Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chane"

Nazm MATCHES FOR "chane"

Nazm

daraKHt-e-zard

hadaf ho.nge tumhaaraa kaun tum kis ke hadaf hoge
na jaane vaqt kii paikaar me.n tum kis taraf hoge
hai ran ye zindagii ik ran jo barpaa lamha lamha hai
hame.n is ran me.n kuchh bhii ho kisii jaanib to honaa hai
so ham bhii is nafas tak hai.n sipaahii ek lashkar ke
hazaaro.n saal se jiite chale aa.e hai.n mar mar ke
shuhuud ik fan hai aur merii adaavat be-fano.n se hai
mirii paikaar azal se
ye 'KHusro' 'miir' 'Gaalib' kaa KHaraaba bechtaa kyaa hai
hamaaraa 'Gaalib'-e-aazam thaa chor aaqa-e-'bedil' kaa
so rizq-e-faKHr ab ham khaa rahe hai.n 'miir'-e-bismil kaa
sidhaarat bhii thaa sharminda ki do-aabe kaa baasii thaa
tumhe.n ma.aluum hai urdu jo hai paalii se niklii hai
vo goyaa us kii hii ik pur-numuu Daalii se niklii hai

Jaun Eliya
Nazm

parchhaiyan

bastii pe udaasii chhaane lagii melo.n kii bahaare.n KHatm hu.ii.n
aamo.n kii lachaktii shaaKHo.n se jhuulo.n kii qataare.n KHatm hu.ii.n

Sahir Ludhianvi
Nazm

intizar

raat bhar diida-e-namnaak me.n lahraate rahe
saa.ns kii tarah se aap aate rahe jaate rahe
KHush the ham apnii tamannaa.o.n kaa KHvaab aa.egaa
apnaa armaan bar-afganda-naqaab aa.egaa
nazre.n niichii kiye sharmaa.e hu.e aa.egaa
kaakule.n chehre pe bikhraa.e hu.e aa.egaa
aa ga.ii thii dil-e-muztar me.n shakebaa.ii sii
baj rahii thii mire Gam-KHaane me.n shahnaa.ii sii
patiyaa.n kha.Dkii.n to samjhaa ki lo aap aa hii ga.e
sajde masruur ki ma.abuud ko ham paa hii ga.e
shab ke jaage hu.e taaro.n ko bhii nii.nd aane lagii
aap ke aane kii ik aas thii ab jaane lagii
sub.h ne sej se uThte hu.e lii a.ng.Daa.ii
o sabaa! tuu bhii jo aa.ii to akelii aa.ii
mere mahbuub mirii nii.nd u.Daane vaale
mere masjuud mirii ruuh pe chhaane vaale
aa bhii jaa, taaki mire sajdo.n kaa armaa.n nikle
aa bhii jaa, ki tire qadmo.n pe mirii jaa.n nikle

Makhdoom Mohiuddin
Nazm

ek lamha

jab bhii chuum letaa huu.n un hasiin aa.nkho.n ko
sau charaaG a.ndhere me.n jhilmilaane lagte hai.n
KHushk KHushk ho.nTo.n me.n jaise dil khi.nch aataa hai
dil me.n kitne aa.iine thartharaane lagte hai.n
phuul kyaa shaguufe kyaa chaa.nd kyaa sitaare kyaa
sab raqiib qadmo.n par sar jhukaane lagte hai.n
zehn jaag uThtaa hai ruuh jaag uThtii hai
naqsh aadmiyat ke jagmagaane lagte hai.n
lau nikalne lagtii hai mandiro.n ke siine se
devtaa fazaa.o.n me.n muskuraane lagte hai.n
raqs karne lagtii hai.n muurate.n ajantaa kii
muddato.n ke lab-basta Gaar gaane lagte hai.n
phuul khilne lagte hai.n uj.De uj.De gulshan me.n
tishna tishna giitii par abr chhaane lagte hai.n
lamha bhar ko ye duniyaa zulm chho.D detii hai
lamha bhar ko sab patthar muskuraane lagte hai.n

