kashtii kaa sahaaraa thii tuu
chaah me.n yuusuf kii dil-aaraa thii tuu
raam ke ham-raah cha.Dhii ran me.n tuu
paa.nDav ke bhii saath phirii ban me.n tuu
tuu ne sadaa qais kaa bahlaayaa dil
thaam liyaa jab kabhii ghabraayaa dil
ho gayaa farhaad kaa qissa tamaam
par tire fiqro.n pe rahaa KHush mudaam
tuu ne hii raa.njhe kii ye ba.ndhvaaii aas
hiir thii furqat me.n bhii goyaa ki paas
hotii hai tuu pusht pe himmat kii jab
mushkile.n aasaa.n nazar aatii hai.n sab
haath me.n jab aa ke liyaa tuu ne haat
saat samundar se guzarnaa hai baat
saath milaa jis ko tiraa do qadam
kahtaa hai vo ye hai arab aur ajam
gho.De kii lii apne jahaa.n tuu ne baag
saamne hai tere gayaa aur praag
azm ko jab detii hai tuu mel jast
gumbad-e-garduu.n nazar aataa hai past
tuu ne diyaa aa ke ubhaaraa jahaa.n
samjhe ki muTThii me.n hai saaraa jahaa.n
zarre ko KHurshiid me.n de khapaa
bande ko allaah se de tuu milaa
dono.n jahaa.n kii hai ba.ndhii tujh se la.D
diin kii tuu asl hai duniyaa kii ja.D
nekiyo.n kii tujh se hai qaa.em asaas
tuu na ho to jaa.e.n na nekii ke paas
diin kii tujh bin kahii.n pursish na ho
tuu na ho to haq kii parastish na ho
KHushk thaa bin tere daraKHt-e-amal
tuu ne lagaa.e hai.n ye sab phuul phal
dil ko lubhaatii hai kabhii ban ke huur
gaah dikhaatii hai sharaab-e-tahuur
naam hai sidra kabhii tuubaa tiraa
roz niraalaa hai tamaashaa tiraa
kausar o tasniim hai yaa salsabiil
jalve hai.n sab tere ye be-qaal-o-qiil
ruup hai.n har panth me.n tere alag
hai kahii.n firdaus kahii.n hai sovarg
chhuuT ga.e saare qariib aur ba.iid
ek na chhuuTii to na chhuuTii umiid
tere hii dam se kaTe jo din the saKHt
tere hii sadqe se milaa taaj-o-taKHt
KHaakiyo.n kii tujh se hai himmat buland
tuu na ho to kaam ho.n duniyaa ke band
tujh se hii aabaad hai kaun-o-makaa.n
tuu na ho to hai bhii barham jahaa.n
ko.ii pa.Dtaa phirtaa hai bahr-e-ma.aash
hai ko.ii iksiir ko kartaa talaash
ik tamannaa me.n hai aulaad kii
ek ko dil-daar kii hai lau lagii
ek ko hai dhan jo kuchh haath aa.e
dhuum se aulaad kii shaadii rachaa.e
ek ko kuchh aaj agar mil gayaa
kal kii hai ye fikr ki khaa.e.nge kyaa
qaum kii bahbuud kaa bhuukaa hai ek
jin me.n ho un ke liye anjaam-e-nek
ek ko hai tishnagii-e-qurb-e-haq
jis ne kiyaa dil se jigar tak hai shaq
jo hai Garaz us kii na.ii justujuu
laakh agar dil hai.n to laakh aarzuu
tujh se hai.n dil sab ke magar baaG baaG
gul ko.ii hone nahii.n paataa charaaG
sab ye samajhte hai.n ki paa.ii muraad
kahtii hai jab tuu ki ab aa.ii muraad
va.ada tiraa raast ho yaa ho daroG
tuu ne diye hai.n use kyaa kyaa faroG
va.ade vafaa kartii hai go chand tuu
rakhtii hai har ek ko KHursand tuu
bhaatii hai sab ko tirii lait-o-la.al
