Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "naacho"

Nazm MATCHES FOR "naacho"

Nazm

hasb-e-farmaish

mai.n tujhe phuul kahuu.n aur kahuu.n bha.nvaro.n se
aa.o us phuul kaa ras chuus ke naacho-jhuumo
mai.n tujhe sham.a kahuu.n aur kahuu.n parvaano
aa.o us sham.a ke ho.nTo.n ko KHushii se chuumo

Habib Jalib
Nazm

didani

merii palko.n ko mat dekho
in kaa uThnaa in kaa jhapaknaa jism kaa naa-mahsuus amal hai
merii aa.nkho.n ko mat dekho
in kii oT me.n shaam-e-Gariibaa.n in kii aa.D me.n dasht-e-azal hai
mere chehre ko mat dekho
is me.n ko.ii vaada-e-fardaa is me.n ko.ii aaj na kal hai
ab is dariyaa tak mat aa.o jis kii lahre.n TuuT chukii hai.n
is siine se lau na lagaa.o jis kii nabze.n chhuuT chukii hai.n
ab mere qaatil ko chaaho
meraa qaatil marham marham dariyaa dariyaa saahil saahil
qaazi-e-shahr kaa maathaa chuumo
jis ke qalam me.n zahr-e-halaahal jis ke suKHan me.n lahn-e-halaahal
ab us raqs kii dhun pe naacho
jis kii giit pe luT gayaa qaazii jis kii lai par bik gayaa qaatil

Mustafa Zaidi
Nazm

guDiya ki shadi

munnii bolii pyaarii aashaa
kitnii bholii merii gu.Diyaa
achchhaa hai teraa bhii guDDaa
ho jaa.e dono.n kaa rishta
aashaa bolii gunjaa.ish hai
lekin merii farmaa.ish hai
haathii luu.ngii gho.De luu.ngii
mai.n kap.De sau jo.De luu.ngii
T.V coolar aur ik motor
sone aur chaa.ndii ke zevar
dene ho.nge moTe paise
milte hai.n seTho.n ko jaise
mehmaano.n kii KHaatir achchhii
maano jab ye baat hai pakkii
munnii kaa to jii ghabraayaa
aa.nsuu Tapke sar chakraayaa
phir vo bolii jaa.o jaa.o
Duubegii kaaGaz kii naav
laalach kaa phal jis ne khaayaa
royaa aaKHir vo pachhtaayaa
aashaa bolii tum ho paagal
naahaq hii hotii ho be-kal
baate.n hai.n ye bahkii bahkii
mere dil me.n laalach chhii-chhii
mai.n ne tum ko yuu.nhii chhe.Daa
kyuu.n Duube ulfat kaa be.Daa
terii gu.Diyaa merii gu.Diyaa
meraa guDDaa teraa guDDaa
paise kii kaisii barbaadii
shaadii hogii siidhii-saadii
laa.o jaldii sharbat laa.o
jaa.o uchhlo naacho gaa.o

Zafar Kamali
Nazm

childrens-day

naacho gaa.o jashn manaa.o
khelo kuudo mauj u.Daa.o

Faragh Rohvi
Nazm

bandar wala

Dug Dug Dug Dug kartaa aayaa
bandar vaalaa bandar laayaa
haath me.n ik moTaa saa Da.nDaa
DanDe me.n ik laal saa jhanDaa
ka.ndhe par mailaa saa jholaa
piichhe bandar bholaa bholaa
bandar ke saath ik bandariyaa
pahne hu.e ik laal ghagariyaa
kuucho.n baazaaro.n se guzartaa
chauk me.n aayaa Dug Dug kartaa
dekh ke kuchh logo.n kaa jamghaT
us ne khel jamaayaa jhaT-paT
jab logo.n ne gheraa baa.ndhaa
chhilne lagaa kaa.ndhe se kaa.ndhaa
le kar Da.nDaa rakh kar jhuulaa
bandar vaalaa ha.ns kar bolaa
naacho beTaa naacho beTaa
bandar ne bhii jism sameTaa
apne dono.n haath uThaa kar
gardan aur kuulhe maTkaa kar
jhijkaa aur na kuchh sharmaayaa
thirak thirak kar naach dikhaayaa
dekhiye ab sasuraal me.n jaanaa
aur biivii ko saath me.n laanaa
biivii pahle to sharmaa.ii
phir vo chham-chham kar aa.ii
la.Dko.n ne bandar ko sataayaa
bandar ko bhii Gussa aayaa
jhapTaa un par Da.nDaa le kar
un ko Daraayaa bhapkii de kar
kar ke tamaashe aise aise
sab logo.n se maa.nge paise
vaqt abhii thaa ThanDaa ThanDaa
chaltaa banaa le jhuulaa Da.nDaa

