Search result for "mizaaj" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "mizaaj"

Nazm MATCHES FOR "mizaaj"

Nazm

bhali si ek shakl thi

tumhaarii soch jo bhii ho
mai.n us mizaaj kii nahii.n
mujhe vafaa se bair hai
ye baat aaj kii nahii.n

Ahmad Faraz

Nazm

iblis ki majlis-e-shura

ibliis
ye anaasir kaa puraanaa khel ye duniyaa-e-duu.n
saakinaan-e-arsh-e-aazam kii tamannaa.o.n kaa KHuu.n
is kii barbaadii pe aaj aamaada hai vo kaarsaaz
jis ne is kaa naam rakhaa thaa jahaan-e-kaaf-o-nuu.n
mai.n ne dikhlaayaa fara.ngii ko muluukiyat kaa KHvaab
mai.n ne to.Daa masjid-o-dair-o-kaliisaa kaa fusuu.n
mai.n ne naadaaro.n ko sikhlaayaa sabaq taqdiir kaa
mai.n ne mun.im ko diyaa sarmaaya daarii kaa junuu.n
kaun kar saktaa hai is kii aatish-e-sozaa.n ko sard
jis ke ha.ngaamo.n me.n ho ibliis kaa soz-e-daruu.n
jis kii shaaKHe.n ho.n hamaarii aabiyaarii se buland
kaun kar saktaa hai is naKHl-e-kuhan ko sar-niguu.n
pahlaa mushiir
is me.n kyaa shak hai ki mohkam hai ye ibliisii nizaam
puKHta-tar is se hu.e KHuu-e-Gulaamii me.n avaam
hai azal se in Gariibo.n ke muqaddar me.n sujuud
in kii fitrat kaa taqaazaa hai namaaz-e-be-qayaam
aarzuu avval to paidaa ho nahii.n saktii kahii.n
ho kahii.n paidaa to mar jaatii hai yaa rahtii hai KHaam
ye hamaarii sa.ii-e-paiham kii karaamat hai ki aaj
suufii-o-mullaa muluukiyyat ke bande hai.n tamaam
tab-e-mashriq ke liye mauzuu.n yahii afyuun thii
varna qavvaalii se kuchh kam-tar nahii.n ilm-e-kalaam
hai tavaaf-o-haj kaa ha.ngaama agar baaqii to kyaa
kund ho kar rah ga.ii momin kii teG-e-be-niyaam
kis kii nau-miidii pe hujjat hai ye farmaan-e-jadiid
hai jihaad is daur me.n mard-e-musalmaa.n par haraam
duusraa mushiir
KHair hai sulataanii-e-jamhuur kaa GauGaa ki shar
tuu jahaa.n ke taaza fitno.n se nahii.n hai baa-KHabar
pahlaa mushiir
huu.n magar merii jahaa.n-biinii bataatii hai mujhe
jo muluukiyat kaa ik parda ho kyaa is se KHatar
ham ne KHud shaahii ko pahnaayaa hai jamhuurii libaas
jab zaraa aadam hu.aa hai KHud-shanaas-o-KHud-nigar
kaarobaar-e-shahryaarii kii haqiiqat aur hai
ye vajuud-e-miir-o-sultaa.n par nahii.n hai munhasir
majlis-e-millat ho yaa parvez kaa darbaar ho
hai vo sultaa.n Gair kii khetii pe ho jis kii nazar
tuu ne kyaa dekhaa nahii.n maGrib kaa jamhuurii nizaam
chehra raushan andaruu.n cha.ngez se taariik-tar
tiisraa mushiir
ruuh-e-sultaanii rahe baaqii to phir kyaa iztiraab
hai magar kyaa is yahuudii kii sharaarat kaa javaab
vo kaliim-e-be-tajallii vo masiih-e-be-saliib
niist paiGambar va-lekin dar baGal daarad kitaab
kyaa bataa.uu.n kyaa hai kaafir kii nigaah-e-parda-soz
mashriq-o-maGrib kii qaumo.n ke liye roz-e-hisaab
is se ba.Dh kar aur kyaa hogaa tabii.at kaa fasaad
to.D dii bando.n ne aaqaa.o.n ke KHemo.n kii tanaab
chauthaa mushiir
to.D is kaa ruumat-ul-kubraa ke aivaano.n me.n dekh
aal-e-ceaser ko dikhaayaa ham ne phir ceaser kaa KHvaab
kaun bahr-e-ruum kii maujo.n se hai lipTaa hu.aa
gaah baalad-chuu.n-sanobar gaah naalad-chuu.n-rubaab
tiisraa mushiir
mai.n to is kii aaqibat-biinii kaa kuchh qaa.il nahii.n
jis ne afra.ngii siyaasat ko kyaa yuu.n be-hijaab
paa.nchvaa.n mushiir ibliis ko muKHaatab kar ke
ai tire soz-e-nafas se kaar-e-aalam ustuvaar
tuu ne jab chaahaa kiyaa har pardagii ko aashkaar
aab-o-gil terii haraarat se jahaan-e-soz-o-saaz
ablah-e-jannat tirii ta.aliim se daanaa-e-kaar
tujh se ba.Dh kar fitrat-e-aadam kaa vo mahram nahii.n
saada-dil bando.n me.n jo mash.huur hai parvardigaar
kaam thaa jin kaa faqat taqdiis-o-tasbiih-o-tavaaf
terii Gairat se abad tak sar-niguu.n-o-sharmsaar
garche hai.n tere muriid afra.ng ke saahir tamaam
ab mujhe un kii faraasat par nahii.n hai e'tibaar
vo yahuudii fitna-gar vo ruuh-e-mazdak kaa buruuz
har qabaa hone ko hai is ke junuu.n se taar taar
zaaG dashtii ho rahaa hai ham-sar-e-shaahiin-o-charG
kitnii sur.at se badaltaa hai mizaaj-e-rozgaar
chhaa ga.ii aashufta ho kar vus.at-e-aflaak par
jis ko naadaanii se ham samjhe the ik musht-e-Gubaar
fitna-e-fardaa kii haibat kaa ye aalam hai ki aaj
kaa.npte hai.n kohsaar-o-murG-zaar-o-juu.ebaar
mere aaqaa vo jahaa.n zer-o-zabar hone ko hai
jis jahaa.n kaa hai faqat terii siyaadat par madaar

