Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "naadiida"

Nazm MATCHES FOR "naadiida"

Nazm

visal ki KHwahish

kah bhii de ab vo sab baate.n
jo dil me.n poshiida hai.n
saare ruup dikhaa de mujh ko
jo ab tak naadiida hai.n
ek hii raat ke taare hai.n
ham dono.n us ko jaante hai.n
duurii aur majbuurii kyaa hai
us ko bhii pahchaante hai.n
kyuu.n phir dono.n mil nahii.n sakte
kyuu.n ye bandhan TuuTaa hai
yaa ko.ii khoT hai tere dil me.n
yaa meraa Gam jhuuTaa hai

Muneer Niyazi
Nazm

abhi hum KHub-surat hain

abhii ham KHuub-suurat hai.n
hamaare jism auraaq-e-KHizaanii ho ga.e hai.n
aur ridaa-e-zaKHm se aaraasta hai.n
phir bhii dekho to
hamaarii KHush-numaa.ii par ko.ii harf
aur kashiida-qaamtii me.n KHam nahii.n aayaa
hamaare ho.nT zahriilii ruto.n se kaasnii hai.n
aur chehre ratjago.n kii sho.alagii se
aabnuusii ho chuke hai.n
aur zaKHmii KHvaab
naadiida jaziiro.n kii zamii.n par
is tarah bikhre pa.De hai.n
jis tarah tuufaa.n-zada kashtii ke Tuk.Do.n ko
samundar saahilo.n par phe.nk detaa hai
lahuu kii baarishe.n
yaa KHud-kushii kii KHvaahishe.n thii.n
is aziyyat ke safar me.n
kaun saa mausam nahii.n aayaa
magar aa.nkho.n me.n nam
lahje me.n sam
ho.nTo.n pe ko.ii naGma-e-maatam nahii.n aayaa
abhii tak dil hamaare
KHanda-e-tiflaa.n kii suurat be-kuduurat hai.n
abhii ham KHuub-suurat hai.n
zamaane ho ga.e
ham kuu-e-jaanaa.n chho.D aa.e the
magar ab bhii
bahut se aashnaa naa-aashnaa hamdam
aur un kii yaad ke maanuus qaasid
aur un kii chaahato.n ke hijr-naame
duur deso.n se hamaarii or aate hai.n
gulaabii mausamo.n kii dhuup
jab naurasta sabze par qadam rakhtii hu.ii
ma.muura-e-tan me.n dar aatii hai
tuu barfaanii badan me.n
juu-e-KHuu.n aahistagii se gungunaatii hai
udaasii kaa parinda
chup ke jangal me.n
sar-e-shaaKH-e-nihaal-e-Gam chahaktaa hai
ko.ii bhuulaa hu.aa bisraa hu.aa dukh
aabla bin kar Tapaktaa hai
to yuu.n lagtaa hai
jaise harf apne
zinda aavaazo.n kii suurat hai.n
abhii ham KHuub-suurat hai.n
hamaarii KHush-numaa.ii harf-e-haq kii ruu-numaa.ii hai
usii KHaatir to ham aashufta-jaa.n
ushshaaq kii yaado.n me.n rahte hai.n
ki jo un par guzartii hai vo kahte hai.n
hamaarii harf-saazii
ab bhii mahbuub-e-jahaa.n hai
shaa.erii shoriid-gaan-e-ishq ke vird-e-zabaa.n hai
aur gulaabo.n kii tarah shaadaa.n chehre
la.al o marjaa.n kii tarah lab
sandalii.n haatho.n se
chaahat aur aqiidat kii bayaazo.n par
hamaare naam likhte hai.n
sabhii dard-aashnaa
iisaar mashrab
ham-nafas ahl-e-qafas
jab maqtalo.n kii samt jaate hai.n
hamaare bait gaate hai.n
abhii tak naaz karte hai.n sab ahl-e-qaafila
apne hudii-KHvaano.n par aashufta-kalaamo.n par
abhii ham dastaKHat karte hai.n apne qatl-naamo.n par
abhii ham aasmaano.n kii amaanat
aur zamiino.n kii zaruurat hai.n
abhii ham KHuub-suurat hai.n