Mohammad Shafiuddin Nayyar
Nazm

party

ram aur jin kii KHaalii botalo
aKHbaaro.n me.n chhape hu.e be-masraf lafzo
esterpetiz-club ke phaTe puraane TickeTo
coat ke collar ke afsurda tanhaa phuulo
tab record me.n sahme sahgal ke naGmo
dostiyo.n aur dushmaniyo.n ke zinda lamho
kaa.npte ho.nTo.n par kumhlaate, moniikaa ke aaKHirii boso
gheraa Daal ke mere gird kha.De ho jaa.o
naacho gaa.o shor machaa.o
aur mire siine par thak kar so jaa.o

Saqi Faruqi
Nazm

lamha

zindagii kii nadii me.n nahaate hu.e
KHauf khaate ho tum
jab fanaa ke samundar me.n Gote lagaa.oge
tab kyaa karoge
so masnuu.ii ThanDak ke maare hu.e
murda-KHaana-numaa band da.Dbe se niklo
jiyo
aur saavan kii baarish me.n naacho
jiyo aur dekho
shumaalii pahaa.Do.n pe barfe.n pighalte hii
sabze kaa joban cha.Dhaa hai
papiihe ne aavaaz de kar
pukaaraa hai pii ko
so tum bhii pukaaro kisii ko
suno
jab tumhaare lahuu me.n jamii barf pighlegii
jharnaa bahegaa
to phir zindagii kii nadii aur fanaa kaa samundar
gale mil ke naache.nge
taaza ikaa.ii kii suurat
uTho aur is lamha-e-jaa.n-fazaa ko paka.D lo
mabaadaa ko.ii lamha-e-jaa.n-gusil tum ko paa le

Sultan Nasir
Nazm

miTTi ka git

miTTii kii ye sundar kaayaa miTTii kii hii saarii maayaa
kankar patthar sonaa chaa.ndii solah aane miTTii ke
miTTii ke sab chehre-mohre miTTii ke sab nange paa.nv
miTTii kii ye zulfe.n ghanerii sab ke shaane miTTii ke
miTTii kii nannhii sii kyaarii miTTii kii mahkii phulvaarii
miTTii ke ye phuul ye kaliyaa.n sab ke dahaane miTTii ke
miTTii ke sab khet hamaare miTTii kii pagDanDii bhii
miTTii ke hariyaale paude daane daane miTTii ke
miTTii ke sab panghaT apne miTTii kii sab sakhiyaa.n
miTTii ke chamkiile gagre kaun ye jaane miTTii ke
miTTii kii maa.n bahne.n apnii miTTii ke hai.n bachche-baale
jhuulaa jhuule.n sab miTTii kaa sab ke taraane miTTii ke
miTTii kii sii mohnii suurat miTTii kii ye apnii gu.Diyaa
miTTii ke sab dul.han duulhaa taane-baane miTTii ke
miTTii ke sab daadii daadaa miTTii ke sab naanii naanaa
miTTii ke sab aa.nkho.n vaale andhe kaane sab miTTii ke
miTTii ke sab mahal do-mahle miTTii kii chhoTii sii kuTiyaa
miTTii ke sab ye diye ye sham'e.n sab parvaane miTTii ke
miTTii kii sab galiyaa.n apnii miTTii ke sab gaa.nv hamaare
miTTii ke sab shahr base hai.n sab viiraane miTTii ke
miTTii ke sab saaqii-o-dilbar miTTii ke sab shiisha-o-saaGar
miTTii ke sab jaam-o-subuu hai.n sab paimaane miTTii ke
miTTii ke sab devtaa devii miTTii ke sab girjaa masjid
kyaa siitaa kyaa kaalii maataa sab afsaane miTTii ke
miTTii kii miiThii sii bansii miTTii kii chanchal raadhaa
miTTii se kirshan kanhaiyyaa sab ke gaane miTTii ke
miTTii kaa baazaar lagaa hai kore kore se bartan
kis kii suraahii kis kaa pyaala sab paimaane miTTii ke
miTTii ke chuulhe par naache so.ndhii roTii miTTii kii
jo kuchh chakkii chaak me.n piise daane daane miTTii ke
miTTii kii KHushbuu me.n basaa hai miTTii kaa ye zarra zarra
miTTii ko miTTii hii pukaare hiile-bahaane miTTii ke
jhan-jhan jhan-jhan jhan-jhan bajtii kau.Dii miTTii kii
khan-khan khan-khan giit sunaate aane aane miTTii ke
taak dhinnaa-dhin taak dhinnaa-dhin bolaa tabla miTTii kaa
naacho naacho naacho naacho sab raqsaane miTTii ke
dhamaa-dhamaa dhuu dhamaa-dhamaa dhuu dhamkaa miTTii kaa taa.nDav
us ke piichhe yaahuu yaahuu sab mastaane miTTii ke
dha.D-dha.D dha.D-dha.D dha.Dak rahii hai har har chhaatii miTTii kii
sarsar sarsar sarak rahe hai.n saare shaane miTTii ke
miTTii miTTii miTTii baaje baaje kuuch kaa naqqaaraa
ghar chal ghar chal ghar chal ghar chal o man-maane miTTii ke
miTTii miTTii miTTii miTTii miTTii lorii gaatii hai
so jaa so jaa so jaa so jaa o diivaane miTTii ke
miTTii kii chaadar me.n chhupe.nge qabr banegii miTTii kii

