Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "pahra"

Nazm MATCHES FOR "pahra"

Nazm

bahut KHub-surat ho tum

bahut KHuub-suurat ho tum bahut KHuub-suurat ho tum
kabhii mai.n jo kah duu.n mohabbat hai tum se
to mujh ko KHudaa raa Galat mat samajhnaa
ki merii zaruurat ho tum bahut KHuub-suurat ho tum
hai.n phuulo.n kii Daalii pe baa.nhe.n tumhaarii
hai.n KHaamosh jaaduu nigaahe.n tumhaarii
jo kaa.nTe huu.n sab apne daaman me.n rakh luu.n
sajaa.uu.n mai.n kaliyo.n se raahe.n tumhaarii
nazar se zamaane kii KHud ko bachaanaa
kisii aur se dekho dil mat lagaanaa
ki merii amaanat ho tum
bahut KHuub-suurat ho tum
hai chehraa tumhaaraa ki din hai sunahraa
hai chehraa tumhaaraa ki din hai sunahraa
aur is par ye kaalii ghaTaa.o.n kaa pahraa
gulaabo.n se naazuk mahaktaa badan hai
ye lab hai.n tumhaare ki khiltaa chaman hai
bikhero jo zulfe.n to sharmaa.e baadal
farishte bhii dekhe.n to ho jaa.e.n paagal
vo paakiiza muurat ho tum bahut KHuub-suurat ho tum
jo ban ke kalii muskuraatii hai aksar
shab-e-hijr me.n jo rulaatii hai aksar
jo lamho.n hii lamho.n me.n duniyaa badal de
jo shaa.ir ko de jaa.e pahluu Gazal ke
chhupaanaa jo chaahe.n chhupaa.ii na jaa.e
bhulaanaa jo chaahe.n bhulaa.ii na jaa.e
vo pahlii mohabbat ho tum bahut KHuub-suurat ho tum

Tahir Faraz
Nazm

nura

vo nau-KHez nuuraa vo ik bint-e-maryam
vo maKHmuur aa.nkhe.n vo gesu-e-pur-KHam
vo arz-e-kaliisaa kii ik maah-paara
vo dair-o-haram ke liye ik sharaara
vo firdaus-e-maryam kaa ik Guncha-e-tar
vo tasliis kii duKHtar-e-nek-aKHtar
vo ik nurse thii chaara-gar jis ko kahiye
madaavaa-e-dard-e-jigar jis ko kahiye
javaanii se tiflii gale mil rahii thii
havaa chal rahii thii kalii khil rahii thii
vo pur-ro.ab tevar vo shaadaab chehra
mataa-e-javaanii pe fitrat kaa pahra
mirii hukmaraanii hai ahl-e-zamii.n par
ye tahriir thaa saaf us kii jabii.n par
safed aur shaffaaf kap.De pahan kar
mire paas aatii thii ik huur ban kar
vo ik aasmaanii farishta thii goyaa
ki andaaz thaa us me.n jibra.iil kaa saa
vo ik marmarii.n huur KHuld-e-barii.n kii
vo ta.abiir aazar ke KHvaab-e-hasii.n kii
vo taskiin-e-dil thii sukuun-e-nazar thii
nigaar-e-shafaq thii jamaal-e-nazar thii
vo sho.ala vo bijlii vo jalva vo partav
sulaimaa.n kii vo ik kaniiz-e-subuk-rau
kabhii us kii shoKHii me.n sanjiidgii thii
kabhii us kii sanjiidgii me.n bhii shoKHii
gha.Dii chup gha.Dii karne lagtii thii baate.n
sirhaane mire kaaT detii thii raate.n
ajab chiiz thii vo ajab raaz thii vo
kabhii soz thii vo kabhii saaz thii vo
naqaahat ke aalam me.n jab aa.nkh uThtii
nazar mujh ko aatii mohabbat kii devii
vo us vaqt ik paikar-e-nuur hotii
taKHayyul kii parvaaz se duur hotii
ha.nsaatii thii mujh ko sulaatii thii mujh ko
davaa apne haatho.n se mujh ko pilaatii
ab achchhe ho har roz muzhda sunaatii
sirhaane mire ek din sar jhukaa.e
vo baiThii thii takiye pe kuhnii Tikaa.e
KHayaalaat-e-paiham me.n kho.ii hu.ii sii
na jaagii hu.ii sii na so.ii hu.ii sii
jhapaktii hu.ii baar baar us kii palke.n
jabii.n par shikan be-qaraar us kii palke.n
vo aa.nkho.n ke saaGar chhalakte hu.e se
vo aariz ke sho.ale bha.Dakte hu.e se
labo.n me.n thaa la.al-o-gohar kaa KHazaana
nazar aarifaana adaa raahibaana
mahak gesu.o.n se chalii aa rahii thii
mire har nafas me.n basii jaa rahii thii
mujhe leTe leTe sharaarat kii suujhii
jo suujhii bhii to kis qayaamat kii suujhii
zaraa ba.Dh ke kuchh aur gardan jhukaa lii
lab-e-la.al-e-afshaa.n se ik shai churaa lii
vo shai jis ko ab kyaa kahuu.n kyaa samajhiye
behisht-e-javaanii kaa tohfa samajhiye
sharaab-e-mohabbat kaa ik jaam-e-ra.ngii.n
subuu-zaar-e-fitrat kaa ik jaam-e-ra.ngii.n
mai.n samjhaa thaa shaayad biga.D jaa.egii vo
havaa.o.n se la.Dtii hai la.D jaa.egii vo
mai.n dekhuu.ngaa us ke bipharne kaa aalam
javaanii kaa Gussa bikharne kaa aalam
idhar dil me.n ik shor-e-mahshar bapaa thaa
magar us taraf rang hii duusraa thaa
ha.nsii aur ha.nsii is tarah khilkhilaa kar
ki sham-e-hayaa rah ga.ii jhilmilaa kar
nahii.n jaantii hai miraa naam tak vo
magar bhej detii hai paiGaam tak vo
ye paiGaam aate hii rahte hai.n akasr
ki kis roz aa.oge biimaar ho kar

