Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "mutabarrik"

Nazm MATCHES FOR "mutabarrik"

Nazm

shahr ki galiyan charaghon se bhar gain

vo papers ke ja.ngalo.n ke shumaalii kinaare pe baiThii
niil ke paaniyo.n ko kaat rahii thii
us ne mere KHaak-aaluud chehre ko
niil kaa aa.iina dikhaayaa
ham mutabarrik tel ke namkiin charaaG hatheliyo.n pe rakhe
shahr-e-panaah kii taraf chal diye
jahaa.n devtaa
baaryaabii ke muntazir the
hamaare qadmo.n kii aahaT paa kar
muqaddas phaaTak ke sunahre kivaa.D
zamiin ke aaKHirii kinaaro.n tak khul ga.e
aur shahar kii itr-bez galiyaa.n
hamaare talve chuumne lagii.n

Jawaz Jafri
Nazm

nargis-e-mastana

apnaa hii saa ai nargis-e-mastaana banaa de
mai.n jab tujhe jaanuu.n mujhe diivaana banaa de
har qaid se har rasm se begaana banaa de
diivaana banaa de mujhe diivaana banaa de
ik barq-e-adaa KHirman-e-hastii pe giraa kar
nazro.n ko mirii tuur kaa afsaana banaa de
har dil hai tirii bazm me.n labrez-e-mai-e-ishq
ik aur bhii paimaana se paimaana banaa de
tuu saaqi-e-mai-KHaana bhii tuu nashsha o mai bhii
mai.n tishna-e-hastii mujhe mastaana banaa de
allaah ne tujh ko mai o mai-KHaana banaayaa
tuu saarii fazaa ko mai o mai-KHaana banaa de
tuu saaqi-e-mai-KHaana hai mai.n rind-e-balaa-nosh
mere liye mai-KHaane ko paimaana banaa de
yaa diida-o-dil me.n mire tuu aap samaa jaa
yaa phir dil-o-diida hii ko viiraana banaa de
qatre me.n vo dariyaa hai jo aalam ko Dubo de
zarre me.n vo sahraa hai ki diivaana banaa de
lekin mujhe har qaid-e-ta.ayyun se bachaa kar
jo chaahe vo ai nargis-e-mastaana banaa de
aalam to hai diivaana jigar! husn kii KHaatir
tuu apne liye husn ko diivaana banaa de
kab tak nigah-e-yaar na hogii mutabassim
tuu apnaa har andaaz hariifaana banaa de
munkir tuu na ban husn ke e.ajaaz-e-nazar kaa
kahne ke liye apne ko begaana banaa de
jab tak karam-e-KHaas kaa dariyaa na uma.nD aa.e
tuu aur bhii haal apnaa safiihaana banaa de
but-KHaane aa nikle to ka.aba kii binaa Daal
ka.abe me.n pahu.nch jaa.e to but-KHaana banaa de
jo mauj uThe dil se tire josh-e-talab me.n
sar rakh ke vahii.n sajda-e-shukraana banaa de
jab maa.il-e-altaaf nazar aa.e vo KHud-bii.n
tuu har nigah-e-shauq ko afsaana banaa de
kaunain bhii mil jaa.e to daaman ko na phailaa
kaunain ko bhuulaa hu.aa afsaana banaa de
phir arz kar is tarah 'jigar' shauq o adab se
bebaak agar jur.at-e-rindaana banaa de
tujh ko nigah-e-yaar! qasam mere junuu.n kii
naaseh ko bhii meraa hii saa diivaana banaa de
mai.n huu.n tire qadmo.n me.n mujhe kuchh nahii.n kahnaa
ab jo bhii tiraa lutf-e-kariimaana banaa de