Kaifi Azmi
Nazm

jatri

ek aayaa gayaa duusraa aa.egaa der se dekhtaa huu.n yuu.nhii raat us kii guzar jaa.egii
mai.n kha.Daa huu.n yahaa.n kis liye mujh ko kyaa kaam hai yaad aataa nahii.n yaad bhii TimTimaataa
hu.aa ik diyaa ban ga.ii jis kii ruktii hu.ii aur jhijaktii hu.ii har kiran be-sadaa qahqaha hai
magar mere kaano.n ne kaise use sun liyaa ek aa.ndhii chalii chal ke miT
bhii ga.ii aaj tak mere kaano.n me.n maujuud hai saa.e.n saa.e.n machaltii hu.ii aur
ubaltii hu.ii phailtii phailtii der se mai.n kha.Daa huu.n yahaa.n ek aayaa gayaa
duusraa aa.egaa raat us kii guzar jaa.egii ek ha.ngaama barpaa hai dekhe.n jidhar
aa rahe hai.n ka.ii log chalte hu.e aur Tahalte hu.e aur rukte hu.e phir se
ba.Dhte hu.e aur lapakte hu.e aa rahe jaa rahe hai.n idhar se udhar aur udhar se
idhar jaise dil me.n mire dhyaan kii lahar se ek tuufaan hai vaise aa.nkhe.n
mirii dekhtii hii chalii jaa rahii hai.n ki ik TimTimaate diye kii kiran zindagii ko phisalte
hu.e aur girte hu.e Dhab se zaahir kiye jaa rahii hai mujhe dhyaan
aataa hai ab tiirgii ik ujaalaa banii hai magar is ujaale se ristii chalii jaa rahii
hai.n vo amrit kii buu.nde.n jinhe.n mai.n hathelii pe apnii sambhaale rahaa huu.n hathelii
magar TimTimaataa hu.aa ik diyaa ban ga.ii thii lapak se ujaalaa hu.aa lau girii phir a.ndheraa saa
chhaane lagaa baiThtaa baiThtaa baiTh kar ek hii pal me.n uThtaa hu.aa jaise aa.ndhii ke
tiikhe thape.Do.n se darvaaze ke taaq khulte rahe.n band hote rahe.n
pha.D.pha.Daate hu.e taa.ir-e-zaKHm-KHurda kii maanind mai.n dekhtaa hii rahaa ek aayaa
gayaa duusraa aa.egaa soch aa.ii mujhe paa.nv ba.Dhne se inkaar karte
ga.e mai.n kha.Daa hii rahaa dil me.n ik buu.nd ne ye kahaa raat yuu.nhii guzar jaa.egii
dil kii ik buu.nd ko aa.nkh me.n le ke mai.n dekhtaa hii rahaa pha.D.pha.Daate hu.e taa.ir
zaKHm-KHurda kii maanind darvaaze ke taaq ik baar jab mil ga.e mujh ko aahista aahista
ehsaas hone lagaa ab ye zaKHmii parinda na ta.Dpegaa lekin mire dil ko har vaqt
ta.Dpaa.egaa mai.n hathelii pe apnii sambhaale rahuu.ngaa vo amrit kii buu.nde.n jinhe.n aa.nkh
se merii risnaa thaa lekin mirii zindagii TimTimaataa hu.aa ik diyaa ban ga.ii jis kii ruktii hu.ii
aur jhijaktii hu.ii har kiran be-sadaa qahqaha hai ki is tiirgii me.n ko.ii baat aisii nahii.n
jis ko pahle a.ndhere me.n dekhaa ho mai.n ne safar ye ujaale a.ndhere kaa chaltaa
rahaa hai to chaltaa rahegaa yahii rasm hai raah kii ek aayaa gayaa duusraa
aa.egaa raat aise guzar jaa.egii TimTimaate sitaare bataate the raste kii
naddii bahii jaa rahii hai bahe jaa is uljhan se aise nikal jaa ko.ii siidhaa manzil pe jaataa
thaa lekin ka.ii qaafile bhuul jaate the anjum ke daur-e-yagaanaa ke mub.ham ishaare magar vo
bhii chalte hu.e aur ba.Dhte hu.e shaam se pahle hii dekh lete the maqsuud kaa band
darvaaza khulne lagaa hai magar mai.n kha.Daa huu.n yahaa.n mujh ko kyaa kaam hai meraa darvaaza
khultaa nahii.n hai mujhe phaile sahraa kii so.ii hu.ii reg kaa zarra zarra yahii kah rahaa hai
ke aise KHaraabe me.n suukhii hathelii hai ik aisaa talvaa ke jis ko kisii KHaar kii nok chubhne pe bhii
kah nahii.n saktii mujh ko ko.ii buu.nd apne lahuu kii pilaa do magar mai.n kha.Daa huu.n yahaa.n kis liye
kaam ko.ii nahii.n hai to mai.n bhii in aate hu.e aur jaate hu.e ek do tiin
laakho.n baguulo.n me.n mil kar yuu.nhii chalte chalte kahii.n Duub jaataa ke jaise yahaa.n
bahtii lahro.n me.n kashtii har ek mauj ko thaam letii hai apnii hathelii ke phaile ka.nval
me.n mujhe dhyaan aataa nahii.n hai ki is raah me.n to har ik jaane vaale ke bas
me.n hai manzil mai.n chal duu.n chaluu.n aa.iye aa.iye aap kyuu.n is jagah
aise chup-chaap tanhaa kha.De hai.n agar aap kahiye to ham ik achhuutii sii Tahnii se
do phuul bas bas mujhe is kii ko.ii zaruurat nahii.n hai mai.n ik
dost kaa raasta dekhtaa huu.n magar vo chalaa bhii gayaa hai mujhe phir bhii
taskiin aatii nahii.n hai ki mai.n ek sahraa kaa baashinda maaluum hone lagaa huu.n KHud
apnii nazar me.n mujhe ab ko.ii band darvaaza khultaa nazar aa.e ye baat mumkin nahii.n hai
mai.n ik aur aa.ndhii kaa mushtaaq huu.n jo mujhe apne parde me.n yaksar chhupaa le
mujhe ab ye mahsuus hone lagaa hai suhaanaa samaa.n jitnaa bas me.n thaa mere
vo sab ek bahtaa saa jho.nkaa banaa hai jise haath mere nahii.n rok sakte
ki merii hathelii me.n amrit kii buu.nde.n to baaqii nahii.n hai.n faqat ek phailaa hu.aa
KHushk be-barg be-ra.ng sahraa hai jis me.n ye mumkin nahii.n mai.n kahuu.n
ek aayaa gayaa duusraa aa.egaa raat merii guzar jaa.egii

