Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "halq-e-husain"

Nazm MATCHES FOR "halq-e-husain"

Nazm

wo jo tujhse pahle ka zikr tha

vo jo tujh se pahle kaa zikr thaa
vo jo tujh se pahle kii raah thii
kahii.n sub.h-e-zaat luTii hu.ii
kahii.n shaam-e-ishq bujhii hu.ii
kahii.n dopahar rah-e-maa.ndagaa.n pe tanii hu.ii
kahii.n chaa.nd pichhle visaal ke
kahii.n mehr sub.h-e-kamaal ke
kahii.n zulf-e-vasl-mizaaj par tah-e-gard-e-hijr jamii hu.ii
kahii.n aas thii kahii.n pyaas thii
kahii.n KHushk halq me.n tiir thaa
kahii.n saa.ebaan jalaa hu.aa kahii.n baadbaan me.n chhed thaa

Akhtar Husain Jafri
Nazm

jashn-e-azadi

apnii miTTii hai muqaddas
jaise mamtaa kaa taqaddus
KHuun kaa ik ek qatra de ke bhii
is kii rakhvaalii muqaddam
shaan-e-momin
azm-e-paiham
maujzan ho ruuh ruuh
josh-e-iimaan-e-husain

Asghar Ali Tabassum
Nazm

saut-e-nadida

nii.nd palko.n ke saa.ebaa.n me.n nahii.n
taa.ir-e-KHvaab kar gayaa parvaaz
vaadii-e-chashm ke ufuq se pare
aa.nkh mahv-e-tasavvuraat-e-husain
ek halchal sii zehn-o-dil me.n machii
aur nazar ik maqaam Tiktii nahii.n
KHushbu.o.n ke hisaar-e-gardish me.n
hai samaa.at kuchh is qadar hassaas
aa.nkh kii putliyo.n ke thaame haath
dau.Dtii hai udhar se us jaanib
ek lamha use qaraar nahii.n
ek manzar pe e.atibaar nahii.n

Yaqoob Tasawwur
Nazm

ek kahani ishq ki

mai.n tere bahattar saathiyo.n me.n nahii.n thaa
mujhe to ishq ne muntaKHab kiyaa thaa
ek vahshat-naak bhii.D thii mere ird-gird
magar mai.n is bhii.D me.n hote hu.e bhii
kisii vahshat kaa hissa na thaa
mai.n to tanhaa thaa
ahl-e-hakam ke nazdiik to ek baaGii thaa
aur vo tamaam hujuum jo faqat hujuum thaa
be-chehra be-kirdaar be-zehn faqat hujuum
jo apnii Galat zaruurato.n kii KHaatir
vahii kahte jo ahl-e-hakam kahte vahii sunte jo unhe.n sunaayaa jaataa
vahii dekhte jo unhe.n dikhaa jaataa
suu-e-husain-ibn-e-alii
tum baaGii Thahre
mai.n is hujuum kaa hissa nahii.n thaa
magar tum tak aane ke liye mujhe is hujuum se guzarnaa thaa
tumhaare sach ko jaan.ne ke liye
mai.n ne kitne hii jhuuT sune
mai.n baatil ke raasto.n ko ubuur kar ke
haq tak pahu.nchaa
mai.n tere behtar saathiyo.n me.n nahii.n thaa
magar mashiyyat ko manzuur thaa ki husain hur se mile
ki taariiKH ko baavar ho
ahl-e-ishq ke faisle
KHudaa ke faisle hote hai.n
jis ne zamaane kii qasam khaa kar
KHasaare kaa mafhuum samjhaayaa
aur mai.n ne juum-e-Galat ke darmiyaan
is mafhuum ko paa liyaa
mai.n tere bahattar saathiyo.n me.n nahii.n thaa
husain mai.n teraa hur thaa