Allama Iqbal

Nazm

safar ke waqt

tum ek saada o barjasta aadmii Thahre
mizaaj-e-vaqt ko tum aaj tak nahii.n samjhe
jo chiiz sab se zaruurii hai vo mai.n bhuul ga.ii
ye passport hai is ko sambhaal ke rakhnaa
jo ye na ho to KHudaa bhii bashar tak aa na sake
so tum shu.uur kaa apne kamaal kar rakhnaa

Jaun Eliya

Nazm

ek laDka

ma.iishat duusro.n ke haath me.n hai mere qabze me.n
juz ik zehn-e-rasaa kuchh bhii nahii.n phir bhii magar mujh ko
KHarosh-e-umr ke itmaam tak ik baar uThaanaa hai
anaasir muntashir ho jaane nabze.n Duub jaane tak
navaa-e-sub.h ho yaa naala-e-shab kuchh bhii gaanaa hai
zafar-mando.n ke aage rizq kii tahsiil kii KHaatir
kabhii apnaa hii naGma un kaa kah kar muskuraanaa hai
vo KHaama-sozii shab-bedaariyo.n kaa jo natiija ho
use ik khoTe sikke kii tarah sab ko dikhaanaa hai
kabhii jab sochtaa huu.n apne baare me.n to kahtaa huu.n
ki tuu ik aabla hai jis ko aaKHir phuuT jaanaa hai
Garaz gardaa.n huu.n baad-e-sub.h-gaahii kii tarah lekin
sahar kii aarzuu me.n shab kaa daaman thaamtaa huu.n jab
ye la.Dkaa puuchhtaa hai aKHtar-ul-iimaan tum hii ho
ye la.Dkaa puuchhtaa hai jab to mai.n jhallaa ke kahtaa huu.n
vo aashufta-mizaaj andoh-parvar iztiraab-aasaa
jise tum puuchhte rahte ho kab kaa mar chukaa zaalim
use KHud apne haatho.n se kafan de kar farebo.n kaa
isii kii aarzuu.o.n kii lahad me.n phe.nk aayaa huu.n
mai.n us la.Dke se kahtaa huu.n vo sho.ala mar chukaa jis ne
kabhii chaahaa thaa ik KHaashaak-e-aalam phuu.nk Daalegaa
ye la.Dkaa muskuraataa hai ye aahista se kahtaa hai
ye kizb-o-iftiraa hai jhuuT hai dekho mai.n zinda huu.n

Akhtarul Iman

Nazm

KHadsha

tirii jabii.n pe agar haadso.n ke naqsh ubhre.n
mizaaj-e-gardish-e-dauraa.n bhii la.Dkha.Daa jaa.e
tuu muskuraa.e to sub.he.n tujhe salaam kare.n
tuu ro pa.De to zamaane kii aa.nkh bhar aa.e

Mohsin Naqvi

Nazm

kisan

qalb par jis ke numaayaa.n nuur o zulmat kaa nizaam
munkashif jis kii faraasat par mizaaj-e-sub.h-o-shaam

Josh Malihabadi

Nazm

taaruf

KHuub pahchaan lo asraar huu.n mai.n
jins-e-ulfat kaa talabgaar huu.n mai.n
ishq hii ishq hai duniyaa merii
fitna-e-aql se be-zaar huu.n mai.n
KHvaab-e-ishrat me.n hai.n arbaab-e-KHirad
aur ik shaa.ir-e-bedaar huu.n mai.n
chhe.Dtii hai jise mizraab-e-alam
saaz-e-fitrat kaa vahii taar huu.n mai.n
ra.ng nazzaara-e-qudrat mujh se
jaan-e-ra.ngiini-e-kohsaar huu.n mai.n
nashsha-e-nargis-e-KHuubaa.n mujh se
Gaaza-e-aariz-o-ruKHsaar huu.n mai.n
aib jo haafiz o KHayyaam mai.n thaa
haa.n kuchh is kaa bhii gunahgaar huu.n mai.n
zindagii kyaa hai gunaah-e-aadam
zindagii hai to gunahgaar huu.n mai.n
rashk-e-sad-hosh hai mastii merii
aisii mastii hai ki hushyaar huu.n mai.n
le ke niklaa huu.n guhar-haa-e-suKHan
maah o anjum kaa KHariidaar huu.n mai.n
dair o ka.aba me.n mire hii charche
aur rusvaa sar-e-baazaar huu.n mai.n
kufr o ilhaad se nafrat hai mujhe
aur maz.hab se bhii be-zaar huu.n mai.n
ahl-e-duniyaa ke liye na.ng sahii
raunaq-e-anjuman-e-yaar huu.n mai.n
ain is be-sar-o-saamaanii me.n
kyaa ye kam hai ki guhar-baar huu.n mai.n
merii baato.n me.n masiihaa.ii hai
log kahte hai.n ki biimaar huu.n mai.n
mujh se barham hai mizaaj-e-piirii
mujrim-e-shoKHi-e-guftaar huu.n mai.n
huur o Gilmaa.n kaa yahaa.n zikr nahii.n
nau-e-insaa.n kaa parastaar huu.n mai.n
mahfil-e-dahr pe taarii hai jumuud
aur vaarafta-e-raftaar huu.n mai.n
ik lapaktaa hu.aa sho.ala huu.n mai.n
ek chaltii hu.ii talvaar huu.n mai.n