Meeraji
Nazm

jaDe ki bahaaren

jab maah aghan kaa Dhaltaa ho tab dekh bahaare.n jaa.De kii
aur ha.ns ha.ns puus sambhaltaa ho tab dekh bahaare.n jaa.De kii
din jaldii jaldii chaltaa ho tab dekh bahaare.n jaa.De kii
aur paalaa barf pighaltaa ho tab dekh bahaare.n jaa.De kii
chillaa Gam Tho.nk uchhaltaa ho tab dekh bahaare.n jaa.De kii
tan Thokar maar pichhaa.Daa ho aur dil se hotii ho kushtii sii
thar-thar kaa zor ukhaa.Daa ho bajtii ho sab kii battiisii
ho shor phaphuu huu-huu kaa aur dhuum ho sii-sii sii-sii kii
kalle pe kallaa lag lag kar chaltii ho mu.nh me.n chakkii sii
har daa.nt chane se daltaa ho tab dekh bahaare.n jaa.De kii
har ek makaa.n me.n sardii ne aa baa.ndh diyaa ho ye chakkar
jo har dam kap-kap hotii ho har aan ka.Daaka.D aur thar-thar
paiThii ho sardii rag rag me.n aur barf pighaltaa ho patthar
jha.D-baa.ndh mahaavaT pa.Dtii ho aur tis par lahre.n le le kar
sannaaTaa baav kaa chaltaa ho tab dekh bahaare.n jaa.De kii
har chaar taraf se sardii ho aur sehn khulaa ho koThe kaa
aur tan me.n niimaa shabnam kaa ho jis me.n KHas kaa itr lagaa
chhi.Dkaav hu.aa ho paanii kaa aur KHuub pala.ng bhii ho bhiigaa
haatho.n me.n piyaala sharbat kaa ho aage ik farraash kha.Daa
farraash bhii pa.nkhaa jhaltaa ho tab dekh bahaare.n jaa.De kii
jab aisii sardii ho ai dil tab roz maze kii ghaate.n ho.n
kuchh narm bichhaune maKHmal ke kuchh aish kii lambii raate.n ho.n
mahbuub gale se lipTaa ho aur kuhnii, chuTkii, laate.n ho.n
kuchh bose milte jaate ho.n kuchh miiThii miiThii baate.n ho.n
dil aish-o-tarab me.n paltaa ho tab dekh bahaare.n jaa.De kii
ho farsh bichhaa Gaaliicho.n kaa aur parde chhoTe ho.n aa kar
ik garm a.ngiiThii jaltii ho aur sham.a ho raushan aur tis par
vo dilbar, shoKH, parii, chanchal, hai dhuum machii jis kii ghar ghar
resham kii narm nihaalii par sau naaz-o-adaa se ha.ns ha.ns kar
pahluu ke biich machaltaa ho tab dekh bahaare.n jaa.De kii
tarkiib banii ho majlis kii aur kaafir naachne vaale ho.n
mu.nh un ke chaa.nd ke Tuk.De ho.n tan un ke ruu.ii ke gaale ho.n
poshaake.n naazuk ra.ngo.n kii aur o.Dhe shaal do-shaale ho.n
kuchh naach aur rang kii dhuume.n ho.n aish me.n ham matvaale ho.n
piyaale par pyaala chaltaa ho tab dekh bahaare.n jaa.De kii
har ek makaa.n ho KHalvat kaa aur aish kii sab tayyaarii ho
vo jaan ki jis se jii Gash ho sau naaz se aa jhankaarii ho
dil dekh 'naziir' us kii chhab ko har aan adaa par vaarii ho
sab aish muhayyaa ho aa kar jis jis armaan kii baaii ho
jab sab armaan nikaltaa ho tab dekh bahaare.n jaa.De kii

Nazeer Akbarabadi
Nazm

barsat

vo dekho uThii kaalii kaalii ghaTaa
hai chaaro.n taraf chhaane vaalii ghaTaa
ghaTaa ke jo aane kii aahaT hu.ii
havaa me.n bhii ik sansanaahaT hu.ii
ghaTaa aan kar me.nh jo barsaa ga.ii
to be-jaan miTTii me.n jaan aa ga.ii
zamii.n sabze se lahlahaane lagii
kisaano.n kii mehnat Thikaane lagii
ja.Dii-buuTiyaa.n pe.D aa.e nikal
ajab bel patte ajab phuul phal
har ik pe.D kaa yak nayaa Dha.ng hai
har ik phuul kaa ik nayaa rang hai
ye do din me.n kyaa maajraa ho gayaa
ki jangal kaa jangal haraa ho gayaa
jahaa.n kal thaa maidaan chaTyal pa.Daa
vahaa.n aaj hai ghaas kaa ban pa.Daa
hazaaro.n phudakne lage jaanvar
nikal aa.e goyaa ki miTTii ke par

