Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chubhan"

Nazm MATCHES FOR "chubhan"

Nazm

urdu

zabaan-e-hind hai urdu to maathe kii shikan kyuu.n hai
vatan me.n be-vatan kyuu.n hai
mirii mazluum urdu terii saa.nso.n me.n ghuTan kyuu.n hai
teraa lahja mahaktaa hai to lafzo.n me.n thakan kyuu.n hai
agar tuu phuul hai to phuul me.n itnii chubhan kyuu.n hai
vatan me.n be-vatan kyuu.n hai
ye 'nanak' kii ye 'KHusrav' kii 'dayaa-sha.nkar' kii bolii hai
ye diivaalii ye baisaakhii ye iid-ul-fitr holii hai
magar ye dil kii dha.Dkan aaj-kal dil kii jalan kyuu.n hai
vatan me.n be-vatan kyuu.n hai
ye naazo.n kii palii thii 'miir' ke 'Gaalib' ke aa.ngan me.n
jo suuraj ban ke chamkii thii kabhii mahlo.n ke daaman me.n
vo shahzaadii zabaano.n kii yahaa.n be-anjuman kyuu.n hai
vatan me.n be-vatan kyuu.n hai
mohabbat kaa sabhii elaan kar jaate hai.n mahfil me.n
ki is ke vaaste jazba hai hamdardii kaa har dil me.n
magar haq maa.ngne ke vaqt ye begaana-pan kyuu.n hai
vatan me.n be-vatan kyuu.n hai
ye doshiiza jo baazaaro.n se iThlaatii guzartii thii
labo.n kii naazukii jis kii gulaabo.n sii bikhartii thii
jo tahziibo.n ke sar kii o.Dhnii thii ab kafan kyuu.n hai
vatan me.n be-vatan kyuu.n hai
mohabbat kaa agar da.avaa hai to is ko bachaa.o tum
jo va.ada kal kiyaa thaa aaj vo va.ada nibhaa.o tum
agar tum raam ho to phir ye raavan kaa chalan kyuu.n hai
vatan me.n be-vatan kyuu.n hai

Manzar Bhopali
Nazm

main saz DhunDti rahi

ehsaas-e-avvalii.n
ek mauhuum iztiraab saa hai
ik talaatum saa pech-o-taab saa hai
umDe aate hai.n KHud-ba-KHud aa.nsuu
dil pe qaabuu na aa.nkh par qaabuu
dil me.n ik dard miiThaa miiThaa saa
ra.ng chehre kaa phiikaa phiikaa saa
zulf bikhrii hu.ii pareshaa.n-haal
aap hii aap jii hu.aa hai niDhaal
siine me.n ik chubhan sii hotii hai
aa.nkho.n me.n kyuu.n jalan sii hotii hai
sar me.n pinhaa.n tasavvur-e-mauhuum
haa.e ye aarzuu-e-naa-maaluum
ek naala saa hai baGair aavaaz
ek halchal sii hai na soz na saaz
kyuu.n ye haalat hai be-qaraarii kii
saa.ns bhii khul ke aa nahii.n saktii
ruuh me.n intishaar saa kyaa hai
dil ko ye intizaar saa kyaa hai

Ada Jafarey
Nazm

muddat hui aurat hue

mujh se sahelii ne kahaa
mumtaaz aisaa likhtii jaa
jis me.n ho.n kuchh chuu.Diyo.n
jhankaar kii baate.n
kuchh tazkire ho.n chunriyo.n ke
iz.haar kii baate.n
u.Dte sunahrii aa.nchalo.n me.n
motiyo.n kii sii la.Dii
pahlii vo shaitaanii merii
pahlii vo jo merii ha.nsii
baalii umr kii dil-kashii
vo bachpane kii shoKHiyaa.n
KHvaabo.n me.n KHvaahish ke saraab
dha.Dkan kii vo sargoshiyaa.n
goTaa kanaarii Taa.nkte
u.ngliyo.n me.n suu.ii kii chubhan
daa.nto.n me.n u.nglii daab kar
hotii shuruu.a phir se lagan
pahlii dafa dha.Dkaa thaa kab
ye dil tujhe kuchh yaad hai
vo KHushbuu.o.n ra.ngo.n kii duniyaa
ab bhii kyaa aabaad hai
mai.n ne kahaa merii sakhii
duniyaa kyaa tuu ne na takii
masruuf itnii zindagii
ki chuu.Diyaa.n pahnii nahii.n
jo chunariyaa.n ra.ngiin thii.n
vo dhuup le kar u.D ga.ii.n
merii umr kii titliyaa.n
ab aur jaanib mu.D ga.ii.n
ab dupaTTo.n par kabhii na
goTaa motii Taa.nktii huu.n
suu.iyaa.n haatho.n par nahii.n ab
dil ko apne Taa.nktii huu.n
KHushbu.o.n ke des se
mai.n duur itnii aa ga.ii
jiine kii KHaatir
mard saa
andaaz mai.n apnaa ga.ii
rishto.n ko naato.n ko nibhaate
farz adaa karte hu.e
tuu ne jo chau.nkaayaa lagaa
muddat hu.ii aurat hu.e

