Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ruko"

Nazm MATCHES FOR "ruko"

Nazm

daraKHt-e-zard

to mai.n kyaa kah rahaa thaa ya.anii kyaa kuchh sah rahaa thaa mai.n
amaa.n haa.n mez par yaa mez par se bah rahaa thaa mai.n
ruko mai.n be-sar-o-paa apne sar se bhaag niklaa huu.n
ilaa yaa ayyuhal-abjad zaraa ya.anii zaraa Thahro
There is an absurd i in absurdity shaayad
kahii.n apne sivaa ya.anii kahii.n apne sivaa Thahro
tum is absurdity me.n ik radiif ik qaafiya Thahro

Jaun Eliya
Nazm

tumhein pyar hai, to yaqin do,

tumhe.n pyaar hai, to yaqiin do,
mujhe na kaho, tumhe.n pyaar hai, mujhe dekhne kii na zid karo,
tumhe.n fikr ho, mire haal kii,
ko.ii guftuguu ho malaal kii,
jo KHayaal ho, na kiyaa karo,
na kahaa karo mirii fikr hai
mai.n aziiz-tar huu.n jahaan se
yaa iimaan se, na kahaa karo,
na likhaa karo mujhe varaq par, kisii farsh par,
na udaas ho, na hii KHush raho
mujhe soch kar, yaa kharoch kar, merii yaad ko na aavaaz do,
mujhe KHat me.n likh ke KHudaa.o.n kaa na do vaasta
tumhe.n pyaar me.n na qaraar hai, mujhe is zabaa.n kaa yaqiin nahii.n
kuchh aur ho, jo sunaa na ho, jo kahaa na ho jo likhaa na ho
to yaqiin ho!
ruko aur tho.Daa saa zabt lo, mujhe soch lene ko vaqt do,
chalo yuu.n karo mire vaaste ki buland-o-baalaa imaarato.n kaa lo jaa.eza
jo falak ko bosa lagaa rahii ho.n imaarate.n,
jo tumhaare pyaar se le rahii ho.n mushaabahate.n
jo ho sab se ziyaada buland-o-baalaa alag-thalag
use sar karo,
use chhat talak, haa.n yahii.n ruko, ye vo hii hai chhat,
zaraa saa.ns lene ko qayaam lo, miraa naam lo,
to safar kii saarii thakan yahii.n pe utaar lo,
ab! mire tumhaare jo darmiyaa.n me.n hai faasla, vo zaraa saa hai,
vo miTaa sako, to Guruur Dhaatii bulandiyo.n ko phalaa.ng do!
tumhe.n pyaar hai to yaqiin do!!

Arif Ishtiaque
Nazm

eid

magar ruko zaraa Thahro ye siskiyaa.n kaisii
KHushii ki rut me.n dukho.n kii ye badliyaa.n kaisii
suno ye Gaur se maa.e.n bilak rahii hai.n kahii.n
ye dekho bachcho.n kii aa.nkhe.n chhalak rahii hai.n kahii.n
kisii ke eid ke jo.De me.n hai kafan aayaa
kahii.n pe zaKHmo.n se lipTaa hu.aa badan aayaa
ko.ii to khilne se pahle kalii ko luuT gayaa
kahii.n daraKHt hii apnii zamii.n se TuuT gayaa
kis ne kar diye paamaal saaya-daar shajar
ja.De.n kahii.n pe kaTii.n aur kahii.n bache na samar

Shifa Kajgavnwi
Nazm

mujhe taqsim kar do

apnii zabaan
mire maathe se mirii naak kii siidh par
niiche kii taraf
aahista aahista le kar chalo
haa.n aise yuu.n
bahut aahista bilkul chyuu.nTii kii tarah
re.ngtii hu.ii
tumhaarii zabaan mire jism ke biicho.n-biich
jaise tum mujhe aadhaa kar rahe ho
peT ke ubhaar se hote hu.e
naaf ke ubhaar se hote hu.e
naaf ke raaste se
pe.Duu ke ubhaar par Thahar jaa.o
ab to merii saa.ns cha.Dhne lagii hai
yahaa.n se
Dhalvaan shuruu.a ho jaatii hai
pichhlaa to saaraa raasta siidhaa hii thaa
tumhaarii zabaan
ab tak apnii ek ek sarak me.n
kitne jaam pilaa chukii hai
jaante ho
is lams kaa nasha sharaab hii jaisaa to hai
ek ghuu.nT do
zabaan yahii.n rahne do
ek ghuu.nT le luu.n
ye jab mire halq se niiche utregii
tum nahii.n jaan sakte
tumhe.n bataa duu.n to bhii to kyaa mere andar
sarsaraate hu.e
un saa.npo.n ko dekh sakoge
jo tumhaarii zabaan ke sarakne ke saath saath
ek ek jumbish par mere andar
phunkaarte hai.n
mujh par ek saath vaar karte hai.n
haa.n ruko nahii.n
is Dhalaan se niiche bhii to jaanaa hai
niiche aur niiche jahaa.n
tumhaarii zabaan tho.Dii der
sustaa.egii
aur phir mujhe do hisso.n me.n
taqsiim kar degii