Ismail Merathi
Nazm

kahani

barso.n kyaa kyaa chane chabaa.e, kyaa kyaa paapa.D bele
lahro.n ko hamraaz banaayaa, tuufaano.n se khele

Mustafa Zaidi
Nazm

shahzade

zehn me.n azmat-e-ajdaad ke qisse le kar
apne taariik gharo.ndo.n ke KHalaa me.n kho jaa.o
marmarii.n KHvaabo.n kii pariyo.n se lipaT kar so jaa.o
abr paaro.n pe chalo, chaa.nd sitaaro.n me.n u.Do
yahii ajdaad se virse me.n milaa hai tum ko
duur maGrib kii fazaa.o.n me.n dahaktii hu.ii aag
ahl-e-sarmaaya kii aavezish-e-baaham na sahii
ja.ng-e-sarmaaya o mehnat hii sahii
duur maGrib me.n hai mashriq kii fazaa me.n to nahii.n
tum ko maGrib ke bakhe.Do.n se bhalaa kyaa lenaa?
tiirgii KHatm hu.ii surKH shu.aa.e.n phailii.n
duur maGrib kii fazaa.o.n me.n taraane guu.nje
fat.h-e-jamhuur ke insaaf ke aazaadii ke
saahil-e-sharq pe gaiso.n kaa dhu.aa.n chhaane lagaa
aag barsaane lage ajnabii topo.n ke dahan
KHvaab-gaaho.n kii chhate.n girne lagii.n
apne bistar se uTho
na.e aaqaa.o.n kii ta.aziim karo
aur phir apne gharo.ndo.n ke KHalaa me.n kho jaa.o
tum bahut der bahut der talak so.e rahe

Sahir Ludhianvi
Nazm

pagal-pan

ik parda kaalii maKHmal kaa aa.nkho.n par chhaane lagtaa hai
ik bha.nvar hazaaro.n shaklo.n kaa dil ko dahlaane lagtaa hai
ik tez hinaa.ii KHushbuu se har saa.ns chamakne lagtaa hai
ik phuul tilismii ra.ngo.n kaa galiyo.n me.n damakne lagtaa hai
saa.npo.n se bhare ik jangal kii aavaaz sunaa.ii detii hai
har ii.nT makaano.n ke chhajjo.n kii KHuun dikhaa.ii detii hai

Muneer Niyazi
Nazm

chalo ek bar phir dariya kinare

jahaa.n se bebasii jaane lagii thii
jahaa.n se zindagii gaane lagii thii
jahaa.n se rashk saa aane lagaa thaa
jahaa.n se nashsha saa chhaane lagaa thaa
jahaa.n se rat-jage kii thii numaa.ish
jahaa.n se diip raaho.n me.n jale the
chalo ik baar phir dariyaa kinaare
jahaa.n pahle-pahal ham tum mile the

Bismil Arifi
Nazm

salgirah

kaun gustaaKH hai kyaa naam hai kyuu.n aayaa hai
pahre vaalo use KHanjar kii anii se roko
apnii banduuqo.n kii naalii se Daraa.o us ko
aur us par jo na maane use topo.n kii salaamii de do
jashn kaa din hai mirii saalgirah kaa din hai
aaj mahlo.n me.n jale.nge mah-o-anjum ke charaaG
aaj bujhte hu.e chehro.n kii zaruurat kyaa hai
aaj maayuus nigaaho.n kii zaruurat kyaa hai
kaun bebaak hai ba.Dhtaa hii chalaa aataa hai
pahre vaalo use KHanjar kii anii se roko
aadmii hai ki miraa vahm hai aaseb hai ye
us ke chehre pe to zaKHmo.n ke nishaa.n tak bhii nahii.n
goliyaa.n us ke siyah siine se Takraa ke chalii aatii hai.n
us ke ho.nTo.n pe tabassum hai ki mu.nh khole hu.e
azhdahaa taKHt nigalne ko chalaa aataa hai
maut kis bhes me.n aa.ii hai mujhe lene ko
aaj kyuu.n aa.ii hai kyuu.n aa.ii hai kyuu.n aa.ii hai
mai.n tujhe gauhar-o-almaas diye detaa huu.n
tere ThiThure hu.e haatho.n ko haraarat duu.ngaa
jashn kaa din hai mirii saalgirah kaa din hai
kaun ho kaun ho tum
ai Gariibo.n ke KHudaavand amiiro.n ke rafiiq
mai.n samajhtaa thaa mujhe aap na pahchaane.nge
mai.n ne a.ngrez kii jailo.n me.n javaanii kaaTii
mai.n ne ThiThure hu.e haatho.n se jalaa.e hai.n diye
jin kii lau aaj bhii tuufaano.n se Takraatii hai
jin ko a.ngrez kii phuu.nko.n ne bujhaanaa chaahaa
aur KHud un kii zabaa.n jal ke siyah-faam hu.ii
vo diye aaj bhii bar-lauu.n kii chiiKHo.n se la.De jaate hai.n
aap ko yaad na hogaa shaayad
kaun ho kaun ho tum
mai.n ne taariiKH kii lahro.n me.n ravaanii de dii
mai.n ne buu.Dho.n kii rag-o-pai me.n javaanii de dii
mai.n ne jhukte hu.e shaano.n ko tavaanaa.ii dii
kaar-KHaane mirii aavaaz se bedaar hu.e
aur ik merii hii aavaaz nahii.n guu.njii thii
saik.Do.n vaqt se haare hu.e insaan uThe
kuhra-e-vaqt pe chhaane ke liye
kaun ho kaun ho tum
auraaq me.n hii nahii.n aayaa huu.n
saik.Do.n vaqt ke maare hu.e insaan bhii hai.n
saik.Do.n vaqt pe chhaa.e hu.e insaan bhii hai.n
kaun ho kaun ho tum
aaj bhii ketiyo.n me.n bhuuk ugaa kartii hai
kaar-KHaano.n me.n dhu.e.n ke baadal
tauq aur aahanii zanjiiro.n me.n Dhal jaate hai.n
kaun ho kaun ho tum
aap insaan kii azmat pe yaqii.n rakhte hai.n
aap ke hukm ne kitno.n kii zabaane.n sii dii.n
aap kii mumlikat adl me.n kitne biimaar
qaid-e-tanhaa.ii me.n dam to.D chuke
kaun ho kaun ho tum
aap kii be.Diyaa.n afraad ko paaband banaa saktii hai.n
aap kii be.Diyaa.n insaan ko paaband nahii.n kar saktii.n
kal yahii sham.a jo siine me.n farozaa.n hai aaj
aap ke saare tilismaat jalaa Daalegii
kal unhii.n kheto.n me.n uj.De hu.e khaliyaano.n me.n
saal-haa-saal kii paamaal zamii.n
apne siine ke KHazaano.n ko luTaatii hogii
kaar-KHaane bhii siyahkaar KHudaa.o.n se rihaa.ii paa kar
laakho.n insaano.n kii taskiin kaa saamaa.n ho.nge
ik na.e ahd na.ii ziist kaa unvaa.n ho.nge
aur phir vaqt kaa bebaak mo.arriKH aa kar
surKH parcham ko salaamii degaa
kaun ho kaun ho tum
bhaardvaaj