Mumtaz Malik
Nazm

yaad

yaad ek be-ra.ng be-mahak
murjhaayaa hu.aa gulaab
jis ke kaa.nTo.n kii chubhan
baaqii rahtii hai sadaa
yaad-e-maazii kii banaa.ii hu.ii
ek dhundlii tasviir
mel nahii.n khaataa jis se haal kaa chehra
phir bhii lagii hai dil kii diivaar par
yaad TuuTaa-phuuTaa ek aisaa khilaunaa
jis se insaan dil bahlaanaa chaahe
be-kaar hone ke baavajuud
use phe.nknaa nahii.n chaahe
yaad ek saraab
ziist ke registaan me.n
jo aur bhii ba.Dhaa de
thake haare musaafir kii pyaas

Elizabeth Kurian Mona
Nazm

ehsas

merii aa.nkho.n me.n hai be-KHvaabii ke nashtar chubhan
har taraf tiira-shabii, har taraf ek ghuTan
ko.ii sho.ala na kiran
sard hone ko hai dil kii dha.Dkan
tak rahii hai mujhe kis hasrat se
mere bistar kii har ik dard se bharpuur shikan
Das na le dil ko ye tanhaa.ii ke ehsaas kii kaalii naagan

Iftikhar Aazmi
Nazm

tohfa

sochtaa huu.n ki tumhe.n kaun saa tohfa bhejuu.n
apne ho.nTo.n kii jalan apnii nigaaho.n kii thakan
apne siine kii ghuTan apnii umiido.n kaa kafan
jaada-e-ziist pe bikhre hu.e kaa.nTo.n kii chubhan
umr bhar kaa miraa sarmaaya yahii hai ai dost
sochtaa huu.n ki tumhe.n kaun saa tohfa bhejuu.n

Khursheed Alig
Nazm

main bilkul Thik hun sohni

tumhaaraa ek message whatsapp par muddato.n ke baa'd aayaa thaa
ye likkhaa thaa ki
busy thaa mai.n so reply na kar paayaa
zaraa us vaqt kuchh saa.nso.n kii tuGyaanii sii barpaa thii
mujhe kuchh dha.Dkano.n ko bhii zaraa tartiib denaa thaa
mobile screen us vaqt dhundlii ho ga.ii thii kuchh
busy thaa mai.n so reply na kar paayaa
so sorry ai mirii sohnii
suno tum ne ye likkhaa thaa ki
mai.n bilkul Thiik huu.n sohnii
tumhaarii yaad hii aatii nahii.n mujh ko
so bilkul Thiik rahtaa huu.n
magar haa.n jab zaraa mai.n saa.ns letaa huu.n
zaraa jab dil dha.Daktaa hai
to phir tum yaad aatii ho
magar is ke alaava Thiik rahtaa huu.n
zaraa sar me.n tanaav kii sii kaifiyyat to rahtii hai
rago.n me.n bhii khi.nchaa.o saa zaraa rahtaa hai ab aksar
magar baaqii sabhii kuchh Thiik hai sohnii
zaraa jab saa.ns letaa huu.n to andar kuchh chubhan sii hone lagtii hai
kahii.n kuchh zaKHm saa hogaa
magar baaqii sabhii kuchh Thiik hai sohnii
zaraa bas dil dha.Daktaa hai to siine me.n kisii kii siskiyaa.n mujh ko sunaa.ii dene lagtii hai.n
magar baaqii sabhii kuchh Thiik hai sohnii
are haa.n kal mai.n aa.iine ke aage jab zaraa aayaa
vahaa.n ik ajnabii chehra nazar aayaa
bahut hii zard saa chehra
aur us kii aa.nkh ke halqe me.n gaDDhe se nazar aa.e
ajab vahshat Tapaktii thii
vahaa.n se bhaag aayaa mai.n
magar baaqii sabhii kuchh Thiik hai sohnii
suno phir bhii mai.n kal ik doctor se ehtiyaatan mil bhii aayaa huu.n
vo kahte hai.n ki ghabraane kii ko.ii baat bilkul bhii nahii.n is me.n
zaraa bas saa.ns tham jaa.e
zaraa dha.Dkan bhii jam jaa.e
to phir sab kuchh hamesha ke liye hii Thiik ho jaa.e

