Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "misaalii"

Nazm MATCHES FOR "misaalii"

Nazm

yaad-e-aligarh

vo chaa.e kii pyaalii pe yaaro.n ke jalse
vo sardii kii raate.n vo zulfo.n ke qisse
kabhii tazkire husn-e-sho.ala-ruKHaa.n ke
mohabbat hu.ii thii kisii ko kisii se
har ik dil vahaa.n thaa nazar kaa nishaana
bahut yaad aataa hai guzraa zamaana
bahut apnaa andaaz thaa laa-ubaalii
kabhii the jalaalii kabhii the jamaalii
kabhii baat me.n baat yuu.nhii nikaalii
sar-e-raah ko.ii qayaamat uThaa lii
kisii ko la.Daanaa kisii ko bachaanaa
bahut yaad aataa hai guzraa zamaana
kabhii sachchii baato.n ko jhuuTaa bataayaa
kabhii jhuuTii baato.n ko sach kar dikhaayaa
kabhii raaz-e-dil kah ke us ko chhupaayaa
kabhii dosto.n me.n yuu.nhii kuchh u.Daayaa
bataa kar chhupaanaa chhupaa kar bataanaa
bahut yaad aataa hai guzraa zamaana
kabhii bazm-e-ahbaab me.n sho.ala-afshaa.n
kabhii union me.n the shamshiir-e-burraa.n
kabhii bazm-e-vaa.iz me.n the paa-ba-jaulaa.n
badalte the har roz taqdiir-e-dauraa.n
jahaa.n jaisii Daflii vahaa.n vaisaa gaanaa
bahut yaad aataa hai guzraa zamaana
zamaana thaa vo ek haivaaniyat kaa
vo daur-e-malaamat thaa shaitaaniyat kaa
hame.n dard thaa ek insaaniyat kaa
uThaa.e alam ham the haqqaaniyat kaa
ba.Dhe jaa rahe the magar baaGiyaana
bahut yaad aataa hai guzraa zamaana
muqaabil me.n aa.e jasaarat thii kis ko
ko.ii rok de ba.Dh ke himmat thii kis ko
pukaare ko.ii ham ko taaqat thii kis ko
ki har bul-havas ko the ham taaziyaana
bahut yaad aataa hai guzraa zamaana
KHayaalaat-e-pur-shauq kaa silsila thaa
badal de.n zamaane ko vo hausla thaa
har ik dil me.n paidaa nayaa valvala thaa
har ik gaam ahbaab kaa qaafila thaa
idhar da.avaa karnaa udhar kar dikhaanaa
bahut yaad aataa hai guzraa zamaana
vo shah-raah-e-marrice ke pur-pech chakkar
vo shamshaad building pe ik shor-e-mahshar
vo mub.ham sii baate.n vo poshiida nashtar
vo be-fikr duniyaa vo lafzo.n ke daftar
ki jin kaa siraa thaa na ko.ii Thikaana
bahut yaad aataa hai guzraa zamaana
kisii ko hu.ii thii kisii se mohabbat
ko.ii kar rahaa thaa kisii kii shikaayat
Garaz roz Dhaatii thii taaza qayaamat
kisii kii shabaahat kisii kii malaamat
kisii kii tasallii kisii kaa sataanaa
bahut yaad aataa hai guzraa zamaana
ko.ii Gam-zada thaa ko.ii ha.ns rahaa thaa
ko.ii husn-e-naahiid par mar miTaa thaa