Jigar Moradabadi
Nazm

nasirddin shah ke liye

ik adaakaar huu.n mai.n
mai.n adaakaar huu.n naa.n
jiinii pa.Dtii hai.n ka.ii zindagiyaa.n ek hayaatii me.n mujhe
meraa kirdaar badal jaataa hai har roz na.ii seat par
mere haalaat badal jaate hai.n
meraa chehra bhii badal jaataa hai afsaana-o-manzar ke mutaabiq
merii aadaat badal jaatii hai.n
aur phir daaG nahii.n chhuuTte pahnii hu.ii poshaako.n ke
KHasta kirdaaro.n kaa kuchh chuuraa saa rah jaataa hai tah me.n
ko.ii nokiilaa saa kirdaar guzartaa hai rago.n se to KHaraasho.n
ke nishaa.n der talak rahte hai.n dil par
zindagii se ye uThaa.e hu.e kirdaar KHayaalii bhii nahii.n hai.n ki utar
jaa.e.n vo pa.nkhe kii havaa se
siyaahii rah jaatii hai siine me.n adiibo.n ke likhe jumlo.n kii
siimii.n parde pe likhii
saa.ns letii hu.ii tahriir nazar aataa huu.n
mai.n adaakaar huu.n lekin
sirf adaakaar nahii.n
vaqt kii tasviir bhii huu.n

Gulzar
Nazm

manazir-e-sahar

vo ruuh me.n anvaar-e-KHudaa sub.h vo saadiq
vo husn jise dekh ke har aa.nkh ho aashiq
vo saadgii insaan kii fitrat ke mutaabiq
zarrii.n vo ufuq nuur se labrez vo mashriq

Josh Malihabadi
Nazm

main rakh deti hun tumhaara nam photographer

to apne naam ke mutaabiq
tum utaaro tasviiro.n me.n
apnii aa.nkhke.n, naak, ruKHsaar aur ho.nT
aur email karte raho mujhe
taaki mai.n utaartii rahuu.n
tum par se nazar-band

Tanveer Anjum
Nazm

aurat

e'tidaal-e-unsurii par paa liyaa jab iqtidaar
ain-fitrat ke mutaabiq shakl kii ik iKHtiyaar

Shaad Aarfi
Nazm

qayamat

yuu.nhii kaTtii chalii jaa.e.ngii raate.n
aur phir vo aaftaab ubhregaa
jo apnii shu.aa.o.n se abad ko raushnii baKHshegaa
phir ko.ii a.ndherii dhartii ko na chhuu paa.egaa
daanaayaan-e-maz.hab ke mutaabiq hashr aa jaa.egaa
lekin hashr bhii ik karb hai
har karb ik taKHliiq hai
ai pau phaTe ke dilrubaa lamho gavaahii do

Ahmad Nadeem Qasmi
Nazm

KHuda ki jagah Khaali hai

sha.nkar Damruu kaa mutabaadil talaash kar chukaa
gopiyaa.n ab kisii uudhau kii muhtaaj nahii.n
trunk call
un kii samasyaa.o.n kaa hal hai
izraa.iil!
atom aur helium ke haq me.n
dast-bardaar hone kii fikr me.n hai
israafiil kii jamaaliyaatii his ko jilaa mil ga.ii
ab vo kisii music-school me.n daaKHila le legaa
food-corporation kaa mutaalbaa:
'mikhail kaa retirement' maan liyaa gayaa hai
wireless-telegraphy kaa mahkama
afsar-e-aalaa ke ohde ke liye
jibra.iil kii darKHvaast par Gaur kar rahaa hai
'KHudaa kii jagah KHaalii hai'
mutamannii hazraat fauran se pesh-tar darKHvaast de.n!

Aashufta Changezi
Nazm

sarsarahaT

yahaa.n in silvaTo.n par haath rakh duu.n
ye lahre.n hai.n bahii jaatii hai.n aur mujh ko bahaatii hai.n
ye mauj-e-baada hai.n saaGar kii KHvaabiida-fazaa dil me.n
achaanak jaag uThtii hai
haqiiqat ke jahaa.n se ko.ii is duniyaa me.n dar aa.e
to us ke ho.nT mutabassim ho.n shaayad qahqaha uTh kar
mire dil ko jaka.D le apne haatho.n se
magar mai.n ye samajhtaa huu.n ki ye lahre.n abhii tak saahilii manzar se naa-vaaqif hai.n yuu.nhii ik bahaanaa kar rahii hai.n ik bahaana kis ko kahte hai.n