Asrarul Haq Majaz

Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri

Nazm

taj-mahal

ye damaktii hu.ii chaukhaT ye tilaa-posh kalas
inhii.n jalvo.n ne diyaa qabr-parastii ko rivaaj
maah o anjum bhii hu.e jaate hai.n majbuur-e-sujuud
vaah aaraam-gah-e-malika-e-ma.abuud-mizaaj
diidanii qasr nahii.n diidanii taqsiim hai ye
ruu-e-hastii pe dhu.aa.n qabr pe raqs-e-anvaar
phail jaa.e isii rauza kaa jo simTaa daaman
kitne jaa.n-daar janaazo.n ko bhii mil jaa.e mazaar
dost mai.n dekh chukaa taaj-mahal
.....vaapas chal

Kaifi Azmi

Nazm

ek gae aur bakri

kyo.n ba.Dii bii mizaaj kaise hai.n
gaay bolii ki KHair achchhe hai.n

Allama Iqbal

Nazm

Sar-guzisht-e-adam

sune ko.ii mirii Gurbat kii daastaa.n mujh se
bhulaayaa qissa-e-paimaan-e-avvalii.n me.n ne
lagii na merii tabii.at riyaaz-e-jannat me.n
piyaa shu.uur kaa jab jaam-e-aatishii.n mai.n ne
rahii haqiiqat-e-aalam kii justujuu mujh ko
dikhaayaa auj-e-KHayaal-e-falak-nashii.n mai.n ne
milaa mizaaj-e-taGayyur-pasand kuchh aisaa
kiyaa qaraar na zer-e-falak kahii.n mai.n ne
nikaalaa kaabe se patthar kii muurato.n ko kabhii
kabhii buto.n ko banaayaa haram-nashii.n mai.n ne
kabhii mai.n zauq-e-takallum me.n tuur par pahu.nchaa
chhupaayaa nuur-e-azl zer-e-aastii.n mai.n ne
kabhii saliib pe apno.n ne mujh ko laTkaayaa
kiyaa falak ko safar chho.D kar zamii.n mai.n ne
kabhii mai.n Gaar-e-hiraa me.n chhupaa rahaa barso.n
diyaa jahaa.n ko kabhii jaam-e-aaKHrii.n mai.n ne
sunaayaa hind me.n aa kar suruud-e-rabbaanii
pasand kii kabhii yuunaa.n kii sarzamii.n mai.n ne
dayaar-e-hind ne jis dam mirii sadaa na sunii
basaayaa KHitta-e-jaapaan o mulk-e-chii.n mai.n ne
banaayaa zarro.n kii tarkiib se kabhii aalam
KHilaaf-e-ma.ani-e-taaliim-e-ahl-e-dii.n mai.n ne
lahuu se laal kiyaa saik.Do.n zamiino.n ko
jahaa.n mai.n chhe.D ke paikaar-e-aql-o-dii.n mai.n ne
samajh me.n aa.ii haqiiqat na jab sitaaro.n kii
isii KHayaal me.n raate.n guzaar dii.n mai.n ne
Daraa sakii.n na kaliisaa kii mujh ko talvaare.n
sikhaayaa mas.ala-e-gardish-e-zamii.n mai.n ne
kashish kaa raaz huvaidaa kiyaa zamaane par
lagaa ke aa.iina-e-aql-e-duur-bii.n mai.n ne
kiyaa asiir shu.aa.o.n ko barq-e-muztar ko
banaa dii Gairat-e-jannat ye sarzamii.n mai.n ne
magar KHabar na milii aah raaz-e-hastii kii
kiyaa KHirad se jahaa.n ko tah-e-nagii.n mai.n ne
hu.ii jo chashm-e-mazaahir-parast vaa aaKHir
to paayaa KHaana-e-dil me.n use makii.n mai.n ne