Injila Hamesh
Nazm

raat Dhalne ko hai

saa.ns roke hu.e vaqt ke pe.D ko
chhe.Dtii hai havaa
habs chhaTne lagaa
bain kartii TaTiirii kii manhuus aavaaz par
os pa.Dne lagii
ras-bharii chaa.ndnii se
chipakne lage KHushk aa.nkho.n ke lab
KHushk hote hu.e halq-e-shab me.n u.nDelii ga.ii
qatra qatra damakte hu.e jugnuu.o.n kii sharaab
raat kii shaaKH par
raushnii se mahakte sitaaro.n kaa baur aa gayaa
chaa.nd aisaa piyaala chhalakne ko hai
jo a.ndhero.n kii pap.Dii jamii thii lab-e-baam-o-dar
vo utarne ko hai
raat Dhalne ko hai

Zaheer Mushtaq Rana
Nazm

adl ka fuqdan

qaatil-o-maqtuul baraabar
zaalim-o-mazluum baraabar
qalam bhii banduuq baraabar
ma.atuub-o-mahbuub baraabar
apnii goyaa saathii kii
har ik KHaatuun baraabar
na.ii daanishvarii jo pa.Dhii
muusaa-o-qaaruun baraabar
zulm to sab par saa.njhaa thaa
banii-israa.iil-o-fir.aun baraabar
maa.n chaahe rotii rahe
shahiid bachche aur mal.uun baraabar
baloch jo ghar se Gaa.eb hai.n
sab par magar qaanuun baraabar
zulm kii andhii fikr me.n
yaziid-o-husain baraabar
na.ii na.ii pa.Dhii sahaafat
mash.al-o-hujuum baraabar
a.ndheraa bhii ujaale saa hai
zulmat-o-nuur baraabar
basiirat par parda pa.Daa
sach aur har ik jhuuT baraabar
ulTii ga.ngaa bahtii hai
madaarii-o-aflaatuun baraabar
jab tak apnaa na bahe
aab-o-KHuun baraabar
ik un kaa bhii maar giraa.o
phir kahnaa maarne vaalaa aur marhuum baraabar

Zehra Alvi
Nazm

agar mujhe zaban mile

agar mujhe zabaa.n mile
to dil kii daastaa.n kahuu.n
KHud apne chaaragar se haal-e-sa.ii-e-raa.egaa.n kahuu.n
kahuu.n ki kyuu.n fasurdagii hai KHema-zan bahaar me.n
dhanak ke rang kyuu.n nahii.n hai.n aks-e-shaaKH-saar me.n
vo abr ban ke tairtii hai.n kyuu.n falak ke niil me.n
ga.e dino.n kii kashtiyaa.n jo hai.n nazar kii jhiil me.n
alam-nasiib dosto.n ko kyaa hu.aa
vo sabz mausamo.n ke KHvaab kyaa hu.e
vo surKH titliyaa.n kahaa.n ga.ii.n
mai.n sab kahuu.n
mai.n sach kahuu.n
mai.n saarii daastaa.n kahuu.n agar mujhe zabaa.n mile
agar mujhe zabaa.n mile
bataa.uu.n saare dard jin ko pairahan milaa na harf-o-saut kaa
sunaa.uu.n sab kahaaniyaa.n
vo shaam shaam ra.ngato.n kii an-kahii kahaaniyaa.n
bayaa.n karuu.n vo qurbate.n jo dil hii dil me.n rah ga.ii.n
vo dhuup dhuup chaahate.n
jo lafz bhii na ban sakii.n
jo ashk ban ke bah ga.ii.n
agar mujhe zabaa.n mile
agar mujhe zabaa.n mile
to irtiqaa kii sab hado.n ko to.D duu.n
masiih-o-krishn sarmad-o-husain ke tamaam raaz khol duu.n
azal abad ko jo.D duu.n
kahuu.n azal azal na thaa
kahuu.n abad abad nahii.n
ki us kii ibtidaa na thii
ki is kii intihaa nahii.n
ye roz-o-shab kaa silsila to ko.ii silsila nahii.n
ye parda-e-KHayaal hai
magar ye silsila bhii mere nutq-o-lab ke bas me.n ho
ye merii dastaras me.n ho
agar mujhe zabaa.n mile