Meeraji
Nazm

ism-e-azam

ikkiis saal umr thii us kii bas
abhii us ne goyaa zindagii ko aa.nkh bhar ke dekhaa bhii na thaa
khelne kuudne ke din the ki zamaane kii riit ke mutaabiq
chaT ma.ngnii paT byaah ho gayaa
aur tiin saal me.n tiin bachche bhii paidaa ho ga.e
phir achaanak bechaarii ko vo biimaarii mil ga.ii
jis ke panje se ko.ii KHush-nasiib hii chhuTtaa hai
mujhe barso.n pahle gaa.nv me.n apnii chitkabrii bakrii yaad aa ga.ii
jis ne ek jholii me.n paa.nch bachche diye the
aur chand roz baa'd mar ga.ii thii
marii hu.ii bakrii ke thano.n se is ke paa.ncho.n bachche
duudh kii aaKHirii buu.nd tak nicho.D lene ke chakkar me.n
ek duusre se guttham-gutthaa ho rahe the
mai.n ne KHudaa se kahaa
Gazab ke sitam-zariif ho tum bhii
aadmii ko itnaa kamzor paidaa kiyaa hai
bakrii kaa bachcha to janm lete hii chaar Taa.ngo.n par kha.Daa ho jaataa hai
magar aadmii kaa bachcha baras-haa-baras tak yatiimo.n kii tarah sahaare Dhuu.nDhtaa phirtaa hai
aur phir tum ye sahaare bhii chhiin lete ho
chalo marhuum baap kii jagah to tum KHud pur kar lete ho
ki aasmaanii baap kahlaane kaa tumhe.n azal se shauq hai
lekin ye nau-mauluud aur nau-KHez bachcho.n ko tum maa.o.n se kis khaate me.n mahruum kar dete ho
ha.nsaa bahut ha.nsaa
mai.n kahe baGair na rah sakaa ki aafriin hai
duusre ke dukh par is tarah khile bando.n to saffaak siyaasat-daa.n bhii nahii.n ha.nste
achaanak meraa shaana jhi.njho.D kar bolaa zaraa merii taraf dekho
mujhe gumaan thaa ki to raat aur qur.aan ke auraaq se nikal kar
ek pur-jalaal mardaana paikar mere saamne hogaa
magar vahaa.n to ek harii-bharii aurat kha.Dii thii
jis kii chhaatiyo.n se duudh kii dhaare.n favvaare kii tarah phuuT rahii thii.n
qariib thaa ki mai.n Gash khaa kar gir jaataa
isii ne mujhe sambhaalaa diyaa
aur dhiire se kahaa
mai.n baap bhii huu.n aasmaano.n me.n
mai.n maa.n bhii huu.n zamiin par
dobaara us kii jaanib dekhaa
aa.nkho.n se do garm garm aa.nsuu mere chehre par Tapak pa.De
mai.n ne kahaa pahle tum ha.ns rahe the
ab tum ro rahii ho
kahaa ha.nsii aur rone kaa ek hii naam hai
zindagii
mai.n ne kahaa tumhaare mardaana naamo.n kaa to shumaar nahii.n
logo.n ko ninnaanve ke phere me.n Daal rakkhaa hai tum ne
murshido.n se ism-e-aazam puuchhte puuchhte behaal ho jaate hai.n
ab tumhaare zanaanaa naam bhii Dhuu.nDne pa.De.nge
zer-e-lab muskuraa ke kahaa
paidaa hote hii tum sab ke mu.nh par meraa ism-e-aazam aa jaataa hai
har ko.ii az-KHud pukaar uThtaa hai
maa.n
aur phir apnii maa.n kii chaahat me.n sab kii maa.n kii bhuul jaataa hai
naam bhii yaad nahii.n rahtaa us kaa

Mohammad Haneef Rame
Nazm

maulwi jannat mein

ham hai.n supply zaruurat ke mutaabiq de rahe
chaar bando.n ke liye dege.n cha.Dhaane se rahe

