Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "paataal"

Nazm MATCHES FOR "paataal"

Nazm

bahut dinon baad

bahut dino.n ba.ad
tere KHat ke udaas lafzo.n ne
terii chaahat ke zaa.iqo.n kii tamaam KHushbuu
mirii rago.n me.n u.nDel dii hai
bahut dino.n ba.ad
terii baate.n
tirii mulaaqaat kii dhanak se dahaktii raate.n
ujaa.D aa.nkho.n ke pyaas paataal kii taho.n me.n
visaal-va.ado.n kii chand chi.ngaariyo.n ko saa.nso.n kii aa.nch de kar
shariir sho.alo.n kii sar-kashii ke tamaam tevar
sikhaa ga.ii hai.n
tire mahakte mahiin lafzo.n kii aabshaare.n
bahut dino.n baa'd phir se
mujh ko rulaa ga.ii hai.n
bahut dino.n ba.ad
mai.n ne sochaa to yaad aayaa
ki mere andar kii raakh ke Dher par abhii tak
tire zamaane likhe hu.e hai.n
sabhii fasaane likhe hu.e hai.n
bahut dino.n ba.ad
mai.n ne sochaa to yaad aayaa
ki terii yaado.n kii kirchiyaa.n
mujh se kho ga.ii hai.n
tire badan kii tamaam KHushbuu
bikhar ga.ii hai
tire zamaane kii chaahatii.n
sab nishaaniyaa.n
sab sharaarte.n
sab hikaayate.n sab shikaayate.n jo kabhii hunar me.n
KHayaal thii.n KHvaab ho ga.ii hai.n
bahut dino.n ba.ad
mai.n ne sochaa to yaad aayaa
ki mai.n bhii kitnaa badal gayaa huu.n
bichha.D ke tujh se
ka.ii lakiiro.n me.n Dhal gayaa huu.n
mai.n apne cigarette ke be-iraada dhu.e.n kii suurat
havaa me.n tahliil ho gayaa huu.n
na Dhuu.nDh merii vafaa ke naqsh-e-qadam ke reze
ki mai.n to terii talaash ke be-kanaar sahraa me.n
vahm ke be-amaa.n baguulo.n ke vaar sah kar
udaas rah kar
na-jaane kis rah me.n kho gayaa huu.n
bichha.D ke tujh se tirii tarah kyaa bataa.uu.n mai.n bhii
na jaane kis kis kaa ho gayaa huu.n
bahut dino.n ba.ad
mai.n ne sochaa to yaad aayaa

Mohsin Naqvi
Nazm

zabanon ka bosa

zabaano.n ke ras me.n ye kaisii mahak hai
ye bosa ki jis se mohabbat kii sahbaa kii u.Dtii hai KHushbuu
ye bad-mast KHushbuu jo gahraa Gunuuda nasha laa rahii hai
ye kaisaa nasha hai
mere zehn ke reze reze me.n ek aa.nkh sii khul ga.ii hai
tum apnii zabaa.n mere mu.nh me.n rakhe jaise paataal se merii jaa.n khii.nchte ho
ye bhiigaa hu.aa garm o taariik bosa
amaavas kii kaalii barastii hu.ii raat jaise umaDtii chalii aa rahii hai
kahii.n ko.ii saa.at azal se ramiida
mirii ruuh ke dasht me.n u.D rahii thii
vo saa.at qarii.n-tar chalii aa rahii hai
mujhe aisaa lagtaa hai
taariikiyo.n ke
larazte hu.e pul ko
mai.n paar kartii chalii jaa rahii huu.n
ye pul KHatm hone ko hai
aur ab
us ke aage
kahii.n raushnii hai