Shahid Malik
Nazm

dost

shaamil-e-haal hai KHaaliq kii 'inaayat ban kar
dostii saath me.n rahtii hai hidaayat ban kar

Salim Husain
Nazm

hum aur waldain

jab apne kaar-e-KHair pe shaadaa.n hu.aa karo
us vaqt vaaldain ke haq me.n du'aa karo

Salim Husain
Nazm

ek pul banaya ja raha hai

mai.n un se puuchhtaa huu.n:
pul kaise banaayaa jaataa hai
pul banaane vaale kahte hai.n:
tum ne kabhii mohabbat nahii.n kii
mai.n kahtaa huu.n: mohabbat kyaa chiiz hai
vo apne auzaar rakhte hu.e kahte hai.n:
mohabbat kaa matlab jaan.naa chaahte ho
to pahle dariyaa se milo...
ruu-e-zamiin par dariyaa se zyaada mohabbat karne vaalaa ko.ii nahii.n
dariyaa apne samundar kii taraf bahtaa rahtaa hai
ye supurdagii hai
ye supurdagii bachpan hai aur bachpan bahisht...
lekin bahisht tak pahu.nchne ke liye ek jahannam se guzarnaa pa.Dtaa hai
mai.n puuchhtaa huu.n jahannam kyaa hai?
vo kahte hai.n: is savaal kaa javaab daraKHto.n ke paas hai
ko.ii bhii mausam ho vo apnii jagah nahii.n chho.Dte
unhe.n miTTii se mohabbat hai
unhe.n parindo.n aur chiyuu.nTiyo.n se mohabbat hai
jo un ke jism me.n ghar banaatii hai.n
'ghar kyaa hai?' mai.n puuchhtaa huu.n?
vo sab ha.nsne lagte hai.n
pahlaa mazduur kahtaa hai:
apnii aurat kii taraf jaa.o
har savaal kaa javaab mil jaa.egaa

Sarvat Husain
Nazm

ek nazm kahin se bhi shurua ho sakti hai

ek nazm kahii.n se bhii shuruu.a ho saktii hai
juuto.n kii jo.Dii se
yaa qabr se jo baarish me.n baiTh ga.ii
yaa us phuul se jo qabr kii paa.iinii par khilaa
har ek ko kahii.n na kahii.n panaah mil ga.ii
chii.ntiyo.n ko jaa-e-namaaz ke niiche
aur la.Dkiyo.n ko mirii aavaaz me.n
murda bail kii khopa.Dii me.n gilahrii ne ghar banaa liyaa hai
nazm kaa bhii ek ghar hogaa
kisii jilaa-vatan kaa dil yaa intizaar kartii hu.ii aa.nkhe.n
ek pahiya hai jo banaane vaale se adhuuraa rah gayaa hai
ise ek nazm mukammal kar saktii hai
ek guu.njtaa hu.aa aasmaan nazm ke liye kaafii hotaa hai
lekin ye ek naashta-daan me.n baa-aasaanii samaa saktii hai
phuul aa.nsuu aur ghanTiyaa.n is me.n piro.ii jaa saktii hai.n
ise andhere me.n gaayaa jaa saktaa hai
tyauhaaro.n kii dhuup me.n sukhaayaa jaa saktaa hai
tum ise dekh saktii ho
KHaalii bartano.n KHaalii qabzo.n aur KHaalii gahvaaro.n me.n
tum ise sun saktii ho
haath-gaa.Diyo.n aur janaazo.n ke saath chalte hu.e
tum ise chuum saktii ho
bandar-gaaho.n kii bhii.D me.n
tum ise guu.ndh saktii ho
patthar kii maa.nd me.n
tum ise ugaa saktii ho
podiine kii kiyaariyo.n me.n
ek nazm
kisii bhii raat se taariik nahii.n kii jaa saktii
kisii talvaar se kaaTii nahii.n jaa saktii
kisii diivaar me.n qaid nahii.n kii jaa saktii
ek nazm
kahii.n bhii saath chho.D saktii hai
baadal kii tarah
havaa kii tarah
raaste kii tarah
baap ke haath kii tarah