Khalid Mubashshir
Nazm

to ye bhi hoga

ye saare rishte tamaam chehre
jinhe.n tum apnaa samajh rahe ho ye sab tumhe.n ajnabii lage.nge
bulandiyo.n ke har ik safar par ba.Dii mohabbat
jataa.egaa ye hujuum-e-yaaraa.n
sabhii ke lafzo.n me.n shahd hogaa sabhii ke haatho.n me.n phuul ho.nge
magar dilo.n me.n babuul ho.nge
bulandiyo.n ke safar se lauTo to un ke chehro.n pe Gaur karnaa bujhe bujhe se tum un ke lahjo.n pe Gaur karnaa tamaam chehre maluul ho.nge
har ik suKHan me.n chubhan milegii
har ik sadaa me.n thakan milegii
har ik jabii.n par shikan milegii
rafaaqato.n ke badalte manzar tumhe.n jo hairat-zada kare.n to ye Gaur karnaa
masaafato.n ke baGair aaKHir badan sabhii ke niDhaal kyo.n hai.n
baGair KHatt-e-uruuj khii.nche
ayaa.n ye KHatt-e-zavaal kyo.n hai.n
safar to tum ne kiye hai.n lekin musaafirat kii ye gard kaise tamaam aa.nkho.n me.n bhar ga.ii hai tamaam chehro.n pe jam ga.ii hai
pas-e-rifaaqat badalte rishto.n kii ma.anaviyyat pe Gaur karnaa magar na hargiz udaas honaa tum un se milte rahe ho jaise tum un se vaise hii milte rahnaa hamesha un se vafaa.e.n karnaa aur un ke haq me.n du.aa.e.n karnaa
KHudaa unhe.n bhii hidaayate.n de azal se ab tak yahii hu.aa hai munaafiqo.n ne hamesha ho.nTo.n pe gul khilaa.e hamesha haatho.n me.n phuul rakkhe magar dilo.n me.n babuul rakkhe

Tariq Qamar
Nazm

karan-ta-karan

jo maza chaahat me.n hai
haasil me.n us ko Dhuu.nDhnaa be-kaar hai
ho kahaa.n tum kis jahaa.n me.n
kyuu.n mujhe ma.aluum ho?
dhund me.n ho KHvaab me.n
yaa aasmaa.n kii qaus me.n
yaa mauj kii gardish me.n ho
tum haath kii rekhaa ke andar ho kahii.n
yaa duur sannaaTo.n ke Takraav se paidaa
an-sunii aavaaz kii rezish me.n ho
chaahe kahii.n bhii ho
mirii chaahat ke phaile baazu.o.n ke
halqa-e-mauhuum me.n maujuud ho!
lams me.n hiddat bahut hai
aur sitaaro.n kii chubhan kaa bhii mujhe ehsaas hai
band muTThii me.n dabe motii
kii lazzat se bhii huu.n mai.n aashnaa
par bayaa.n kaise karuu.n
vo lutf jo chaahat kii phailii boss kii
mad.hosh-kun ThanDak me.n hai
chaahat ke har dam
phailte aafaaq kii larzish me.n hai!!