Ahmad Faraz
Nazm

jugnu

ye soch soch ke aa.nkhe.n mirii bhar aatii thii.n
to jaa ke suune bichhaune pe leT rahtaa thaa
kisii se ghar me.n na raaz apne dil ke kahtaa thaa
yatiim thii mirii duniyaa, yatiim merii hayaat
yatiim shaam-o-sahar thii, yatiim the shab-o-roz
yatiim merii pa.Dhaa.ii thii mere khel yatiim
yatiim merii masarrat thii meraa Gam bhii yatiim
yatiim aa.nsu.o.n se takiya bhiig jaataa thaa
kisii se ghar me.n na kahtaa thaa apne dil kaa bhed
har ik se duur akelaa udaas rahtaa thaa
kisii shamaa.il-e-naadiida ko mai.n taktaa thaa
mai.n ek vahshat-e-be-naam se ha.Daktaa thaa

Firaq Gorakhpuri
Nazm

tajziya

mai.n tujhe chaahtaa nahii.n lekin
phir bhii jab paas tuu nahii.n hotii
KHud ko kitnaa udaas paataa huu.n
gum se apne havaas paataa huu.n
jaane kyaa dhun samaa.ii rahtii hai
ik KHamoshii sii chhaa.ii rahtii hai
dil se bhii guftuguu nahii.n hotii
mai.n tujhe chaahtaa nahii.n lekin
mai.n tujhe chaahtaa nahii.n lekin
phir bhii rah rah ke mere kaano.n me.n
guu.njtii hai tirii hasii.n aavaaz
jaise naadiida ko.ii bajtaa saaz
har sadaa naagavaar hotii hai
in sukuut-aashnaa taraano.n me.n
mai.n tujhe chaahtaa nahii.n lekin
mai.n tujhe chaahtaa nahii.n lekin
phir bhii shab kii taviil KHalvat me.n
tere auqaat sochtaa huu.n mai.n
terii har baat sochtaa huu.n mai.n
kaun se phuul tujh ko bhaate hai.n
ra.ng kyaa kyaa pasand aate hai.n
kho saa jaataa huu.n terii jannat me.n
mai.n tujhe chaahtaa nahii.n lekin
mai.n tujhe chaahtaa nahii.n lekin
phir bhii ehsaas se najaat nahii.n
sochtaa huu.n to ranj hotaa hai
dil ko jaise ko.ii Dubotaa hai
jis ko itnaa saraahtaa huu.n mai.n
jis ko is darja chaahtaa huu.n mai.n
is me.n terii sii ko.ii baat nahii.n
mai.n tujhe chaahtaa nahii.n lekin
mai.n tujhe chaahtaa nahii.n lekin
phir bhii shab kii taviil KHalvat me.n
tere auqaat sochtaa huu.n mai.n
terii har baat sochtaa huu.n mai.n
kaun se phuul tujh ko bhaate hai.n
ra.ng kyaa kyaa pasand aate hai.n
kho saa jaataa huu.n terii jannat me.n
mai.n tujhe chaahtaa nahii.n lekin
mai.n tujhe chaahtaa nahii.n lekin
phir bhii ehsaas se najaat nahii.n
sochtaa huu.n to ranj hotaa hai
dil ko jaise ko.ii Dubotaa hai
jis ko itnaa saraahtaa huu.n mai.n
jis ko is darja chaahtaa huu.n mai.n
us me.n terii sii ko.ii baat nahii.n
mai.n tujhe chaahtaa nahii.n lekin