Syed Hashmat Sohail
Nazm

fasana-e-adam

mai.n thaa zamiir-e-mashiyyat me.n ek azm-e-jaliil
hanuuz shauq kii karvaT bhii lii na thii mai.n ne
ki daf.atan mut.harrik hu.e lab-e-taKHliiq
paka.D lii suurat-e-zaahir vajuud kii mai.n ne
vo sub.h-e-aalam-e-hairat vo jalva-zaar-e-bahisht
havaa chaman kii lagii aa.nkh khol dii mai.n ne
vo tarbiyat-gah-zauq-e-nazar, vo vaadii-e-nuur
jahaa.n se paa.ii mohabbat kii raushnii mai.n ne
vo unfuvaan-e-tamannaa vo ibtidaa-e-junuun
vo ik KHalish jise samjhaa thaa zindagii mai.n ne
kiyaa suruur ne ik aalam-e-digar paidaa
churaa ke pii jo mai-e-sarkash-e-KHudiii mai.n ne
KHudii ke nashshe me.n allaah re be-KHudii merii
badan se chaadar-e-ismat bhii phe.nk dii mai.n ne
hu.aa huduud-e-nazar se nikal ke aavaara
havaa-e-shauq me.n jannat bhii chho.D dii mai.n ne
farishte rah ga.e hairat se dekhte mujh ko
na kii qubuul mashiyyat kii rahbarii mai.n ne
daliil-e-raah banii apnii garmii-e-parvaaz
ki taaqat-e-par-e-jibriil chhiin lii mai.n ne
ba.Dhii.n sitaaro.n kii duniyaa.e.n mere lene ko
utar ke arsh se niiche nazar jo kii mai.n ne
magar zamii.n kii kashish ne suu-e-zamii.n khii.nchaa
kiyaa pasand ye zindaan-e-unsurii mai.n ne
jagah milii jo ta.Dapne kii be-qaraarii ko
to phir huduud me.n vus.at kii daad dii mai.n ne
hu.aa talaatum-e-hastii ba-aalam-e-zarraat
chhi.Dak dii KHaak-e-bayaabaa.n pe zindagii mai.n ne
numuu ke josh se saudaa-e-ra.ng-o-buu niklaa
zamii.n ke dil kii tamannaa nikaal dii mai.n ne
hu.ii.n jahaan-e-amal me.n sharii.ate.n paidaa
KHudaa ke naam pe barpaa jo kii KHudii mai.n ne
kabhii jalaa.ii a.ndhere me.n sham.a-e-ilm-o-amal
kabhii bujhaa dii hidaayat kii raushnii mai.n ne
kabhii bigaa.D ke rakh dii.n savaab kii shakle.n
kabhii badal dii haqiiqat gunaah kii mai.n ne
ba.Dhaa to rah gayaa piichhe mire zamaana-e-haal
rukaa to vaqt kii rafta rok dii mai.n ne
zamii.n pe shauq ke fitne bichhaa diye har suu
fazaa me.n nii.nd kii mastii bikher dii mai.n ne
kabhii jagaa dii qayaamat nafas kii Thokar se
uThaa ke suur-e-saraafiil-e-zindagii mai.n ne
junuu.n ke josh me.n parde nazar ke chaak kiye
naqaab noch ke fitrat kii phe.nk dii mai.n ne
qabaa-e-laila-e-tahziib chaak kar Daalii
ridaa-e-maryam-e-ismat utaar lii mai.n ne
mizaaj-e-aatish-e-sozaa.n ko kar diyaa ThanDaa
machaa dii bazm-e-anaasir me.n khalbalii mai.n ne
liyaa shahanshah-e-KHaavar se raushnii kaa KHiraaj
kiyaa asiir tabii.at ko barq kii mai.n ne
ba-inqalaab-e-tabii.at mizaaj-e-aahan ko
havaa kii garmii-e-parvaaz baKHsh dii mai.n ne
bulandiyo.n kaa tasavvur bhii rah gayaa piichhe
pahu.nch ke itnii bulandii pe saa.ns lii mai.n ne
ThiThuk ga.ii.n jo nigaahe.n qariib hujla-e-quds
pas-e-hijaab-e-adab ye sadaa sunii mai.n ne
ki ai hariif-e-mashiyyat ba-va.ada-gaah-e-azal
Thahar Thahar tirii parvaaz dekh lii mai.n ne

