Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "besvaa"

Nazm MATCHES FOR "besvaa"

Nazm

kis ke sheron mein kis ki baaten hain

merii likhne me.n umr guzrii hai
terii pa.Dhne kii umr hai la.Dkii
terii socho.n kii sab KHabar hai mujhe
mujh pe ye vaqt aa ke biit chukaa
mai.n bhii KHud se savaal kartaa thaa
kis kii Gazlo.n me.n kis ke jalve hai.n
kis kaa chehra hai kis kii nazmo.n me.n
kaun rotaa hai kis ke lahje me.n
kis ke shero.n me.n kis kii baate.n hai.n
phir javaabaat mil ga.e mujh ko
ab ha.nsii aatii hai savaalo.n par
aur tujh par bhii aur KHud par bhii
tujhe ma.aluum kyaa ki ik aamad
kitne jazbo.n se haamila ho kar
leT kar ek besvaa kii tarah
kore kaaGaz ke sard bistar par
vo haraamii kalaam jantii hai
jis pe fatve faqiih-e-shahr ke hai.n
jo KHudaa.o.n ko gaalii lagtaa hai
jis pe raj.at-pasand ku.Dhte hai.n
jis pe jiddat-parast ha.nste hai.n
jis kaa ThaTThaa u.Daate hai.n lau.nDe
jis ke fan kaa zamaana biit gayaa
jis se nafrat hai ilm vaalo.n ko
jis pe KHud mujh ko Gussa aataa hai
jise tuu bhii samajh nahii.n paatii
naam apnaa khurach ke jis par se
mai.n ne raddii me.n baarhaa bechaa
aur cigarette KHariide apne liye
aur is dil ko aag me.n phuu.nkaa
jis ke jazbo.n se haamila ho kar
kore kaaGaz ke sard bistar par
leT kar ek besvaa kii tarah
merii qudrat kii shaahkaar aamad
vo haraamii kalaam jannatii hai
terii socho.n kii sab KHabar hai mujhe
mere shero.n me.n kaun hai mat soch
terii pa.Dhne kii umr hai la.Dkii
aur phir sochne se kyaa haasil
baarvar justujuu hu.ii bhii to kyaa
merii Gazlo.n me.n tuu hu.ii bhii to kyaa

Raheel Farooq
Nazm

mudawa

kitne bebaak hai.n shaa.ir ab ke
kitne uryaa.n hai.n ye afsaana-nigaar
kuchh samajh me.n mire aate hii nahii.n
in adab-sozo.n ke gunjalak-ash.aar
yuu.n to apne ko ye kahte hai.n adiib
pa.Dhte hai.n ja.ng ke lekin aKHbaar
kabhii europe kaa kabhii puurab kaa
zikr karne me.n u.Daate hai.n sharaar
daastaane.n na qasiide na Gazal
adab-e-talKH kii har suu bhar maar
kabhii punjab kii bho.nDii baate.n
kabhii ba.ngaal ke gande afkaar
KHuun-aaluuda hai.n un kii nasre.n
piip bahte hu.e in ke ash.aar
un ke afsaano.n ke mauzuu ajiib
kaalii la.Dkii kabhii kaalii shalvaar
ann-daataa se kabhii la.D baiThe
kabhii aflaas pe khii.nchtii talvaar
un kii nazmo.n me.n ko.ii lutf nahii.n
na ko.ii naGma na tafsiir-e-bahaar
kabhii aavaara kabhii KHaana-ba-dosh
kabhii aurat kabhii miinaa-baazaar
bad-mazaaqii kii saraasar baate.n
ra.ng o buu chho.D ke aa.ndhii kii pukaar
harf-e-aaKHir kii vo shamshiir do-dam
zahr me.n Duubii hu.ii jis kii dhaar
ja.ng-e-aazaadii kaa sar me.n saudaa
besvaa ke liye itne iisaar
aib-poshii unhe.n aatii hii nahii.n
zaKHm dhote hai.n sar-e-raah-guzaar