Akhtar Payami
Nazm

main ki ek bani-adam

mai.n ki ik banii-aadam
aalam-e-anaasir kaa
ik KHamiir-e-taaza-dam
ik hayaat mujh me.n hai
kaa.enaat mujh me.n hai
merii saltanat hai sab
mujh se hai jahaa.n qaa.em
mai.n huu.n gardish-e-paiham
rau me.n hai lahuu har dam
kyaa KHabar lahuu kyaa hai
ek shorish-e-hastii
ek daaKHlii tuufaa.n
ek mahshar-e-dauraa.n
kyaa KHabar lahuu kyaa hai
gardishe.n sitaaro.n kii
gardish aasmaano.n kii
gardishe.n zamiino.n kii
gardishe.n zamaano.n kii
kyaa KHabar lahuu kyaa hai
ye nizaam-e-kul jaarii
ya.anii harkate.n saarii
sab lahuu kii harakat hai
hai lahuu ke dam se hii
amn bhii, mohabbat bhii
ja.ng bhii, adaavat bhii
shorish o baGaavat bhii
kyaa KHabar lahuu kyaa hai
gardishe.n lahuu kii jab
mujh me.n shor kartii hai.n
be-KHudii ke nashshe me.n
jism kaa har ik KHaliya
raqs karne lagtaa hai
aur phir ye hotaa hai
KHushkiyo.n kaa har zarra
paaniyo.n kaa har qatra
ek be-badan jazba
raqs karne lagtaa hai
is jinno.n ke aalam me.n
zaKHm jaag jaate hai.n
dard chiiKH uThtaa hai
aur phir ye hotaa hai
ruuh-o-dil kii vaadii me.n
naGme guu.nj uThte hai.n
naGma-haa-e-sehr-a.ngez
be-karaa.n fazaa.o.n me.n
laa-makaa.n KHalaa.o.n me.n
soz aur fuGaa.n ban kar
miiThii lai me.n Dhal Dhal kar
jab bikharne lagte hai.n
aise sehr-aalam me.n
ek kaif-o-mastii kaa
nashsha chhaane lagtaa hai
aur phir ye hotaa hai
kaa.enaat kii har shai
gungunaane lagtii hai
aur phir vahii naGme
ruuh-o-dil ke chhaalo.n ko
taar, taar zaKHmo.n ko
niim-jaa.n karaaho.n ko
laala-zaar daaGo.n ko
jaagte phaphuulo.n ko
mast loriyaa.n de kar
KHvaab ke gulistaa.n me.n
laapata zamaane tak
yuu.n hii chho.D dete hai.n
asl me.n vahii naGme
dard kaa mudaavaa hai.n!!