Allama Iqbal

Nazm

goristan-e-shahi

aasmaa.n baadal kaa pahne KHirqa-e-deriina hai
kuchh mukaddar saa jabiin-e-maah kaa aa.iina hai
chaa.ndnii phiikii hai is nazzaara-e-KHaamosh me.n
sub.h-e-saadiq so rahii hai raat kii aaGosh me.n
kis qadar ashjaar kii hairat-fazaa hai KHaamushii
barbat-e-qudrat kii dhiimii sii navaa hai KHaamushii
baatin-e-har-zarra-e-aalim saraapaa dard hai
aur KHaamoshii lab-e-hastii pe aah-e-sard hai
aah jaulaa.n-gaah-e-aalam-giir yaanii vo hisaar
dosh par apne uThaa.e saik.Do.n sadiyo.n kaa baar
zindagii se thaa kabhii ma.amuur ab sunsaan hai
ye KHamoshii us ke ha.ngaamo.n kaa goristaan hai
apne sukkaan-e-kuhan kii KHaak kaa dil-daada hai
koh ke sar par misaal-e-paasbaa.n istaada hai
abr ke rauzan se vo baalaa-e-baam-e-aasmaa.n
naazir-e-aalam hai najm-e-sabz-faam-e-aasmaa.n
KHaak-baazii vus.at-e-duniyaa kaa hai manzar use
daastaa.n naakaami-e-insaa.n kii hai azbar use
hai azal se ye musaafir suu-e-manzil jaa rahaa
aasmaa.n se inqilaabo.n kaa tamaashaa dekhtaa
go sukuu.n mumkin nahii.n aalam me.n aKHtar ke liye
faatiha-KHvaanii ko ye Thahraa hai dam bhar ke liye
ra.ng-o-aab-e-zinagii se gul-ba-daaman hai zamii.n
saik.Do.n KHuu.n-gashta tahziibo.n kaa madfan hai zamii.n
KHvaab-gah shaaho.n kii hai ye manzil-e-hasrat-fazaa
diida-e-ibrat KHiraaj-e-ashk-e-gul-guu.n kar adaa
hai to goristaa.n magar ye KHaak-e-garduu.n-paaya hai
aah ik bargashta qismat qaum kaa sarmaaya hai
maqbaro.n kii shaan hairat-aafrii.n hai is qadar
jumbish-e-mizhgaa.n se hai chashm-e-tamaashaa ko hazar
kaifiyat aisii hai naakaamii kii is tasviir me.n
jo utar saktii nahii.n aa.iina-e-tahriir me.n
sote hai.n KHaamosh aabaadii ke ha.ngaamo.n se duur
muztarib rakhtii thii jin ko aarzuu-e-naa-subuur
qabr kii zulmat me.n hai in aaftaabo.n kii chamak
jin ke darvaazo.n pe rahtaa hai jabii.n-gustaar falak
kyaa yahii hai in shahanshaaho.n kii azmat kaa ma.aal
jin kii tadbiir-e-jahaa.nbaanii se Dartaa thaa zavaal
rob-e-faGfuurii ho duniyaa me.n ki shaan-e-qaisarii
Tal nahii.n saktii Ganiim-e-maut kii yuurish kabhii
baadshaaho.n kii bhii kisht-e-umr kaa haasil hai gor
jaada-e-azmat kii goyaa aaKHirii manzil hai gor
shorish-e-bazm-e-tarab kyaa uud kii taqriir kyaa
dardmandaan-e-jahaa.n kaa naala-e-shab-giir kyaa
arsa-e-paikaar me.n ha.ngaama-e-shamshiir kyaa
KHuun ko garmaane vaalaa naara-e-takbiir kyaa
ab ko.ii aavaaz soto.n ko jagaa saktii nahii.n
siina-e-viiraa.n me.n jaan-e-rafta aa saktii nahii.n
ruuh-e-musht-e-KHaak me.n zahmat-kash-e-bedaad hai
kuucha gard-e-nai hu.aa jis dam nafas fariyaad hai
zindagii insaa.n kii hai maanind-e-murG-e-KHush-navaa
shaaKH par baiThaa ko.ii dam chahchahaayaa u.D gayaa
aah kyaa aa.e riyaaz-e-dahr me.n ham kyaa ga.e
zindagii kii shaaKH se phuuTe khile murjhaa ga.e
maut har shaah o gadaa ke KHvaab kii taabiir hai
is sitamgar kaa sitam insaaf kii tasviir hai
silsila hastii kaa hai ik bahr-e-naa-paidaa-kanaar
aur is dariyaa-e-be-paayaa.n kii mauje.n hai.n mazaar