Wazir Agha
Nazm

hikayat-e-dauran

dublaa patlaa naazuk 'dauraa.n'
shiisha jaisaa naazuk 'dauraa.n'
Gam kii kaalii raat kaa maaraa
apne hii jazbaat kaa maaraa
aaTho.n pahar yuu.n khoyaa khoyaa
jaise gahrii soch me.n Duubaa
kam ha.nsnaa aadat me.n daaKHil
KHaamoshii fitrat me.n daaKHil
sham.a kii suurat bazm me.n jalnaa
gaah bha.Daknaa gaah pighalnaa
maathe par har vaqt shikan sii
chehra par aazurda thakan sii
chehre se mahruumii zaahir
maasuumii mazluumii zaahir
aa.nkhe.n har dam umDii umDii
palke.n har dam bhiigii bhiigii
karb aa.nkho.n me.n dard aa.nkho.n me.n
raah-e-vafaa kii gard aa.nkho.n me.n
sahmaa sahmaa shaam-e-balaa se
ruuThaa ruuThaa apne KHudaa se
aql-o-KHirad se jii ko churaa.e
paagal-pan se baaz na aa.e
jaane dil me.n kis kii lagan hai
ruuh me.n kis kaa.nTe kii chubhan hai
ye hai apnaa 'dauraa.n' yaaro
uljhaa suljhaa 'dauraa.n' yaaro
lekin yaaro yahii musaafir
raah-e-vafaa kaa dukhii musaafir
shaano.n par ik bojh ko laade
raah-e-talab me.n aage aage
dil me.n ik mazbuut iraada
nazro.n me.n ik raushan jaada
Gam kii lambii raat pe bhaarii
zulm kaa aur zulmat kaa shikaarii
insaanii tahziib kaa qaa.il
duniyaa kii ta.amiir pe maa.il
sa.i-e-paiham us kii tamannaa
jagmag jagmag us kaa rasta
us kii saarii fikr-e-pareshaa.n
insaanii tanziim kii KHvaahaa.n
nazme.n us kii jaan-e-maqaasid
ruuh-e-tamaddun shaan-e-maqaasid
sub.h pe shaidaa shaam pe aashiq
apne vatan ke naam pe aashiq
baate.n raib-o-riyaa se KHaalii
har naqsh-e-kirdaar misaalii
pyaar insaa.n kaa dil me.n chhupaa.e
dard-e-jahaa.n siine me.n basaa.e
'dauraa.n' hai yaa ruuh-e-'dauraa.n'
giryaa.n giryaa.n KHandaa.n KHandaa.n
is kii duniyaa apnii duniyaa
is duniyaa me.n saarii duniyaa

Owais Ahmad Dauran
Nazm

man arafa nafsahu

raushnii kii ek nannhii sii lakiir
mere kamre ke a.ndhere kaa badan
chupke chupke TaToltii hai
jis tarah habshii hasiina ke Dhale
sandal ke se
aabnuusii jism ke a.asaab me.n
tez suu.ii kii achaanak ik chubhan
sarsaraate saa.np kii maanind dau.Daatii hai KHuu.n
jhanjhanaa uThte hai.n saare taar-o-puu
aur phir aahista aahista kahii.n
zer-e-sat.h-e-jaan-o-dil
ye talaatum
ruk ke so jaataa hai
ya.anii
azhdar-e-aasuuda-KHaatir kii tarah
KHvaab-noshii.n ke u.Daataa hai maze

Shamsur Rahman Faruqi
Nazm

jahan-zadi ka status

zamaana kitnaa badal gayaa hai
maqaam rishto.n kaa miT rahaa hai
kahii.n mohabbat kaa ruup dhaare
kahii.n sulagte ye nafrato.n se
kahii.n pe aa.nkho.n me.n ret ban kar
chubhan kii suurat rulaa rahe hai.n
kahii.n ye barqii payaam ban kar
hazaar miilo.n pe chhaa.ii duurii ke baadalo.n ko haTaa rahe hai.n
dilo.n kii dha.Dkan ba.Dhaa rahe hai.n
rivaayato.n ko badal rahe hai.n
vafaa ke dhaage jafaa se har dam ulajh rahe hai.n
udaas lamhe KHushii-o-hairat kii saarii gha.Diyaa.n
dilo.n se baahar nikal ke diivaar kaa navishta
mohabbat azalii aziim rishta
jo laakho.n pardo.n me.n jagmagaataa thaa
ab status pe ishtihaa kii KHabar kii suurat badal rahaa hai
ko.ii bhii jazba ko.ii bhii rishta
na mustaqil hai na mo'atabar hai
palak jhapakne me.n badle manzar
ki jaise ko.ii jahaan-zaadii ta'alluq apnaa badal rahii ho
na.ii ko.ii chaal chal rahii ho
junuu.n kii aglii jo manzile.n hai.n
vahaa.n pe tasviire.n aavezaa.n hai.n
dabii dabii muskuraahaTe.n hai.n
ghuTii ghuTii sansanaahaTe.n hai.n
junuun ehsaas aur mohabbat
vaqaar apnaa miTaa rahii hai.n
bataa rahii hai.n
zamaana kitnaa badal gayaa hai