Khalid Mubashshir
Nazm

sahaara

os kii buu.ndo.n me.n namkiinii nahii.n
phuul gar chaahe ki apnii raat ke anjaam ko
ek hii lamhe me.n yaksar jaan le
us ko laazim hai havaa ke sard jho.nke se kahe
jaa.o us ke aa.nsu.o.n ko chuum lo
aa.nsu.o.n ko chuum kar mahsuus ye hone lagaa
ek aa.nsuu ek buu.nd
ek pal me.n ek bahr-e-niilguu.n
ban ke chhaa jaataa hai tanhaa naav par
kyaa hu.aa gar os kii buu.ndo.n me.n namkiinii nahii.n
os kii buu.ndo.n me.n namkiinii agar hotii to kyaa
phuul is me.n tairte hii tairte
apnii manzil tak pahu.nch saktaa na thaa ik naav ban saktaa na thaa
phuul kyaa hai tuu ki mai.n
phuul mai.n huu.n tuu nahii.n
tuu to bahr-e-niilguu.n me.n ek tanhaa naav hai
bahtii jaatii hai zaraa ruktii nahii.n
tujh ko ye ma.aluum kab hai os kii buu.ndo.n me.n namkiinii nahii.n
tuu faqat baato.n ke bal par apnii raato.n kii rasiilii chhaa.nv me.n
ye samajhtii hai ki har lamha achaanak phail kar
shash-jihat par dil dha.Dakte hii me.n yuu.n chhaane lagaa
jaise ik Thahraav furqat kii a.ndherii raat me.n
dard ke ham-dosh lazzat ko bhii uksaataa rahe
le piyaala thaam le
is me.n baaqii hai abhii zahr-e-Gam
jis ko pii kar mai.n bhii apnii zindagii se bhaagtaa phirtaa rahaa
guftuguu se faa.eda kuchh bhii nahii.n lekin mujhe
har ishaaraa daam hai alfaaz kaa
jis me.n taa.ir pha.D-pha.Daate chiiKHte
chiiKHte hii chiiKHte KHaamosh ho jaate hu.e
jaan lete hai.n ki ab vo raat hii darmaa.n banegii dard ke ambaar kaa
jis ke bikhre daaman-e-sad-chaak me.n
phuul kii bhiigii hu.ii pattii pe buu.nde.n os kii
saath laatii hai.n gudaaz-e-ruuh kii halkii malaahat ko jise
chakh ke kahtii hai zabaa.n kyuu.n ab kaho
os kii buu.ndo.n me.n namkiinii nahii.n
dekh duur
ek tanhaa naav bahr-e-niilguu.n pe rafta rafta ba.Dhte ba.Dhte aa rahii hai paas dekh
duur kii chiize.n bhii yuu.n
baato.n baato.n me.n qariib aa jaa.e.ngii kyaa thii KHabar
dekh to
rishta-e-ahd-e-taKHayyul band thaa
khulne lagaa
rafta rafta ik na.ii suurat nazar aane lagii
ik na.ii suurat magar kuchh naqsh to maanuus hai.n
aur har lamhe se har aa.nsuu se qasr-e-niilguu.n istaada hai
duur us kii chhat me.n do faanuus hai.n

Meeraji
Nazm

qanun-e-qudrat

galiyo.n kii sham.e.n bujh ga.ii.n aur shahr suunaa ho gayaa
bijlii kaa khambaa thaam kar baa.nkaa sipaahii so gayaa
taariikiyo.n kii deviyaa.n karne lagii.n sargoshiyaa.n
ik dhiimii dhiimii taan me.n gaane lagii.n KHaamoshiyaa.n
mashriq ke parbat se vare ubhrii.n ghaTaa.e.n yak-ba-yak
a.ng.Daa.iyaa.n lene lagii.n be-KHud havaa.e.n yak-ba-yak
taare nigaltii badliyaa.n chaaro.n taraf chhaane lagii.n
chham-chham phuvaaro.n kii jha.Dii dhartii pe barsaane lagii.n
kutte achaanak chau.nk kar bho.nke.n dubak kar so ga.e
be-ras chacho.Dii haDDiyo.n kii lazzato.n me.n kho ga.e
maa.e.n lapaktii hai.n kahii.n bachche bilakte hai.n kahii.n
aur khaaT lene ke liye buu.Dhe uchakte hai.n kahii.n
ik sarsaraahaT sii uThii lahraa.ii tham kar rah ga.ii
har chiiz ne aa.nkhe.n malii.n har chiiz jam kar rah ga.ii
phir gungunaatii zulmato.n kaa sehr har-suu chhaa gayaa
baadal kahii.n gum hoga.e taaro.n pe jauban aa gayaa
qudarat ke sab chhoTe ba.De qaanuun hai.n yaksaa.n magar
parde pa.De hai.n jaa-ba-jaa chhantii nahii.n jin se nazar
insaan kaa ma.asuum dil taariik suunaa shahr hai
jis ke tale ehsaas kii chi.ngaariyo.n kii lahar hai
jab dekhtaa hai vo kahii.n badmast panghaT vaaliyaa.n
gaalo.n ko jin ke chuumtii hai.n patlii patlii baaliyaa.n
zulfe.n ghaTaa.o.n kii tarah aa.nkhe.n sitaaro.n kii tarah
chalnaa havaa.o.n kii tarah ra.ngat sharaaro.n kii tarah
lah.nge kii lahro.n ke tale makkhan se paa.nv raqs me.n
pagDanDiyo.n ke us taraf gaagar kii chhaa.nv raqs me.n
siine chhalakte mai-kade aur ho.nT paimaano.n ke lab
TaKHno.n pe bajtii jhaa.njhne.n ha.nsnaa-ha.nsaanaa be-sabab
ye dekh kar a.ng.Daa.iyaa.n letaa hai dil insaan kaa
aur us kii har dha.Dkan pe hotaa hai gumaa.n tuufaan kaa
galiyo.n me.n chhup jaatii hai.n jab ye chaltii-phirtii bijliyaa.n
hotaa hai taarii ruuh par sunsaan raato.n kaa samaa.n