ai havas KHuu.n ro ki hai ye zindagii be-e'tibaar
ye sharaare kaa tabassum ye KHas-e-aatish-savaar
chaa.nd jo suurat-gar-e-hastii kaa ik ejaaz hai
pahne siimaabii qabaa mahv-e-KHiraam-e-naaz hai
charKH-e-be-anjum kii dahshatnaak vus.at me.n magar
bekasii is kii ko.ii dekhe zaraa vaqt-e-sahar
ik zaraa saa abr kaa Tuk.Daa hai jo mahtaab thaa
aaKHirii aa.nsuu Tapak jaane me.n ho jis kii fanaa
zindagii aqvaam kii bhii hai yuu.nhii be-e'tibaar
ra.ng-haa-e-rafta kii tasviir hai un kii bahaar
is ziyaa.n-KHaane me.n ko.ii millat-e-garduu.n-vaqaar
rah nahii.n saktii abad tak baar-e-dosh-e-rozgaar
is qadar qaumo.n kii barbaadii se hai KHuugar jahaa.n
dekhtaa be-e'tinaa.ii se hai ye manzar jahaa.n
ek suurat par nahii.n rahtaa kisii shai ko qaraar
zauq-e-jiddat se hai tarkiib-e-mizaaj-e-rozgaar
hai nagiin-e-dahr kii ziinat hamesha naam-e-nau
maadar-e-giitii rahii aabastan-e-aqvaam-e-nau
hai hazaaro.n qaafilo.n se aashnaa ye rahguzar
chashm-e-koh-e-nuur ne dekhe hai.n kitne taajvar
misr o baabul miT ga.e baaqii nishaa.n tak bhii nahii.n
daftar-e-hastii me.n un kii daastaa.n tak bhii nahii.n
aa dabaayaa mehr-e-iiraa.n ko ajal kii shaam ne
azmat-e-yuunaan-o-ruumaa luuT lii ayyaam ne
aah muslim bhii zamaane se yuu.nhii ruKHsat hu.aa
aasmaa.n se abr-e-aazaarii uThaa barsaa gayaa
hai rag-e-gul sub.h ke ashko.n se motii kii la.Dii
ko.ii suuraj kii kiran shabnam me.n hai uljhii hu.ii
siina-e-dariyaa shu.aa.o.n ke liye gahvaara hai
kis qadar pyaaraa lab-e-juu mehr kaa nazzaara hai
mahv-e-ziinat hai sanobar juu.ebaar-e-aa.iina hai
Guncha-e-gul ke liye baad-e-bahaar-e-aa.iina hai
na.ara-zan rahtii hai koyal baaG ke kaashaane me.n
chashm-e-insaa.n se nihaa.n patto.n ke uzlat-KHaane me.n
aur bulbul mutrib-e-ra.ngii.n navaa-e-gulsitaa.n
jis ke dam se zinda hai goyaa havaa-e-gulsitaa.n
ishq ke ha.ngaamo.n kii u.Dtii hu.ii tasviir hai
KHaama-e-qudrat kii kaisii shoKH ye tahriir hai
baaG me.n KHaamosh jalse gulsitaa.n-zaado.n ke hai.n
vaadi-e-kohsaar me.n na.are shabaa.n-zaado.n ke hai.n
zindagii se ye puraanaa KHaak-daa.n ma.amuur hai
maut me.n bhii zindagaanii kii ta.Dap mastuur hai
pattiyaa.n phuulo.n kii girtii hai.n KHizaa.n me.n is tarah
dast-e-tifl-e-KHufta se ra.ngii.n khilaune jis tarah
is nashaat-aabaad me.n go aish be-andaaza hai
ek Gam yaanii Gam-e-millat hamesha taaza hai
dil hamaare yaad-e-ahd-e-rafta se KHaalii nahii.n
apne shaaho.n ko ye ummat bhuulne vaalii nahii.n
ashk-baarii ke bahaane hai.n ye uj.De baam o dar
girya-e-paiham se biinaa hai hamaarii chashm-e-tar
dahr ko dete hai.n motii diida-e-giryaa.n ke ham
aaKHirii baadal hai.n ik guzre hu.e tuufaa.n ke ham
hai.n abhii sad-haa guhar is abr kii aaGosh me.n
barq abhii baaqii hai is ke siina-e-KHaamosh me.n
vaadi-e-gul KHaak-e-sahraa ko banaa saktaa hai ye
KHvaab se ummiid-e-dahqaa.n ko jagaa saktaa hai ye
ho chukaa go qaum kii shaan-e-jalaalii kaa zuhuur
hai magar baaqii abhii shaan-e-jamaalii kaa zuhuur