ko.ii chashm-e-nargis kaa biimaar saa thaa
ko.ii bas yuu.nhii taaktaa jhaa.nktaa thaa
kabhii choT khaanaa kabhii muskuraanaa
bahut yaad aataa hai guzraa zamaana
vo har january me.n numaa.ish ke charche
vo pur-shauq aa.nkhe.n vo hairaan jalve
vo chakkar pe chakkar the baara-darii ke
vo hasrat ki sau baar mil kar bhii milte
hazaaro.n bahaano.n kaa vo ik bahaanaa
bahut yaad aataa hai guzraa zamaana
vo ruKH aaftaabii pe abruu hilaalii
vo timsaal-e-siimii.n vo husn-misaalii
shaguufo.n me.n khelii gulaabo.n me.n paalii
vo KHud ik adaa thii adaa bhii niraalii
nigaahe.n bachaa kar nigaahe.n milaa kar
bahut yaad aataa hai guzraa zamaana
vo har-chand mujh ko nahii.n jaantii thii
magar merii nazro.n ko pahchaantii thii
agarche mire dil me.n vo bas ga.ii thii
magar baat bas dil kii dil me.n rahii thii
magar aaj ahbaab se kyaa chhupaanaa
bahut yaad aataa hai guzraa zamaana
vo ik shaam barsaat kii din Dhalaa thaa
abhii raat aa.ii na thii jhuTpuTaa thaa
vo baad-e-bahaarii se ik gul khilaa thaa
dha.Dakte hu.e dil se ik dil milaa thaa
nazar sun rahii thii nazar kaa fasaana
bahut yaad aataa hai guzraa zamaana
javaanii adaa.o.n me.n bal khaa rahii thii
kahaanii nigaaho.n me.n lahraa rahii thii
mohabbat mohabbat ko samjhaa rahii thii
vo chashm-e-tamannaa jhukii jaa rahii thii
qayaamat se pahle qayaamat vo Dhaanaa
bahut yaad aataa hai guzraa zamaana
hame.n biitii baate.n jo yaad aa rahii thii.n
vo maKHmuur nazre.n jo sharmaa rahii thii.n
bahut aql-e-saada ko bahkaa rahii thii.n
ba.Dii be-niyaazii se farmaa rahii thii.n
unhe.n yaad rakhnaa hame.n bhuul jaanaa
bahut yaad aataa hai guzraa zamaana
ab vo uma.nge.n na dil me.n muraade.n
ab rah ga.ii.n chand maazii kii yaade.n
ye jii chaahtaa hai unhe.n bhii bhalaa de.n
Gam-e-zindagii ko kahaa.n tak du.aa de.n
haqiiqat bhii ab ban ga.ii hai fasaana
bahut yaad aataa hai guzraa zamaana
aligarh hai ba.Dh kar hame.n kul jahaa.n se
hame.n ishq hai apnii urdu zabaa.n se
hame.n pyaar hai apne naam-o-nishaa.n se
yahaa.n aa ga.e ham na jaane kahaa.n se
qasam de ke ham ko kasii kaa bulaanaa
bahut yaad aataa hai guzraa zamaana
mohabbat se yaksar hai anjaan duniyaa
ye viiraan bastii pareshaan duniyaa
kamaal-e-KHirad se ye hairaan duniyaa
KHud apne kiye par pashemaan duniyaa
kahaa.n le ke aayaa hame.n aab-o-daana
bahut yaad aataa hai guzraa zamaana