Ahmad Nadeem Qasmi
Nazm

subh-e-judai

ab dhundlii pa.Dtii jaatii hai taariiki-e-shab mai.n jaataa huu.n
vo sub.h kaa taaraa ubhraa vo pau phuuTii ab mai.n jaataa huu.n
jaataa huu.n ijaazat jaane do vo dekho ujaale chhaane ko hai.n
suuraj kii sunahrii kirno.n ke KHaamosh bulaave aane ko hai.n
vo phuulo.n ke gajre jo tum kal shaam piro kar laa.ii thii.n
vo kaliyaa.n jin se tum ne ye ra.ngii.n siije.n mahkaa.ii thii.n
dekho in baasii kaliyo.n kii pattii pattii murjhaa.ii hai
vo raat suhaanii biit chukii aa pahu.nchii sub.h-e-judaa.ii hai
ab mujh ko yahaa.n se jaanaa hai pur-shauq nigaaho mat roko
o mere gale me.n laTkii hu.ii lachkiilii baaho mat roko
in uljhii uljhii zulfo.n me.n dil apnaa bisaare jaataa huu.n
in miiThii miiThii nazro.n kii yaado.n ke sahaare jaataa huu.n
jaataa huu.n ijaazat vo dekho Gurfe se shu.aa.e.n jhalkii hai.n
pighle hu.e sone kii lahre.n miinaa-e-shafaq se chhalkii hai.n
kheto.n me.n kisii charvaahe ne bansii kii taan u.Daa.ii hai
ek ek rasiilii sur jis kii paiGaam safar kaa laa.ii hai
majbuur huu.n mai.n jaanaa jo hu.aa dil maane na maane jaataa huu.n
duniyaa kii a.ndherii ghaaTii me.n ab Thokare.n khaane jaataa huu.n

Majeed Amjad
Nazm

raat

mai.n dekhtaa huu.n
viiraan shaah-raaho.n par re.ngtii KHaamoshii
suuraj ke ghar lauTte hii
be-libaas ho kar naachne lagtii hai
aur talaash kartii hai kuchh muskuraate chehre
a.ndheraa chhaane lagtaa hai
viiraanii daalaan me.n baiThii bain kartii aur
apnii mahruumii kaa iz.haar kartii hai
kiraa.e ke qabristaan me.n dafn murde
raat-bhar ehtijaaj karte hai.n
apnii naa-mukammal KHvaahisho.n ko sa.Dko.n par jalaate hai.n
jis ke dhu.e.n se aasmaan kaa
rang kaalaa pa.D jaataa hai
raat kii taariikii manhuus aavaaze.n nikaaltii hai
viiraan sa.Dak ke ek taraf kha.Dii buu.Dhii tavaa.if
apne gaahak ke ravayye se KHaufzada hai
ulluu aur chamgaada.D bhii raat se KHafaa ho kar
ab din me.n safar karte hai.n
murda raat gahrii ho jaatii hai
jaa.De kii ThiThuraatii sardii me.n
footpath par baiThii ek nannhii kalii
ek roTii ke liye KHudaa ke signature kii muntazir hai
mah.ngii gaa.Diyo.n ke saamne
gi.Dgi.Daatii tavaa.if kaa ek aa.nsuu
mere zehn me.n
be-shumaar savaalaat chho.D gayaa hai

Manzar Latif
Nazm

aa gai sawan ki rut

aa ga.ii saavan kii rut kaalii ghaTaa chhaane lagii
phir kisii kii yaad mere dil ko ta.Dpaane lagii
aa ga.ii saavan kii rut kaalii ghaTaa chhaane lagii