Khalilur Rahman Azmi
Nazm

sham hui to buDha tota

shaam hu.ii to buu.Dhaa totaa
bargad kii Tahnii par baiThaa
soch rahaa thaa ab kyaa hogaa
khaane ko kyaa rakkhaa hogaa
roTii halva yaad aataa thaa
chhat ka saaya yaad aataa thaa
tab vo jangal me.n chillaayaa
haa.e a.ndheraa hone aaya
aa.o bachcho khaa.o chuurii
sab kii aadhii merii puurii
chi.Diyaa.n us kii baate.n sun kar
ha.nstii thii.n shaaKHo.n me.n chhup kar
aapas me.n kahtii thii.n ai bii
kaisaa halva duudh jalebii
aazaadii ke alag maze hai.n
jangal ke apne meve hai.n
shaaKHo.n se taaza phal khaa.o
chashme ke paanii me.n nahaa.o
naacho gaa.o u.Dte jaa.o
raat me.n Tahnii par so jaa.o
khulii havaa.e.n khulii fazaa.e.n
miilo.n par phailaate jaa.e.n
ye sardii garmii barsaate.n
apne din hai.n apnii raate.n
jaltii dhuup aur ThanDaa saaya
chaa.nd sitaaro.n ka sarmaaya
jab tak jangal me.n rahnaa hai
ham is ke hai.n ye apnaa hai

Abid Hasan
Nazm

jab tota aazad hua

daa.e.n baa.e.n uupar dekhaa
ek ik par phailaa kar dekhaa
tab u.D kar diivaar pe aayaa
biibii jaan ne shor machaayaa
mu.nh khole daaman phailaa.e
bachche dau.De dau.De aa.e
daadaa aa.e pi.njraa le kar
KHaala-jaan maliida le kar
baby rotii dhotii aa.ii
chumkaaraa aavaaz lagaa.ii
aa jaa.o ab pyaare tote
mai.n to thak ga.ii rote rote
2
lekin buu.Dhaa ganjaa totaa
itnaa bholaa kaise hotaa
aazaadii se jaan chhu.Daataa
pi.njre me.n vaapas aa jaataa
u.D kar vo jangal me.n poh.nchaa
sab se uu.nchii shaaKH pe baiThaa
shaam hu.ii to buu.Dhaa totaa
bargad kii Tahnii par baiThaa
soch rahaa thaa ab kyaa hogaa
khaane ko kyaa rakkhaa hogaa
roTii halva yaad aataa thaa
chhat kaa saaya yaad aataa thaa
tab vo jangal me.n chillaayaa
haa.e a.ndheraa hone aayaa
KHaala aa.o biibii aa.o
bhuuk lagii hai chuurii laa.o
aa.o bachcho khaa.o chuurii
sab kii aadhii merii puurii
chi.Diyaa.n us kii baate.n sun kar
ha.nstii thii.n shaaKHo.n me.n chhup kar
aapas me.n kahtii thii.n ai bii
kaisaa halva duudh jalebii
aazaadii ke alag maze hai.n
jangal ke apne meve hai.n
shaaKHo.n se taaza phal khaa.o
chashme ke paanii me.n nahaa.o
naacho gaa.o u.Dte jaa.o
raat me.n Tahnii par so jaa.o
khulii havaa.e.n khulii fazaa.e.n
miilo.n par phailaate jaa.e.n
ye sardii garmii barsaate.n
apne din hai.n apnii raate.n
jaltii dhuup aur saaya saaya
chaa.nd sitaaro.n kaa sarmaaya
jab tak jangal me.n rahtaa hai
ham is ke hai.n ye apnaa hai