Jameel Mazhari
Nazm

nazm

zindagii ek KHvaab hai
mere liye mohabbat kaa taviil aur aziyyat-naak KHvaab
mai.n duniyaa ke ha.ngaamo.n se Gaafil huu.n
insaano.n kaa shor merii zaat kii sarhado.n par ruk jaataa hai
andar aanaa man.a hai
mere dil kaa darvaaza band hai
meraa ko.ii ghar nahii.n
mai.n apne paagal-pan ke registaan me.n bhaTak rahaa huu.n
mai.n apne andar safar kar rahaa huu.n
mai.n baahar nahii.n nikal saktaa
mai.n apnii KHvaahish ke mutaabiq amal nahii.n kar saktaa
mai.n barzaKH me.n huu.n
jannat aur jahannam baahar hai.n
mere liye baahar sirf ek aurat hai
duniyaa mere liye nahii.n hai
mai.n apnii tanhaa.ii me.n qaid huu.n
haqiiqat se be-KHabar aur Gaafil
ek aurat ke KHayaal me.n khoyaa hu.aa
mohabbat ke taviil aur aziyyat-naak KHvaab me.n mubtalaa
ye musalsal jaa.n-kanii kii haalat
kyaa ye zindagii hai

Zahid Dar
Nazm

tanhai ke fan mein kaamyab

apnii azlii aarzuu ke mutaabiq
mai.n bilkul aazaad ho chukii huu.n
har KHvaahish se
laalach se
KHauf se
Gam se
nafrat se
mai.n chaahuu.n to rocking chair par
sub.h se shaam kar saktii huu.n
yaa raat bhar safed kap.De par
ra.ng-bira.nge phuul kaa.Dh saktii huu.n
yaa jangal me.n itnii duur jaa saktii huu.n
ki vaapas na aa sakuu.n
yaa daa.ere me.n ghuumte hu.e
apne aap ko thakaa kar giraa saktii huu.n
kabhii na uThne ke liye

Tanveer Anjum
Nazm

KHud-kushi

ek aise sarvey ke mutaabiq
jo mere dost
apne dil ko mausuul hone vaalii
Gair-zaruurii KHabro.n ko jam.a kar ke
murattab kar rahe hai.n
shahr me.n ko.ii KHud-kushii nahii.n kar rahaa
mohabbat me.n naakaamii par finail piine vaalii la.Dkiyaa.n
aur naukrii na milne par
ba.De bhaa.ii ke licence-yaafta pistol se
KHud-kushii karne vaale la.Dke
bahut din se nazar nahii.n aa.e
dupaTTe kaa phandaa banaa kar mar jaane vaalii
be-aulaad dulhane.n
aur taviil biimaarii se ta.ng aa kar
KHud ko jalaa kar halaak karne vaale
udhe.D-umar mariiz
naapaid ho ga.e hai.n
shahr me.n ab jis ko bhii KHud-kushii karnii ho
use bahut ziyaada tag-o-dau nahii.n karnii pa.Dtii
vo baahar nikaltaa hai
aur tho.Dii der ke liye
nishaana-baazo.n vaalii yellow cab kaa
intizaar kartaa hai
yaa jab us kii sa.Dak ke dono.n taraf
KHuub firing ho rahii ho
vo bilaa-iraada balcony me.n jaa ke kha.Daa ho jaataa hai
jab log KHud-kushii karnaa chaahte hai.n
yaqiin kiijiye
kisii jinsii imtiyaaz ke baGair
ra.ng, nasl aur zabaan ke farq ko KHaatir me.n na laate hu.e
goliyaa.n har jagah
unhe.n Dhuu.nDh nikaaltii hai.n

Zeeshan Sahil
Nazm

ek awami nazm

kyaa phuul nau-biyaahataa aurat ke baalo.n
aur bachcho.n ke libaas par hii jachtaa hai
kaash
vatan kii had huduud ke ta.ayyun ke liye
phuulo.n kii kiyaariyaa.n
aahinii-taaro.n kaa mutabaadil hotii.n