Aabidullah Ghazi
Nazm

mera watan

jahaa.n kaa chappa chappa gulsitaa.n hai
jahaa.n kii sar-zamii.n rashk-e-jinaa.n hai
tasadduq jis pe husn-e-aasmaa.n hai
himaala jis kii azmat kaa nishaa.n hai
jahaa.n gangaa jahaa.n jamunaa ravaa.n hai
vahii meraa vatan hindostaa.n hai
jahaa.n rangiin hotii hai.n fazaa.e.n
basii rahtii hai.n KHushbuu me.n havaa.e.n
dikhaate hai.n pahaa.D aur ban adaa.e.n
jahaa.n jharne kii mauje.n gungunaa.e.n
jahaa.n nadiyo.n kaa paanii kaif-e-jaa.n hai
vahii meraa vatan hindostaa.n hai
jahaa.n chaupaal hai.n gaa.nv kii ziinat
jahaa.n hai panghaTo.n kii qadr-o-qiimat
barastii hai jahaa.n kheto.n pe rahmat
jahaa.n fasle.n hai.n khaliyaano.n kii daulat
jahaa.n pe.Do.n ke saa.e me.n amaa.n hai
vahii meraa vatan hindostaa.n hai
jahaa.n sub.h-e-banaras hai misaalii
avadh kii shaam hai shaam-e-divaalii
jahaa.n hai 'maalva' kii shab niraalii
hai raajasthaan kii rangat gulaabii
jahaa.n dilkash dakan kaa har samaa.n hai
vahii meraa vatan hindostaa.n hai
jahaa.n maz.hab ke gahvaare hai.n raushan
kaliisaa aur gurudvaare hai.n raushan
masaajid aur miinaare hai.n raushan
jahaa.n ke but-kade saare hai.n raushan
jahaa.n sham-e-ibaadat zau-fishaa.n hai
vahii meraa vatan hindostaa.n hai
jahaa.n fan aur tahziibe.n amar hai.n
jahaa.n qilaa-o-qutub lutf-e-nazar hai.n
jahaa.n taaj-o-ajantaa jalva-gar hai.n
jahaa.n kii KHushnumaa shaam-o-sahar hai.n
jahaa.n har raah raah-e-kahkashaa.n hai
vahii meraa vatan hindostaa.n hai
jahaa.n 'raam'-o-'krishn'-o-'laxman' the
jahaa.n miiraa ke ho.nTo.n par bhajan the
jahaa.n 'suur' aur un ke kiirtan the
jahaa.n 'rai-daas' bhagTii me.n magan the
jahaa.n 'tulsii' the raamaa.en jahaa.n hai
vahii meraa vatan hindostaa.n hai
jahaa.n KHvaaja mu.iinuddiin aa.e
nizaamuddiim jis me.n jagmagaa.e
jahaa.n 'ras-KHaan'-o-'KHusrau' gungunaa.e
'kabiir'-o-'jaa.isii' ne naGme gaa.e
jahaa.n 'Gaalib' kii fikr-e-jaavedaa.n hai
vahii meraa vatan hindostaa.n hai
jahaa.n aurat ne kii hai hukmraanii
lahuu se apne likkhii hai kahaanii
jahaa.n paidaa hu.ii 'jhaa.nsii' kii raanii
hai 'raziya' jis kii azmat kii nishaanii
sunahrii jis kii har ik daastaa.n hai
vahii meraa vatan hindostaa.n hai
jahaa.n muGalo.n ne fan se raushnii kii
maraaTho.n ne jahaa.n taariiKH likkhii
jo dhartii raajputo.n kii hai dhartii
shujaa.at jis ko bundelo.n ne baKHshii
jahaa.n ba.ngaal kaa azm-e-javaa.n hai
vahii meraa vatan hindostaa.n hai

Rahbar Jaunpuri
Nazm

KHush-KHurak

KHush hai.n aise log duniyaa me.n jo KHush-KHuuraak hai.n
aur un logo.n ke dastar-KHvaan haibatnaak hai.n
un ke dastar-KHvaan pe KHushbuu misaalii chaa.e kii
chaar anDe chhe slice das piyaalii chaa.e kii
ho ga.e jab chaa.e kii lazzat se dil-bardashta
khaa liye aadhaa kilo anguur ba.ad-az-naashta
jab kahii.n mauqa.a milaa tho.Daa saa biscuit khaa liyaa
nosh-e-jaa.n farmaa liyaa phir paan cigarette chhaaliyaa
dopahar me.n chhe chapaatii chaar anDe omelette
chaar-chhe shaamii kabaab aur ik nahaarii ke plate
kofte hasb-e-liyaaqat ek lassii kaa gilass
khaa ga.e aur pii ga.e mausuuf be-KHauf-o-hiraas
da.avato.n ke jaal phailaa.e hu.e hai.n har taraf
kah diyaa khaane se pahle hii takalluf-bar-taraf
raat ko tho.Dii sii jelly kuchh murbba aam kaa
kuchh papiitaa le liyaa phir haazme ke naam kaa
do paraaThe le liye kuchh der sustaane ke ba.ad
''ik tire aane se pahle ik tire jaane ke ba.ad''