Jan Nisar Akhtar
Nazm

sal-girah ki raat

aaj darvaaze khule rahne do
yaad kii aag dahak uTThii hai
shaayad is raat hamaare shohdaa aa jaa.e.n
aaj darvaaze khule rahne do
jaante ho kabhii tanhaa nahii.n chalte hai.n shahiid?
mai.n ne dariyaa ke kinaare jo pare dekhe hai.n
jo charaaGo.n kii lave.n dekhii.n hai.n
vo lave.n boltii thii.n zinda zabaano.n kii tarah
mai.n ne sarhad pe vo naGmaat sune hai.n ki jinhe.n
kaun gaa.egaa shahiido.n ke sivaa?
mai.n ne ho.nTo.n pe tabassum kii na.ii tez chamak dekhii hai
nuur jis kaa thaa halaavat se sharaabor
azaano.n kii tarah!
abhii sarhad se mai.n lauTaa huu.n abhii,
mai.n abhii haa.np rahaa huu.n mujhe dam lene do
raaz vo un kii nigaaho.n me.n nazar aayaa hai
jo hama-giir thaa naadiida zamaano.n kii tarah!
yaad kii aag dahak uTThii hai
sab tamannaa.o.n ke shahro.n me.n dahak uTThii hai
aaj darvaaze khule rahne do
shaayad is raat hamaare shohdaa aa jaa.e.n!
vaqt ke paa.nv ulajh jaate hai.n aavaaz kii zanjiiro.n se
un kii jhankaar se KHud vaqt jhanak uThtaa hai
naGma martaa hai kabhii, naala bhii martaa hai kabhii?
sansanaahaT kabhii jaatii hai mohabbat ke bujhe tiiro.n se?
mai.n ne dariyaa ke kinaare unhe.n yuu.n dekhaa hai
mai.n ne jis aan me.n dekhaa hai unhe.n
shaayad is raat,
is shaam hii,
darvaazo.n pe dastak de.nge!
shohdaa itne subuk-paa hai.n ki jab aa.e.nge
na kisii so.e parinde ko KHabar tak hogii
na daraKHto.n se kisii shaaKH ke girne kii sadaa guu.njegii
pha.Dpha.DaahaT kisii zambuur kii bhii kam hii sunaa.ii degii
aaj darvaaze khule rahne do!
abhii sarhad se mai.n lauTaa huu.n abhii
paar jo guzregii us kaa hame.n Gam hii kyuu.n ho?
paar kyaa guzregii ma.aluum nahii.n
ek shab jis me.n
pareshaanii-e-aalaam se ruuho.n pe giraanii taarii
ruuhe.n sunsaan yatiim
un pe hamesha kii jafaa.e.n bhaarii
buu-e-kaafuur agar baste gharo.n se jaarii
be-panaah KHauf me.n ruuyaa-e-shikasta kii fuGaa.n uTThegii
bujhtii sham.o.n kaa dhu.aa.n uTThegaa
paar jo guzregii ma.aluum nahii.n
apne darvaaze khule rahne do

Noon Meem Rashid
Nazm

KHana-abaadi

mirii aa.nkho.n me.n aa.nsuu aa ga.e naadiida aa.nkho.n ke
mire dil me.n ko.ii Gamgiin naGma sarsaraataa hai

Sahir Ludhianvi
Nazm

mrs-sala-manka

KHudaa hashr me.n ho madad-gaar meraa
ki dekhii hai.n mai.n ne mrs.-saalaa-maa.nkaa kii aa.nkhe.n
mrs.-saalaa-maa.nkaa kii aa.nkhe.n
ki jin ke ufuq hai.n junuubii samundar kii niilii rasaa.ii se aage
junuubii samundar kii niilii rasaa.ii
ki jis ke jaziire hujuum-e-sahar se daraKHshaa.n
daraKHshaa.n jaziiro.n me.n zartaab o unnaab o qurmuz parindo.n kii jaulaa.n-gahe.n
aise phailii hu.ii jaise jannat ke daamaa.n
parinde azal aur abad ke mah o saal me.n baal-afshaa.n!
KHudaa hashr me.n ho madad-gaar meraa
ki mai.n ne liye hai.n mrs.-saalaa-ma.nkaa ke ho.nTo.n ke bose
vo bose ki jin kii halaavat ke chashme
shumaalii zamiino.n ke zartaab o unnaab o qurmuz daraKHto.n
ke mad.hosh baaGo.n se aage
jahaa.n zindagii ke rasiida shaguufo.n ke siino.n
se KHvaabo.n ke ram-diida zambuur lete hai.n ras aur piite hai.n vo
ki jis ke nashe kii jilaa se
zamaano.n kii naadiida mehraab ke do kinaaro.n ke niiche
hai.n yak-baargii guu.nj uThte KHalaa o malaa ke jalaajil
jalaajil ke naGme baham aise paivast hote hai.n jaise
mrs.-saalaa-ma.nikaa ke lab mere lab se!