Allama Iqbal

Nazm

dorahe

kab talak KHvaabo.n se dhoka khaa.ogii
kab talak school ke bachcho.n se dil bahlaa.ogii
kab talak munnaa se shaadii ke karogii tazkire
KHvaahisho.n kii aag me.n jaltii rahogii kab talak
chhuTTiyo.n me.n kab talak har saal dillii jaa.ogii
kab talak shaadii ke har paiGaam ko Thukraa.ogii
chaa.e me.n pa.Dtaa rahegaa aur kitne din namak
band kamre me.n pa.Dhogii aur kitne din KHutuut
ye udaasii kab talak
kab talak nazme.n likhogii
ro.ogii yuu.n raat kii KHaamoshiyo.n me.n kab talak
bible me.n kab talak Dhuu.nDogii zaKHmo.n kaa ilaaj
muskuraahaT me.n chhupaa.ogii kahaa.n tak apne Gam
kab talak puuchhogii telephone par meraa mizaaj
faisla kar lo ki kis raste pe chalnaa hai tumhe.n
merii baa.nho.n me.n simaTnaa hai hamesha ke liye
yaa hamesha dard ke sho.alo.n me.n jalnaa hai tumhe.n
kab talak KHvaabo.n se dhoke khaa.ogii

Kafeel Aazar Amrohvi

Nazm

zalzala

ek shab halkii sii jumbish mujhe mahsuus hu.ii
mai.n ye samjhaa mire shaano.n ko hilaataa hai ko.ii
aa.nkh uThaa.ii to ye dekhaa ki zamii.n hiltii hai
jis jagah shai ko.ii rakkhii hai vahii.n hiltii hai
sahn-o-diivaar kii jumbish hai to dar hilte hai.n
baahar aayaa to ye dekhaa ki shajar hilte hai.n
ko.ii shai jumbish-e-paiham se nahii.n hai mahruum
ek taaqat hai pas-e-parda magar naa-maaluum
chand lamhe bhii ye naira.ngii-e-aalam na rahii
zalzala KHatm hu.aa jumbish-e-paiham na rahii
hairat-e-diid se a.ngusht-ba-dandaa.n thaa mai.n
shaahid-e-jalva-e-qahhaarii-e-yazdaa.n thaa mai.n
daf.atan ek sadaa aah-o-fuGaa.n kii aa.ii
mere allaah ye gha.Dii kis pe musiibat laa.ii
gul kiyaa zalzala-e-qahr ne kis ghar kaa charaaG
kis pe Dhaayaa ye sitam kis ko diyaa hijr kaa daaG
jaa ke nazdiik ye nazzaara-e-hirmaa.n dekhaa
ek hasiina ko ba-sad haal-e-pareshaa.n dekhaa
baizavii shakl me.n the husn ke jalve pinhaa.n
aa.nkh me.n sehr bharaa thaa magar aa.nsuu the ravaa.n
mai.n ne ghabraa ke ye puuchhaa ki ye haalat kyuu.n hai
terii hastii hadaf-e-ra.nj-o-musiibat kyuu.n hai
bolii ai shaa.er-e-ra.ngiin-tabii.at mat puuchh
roz-o-shab dil pe guzartii hai qayaamat mat puuchh
log duniyaa ko tirii mujh ko zamii.n kahte hai.n
ahl-e-zar mujh ko mohabbat me.n hasii.n kahte hai.n
mai.n unhii.n husn-parasto.n kii huu.n ta.Dpaa.ii hu.ii
tujh se kahne ko ye raaz aa.ii huu.n ghabraa.ii hu.ii
zar-parasto.n se hai.n bad-dil mirii duniyaa ke Gariib
hai.n giraftaar-e-salaasil mirii duniyaa ke Gariib
mujh se ye taaza balaa.e.n nahii.n dekhii jaatii
zaalimo.n kii ye jafaa.e.n nahii.n dekhii jaatii.n
chaahtii huu.n mire ushshaaq me.n kuchh farq na ho
muft me.n kashtii-e-ehsaas-e-vafaa Garq na ho
ek vo jis ko mayassar ho.n imaaraat-o-naqiib
ek vo jis ko na ho phuu.ns kaa chhappar bhii nasiib
saahab-e-daulat-o-zii-rutba-o-zardaar ho ek
be-navaa Gam-zada-o-bekas-o-laachaar ho ek
ek muKHtaar ho, aura.ng-e-jahaa.nbaanii kaa
ik muraqqa.a ho Gam-o-ra.nj-o-pareshaanii kaa
saKHt nafrat hai mujhe apne parastaaro.n se
chhiin lete hai.n mujhe mere talab-gaaro.n se
chiira-dastii kaa miTaa detii hai.n sab jaah-o-jalaal
haif-sad-haif ki haa.il hai Gariibo.n kaa KHayaal
ye na hote to dikhaatii mai.n qayaamat kaa samaa.n
ye na hote to miTaatii mai.n Guruur-e-insaa.n
ek karvaT me.n badal detii nizaam-e-aalam
ik ishaare hii me.n ho jaatii hai ye mahfil barham
ik tabassum se jahaa.n barq-ba-daamaa.n hotaa
na ye aaraa.ishe.n hotii.n na ye saamaa.n hotaa
har adaa puuchhtii sarmaaya-parasto.n ke mizaaj
kuchh to farmaa.iye hazrat ki hai.n kis haal me.n aaj
lakh-pati sa.nkh-patii be-sar-o-saamaa.n hote
jaan bach jaa.e bas is baat ke KHvaahaa.n hote
barsar-e-KHaak nazar aate hai.n qasr-o-aivaa.n
ashk-e-KHuunii.n se mire aur bhii uThte tuufaa.n
merii aaGosh me.n sab ahl-e-sitam aa jaate
mere bartaav se bas naak me.n dam aa jaate
ba.az ke mu.nh Gam-e-aalaam se kaale kartii
ba.az ko maut kii devii ke havaale kartii
KHuun-e-zardaar hii mazduur kii mazduurii hai
mai.n jo KHaamosh huu.n ye baa.is-e-majbuurii hai
merii aaGosh me.n jaabir bhii hai.n majbuur bhii hai.n
mere daaman hii se vaabasta ye mazduur bhii hai.n
zabt kartii huu.n jo Gam aataa hai sah jaatii huu.n
josh aataa hai magar kaa.np ke rah jaatii huu.n

Shakeel Badayuni

Nazm

tumne likkha hai

tum ne likkhaa hai mire KHat mujhe vaapas kar do
Dar ga.ii.n husn-e-dil-aavez kii rusvaa.ii se
mai.n na kahtaa thaa ki tum mujh se mohabbat na karo
yuu.n na khelo mire jazbaat kii ra.anaa.ii se
sab samajhte the hamesha mujhe jaan-e-mahfil
ab miraa haal to puuchho mirii tanhaa.ii se
tum na.ii bazm sajaa logii tumhaaraa kyaa hai
tumhe.n Dhuu.nDe.ngii kahaa.n merii sulagtii raate.n
bhuul hii jaa.ogii do chaar dino.n me.n tum to
do dha.Dakte hu.e be-taab dilo.n kii baate.n
mai.n kahaa.n jaa.uu.ngaa mahruumii-e-dil ko le kar
phuuT kar ro.e.ngii jis vaqt bharii barsaate.n
kaash kuchh pyaar kaa anjaam to sochaa hotaa
chhiin lii merii javaanii se javaanii tum ne
mai.n na kahtaa thaa ki tum mujh se mohabbat na karo
laakh samjhaayaa magar ek na maanii tum ne
tum na maano to bhalaa kaun kahe kaun sune
pyaar puujaa hai parastish hai tijaarat to nahii.n
sone chaa.ndii ke liye ishq ko Thukraa denaa
khel ho saktaa hai me.ayaar-e-mohabbat to nahii.n
tum zar-o-siim kii miizaan me.n tul saktii ho
pyaar biktaa nahii.n chaahat kaa ko.ii mol nahii.n
is se pahle ki mire ishq par ilzaam dharo
dekh lo husn kii fitrat me.n to kuchh jhol nahii.n