Hasan Abidi
Nazm

aaKHiri KHwahish

kab tak tum apnii aag me.n jalte rahoge
kab tak suunaa charaaG jaltaa rahe
kabhii tumhaare aa.ngan me.n bhii ko.ii utre
lahuu ke charaaG jalaa.e hu.e
tumhaare saayo.n se bhii pyaar kare
tum puure chaa.nd ke saath gaa.o
ghup a.ndhere me.n bhii naacho
ye tamanna bhii puurii ho
aur mai.n ye manzar
raakh ke Dher se
aur kabhii
paataal se dekhuu.n

Mazhar Mehdi
Nazm

ye meri ghazlen ye meri nazmen

jo zindagii ke na.e safar me.n
tujhe kisii vaqt yaad aa.e.n
to ek ik harf jii uThegaa
pahan ke anfaas kii qabaa.e.n
udaas tanhaa.iyo.n ke lamho.n
me.n naach uTThe.ngii ye apsaraa.e.n
mujhe tire dard ke alaava bhii
aur dukh the ye maantaa huu.n
hazaar Gam the jo zindagii kii
talaash me.n the ye jaantaa huu.n
mujhe KHabar thii ki tere aa.nchal me.n
dard kii ret chhaantaa huu.n
magar har ik baar tujh ko chhuu kar
ye ret ra.ng-e-hinaa banii hai
ye zaKHm gulzaar ban ga.e hai.n
ye aah-e-sozaa.n ghaTaa banii hai
ye dard mauj-e-sabaa hu.aa hai
ye aag dil kii sadaa banii hai
aur ab ye saarii mataa-e-hastii
ye phuul ye zaKHm sab tire hai.n
ye dukh ke nauhe ye sukh ke naGme
jo kal mire the vo ab tire hai.n
jo terii qurbat tirii judaa.ii
me.n kaT ga.e roz-o-shab tire hai.n
vo teraa shaa.ir tiraa muGannii
vo jis kii baate.n ajiib sii thii.n
vo jis ke andaaz KHusravaana the
aur adaa.e.n Gariib sii thii.n
vo jis ke jiine kii KHvaahishe.n bhii
KHud us ke apne nasiib sii thii.n
na puuchh is kaa ki vo divaana
bahut dino.n kaa uja.D chukaa hai
vo kohkan to nahii.n thaa lekin
ka.Dii chaTaano.n se la.D chukaa hai
vo thak chukaa thaa aur us kaa tesha
usii ke siine me.n ga.D chukaa hai

Ahmad Faraz
Nazm

parchhaiyan

ta.amiir ke raushan chehre par taKHriib kaa baadal phail gayaa
har gaa.nv me.n vahshat naach uThii har shahr me.n jangal phail gayaa