Wamiq Jaunpuri
Nazm

kam-nigahi

mar ke dekhtaa huu.n mai.n
zindagii kii razm-gaah sard aur bujhii hu.ii
jaise ek besvaa raat kii thakii hu.ii
ho pala.ng par udaas niim-jaa.n pa.Dii hu.ii
ko.ii kashmakash nahii.n ko.ii justujuu nahii.n
ab to duur duur tak hashr-e-haa.o-huu nahii.n
chaar-suu nigaah me.n suukhe suukhe jism me.n
maut kii jabii.n pe hai.n yaa kariih tevriyaa.n
chaar-suu nigaah me.n haDDiyo.n ke Dher hai.n
aaj bhii jhalakte hai.n jin se bhuuk ke nishaa.n
zindagii giraa.n rahii maut raa.egaa.n ga.ii
sair ho ke jaa rahe hai.n gadho.n ke kaarvaa.n
mere ham-safar tamaam saadgii shi.aar the
ra.nj ke shikaar the Gam se dil-figaar the
phir bhii mutma.in jiye kitne vaz.a-daar the
vo pa.Dii hai naazima, vo mirii rafiiq-e-kaar
vo mirii shariik-e-Gam ziist kii shaguftagii
sach ki Gam-zada rahii ifaaqa-kash rahii magar
bhe.Diyo.n ke vaaste tar nivaala hii rahii
is kaa jism Dhaa.np duu.n ki har ik barahnagii
is fareb-zaar me.n naa-pasand kii ga.ii
haalat-e-sitam-nasiib dekhtaa nahii.n ko.ii
kyuu.n hu.aa ko.ii Gariib dekhtaa nahii.n ko.ii
aur haqaa.eq-e-muhiib dekhtaa nahii.n ko.ii
baaG dekhte hai.n sab raag dekhte nahii.n
chaa.nd dekhte hai.n sab daaG dekhte nahii.n

Makhmoor Jalandhari
Nazm

daeron ki fasilon se Darte ho

daa.ere se TuuT kar gir pa.De.nge abhii
aur ham apne hone kii paadaash me.n
buu.Dhii sadiyo.n kii TuuTii hu.ii qaus par
ek taariik nuqte me.n kho jaa.e.nge
daa.ero.n ke maqaabir me.n so jaa.e.nge
daa.ere KHvaahisho.n ke maqaabir sahii
daa.ere aarzuu ke miinaar hai.n
daa.ere be-sabaatii ke marqad nahii.n
daa.ere guzre vaqto.n ke aasaar hai.n
daa.ero.n kii fasiilo.n me.n lipTe hu.e
an-ginat log jiivan se bezaar hai.n
jaane din ke lahuu se siyah-raat ko
haath dhone me.n kaisii masarrat milii
kaise kaise javaa.n-mard the jo kabhii
chaa.ndnii ke safar par ravaana hu.e
mausamo.n kii tamaazat ko o.Dhe hu.e
naa-rasaa.ii ke aazaar me.n kho ga.e
kitne taare KHalaa.o.n kii dahliiz par
raat ke dasht-e-viiraan me.n so ga.e
daa.ero.n kii fasiilo.n se girtaa lahuu
shahr ke be-navaa.o.n kaa taavaan hai
jangalo.n me.n bhaTaktii sadaa kii tarah
shahr kaa har sadaa-kaar be-jaan hai
be-gharo.n kii tarah besvaa kii tarah
kohsaaro.n se uljhii havaa kii tarah
shahar ke chauk me.n naqsh-e-paa kii tarah
daa.ero.n kii fasiilo.n se Darte raho
zard patto.n kii suurat havaa kii tarah

Shabnam Munavari
Nazm

aawara

ik mahal kii aa.D se niklaa vo piilaa maahtaab
jaise mullaa kaa amaama jaise baniye kii kitaab
jaise muflis kii javaanii jaise beva kaa shabaab
ai Gam-e-dil kyaa karuu.n ai vahshat-e-dil kyaa karuu.n