Sarvat Husain
Nazm

das se upar

auzaaro.n ke naam bahut hai.n
hathiyaaro.n ke daam bahut hai.n
ai saudaagar kaun gine
das se uupar kaun gine
ai dil
ai be-kal favvaare
kitne ghaav bane hai.n pyaare

Sarvat Husain
Nazm

itne bahut se rang

salaaKHo.n se udhar
kuchh daraKHt, ek sa.Dak, kutte kii zanjiir thaame ek aadmii
aur ek Dor jis par ra.ng-bira.nge kap.De suukh rahe hai.n
jismo.n ke baGair ye kap.De, bachcho.n ke baGair ye maidaan
mohabbat ke baGair ye raaste
duniyaa kitnii chhoTii nazar aatii hai
ra.ng-bira.nge kap.De suukh jaane par
ek aurat aa.egii
tab ek ek kar ke ye qamiize.n, patluune.n aur faraake.n
apne apne jism haasil kar le.nge
tab maidaan bachcho.n se
aur bachche KHushii se bhar jaa.e.nge
ye chhoTii sii kaa.enaat ra.ngo.n se bhar jaa.egii
itne bahut se ra.ng
ai aurat, itne bahut se ra.ng!

Sarvat Husain
Nazm

ek pul banaya ja raha hai

mai.n un se puuchhtaa huu.n
pul kaise banaayaa jaataa hai
pul banaane vaale kahte hai.n
tum ne kabhii mohabbat nahii.n kii
mai.n kahtaa huu.n mohabbat kyaa chiiz hai
vo apne auzaar rakhte hu.e kahte hai.n
mohabbat kaa matlab jaan.naa chaahte ho
to pahle dariyaa se milo
ruu-e-zamiin par dariyaa se ziyaada mohabbat karne vaalaa ko.ii nahii.n
dariyaa apne samundar kii taraf bahtaa rahtaa hai
ye supurdagii hai
supurdagii bachpan hai aur bachpan bahisht
lekin bahisht tak pahu.nchne ke liye ek jahannam se guzarnaa pa.Dtaa hai
mai.n puuchhtaa huu.n jahannam kyaa hai
vo kahte hai.n is savaal kaa javaab daraKHto.n ke paas hai
ko.ii bhii mausam ho vo apnii jagah nahii.n chho.Dte
unhe.n miTTii se mohabbat hai
unhe.n parindo.n aur chyuu.nTiyo.n se mohabbat hai
jo un ke jism me.n ghar banaatii hai.n
ghar kyaa hai mai.n puuchhtaa huu.n
vo sab ha.nsne lagte hai.n
pahlaa mazduur kahtaa hai
apnii 'aurat kii taraf jaa.o
har savaal kaa javaab mil jaa.egaa

Sarvat Husain
Nazm

shairi ki taraf

shaa'irii kii taraf khulte hai.n mere darvaaze
aur darvaazo.n ke us paar damaktii duniyaa
khii.nchtii hai miraa daamaan chale bhii aa.o
ta.ngnaa-e-dar-o-diivaar se baahar jaa kar
mai.n bhii atraaf-o-javaanib kii KHabar laa.uu.ngaa

Sarvat Husain
Nazm

nili lakir

azal se tum bah rahe ho sindhuu
qariib aa.o
hame.n sunaa.o vo saare qisse jo tum pe biite hai.n is safar me.n
anaaj-ghar me.n
tumhaarii zarKHeziyo.n kii chaadar bichhii hu.ii hai
junuub kii samt bahne vaale mahaan sindhuu
tumhe.n mubaarak shumaal kii barf kaa pighalnaa
tumhaare tahziib-yaafta kinaare abad ko aavaaz de rahe hai.n
hamaare mallaah aur machhere tumhaarii chaahat me.n naGma-gar hai.n
zamii.n ke naqshe pe ek niilii lakiir jo muskuraa rahii hai
visaal kaa giit gaa rahii hai