Fahmida Riaz
Nazm

daraKHt mere dost

daraKHt! mere dost
tum mil jaate ho kisii na kisii mo.D par
aur aasaan kar dete ho safar
tumhaare pair kii u.ngliyaa.n
jamii rahii.n paataal ke bhedo.n par
qaa.em rahe mere dost
tumhaare tane kii mataanat aur quvvat
dhuup aur baarish tumhe.n apne tohfo.n se navaaztii rahe
tum bahut pur-vaqaar aur saada ho
mere thaile ko jaan.naa chaahte ho
zaruur.... ye lo mai.n ise kholtaa huu.n
roTiyaa.n du.aa.e.n aur nazme.n
mere paas is se ziyaada kuchh nahii.n
ek shaa.er ke paas is se ziyaada kuchh nahii.n hotaa
dost dukh denaa tum ne siikhaa hii nahii.n
tum ne na to mujh se shaa.erii kaa matlab puuchhaa
aur na kabhii mere mutaale.e par shak kiyaa
aisaa hii honaa chaahiye dosto.n ko
agar mere paas ik aur zindagii hotii to
to mai.n apnii pahlii zindagii tumhaarii ja.Do.n par guzaar detaa
magar mai.n ghar se KHaandaan bhar KHushiyo.n ke liye niklaa huu.n
aur vahaa.n meraa intizaar kiyaa jaa rahaa hai
tum ne mere dost
haa.n tum ne
bahut kuchh sikhaayaa hai mujhe
maslan zamiin aur aasmaanii bijlii
aur havaa
aur intizaar
aur duusro.n ke liye zinda rahnaa
bahut qiimtii hai.n ye baate.n
mai.n kyaa de saktaa huu.n is fayyaazii kaa javaab
mere paas tumhaare liye
ek roTii aur du.aa hai
roTii: tumhaarii chiyuu.nTiyo.n ke liye
du.aa tumhaare aaKHirii din ke liye
mujhe ma.aluum hai tum ne kulhaa.Dii ke musaafahe
aur aarii kii ha.nsii se kabhii KHauf nahii.n khaayaa
magar tum rok nahii.n sakte inhe.n
ko.ii bhii nahii.n rok saktaa
KHudaa kare
KHudaa kare tumhaarii shaaKHo.n se ek jho.npa.Dii banaa.ii jaa.e
baazu.o.n ke ghere me.n na aane vaale tumhaare
tane kii lak.Dii
bahut kaafii hai
do pahiyo.n aur ek kashtii ke liye
dost: ham phir mile.nge
musaafir aur chhak.Daa
musaafir aur kashtii
kahii.n na kahii.n ham phir ek saath ho.nge
kahii.n na kahii.n
ek saath.... ham saamnaa kare.nge
havaa kaa aur raasto.n kaa
masarrat aur maut kaa....

Sarvat Husain
Nazm

tasalsul

kab se sunsaan KHaraabo.n me.n pa.Daa thaa ye jahaa.n
kab se KHvaabiida the is vaadii-e-KHaaraa ke sanam
kis ko ma.aluum ye sadiyo.n ke pur-asraar bharam
kaun jaane ki ye patthar bhii kabhii the insaa.n
sirf lab-doKHt parbat hai.n jahaa.n nauha-kunaa.n
na dar-o-baam na diivaar o dariicha ko.ii
ko.ii dahliiz-e-shikasta na hariim-e-viiraa.n
shahr ke shahr hai.n paataal ke daaman me.n nihaa.n
kaun pahchaantaa zulmat hai.n siyaahii ke nishaa.n
jo nazar Dhuu.nDne uTThii vo nazar bhii kho.ii
chashm-e-mahtaab bhii shabnam kii jagah KHuu.n ro.ii

Ahmad Faraz
Nazm

guman ka mumkin- jo tu hai main hun

ye jhiil vo hai ki jis ke uupar
hazaaro.n insaa.n
ufuq ke mutavaazii chal rahe hai.n
ufuq ke mutavaazii chalne vaalo.n ko paar laatii hai.n
vaqt lahre.n
jinhe.n tamannaa, magar, samaavii KHiraam kii ho
inhii ko paataal zamzamo.n kii sadaa sunaatii hai.n
vaqt lahre.n
unhe.n Dubotii hai.n vaqt lahre.n!
tamaam mallaah us sadaa se sadaa hiraasaa.n, sadaa gurezaa.n
ki jhiil me.n ik umuud kaa chor chhup ke baiThaa hai
us ke gesuu ufuq kii chhat se laTak rahe hai.n
pukaartaa hai: ''ab aa.o, aa.o!
azal se mai.n muntazir tumhaaraa
mai.n gumbado.n ke tamaam raazo.n ko jaantaa huu.n
daraKHt miinaar burj ziine mire hii saathii
mire hii mutavaazii chal rahe hai.n
mai.n har havaa.ii-jahaaz kaa aaKHirii baseraa
samundaro.n par jahaaz-raano.n kaa mai.n kinaaraa
ab aa.o, aa.o!
tumhaare jaise ka.ii fasaano.n ko mai.n ne un ke
abad ke aaGosh me.n utaaraa''
tamaam mallaah is kii aavaaz se gurezaa.n
ufuq kii shaah-raah-e-mubtazil par tamaam sahme hu.e KHiraamaa.n
magar samaavii KHiraam vaale
jo past o baalaa ke aastaa.n par jame hu.e hai.n
umuud ke is tanaab hii se utar rahe hai.n
isii ko thaame hu.e bulandii pe cha.Dh rahe hai.n!