Jafar Malihabadi
Nazm

mera KHwab thin jo mohabbaten

mirii aarzuu.o.n ke devtaa
mai.n ajiib thii mai.n ajab rahii
mujhe dasht-e-Gam ko bhii chhaanne kii talab rahii
mirii baat me.n ko.ii raat aa ke Thahar ga.ii
mirii zaat me.n ko.ii zaat aa ke guzar ga.ii
mujhe phir bhii dard ko jaa.nchne kii talab rahii
ka.ii ranj bhii hai.n nadaamato.n se mile hu.e
ka.ii shahr bhii hai.n adaavato.n se bhare hu.e
kisii Gam ke zor se zard hai miraa shahr bhii
mujhe yaad hai kisii shaam-e-Gam kaa vo qahr bhii
ye jo log hai.n ye ba.De ajiib se log hai.n
ye abhii talak na samajh sake
hai kamaal kyaa
hai mohabbato.n kaa junuub kyaa
hai shumaal kyaa
hai uruuj-e-dard-e-habiib kyaa
hai zavaal kyaa
ye samajh sake hii nahii.n
hai ham ko malaal kyaa
mujhe vasl-e-yaar ke falsafe pe yaqiin hai
ye jo hijr hai ye kisii gumaan se kam nahii.n
mirii aa.nkh dasht hai
muddato.n se jo nam nahii.n
sabhii kuchh hai bas yahaa.n tum nahii.n
ai habiib-e-man
ai tabiib-e-jaa.n
ye jo chaashnii hai huruuf me.n
tirii den hai
ye jo naqsh hai.n mirii aa.nkh me.n
hai tiraa karam
jo miThaas hai mirii baat me.n
tirii baat hai
miraa mujh me.n kuchh bhii nahii.n rahaa
tirii zaat hai
ai faqiih-e-shahr tiraa bayaan bhii jhuuT hai
mujhe ishq hai to phir is me.n ko.ii daliil kyaa
mujhe zabt miltaa hai roz gar
to ye dard dard-e-sabiil kyaa
mirii aarzuu.o.n ke devtaa
zaraa dekh le
mirii ruuh vajd kii kaifiyat me.n ghirii hu.ii
mai.n jo saa.ns saa.ns marii hu.ii
tire dar pe kab se pa.Dii hu.ii
kabhii dekh le
kabhii saar le
ye bataa mujhe
hai qusuur kyaa
mire devtaa mire baadshaah
ba.De zaKHm hai.n
ba.De zaKHm hai.n mirii ruuh par
tujhe terii shaan kaa vaasta
mire indimaal ke vaaste
zaraa muskuraa
zaraa muskuraa ki sukuu.n mile
zaraa duur mujh se fishaar ho
mire chaar-suu tiraa pyaar ho
mire jism-o-jaa.n kii KHizaa.o.n me.n bhii bahaar ho
to phir is ke baad vazaahate.n
ye adaavate.n
mujhe kab hai.n raas saKHvaate.n
vahii aafate.n
ye musiibate.n
mirii zaKHm-zaKHm aqiidate.n
mirii dard dard iraadate.n
mai.n haqiiqato.n se kaTii hu.ii mire chaaraagar
mujhe raas aa.ii.n aziyyate.n
miraa KHvaab thii.n jo mohabbate.n

Fauziya rabab
Nazm

yaran-e-najd

ai baad-e-sub.h-gaahii dil keii kalii khilaa de
viiraana mere dil kaa rashk-e-chaman banaa de
us bazm-e-jaa.n-fazaa kaa nazzaara phir dikhaa de
gulzaar-e-aarzuu me.n phir taaza gul khilaa de
ye kaar-zaar-e-hastii hai ranj-o-Gam keii bastii
phir yaad-e-bazm-e-jam me.n ik jaam-e-jam pilaa de
ab shaam-e-zindagii keii zulmat hai chhaane vaalii
vo sub.h-e-dil-kushaa kaa nazzaara phir dikhaa de
pastii me.n paa-ba-gil hai umr-e-ravaa.n kaa dariyaa
phir uu.nchii vaadiyo.n ke manzar use dikhaa de
vo ahd-e-shaadmaanii vo itr-e-zindagaanii
ai daur-e-aasmaanii vaapas kahii.n se laade
ai baaGbaa.n ho tujh ko taKHt-e-chaman mubaarak
mujh ko vo ham-navaa de vo meraa gho.nsla de
kin hasrato.n se 'naazir' us anjuman se nikle
melaa saa lag rahaa hai jab ham chaman se nikle
ahvaal-e-bazm-e-gulshan ai naama-bar sunaanaa
vo daastaa.n hai dilkash ra.ngii.n hai vo fasaana
us bazm-e-dil-kushaa me.n ulfat keii us fazaa me.n
taaro.n keii raushnii me.n yaaro.n kaa mil ke gaanaa
kaano.n me.n rach rahii hai koyal keii kuuk ab tak
'naazir' kaa hai vaziifa us dhun me.n gungunaanaa
collage keii sarzamii.n thii yaa naqsh-e-dil-nashii.n thii
dil se KHayaal us kaa mumkin nahii.n bhulaanaa
dariyaa me.n mil ke jaise ho.n naddiyaa.n ham-aaGosh
begaana kal jo aayaa vo aaj thaa yagaana
bahr-e-tavaaf jaanaa piir-e-muGaa.n ke dar par
aur us keii ik nigah se sarmast ho ke aanaa
us chashm-e-mast me.n thii ye turfa ik karaamat
phirtii vo jis taraf ko phirtaa udhar zamaanaa
ai vaqt-e-rafta aa jaa phir vo samaa.n dikhaa jaa
aisaa bhii kyaa thaa jaanaa phir lauT kar na aanaa
ai naaKHudaa bha.nvar se kashtii merii bachaa kar
yaaraan-e-aashnaa se bahr-e-KHudaa milaanaa
dar fasl-e-gul ki gulshan naqsh-o-nigaar bando
'naazir' KHayaal-e-KHud-raa aur bazm-e-yaar bando

Khushi Mohammad Naazir
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now