tuu ne kahaa.n siikhii hai ye aaj kal
talKH ko tuu chaahe to shiirii.n kare
bazm-e-azaa ko tarab-aagii.n kare
aane na de ranj ko muflis ke paas
rakhe Ganii us ko rahe jis ke paas
yaas kaa paatii hai jo tuu kuchh lagaav
saik.Do.n kartii hai utaar aur cha.Dhaa.o
aane nahii.n detii dilo.n par hiraas
TuuTne detii nahii.n taalib kii aas
jin ko mayassar na ho kamlii phaTii
KHush hai.n tavaqqo.a pe vo zar-baft kii
chaTnii se roTii kaa hai jin kii banaav
baiThe pakaate hai.n KHayaalii polaav
paa.nv me.n juutii nahii.n par hai ye zauq
gho.Daa jo sabza ho to niilaa ho tauq
faiz ke khole hai.n jahaa.n tuu ne baab
dekhte hai.n jho.npa.De mahlo.n ke KHvaab
tere karishme hai.n Gazab dil-fareb
dil me.n nahii.n chho.Dte sabr-o-shakeb
tujh se muhavvis ne jo shuuraa liyaa
phuu.nk diyaa kaan me.n kyaa jaane kyaa
dil se bhulaayaa zan o farzand ko
lag gayaa ghun naKHl-e-baroma.nd ko
khaane se piine se hu.aa sard jii
aisii kuchh iksiir kii hai lau lagii
diin kii hai fikr na duniyaa se kaam
dhun hai yahii raat din aur sub.h shaam
dho.nknii hai baiTh ke jab dho.nknaa
shah ko samajhtaa hai ik adnaa gadaa
paise ko jab taav pe detaa hai taav
puuchhtaa yaaro.n se hai sone kaa bhaav
kahtaa hai jab ha.nste hai.n sab dekh kar
rah ga.ii ik aa.nch kii baaqii kasar
hai isii dhu.nd me.n vo aasuuda-haal
tuu ne diyaa aql pe parda saa Daal
tol kar gar dekhiye us kii KHushii
ko.ii KHushii is ko na pahu.nche kabhii
phirte hai.n mohtaaj ka.ii tiira-baKHt
jan ke pairo.n me.n thaa kabhii taaj-o-taKHt
aaj jo bartan hai.n to kal ghar karo
maltii hai mushkil se inhe.n naan-e-jau
taire sivaa KHaak nahii.n in ke paas
saarii KHudaa.ii me.n hai le de ke aas
phuule samaate nahii.n is aas par
saahib-e-aalam unhe.n kahiye agar
khaate hai.n is aas pa qasme.n ajiib
jhuuTe ko ho taKHt na yaa-rab nasiib
hotaa hai naumiidiyo.n kaa jab hujuum
aatii hai hasrat kii ghaTaa jhuum jhuum
lagtii hai himmat kii kamar TuuTne
hausla kaa lagtaa hai jii chhuuTne
hotii hai be-sabrii o taaqat me.n ja.ng
arsa-e-aalam nazar aataa hai ta.ng
jii me.n ye aataa hai ki sam khaa.iye
phaa.D ke yaa kap.De nikal jaa.iye
baiThne lagtaa hai dil aave kii tarah
yaas Daraatii hai chhalaave kii tarah
hotaa hai shikva kabhii taqdiir kaa
u.Dtaa hai KHaaka kabhii tadbiir kaa
Thantii hai garduu.n se la.Daa.ii kabhii
hotii hai qismat kii ha.nsaa.ii kabhii
jaataa hai qaabuu se aaKHir dil nikal
kartii hai in mushkilo.n ko tuu hii hal
kaan me.n pahu.nchii tirii aahaT jo hai.n
raKHt-e-safar yaas nai baa.ndhaa vahii.n
saath ga.ii yaas ke pazhmurdagii
ho ga.ii kaafuur sab afsurdagii
tujh me.n chhupaa raahat-e-jaa.n kaa hai bhed
chho.Diyo 'haalii' kaa na saath ai umiid