Zahid Imroz
Nazm

umid

mujhe yaqii.n hai
ki tum kaun meh.ndii se
jab mere aduu kaa naam
apnii KHuubsuurat kalaa.ii par likhogii
to
meraa KHayaal aate hii
aaKHir ek din
us manhuus ke naam par
KHud hii
ba.Daa saa kaa.nTaa lagaa dogii
aur duusrii kalaa.ii par
meraa naam likh kar
use der tak chuumtii rahogii
mai.n us lamhe ke intizaar me.n
mutabaadil kalaa.iyo.n kii jaanib se mausuula
hazaaro.n dil-paziir aafrii.n
musalsal mustarad kiye jaa rahaa huu.n
kyuu.nki
duniyaa ummiid par qaa.em hai

Aziz Faisal
Nazm

ummid

parso.n ne kal ko paalaa thaa
parvaan cha.Dhaayaa kal ne aaj
aur aaj kii kokh se fardaa janm le rahaa hai
jaise zamiin ne suuraj se zindagii paa.ii thii
aur chaa.nd ko zamiin se rizq pahu.nch rahaa hai
suuraj zamiin kaa maazii aur chaa.nd us kaa mustaqbil hai
jaise jamaadaat se nabaataat se haivaanaat ke baa'd insaan paidaa ho gayaa
to zindagii kaa safar yahaa.n pahu.nch kar ruk jaa.egaa kyaa
kyaa nietzsche kaa insaan-e-baalaa ''ba-qaul-e-zardshut'' ke auraaq hii me.n dafn ho kar rah jaa.egaa
kyaa iqbaal kaa shaahiin qasr-e-sultaanii ke gumbad hii me.n baseraa kar legaa
kyaa qur.aan ke mutaabiq insaan kaa muntahaa KHudaa nahii.n
to kyaa ham KHudaa kii jaanib mahv-e-safar hai.n
aur jab ham KHudaa tak pahu.nch jaa.e.nge to kyaa zindagii kaa safar KHatm ho jaa.egaa
aur kyaa is maqaam par vaqt tham jaa.egaa taariiKH tamaam ho jaa.egii
yaa vahaa.n se ek aur jahaan shuruu.a hogaa
ek nayaa aalam ek na.ii zindagii
ek nayaa KHudaa?
vaise agar KHudaa hii ibtidaa aur KHudaa hii intihaa hai
to kyaa ibtidaa aur intihaa kii taKHsiis be-ma.anii nahii.n
jaise jab daa.era mukammal ho jaa.e to us kii ibtidaa aur intihaa dono.n miT jaatii hai.n
to kyaa haqiiqat ek kaamil daa.era hai ibtidaa aur intihaa ke baGair
agar aisaa hai to harkat kahaa.n se aa.ii
kahii.n ye daa.era phailtaa aur siku.Dtaa to nahii.n rahtaa
kyaa vaqt kaa ruKH maazii se haal se mustaqbil kii jaanib hii rahtaa hai
yaa mustaqbil se haal se maazii kii taraf bhii ho saktaa hai
kyaa insaan se haivaanaat se nabaataat se jamaadaat ko lauTnaa bhii mumkin hai
aur kyaa ab aisaa hii to nahii.n ho rahaa
zaahir hai insaan par KHudaa kaa rang to cha.Dh nahii.n rahaa
albatta haivaanii sifaat ne zaruur ghar kar liyaa hai is me.n
shahr-e-insaan se shahr-e-KHudaa kii jaanib to ham jaa nahii.n rahe
kahii.n ham qadam-ba-qadam jangal kii taraf to nahii.n palaT rahe
kyaa hamaarii maazii-parastii hame.n
haivaanaat se nabaataat se jamaadaat tak to nahii.n le jaa.egii
kyaa ham piichhe mu.D kar dekhne ke jurm me.n patthar ke ho kar to nahii.n rah jaa.e.nge
lekin kahte hai.n ki naa-umiid nahii.n honaa chaahiye ki naa-umiidii kufr hai
aaKHir jamaadaat se pahle bhii to kuchh maujuud hogaa
bha.ii, KHudaa to thaa us vaqt bhii
aur agar KHudaa hii hamaaraa muntahaa hai
to aage ba.Dh kar na sahii
piichhe mu.D kar sahii
ham use paa hii le.nge
bas iimaan mazbuut honaa chaahiye
''fanaa'' ''baqaa'' aur ''laqaa'' kii manzile.n zaruur aa.e.ngii
ham pur-ummiid hai.n