Asrarul Haq Majaz
Nazm

nazm

tire puure badan par ik muqaddas aag kaa pahra hai
jo terii taraf ba.Dhte hu.e haatho.n ke naaKHun rok letaa hai
tire ho.nTo.n se nikle saa.ns kii KHushbuu
dar-o-diivaar se rasta banaa kar saare barr-e-'aazamo.n me.n phail saktii hai
tirii baa.nhe.n abad ko jaane vaalii shaahraahe.n hai.n
tirii daa.ii.n hathelii kii lakiire.n duusrii duniyaa.o.n ke naqshe hai.n jo in munshiyo.n ke bas se baahar hai.n
tirii aa.nkhe.n nahii.n ye devtaa.o.n kii panah-gaahe.n hai.n
jin me.n vaqt jaise zahr kaa tiryaaq hai
tirii zulfo.n kii vus'at is jahaa.n kii intihaa.o.n se pare tak hai
tirii gardan kisii jannat ke paakiiza daraKHto.n ke tane ko dekh kar tarshii ga.ii hai
hamaare jism par se terii parchhaa.ii guzar jaa.e
to mumkin hai ki ham is maut jaise KHauf se aazaad ho jaa.e.n
hamaare paas aisaa kyaa hai jo tujh ko bataa kar ham tujhe qaa.il kare.n
bas itnaa hai ki apne lafz barsaa kar tirii chhatrii pe baarish phe.nk de.nge
yaa tire chehre pe apnii nazm kii ik satr se chhaa.nv kare.nge
dhuup de de.nge
magar kyaa faa.eda is kaa ki mausam KHud tire juuto.n ke tasmo.n se ba.ndhe hai.n
tire hamraah chalne kii ko.ii KHvaahish agar dil me.n kabhii thii bhii
to ham ne tark kar dii hai
ham is laa.iq nahii.n hai.n
hame.n maa'luum hai ki agle vaqto.n me.n ye log
tire pairo.n ke saa.ncho.n se na.ii samto.n ke andaaze lagaa.e.nge

Tahzeeb Hafi
Nazm

lab pe pabandi to hai

lab pe paabandii to hai ehsaas par pahraa to hai
phir bhii ahl-e-dil ko ahvaal-e-bashar kahnaa to hai