Noon Meem Rashid
Nazm

meri udasi ka zard mausam

mirii udaasii kaa zard mausam
agar kisii din
mirii bujhii aa.nkh ke kinaare
bhigo bhigo kar
anaa ke paataal kii kisii tah me.n
ek pal ko Thahar gayaa to
mujhe yaqii.n hai
ki TuuTte dil me.n KHvaahisho.n kaa
ko.ii chhanaakaa
miraa badan bhii na sun le

Mohsin Naqvi
Nazm

visaliya

jaage vo lahuu me.n silsile phir
tan man ke vahii the zaa.iqe phir
tham tham ke baras baras ga.e phir
paataal tak ho ga.e hare phir

Obaidullah Aleem
Nazm

hashr ki subh daraKHshan ho maqam-e-mahmud

raat daa.Dhii ke a.ndhere se takalluf barte
arsh ke saamne rusvaa.ii kii gardan na uThe
izn-e-sajda pe kamar taKHta na ho jaa.e kahii.n
khokhle lafzo.n me.n lohaa to nahii.n bhar sakte
saika.Do.n saal kii tabliiG ke chaaliis samar
kashtii ban jaa.e to tannuur se paanii uble
saalhaa-saal se aaraam natiija matluub
tiin-sau-saaTh sanam KHaana-e-ka.aba se chale
reg-zaaro.n me.n Gubaar aur khajuurii saa.e
uu.nT kii aa.nkh me.n tash.hiir hu.aa dard-e-safar
ko.ii 'hi.nda' se kahe daa.nt kahaa.n hai.n tere
fat.h-e-makka se magar log hidaayat paa.e.n
KHuun jam jaa.e jo naalain me.n chalte chalte
arsh kii aa.nkh se rahmat kaa samundar uble
jibra.iil apnii hai.at me.n hai.n numaa.ish-manzar
paa.nv paataal me.n sar charKH se Takraa.e kahii.n
par jo khole to har ik samt pe parde laTke.n
aur jaltaa hu.aa suuraj abhii kho jaa.e kahii.n
qaafila aayaa hai 'buu-bakr' se mansuub magar
maal taqsiim hu.aa daaman-e-haajat-ma.nda.n
nuur ka.ndhe pe uThaa.e shab-e-hijrat ke safiir
Gaar me.n saath rahe paas hii paivand hu.e
masjid-e-nabvii me.n ambaar-e-Ganiimat raushan
log rote hu.e nikle hai.n pareshaa.n-manzar
raushnii pahu.nchii 'abuu-jahl' kii diivaaro.n tak
ghar kii taariikii me.n rasta na bane biinaa.ii
pe.D ke saa.e kii pahchaan yahuudii raahib
ruk gayaa aab-e-ravaa.n beva ke darvaaze par
dast-e-zohraa me.n nishaanaat ayaa.n chakkii se
ilm ke baab 'alii' umr me.n sab se chhoTe
chaa.nd kaa naam tire chaak-garebaano.n me.n
mubtadii Dhuu.nDte hai.n masjid-e-aqsaa me.n imaam
sidrat-ul-muntahaa jibriil ijaazat maa.nge
kaun thaa kis ne pukaaraa ki chale bhii aa.o
kaun maujuud thaa pahle se vahaa.n kaun gayaa
kaun suntaa thaa vahaa.n kis ne pukaaraa kis ko
kis kii aavaaz kii tanviir se aalim chamke
sar-bulandii thii muqaddar me.n qalam se pahle
bakriyaa.n kaun 'haliima' kii charaane jaa.e
'aamina' batn se iz.haar hai aadam kaa uruuj
mujtam.a kis ne kiyaa logo.n ko parbat ke qariib
kis ne lalkaaraa zalaalat ko musalsal tanhaa
jau kii roTii kabhii mil jaa.e kabhii faaqa-kashii
bhuuk se peT pe patthar kabhii baa.ndhe kis ne
tiin-sau-terah kii ta.adaad hai kis gintii me.n
fikr pe daa.era-kun KHandaqe.n khodii jaa.e.n
duur kii dhuup me.n hai faisla-kun rah-e-tabuuk
'ha.nzala' saamne aa jaa.e.n jo chhaT jaa.e Gubaar
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
ko.ii pardesii hai KHeme pe pareshaa.n-surat
aur 'faaruuq' chale biivii ko ham-raah liye
faasle to.D kar aavaaz ke saa.e phaile
haakim-e-vaqt kaa kurtaa ka.ii paivand lagaa
bakriyaa.n jis se sambhaalii nahii.n jaatii.n thii.n kabhii
nisf duniyaa pe KHilaafat ke alam lahraa.e
yaad hai saahibo KHaibar ko ukhaa.Daa kis ne
kis kii talvaar thii aa.iina zamaane ke liye
kis ne zarKHez shujaa.at ke sitaare bo.e
jaan dii jaavedaa.n lamhaat tilaavat mashGuul
KHuun ke dhabbe hai.n qur.aan pe taabinda nazar