Khalid Irfan
Nazm

baz-gasht

mai.n terii bastii se bhaag kar duur ik KHaraabe me.n aa gayaa huu.n
ye vo KHaraaba hai jis me.n hastii kii raushnii kaa guzar nahii.n hai
yahaa.n na tuu hai na ra.ng-o-buu hai na zindagii hai
yahaa.n hai vo aalam-e-KHamoshii ki dil kii dha.Dkan bhii be-sadaa hai
ki merii tanhaa.iyo.n ke daaman-e-ufuq ke daaman se jaa mile hai.n
tire nagar ke hasiin kuuche shafiiq galiyaa.n jo ziist kii raushnii kaa ghar hai.n
mire liye merii bebasii ne inhe.n shab-aaluud kar diyaa hai
vo rahguzar tere naqsh-e-paa par jahaa.n hazaar aastaa.n bane hai.n
vo rahguzar ajnabii hu.e hai.n
jahaa.n mai.n ab huu.n vahaa.n agarche hai be-karaa.n tiirgii fazaa me.n
magar yahaa.n bhii mire KHayaalo.n me.n mahr ban kar tiraa saraapaa damak rahaa hai
havaa ke be-kaif sard jho.nke jo zard patto.n se khelte hai.n
to merii be-aab KHushk aa.nkhe.n tujhe KHalaa.o.n me.n Dhuu.nDhtii hai.n
miraa taKHayyul ki is KHaraabe se bad-gumaa.n hai
mire junuu.n ko jhi.njho.Dtaa hai to sochtaa huu.n
agarche tuu ek vo haqiiqat hai jis kaa iqraar laa-budii hai
magar ye teraa vajuud mere liye faqat ek vaahima hai
ki terii zulfo.n ko mere shaano.n ne apnii duniyaa se duur paayaa
ki mere ashko.n ko tere daaman kii aarzuu hii rahii hamesha
magar ye KHush thaa
ki mere Gam ne tire taKHayyul me.n vo sitaare se bhar diye the
charaaG jin ke na bujh sake hai.n na bujh sake.nge
ye sab thaa lekin junuu.n pe kuchh aisii qadGane.n thii.n
ki jazb-e-dil harf-e-mudda.aa ko na paa sakaa thaa
kabhii ko.ii dard lafz bin kar marii zabaa.n par na aa sakaa thaa
magar na jaane vo kyaa thaa jis ne dilo.n ke parde uThaa diye the
junuu.n ke asraar vaaqiye the
tahii-zabaa.n ham hu.e the lekin zabaa.n ke muhtaaj kab rahe the
ki ham nigaaho.n se dil ke paiGaam bhejte the
ye sab thaa lekin mai.n karb-e-jaa.n-soz kaa amii.n thaa
vo karb-e-jaa.n-soz thaa ki merii hayaat se nii.nd bad-gumaa.n thii
aur is KHaraabe me.n jis me.n hastii kii raushnii kaa guzar nahii.n hai
jahaa.n na tuu hai na ra.ng-o-buu hai na zindagii hai
miraa gumaa.n thaa yahaa.n tujhe KHud se duur paa kar mai.n karb se jaa.n bachaa sakuu.ngaa
tujhe kabhii to dimaaG-o-dil se haTaa sakuu.ngaa
tujhe kabhii to bhulaa sakuu.ngaa
magar ye ik aur vaahima thaa
qayaamate.n soz-e-dard-e-dil me.n nihaa.n vahii hai.n
abas Gam-e-zindagii se mai.n ne faraar chaahaa
isii tarah karab-e-jaa.n-guzaa se mai.n ab bhii aatish-e-ba-jaa huu.n har-dam
ki ab tiraa shahr chho.Dne kaa ik aur Gam hai
agarche teraa vajuud mere liye faqat ek vaahima thaa
agarche teraa vajuud mere liye faqat ek vaahima hai
magar tiraa paikar-e-misaalii mire KHayaalo.n me.n jaaguzii.n hai
ki vo kisii dil-kushaa haqiiqat kaa bhii amii.n hai
aur us se mujh ko mafar nahii.n hai

Arsh Siddiqui
Nazm

tiranga

har ek fan kii azmat tahziib-e-be-misaalii
hai is se aashkaara ko.ii nahii.n savaalii
amn-o-amaa.n kii ra.ngat viiro.n ke KHuu.n kii laalii
is me.n jhalak rahii hai mazduur kii bahaalii