Sahir Ludhianvi
Nazm

nind nahin aati hai

lekin un maa.o.n kaa socho
jin ke beTe
chaa.nd talak ik din jaa.e.nge
jaa ke vahaa.n par bas jaa.e.nge
aise me.n
jab raat aa.egii
chaa.nd zamii.n par niklaa hogaa
chaa.nd me.n un kaa chehra hogaa
lekin un ke ghar kaa aa.ngan
kitnaa suunaa suunaa hogaa
darvaazo.n par KHaamoshii kaa pahra hogaa
aa.nkho.n me.n viiraanii hogii
dil me.n bhii sannaaTaa hogaa
raat aa.egii
aur aa.nkho.n se
nii.nd kii pariyaa.n ruuThii ho.ngii
vo bas chaa.nd ko dekhtii ho.ngii
jaagtii ho.ngii
un maa.o.n ke baare me.n bhii
kuchh to socho
shaayad tum ko nii.nd aa jaa.e
mai.n to itnii duur nahii.n huu.n
mai.n to yahii.n par hii bastaa huu.n
saa.ns yahii.n par hii letaa huu.n
mai.n to zamii.n par hii rahtaa huu.n

Ashfaq Husain
Nazm

KHuda ka ghar nahin koi

KHudaa kaa ghar nahii.n ko.ii
bahut pahle hamaare gaa.nv ke akasr buzurgo.n ne
use dekhaa thaa
puujaa thaa
yahii.n thaa vo
yahii.n bachcho.n kii aa.nkho.n me.n
lahakte sabz pe.Do.n me.n
vo rahtaa thaa
havaa.o.n me.n mahaktaa thaa
nadii ke saath bahtaa thaa
hamaare paas vo aa.nkhe.n kahaa.n hai.n
jo pahaa.Dii par
chamaktii
boltii
aavaaz ko dekhe.n
hamaare kaan bahre hai.n
hamaarii ruuh andhii hai
hamaare vaaste
ab phuul khilte hai.n
na ko.npal gungunaatii hai
na KHaamoshii akele me.n sunahre giit gaatii hai
hamaaraa ahd!
maa.n ke peT se andhaa hai bahraa hai
hamaare aage piichhe
maut kaa taariik pahraa hai

Nida Fazli
Nazm

samundar ki tah mein

samundar kii tah me.n
samundar kii sa.ngiin tah me.n
hai sanduuq
sanduuq me.n ek Dibiyaa me.n Dibiyaa
me.n Dibiyaa
me.n kitne ma.aanii kii sub.he.n
vo sub.he.n ki jin par risaalat ke dar-band
apnii shu.aa.o.n me.n jak.Dii hu.ii
kitnii sahmii hu.ii!
(ye sanduuq kyuu.n kar giraa?
na jaane kisii ne churaayaa?
hamaare hii haatho.n se phislaa?
phisal kar giraa?
samundar kii tah me.n magar kab?
hamesha se pahle
hamesha se bhii saal-haa-saal pahle?
aur ab tak hai sanduuq ke gird
lafzo.n kii raato.n kaa pahraa
vo lafzo.n kii raate.n
jo devo.n kii maanind
paanii ke las-dar devo.n ke maanind
ye lafzo.n kii raate.n
samundar kii tah me.n to bastii nahii.n hai.n
magar apne laa-raib pahre kii KHaatir
vahii.n re.ngtii hai.n
shab o roz
sanduuq ke chaar suu re.ngtii hai.n
samundar kii tah me.n!
bahut sochtaa huu.n
kabhii ye ma.aanii kii paakiiza sub.ho.n kii pariyaa.n
rihaa.ii kii ummiid me.n
apne Gavvaas jaaduu-garo.n kii
sadaa.e.n sune.ngii?

