Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "puuchhiye"

Nazm MATCHES FOR "puuchhiye"

Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

roTiyan

jab aadmii ke peT me.n aatii hai.n roTiyaa.n
phuulii nahii.n badan me.n samaatii hai.n roTiyaa.n
aa.nkhe.n parii-ruKHo.n se la.Daatii hai.n roTiyaa.n
siine upar bhii haath chalaatii hai.n roTiyaa.n
jitne maze hai.n sab ye dikhaatii hai.n roTiyaa.n
roTii se jis kaa naak talak peT hai bharaa
kartaa pare hai kyaa vo uchhal kuud jaa-ba-jaa
diivaar phaa.nd kar ko.ii koThaa uchhal gayaa
ThaTThaa ha.nsii sharaab sanam saaqii is sivaa
sau sau tarah kii dhuum machaatii hai.n roTiyaa.n
jis jaa pe haa.nDii chuulhaa tavaa aur tanuur hai
KHaaliq kii qudrato.n kaa usii jaa zuhuur hai
chuulhe ke aage aa.nch jo chaltii huzuur hai
jitne hai.n nuur sab me.n yahii KHaas nuur hai
is nuur ke sabab nazar aatii hai.n roTiyaa.n
aave tave tanuur kaa jis jaa zabaa.n pe naam
yaa chakkii chuulhe ke jahaa.n gulzaar ho.n tamaam
vaa.n sar jhukaa ke kiije Da.nDvat aur salaam
is vaaste ki KHaas ye roTii ke hai.n maqaam
pahle inhii.n makaano.n me.n aatii hai.n roTiyaa.n
in roTiyo.n ke nuur se sab dil hai.n bor bor
aaTaa nahii.n hai chhalnii se chhan-chhan gire hai nuur
pe.Daa har ek us kaa hai barfii o motii chuur
hargiz kisii tarah na bujhe peT kaa tanuur
is aag ko magar ye bujhaatii hai.n roTiyaa.n
puuchhaa kasii ne ye kisii kaamil faqiir se
ye mehr-o-maah haq ne banaa.e hai.n kaahe ke
vo sun ke bolaa baabaa KHudaa tujh ko KHair de
ham to na chaa.nd samjhe.n na suuraj hai.n jaante
baabaa hame.n to ye nazar aatii hai.n roTiyaa.n
phir puuchhaa us ne kahiye ye hai dil kaa tuur kyaa
is ke mushaahide me.n hai khultaa zuhuur kyaa
vo bolaa sun ke teraa gayaa hai shu.uur kyaa
kashf-ul-quluub aur ye kashf-ul-qubuur kyaa
jitne hai.n kashf sab ye dikhaatii hai.n roTiyaa.n
roTii jab aa.ii peT me.n sau qand ghul ga.e
gulzaar phuule aa.nkho.n me.n aur aish tul ga.e
do tar nivaale peT me.n jab aa ke Dhul ga.e
chaudah tabaq ke jitne the sab bhed khul ga.e
ye kashf ye kamaal dikhaatii hai.n roTiyaa.n
roTii na peT me.n ho to phir kuchh jatan na ho
mele kii sair KHvaahish-e-baaG-o-chaman na ho
bhuuke Gariib dil kii KHudaa se lagan na ho
sach hai kahaa kasii ne ki bhuuke bhajan na ho
allaah kii bhii yaad dilaatii hai.n roTiyaa.n
ab aage jis ke maal-puu.e bhar ke thaal hai.n
puure bhagat unhe.n kaho saahab ke laal hai.n
aur jin ke aage roGnii aur shiir-maal hai.n
aarif vahii hai.n aur vahii saahab-kamaal hai.n
pakkii-pakaa.ii ab jinhe.n aatii hai.n roTiyaa.n
kap.De kisii ke laal hai.n roTii ke vaaste
lambe kisii ke baal hai.n roTii ke vaaste
baa.ndhe ko.ii rumaal hai.n roTii ke vaaste
sab kashf aur kamaal hai.n roTii ke vaaste
jitne hai.n ruup sab ye dikhaatii hai.n roTiyaa.n
roTii se naache pyaada qavaa.ed dikhaa dikhaa
asvaar naache gho.De ko kaava lagaa lagaa
ghu.nghruu ko baa.ndhe paik bhii phirtaa hai naachtaa
aur is sivaa jo Gaur se dekhaa to jaa-ba-jaa
sau sau tarah ke naach dikhaatii hai.n roTiyaa.n
roTii ke naach to hai.n sabhii KHalq me.n pa.De
kuchh bhaa.nD bhiigte ye nahii.n phirte naachte
ye ranDiyaa.n jo naache hai.n ghuu.nghaT ko mu.nh pe le
ghuu.nghaT na jaano dosto tum ziinhaar use
is parde me.n ye apne kamaatii hai.n roTiyaa.n
ashraafo.n ne jo apnii ye zaate.n chhupaa.ii hai.n
sach puuchhiye to apnii ye shaane.n ba.Dhaa.ii hai.n
kahiye unho.n kii roTiyaa.n kis kis ne khaa.ii hai.n
ashraaf sab me.n kahiye to ab naan-baa.ii hai.n
jin kii dukaa.n se har kahii.n jaatii hai.n roTiyaa.n
duniyaa me.n ab badii na kahii.n aur niko.ii hai
yaa dushmanii o dostii yaa tund-KHuu.ii hai
ko.ii kisii kaa aur kisii kaa na ko.ii hai
sab ko.ii hai usii kaa ki jis haath Do.ii hai
naukar nafar Gulaam banaatii hai.n roTiyaa.n
roTii kaa ab azal se hamaaraa to hai KHamiir
ruukhii hii roTii haq me.n hamaare hai shahd-o-shiir
yaa patlii hove moTii KHamiirii ho yaa fatiir
gehuu.n javaar baajre kii jaisii ho 'naziir'
ham ko to sab tarah kii KHush aatii hai.n roTiyaa.n