Maimoona Abbas Khan
Nazm

nae aadmi ka confession

kabhii ye bhii KHvaahish pareshaan kartii hai mujh ko
ki mai.n apne bhiitar ke mai.n ko nikaaluu.n
magar mere mai.n kii to suurat bahut hii burii hai
KHabaasat kaa ambaar jis me.n nihaa.n hai
saraafa se jis kii karaahat ayaa.n hai
jabii.n par KHatarnaak socho.n ke jangal uge hai.n
bhayaanak iraado.n ke vahshii chhupe hai.n
nigaaho.n me.n jis kii havasnaakiyo.n ke manaazir bhare hai.n
manaazir bhii aise ki jin me.n
zinaa aise logo.n ke hamraah karne ko sochaa gayaa hai
badan jin ke jinsii buluuGat ko pahu.nche nahii.n hai.n
yaa vo jo buluuGat kii saarii kashish kho chuke hai.n
yaa vo jin se ko.ii muqaddas saa rishta ju.Daa hai
mire mai.n kii suurat burii hai
ki dandaa.n darindo.n kii suurat
kisii sahme simTe ku.nvaare badan me.n ga.De hai.n
ki maatam-kade me.n bhii aa.nkhe.n kisii jism kii burjiyo.n par Tikii hai.n
ki biivii baGal me.n magar zehn me.n aur hii ko.ii tan-man khilaa hai
ki paglii bhikaaran ke tan aur andhe bhikaarii ke kashkol par bhii nazar hai
burii hai bahut hii burii hai
ki dil me.n a.izzaa kii amvaat kii KHvaahishe.n bhii dabii hai.n
ka.ii be-gunah gardane.n u.ngliyo.n me.n pha.nsii hai.n
ki lafz-e-ayaadat me.n biimaar kii maut kii bhii du.aa hai
burii hai burii hai
ki ahbaab kii jiit par dil dukhii hai
ki aulaad kii bartarii se chubhan hai
ki bhaa.ii ke raushan jahaa.n se jabii.n par shikan hai
burii hai burii hai
ki jo paaltaa hai usii kii nafii hai
ki jo puujtaa hai usii se daGaa hai
ajab uuba.D-khaaba.D sii mai.n kii zamii.n hai
ki us me.n kahii.n bhii tavaazun nahii.n hai
kisii bhii tarah kaa tanaasub nahii.n hai
jahaa.n chaahiye hausla buzdilii hai
jahaa.n raastii kii zaruurat kajii hai
jahaa.n chaahiye aman Gaarat-garii hai
jahaa.n chaahiye qurb vaa.n faasla hai
jahaa.n sulh-e-kul chaahiye garmiyaa.n sardiyaa.n hai.n
agar mere mai.n kii ye suurat mire KHol kii baahar sat.h par aa ga.ii
to zamaana mujhe kyaa kahegaa
yahii soch kar apnii is aarzuu ke badan me.n
tabar bhau.nk detaa huu.n aksar
magar ye tamannaa
ki mai.n apne bhiitar ke mai.n ko nikaaluu.n
mire dil me.n rah rah ke kyuu.n jaagtii hai
sabab us kaa ye to nahii.n hai
ki mai.n apne andar kii shaffaaf makruuh suurat dikhaa kar
zamaane kii aa.nkho.n me.n KHud ko ba.Daa dekhnaa chaahtaa huu.n
yaa ye ki musalsal sharaafat ke naaTak se ta.ng aa chukaa huu.n
yaa phir ye ki ab
baaharii shakl-o-suurat me.n merii
kashish ko.ii
baaqii
nahii.n hai