Noon Meem Rashid
Nazm

chaar musafir

nikle safar ko paidal vo chaar ham-safar the
sab apne raaste aur manzil se baa-KHabar the
ik falsafii thaa un me.n duusraa thaa naa.ii
phir tiisraa sipaahii ganjaa thaa jis kaa bhaa.ii
ja.ngal me.n raat aa.ii laazim thaa un ko sonaa
le kar chale the apne vo o.Dhnaa bichhaunaa
so.e kuchh is tarah vo us me.n hoshiyaarii
har ek kaa thaa pahraa do ghanTe baarii baarii
pahle sipaahii jaagaa phir aadhii raat aa.ii
vo so gayaa to pahraa dene lagaa thaa naa.ii
lambe the aur ghane the jo baal us ke sar par
naa.ii ne muu.nD Daale tez usturaa pher kar
bedaar falsafii ko kar ke ye bolaa naa.ii
baarii ab aap kii hai uTh jaa.o mere bhaa.ii
jab haath falsafii ne cha.ndiyaa pe apnii pheraa
aape se ho ke baahar naa.ii ko us ne gheraa
ye kyaa Gazab kiyaa hai naahaq use uThaayaa
baarii thii falsafii kii ganje ko kyo.n jagaayaa

Aafaque Siddiqui
Nazm

aazadi

zabaa.n tum kaaT lo yaa phir lagaa do ho.nTh par taale
mirii aavaaz par ko.ii bhii pahra ho nahii.n saktaa
mujhe tum band kar do tiirgii me.n yaa salaaKHo.n me.n
parinda soch kaa lekin ye Thahraa ho nahii.n saktaa
agar tum phuu.nk kar suuraj bujhaa doge to sun lo phir
jalaa kar zehn ye apnaa ujaalaa chhaa.nT luu.ngaa mai.n
siyaahii KHatm ho.egii qalam jab TuuT jaa.egaa
to apne KHuun me.n u.nglii Dubaa kar sach likhuu.ngaa mai.n

Tripurari
Nazm

koi ojhal duniya hai

lamha lamha roz-marra zindagii ke saath hai
ek lamha jo kisii aaise jahaa.n kii zindagii kaa haath hai
jis me.n mai.n rahtaa nahii.n jis me.n ko.ii rahtaa nahii.n
jis me.n ko.ii din nahii.n hai raat kaa pahraa nahii.n
jis me.n suntaa hii nahii.n ko.ii na ko.ii baat hai
roz-marra zindagii se yuu.n guzartaa hai kabhii
saath le jaataa hai guzrii umr ke hisse kabhii
jo basar ab tak hu.aa us ko Galat kartaa hu.aa
aur hii ik zindagii se aashnaa kartaa hu.aa
jo gumaa.n tak me.n na thaa us ko dikhaa jaataa hu.aa
vahm tak jis kaa na thaa us vaqt ko laataa hu.aa
phir chalaa jaataa hai apne asl ke aasaar me.n
aur ham masruuf ho jaate hai.n phir
apne roz-o-shab ke kaarobaar me.n

Muneer Niyazi
Nazm

iltija

ye aurat hai
ise tum saat pardo.n me.n chhupaa.o
ise tum baa.ndh kar rakkho
ye bakrii se zyaada qiimtii hai
ki bakrii duudh detii hai
magar jab kaaT kar khaa lo
to phir kuchh bhii nahii rahtaa
ye aurat hai use kachchaa chabaa lo
phir bhii ye zinda rahegii
aur tumhaare kaam aa.egii
tum is ke zehn o dil par
aur is ke jism ke
ek ek hisse par
KHalaa me.n palne vaale KHauf kaa
pahra biThaa do
ye maa.n ho yaa bahan
biivii ho mahbuuba ho beTii ho
tumhaarii KHaadima ho yaa tavaa.if ho
tumhaare kaam aa.egii

Harris Khalique
Nazm

uljhan ki kahani

ek akahraa duusraa dohraa tiisraa hai so tihraa hai
ek akahre par pal pal ko dhyaan kaa KHuunii.n pahra hai
duusre dohre ke raste me.n tiisraa khel kaa mohara hai
tiisraa tihra jo hai us kaa sab se ujaagar chehra hai
goyaa akahraa pahraa dohra mohraa tihraa chehra hai
ek akahraa kaaGaz dohraa tihraa ho kar naav banii
naav se pal bhar bachche bahle khel khel me.n ghaa.o banii
ghaa.o banii to dil me.n dhyaan ye aayaa kah de.n aa.o banii