Nazeer Akbarabadi
Nazm

hubb-e-watan

qadr ai dil vatan me.n rahne kii
puuchhe pardesiyo.n ke jii se ko.ii
jab milaa raam-chandr ko ban-baas
aur niklaa vatan se ho ke udaas
baap kaa hukm rakh liyaa sar par
par chalaa saath le ke daaG-e-jigar
paa.nv uThtaa thaa us kaa ban kii taraf
aur khi.nchtaa thaa dil vatan kii taraf
guzre Gurbat me.n is qadar mah-o-saal
par na bholaa ayodhya kaa KHayaal
des ko ban me.n jii bhaTaktaa rahaa
dil me.n kaa.nTaa saa ik khaTaktaa rahaa
tiir ik dil me.n aa ke lagtaa thaa
aatii thii jab ayodhya kii havaa
kaTne chaudah baras hu.e the muhaal
goyaa ek ek jug thaa ek ik saal

Altaf Hussain Hali
Nazm

kohre ka khet

vo sard raat jabki safar kar rahaa thaa mai.n
ra.ngiiniyo.n se zarf-e-nazar bhar rahaa thaa mai.n
tezii se ja.ngalo.n me.n u.Dii jaa rahii thii rail
KHvaabiida kaa.enaat ko chau.nkaa rahii thii rail
mu.Dtii uchhaltii kaa.nptii chi.nghaa.Dtii hu.ii
kohre kii vo dabiiz ridaa phaa.Dtii hu.ii
pahiyo.n kii gardisho.n me.n machaltii thii raagnii
aahan se aag ban ke nikaltii thii raagnii
pahu.nchii jidhar zamii.n kaa kaleja hilaa diyaa
daaman me.n tiirgii ke garebaa.n banaa diyaa
jho.nke havaa ke barf bichhaate the raah me.n
jalve samaa rahe the laraz kar nigaah me.n
dhoke se chhuu ga.ii.n jo kahii.n sard u.ngliyaa.n
bichchhuu saa Da.nk maarne lagtii thii.n khi.Dkiyaa.n
pichhle pahar kaa narm dhu.ndlakaa thaa pur-fishaa.n
maayuusiyo.n me.n jaise umiido.n kaa kaarvaa.n
be-nuur ho ke Duubne vaalaa thaa maahtaab
kohre me.n khup ga.ii thii sitaaro.n kii aab-o-taab
qabze se tiirgii ke sahar chhuuTne ko thii
mashriq ke haashiye me.n kiran phuuTne ko thii
kohre me.n thaa Dhake hu.e baaGo.n kaa ye samaa.n
jis tarah zer-e-aab jhalaktii ho.n bastiyaa.n
bhiigii hu.ii zamii.n thii namii sii fazaa me.n thii
ik kisht-e-barf thii ki mu.allaq havaa me.n thii
jaaduu ke farsh sehr ke sab saqf-o-baam the
dosh-e-havaa pe pariyo.n ke siimii.n KHiyaam the