Sahir Ludhianvi
Nazm

aadmi-nama

duniyaa me.n paadshah hai so hai vo bhii aadmii
aur muflis-o-gadaa hai so hai vo bhii aadmii
zardaar-e-be-navaa hai so hai vo bhii aadmii
nemat jo khaa rahaa hai so hai vo bhii aadmii
Tuk.De chabaa rahaa hai so hai vo bhii aadmii
abdaal, qutub o Gaus valii-aadmii hu.e
munkir bhii aadmii hu.e aur kufr ke bhare
kyaa kyaa karishme kashf-o-karaamaat ke liye
hattaa ki apne zohd-o-riyaazat ke zor se
KHaaliq se jaa milaa hai so hai vo bhii aadmii
fir.aun ne kiyaa thaa jo da.avaa KHudaa.ii kaa
shaddaad bhii bahisht banaa kar hu.aa KHudaa
namruud bhii KHudaa hii kahaataa thaa barmalaa
ye baat hai samajhne kii aage kahuu.n mai.n kyaa
yaa.n tak jo ho chukaa hai so hai vo bhii aadmii
kul aadmii kaa husn o qubah me.n hai yaa.n zuhuur
shaitaa.n bhii aadmii hai jo kartaa hai makr-o-zor
aur haadii rahnumaa hai so hai vo bhii aadmii
masjid bhii aadmii ne banaa.ii hai yaa.n miyaa.n
bante hai.n aadmii hii imaam aur KHutba-KHvaa.n
pa.Dhte hai.n aadmii hii qur.aan aur namaaziyaa.n
aur aadmii hii un kii churaate hai.n juutiyaa.n
jo un ko taa.Dtaa hai so hai vo bhii aadmii
yaa.n aadmii pe jaan ko vaare hai aadmii
aur aadmii pe teG ko maare hai aadmii
pag.Dii bhii aadmii kii utaare hai aadmii
chillaa ke aadmii ko pukaare hai aadmii
aur sun ke dau.Dtaa hai so hai vo bhii aadmii
chaltaa hai aadmii hii musaafir ho le ke maal
aur aadmii hii maare hai phaa.nsii gale me.n Daal
yaa.n aadmii hii said hai aur aadmii hii jaal
sachchaa bhii aadmii hii nikaltaa hai mere laal
aur jhuuT kaa bharaa hai so hai vo bhii aadmii
yaa.n aadmii hii shaadii hai aur aadmii biyaah
qaazii vakiil aadmii aur aadmii gavaah
taashe bajaate aadmii chalte hai.n KHvaah-maKHvaah
dau.De hai.n aadmii hii to mash.al jalaa ke raah
aur byaahane cha.Dhaa hai so hai vo bhii aadmii
yaa.n aadmii naqiib ho bole hai baar baar
aur aadmii hii pyaade hai.n aur aadmii savaar
huqqa suraahii juutiyaa.n dau.De.n baGal me.n maar
kaa.ndhe pe rakh ke paalkii hai.n dau.Dte kahaar
aur us me.n jo pa.Daa hai so hai vo bhii aadmii
baiThe hai.n aadmii hii dukaane.n lagaa lagaa
aur aadmii hii phirte hai.n rakh sar pe khuunchaa
kahtaa hai ko.ii lo ko.ii kahtaa hai laa re laa
kis kis tarah kii beche.n hai.n chiize.n banaa banaa
aur mol le rahaa hai so hai vo aadmii
table majiire daa.ere saara.ngiyaa.n bajaa
gaate hai.n aadmii hii har ik tarah jaa-ba-jaa
ranDii bhii aadmii hii nachaate hai.n gat lagaa
aur aadmii hii naache hai.n aur dekh phir mazaa
jo naach dekhtaa hai so hai vo bhii aadmii
yaa.n aadmii hii la.al-o-javaahar me.n be-bahaa
aur aadmii hii KHaak se bad-tar hai ho gayaa
kaalaa bhii aadmii hai ki ulTaa hai juu.n tavaa
goraa bhii aadmii hai ki Tuk.Daa hai chaa.nd-saa
bad-shakl bad-numaa hai so hai vo bhii aadmii
ik aadmii hai.n jin ke ye kuchh zarq-barq hai.n
ruupe ke jin ke paa.nv hai.n sone ke farq hai.n
jhamke tamaam Garb se le taa-ba-sharq hai.n
kam-KHvaab taash shaal do-shaalo.n me.n Garq hai.n
aur chiitha.Do.n lagaa hai so hai vo bhii aadmii
hairaa.n huu.n yaaro dekho to kyaa ye svaa.ng hai
aur aadmii hii chor hai aur aapii thaang hai
hai chhiinaa jhapTii aur baa.ng taa.ng hai
dekhaa to aadmii hii yahaa.n misl-e-raa.ng hai
faulaad se ga.Dhaa hai so hai vo bhii aadmii
marne me.n aadmii hii kafan karte hai.n tayaar
nahlaa-dhulaa uThaate hai.n kaa.ndhe pe kar savaar
kalma bhii pa.Dhte jaate hai.n rote hai.n zaar-zaar
sab aadmii hii karte hai.n murde ke kaarobaar
aur vo jo mar gayaa hai so hai vo bhii aadmii
ashraaf aur kamiine se le shaah-taa-vaziir
ye aadmii hii karte hai.n sab kaar-e-dil-paziir
yaa.n aadmii muriid hai aur aadmii hii piir
achchhaa bhii aadmii hii kahaataa hai ai 'naziir'
aur sab me.n jo buraa hai so hai vo bhii aadmii