Noon Meem Rashid
Nazm

na-dida rifaqat mein

mahsuus ye hotaa hai
dukh jhele the jo ab tak
be-naam masaafat me.n
likhne kii mohabbat me.n
pa.Dhne kii zaruurat me.n
be-suud riyaazat thii
be-faiz ibaadat thii
jo KHvaab bhii dekhe the
in jaagtii aa.nkho.n ne
sab KHaam-KHayaalii thii
phir bhii tujhe paane kii
dil ke kisii goshe me.n
KHvaahish to bachaa lii thii
lekin tujhe paa kar bhii
aur KHud ko ga.nvaa kar bhii
is habs ke mausam kii khi.Dkii se havaa aa.ii
na phuul se KHushbuu kii ko.ii bhii sadaa aa.ii
ab nii.nd hai aa.nkho.n me.n
naa.n dil me.n vo pahlii sii taaza suKHan-aaraa.ii
naa.n lafz mire nikle
naa.n harf-o-mu.aafii kii daanish mire kaam aa.ii
naadiida rifaaqat me.n
jitnii bhii aziyyat thii
sab mere hii naam aa.ii
kuchh bhii to nahii.n vaisaa
jaisaa tujhe sochaa thaa
jitnaa tujhe chaahaa thaa

Noshi Gilani
Nazm

hum

1
bichhii hu.ii hai bisaat kab se
zamaana shaatir hai aur ham
is bisaat ke zisht-o-KHuub-KHaano.n me.n
dast-e-naadiida ke ishaaro.n pe chal rahe hai.n
bichhii hu.ii hai bisaat azal se
bichhii hu.ii hai bisaat jis kii na ibtidaa hai na intihaa hai
bisaat aisaa KHalaa hai jo vus.at-e-tasavvur se maavaraa hai
karishma-e-kaa.enaat kyaa hai
bisaat par aate jaate mohro.n kaa silsila hai
bisaat saakit hai vaqt-e-mutlaq