Adil Mansuri
Nazm

saDak

sa.Dak masaafat kii ujlato.n me.n
ghire hu.e sab musaafiro.n ko
ba-Gaur fursat se dekhtii hai
kisii ke chehre pe surKH vahshat chamak rahii hai
kisii ke chehre se zard hairat chhalak rahii hai
kisii kii aa.nkhe.n harii-bharii hai.n
kabiir had se ubhar rahaa hai
saGiir qad se guzar rahaa hai
kisii kaa tyre kisii ke pahiye ko khaa rahaa hai
kisii kaa juutaa kisii kii chappal chabaa rahaa hai
kisii ke pairo.n me.n aa rahaa hai kisii kaa bachcha
kisii kaa bachcha kisii ke shaane pe jaa rahaa hai
ko.ii Thikaane pe ko.ii khaane pe jaa rahaa hai
habiib dast-e-raqiib thaame
Gariib-KHaane pe jaa rahaa hai
amiir pi.njra banaa rahaa hai
Gulaam kartab dikhaa rahaa hai
aur apne beTe ke saath chhat par
amiin kunDaa lagaa rahaa hai
nizaam Taa.nga chalaa rahaa hai
kisii kalaa.ii pe jagmagaatii hu.ii gha.Dii hai
magar abhii vo rukii hu.ii hai
kisii ke chehre pe baara bajne me.n paa.nch second rah ga.e hai.n
kisii kii haathii-numaa prado
sa.Dak se aise guzar rahii hai
sivaa.e is ke kahii.n bhii jaise ko.ii nahii.n ho
kisii kii mo.nchhe.n jhukii hu.ii hai.n
kisii kii baa.nchhe.n khilii hu.ii hai.n
kisii kii taxi kisii kii foksii milii hu.ii hai.n
kisii ke lab aur kisii kii aa.nkhe.n silii hu.ii hai.n
kisii ke kap.De phaTe hu.e hai.n
kisii kii pag.Dii chamak rahii hai
kisii kii ra.ngat kisii kii Topii u.Dii hu.ii hai
shariif nazre.n uThaa uThaa kar
kamaan jismo.n pe apnii vahshat ke tiir kab se chalaa rahaa hai
naziir nazre.n churaa rahaa hai
nafiis apne cluff kii shikno.n ko ro rahaa hai
hakiim apne matab ke shiisho.n ko dho rahaa hai
kisii kii aa.nkho.n ke dhu.ndle shiisho.n me.n us ke maazii kii jhalkiyaa.n hai.n
kisii kii aa.nkho.n me.n aane vaale hasiin lamho.n kii mastiyaa.n hai.n
kisii kii aa.nkho.n me.n rat-jago.n kii kuchh arGavaanii sii Doriyaa.n hai.n
kisii ke kaa.ndhe pe us ke KHvaabo.n kii boriyaa.n hai.n
kabaa.D-KHaane pe baasii Tuk.Do.n kii or kitaabo.n kii boriyaa.n hai.n
buzurg bargad ke niiche buu.Dhaa kha.Daa hu.aa hai
aur us ke haatho.n me.n tape lipTii hu.ii chha.Dii hai
police kii gaa.Dii pikiT lagaa kar
sa.Dak pe tirchhii kha.Dii hu.ii hai
aur ek mazduur apnaa daaman uThaa.e be-bas kha.Daa hu.aa hai
aur ik sipaahii ki us ke nefe me.n u.ngliyo.n ko ghumaa rahaa hai
vahii.n pe shaahid siyaah chashma lagaa ke KHud ko chhupaa rahaa hai