Asrarul Haq Majaz
Nazm

ek nazm

daanish-var kahlaane vaalo
tum kyaa samjho
mub.ham chiize.n kyaa hotii hai.n
thal ke registaan me.n rahne vaale logo
tum kyaa jaano
saavan kyaa hai
apne badan ko
raat me.n andhii taariikii se
din me.n KHud apne haatho.n se
Dhaa.npne vaalo
uryaa.n logo
tum kyaa jaano
cholii kyaa hai daaman kyaa hai
shahr-badar ho jaane vaalo
fuTpaatho.n par sone vaalo
tum kyaa samjho
chhat kyaa hai diivaare.n kyaa hai.n
aa.ngan kyaa hai
ik la.Dkii kaa KHizaa.n-rasiida baazuu thaame
nabz ke uupar haath jamaa.e
ek sadaa par kaan lagaa.e
dha.Dkan saa.nse.n gin.ne vaalo
tum kyaa jaano
mub.ham chiize.n kyaa hotii hai.n
dha.Dkan kyaa hai jiivan kyaa hai
sattarah-number ke bistar par
apnii qaid kaa lamha lamha gin.ne vaalii
ye la.Dkii jo
barso.n kii biimaar nazar aatii hai tum ko
sola saal kii ik beva hai
ha.nste ha.nste ro pa.Dtii hai
andar tak se bhiig chukii hai
jaan chukii hai
saavan kyaa hai
is se puuchho
kaa.nch kaa bartan kyaa hotaa hai
is se puuchho
mub.ham chiize.n kyaa hotii hai.n
suunaa aa.ngan tanhaa jiivan kyaa hotaa hai