Sarvat Husain
Nazm

aadhe sayyare par

aadhaa pe.D KHizaa.n kii zad me.n jis par phuul na paat
aadhe sayyaare par suuraj aadhe par barsaat
aadhe favvaare par paanii aur aadhe me.n ret
sachche haath daraa.ntii vaale kaaT rahe hai.n khet
achchhii fasl hu.ii hai ab ke maalik kaa ehsaan
is aa.ngan me.n aa.o saathii mil kar kuuTe.n dhaan
ek taraf piital kii ghanTii ek taraf diivaar
is ujlii aavaaz ke ruKH par khole rakkho dvaar
KHaalii haath nahii.n lauTegaa ai mere paataal
kaan-kano.n kaa Tokraa ho yaa maahii-giir kaa jaal

Sarvat Husain
Nazm

mor-pankh

ai mor-pankh
tuu muu-qalam
taKHtii mujhe darkaar hai
chaaro.n taraf
rango.n kaa ik tyauhaar hai
bauchhaar hai
bauchhaar me.n do phuul hai.n
ik phuul juu.De ke liye
ik sabz paanii ke liye

Sarvat Husain
Nazm

hubb-e-watan

ai dil ai banda-e-vatan hoshiyaar
KHvaab-e-Gaflat se ho zaraa bedaar
o sharaab-e-KHudii ke matvaale
ghar kii chaukhaT ke chuumne vaale
naam hai kyaa isii kaa hubb-e-vatan
jis kii tujh ko lagii hu.ii hai lagan
kabhii bachcho.n kaa dhyaan aataa hai
kabhii yaaro.n kaa Gam sataataa hai
yaad aataa hai apnaa shahr kabhii
lau kabhii ahl-e-shahr kii hai lagii
naqsh hai.n dil pe kuucha-o-baazaar
phirte aa.nkho.n me.n hai.n dar-o-diivaar
kyaa vatan kyaa yahii mohabbat hai
ye bhii ulfat me.n ko.ii ulfat hai
is me.n insaa.n se kam nahii.n hai.n darind
is se KHaalii nahii.n chairnd o parind
Tuk.De hote hai.n sang Gurbat me.n
suukh jaate hai.n ruukh furqat me.n
jaa ke kaabul me.n aam kaa paudaa
kabhii parvaan cha.Dh nahii.n saktaa
aa ke kaabul se yaa.n bihii-o-anaar
ho nahii.n sakte baarvar zinhaar
machhlii jab chhuuTtii hai paanii se
haath dhotii hai zindagaanii se
aag se jab hu.aa samundar duur
us ko jiine kaa phir nahii.n maqduur
gho.De jab khet se bichha.Dte hai.n
jaan ke laale un ke pa.Dte hai.n
gaa.e, bhai.ns uu.nT ho yaa bakrii
apne apne Thikaane KHush hai.n sabhii
kahiye hubb-e-vatan isii ko agar
ham se haivaa.n nahii.n hai.n kuchh kam-tar
hai ko.ii apnii qaum kaa hamdard
nau-e-insaa.n kaa samjhe.n jis ko fard
jis pe itlaaq-e-aadmii ho sahiih
jis ko haivaa.n pe de sake.n tarjiih
qaum par ko.ii zad na dekh sake
qaum kaa haal-e-bad na dekh sake
qaum se jaan tak aziiz na ho
qaum se ba.Dh ke ko.ii chiiz na ho
samjhe un kii KHushii ko raahat-e-jaa.n
vaa.n jo nau-roz ho to iid ho yaa.n
ra.nj ko un ke samjhe maaya-e-Gam
vaa.n agar sog ho to yaa.n maatam
bhuul jaa.e sab apnii qadr-e-jaliil
dekh kar bhaa.iyo.n ko KHvaar-o-zaliil
jab pa.De un pe gardish-e-aflaak
apnii aasaa.isho.n pe Daal de KHaak

Altaf Hussain Hali
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now