Nazeer Akbarabadi
Nazm

zauq o shauq

qalb o nazar kii zindagii dasht me.n sub.h kaa samaa.n
chashma-e-aaftaab se nuur kii naddiyaa.n ravaa.n!
husn-e-azal kii hai numuud chaak hai parda-e-vajuud
dil ke liye hazaar suud ek nigaah kaa ziyaa.n!
surKH o kabuud badliyaa.n chho.D gayaa sahaab-e-shab!
koh-e-izam ko de gayaa ra.ng-ba-ra.ng tailisaa.n!
gard se paak hai havaa barg-e-naKHiil dhul ga.e
reg-e-navaah-e-kaazima narm hai misl-e-parniyaa.n
aag bujhii hu.ii idhar, TuuTii hu.ii tanaab udhar
kyaa KHabar is maqaam se guzre hai.n kitne kaarvaa.n
aa.ii sadaa-e-jibra.iil teraa maqaam hai yahii
ahl-e-firaaq ke liye aish-e-davaam hai yahii
kis se kahuu.n ki zahr hai mere liye mai-e-hayaat
kohna hai baz-e-kaa.inaat taaza hai.n mere vaardaat!
kyaa nahii.n aur Gaznavii kaargah-e-hayaat me.n
baiThe hai.n kab se muntazir ahl-e-haram ke somnaat!
zikr-e-arab ke soz me.n, fikr-e-ajam ke saaz me.n
ne arabii mushaahidaat, ne ajamii taKHaiyyulaat
qaafilaa-e-hijaaz me.n ek husain bhii nahii.n
garche hai taab-daar abhii gesuu-e-dajla-o-furaat!
aql o dil o nigaah kaa murshid-e-avvalii.n hai ishq
ishq na ho to shar-o-dii.n butkada-e-tasavvuraat!
sidq-e-KHaliil bhii hai ishq sabr-e-husain bhii hai ishq!
ma.arka-e-vajuud me.n badr o hunain bhii hai ishq!
aaya-e-kaa.enaat kaa ma.anii-e-der-yaab tuu!
nikle tirii talaash me.n qaafila-haa-e-ra.ng-o-buu!
jalvatiyaan-e-madrasa kor-nigaah o murda-zauq
jalvatyaan-e-maikada kam-talab o tahii-kaduu!
mai.n ki mirii Gazal me.n hai aatish-e-rafta kaa suraaG
merii tamaam sarguzisht kho.e hu.o.n kii justujuu!
baad-e-sabaa kii mauj se nash-o-numaa-e-KHaar-o-KHas!
mere nafas kii mauj se nashv-o-numaa-e-aarzuu!
KHuun-e-dil o jigar se hai merii navaa kii parvarish
hai rag-e-saaz me.n ravaa.n saahib-e-saaz kaa lahuu!
fursat-e-kashmukash me.n ii.n dil be-qaraar raa
yak do shikan zyaada kun gesuu-e-taabdaar raa
lauh bhii tuu, qalam bhii tuu, teraa vajuud al-kitaab!
gumbad-e-aabgiina-ra.ng tere muhiit me.n habaab!
aalam-e-aab-o-KHaak me.n tere zuhuur se faroG
zarra-e-reg ko diyaa tuu ne tuluu-e-aaftaab!
shaukat-e-sanjar-o-saliim tere jalaal kii numuud!
faqr-e-'juned'-o-'baayaziid' teraa jamaal be-naqaab!
shauq tiraa agar na ho merii namaaz kaa imaam
meraa qayaam bhii hijaab! meraa sujuud bhii hijaab!
terii nigaah-e-naaz se dono.n muraad paa ga.e
aql, Gayaab o justujuu ishq, huzuur o iztiraab!
tiira-o-taar hai jahaa.n gardish-e-aaftaab se!
tab-e-zamaana taaza kar jalva-e-be-hijaab se!
terii nazar me.n hai.n tamaam mere guzishta roz o shab
mujh ko KHabar na thii ki hai ilm-e-naKHiil be-rutab!
taaza mire zamiir me.n ma.arka-e-kuhan hu.aa!
ishq tamaam mustafaa! aql tamaam buu-lahab!
gaah ba-hiila mii-barad, gaah ba-zor mii-kashad
ishq kii ibtidaa ajab ishq kii intihaa ajab!
aalam-e-soz-o-saaz me.n vasl se ba.Dh ke hai firaaq
vasl me.n marg-e-aarzuu! hijr me.n lazzat-e-talab!
ain-e-visaal me.n mujhe hausla-e-nazar na thaa
garche bahaana-juu rahii merii nigaah-e-be-adab!
garmii-e-aarzuu firaaq! shorish-e-haa-o-huu firaaq!
mauj kii justujuu firaaq! qatre kii aabruu firaaq!