thii ThanDe ThanDe nuur me.n kho.ii hu.ii nigaah
Dhal kar fazaa me.n aa.ii thii huuro.n kii KHvaab-gaah
ban ban ke phen suu-e-falak dekhtaa hu.aa
dariyaa chalaa thaa chho.D ke daaman zamiin kaa
is shabnamii dhundalke me.n bagule the yuu.n ravaa.n
maujo.n pe mast ho ke chale.n jaise machhliyaa.n
Daalaa kabhii fazaa.o.n me.n KHat kho ga.e kabhii
jhalke kabhii ufuq me.n nihaa.n ho ga.e kabhii
engine se u.D ke kaa.nptaa phirtaa thaa yuu.n dhu.aa.n
letaa thaa lahr khet me.n kohre ke aasmaa.n
us vaqt kyaa thaa ruuh pe sadma na puuchhiye
yaad aa rahaa thaa kis se bichha.Dnaa na puuchhiye
dil me.n kuchh aise ghaav the tiir-e-malaal ke
ro ro diyaa thaa khi.Dkii se gardan nikaal ke

Kaifi Azmi
Nazm

basant aur holi ki bahaar

mastii bhare dilo.n kii uma.nge.n na puuchhiye
kyaa mantiqe.n hai.n kyaa hai.n tara.nge.n na puuchhiye

Ufuq Lakhnavi
Nazm

eid milan

bichh.De hu.o.n ko bichh.De hu.o.n se milaa.e hai
har samt eid jashn-e-mohabbat manaa.e hai
insaaniyat kii pe.ng mohabbat ba.Dhaa.e hai
mausam har ik umiid ko jhuulaa jhulaa.e hai
baarish me.n khet aisii tarah se nahaa.e hai
raunaq har ik kisaan ke chehre pe aa.e hai
ham sab ko apne ghere me.n lene ke vaaste
chaaro.n taraf se ghir ke ghaTaa aaj aa.e hai
haivaaniyat ne KHuun ke dhabbe janam diye
barsaat aa ke KHuun ke dhabbe chhu.Daa.e hai
shahzaadii-e-bahaar kii aamad hai baaG me.n
har ek phuul raah me.n aa.nkhe.n bichhaa.e hai
hai kitnii pyaarii pyaar bharii eid kii adaa
apnaa samajh ke sab ko gale se lagaa.e hai
sach puuchhiye to ye bhii mohabbat kaa hai subuut
jo raa.e aap kii hai vahii merii raa.e hai
bauchhaare.n aa ke detii hai.n us ko salaamiyaa.n
bansii bajaa bajaa ke jo mela lagaa.e hai
mai.n jaa.uu.ngaa to phir kabhii vaapas na aa.uu.ngaa
kaalii ghaTaa to har baras aa.e hai jaa.e hai
eid-ul-fitar kii vaj.h-e-sharaafat to dekhiye
har saal aa ke sab ko gale se lagaa.e hai
diije du.aa.e.n eid kii tyauhaar ko 'naziir'
ik bhii.D aaj aap se milne ko aa.e hai