Azra Abbas
Nazm

har jada-e-shahr

shahr kii ik ik sa.Dak
phaa.nktii aa.ii hai laakho.n haadso.n kii sard dhuul
jaane kitne ajnabii ik duusre ke dost ban.ne se kinaara kar ga.e
aur kitne aashnaa.o.n ke dilo.n se miT ga.ii pahchaan bhii
sau nigaahe.n laakh zaKHm
chaar-samtii laakh jhuuT
sau tamaasho.n ke pa.De hai.n jaa-ba-jaa dhabbe
jinhe.n
gard-e-masaafat me.n chhupaane ke liye
barq-paa lamho.n ko thaame dau.Dte jaate hai.n ham
lamhe do lamhe ko dam lene kii KHaatir sust ho jaa.e.n agar
shahr kii ik ik sa.Dak
aa.nkho.n se KHuu.n rulvaa.egii
aur banaa kar ham ko bhii ik daastaa.n
dohraa.e gii
haa.nptii tahziib ke ik ik musaafir se kahegii
dau.Dte jaa.o yahii hai zindagii
mat ruko ik duusre ke vaaste
bhaagtaa hai vaqt
lekin lamha lamha
dau.Dnaa hai sab ko
lekin tanhaa tanhaa

Rajinder Manchanda Bani
Nazm

sharik-e-gham

bahut maGruur ho tum bhii
mohabbat ko samajhte ho
ki jaise dhuul paa.nv kii
ki jaise KHaak raaho.n kii
magar jaanaa.n zaraa socho
ruko lamhe ko aur dekho
kahii.n aisaa na ho jaa.e
tumhaaraa dil badal jaa.e
sataa.e yaad chaahat kii
ye aa.nsuu rog ban jaa.e.n
tumhe.n aur ham ko ta.Dpaa.e.n
zaraa Thahro mirii sun lo
ki mai.n tum ko samajhtii huu.n
zaraa tum se ziyaada hii
mujhe parvaa nahii.n apnii
nahii.n hai maslahat ko.ii
kahii.n aisaa na ho jaa.e
bahut saa vaqt bah jaa.e
aur aisaa mo.D aa jaa.e
jahaa.n se raasta ko.ii bhii
mujh tak tum ko na laa.e

Shaista Mufti
Nazm

be-KHwab masafat

ek do pal to zaraa aur ruko
aisii jaldii bhii bhalaa kyaa hai chale jaanaa tum
shaam mahkii hai abhii aur na palko.n pe sitaare jaage
ham sar-e-raah achaanak hii sahii
muddato.n baa'd mile hai.n to na milne kii shikaayat kaisii
fursate.n kis ko mayassar hai.n yahaa.n
aa.o do-chaar qadam aur zaraa saath chale.n
shahr-e-afsurda ke maathe pe bujhii shaam kii raakh
zard patto.n me.n simaTtii dekhe.n
phir usii KHaak-ba-daamaa.n pal se
apne guzre hu.e kal kii KHush-buu
lamha-e-haal me.n shaamil kar ke
apnii be-KHvaab masaafat kaa izaala kar le.n
apne hone kaa yaqii.n
aur na hone kaa tamaashaa kar le.n
aaj kii shaam sitaaraa kar le.n

Khalid Moin
Nazm

baDa shahr

ka.ii baar mai.n ne samundar kii bhiigii havaa.o.n se puuchhaa
ki ai KHush-nafas rahravo
tum is tarah begaana-vash kyuu.n guzartii ho
pal bhar ruko
ko.ii taskii.n kaa paiGaam do
aur apnaa ye amrit saa haath
dukhe dil pe rakh do