Vaqar Khaleel
Nazm

hikayat-e-dauran

dublaa patlaa naazuk 'dauraa.n'
shiisha jaisaa naazuk 'dauraa.n'
Gam kii kaalii raat kaa maaraa
apne hii jazbaat kaa maaraa
aaTho.n pahar yuu.n khoyaa khoyaa
jaise gahrii soch me.n Duubaa
kam ha.nsnaa aadat me.n daaKHil
KHaamoshii fitrat me.n daaKHil
sham.a kii suurat bazm me.n jalnaa
gaah bha.Daknaa gaah pighalnaa
maathe par har vaqt shikan sii
chehra par aazurda thakan sii
chehre se mahruumii zaahir
maasuumii mazluumii zaahir
aa.nkhe.n har dam umDii umDii
palke.n har dam bhiigii bhiigii
karb aa.nkho.n me.n dard aa.nkho.n me.n
raah-e-vafaa kii gard aa.nkho.n me.n
sahmaa sahmaa shaam-e-balaa se
ruuThaa ruuThaa apne KHudaa se
aql-o-KHirad se jii ko churaa.e
paagal-pan se baaz na aa.e
jaane dil me.n kis kii lagan hai
ruuh me.n kis kaa.nTe kii chubhan hai
ye hai apnaa 'dauraa.n' yaaro
uljhaa suljhaa 'dauraa.n' yaaro
lekin yaaro yahii musaafir
raah-e-vafaa kaa dukhii musaafir
shaano.n par ik bojh ko laade
raah-e-talab me.n aage aage
dil me.n ik mazbuut iraada
nazro.n me.n ik raushan jaada
Gam kii lambii raat pe bhaarii
zulm kaa aur zulmat kaa shikaarii
insaanii tahziib kaa qaa.il
duniyaa kii ta.amiir pe maa.il
sa.i-e-paiham us kii tamannaa
jagmag jagmag us kaa rasta
us kii saarii fikr-e-pareshaa.n
insaanii tanziim kii KHvaahaa.n
nazme.n us kii jaan-e-maqaasid
ruuh-e-tamaddun shaan-e-maqaasid
sub.h pe shaidaa shaam pe aashiq
apne vatan ke naam pe aashiq
baate.n raib-o-riyaa se KHaalii
har naqsh-e-kirdaar misaalii
pyaar insaa.n kaa dil me.n chhupaa.e
dard-e-jahaa.n siine me.n basaa.e
'dauraa.n' hai yaa ruuh-e-'dauraa.n'
giryaa.n giryaa.n KHandaa.n KHandaa.n
is kii duniyaa apnii duniyaa
is duniyaa me.n saarii duniyaa

Owais Ahmad Dauran
Nazm

ai mere pyare watan

tere gulshan kii har ik rangiin Daalii ko salaam
terii KHushbuu terii kaliyo.n tere maalii ko salaam
shab kii zulf-e-ambarii.n ko din kii laalii ko salaam
ai mire mohsin tire husn-misaalii ko salaam
reshmii.n kirno.n me.n lipTii terii sub.ho.n ko salaam
nuur me.n Duubii hu.ii puunam kii raato.n ko salaam
ruup ke sehre sajaatii terii kirno.n ko salaam
ai mire mohsin tirii nuuraanii sham.o.n ko salaam
tere phuulo.n ko tirii dilkash bahaaro.n ko salaam
tere suuraj kii suhaanii rahguzaaro.n ko salaam
tere zarro.n terii dhartii ke sitaaro.n ko salaam
abr-paaro.n ko phuvaaro.n ko chanaaro.n ko salaam