Aanis Moin
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

bewa ki KHud-kushi

ye a.ndherii raat ye saarii fazaa so.ii hu.ii
pattii pattii manzar-e-KHaamosh me.n kho.ii hu.ii
maujzan hai bahr-e-zulmat tiirgii kaa josh hai
shaam hii se aaj qindiil-e-falak KHaamosh hai
chand taare hai.n bhii to be-nuur pathraa.e hu.e
jaise baasii haar me.n ho.n phuul kumhlaa.e hu.e
khap gayaa hai yuu.n ghaTaa me.n chaa.ndnii kaa saaf ra.ng
jis tarah maayuusiyo.n me.n dab ke rah jaa.e uma.ng
umDii hai kaalii ghaTaa duniyaa Dubone ke liye
yaa chalii hai baal khole raa.nD rone ke liye
jitnii hai gunjaan bastii utnii hii viiraan hai
har galii KHaamosh hai har raasta sunsaan hai
ik makaa.n se bhii makii.n kii kuchh KHabar miltii nahii.n
chilmane.n uThtii nahii.n zanjiir-e-dar hiltii nahii.n
so rahe hai.n mast-o-be-KHud ghar ke kul piir-o-javaa.n
ho ga.ii hai.n band husn-o-ishq me.n sargoshiyaa.n
haa.n magar ik samt ik goshe me.n ko.ii nauhagar
le rahii hai karvaTo.n par karvaTe.n dil thaam kar
dil sambhaltaa hii nahi.n hai siina-e-sad-chaak me.n
phuul saa chehra aTaa hai bevgii kii KHaak me.n
u.D chalii hai ra.ng-e-ruKH ban kar hayaat-e-musta.aar
ho rahaa hai qalb-e-murda me.n javaanii kaa fishaar
hasrate.n dam to.Dtii hai.n yaas kii aaGosh me.n
saik.Do.n shikve machalte hai.n lab-e-KHaamosh me.n
umr aamaada nahii.n murda-parastii ke liye
baar hai ye zinda mayyat dosh-e-hastii ke liye
chaahtii hai laakh qaabuu dil pe paatii hii nahii.n
haa.e-re zaalim javaanii bas me.n aatii hii nahii.n
thartharaa kar girtii hai jab suune bistar par nazar
le ke ik karvaT paTak detii hai vo takiya pe sir
jab khanak uThtii hai.n sotii la.Dkiyo.n kii chuu.Diyaa.n
aah ban kar uThne lagtaa hai kaleja se dhu.aa.n
ho ga.ii beva kii KHaatir nii.nd bhii jaise haraam
muKHtasar saa ahd-e-vaslat de gayaa soz-e-davaam
dopahar kii chhaa.nv daur-e-shaadmaanii ho gayaa
pyaas bhii bujhne na paa.ii KHatm paanii ho gayaa
le rahii hai karvaTo.n par karvaTe.n baa-iztiraar
aag me.n paara hai yaa bistar pe jism-e-be-qaraar
pa.D ga.ii ik aah kar ke ro ke uTh baiThii kabhii
u.ngliyo.n me.n le ke zulf-e-KHam-ba-KHam ai.nThii kabhii
aa ke ho.nTo.n par kabhii maayuus aahe.n tham ga.ii.n
aur kabhii suunii kalaa.ii par nigaahe.n jam ga.ii.n
itnii duniyaa me.n kahii.n apnii jagah paatii nahii.n
yaas is had kii ki shauhar kii bhii yaad aatii nahii.n
aa rahe hai.n yaad paiham saas nando.n ke suluuk
phaT rahaa hai Gam se siina uTh rahii hai dil me.n huuk
apnii maa.n bahno.n kaa bhii aa.nkhe.n churaanaa yaad hai
aisii duniyaa me.n kisii kaa chho.D jaanaa yaad hai
baaGbaa.n to qabr me.n hai kaun ab dekhe bahaar
KHud usii ko tiir us ke karne vaale hai.n shikaar
jab nazar aataa nahii.n detaa ko.ii bekas kaa saath
zahr kii shiishii kii jaanib KHud-ba-KHud ba.Dhtaa hai haath
dil ta.Dap kar kah rahaa hai jald is duniyaa ko chho.D
chuu.Diyaa.n to.Dii.n to phir zanjiir-e-hastii ko bhii to.D
dam agar niklaa to kho.ii zindagii mil jaa.egii
ye nahi.n to KHair tanhaa qabr hii mil jaa.egii
vaa.n tujhe zillat kii nazro.n se na dekhegaa ko.ii
chaahe ha.nsnaa chaahe ronaa phir na rokegaa ko.ii
vaa.n sab ahl-e-dard hai.n sab saahab-e-insaaf hai.n
rahbar aage jaa chukaa raahe.n bhii terii saaf hai.n
dil inhii.n baato.n me.n uljhaa thaa ki dam ghabraa gayaa
haath le kar zahr kii shiishii labo.n tak aa gayaa
tilmilaatii aa.nkh jhapkaatii jhijaktii haa.nptii
pii ga.ii kul zahr aaKHir thartharaatii kaa.nptii
maut ne jhaTkaa diyaa kul uzv Dhiile ho ga.e
saa.ns ukh.Dii, nabz Duubii, ho.nT niile ho ga.e
aa.nkh jhapkii ashk Tapkaa hichkii aa.ii kho ga.ii
maut kii aaGosh me.n ik aah bhar kar so ga.ii
aur kar ik aah sulge hind kii rasmo.n kaa daam
ai javaanaa-marg beva tujh pe 'kaifii' kaa salaam