Mohammad Haneef Rame
Nazm

wo aurat thi

KHalaa kii mushkilaat apnii jagah qaa.em thii.n aur duniyaa
uja.Dtii bharbharii banjar zamiino.n kii nishaanii thii
sitaare surKH the aur chaa.nd suuraj par a.ndhero.n kaa baseraa thaa
daraKHto.n par parindo.n kii jagah viiraaniyo.n ke gho.nsle hote
zamii.n kii kokh me.n bas thuur thaa aur KHaar ugte the
havaa ko saa.ns lene me.n bahut dushvaariyaa.n hotii.n
to phir us nuur vaale ne ko.ii lauh-e-anaara bhej dii shaayad
a.ndhere raushnii pe kis tarah iimaan le aa.e
balaa.e.n kis tarah pariyo.n kii suurat me.n chalii aa.ii.n
ye kis naural suvaibaa kii KHudaa taKHliiq kar baiThaa
ye narmii dilbarii sharm-o-hayaa taKHliiq kar baiThaa
vo naural vo suvaibaa jis kii KHaatir aasmaa.n se rang utre the
vo jis ke dam se duniyaa par nazaakat kaa vajuud aayaa
KHudaa-e-KHalq ne naural se pahle hii havas taKHliiq kar dii thii
nazaakat tak havas kii dastaras taKHliiq kar dii thii
hazaaro.n saal guzre hai.n magar fitrat nahii.n badlii
nigaahe.n ab bhii bhuukii hai.n ki jaise khaa hii jaa.e.ngii
havas-zaado.n ne kaise nuur se mu.nh par malii kaalak
har ik rishta zaruurat ke mutaabiq kis liye badlaa
havas-zaado.n badan-KHoro zaraa sii sharm farmaa.o
vo naural vo suvaibaa raushnii kaa isti.aara thii
kabhii havvaa kabhii mariyam kabhii lauhe-anaara thii
vo aurat thii

Waqar Khan
Nazm

maut jo mera muqaddar thi

bahut mai.n ne is muKHtasar zindagii me.n
aziiz-o-aqaarib ke sadmaat dekhe
bahut dosto.n kii javaa.n mayyato.n ko
sisakte hu.e mai.n ne kaa.ndhaa diyaa hai
bahut mehrbaano.n kii majruuh laasho.n ke taabuut
miTTii ke mu.nh me.n utaare
magar
merii be-rahm manhuus aa.nkhe.n
ye dil-doz manzar sameTe hu.e
phir na.e zaKHm tak mundamil ho ga.ii.n
har dafa
apne ashko.n ke tuufaan ko
thapkiyaa.n de ke mai.n ne sulaa hii diyaa
aur KHud se kahaa
TuuTnaa hii sitaaro.n kii qismat me.n thaa
ye sabhii apnii qismat ke likkhe hu.e faislo.n ke mutaabiq
zamaane ko dhutkaar kar jaa rahe hai.n
magar
kal ik aisii bhii mayyat uThaa.ii
ki mai.n
jis ke jazbe kii gahraa.iyo.n ke samundar me.n
aksar utartaa rahaa thaa
mujhe yuu.n lagaa
jaise mai.n apne kaa.ndhe pe
apnaa janaaza uThaa.e hu.e huu.n
mujhe yuu.n lagaa
jaise ye maut meraa muqaddar thii
jis ko ko.ii duusraa chhiin kar le gayaa hai
mujhe yuu.n lagaa
jaise is bojh ko
jo mere zehn me.n parvarish paa rahaa thaa
ta.aaqub kii be-mehr zad se bachaa kar
kisii aise taariik goshe ke andar
chhupaane chalaa huu.n
jahaa.n raaz ko
faash hone kii kotaahiyo.n se bachaa luu.n

Saifurrahman Saifi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now