Sohan Rahi
Nazm

aali-ji ki gum-shuda bayaz

bayaaz chorii hu.ii hai janaab-e-'aalii' kii
bayaaz-chor ne chorii ba.Dii misaalii kii
zaruur chor ko.ii saariq-e-adab hogaa
use bayaaz churaane kaa KHaas Dhab hogaa
mai.n aise chor kii daanish-varii pe huu.n hairaan
jo ek raat me.n ban baiThaa saahab-e-diivaan
janaab-e-'aalii' ke column the jitne matbuu.aa
samajh ke chho.D gayaa un ko nasr-e-mamnu.aa
ajiib chor thaa nasrii kalaam chho.D gayaa
bayaaz le gayaa column tamaam chho.D gayaa
Gazal ke saath ga.ii masnavii bhii dohaa bhii
tamaam shahr ne maanaa thaa jis kaa lohaa bhii
chhupaa hu.aa thaa jo shaa.ir nikal rahaa hogaa
vo is bayaaz ke maqte badal rahaa hogaa
janaab-e-'aalii' kii fikr-e-jamiil thii ye bayaaz
rubaa.iyo.n me.n ba.Dii KHud-kafiil thii ye bayaaz
jis anjuman me.n ye jaatii thii hashr kartii thii
adab ke saath siyaasat bhii nashr kartii thii
mushaa.eron me.n ba-sad ehtiraam aatii thii
yahii bayaaz musiibat me.n kaam aatii thii
isii bayaaz se doho.n ko aazmaanaa thaa
vo shaaKH hii na rahii jis pe aashiyaana thaa

Khalid Irfan
Nazm

chand aur suraj

maz.har jalaalii maz.har jamaalii
dono.n kii suurat hai bholii bhaalii
dono.n subuk-ravaa.n kii ravish se
zaahir nahii.n hai aashufta haalii
taabinda un ke faiz-e-asar se
bazm-e-KHayaalii bazm-e-misaalii
din is se taabaa.n raat is se raushan
zarkaar-e-sanad kab dekhii KHaalii
nazre.n hai.n un par husn-e-atam kii
jalvo.n se us ke shaan un kii chamkii

Ali Manzoor Hyderabadi
Nazm

tashkil-e-sheristan ke baad

maan lii sarkaar ne jab maa.ng sheristaan kii
shaa.iro.n ne saa.ns lii tab jaa ke itmiinaan kii
purkashish thaa is qadar un ke liye taaza vatan
chho.D kar aabaa.ii ghar jaane lage ahl-e-suKHan
'amn' 'mullaa' 'arsh' 'saaGar' 'vajd' 'jazbii' aur 'firaaq'
apnaa apnaa qaafila le kar chale baa-tamtaraaq
band kar dii 'saahir'o-'sardaar' ne filmii dukaa.n
le ke nikle inqilaabii shaa.iro.n kaa kaarvaa.n
saath 'alvii' ko liye nikle 'KHaliil'-o-'shahryaar'
aage piichhe kul jadiidii the qataar-andar-qataar
gungunaate giit gaate 'bekal' utsaahii chale
tanziya ash.aar kahte 'furqat'-o-'vaahii' chale
yuu.nhii saare mulk se kul shaa'iraan-e-har-zabaa.n
suu-e-manzil chal pa.De le le ke apnii Toliyaa.n
saal-bhar me.n shaa.iro.n se mulk KHaalii ho gayaa
inKHilaa un kaa mukammal aur misaalii ho gayaa
aam taKHmiine ke ruu se un kii ta.adaad-o-shumaar
tuul-o-arz-e-mulk me.n thii do karo.D iksaTh hazaar
naql-e-aabaadii ke is taariiKH-saaz iqdaam se
kuchh masaa.il hal hu.e kuchh mas.ale paidaa hu.e
uTh ga.ii jab mulk se ash.aar-saazo.n kii baraat
kuchh Gizaa.ii mushkilo.n se qaum ne paa.ii najaat
daf.atan be-rozgaarii kii vabaa bhii kam hu.ii
zor shorish kaa ghaTaa sarkaar mustahkam hu.ii
family mansuuba-bandii kii zaruurat ghaT ga.ii
baap-maa.n par thii jo paabandii vo fauran haT ga.ii

Raza Naqvi Vahi
Nazm

sarojini naidu

hind kii tahriik-e-aazaadii me.n teraa naam hai
qaabil-e-taqliid teraa vo misaalii kaam hai