Meeraji
Nazm

accident

mujh se roz yahii kahtaa hai pakkii sa.Dak par vo kaalaa saa daaG jo kuchh din pahle
surKH lahuu kaa thaa ik chhii.nTaa chiknaa giilaa chamkiilaa chamkiilaa
miTTii us pe girii aur mailii sii ik pii.Dhii us par se utrii
aur phir sinduurii saa ik KHaaka ubhraa
jo ab pakkii sa.Dak par kaalaa saa dhabba hai
pisii hu.ii bajrii me.n jazb aur jaamid an-miT
mujh se roz yahii kahtaa hai pakkii sa.Dak par maslaa hu.aa vo daaG lahuu kaa
mai.n ne to pahlii baar us din
apnii ra.ng-bira.ngii qaasho.n vaalii ge.nd ke piichhe
yuu.n hii zaraa ik jast-bharii thii
abhii to meraa roGan bhii kachchhaa thaa
kis ne u.nDel diyaa yuu.n mujh ko is miTTii par
uu.n uu.n mai.n nahii.n miTtaa mai.n to huu.n ab bhii huu.n
mai.n ye sun kar Dar jaataa huu.n
kaalii bajrii ke roGan me.n jiine vaale is ma.asuum lahuu kii kaun sunegaa
mamtaa bik bhii chukii hai chand Tako.n me.n
qaanuun aa.nkhe.n miiche hu.e hai
qaatil pahiye be-pahraa hai.n

Majeed Amjad
Nazm

chand meri zamin phul mera watan

chaa.nd merii zamii.n phuul meraa vatan
mere kheto.n kii miTTii me.n la.al-e-yaman
mere mallaah lahro.n ke paale hu.e
mere dahqaa.n pasiino.n ke Dhaale hu.e
mere mazduur is daur ke kohkan
chaa.nd merii zamii.n phuul meraa vatan
mere faujii javaa.n jur.ato.n ke nishaa.n
mere ahl-e-qalam azmato.n kii zabaa.n
mere mehnat-kasho.n ke sunahre badan
chaa.nd merii zamii.n phuul meraa vatan
merii sarhad pe pahraa hai iimaan kaa
mere shahro.n pe saaya hai qur.aan kaa
meraa ik ik sipaahii hai KHaibar-shikan
chaa.nd merii zamii.n phuul meraa vatan
mere dahqaa.n yuu.n hii hal chalaate rahe.n
mirii miTTii ko sonaa banaate rahe.n
giit gaate rahe.n mere sho.ala-badan
chaa.nd merii zamii.n phuul meraa vatan

Saqi Javed
Nazm

maut kis ne banTi hai

ye sadaa.e.n kaisii hai.n
jin kii guu.nj se mere
kaan sansanaate hai.n
kis kii siskiyaa.n hai.n ye
zindagii kii yaa tum ho
maut to nahii.n naa ye
maut gar nahii.n hai ye
aahaTe.n hai.n phir kis kii
kyuu.n ghuTan kaa pahra hai
kyaa mujhe janam de kar
tum ne maut baa.nTii hai

Maimoona Abbas Khan
Nazm

ye raat hogi tawil kitni

ye raat hogii taviil kitnii
buland hogii fasiil kitnii
ye KHauf-o-dahshat kaa daur-daura
rahegaa kab tak
galii galii kuucha kuucha pahra
rahegaa kab tak
ye aag jangal kii aag kab tak
falak se barsegii raakh kab tak
sitaare TuuTe.nge aur kab tak
yuu.n aasmaa.n se
parind ruuThe.nge aashiyaa.n se
ye phuul-patte havaa.e.n shabnam

Firoz Natiq Khusro
Nazm

meri udas aankhen

har suu
dhu.nd kaa pahra hai
raat KHaamosh hai
maTmailii chaa.ndnii
utar aa.ii hai mere aa.ngan me.n
haatho.n me.n
yaado.n ke charaaG liye
kholtii huu.n khi.Dkiyo.n darvaazo.n ko
aaj KHuubsuurat lag rahii hai.n
merii udaas aa.nkhe.n
dukh ke aa.iine me.n
aaj
mai.n ne dekhaa hai apnaa chehra
aaj mai.n ko.ii giit
gungunaanaa chaahtii huu.n