Nazeer Banarasi
Nazm

zikr-e-gandhi

ek-aadh saal se hai fazaa mulk kii kuchh aur
Gaalib sadii ke baad hai gaa.ndhii sadii kaa daur
gaa.ndhii ko kaun aisaa hai jo jaantaa na ho
izzat ke saath un ko ba.Daa maantaa na ho
baapuu to un ko pyaar se kahte hai.n aaj bhii
har dil pe sach jo puuchhiye hai un kaa raaj bhii
dam se unhii.n ke daur-e-Gulaamii hu.aa tamaam
aasaanii me.n badal gayaa dushvaar thaa jo kaam
us rahbar-e-aziim ne ham ko vo bal diye
a.ngrez mulk chho.D ke KHaamosh chal diye
sach aur us ke saath ahinsaa kii dhuum hai
duniyaa kaa ab samaadhii pe un kii hujuum hai
har shaKHs sar-niguu.n hai ba.De ehtiraam se
'aadil' ye qadr hotii hai be-laus kaam se

Adil Jafari
Nazm

siyasi maslahat

hind kii taariiKH kaa baab daraKHshaa.n puuchhiye
kyuu.n siyaasii maslahat kii aag me.n jho.nkaa gayaa

Ghaus Khah makhah Hyderabadi
Nazm

ilm

hai zabaa.n par sab kii mid.hat ilm kii
kyo.n na ho dil me.n mohabbat ilm kii
kyo.n na ho har ik ko chaahat ilm kii
har kisii ko hai zaruurat ilm kii
ilm ke rutbe se vaaqif hai jahaa.n
goshe goshe me.n hai shohrat ilm kii
jis ko chaskaa lag gayaa hai ilm kaa
puuchhiye us se haqiiqat ilm kii
bas usii ne paa.ii izzat mulk me.n
dil se kii hai jis ne KHidmat ilm kii
saare duniyaa kaa chahiitaa hai ye ilm
rahtii hai har dil me.n ulfat ilm kii
vo zaliil-o-KHvaar duniyaa me.n hu.aa
jis kisii ne kii na izzat ilm kii
do jahaa.n kii us ko ne.amat mil ga.ii
ho ga.ii jis par inaayat ilm kii
surKH-ruu hotaa hai vo ik din zaruur
rahtii hai jis dil ko chaahat ilm kii
taKHt-e-shaahii kyaa hai miltaa hai KHudaa
is se ba.Dh kar kyaa ho barakat ilm kii
kyo.n kisii ke aage vo phailaa.e haath
haath aa.ii jis ke daulat ilm kii
hai ye kunjii aish aur aaraam kii
kyaa bataa.uu.n qadr-o-qiimat ilm kii
saarii duniyaa paa rahii hai jis se faiz
hai haqiiqat me.n vo daulat ilm kii
jaan se is ko samajhte hai.n aziiz
jin pe raushan hai haqiiqat ilm kii
ho vo bachcha yaa ho buu.Dhaa yaa javaan
har kisii ko hai zaruurat ilm kii
jaa.o 'jauhar' har kahii.n be-KHauf tum
ko.ii luuTegaa na daulat ilm kii

Banne Miyan Jauhar
Nazm

sawal-e-mazi-o-haal

meraa bachpan bhii KHuub bachpan thaa
merii duniyaa bhii KHuubsuurat thii
dil me.n dahshat thii ko.ii aur na KHauf
dosto.n me.n ba.Dii mohabbat thii
dekhte dekhte javaan hu.aa
aur duniyaa badal ga.ii merii
pyaar ke jis pe phuul khilte the
vo hasii.n shaaKH jal ga.ii merii
aaj aalam na puuchhiye mujh se
har taraf ek KHauf taarii hai
pyaar kaa gulsitaa.n thaa jo bhaarat
us me.n nafrat kii jang jaarii hai
eid hotii to hai baroz-e-eid
eid kii sii KHushii nahii.n hotii
diip jalte to hai.n divaalii ke
pyaar kii raushnii nahii.n hotii
phir unhii.n saa.ato.n ko lauTaa de
ai KHudaa-vand ai mire ma.abuud
phir ye hangaama ai KHudaa kyaa hai
jab ki tujh bin nahii.n ko.ii maujuud

Mujeeb Shehzar
Nazm

aadmi

tausiif-e-be-kanaar kaa haqdaar aadmii
duniyaa-e-shash-jihaat kaa sardaar aadmii
sach puuchhiye agar to hai dono.n jahaan me.n
taKHliiq-e-zul-jalaal kaa shahkaar aadmii