news channel kii chhoTii gaa.Dii ba.Dii KHabar kii talaash me.n hai
do sabzii vaale bhii apnii pherii lagaa rahe hai.n
to phuul vaale ke sar pe phuulo.n kii Tokarii hai
kisii kii aa.nkho.n me.n naukrii hai
kisii kii aa.nkho.n me.n chhokrii hai
vaqaar sar ko jhukaa rahaa hai
faraaz khaa.ii me.n jaa rahaa hai
to giilii cigarette ke kash lagaa kar
navaab rickshaw chalaa rahaa hai
saliim kannii ghumaa rahaa hai
vakiil vardii me.n jaa rahaa hai
zamiir baGle.n bajaa rahaa hai
aur ek vaa.iz bataa rahaa hai
KHudaa ko naaraaz karne vaale jahannamii hai.n
KHudaa ko raazii karo KHudaaraa
KHudaa ko raazii karo KHudaaraa
aur us ke aage nasiir akmal kamaal shaadaab Gulaam saare
nazar jhukaa.e kha.De hu.e hai.n
ki chashm-e-biinaa agar kahii.n hai
to samjho paataal tak ga.Dhii hai
kisii ko a-c KHariidnaa hai
kisii ko pii sii KHariidnaa hai
kisii kii bas aur kisii kii bii-sii nikal rahii hai
aqiila KHaala ke dono.n haatho.n me.n aaTh thaile laTak rahe hai.n
aur aate jaate sabhii musaafir
unhe.n musalsal khaTak rahe hai.n
ziyaa a.ndhere me.n jaa rahaa hai
gulaab kachraa jalaa rahaa hai
aziim makkhii a.Daa rahaa hai
kaliim guTkaa chabaa rahaa hai
to ghanTa-package pe jaane kab se
fahiim gappe.n la.Daa rahaa hai
sabaq musaavaat kaa sikhaane
vaziir gaa.Dii me.n jaa rahaa hai
sanaa nidaa ko na.e latiife sunaa rahii hai
hinaa hathelii ko takte takte puraane raste se aa rahii hai
aur apnii bhaavaj kaa haath thaame
zubaida check-up ko jaa rahii hai
vo apnii nazre.n kabhii idhar ko kabhii adhar ko gumaa rahii hai
magar ko.ii shai use musalsal bulaa rahii rahii hai
ajiib ujlat ajiib vahshat ajiib Gaflat kaa maajraa hai
kahuu.n mai.n kis se mire KHudaayaa ye kaisii KHilqat kaa maajraa hai
ki apnii mastii me.n mast ho kar
ye sab musaafir guzar rahe
na.e musaafir ubhar rahe hai.n
sa.Dak jahaa.n thii vahii.n kha.Dii hai
magar haqiiqat bahut ba.Dii hai
sa.Dak pe billii marii pa.Dii hai

Imran Shamshad Narmi
Nazm

shaffafiyan

agar tum kahkashaa.n maskan banaa.oge
to ham bhii raushnii-zaade hai.n
suuraj ke pujaarii hai.n
ham aise sab sitaare to.D dete hai.n
jo ham se raushnii kii bhiik bhii lete hai.n
aa.nkho.n me.n bhii chubhte hai.n
agar paataal me.n chhupne kii koshish kii
to phir ai siim-tan!
dhartii hamaare vaaste sonaa ugaltii hai
bhalaa chaa.ndii kahaa.n is me.n Thahartii hai