Ghazanfar
Nazm

no need of password

ham mohabbat kaa password note-notepad par likh kar bhuul ga.e hai.n
magar terii aa.nkhe.n na jaane kis jaaduu.ii mantar ke nam se dhulii hai.n
ki asiir kar letii hai.n mere dil kii dha.Dkano.n ko apnii palko.n kii larzish me.n
kisii password ke baGair
jaise chaa.nd kii chaa.ndnii ko
raat apnii aaGosh me.n sameT letii hai
merii mohabbat apnii pyaas bujhaatii hai
havaa ke rath par savaar ho kar sitaaro.n kii oT me.n tumhaarii
be-harf-o-saut KHud-kalaamii se ham-kalaam ho kar
magar suuraj kii kirno.n kii chubhan bikher detii hai us KHud-kalaamii ko din ke sahraa me.n
aa.nkh khul jaatii hai
aur kamra tere na hone ke dukh me.n Dagmagaane lagtaa hai
kaash ko.ii mahal-saraa ho jis kaa chor darvaaza
mujhe tujh se milaane vaale raaste kii taraf aap hii aap khul jaa.e
jahaa.n ghane sabz aur phaldaar daraKHto.n me.n pariyo.n kaa hujuum istiqbaaliya raqs ke uruujii marhale ko chhuu rahaa hai
mere saahir
aasmaan kii chhalnii se jhaa.nktii hu.ii sitaaro.n kii muskuraahaT kii qasam
terii aa.nkho.n kii tapish se ek surma.ii la.Dkii kii zaat pighalne lagii hai
aur ye vasl-aamez kohar hamaarii rago.n me.n dhiire dhiire saraayat karne lagii hai
mere saahir
mere shaa.ir
password kii zaruurat nahii.n

Asima Tahir
Nazm

virana-e-KHayal

dasht-e-garm-o-sard me.n ye be-dayaaro.n kaa hujuum
be-KHabar maahaul se
chup-chaap
KHud se ham-kalaam
chal rahaa hai sar jhukaa.e is tarah
jis tarah marghaT pe ruuho.n kaa KHiraam
zard chehro.n par hai sadiyo.n kii thakan
saa.ns lete hai.n kuchh aise
jaise hotii ho chubhan
ho.nT par Gamgii.n tabassum aur siine me.n bukaa
har qadam par haDDiyo.n ke ka.Dka.Daane kii sadaa
un kii aa.nkhe.n
jin pe hukm-e-diida-e-biinaa lagaate hai.n
devtaa.o.n kii basiirat kaa.np jaa.e
zehn o dil kaa faasla tai karte karte haa.np jaa.e
vus.at-e-arz-o-samaa ik diida-e-hairaan hai
uf! ye melaa kis qadar viiraan hai!!

Iftikhar Aazmi
Nazm

maKHdum

halkii halkii chubhan
miiThii miiThii jalan

Sulaiman Khateeb
Nazm

lagan

kaleje ko ab ye chubhan khaa rahii hai
na tum aa.e aur baat bhii jaa rahii hai
kahii.n bhed bhii apnaa kahtaa hai ko.ii
mujhe apne uupar ha.nsii aa rahii hai

Nakhshab Jaarchawi
Nazm

dard

sarsaraahaT hai
na aahaT hai
na halchal
na chubhan
dard chup-chaap
kisii dhiimii nadii kii suurat
saa.ns letii hu.ii
gaa.nTho.n me.n
utar aayaa hai
kitne barso.n kii
riyaazat se
hunar-mandii se
aaise bikhre hu.e
resho.n ko sameTaa hai magar
aur har baar
har ik baar
bahut jatano.n se
jism ko jaan se
jo.Daa hai magar
be-sabab saa.ns kii kaTtii Dorii
kab se thaame hu.e
baiThe hai.n magar
aaj nahii.n
yaa kahii.n dard thame
aur sakuu.n mil jaa.e
yaa ko.ii gaa.nTh khule
aur qaraar aa jaa.e

Gulnaz Kausar
Nazm

safar-e-agahi

ajiib hai
dasht-e-aagahii kaa safar
vafaa kii ridaa me.n lipTii
barhana qadmo.n se chal rahii huu.n
tape hu.e regzaar me.n bhii
magar chubhan hai na paa.nv me.n ko.ii aabla hai
thakan kaa naam-o-nishaa.n nahii.n hai

Parveen Fana Syed
Nazm

shahar-zade

hai KHud-faraamoshii pe Gaalib KHud-farebii kii chubhan
takraar se ta.abiir hai.n ye zindagii ke maah-o-san
yaksaaniyat ke dasht me.n khultaa hai nudrat kaa chaman
maayuus jazbo.n se idhar kuchh kar dikhaane kii lagan
biim-o-rajaa ke darmiyaa.n ham shahr-zaade hai.n magan

Salman Sarwat
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now