Asha Parbhat
Nazm

abhi mausam nahin aaya

abhii tak mausam-e-gul lauT kar aayaa nahii.n
kuchh der baaqii hai
abhii is dard kii chhaa.nv me.n saa.nso.n ko ravaa.n rakhne kaa hiila
Dhuu.nDhnaa hai
paa.nv me.n miTTii ke juute haath me.n kashkol-e-jaa.n
sar par kulaah-e-Gam
qabaa-e-gard me.n lipTe badan diivaar-e-girya se
lagaa kar baiThnaa hai aur
is mausam kaa rasta dekhnaa hai jis kii KHaatir
ham ne apnii KHaak ke zarro.n se
apne ghar banaa.e the
abhii kuchh der baaqii hai
abhii galiyo.n makaano.n kii chhato.n par Dev.Dhiyo.n me.n KHaamushii
KHanjar-ba-kaf pahre pe faa.ez hai
yahaa.n is qarya-e-ibrat me.n ik qasr-e-buland-o-pur-hashm hai
jis ke farsh-e-niilmii.n par ek
amboh Gulaamaa.n saf-ba-saf KHaalii suro.n ko apne
siine par jhukaa.e
haath baa.ndhe
apne aaqaa se vafaadaarii kaa dam bhartaa hai
haajat-mand masaa.il kii tarah be-vazan
lahje me.n suKHan kartaa hai jiitaa hai na martaa hai
zaraa dekho
zaraa is qarya-e-ibrat ke qasr-e-pur-hashm se us taraf dekho
havaa mahbuus hai barg-o-samar se KHaalii pe.Do.n kii
barahna Tahniyo.n ke saath girhe.n Daal kar baa.ndhii
ga.ii hai aur
zamistaa.n kii sunahrii dhuup Tuk.De Tuk.De
kar ke shahr kii uu.nchii chhato.n par chiil kavvo.n ke liye Daalii ga.ii hai
aatish-e-gul se charaaG-e-shaam tak jo kuchh dil
ushshaaq ko virse me.n miltaa hai
asiiraan-e-furaat-o-shaam ke maanind
zanjiir-o-salaasil me.n piro kar saahab-e-qasr-e-hasaham ke saamne laayaa gayaa hai
pahra-vaaro.n ne dariiche
khi.Dkiyaa.n aur bhaarii darvaaze muqaffal kar diye hai.n
aur mausam un dariicho.n
khi.Dkiyo.n aur bhaarii darvaazo.n se baahar saakit-o-jaamid kha.Daa hai
baazyaabii kii ijaazat chaahtaa hai
maatamii ra.ngo.n me.n Duubaa dard kaa mausam huzuur-e-shaah se
apne tan-e-naazuk pe barg-e-gul sajaane kii himaayat chaahtaa hai
be.Diyaa.n pahne hu.e lab-basta-o-saakin havaa ke paa.nv me.n
KHushbuu kii paa.el baa.ndhne aur phir use aazaad karne
kii sa.aadat chaahtaa hai
lekin
ai kaar-e-junuu.n
kaar-e-numuu aaGaaz hone me.n abhii kuchh der baaqii hai

Ayub Khawar
Nazm

aazadi

raste me.n pa.De ro.De patthar
pahra dete vardii vaale
duur se aataa shor-sharaaba
nukka.D pe pa.Dii KHaalii botal
car ke niiche sotaa kuttaa
aur Gubaar u.Daatii havaa.e.n
sab kuchh achchhaa lagtaa hai
jab chalne kii aazaadii ho

Naina Adil
Nazm

mohabbat jism hai mana

mohabbat jism ke chhoTe se hujre ke
kisii goshe me.n rahtii hai
yahaa.n rauzan nahii.n ko.ii
kahii.n se raushnii kii ik kiran andar nahii.n aatii
bahut gahraa a.ndheraa hai
tasavvur aur KHayaalo.n kii guzargaaho.n pe pahraa hai
mohabbat ek laa haasil safar kaa saatvaa.n parda hai
jis me.n ik samundar us kii tuGyaanii KHamoshii kaa baseraa hai
samundar shaant hotaa hai to pistaano.n se lahre.n yuu.n lipaTtii hai.n
ki jaise ghan garaj ke baa'd sarshaarii kaa lamha ho
usii lamhe me.n vaqfe me.n
mohabbat be-karaa.n hotii hai jiitii hai
mohabbat gungunaatii aur bikhartii hai
mohabbat jaavedaa.n hotii mahaktii hai

Tabassum Fatma
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now