Altaf Hussain Hali
Nazm

ustad

nek bachche dil se karte hai.n adab ustaad kaa
baap kii ulfat se behtar hai Gazab ustaad kaa
aam logo.n kii jahaalat duur karne ke liye
haq-ta.aalaa ne banaayaa hai sabab ustaad kaa
us kii barakat se jahaa.n me.n phailtii hai.n nekiyaa.n
kyo.n na phir ustaad se raazii ho rab ustaad kaa
kuchh na kuchh umda sabaq detii hai us kii zindagii
KHulq se KHaalii nahii.n hai ko.ii Dhab ustaad kaa
jis gha.Dii naadaan bachcho.n ko sikhaataa hai vo ilm
chuum lete hai.n farishte aa ke lab ustaad kaa
bas use pa.Dhne-pa.Dhaane se hamesha kaam hai
kitnaa achchhaa mashGala hai roz-o-shab ustaad kaa
KHvaah saarii umr us ke paa.nv dho dho kar piye
aadmii se haq adaa hotaa hai kab ustaad kaa
imtihaa.n me.n hal na ho jis dam ko.ii mushkil savaal
KHud pasando.n ko pataa chaltaa hai tab ustaad kaa
shukr ke jazbaat se gardan jhukaa letaa huu.n mai.n
yaad aataa hai mujhe ehsaan jab ustaad kaa
kal zamaane kii nigaaho.n me.n vo izzat paa.egaa
martaba pahchaan jaa.egaa jo ab ustaad kaa
us kii aalamgiir haisiyyat hai shaaho.n kii tarah
kul ajam ustaad kaa hai kul arab ustaad kaa
chal rahe hai.n aaj duniyaa me.n hazaaro.n mahkame
sach agar puuchho to hai ye 'faiz' sab ustaad kaa

Faiz Ludhianvi
Nazm

hamari zaban

yaarab rahe salaamat urdu zabaa.n hamaarii
har lafz par hai jis ke qurbaan jaa.n hamaarii
misrii sii toltaa hai shakkar sii gholtaa hai
jo ko.ii boltaa hai miiThii zabaa.n hamaarii
hinduu ho paarsii ho iisaa.ii ho ki muslim
har ek kii zabaa.n hai urdu zabaa.n hamaarii
duniyaa kii boliyo.n se matlab nahii.n hame.n kuchh
urdu hai dil hamaaraa urdu hai jaa.n hamaarii
duniyaa kii kul zabaane.n buu.Dhii sii ho chukii hai.n
lekin abhii javaa.n hai urdu zabaa.n hamaarii
apnii zabaan se hai izzat jahaa.n me.n apnii
gar ho zabaa.n na apnii izzat kahaa.n hamaarii
urdu kii god me.n ham pal kar ba.De hu.e hai.n
sau jaa.n se ham ko pyaarii urdu zabaa.n hamaarii
'aazaad'-o-'miir'-o-'Gaalib' aa.e.nge yaad barso.n
kartii hai naaz jin par urdu zabaa.n hamaarii
africa ho arab ho america ho ki europe
pahu.nchii kahaa.n nahii.n hai urdu zabaa.n hamaarii
miT jaa.e.nge ham miTne na de.nge is ko
hai jaan-o-dil se pyaarii ham ko zabaa.n hamaarii

Akhtar Shirani
Nazm

namrud ki KHudai

ai falsafa-go,
kahaa.n vo ruuyaa-e-aasmaanii?
kahaa.n ye namruud kii KHudaa.ii!
tuu jaal buntaa rahaa hai jin ke shikasta taaro.n se apne mauhuum falsafe ke
ham us yaqii.n se, ham us amal se, ham us mohabbat se,
aaj maayuus ho chuke hai.n,
ko.ii ye kis se kahe ki aaKHir
gavaah kis adl-e-be-bahaa ke the ahd-e-taataar ke KHaraabe?
ajam, vo marz-e-tilism-o-ra.ng-o-KHayaal-o-naGma
arab, vo iqliim-e-shiir-o-shahd-o-sharaab-o-KHurmaa
faqat navaasa.nj the dar-o-baam ke ziyaa.n ke,
jo un pe guzrii thii
us se bad-tar dino.n ke ham said-e-naa-tavaa.n hai.n!
ko.ii ye kis se kahe:
dar-o-baam,
aahan o chob o sang o siimaa.n ke
husn-e-paivand kaa fusuu.n the
bikhar gayaa vo fusuu.n to kyaa Gam?
aur aise paivand se umiid-e-vafaa kise thii!