Zia Jalandhari
Nazm

KHwabon se rishta

mere hamraaz ai mire hamdam
mere saathii mire shariik-e-safar
is qadar kyo.n niDhaal ho bolo
is qadar kyo.n udaas ho bolo
tum ne KHvaabo.n se rishta kyo.n to.Daa
aur aa.nkhe.n thakan se chuur hai.n kyo.n
kyo.n qadam ruk ga.e mire saathii
hai safar to abhii bahut baaqii
aur manzil bahut hai duur abhii
kuchh bataa.o ki kyo.n KHamosh ho tum
kyo.n bhaTakne lage KHayaalo.n me.n
ye na samjho ki dukh tumhaaraa hai
ye na socho ki tum akele ho
har qadam par tumhaare saath huu.n mai.n
laa.o de do tum apne dukh saare
mai.n tumhaare Gamo.n ko pyaar karuu.n
aur talvo.n ke aablo.n ko bhii
apne ashko.n se KHud mai.n saaf karuu.n
jitne kaa.nTe chubhe.n hai.n chun luu.n mai.n
phir ko.ii KHvaab bhar duu.n aa.nkho.n me.n
taabnaakii hayaat ko de duu.n
raste-raste ko murG-zaar karuu.n
jis se raahat mile tumhe.n hamdam
jis se saa.nse.n bhii mushk-baar bane.n
phuul ho.nTo.n pe muskuraa uTThe.n
aur uma.nge.n javaan ho.n jis se
hausla tum ko jis se mil jaa.e
aur aa.nkhe.n tumhaarii KHvaab bune.n
jis se tum faaslo.n ko tai kar lo
reg-zaaro.n me.n muskuraa ke chalo
raah-e-manzil me.n tum kabhii na ruko
ki
jo manzil pukaartii hai tumhe.n
vahii manzil hai merii manzil bhii
merii jannat tumhaarii KHushiyaa.n hai.n
tum ne samjhaa hai jis ko KHaak-e-paa
vo chamakte hu.e sitaare hai.n
un sitaaro.n se maa.ng mai.n ne bharii
un sitaaro.n se zindagii hai mirii
un sitaaro.n se zarfishaa.n hai hayaat
mere lab par hai.n pyaar kii sargam
un se khilte hai.n aarizo.n pe ka.nval
un se aa.nkho.n me.n KHvaab palte hai.n
jin se din laa-javaab hote hai.n
laa.o de do tum apne dukh saare
mai.n tumhaare Gamo.n ko pyaar karuu.n
hausla tum ko jis se mil jaa.e
aur aa.nkhe.n tumhaarii KHvaab bune.n

Anwar Afaqi
Nazm

zarurat kya hai

is qadar ham se gurezaa.n kyuu.n ho
kuchh nahii.n ham hai.n faqat aks-e-KHayaal
ek tasviir kaa dhu.ndlaa saa nishaa.n
harf-o-ma.anii ke pur-asraar tasalsul me.n kahii.n
an-kahii baat kaa ehsaas-e-ziyaa.n
ajnabii shahar me.n chalte chalte raasta haath paka.D le to ruko
jis tarah tez havaa aa ke dariiche pe kabhii
dastake.n detii hai chup chaap palaT jaatii hai
aur guzargaah-e-samaa.at me.n faqat guu.njte hai.n
us ke qadmo.n ke nishaa.n
jo yaqii.n hai.n na gumaa.n
kisii ik lamha-e-guzraa.n kii haqiiqat kyaa hai
kaar-e-ulfat bhii agar kaar-e-aziyyat hai to phir
aaKHir is kaar-e-aziyyat kii zaruurat kyaa hai

Shaheen Mufti
Nazm

visal

raat guzrii
aur shafaq phuulii to mai.n ne
cha.Dhte suuraj kii kalaa.ii
thaam kar us se kahaa
bhaa.ii ruko
tum do qadam aage ba.Dhe to
aasmaa.n shaayad giregaa
KHashmagii.n nazro.n se mujh ko
dekh kar suuraj ne aa.nkhe.n
pher lii.n dhiire se bolaa
aasmaa.n har raat girtaa hai
magar dono.n kabhii milte nahii.n hai.n!