Syeda Farhat
Nazm

ba-yaad-e-jigar

har taraf thii tirii pukaar jigar
har jagah thaa tuu naGma-baar jigar
umr bhar to tujhe qaraar na thaa
aaKHirash aa gayaa qaraar jigar
suunii suunii sii hai har ik mahfil
uj.Dii uj.Dii sii hai bahaar jigar
jab mohabbat kaa zikr aa.egaa
aa.egaa yaad baar-baar jigar
rashk karte the phuul gulshan me.n
tujh ko kaa.nTo.n se thaa vo pyaar jigar
shaa.erii tujh pe naaz kartii thii
aur tuu us pe thaa nisaar jigar
be-KHudii tujh ko zeb detii thii
thaa KHudii kaa tuu raazdaar jigar
har adaa terii ehtiraam-talab
har Gazal terii shaahkaar jigar
tujh se sher-o-adab kii azmat thii
har jagah tuu thaa baa-vaqaar jigar
shaGl-e-mai bhii tiraa misaalii thaa
azm-e-tauba bhii yaadgaar jigar
kis ko rote hai.n jaam-o-paimaana
allah allah tiraa vaqaar jigar
allah allaah terii haq-go.ii
tujh pe rahmat hazaar baar jigar
tere dil me.n thaa vo Gam-e-insaa.n
jis kii har samt hai pukaar jigar
har dukhii dil kii tarjumaanii kii
thaa sabhii kaa tuu Gam-gusaar jigar
nasl-o-qaum-o-vatan ke hangaame
the bahut tujh ko naagavaar jigar
tere paiGaam tak na pahu.nche jo
vo siyaasat hai KHaam-kaar jigar
chhuu ga.e the jinhe.n qadam tere
raaste hai.n vo yaadgaar jigar
sho.ala-e-tuur aatish-e-gul hai.n
laakh firdaus darkinaar jigar
allah allah vo azm-e-haj teraa
rahmat-e-haq se ham-kanaar jigar
aur vo na.at-e-pur-KHuluus tirii
vo tirii ruuh kii pukaar 'jigar'
sharm-e-isyaa.n dil-e-tapiida par
vo bharosa vo inhisaar jigar
vo lataafat ki diida-o-dil kaa
gosha gosha hai pur-bahaar jigar
vo jagah bhii hai pyaar ke qaabil
jis jagah hai tiraa mazaar jigar
bhuul saktaa nahii.n tujhe ko.ii
yuu.n to shaa.ir hai.n be-shumaar jigar

Mustafa Rahi
Nazm

nana ki banduq

aslii jaapaanii do naalii
naanaa kii banduuq niraalii
kanda is kaa maT-mailaa saa
ruup Daraavnaa suurat kaalii
naanaa jii is ke rasiyaa the
naanii thii is kii matvaalii
lete the is se jo nishaana
jaataa thaa vo aksar KHaalii
chi.Diyo.n kaa jiinaa duubhar thaa
chhuptii thii.n vo Daalii Daalii
naanaa jii ik roz ga.e the
dekhne jab mela vaishaalii
naanii ko samjhaa ke ga.e the
karnii thii is kii rakhvaalii
saarii raat guzaarii baahar
mele kii thii shaan niraalii
ghar par raat ko Daaku aa.e
to.D ke raushan-daan kii jaalii
naanii ko pistaul dikhaa kar
le bhaage banduuq kamaalii
shor machaatii piichhe dau.Dii.n
vo thii.n diler ba.Dii dil vaalii
hallaa sun kar log bhii dau.De
le kar ballam aur bhujaalii
chor hu.e tab nau do gyaarah
chho.D ga.e banduuq misaalii
naanaa ke ghar isii KHushii me.n
agle roz manii diivaalii
naanii jii ne isii KHushii me.n
ghar ghar bhejii khiir kii thaalii