Allama Iqbal
Nazm

tum bilkul hum jaise nikle

tum bilkul ham jaise nikle
ab tak kahaa.n chhupe the bhaa.ii
vo muurakhtaa vo ghaama.D-pan
jis me.n ham ne sadii ga.nvaa.ii
aaKHir pahu.nchii dvaar tuhaare
are badhaa.ii bahut badhaa.ii
pret dharm kaa naach rahaa hai
qaa.em hinduu raaj karoge
saare ulTe kaaj karoge
apnaa chaman taaraaj karoge
tum bhii baiThe karoge sochaa
puurii hai vaisii tayyaarii
kaun hai hinduu kaun nahii.n hai
tum bhii karoge fatvaa jaarii
hogaa kaThin yahaa.n bhii jiinaa
daa.nto.n aa jaa.egaa pasiinaa
jaisii-taisii kaTaa karegii
yahaa.n bhii sab kii saa.ns ghuTegii
bhaa.D me.n jaa.e shikshaa-vikshaa
ab jaahil-pan ke gun gaanaa
aage ga.Dhaa hai ye mat dekho
vaapas laa.o gayaa zamaana
mashq karo tum aa jaa.egaa
ulTe paa.nv chalte jaanaa
dhyaan na duujaa man me.n aa.e
bas piichhe hii nazar jamaanaa
ek jaap saa karte jaa.o
baaram-baar yahii doharaa.o
kaisaa viir mahaan thaa bhaarat
kitnaa 'aalii-shaan thaa bhaarat
phir tum log pahu.nch jaa.oge
bas parlok pahu.nch jaa.oge
ham to hai.n pahle se vahaa.n par
tum bhii samay nikaalte rahnaa
ab jis nark me.n jaa.o vahaa.n se
chiTThii-viTThii Daalte rahnaa

Fahmida Riaz
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

jugnu

vo merii maa.n mai.n kabhii jis kii piiTh par na cha.Dhaa
vo merii maa.n kabhii kuchh jis ke kaan me.n na rakhaa
vo maa.n kabhii jo mujhe kardhanii pinhaa na sakii
jo taal haath se de kar mujhe nachaa na sakii
jo mere haath se ik din davaa bhii pii na sakii
ki mujh ko zindagii dene me.n jaan hii de dii
vo maa.n na dekh sakaa zindagii me.n jis kii chaah
usii kii bhaTaktii hu.ii ruuh ko dikhaataa raah