Noon Meem Rashid
Nazm

inqalab-e-filistin

dekhtaa hai kaun sahraa ke baguulo.n kii taraf
jo nazar uThtii hai bas jaatii hai phuulo.n kii taraf
aish me.n rah kar hame.n kuchh bhii KHayaal-e-Gam nahii.n
muskuraahaT lab pe hai aa.nkhe.n magar pur-nam nahii.n
dekhtaa us ke karishme kis ko itnaa hosh thaa
pattii pattii dam-ba-KHud thii gul chaman KHaamosh thaa
mahv-e-nazzaara thii.n aa.nkhe.n dil me.n taarii be-KHudii
mujh ko diivaana kiye detii thii phuulo.n kii ha.nsii
dekhtii thii mai.n bhii ye husn-e-chaman ra.ng-e-bahaar
naa-gahaa.n aa.ii sadaa-e-dil ki Gaafil hoshiyaar
khol aa.nkhe.n dekh apne muslimo.n kaa haal-e-zaar
un ko to un kaafir yahuudo.n ne banaayaa hai shikaar
in mazaalim par bhii tuu sarshaar hai mad.hosh hai
masjido.n me.n jaanvar ba.ndhte hai.n tuu KHaamosh hai.n
naam ko baaqii nahii.n islaam kaa izz-o-vaqaar
terii aa.nkho.n se magar jaataa nahii.n ab tak KHumaar
ham hai.n haalaa.nki bahut ye ho chukaa hai inqalaab
sun rahe hai.n daastaan-e-Gam magar kyaa de.n javaab
ho ke paaband-e-hukuumat kis qadar majbuur hai.n
ya.anii koso.n ham arab kii manzilo.n se duur hai.n
huuk uThtii hai ye sun mere dil-e-naakaam me.n
palTane.n kuffaar kii ho.n KHaana-e-islaam me.n

Shahzadi Kulsum
Nazm

bambai

raate.n aa.nkho.n me.n jaaduu kaa kaajal lagaa.e hu.e
shaame.n niilii havaa kii namii me.n nahaa.ii hu.ii
sub.he.n shabnam ke baariik malbuus pahne hu.e
KHvaab-aalud kohsaar ke silsile
ja.ngalo.n ke ghane saa.e
miTTii kii KHushbuu
mahaktii hu.ii ko.nple.n
pattharo.n kii chaTTaane.n
apnii baa.nho.n ko bahr-e-arab me.n sameTe hu.e

Ali Sardar Jafri
Nazm

KHatib-e-azam (sayyad ata-ullah-buKhaari)

KHatiib-e-aazam arab kaa naGma ajam kii lai me.n sunaa rahaa hai
sar-e-chaman chahchahaa rahaa hai sar-e-viGaa muskuraa rahaa hai
hadiis-e-sarv-o-saman nichhaavar zabaan-e-shamshiir is pe qurbaa.n
musailama aise ja.al-saazo.n kii beKH o buniyaad Dhaa rahaa hai
quruun-e-uula kii razm-gaaho.n se murtazaa kaa jalaal le kar
dabiiz niinde.n jhi.njho.Dtaa hai mujaahido.n ko jagaa rahaa hai
hai.n us kii lalkaar se hiraasaa.n mohammad-e-mustafaa ke baaGii
vafaa ke jhanDe ga.De hu.e hai.n Ganiim par dandanaa rahaa hai
mai.n us ke chehre kii muskuraahaT se aisaa mahsuus kar rahaa huu.n
ki jaise kausar pe shaam hote ko.ii diyaa jhilmilaa rahaa hai
vo mard darvesh jis ko haq ne diye hai.n andaaz-e-KHusravaana
usii kii suurat ko tak rahaa hai safar se lauTaa hu.aa zamaana

Shorish kashmiri
Nazm

umara-e-arab se

کرے يہ کافر ہندي بھي جرات گفتار
اگر نہ ہو امرائے عرب کي بے ادبي!
يہ نکتہ پہلے سکھايا گيا کس امت کو؟
وصال مصطفوي ، افتراق بولہبي!
نہيں وجود حدود و ثغور سے اس کا
محمد عربي سے ہے عالم عربي

Allama Iqbal
Nazm

parwin club se aati hai

baahar ye chaahe jaisii ho ghar me.n to adab se aatii hai
jab aadhii raat guzar jaa.e parviin club se aatii hai

Khalid Irfan
Nazm

tamasha-gah-e-lala-zar

tamaashaa-gah-e-laala-zaar
''tiyaatar'' pe merii nigaahe.n jamii thii.n
mire kaan ''music'' ke zer-o-bam par lage the
magar meraa dil phir bhii kartaa rahaa thaa
arab aur ajam ke Gamo.n kaa shumaar
tamaashaa-gah-e-laala-zaar!