Zia Jalandhari
Nazm

dil mere sahra-naward-e-pir dil

naGma-dar-jaa.n raqs barpaa KHanda-bar-lab
dil tamannaa.o.n ke be-paayaa.n alaav ke qariib
dil mire sahraa-navard-e-piir dil
reg ke dil-shaad shahrii reg tuu
aur reg hii terii talab
reg kii nik.hat tire paikar me.n terii jaa.n me.n hai
reg sub.h-e-iid ke maanind zartaab-o-jaliil
reg sadiyo.n kaa jamaal
jashn-e-aadam par bichha.D kar milne vaalo.n kaa visaal
shauq ke lamhaat ke maanind aazaad-o-aziim
reg naGma-zan
ki zarre reg-zaaro.n kii vo paazeb-e-qadiim
jis pe pa.D saktaa nahii.n dast-e-la.iim
reg-e-sahraa zar-garii kii ek kii lahro.n se duur
chashma-e-makr-o-riyaa shahro.n se duur
reg shab-bedaar hai suntii hai har jaabir kii chaap
reg shab-bedaar hai nigaraa.n hai maanind-e-naqiib
dekhtii hai saaya-e-aamir kii chaap
reg har ayyaar Gaarat-gar kii maut
reg istibdaad ke tuGyaa.n ke shor-o-shar kii maut
reg jab uThtii hai u.D jaatii hai har faateh kii nii.nd
reg ke nezo.n se zaKHmii sab shahanshaaho.n ke KHvaab
reg ai sahraa kii reg
mujh ko apne jaagte zarro.n ke KHvaabo.n kii
na.ii ta.abiir de
reg ke zarro.n ubhartii sub.h tum
aa.o sahraa kii hado.n tak aa gayaa roz-e-tarab
dil mire sahraa-navard-e-piir dil
aa chuum reg
hai KHayaalo.n ke parii-zaado.n se bhii ma.asuum reg
reg-e-raqsaa.n maah-o-saal nuur tak raqsaa.n rahe
us kaa abresham mulaa.em narm-KHuu KHandaa.n rahe
dil mire sahraa-navard-e-piir dil
ye tamannaa.o.n kaa be-paayaa.n alaav
raah gum kar duu.n kii mash.al is ke lab par aa.o aa.o
tere maazii ke KHazaf rezo.n se jaagii hai ye aag
aag kii qurmuz zabaa.n par imbisaat-e-nau ke raag
dil mire sahraa-navard-e-piir dil
sargiraanii kii shab-e-rafta se jaag
kuchh sharar aaGosh sarsar me.n hai.n gum
aur kuchh ziina ba ziina sho.alo.n ke miinaar par cha.Dhte hu.e
aur kuchh tah me.n alaav kii abhii
muztarib lekin muzabzab tifl-e-kam-sin kii tarah
aag ziina aag ra.ngo.n kaa KHaziina
aag un lazzaat kaa sar-chashma hai
jis se letaa hai Gizaa ushshaaq ke dil kaa tapaak
chob-e-KHushk anguur us kii mai hai aag
sarsaraatii hai rago.n me.n iid ke din kii tarah
aag kaahin yaad se utrii hu.ii sadiyo.n kii ye afsaana-KHvaa.n
aane vaale qarnahaa kii daastaane.n lab pe hai.n
dil miraa sahraa-navard-e-piir dil sun kar javaa.n
aag aazaadii kaa dil-shaadii kaa naam
aag paidaa.ish kaa afzaa.ish kaa naam
aag ke phuulo.n me.n nasrii.n yaasman sumbul shafiiq-o-nastaran
aag aaraa.ish kaa zebaa.ish kaa naam
aag vo taqdiis dhul jaate hai.n jis se sab gunaah
aag insaano.n kii pahlii saa.ns ke maanind ik aisaa karam
umr kaa ik tuul bhii jis kaa nahii.n kaafii javaab
ye tamannaa.o.n kaa be-paayaa.n alaav gar na ho
is laq-o-daq me.n nikal aa.e.n kahii.n se bhe.Diye
is alaav ko sadaa raushan rakho
reg-e-sahraa ko bashaarat ho ki zinda hai alaav
bhe.Diyo.n kii chaap tak aatii nahii.n
aag se sahraa kaa rishta hai qadiim
aag se sahraa ke Te.Dhe re.ngne vaale
girah-aaluud zholiida daraKHt
jaagte hai.n naGma-dar-jaa.n raqs barpaa KHanda-bar-lab
aur manaa lete hai.n tanhaa.ii me.n jashn-e-maahtaab
un kii shaaKHe.n Gair-mara.ii tabl kii aavaaz par detii hai.n taal
biikH-o-bun se aane lagtii hai KHudaavandii jalaajil kii sadaa
aag se sahraa kaa rishta hai qadiim
rahravo.n sahraa-navardo.n ke liye hai rahnumaa
kaarvaano.n kaa sahaaraa bhii hai aag
aur sahraa.o.n kii tanhaa.ii ko kam kartii hai aag
aag ke chaaro.n taraf pashmiina-o-dastaar me.n lipTe hu.e