Kaifi Azmi
Nazm

gurez

miraa junuun-e-vafaa hai zavaal-aamaada
shikast ho gayaa teraa fusuun-e-zebaa.ii
un aarzuu.o.n pe chhaa.ii hai gard-e-maayuusii
jinho.n ne tere tabassum me.n parvarish paa.ii
fareb-e-shauq ke ra.ngii.n tilism TuuT ga.e
haqiiqato.n ne havaadis se phir jilaa paa.ii
sukuun-o-KHvaab ke parde sarakte jaate hai.n
dimaaG-o-dil me.n hai.n vahshat kii kaar-farmaa.ii
vo taare jinme.n mohabbat kaa nuur taabaa.n thaa
vo taare Duub ga.e le ke ra.ng-o-ra.anaa.ii
sulaa ga.ii thii.n jinhe.n terii multafit nazre.n
vo dard jaag uThe phir se le ke a.ng.Daa.ii
ajiib aalam-e-afsurdagii hai ruu-ba-faroG
na jab nazar ko taqaazaa na dil tamannaa.ii
tirii nazar tire gesuu tirii jabii.n tire lab
mirii udaas-tabii.at hai sab se uktaa.ii
mai.n zindagii ke haqaa.eq se bhaag aayaa thaa
ki mujh ko KHud me.n chhupaa.e tirii fusuu.n-zaa.ii
magar yahaa.n bhii ta.aaqub kiyaa haqaa.eq ne
yahaa.n bhii mil na sakii jannat-e-shakebaa.ii
har ek haath me.n le kar hazaar aa.iine
hayaat band dariicho.n se bhii guzar aa.ii
mire har ek taraf ek shor guu.nj uThaa
aur us me.n Duub ga.ii ishrato.n kii shahnaa.ii
kahaa.n talak kare chhup-chhup ke naGma-pairaa.ii
vo dekh saamne ke pur-shikoh aivaa.n se
kisii kiraa.e kii la.Dkii kii chiiKH Takraa.ii
vo phir samaaj ne do pyaar karne vaalo.n ko
sazaa ke taur par baKHshii taviil tanhaa.ii
phir ek tiira-o-taariik jho.npa.Dii ke tale
sisakte bachche pe beva kii aa.nkh bhar aa.ii
vo phir bikii kisii majbuur kii javaa.n beTii
vo phir jhukaa kisii dar par Guruur-e-barnaa.ii
vo phir kisaano.n ke majme.a pe gun-mashiino.n se
huquuq-yaafta tabqe ne aag barsaa.ii
sukuut-e-halqa-e-zindaa.n se ek guu.nj uThii
aur is ke saath mire saathiyo.n kii yaad aa.ii
nahii.n nahii.n mujhe yuu.n multafit nazar se na dekh
nahii.n nahii.n mujhe ab taab-e-naGma-pairaa.ii
miraa junuun-e-vafaa hai zavaal-aamaada
shikast ho gayaa teraa fusuun-e-zebaa.ii

Sahir Ludhianvi
Nazm

meri shaeri

mirii shaa.erii KHaar-zaaro.n kii duniyaa
tahii-dastii o pastii o KHasta-haalii
baguulo.n se ma.amuur phuulo.n se KHaalii
vo besha ki hai mazra-e-KHushk-saalii
jahaa.n abr bhuulaa hai dariyaa-navaalii
na bhuulii use bhii mirii fikr-e-aalii
mirii shaa.erii KHaarzaaro.n kii duniyaa