Jameel Azimabadi
Nazm

yaad aa gae bachche

kis se puuchhiye jaa kar kyo.n biga.D ga.e bachche
aatishii.n khilauno.n se khelne lage bachche
kuchh na.e taqaaze hai.n is na.e zamaane ke
ab kahaa.n machalte hai.n chaa.nd ke liye bachche
kho ga.e ta.assub ke be-karaa.n a.ndhero.n me.n
shahr kii fazaa.o.n me.n mere gaa.nv ke bachche
do-gha.Dii la.Daa.ii hai phir vahii safaa.ii hai
ham ba.Do.n se achchhe hai.n be-shu.uur se bachche
ik qadam bhii phir aage mai.n na chal sakaa 'shaahid'
jab ka.Dii masaafat me.n yaad aa ga.e bachche

Hafeez Shahid
Nazm

adhura TukDa

kyuu.n mujhe terii chaah hai
us ko kyuu.n puuchhiye

Azmatullah Khan
Nazm

hadsat

ashk-baarii na puuchhiye ham se
aa.nkh saavan kii raat lagtii hai

Ashraf Baqri
Nazm

ehtimam-e-huzuri

dil me.n hujuum-e-shauq-o-tamannaa abhii se hai
aa.nkho.n me.n ik suruur kii duniyaa abhii se hai
haazir nahii.n hu.e hai.n abhii bazm-e-dost me.n
lekin KHayaal-e-mahv-e-tamaashaa abhii se hai
anfaas me.n abhii se hai ik hashr-e-iztiraab
ehsaas me.n qayaamat-e-suGraa abhii se hai
har har KHayaal me.n hai abhii se bahaar-e-husn
har har nazar me.n barq-e-tajallii abhii se hai
bazm-e-tasavvuraat kaa aalam na puuchhiye
zoro.n pe mehr-o-maah kaa dhokaa abhii se hai
kitne hijaab hai.n nigah-e-shauq par abhii
aur saamne vo chehra-e-zebaa abhii se hai
saaqii nahii.n sharaab nahii.n mai-kada nahii.n
lekin fazaa me.n mastii-e-sahbaa abhii se hai
vo aaftaab-e-husn abhii ruu-ba-ruu nahii.n
hastii tamaam rashk-e-surayyaa abhii se hai
KHud husn ne diyaa bhii nahii.n hai javaab-e-ishq
aur ishq hai ki husn-e-saraapaa abhii se hai
vo aa.e bhii nahii.n hai.n nigaaho.n ke saamne
ho.nTo.n pe ik latiif saa shikva abhii se hai
hai.n kitnii duur husn kii aaGosh-e-naaz se
lekin supurdagii kii tamanna abhii se hai
aur phir is ehtimaam-e-huzuurii ke baavajuud
kyaa jaane kyo.n firaaq kaa KHatra abhii se hai

Kaif Moradaabadi
Nazm

mobile

ik jaaduu.ii khilaunaa haatho.n pe dhar liye hai.n
bachche javaan buu.Dhe sab is se khelte hai.n
aa.nkhe.n ga.Dii hu.ii hai.n aur u.ngliyaa.n hai.n raqsaa.n
duniyaa kii sair is me.n sab lutf ke hai.n saamaa.n
tasviir o film is me.n youtube radio bhii
bhaashan bhajan tilaavat naGmaat-e-radio bhii
camera-o-conferencing hai.n ehtimaam saare
har ghar me.n har galii me.n is ke Gulaam saare
sach puuchhiye to ye hai jaaduu kaa ik khilaunaa
hai is me.n sar khapaanaa umr-e-aziiz khonaa
gumraahiyo.n ke raste is me.n khule hu.e hai.n
is raah-e-ilm me.n bhii Daaku chhupe hu.e hai.n
miilo.n kii duuriyaa.n hai.n pal me.n ubuur kartaa
dil duuriyaa.n bhii achchhaa hotaa jo duur kartaa