Noon Meem Rashid
Nazm

dilli

ma.ngol shak kushaan daraavi.D ki hoon ho.n
vo aariya arab ho.n ki ahl-e-funuun huu.n

Gulzar Dehlvi
Nazm

holi

pahle zamaana aur thaa mai aur thii daur aur thaa
vo boliyaa.n hii aur thii.n vo Toliyaa.n hii aur thii.n, vo holiyaa.n hii aur thii.n
lekin mire piir-e-muGaa.n
kal to nayaa andaaz thaa
ik daur kaa thaa KHaatma ik daur kaa aaGaaz thaa
tere vafaadaaro.n ne jab khelii.n gulaabii holiyaa.n
nikle banaa kar Toliyaa.n
ha.nste chale gaate chale
apne gulaabii rang se duniyaa ko nahlaate chale
masjid se mu.nh mo.De hu.e
mandir kaa sa.ng-e-aastaa.n chho.De hu.e
girjaa se katraa.e hu.e
jaise ki ho.n ruuhaaniyat kii zindagaanii hii se ghabraa.e hu.e
daur-e-vafaadaarii kaa ye anjaam thaa
fikr-e-gunahgaarii kaa taaza dil-rubaa paiGaam thaa
tere hii kuuche me.n ye sab ahd-e-vafaa to.De ga.e
rishte na.e jo.De ga.e
aur phir gunahgaaro.n ne kyaa rindaana ha.ngaame kiye
us vaqt un ko yaad thaa bas ek tarsaanaa tiraa
mufliso.n naadaaro.n ko lalchaanaa tiraa
jab mai-kade kii god me.n
tere jafaa terii sazaa ke naam par saaGar chale
suukhe hu.e kaase labaalab bhar chale
sab apne lab tar kar chale
phir to.D dii.n vo pyaaliyaa.n jin me.n sadaa pii aa.e the
shiishe chhanaa chhan chhan chhanaa chhan TuuTte
aur ri.nd lazzat luuTte
TuuTe hu.e shiisho.n kaa ik ambaar thaa
shiisho.n ke is ambaar me.n ik vo bhii kohna jaam thaa
jis ko sikandar ke qavii haikal javaa.n
bhaage the poras kii zamii.n ko chho.D kar
un me.n vo kaase bhii to hai.n jin ko arab le aa.e the
apnii abaa se Dhaa.np kar
piine se pahle dekhte the mohtasib ko jhaa.nk kar
lekin kabhii
piine se baaz aate na the faateh jo the
un me.n hai.n aise jaam bhii
jin par paThaano.n ke qavii haatho.n ke dhu.ndle se nishaa.n
kuchh aaj bhii maujuud hai.n
aur un nishaano.n me.n hai KHuu.n maftuuh hindustaan kaa
aur un me.n hai.n vo jaam bhii jin ko muGal le aa.e the
taataar se qandhaar se kaabul se ruknaa-baad se
maftuuh hindustaan me.n
jin ko vo apne qasr-e-aaliishaa.n me.n chhalkaate rahe
teGo.n se khankaate rahe
aur vo hasii.n naazuk subuk halkii suraahii kis kii hai
paris ke mai-KHaano.n me.n ye mash.huur thii
laayaa thaa ik taajir ise jo baa'd me.n faateh banaa
ye halke shiisho.n ke gilaas aur ye na.e halke se paig
jin par likhaa hai ye bane the mulk-e-inglistaan me.n
aur haal kii sadiyo.n me.n chalte rahe
piine ko mil jaatii thii pii lete the ham
lekin tahii-dastii kaa ye aalam thaa dil jalte rahe
ham aaj ghabraa hii ga.e
aur un sabhii shiisho.n ko chaknaachuur kar Daalaa vufuur-e-josh me.n
chhan chhan chhanaa chhan to.D kar
jaise ki barbaadii kii devii chham-chhamaa-chham naachtii
holii manaane ke liye mai-KHaane me.n aa hii ga.e
TuuTe hu.e shiisho.n ke is ambaar par
ham ne jalaa.ii aag yuu.n
zardusht kaa paakiiza dil sachchaa.iyo.n par ha.ns diyaa
jaise ki ye kahne lagaa
jalne do jalne do yuu.nhii shiishe pighalne do yuu.nhii
tere vafaadaaro.n ne yuu.n piir-e-muGaa.n
shab bhar jalaa.ii.n holiyaa.n
na.are vo mastaane lage is josh me.n
dil gir pa.De ehsaas kii aaGosh me.n