Hafeez Jalandhari
Nazm

khanDar

kaisii KHaamoshii hai viiraanii hai sannaaTaa hai
ko.ii aahaT hai na aavaaz na ko.ii dha.Dkan
dil hai yaa qabr sulagtii hu.ii tanhaa.ii kii
zehan hai yaa kisii beva kaa akelaa aa.ngan
u.D gayaa rang har ik soch ke aa.ii.ne kaa
shab ke be-nuur dupaTTe se sitaare TuuTe
jam ga.ii gard KHayaalo.n kii hasii.n raaho.n par
muddate.n ho ga.ii.n ummiid kaa daaman chhuuTe
yak-ba-yak duur bahut duur bahut duur kahii.n
terii paazeb chhanakne kii sadaa aane lagii
shauq ne paa.nv ba.Dhaa.e usii aavaaz kii samt
tujh se milne kii lagan aur bhii ta.Dpaane lagii
ye kha.nDar aaj jahaa.n raat kii taariikii me.n
tuu ne bhuule hu.e afsaane ko dohraayaa hai
isii uj.De hu.e viiraan kha.nDar me.n ki jahaa.n
kitne din baa'd tiraa saaya nazar aayaa hai
isii uj.De hu.e viiraan kha.nDar me.n ham ne
umr bhar saath nibhaane kii qasam khaa.ii thii
isii uj.De hu.e viiraan kha.nDar me.n tere
thartharaate hu.e ho.nTo.n pe du.aa aa.ii thii
rasm ko.ii ho magar ham ko judaa kar na sake
ye rivaayaat na pahnaa.e.n kabhii zanjiire.n
ham ki is raaz se is baat se naa-vaaqif the
ki du.aa.o.n se badaltii hii nahii.n taqdiire.n
lekin ab rasm ko.ii kuchh na kahegii mujh se
ab rivaayaat ko majbuur kiyaa hai mai.n ne
ab na rokegaa mirii raah zamaana ba.Dh kar
jo bhii anjaam ho ye soch liyaa hai mai.n ne
mai.n muqaddar se gale mil ke nahii.n ro saktaa
tujh ko paanaa miraa maqsad hai tujhe paa.uu.ngaa
aaj Thukraa ke har ik maslahat-andeshii ko
tere saa.e ke ta.aaqub me.n chalaa jaa.uu.ngaa

Kafeel Aazar Amrohvi
Nazm

bewa ki fariyaad

kisii kii yaad dil me.n hai ki jis se jii niDhaal hai
kahuu.n agar to kyaa kahuu.n ajab tarah kaa haal hai

Arsh Malsiyani
Nazm

hashr ki subh daraKHshan ho maqam-e-mahmud

raat daa.Dhii ke a.ndhere se takalluf barte
arsh ke saamne rusvaa.ii kii gardan na uThe
izn-e-sajda pe kamar taKHta na ho jaa.e kahii.n
khokhle lafzo.n me.n lohaa to nahii.n bhar sakte
saika.Do.n saal kii tabliiG ke chaaliis samar
kashtii ban jaa.e to tannuur se paanii uble
saalhaa-saal se aaraam natiija matluub
tiin-sau-saaTh sanam KHaana-e-ka.aba se chale
reg-zaaro.n me.n Gubaar aur khajuurii saa.e
uu.nT kii aa.nkh me.n tash.hiir hu.aa dard-e-safar
ko.ii 'hi.nda' se kahe daa.nt kahaa.n hai.n tere
fat.h-e-makka se magar log hidaayat paa.e.n
KHuun jam jaa.e jo naalain me.n chalte chalte
arsh kii aa.nkh se rahmat kaa samundar uble
jibra.iil apnii hai.at me.n hai.n numaa.ish-manzar
paa.nv paataal me.n sar charKH se Takraa.e kahii.n
par jo khole to har ik samt pe parde laTke.n
aur jaltaa hu.aa suuraj abhii kho jaa.e kahii.n
qaafila aayaa hai 'buu-bakr' se mansuub magar
maal taqsiim hu.aa daaman-e-haajat-ma.nda.n
nuur ka.ndhe pe uThaa.e shab-e-hijrat ke safiir
Gaar me.n saath rahe paas hii paivand hu.e
masjid-e-nabvii me.n ambaar-e-Ganiimat raushan
log rote hu.e nikle hai.n pareshaa.n-manzar
raushnii pahu.nchii 'abuu-jahl' kii diivaaro.n tak
ghar kii taariikii me.n rasta na bane biinaa.ii
pe.D ke saa.e kii pahchaan yahuudii raahib
ruk gayaa aab-e-ravaa.n beva ke darvaaze par
dast-e-zohraa me.n nishaanaat ayaa.n chakkii se
ilm ke baab 'alii' umr me.n sab se chhoTe
chaa.nd kaa naam tire chaak-garebaano.n me.n
mubtadii Dhuu.nDte hai.n masjid-e-aqsaa me.n imaam
sidrat-ul-muntahaa jibriil ijaazat maa.nge
kaun thaa kis ne pukaaraa ki chale bhii aa.o
kaun maujuud thaa pahle se vahaa.n kaun gayaa
kaun suntaa thaa vahaa.n kis ne pukaaraa kis ko
kis kii aavaaz kii tanviir se aalim chamke
sar-bulandii thii muqaddar me.n qalam se pahle
bakriyaa.n kaun 'haliima' kii charaane jaa.e
'aamina' batn se iz.haar hai aadam kaa uruuj
mujtam.a kis ne kiyaa logo.n ko parbat ke qariib
kis ne lalkaaraa zalaalat ko musalsal tanhaa
jau kii roTii kabhii mil jaa.e kabhii faaqa-kashii
bhuuk se peT pe patthar kabhii baa.ndhe kis ne
tiin-sau-terah kii ta.adaad hai kis gintii me.n
fikr pe daa.era-kun KHandaqe.n khodii jaa.e.n
duur kii dhuup me.n hai faisla-kun rah-e-tabuuk
'ha.nzala' saamne aa jaa.e.n jo chhaT jaa.e Gubaar
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
ko.ii pardesii hai KHeme pe pareshaa.n-surat
aur 'faaruuq' chale biivii ko ham-raah liye
faasle to.D kar aavaaz ke saa.e phaile
haakim-e-vaqt kaa kurtaa ka.ii paivand lagaa
bakriyaa.n jis se sambhaalii nahii.n jaatii.n thii.n kabhii
nisf duniyaa pe KHilaafat ke alam lahraa.e
yaad hai saahibo KHaibar ko ukhaa.Daa kis ne
kis kii talvaar thii aa.iina zamaane ke liye
kis ne zarKHez shujaa.at ke sitaare bo.e
jaan dii jaavedaa.n lamhaat tilaavat mashGuul
KHuun ke dhabbe hai.n qur.aan pe taabinda nazar