afsaana-go
jaise gird-e-chashm mizhgaa.n kaa hujuum
un ke hairat-naak dilkash tajrabo.n se
jab damak uThtii hai ret
zarra zarra bajne lagtaa hai misaal-e-saaz-e-jaa.n
gosh-bar-aavaaz rahte hai.n daraKHt
aur ha.ns dete hai.n apnii aarifaana be-niyaazii se kabhii
ye tamannaa.o.n kaa be-paayaa.n alaav gar na ho
reg apnii KHalvat-e-be-nuur-o-KHud-bii.n me.n rahe
apnii yaktaa.ii kii tahsii.n me.n rahe
is alaav ko sadaa raushan rakho
ye tamannaa.o.n kaa be-paayaa.n alaav gar na ho
asia africa pahnaa.ii kaa naam
be-kaar pahnaa.ii kaa naam
europe aur america daaraa.ii kaa naam
takraar-e-daaraa.ii kaa naam
meraa dil sahraa-navard-e-piir dil
jaag uThaa hai mashriq-o-maGrib kii aisii yak-dilii
ke kaarvaano.n kaa nayaa ruuyaa liye
yak-dilii aisii ki hogii fahm-e-insaa.n se varaa
yak-dilii aisii ki ham sab kah uThe.n
is qadar ujlat na kar
izhdihaam-e-gul na ban
kah uThe.n ham
tuu Gam-e-kul to na thii
ab lazzat-e-kul bhii na ban
roz-e-aasaa.ish kii bedardii na ban
yak-dilii ban aisaa sannaaTaa na ban
jis me.n taabistaa.n kii dopahro.n kii
be-haasil kasaalat ke sivaa kuchh bhii na ho
is jafaa-gar yak-dilii ke kaarvaa.n yuu.n aa.e.nge
dast-e-jaaduu-gar se jaise phuuT nikle ho.n tilism
ishq-e-haasil-KHez se yaa zor-e-paidaa.ii se jaise naa-gahaa.n
khul ga.e ho.n mashriq-o-maGrib ke jism
jism sadiyo.n ke aqiim
kaarvaa.n farKHanda-pai aur un kaa baar
kiisa kiisa taKHt-e-jam aur taaj-e-kai
kuuza kuuza fard kii satvat kii mai
jaama jaama roz-o-shab mehnat kaa KHai
naGma naGma hurriyat kii garm lai
saaliko firoz-baKHto aane vaale qaaflo
shahr se lauToge tum to paa.oge
ret ke sarhad pe jo ruuh-e-abad KHvaabiida thii
jaag uThii hai shikva-haa-e-nai se vo
ret kii tah me.n jo sharmiilii sahar ro.iida thii
jaag uThii hai hurriyat kii lai se vo
itnii doshiiza thii itnii mard-e-naa-diida thii sub.h
puuchh sakte the na us kii umr ham
dard se ha.nstii na thii
zarro.n kii ra.anaa.ii pe bhii ha.nstii na thii
ek mahjuubaana be-KHabarii me.n ha.ns detii thii sub.h
ab manaatii hai vo sahraa kaa jalaal
jaise izz-o-jal ke paa.nv kii yahii mehraab ho
zer-e-mehraab aa ga.ii ho us ko bedaarii kii raat
KHud janaab-e-izz-o-jal se jaise umiid-e-zafaaf
saare naa-karda gunaah is ke mu.aaf
sub.h-e-sahraa shaad-baad
ai uruus-e-izz-o-jal farKHanda ro taabinda kho
tuu ik aise hujra-e-shab se nikal kar aa.ii hai
dast-e-qaatil ne bahaayaa thaa jahaa.n har sej par
sai.nka.Do.n taaro.n kaa raKHshanda lahuu phuulo.n ke paas
sub.h-e-sahraa sar mire zaanuu pe rakh kar daastaa.n
un tamannaa ke shahiido.n kii na kah
un kii niima-ras uma.ngo.n aarzuu.o.n kii na kah
jin se milne kaa ko.ii imkaa.n nahii.n
shahd teraa jin ko nashsh-e-jaa.n nahii.n
aaj bhii kuchh duur is sahraa ke paar
dev kii diivaar ke niiche nasiim
roz-o-shab chaltii hai mub.ham KHauf se sahmii hu.ii
jis tarah shahro.n kii raaho.n par yatiim
naGma-bar-lab taaki un kii jaa.n kaa sannaaTaa ho duur
aaj bhii is reg ke zarro.n me.n hai.n
aise zarre aap hii apne Ganiim
aaj bhii is aag ke sho.alo.n me.n hai.n
vo sharar jo us kii tah me.n par-buriida rah ga.e
misl-e-harf naa-shuniida rah ga.e
sub.h-e-sahraa ai uruus-e-izz-o-jal
aa ki un kii daastaa.n dohraa.e.n ham
un kii izzat un kii azmat gaa.e.n ham
sub.h ret aur aag ham sab kaa jalaal
yak-dilii ke kaarvaa.n un kaa jamaal
aa.o
is tahliil ke halqe me.n ham mil jaa.e.n
aa.o
shaad-baaG apnii tamannaa.o.n kaa be-paayaa.n alaav