Waheed Ahmad
Nazm

ek nazm tumhaare nam

mai.n vaqt kii shaaKH se
na jaane kab TuuTuu.n
aur bikhar jaa.uu.n
merii kitaabe.n baate.n tasviire.n
kisii micro film audio yaa video cassette par
yaa kisii cD me.n
mahfuuz kar lo
dekho ab bhii vaqt hai
magar vaqt bahut kam hai
mujhe aaKHirii baar chhuu lo
mere KHayaal ke siine par sar rakh kar
computer se merii floppy nikaal kar
apne balaa.uz ke garebaan me.n Daal lo
na jaane kab
ye pahaa.D jangal shahr samundar paataal KHalaa
jinhe.n mai.n ne jii bhar ke dekhaa tak nahii.n
lakiiro.n me.n Dhal kar
ghaTte hu.e daa.ero.n
ek aise nuqte me.n simaT jaa.e.n
jo apne hii markaz kii gahraa.ii me.n Duub jaa.e

Mushaf Iqbal Tausifi
Nazm

suraj ka shahr

''ye shahr suuraj kaa shahr hai is ke roz-o-shab kaa pata nahii.n hai
na aaj tak vaqt aur taariiKH kaa mujhe ilm ho sakaa hai
ki mere ehsaas me.n ko.ii aaj hai na kal
aur ye raat hai yaa siyaah suuraj?
Guruub ho kar bhii aasmaan o zamii.n se paiham guzar rahaa hai
bas is jahaa.n me.n siyaah o raushan hamesha din hai
hamesha suuraj hii apne sar par kha.Daa hu.aa hai
ye kaa.enaat ik shikasta gaa.Dii hai ek pahiye pe chal rahii hai
zamiin kaa chaa.nd kyaa KHabar kis a.ndhere paataal me.n giraa ho
har ek shai bhaagtii hu.ii ek duusre kii talaash me.n gum
bas ek tasaadum
har ek shaKHs ek dau.Dtii laash hai ki ik duusre se vahshat-zada, gurezaa.n
sab apnaa suuraj se mu.nh chhupaa.e talaash me.n vaqt kii hiraasaa.n
kisii ko itnii bhii shaam miltii nahii.n ki tho.Daa udaas ho le.n''

Shahab Jafri
Nazm

kya hogi peDon ki zat

baniyaa to mahuvaa hogaa
us ke patto.n se pattal bantii hai.n
rasiile phal aa.nTe me.n
miij kar gujiyaa banaate hai.n
sukhaa kar us ke phal dukaan par bech dete hai.n
tel bhii miltaa hai mahuve kii ko.iyyaa se
lak.Dii to us kii ba.De kaam aatii hai.n

Kamal Upadhyay
Nazm

mohlat

abhii Thahro
abhii se is ta'alluq kaa ko.ii unvaan mat socho
abhii to is kahaanii me.n
mohabbat ke adhuure baab kii takmiil hone tak
nazar kii dhuup me.n rakkhe hu.e KHvaabo.n ke
saare zaa.iqe tabdiil hone tak
bahut se mo.D aane hai.n
mujhe un se guzarne do
zaraa mahsuus karne do
ki mere paa.nv ke niiche zamii.n ne rang badlaa hai
mire lahje me.n apnaa kis tarah aaha.ng badlaa hai
mujhe tho.Daa sambhalne do abhii Thahro
abhii Thahro ki vo KHush-baKHt saa.at bhii abhii
mujh tak nahii.n pahu.nchii
jo dil ke aa.iine ko vahm kii andhii galii se
etibaar-e-zaat kii sarhad pe laatii hai
use rasta bataatii hai
abhii un raasto.n par tum mujhe kuchh der chalne do
abhii Thahro
ko.ii KHvaahish umiid-o-biim ke maabain ab bhii
saa.ns letii hai
use is karb se aazaad karne do
vo saare KHvaab
jin ko dekhne kaa qarz me.n luuTaa nahii.n paa.ii
mujhe un ke liye ta.abiir kaa saf.ha palaTne do
abhii Thahro
kisii biite hu.e mausam ke baKHshe zaKHm
ab bhii aa.nkh kii putlii me.n raushan hai.n
zaraa ye zaKHm bharne do
masiihaa.ii tumhaarii
ruuh kii paataal tak kaise pahu.nchtii hai
mujhe andaaza karne do
abhii Thahro
abhii se is ta'alluq kaa
ko.ii unvaan mat socho