Adil Mansuri
Nazm

cigarette aur pan ka mukalima

jal ke KHud sab ko jilaa denaa tiraa pesha hai
chhup ke baiThii hai ajal jis me.n tuu vo besha hai
jaan le apne hii aashiq kii jo vo tesha hai
tere piine se to sartaan kaa andesha hai
jo tujhe mu.nh se lagaa.e.nge lahuu thuuke.nge
aur bhii chiizo.n ke kash lene se kab chuuke.nge

Syed Mohammad Jafri
Nazm

qatl-e-bahaaran

uj.Daa khanDar
suunaa manzar
beva panchhii
zaKHmii taa.ir
uryaa.n KHanjar
KHuunii.n dhartii kaalaa suuraj giilaa ambar
jangal jangal KHauf aur dahshat
sahraa sahraa vahshat vahshat
tank kii aamad
top kii harakat
jang kii la.anat
qaht kaa saaya
bhuuk kii aa.ndhii
aur bekaarii
aur bad-chalanii
aur biimaarii
tan kii tijaarat
man kii haziimat
dhan kii hukuumat
bhuukii siitaa nangii mariyam murda gautam
paara-paara shiisha-e-hurmat
reza reza qasr-e-tamaddun
dhajjii dhajjii amn kaa parcham
bol ki lab aazaad hai.n tere

Raza Ashk
Nazm

is waqt ghazal ki baat na kar

jis ghar me.n barastaa thaa jiivan
chhaa.ii hai vahaa.n par viiraanii
beva hu.ii.n kitnii sundariyaa.n
maare ga.e kitne senaanii
kyuu.n josh nahii.n aataa tujh ko
hai KHuun rago.n me.n yaa paanii
aazaadii ke din ko raat na kar
is vaqt Gazal kii baat na kar