Noon Meem Rashid
Nazm

afsana-e-shahr

shahr ke shahr kaa afsaana vahii aarzuu-e-KHasta ke la.ng.Daate hu.e pair
ki hai.n aaj bhii afsaane kii duzdiida o zhuuliida lakiiro.n pe ravaa.n
un asiiro.n kii tarah jin ke rag-o-reshe kii zanjiir kii jhankaar
bhii tham jaa.e to kah uTThe.n kahaa.n
''ab kahaa.n jaa.e.nge ham
jaa.e.n ab taaza o naadiida nigaaho.n ke zamistaa.n me.n kahaa.n?''
un asiiro.n kii tarah jin ke liye vaqt kii be-sarfa salaaKHe.n
na kabhii sard na garm aur na kabhii saKHt na narm
na rihaa.ii kii paziiraa.ii na asiirii hii kii sharm

Noon Meem Rashid
Nazm

ham-zad

barq-paa lamho.n kii ik zanjiir me.n jak.Daa hu.aa
vo shikasta-paa unhii rasto.n se guzraa
aur naadiida KHudaa.o.n kaa hujuum
KHanda-zan aa.nkho.n se us kii naa-rasaa.ii kaa tamaashaa dekh
kar kahtaa rahaa
tuu ne chaahaa thaa magar tere muqaddar me.n na thaa
jaise us kii bebasii me.n vo kabhii shaamil na the

Ahmed Shamim
Nazm

tamanna ke tar

tamannaa ke zholiida taar
girah dar girah hai.n tamannaa ke naadiida taar
sitaaro.n se utre hai.n kuchh log raat
vo kahte hai.n apnii tamannaa ke zholiida taaro.n ko suljhaa.o
suljhaa.o apnii tamannaa ke zholiida taar
sitaaro.n kii kirno.n kii maanind suljhaa.o
mabaadaa sitaaro.n se barse.n vo tiir
ki rah jaa.e baaqii tamannaa na taar

Noon Meem Rashid
Nazm

dustbin

vo kaun saa mujrim dard hai
jis ko dil ke shab-KHaano.n me.n chhupaa.e
jis ke naadiida sho.alo.n se nazar jalaa.e
baiThii ho
chor zehn ke
pichhle shelf pe
tah karke mujhe mat rakkho

Saqi Faruqi
Nazm

nazm

aur phir ik din mai.n aur tum in uu.nchii niichii diivaaro.n ke jhurmuT me.n utre
jin me.n kabhii hamaarii ruuho.n ko zinda chun diyaa gayaa thaa
is vaqt aa.ngan aa.ngan me.n tirchhii kirno.n ne dhuup ke ka.ngare saayo.n kii qaasho.n me.n Taa.nk diye the
dekhaa hu.aa saa ko.ii samaa.n puraanaa us din ham ne dekhaa
yuu.n lagtaa thaa jaise aasmaano.n kii raushaniyaa.n jhuk jhuk kar us ik qarye ko dekh rahii thii.n
aur hame.n tab vo din yaad aa.e jab maut hamaarii zindagiyo.n se guzar rahii thii aisii hii sub.ho.n kii oT me.n
ham un ziina-ba-ziina mu.nDero.n ke jhurmuT me.n the
aur us shahr ke log ab bhii galiyo.n me.n KHvaa.nche lagaa.e apnii zindagiyo.n ko saj rahe the
aur phir ham ne sochaa
kaun achchhaa hai ham jo murda chehro.n se jiine kii KHvaahish paate hai.n yaa vo jo
ham ko zinda dekh ke hamaarii maut ko maan lete hai.n
abhii abhii to mere saath saath the ham use guzre hu.e zamaano.n ke KHayaalo phir kab lauToge
ik din phir bhii tumhaare saath is KHaak ke taKHte tak jaa.uu.ngaa
jis se Dhake hu.e be-nuur ga.Dho.n me.n
kuchh naadiida aa.nkhe.n ham ko dekh ke ab bhii ha.ns ha.ns uThtii nazar aatii hai.n

Majeed Amjad
Nazm

inna lillahi o inna ileihi rajeun

ye haqiiqat thii ki ko.ii vaahima thaa
par ye badbuu-daar laasha
sirf mujh ko hii nazar aataa thaa, jaise
ek naadiida chhalaavaa ho mire piichhe lagaa ho
mere kumbe ke sabhii afraad us kii
har jagah maujuudgii se be-KHabar the
sirf mai.n hii thaa jise ye
TikTikii baa.ndhe hu.e be-nuur aa.nkho.n se hamesha ghuurtaa thaa

Satyapal Anand
Nazm

mirza-ghaalib

aah KHaak-e-hind me.n tuu der se KHvaabiida hai
ziinat-e-har-bazm teraa jalva-e-naa-diida hai
tere Gam me.n aaj bhii jaan-e-suKHan kaahiida hai
hai tasarruf teraa paidaa aur tuu poshiida hai
soz teraa aag ban kar bazm par chhaa jaa.egaa
saaz-e-hastii hashr tak tere hii naGme gaa.egaa

Mohammad Sadiq Zia
Nazm

ek umr ki der

aa.nsu.o.n se miraa aa.iina-e-Gam dhundlaayaa
ek sardaaba-e-dauraa.n me.n jo poshiida-o-naadiida rahii thii
ab tak
is tan-e-zaar ko... vo zindagii hii bhuul ga.ii
dil se lipTii hu.ii yak-ra.ng udaasii ke sabab
ra.ng-o-raamish me.n basii zinda-dilii bhuul ga.ii
par tirii shakl bhulaane me.n mujhe der lagii
puurii ik umr kii der