Mohammad Asadullah
Nazm

urdu

hai shahad se bhii miiThii urdu zabaa.n hamaarii
sach puuchhiye to ye hai taskiin-e-jaa.n hamaarii
dil kaa suruur hai ye aa.nkho.n kaa nuur hai ye
urdu zabaa.n ke ham hai.n urdu zabaa.n hamaarii
hindostaa.n se chal kar europe pahu.nch ga.ii hai
duniyaa pe chhaa rahii hai urdu zabaa.n hamaarii
ham hindiyo.n ne is ko sau chochalo.n se paalaa
urdu hai aaj vaahid qaumii zabaa.n hamaarii
vaahid ho qaum apnii vaahid zabaan apnii
be-shak jabhii karegaa izzat jahaa.n hamaarii
jab tak jiye.nge KHidmat urdu kii ham kare.nge
urdu hai zindagii kii ruuh-o-ravaa.n hamaarii
aasaan aur shiirii.n dilchasp aur piyaarii
hai har zabaa.n se ba.Dh kar urdu zabaa.n hamaarii

Nishtar Jalandhari
Nazm

meayar-e-sukun

mahaaz-e-jang se lauTe hu.e sipaahii se
jo puuchhiye ki hai bachcho.n kaa shor-o-GauGaa kyaa
to vo kahegaa ki ye shor hai sukuu.n kaa amii.n
sivaa.e is ke hai raahat kii aur duniyaa kyaa
magar clerk jo daftar se shaam ko lauTe
isii savaal kaa shaayad javaab ye degaa
sukuun-e-qalb kaa dushman ye gul-Gapaa.Daa hai
ye rog vo hai jo ik roz jaan le legaa

Akhtar Bastavi
Nazm

faiz ke nam

fikr-e-ma.aal hai kise fardaa kii fikr hai
do gaz zamii.n bahut hai mire jism ke liye
vaqt-e-safar na puuchhiye kyuu.nkar ki ham chale
'ahd-e-vafaa ko to.D ke qaid-e-jafaa hu.e
manzil tumhaarii aaKHirash aisii na thii kabhii
kahte na the ki aasmaa.n ro.egaa ek din
ahl-e-sitam kafan ko bhii tarse.nge ek din
daar-o-rasan kii bazm sajegii na phir kabhii
maqtal me.n hogii chaar-suu haq aur sach kii dhuum
ik din havaa ke zor ko honaa hai KHatm-shud
baad-e-sabaa machal ke sunaa.egii ye KHabar
ruKHsat KHizaa.n kaa baaG-e-jahaa.n se nasiib hai
ab jashn-e-nau-bahaar kii aamad qariib hai

Ahmar Nadeem
Nazm

urdu zaban

ye kaisaa ishq hai urdu zabaa.n kaa,
mazaa ghultaa hai lafzo.n kaa zabaa.n par
ki jaise paan me.n mah.ngaa qimaam ghultaa hai
ye kaisaa ishq hai urdu zabaa.n kaa....
nasha aataa hai urdu bolne me.n
gilaurii kii tarah hai.n mu.nh lagii sab istelaahe.n
lutf detii hai, halaq chhuutii hai urdu to, halaq se jaise mai kaa gho.nT utartaa hai
ba.Dii aristocracy hai zabaa.n me.n
faqiirii me.n navaabii kaa mazaa detii hai urdu
agarche ma.anii kam hote hai urdu me.n
alfaaz kii ifraat hotii hai
magar phir bhii, buland aavaaz pa.Dhiye to bahut hii mo'tabar lagtii hai.n baate.n
kahii.n kuchh duur se kaano.n me.n pa.Dtii hai agar urdu
to lagtaa hai ki din jaa.Do.n ke hai.n khi.Dkii khulii hai, dhuup andar aa rahii hai
ajab hai ye zabaa.n, urdu
kabhii kahii.n safar karte agar ko.ii musaafir sher pa.Dh de 'miir', 'Gaalib' kaa
vo chaahe ajnabii ho, yahii lagtaa hai vo mere vatan kaa hai
ba.Dii shaa.ista lahje me.n kisii se urdu sun kar
kyaa nahii.n lagtaa ki ek tahziib kii aavaaz hai, urdu

Gulzar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now