Prem Warbartani

Nazm

mere liye kya hai kuchh bhi nahin

ye gaa.nv kaa manzar sannaaTaa aur shaam kii dhundlii taariikii
ik shaam bahut ra.ngiin magar muflis kii nigaaho.n me.n phiikii
dhartii pe ye paanii sone kaa aakaash pe nahre.n chaa.ndii kii
ye chaa.nd ye taare ye dariyaa mere liye kyaa hai kuchh bhii nahii.n
ye shahr kii chaltii sa.Dko.n par har samt dukaane.n nuuraanii
bijlii me.n bhii jaltaa ho jaise iflaas ke patte kaa paanii
chiizo.n kii giraanii me.n shaamil Gurbat ke lahuu kii arzaanii
ye saaz ye saamaan-e-ishrat mere liye kyaa hai kuchh bhii nahii.n
raato.n ke a.ndhere me.n jagmag jagmag ye fazaa mai-KHvaano.n kii
mezo.n pe nazaare mastii ke bahkii hu.ii lai diivaano.n kii
botal kii navaa-e-kulkul me.n halkii sii KHunuk paimaano.n kii
ye shiisha ye saaqii ye sahbaa mere liye kyaa hai kuchh bhii nahii.n
sa.Dko.n pe hasiino.n kaa taa.ntaa jaaduu kaa paraa chaltaa phirtaa
saa.Dii kii lapeTuu.n se jin kii chhilke hai javaanii kii sahbaa
mastii ke qadam sambhle sambhle aa.nchal kaa siraa Dhalkaa Dhalkaa
ye husn-o-javaanii ra.ng-o-adaa mere liye kyaa hai kuchh bhii nahii.n
aa.nkho.n pe mirii ehsaas hai kyaa sabzo.n pe agar hai barnaa.ii
kyuu.n puuchhne jaa.uu.n kyaarii me.n phuulo.n kaa mizaaj-e-ra.anaa.ii
kyaa kaam hai mujh ko gulshan se kaliyaa.n ho khilii yaa murjhaa.ii
ye phuul ye shabnam sher-o-fazaa mere liye kyaa hai kuchh bhii nahii.n
collage kii ye ta.amiir-e-KHandaa.n mamnuun Gamo.n laam nahii.n
is me.n kisii muflis ke ghar ke Gamgiin pisar kaa naam nahii.n
saamaan-e-tijaarat hai ye bhii saamaan-e-mafaad-e-aam nahii.n
ye ilm ye hikmat hosh-rubaa mere liye kyaa hai kuchh bhii nahii.n
be-jaan ho jab naqsh-e-hastii tasviir-e-tamannaa kyaa bole
taaraaj ke KHuunii panje me.n tahziib kii miinaa kyaa bole
chiilo.n ke najaasat khaane me.n bechaara papiihaa kyaa bole
ye naGma ye sher-o-saaz-o-navaa mere liye kyaa hai kuchh bhii nahii.n

Nushur Wahidi

Nazm

ishq aawara-mizaj

ishq aavaara-mizaaj
vo musaafir to gayaa
na ko.ii us kii mahak hai ki jo de us kaa pata
na ko.ii naqsh-e-kaf-e-paa
na ko.ii us kaa nishaa.n
ko.ii talKHii bhii tah-e-jaam na chho.Dii us ne
zindagii baaqii hai
ek sanjiida ha.nsii
soch sii dil me.n basii
tez aa.ii hu.ii saa.ns
zehn me.n tho.De se vaqfe se khaTaktii hu.ii phaa.ns
aur dukhtaa hu.aa dil
choT thii jis pe lagii
choT vaisii to nahii.n
dard baaqii to nahii.n
laakh maane na magar
kuchh pashemaan saa dil
yuu.n badal jaane par
aap hairaan saa dil
us ko kyaa apnaa pata
ye hai insaan kaa dil
ko.ii patthar to nahii.n
jis pe miTtii nahii.n pa.D jaa.e jo ik baar lakiir

Fahmida Riaz

Nazm

jashn ka din

tunuk-mizaaj hai saaqii na ra.ng-e-mai dekho
bhare jo shiisha cha.Dhaa.o ki jashn kaa din hai