Nahid Qamar
Nazm

diwali

halva-e-be-duudh kii thaalo.n kaa bahr-e-be-karaa.n
kashtiyaa.n bahtii hai.n yaa aa jaa rahii hai.n mohriyaa.n
saalimo.n ke saath hai.n TuuTe khilaune khaand ke
mor kaa sar sher kaa dha.D paa.nv Gaa.eb saanD ke
sahn me.n khele.n bataashe abr se barse hu.e
bartano.n ke paas pattal raat ke parse hu.e

Shaad Aarfi
Nazm

ek achanak maut ka nauha

ba-zaahir ye lagtaa hai
us malgajii sub.h ko sab sahaaro.n ne jaise
achaanak tiraa saath chho.Daa
sahar ne zamii.n par qadam jab rakhaa
to achaanak zamii.n bevafaa ho ga.ii
ubhartaa hu.aa aaftaab
ek hii naa-gahaa.n laGzish-e-paa se yuu.n la.Dkha.Daayaa
ki maGrib ke paataal me.n mu.nh ke bal jaa samaayaa
achaanak farishte kafan saa.ebaa.n kii tarah taan kar
aasmaano.n se utre
gulo.n kii mahak kii jagah daf.atan buu-e-kaafuur kii sard-mehrii ne le lii
shajar ke badan se na.ii ko.npalo.n kii bajaa.e KHizaa.n phuuT niklii
ba-zaahir ye lagtaa hai
lekin bhalaa haadsa ek-dam kab hu.aa hai
bahut din se is sar-ba-mahar aatishii.n raaz kaa gu.ng fiita
KHamoshii se jaltaa chalaa jaa rahaa thaa
fanaa ke garajte hu.e aabshaaro.n ke uupar tanaa
rassiyo.n kaa ye pul
ek muddat se galtaa jaa rahaa thaa

Khursheed Rizvi
Nazm

sara shagufta

tho.Daa sabr chakho!
lazzat pakii pakaa.ii roTii nahii.n
jise chingiir me.n rakh kar tumhe.n paros duu.n!
tum to sarmaa ke lihaaf me.n bhii ThanDe pa.D rahe ho
daa.nto.n ko pasiina to aane do
ki zabaan badan kaa namak churaa sake
miTTii se pyaas nahii.n bujhii
mujhe abhii aur khodo
khodte raho ki paanii kaa zaa.iqa abhii
bahut paataal me.n hai!

Anjum Saleemi
Nazm

chalo tumko

nukiile naaKHuno.n se apnii qabre.n khodte jaa.o
thakan se chuur chehro.n par
abhii tak sharm ke aasaar baaqii hai.n
a.ndhero.n ke kisii paataal me.n
utre chale jaa.o
tumhaare ratjago.n ne nii.nd ko paamaal kar Daalaa
saKHii aa.ankho.n ke ashko.n ne tumhe.n ka.ngaal kar Daalaa
tumhaarii be-dilii kaa karb ab dekhaa nahii.n jaataa
chalo tum ko kisii ik ghuumtii kursii pe biThlaa de.n

Shahryar
Nazm

KHala aur KHuda

na aane vaale tuu kab tak na aa.egaa
kaa.enaato.n ke KHaaliq kin aafaaq me.n kho gayaa hai tuu
kaun se aasmaan bhaa ga.e hai.n tujhe
kaun se KHalaa khaa ga.e hai.n tujhe
KHalaa hii pasand hai.n to mere dil me.n aa
ki tuu ne is se ba.Daa black-hole to abhii tak paidaa nahii.n kiyaa
aa ai KHudaa aa
aa mere dil ke KHalaa me.n aa
tuu agar har jagah hai to meraa dil kyuu.n KHaalii hai
dil ke athaah paataal me.n Dhuu.nDhtaa huu.n aur tujhe paataa nahii.n
sochtaa huu.n kahii.n KHalaa hii KHudaa na ho
shaayad intizaar hii us kii maujuudgii ho
shaayad adam hii us kaa vajuud ho
aur nafii us kaa isbaat
phir ye soch palTaa khaatii aur dil ke KHalaa me.n utar jaatii hai
aur ek aavaara aavaaz kii tarah guu.njtii hai
guu.njtii hai guu.njtii hai guu.nje hii chalii jaatii hai
aur aahista aahista ek lafz me.n Dhal jaatii hai
KHudaa
aur aaKHir me.n ek sur rah jaataa hai
aa
duur kahii.n kisii ne darbaarii kaa alaap chhe.Daa hai
aa