Firaq Gorakhpuri
Nazm

roTiyan

jab aadmii ke peT me.n aatii hai.n roTiyaa.n
phuulii nahii.n badan me.n samaatii hai.n roTiyaa.n
aa.nkhe.n parii-ruKHo.n se la.Daatii hai.n roTiyaa.n
siine upar bhii haath chalaatii hai.n roTiyaa.n
jitne maze hai.n sab ye dikhaatii hai.n roTiyaa.n
roTii se jis kaa naak talak peT hai bharaa
kartaa pare hai kyaa vo uchhal kuud jaa-ba-jaa
diivaar phaa.nd kar ko.ii koThaa uchhal gayaa
ThaTThaa ha.nsii sharaab sanam saaqii is sivaa
sau sau tarah kii dhuum machaatii hai.n roTiyaa.n
jis jaa pe haa.nDii chuulhaa tavaa aur tanuur hai
KHaaliq kii qudrato.n kaa usii jaa zuhuur hai
chuulhe ke aage aa.nch jo chaltii huzuur hai
jitne hai.n nuur sab me.n yahii KHaas nuur hai
is nuur ke sabab nazar aatii hai.n roTiyaa.n
aave tave tanuur kaa jis jaa zabaa.n pe naam
yaa chakkii chuulhe ke jahaa.n gulzaar ho.n tamaam
vaa.n sar jhukaa ke kiije Da.nDvat aur salaam
is vaaste ki KHaas ye roTii ke hai.n maqaam
pahle inhii.n makaano.n me.n aatii hai.n roTiyaa.n
in roTiyo.n ke nuur se sab dil hai.n bor bor
aaTaa nahii.n hai chhalnii se chhan-chhan gire hai nuur
pe.Daa har ek us kaa hai barfii o motii chuur
hargiz kisii tarah na bujhe peT kaa tanuur
is aag ko magar ye bujhaatii hai.n roTiyaa.n
puuchhaa kasii ne ye kisii kaamil faqiir se
ye mehr-o-maah haq ne banaa.e hai.n kaahe ke
vo sun ke bolaa baabaa KHudaa tujh ko KHair de
ham to na chaa.nd samjhe.n na suuraj hai.n jaante
baabaa hame.n to ye nazar aatii hai.n roTiyaa.n
phir puuchhaa us ne kahiye ye hai dil kaa tuur kyaa
is ke mushaahide me.n hai khultaa zuhuur kyaa
vo bolaa sun ke teraa gayaa hai shu.uur kyaa
kashf-ul-quluub aur ye kashf-ul-qubuur kyaa
jitne hai.n kashf sab ye dikhaatii hai.n roTiyaa.n
roTii jab aa.ii peT me.n sau qand ghul ga.e
gulzaar phuule aa.nkho.n me.n aur aish tul ga.e
do tar nivaale peT me.n jab aa ke Dhul ga.e
chaudah tabaq ke jitne the sab bhed khul ga.e
ye kashf ye kamaal dikhaatii hai.n roTiyaa.n
roTii na peT me.n ho to phir kuchh jatan na ho
mele kii sair KHvaahish-e-baaG-o-chaman na ho
bhuuke Gariib dil kii KHudaa se lagan na ho
sach hai kahaa kasii ne ki bhuuke bhajan na ho
allaah kii bhii yaad dilaatii hai.n roTiyaa.n
ab aage jis ke maal-puu.e bhar ke thaal hai.n
puure bhagat unhe.n kaho saahab ke laal hai.n
aur jin ke aage roGnii aur shiir-maal hai.n
aarif vahii hai.n aur vahii saahab-kamaal hai.n
pakkii-pakaa.ii ab jinhe.n aatii hai.n roTiyaa.n
kap.De kisii ke laal hai.n roTii ke vaaste
lambe kisii ke baal hai.n roTii ke vaaste
baa.ndhe ko.ii rumaal hai.n roTii ke vaaste
sab kashf aur kamaal hai.n roTii ke vaaste
jitne hai.n ruup sab ye dikhaatii hai.n roTiyaa.n
roTii se naache pyaada qavaa.ed dikhaa dikhaa
asvaar naache gho.De ko kaava lagaa lagaa
ghu.nghruu ko baa.ndhe paik bhii phirtaa hai naachtaa
aur is sivaa jo Gaur se dekhaa to jaa-ba-jaa
sau sau tarah ke naach dikhaatii hai.n roTiyaa.n
roTii ke naach to hai.n sabhii KHalq me.n pa.De
kuchh bhaa.nD bhiigte ye nahii.n phirte naachte
ye ranDiyaa.n jo naache hai.n ghuu.nghaT ko mu.nh pe le
ghuu.nghaT na jaano dosto tum ziinhaar use
is parde me.n ye apne kamaatii hai.n roTiyaa.n
ashraafo.n ne jo apnii ye zaate.n chhupaa.ii hai.n
sach puuchhiye to apnii ye shaane.n ba.Dhaa.ii hai.n
kahiye unho.n kii roTiyaa.n kis kis ne khaa.ii hai.n
ashraaf sab me.n kahiye to ab naan-baa.ii hai.n
jin kii dukaa.n se har kahii.n jaatii hai.n roTiyaa.n
duniyaa me.n ab badii na kahii.n aur niko.ii hai
yaa dushmanii o dostii yaa tund-KHuu.ii hai
ko.ii kisii kaa aur kisii kaa na ko.ii hai
sab ko.ii hai usii kaa ki jis haath Do.ii hai
naukar nafar Gulaam banaatii hai.n roTiyaa.n
roTii kaa ab azal se hamaaraa to hai KHamiir
ruukhii hii roTii haq me.n hamaare hai shahd-o-shiir
yaa patlii hove moTii KHamiirii ho yaa fatiir
gehuu.n javaar baajre kii jaisii ho 'naziir'
ham ko to sab tarah kii KHush aatii hai.n roTiyaa.n

Nazeer Akbarabadi
Nazm

holi ki bahaaren

ho naach ra.ngiilii pariyo.n kaa baiThe ho.n gul-ruu ra.ng-bhare
kuchh bhiigii taane.n holii kii kuchh naaz-o-adaa ke Dha.ng-bhare
dil bhuule dekh bahaaro.n ko aur kaano.n me.n aaha.ng bhare
kuchh table kha.Dke.n ra.ng-bhare kuchh aish ke dam mu.nh-cha.ng bhare

Nazeer Akbarabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now