Nazeer Banarasi
Nazm

tufani kashti

dariyaa cha.Dhaav par hai
aur bojh naav par hai
pahnaa-e-aab saaraa
hai kuuch kaa ishaaraa
hosh-aazmaa nazaaraa
maujo.n ke mu.nh me.n kaf hai
ik shor har taraf hai
marg-aafrii.n hai dhaaraa
aur duur hai kinaaraa
ko.ii nahii.n sahaaraa
teG-aazmaa hai.n lahre.n
teGe.n hai.n yaa hai.n lahre.n
tauba havaa kii tezii
mauj-e-fanaa kii tezii
hai kis balaa kii tezii
tadbiir-e-naaKHudaa kyaa
chappuu kaa aasraa kyaa
girdaab pa.D rahe hai.n
kashtii se la.D rahe hai.n
taKHte ukha.D rahe hai.n
naGmo.n kaa josh KHaamosh
sab naav-nosh KHaamosh
hai ye baraat kis kii
nau-shaah aur baraatii
lauTe hai.n le ke Dolii
maayuus hai.n nigaahe.n
raqsaa.n labo.n pe aahe.n
Dolii me.n huur paikar
kyaa kaa.nptii hai tharthar
lekin hai muhr lab par
duulhaa ke sar pe sahraa
lekin udaas chehra
ishrat kii aarzuu thii
ulfat kii justujuu thii
ummiid ruu-ba-ruu thii
ye inqalaab kyaa hai
aaGosh-e-marg vaa hai
afsos yaa-ilaahii
kyaa aa ga.ii tabaahii
qismat kii kam nigaahii
dil sard ho rahe hai.n
ruKH zard ho rahe hai.n
is mahshar-e-balaa me.n
is lahja-e-fanaa me.n
is sail-e-baad-paa me.n
sab ahl-e-yaas gum hai.n
hosh-o-havaas gum hai.n
kuchh mahv hai.n du.aa me.n
kuchh naala-o-bukaa me.n
kuchh shikva-e-KHudaa me.n
baiThii hai ek beva
hai sabr jis kaa sheva
dil haath se dabaa.e
bachcha gale lagaa.e
tiir-e-umiid khaa.e
ye baap kii nishaanii
sarmaaya-e-javaanii
ik din javaan hogaa
ammaa.n kaa maan hogaa
haq mehrbaan hogaa
ik naujavaa.n bad-aKHtar
bhaagaa hai ghar se la.D kar
chho.De the baap-maa.n bhii
biivii bhii aur makaa.n bhii
ab chho.Dtaa hai jaa.n bhii
ai kaash mai.n na aataa
ai kaash lauT jaataa
ai tab-e-KHud-sar afsos
ai taish tujh par afsos
afsos yaksar afsos
ye dev-zaad mauje.n
ye nau-nihaad mauje.n
aayaa phir ek relaa
kashtii banii hai tinkaa
bas ho chalaa safaayaa
tadbiir ro rahii hai
taqdiir so rahii hai
mallaah tair nikle
dariyaa me.n pair nikle
afsos Gair nikle

Hafeez Jalandhari
Nazm

hindostan

muflis yahaa.n nahii.n hai.n ki beva yahaa.n nahii.n
aisaa ko.ii nahii.n hai jo aafat-nishaa.n nahii.n
ye baat misl-e-shams ayaa.n hai nihaa.n nahii.n
aazaad gar nahii.n hai to hindostaa.n nahii.n

Shatir Hakeemi
Nazm

ek KHatun aur nujumi

KHaatuun bolii.n itnaa to KHud maantii huu.n mai.n
mai.n beva hone vaalii huu.n ye jaantii huu.n mai.n

Syed Hashmat Sohail
Nazm

raegan subh ki chita par

mai.n takmiil ke sahraa me.n bhaTaktaa hu.aa zarra huu.n
suuraj hone ke gumaan se duur
aur bache hu.e lamho.n ko god me.n liye zindagii
har raa.egaa.n sub.h kii chitaa par
satii ho jaane vaalii beva hai

Tanveer Anjum
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now