Sameena Raja
Nazm

mazafat

in gharo.n ke aa.ngan me.n
dopahar utartii hai
ek nannhii suu.ii kii
aa.nkh ke jharoke se
ik kiran ke mokhe se
dhuup ke hinaa.ii haath
tashtarii ba.Dhaate hai.n
chaahato.n ke miiThe rang
zaa.iqo.n ke naadiida
lams chho.D jaate hai.n

Ishrat Afreen
Nazm

ism-e-ab

jo tuu tasviir kartaa hai
jo mai.n tahriir kartaa huu.n
na teraa hai na meraa hai
magar apnaa hai ye jab tak
ise pa.Dhne me.n kitnii der lagtii hai
abhii maahaul ko chaaro.n taraf se
habs ke sahraa ne gheraa hai
magar kab tak
havaa chalne me.n kitnii der lagtii hai
ko.ii zanjiir hai shaayad hamaare paa.nv me.n
aur raah me.n kaafii a.ndheraa hai
magar kab tak
diyaa jalne me.n kitnii der lagtii hai
havaa.e.n baadbaano.n se ulajhtii aur kahii.n naaqa-savaaro.n ko
ko.ii paiGaam detii shaam ke aa.nchal ko thaame
saahilo.n kii samt aatii hai.n
parinde daa.ero.n me.n u.Dte phirte
abr kii chaadar me.n lipTe
rang barsaate
fazaa.o.n me.n safar kii daastaa.n likhte
Thikaano.n kii taraf jaate hu.e
manzar ko apne aks me.n tabdiil karte hai.n
achaanak sar-phirii mauje.n
mujhe chhuu kar guzar jaatii hai.n
aur mai.n apne talvo.n se nikaltii sansanaatii riit kii sargoshiyaa.n
mahsuus kartaa huu.n
vahii mai.n huu.n vahii asbaab-e-vahshat hai.n vahii saahil
vahii tuu hai vahii ha.nstii hu.ii aa.nkhe.n
tirii aa.nkho.n me.n rango.n aur KHvaabo.n ke jaziire
jagmagaate hai.n
sar-e-mizhgaa.n rupahlii saa.ato.n ke isti.aare muskuraate hai.n
ha.nsii mahtaab bantii hai
phir is mahtaab ke chaaro.n taraf aavaaz kaa haala ubhartaa hai
aur is haale me.n terii u.ngliyaa.n
naadiida manzar ko tilism-e-KHvaab se aazaad kartii hai.n
tire haatho.n kii jumbish
dhuup chhaa.nv se dhanak tartiib de kar
KHaalii tasviiro.n me.n KHadd-o-KHaal ko aabaad kartii hai
tirii palke.n jhapaktii hai.n
sitaare se sitaara aan miltaa hai
ki jaise shaam hote hii
subuk aasaar lahro.n me.n
kinaare se kinaara aan miltaa hai
ye jo kuchh hai
bahut hii KHuubsuurat hai
magar us ke liye hai
jo ye sab mahsuus kartaa hai
tujhe maaluum bhii ho jaa.e to kyaa farq pa.Dtaa hai
abhii din kaa thakaa haaraa musaafir dhuup ke KHeme sameTe
duur paanii me.n utarne ke liye
be-taab hai dekho
ye niilaa aasmaa.n
apnii garaa.n KHvaabii me.n KHud Garqaab hai dekho
na jaane kyo.n
samundar dekhne vaalo.n ko
suuraj Duubne kaa KHauf rahtaa hai
ko.ii hai jis ko ism-e-aab aataa ho
kinaaro.n kii tarah har lamha kaT girtaa ho
zer-e-aab aataa ho
samundar aasmaa.n kii raahdaarii hai
magar is raahdaarii tak pahu.nchne kaa ko.ii rasta
ba.Dii mushkil se miltaa hai
ye ism-e-aab
saahil par kha.De nazzaara۔biino.n kii samajh me.n kis tarah aa.e
ki ye to Duubne vaalo.n pe bhii
mushkil se khultaa hai
magar kab tak
ise khulne me.n kitnii der lagtii hai

Saleem Kausar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now