Faiz Ahmad Faiz

Nazm

KHushamad

dil KHushaamad se har ik shaKHs kaa kyaa raazii hai
aadmii jin parii o bhuut balaa raazii hai
bhaa.ii farzand bhii KHush baap chachaa raazii hai
shaad masruur Ganii shaah o gadaa raazii hai
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
apnaa matlab ho to matlab kii KHushaamad kiije
aur na ho kaam to us Dhab kii KHushaamad kiije
auliyaa ambiyaa aur rab kii KHushaamad kiije
apne maqduur Garaz sab kii KHushaamad kiije
jo KHushaamad kare KHalq us se sadaa raazii hai
haq to ye hai kii KHushaamad se KHudaa raazii hai
chaar din jis ko kiyaa jhuk ke KHushaamad se salaam
vo bhii KHush ho gayaa apnaa bhii hu.aa kaam me.n kaam
ba.De aaqil ba.De daanaa ne nikaalaa hai ye daam
KHuub dekhaa to KHushaamad hii kii aamad hai tamaam
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
bad baKHiil aur saKHii kii bhii KHushaamad kiije
aur jo shaitaan ho to us kii bhii KHushaamad kiije
gar valii ho to valii kii bhii KHushaamad kiije
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
pyaar se jo.D diye jis kii taraf haath jo aah
vahii.n KHush ho gayaa karte hii vo haatho.n pe nigaah
Gaur se ham ne jo is baat ko dekhaa vallaah
kuchh KHushaamad hii ba.Dii chiiz hai allaah allaah
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii
piine aur pahan.ne khaane kii KHushaamad kiije
hiij.De bhaa.nD zanaane kii KHushaamad kiije
mast o hushiyaar divaane kii KHushaamad kiije
bhole naadaan siyaane kii KHushaamad kiije
jau KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
aish karte hai.n vahii jin kaa KHushaamad kaa mizaaj
jo nahii.n karte vo rahte hai.n hamesha mohtaaj
haath aataa hai KHushaamad se makaa.n mulk aur taaj
kyaa hii taasiir kii is nusKHe ne paa.ii hai rivaaj
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
gar bhalaa ho to bhale kii bhii KHushaamad kiije
aur buraa ho to bure kii bhii KHushaamad kiije
paak naapaak si.De kii bhii KHushaamad kiije
kutte billii o gad.he kii bhii KHushaamad kiije
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
KHuub dekhaa to KHushaamad kii ba.Dii khetii hai
Gair kii apne hii ghar biich ye sukh detii hai
maa.n KHushaamad ke sabab chhaatii lagaa letii hai
naanii daadii bhii KHushaamad se du.aa detii hai
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
bii-bii kahtii hai miyaa.n aa tire sadqe jaa.uu.n
saas bole kahii.n mat jaa tire sadqe jaa.uu.n
KHaala kahtii hai ki kuchh khaa tire sadqe jaa.uu.n
saalii kahtii hai ki bhayyaa tire sadqe jaa.uu.n
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
aa pa.Daa hai jo KHushaamad se sarokaar use
Dhuu.nDte phirte hai.n ulfat ke KHariidaar use
aashnaa milte hai.n aur chaahe hai.n sab yaar use
apne begaane Garaz karte hai.n sab pyaar use
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
ruukhii aur roGnii aabii ko KHushaamad kiije
naan-baa.ii o kabaabii kii KHushaamad kiije
saaqii o jaam sharaabii kii KHushaamad kiije
paarsaa rind KHaraabii kii KHushaamad kiije
jo KHushaamad kare KHalq us se sadaa araazii hai
haq to ye hai ki KHushaamad se KHudaa raazii hai
jo ki karte hai.n KHushaamad vo ba.De hai.n insaa.n
jo nahii.n karte vo rahte hai.n hamesha hairaa.n
haath aate hai.n KHushaamad se hazaaro.n saamaa.n
jis ne ye baat nikaalii hai mai.n us ke qurbaa.n
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
kau.Dii paise o Take zar kii KHushaamad kiije
la.al o niilam dar o gauhar kii KHushaamad kiije
aur jo patthar ho to patthar kii KHushaamad kiije
nek o bad jitne hai.n yak-sar kii KHushaamad kiije
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
ham ne har dil kii KHushaamad kii mohabbat dekhii
pyaar iKHlaas o karam mehr muravvat dekhii
dilbaro.n me.n bhii KHushaamad hii kii ulfat dekhii
aashiqo.n mai.n bhii KHushaamad hii kii chaahat dekhii
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
paarsaa piir hai zaahid hai manaa jaatii hai
juvaariyaa chor daGaabaaz KHaraabaatii hai
maah se maahii talak chyuu.nTii hai yaa haathii hai
ye KHushaamad to miyaa.n sab ke ta.ii.n bhaatii hai
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
gar na miiThii ho to ka.Dvii bhii KHushaamad kiije
kuchh na ho paas to KHaalii bhii KHushaamad kiije
jaanii dushman ho to us kii KHushaamad kiije
sach agar puuchho to jhuuTii bhii KHushaamad kiije
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
mard o zan tifl o javaa.n KHurd o kalaa.n piir o faqiir
jitne aalam me.n hai.n mohtaaj o gadaa shaah vaziir
sab ke dil hote hai.n phande me.n KHushaamad ke asiir
to bhii vallaah ba.Dii baat ye kahtaa hai 'naziir'
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai

Nazeer Akbarabadi

Nazm

bahut qarib ho tum

mire mizaaj me.n aashuftagii sabaa kii hai
milii kalii kii adaa gul kii tamkanat tum ko
sabaa kii god me.n phir bhii sabaa se begaana
tamaam husn o haqiiqat tamaam afsaana

Ali Sardar Jafri

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now