aur bol uThe tasliim ai piir-e-muGaa.n jaate hai.n ham
kal phir palaT kar aa.e.nge
us vaqt is mai-KHaane me.n saamaan ho.nge duusre
tere puraane zehn ke me.aar to.De jaa.e.nge
taamiir-e-nau kii jaa.egii
lekin hamaare saal-KHuurda mehrbaa.n piir-e-muGaa.n
tujh ko buraa lagtaa hai kyuu.n
Gairo.n kaa kyaa teraa bhii kyaa
ye mai-kada ham sab kaa hai panchaaytii
tuu kyaa hai teraa KHauf kyaa
kah to diyaa piir-e-muGaa.n kal palaT kar aa.e.nge
hargiz na ham baaz aa.e.nge
kis ko Daraataa hai ki tum is kii sazaa paa jaa.oge
gaate the ham gaate hai.n ham gaa.e.nge ham
hargiz na baaz aa.e.nge ham
jhele.nge jiite jaa.e.nge
pairo.n me.n hai zanjiir lekin TuuT bhii saktii hai ye
haa.n aaj hastii qaid hai kal chhuuT bhii saktii hai ye
gaane de gaane de hame.n
dhuume.n machaane de hame.n
shiishe ko shiishe se la.Daane de hame.n
chhan-chhan-chhanaa-chhan kii sadaa
ba.Dhne de ba.Dhne de abhii
ham mast o be-KHud naachte gaate jalaate to.Dte
ha.nste rahe.n chalte rahe.n
aur tuu bhii KHud piir-e-muGaa.n
holii ke naGme san zaraa aur dekh apnii aa.nkh se
tere vafaadaaro.n ne kyaa khelii.n gulaabii holiyaa.n
mu.nh mai-kade se mo.D kar holii kii ye Tolii chalii
gulzaar me.n
sabze lachaktii Daaliyaa.n gunjaan, sundar jhaa.Diyaa.n
paanii kii sii.nchii kiyaariyaa.n, kaa.nTo.n me.n chubhtii pattiyaa.n
ye sab sahii lekin yahaa.n vo shai kahaa.n
jis ke liye mash.huur hai a.nguur-e-naab
haa.n kyaa kahaa piir-e-muGaa.n
talvo.n ke niiche phuul hai.n in me.n se do ik chun bhii luu.n
KHaalii hai.n gul-daste tire
tujh ko nahii.n ma.aluum abhii
KHaalii ye gul-daste tire KHaalii hii rah jaa.e.nge ab
phuulo.n ne Thaanii hai ki shaaKHo.n hii pe mar jaa.e.nge ab
aur tere kamro.n me.n vo na aa.e.nge ab
mu.nh-band kaliyaa.n ab kahaa.n
jo apnii sundar mohnii muskaan kar de.n raa.egaa.n
aur apnaa gulshan chho.D de.n siine me.n KHushbu.e.n liye
aur ajnabii maahaul me.n
taaq-e-nazar kii kaa.nptii ziinat bane.n
kaliyo.n ke mu.nh ab khul chuke mu.nh-band kaliyaa.n ab kahaa.n
kaliyaa.n kahaa.n ye phuul hai.n
KHaak-e-chaman kii god me.n aaraam-e-jaa.n ye phuul hai.n
aatish-zabaa.n ye phuul hai.n
aur dekh tuu ye phuul kitne shoKH hai.n
jo TuuT kar shaaKHo.n se gir jaate hai.n terii raah me.n
ai dil-kash piir-e-muGaa.n
ye chaahte hai.n rok de.n gulzaar me.n raahe.n tirii
tere liye chaara hii kiyaa ab rah gayaa
in be-hayaa phuulo.n kii aa.nkho.n kaa to paanii bah gayaa
ab hai.n ye un kii jur.ate.n roke.ngi tere raaste
tuu bhii KHudaa ke vaaste
in ko kuchal de piis de
varna KHudaa-na-KHvaasta
ye rok hii le.n raasta
kaliyaa.n nahii.n kaa.nTe hai.n ye
kaa.nTo.n se bhii bad-tar hai.n ye nashtar hai.n ye KHanjar hai.n ye
gulzaar me.n tere qadam kuchh aaj to aa.e nahii.n
tuu ne unhii.n sabzo.n pe kii hai mai-kashii
sadiyo.n se teraa daur hai
gulzaar par hai haq tiraa
tuu Dar gayaa piir-e-muGaa.n
kitnaa bhayaanak KHvaab thaa
ta.abiir kuchh bhii ho magar
tere vafaadaaro.n ne kal
kis aan se kis baan se kis shaan se
khelii.n gulaabii holiyaa.n

Ali Jawad Zaidi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now