Mohammad Haneef Rame
Nazm

KHak aur dhund ka safar

ulajhtii saa.nso.n kii saKHt girhe.n
badan ke andar khii.nchii hu.ii hai.n
niDhaal sadiyo.n ke faaslo.n kaa safar ki paa.nv me.n pal rahaa hai
dha.Do.n ke niiche hamaaraa saaya
hamaare jismo.n ko reza reza nigal rahaa hai
(2)
samundaro.n se havaa lipaT kar na.ii ruto.n kaa visaal maa.nge
zamii.n kii KHushbuu sahar kii aahaT ke dhu.ndle KHvaabo.n kaa aks phaile
hame.n yaqii.n hai havaa ke gadle safar se aage
chamakte lamho.n kii rahguzar hai
na.e gulaabo.n kii sarzamii.n hai
hamaare paa.nv me.n aane vaale safar kii KHvaahish ta.Dap rahii hai
hamaarii aa.nkho.n me.n baavle KHvaab kaa nasha hai
ham apne apne dha.Do.n ke taabuut se nikal kar
ba.Dhe ki suuraj kaa jism chhiine.n
zamii.n kii KHushbuu kaa khoj paa.e.n
ham ek muddat se sochte hai.n
ki aasmaa.n ke siyaah patthar me.n ab kiran kaa shigaaf utre
zamii.n kii paataal se kashish ho
na.e gulaabo.n kii mast KHushbuu badan me.n phaile
magar vahii dhund kaa safar hai
kaTii-phaTii sard u.ngliyo.n par lahuu ke jugnuu chamak chamak kar bikhar chuke hai.n
rago.n ke resho.n me.n taaza KHvaahish kii kashmakash sard pa.D chukii hai
dho.e.n ke phande me.n marne vaalo.n ke naam zehno.n kii taKHtiyo.n se
utar rahe hai.n
saro.n pe karb-o-balaa ke mausam kaa saKHt KHema khii.nchaa hu.aa hai
havaa pe likkhe hu.e hai.n nauhe
fazaa me.n laTke hu.e hai.n chehre
ufuq pe TuuTii hu.ii lakiire.n
zamii.n pe phaile hu.e hai.n saa.e
samundaro.n se lipaTne vaalii havaa kii an-dekhii Doriyo.n kaa
ko.ii siraa haath me.n nahii.n hai
hamaarii palke.n udha.D chukii hai.n
tamaam KHvaabo.n kii dhundlii ruuhe.n muhiib jangal ke raasto.n par
bhaTak rahii hai.n
ulajhtii saa.nso.n kii saKHt girhe.n
abhii talak jism par khii.nchii hai.n
hamaare niiche kisii zamii.n kii kashish ho shaayad
yahii.n kahii.n dhund ke aqab me.n ho ko.ii suuraj nikalne vaalaa
havaa ke gadle safar se aage chamakte lamho.n kii rahguzar ho
na.e gulaabo.n kii sar-zamii.n ho
magar pighalte badan ko tahliil karne vaalii ajiib saa.at sadaa aTal hai
hamaarii KHvaahish ye nek saa.at hamaarii aa.nkho.n me.n ghul ke phaile
hamaare jismo.n kaa dard pighle
hamaarii KHvaahish ye nek saa.at sukuut ban kar ta.Dapte jismo.n me.n aa ke Thahre
ulajhtii saa.nso.n kii girhe.n khole
ham us kii KHushbuu ke pur-sukuu.n malgaje a.ndhere kii gahrii lazzat ke muntazir hai.n
ham us kii KHvaahish me.n apne apne dha.Do.n ke taabuut me.n ba.ndhe hai.n

Sarmad Sahbai
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now