Zaki Ahmad
Nazm

raat ka manzar-nama

chhaa.ii shafaq kii laalii
rang is ke hai.n misaalii

Saiqa Ali Noori
Nazm

nelson mandela ke nam

ai ma.ndela tirii bebaak qayaadat ko salaam
sach hai insaan kii tauqiir ba.Dhaa dii tuu ne
taa-abad yaad rahegii ye misaalii paikaar
qil.a-e-zulm kii buniyaad hilaa dii tuu ne
ye tirii jehd-e-musalsal ye tiraa azm-e-samiim
sham.a tuufaan-e-havaadis me.n jalaa dii tuu ne
aaj africa ke sab piir-o-javaa.n hai.n bedaar
qismat-e-KHufta Gulaamo.n kii jagaa dii tuu ne
zor-e-baazuu ne tire aaj ba.Daa kaam kiyaa
gardan-e-KHvaajgii pal-bhar me.n jhukaa dii tuu ne
jo thii insaan pe insaa.n ke sitam kii buniyaad
past-o-baalaa kii vo tafriiq miTaa dii tuu ne
tuu ne shaahii.n se mamuule ko la.Daayaa ai dost
KHaak me.n haibat-e-afrang milaa dii tuu ne
ai mire mard-e-mujaahid tirii jur.at ke nisaar
rang aur nasl kii diivaar giraa dii tuu ne
dekh hai vaqt kii maujo.n me.n ravaanii tujh se
zinda hai azmat-e-insaa.n kii kahaanii tujh se

Rafeeq Jabir
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

muhasara

tamaam suufii o saalik sabhii shuyuuKH o imaam
umiid-e-lutf pe aivaan-e-kaj-kulaah me.n hai.n
mo.azzaziin-e-adaalat bhii half uThaane ko
misaal-e-saa.il-e-mubarram nashista raah me.n hai.n

Ahmad Faraz
Nazm

ai sharif insano

jang to KHud hii ek mas.ala hai
jang kyaa mas.alo.n kaa hal degii
aag aur KHuun aaj baKHshegii
bhuuk aur ehtiyaaj kal degii

Sahir Ludhianvi
Nazm

banjara-nama

gar to hai lakkhii banjaaraa aur khep bhii terii bhaarii hai
ai Gaafil tujh se bhii cha.Dhtaa ik aur ba.Daa byopaarii hai
kyaa shakkar misrii qand garii kyaa saa.nbhar miiThaa khaarii hai
kyaa daakh munaqqaa so.nTh mirach kyaa kesar lau.ng supaarii hai
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

KHizr-e-rah

bartar az andesha-e-suud-o-ziyaa.n hai zindagii
hai kabhii jaa.n aur kabhii tasliim-e-jaa.n hai zindagii
tuu ise paimaana-e-imroz-o-fardaa se na naap
jaavedaa.n paiham davaa.n har-dam javaa.n hai zindagii
apnii duniyaa aap paidaa kar agar zindo.n me.n hai
sirr-e-aadam hai zamiir-e-kun-fakaa.n hai zindagii
zindagaanii kii haqiiqat kohkan ke dil se puuchh
juu-e-shiir-o-tesha-o-sa.ng-e-garaa.n hai zindagii
bandagii me.n ghaT ke rah jaatii hai ik juu-e-kam-aab
aur aazaadii me.n bahr-e-be-karaa.n hai zindagii
aashkaaraa hai ye apnii quvvat-e-tasKHiir se
garche ik miTTii ke paikar me.n nihaa.n hai zindagii
qulzum-e-hastii se to ubhraa hai maanind-e-habaab
is ziyaa.n-KHaane me.n teraa imtihaa.n hai zindagii
KHaam hai jab tak tuu hai miTTii kaa ik ambaar tuu
puKHta ho jaa.e tuu hai shamsher-e-be-zinhaar tuu
ho sadaaqat ke liye jis dil me.n marne kii ta.Dap
pahle apne paikar-e-KHaakii me.n jaa.n paidaa kare
phuu.nk Daale ye zamiin-o-aasmaan-e-musta'aar
aur KHaakistar se aap apnaa jahaa.n paidaa kare
zindagii kii quvvat-e-pinhaa.n ko kar de aashkaar
taa ye chingaarii froG-e-jaavedaa.n paidaa kare
KHaak-e-mashriq par chamak jaa.e misaal-e-aaftaab
taa-badaKHshaa.n phir vahii laa'l-e-giraa.n paidaa kare
suu-e-garduu.n naala-e-shab-giir kaa bheje safiir
raat ke taaro.n me.n apne raaz-daa.n paidaa kare
ye gha.Dii mahshar kii hai tuu arsa-e-mehshar me.n hai
pesh kar Gaafil ‘amal ko.ii agar daftar me.n hai
saltanat

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now