Satyapal Anand
Nazm

dars-e-amal

uTTho qadam qadam se milaate chale chalo
sab mil ke ek raah banaate chale chalo
manzil kii dhun me.n jhuumte gaate chale chalo
har marhale ko sahl banaate chale chalo
ban kar ghaTaa fazaa.o.n pe chhaate chale chalo
har har qadam pe dhuum machaate chale chalo
tafriiq-e-rang-o-nasl miTaate chale chalo
insaaniyat kii shaan dikhaate chale chalo
aage ba.Dho ruko na kisii rahguzaar par
har dam safar kaa lutf uThaate chale chalo
maayuusiyo.n me.n chhe.D do naGme umiid ke
taariikiyo.n me.n jot jagaate chale chalo
TuuTe hu.e dilo.n ko mohabbat se jo.D do
jauhar amal ke apne dikhaate chale chalo
dhartii bhii jagmagaa uThe aakaas kii tarah
raato.n me.n vo charaaG jalaate chale chalo
chamko gagan ke taaro.n kii suurat zamiin par
tum aasmaa.n zamii.n ko banaate chale chalo
patjha.D kii rut me.n phuul khilaanaa kamaal hai
patjha.D kii rut me.n phuul khilaate chale chalo
badle KHizaa.n 'naziir' chaman me.n bahaar se
vo giit zindagii ke sunaate chale chalo

Saadat Nazeer
Nazm

chor sipahi

pocket u.Daa ke chor ko.ii bhaagtaa hu.aa
ik roz ik police ke shikanje me.n aa gayaa
ye soch kar ki Gair u.Daataa hai maal-e-tar
fauran Gariib chor ke piichhe nikal pa.Daa
aavaaz de ke us se kahaa ai miyaa.n ruko
jaate kahaa.n ho maal liye apne baap kaa
sun kar sadaa sipaahii kii vo chor chau.nk kar
raftaar aur tez kii aur dau.Dtaa rahaa
ye soch kar ki chor mirii maantaa nahii.n
Gusse me.n bhar ke aur bhii vo surKH ho gayaa
kahne lagaa ki KHud ko samajhtaa hai kyaa runner
hargiz na mere haath se tuu bach ke jaa.egaa
tujh ko dikhaa.uu.n aaj mai.n hotii hai kyaa running
chal jaa.egaa tujhe bhii pata chiiz huu.n mai.n kyaa
piichhaa kiyaa jo chor kaa police ne dau.D kar
josh-e-junuu.n me.n chor ke aage nikal gayaa

Mohammad Asadullah
Nazm

charagh ugne ke din nahin hain

zamaa.n kii gardish
KHutuut jitne bhii amn-o-ulfat ke tum ne ham ko diye hai.n ab tak
zaraa ruko to
hame.n bataa.o
tumhaare lafzo.n kii aastiino.n me.n kyaa chhupaa hai
vo koh-e-kaafii qabiila jis ne
na.e zamaano.n ko surKH chaadar se Dhaa.np lene kaa
hukm saadir kiyaa hai phir se
vo nochtaa hai un aa.ino.n ko
ki jin pe suuraj kaa aks chhalke to raushnii ho
KHudaa ke ghar me.n
KHaraab haalo.n ne dars dene kii Thaan lii hai
hamaare aa.nsuu bhii kuchh KHasaaro.n ko jazb kar ke
hazaaro.n sajdo.n pe jam ga.e hai.n
har ik galii me.n hai shor itnaa
azaane.n ghar tak pahu.nch na paa.e.n
hamaarii tahziib aur rivaayat mirii pa.Dii hai
har ek gumbad pe sard lahje saje hu.e hai.n
hai darj un par
ye log saare jahannamii hai.n
hamaare bachche namaaz pa.Dhne se Dar rahe hai.n
nigaahe.n sab kii tamaash-biino.n ne baa.nT lii hai.n
hiraa se aatii hu.ii havaa.o.n ko bosa dene kii aarzuu me.n
bahut se rasto.n ne dhuul phuu.nkii
bahut se gho.Do.n ne jaa.n ga.nvaa dii
zamaa.n kii gardish
hai yaad ham ko
arab kii miTTii pe dhuup barsii to aag bha.Dkii
falak se utrii thii.n aabshaare.n
bahut se fitne bhii jal bujhe the
vahii dhu.aa.n phir se uTh rahaa hai
zamii.n pe jin ne baqaa kaa parcham uThaa rakhaa hai
shariir bachche hai.n kuufiyo.n ke
zamaa.n kii gardish
zaraa suno to
bahut hai.n tuufaa.n zamii.n hai banjar
mirii sadaa ke nahiif sho.ale gavaah rahnaa
gavaah rahnaa
charaaG ugne ke din nahii.n hai.n charaaG ugne ke din nahii.n hai.n

nawed malik
Nazm

kufa-mizaj

ruko mohabbat ke KHaanvaade ke shaahzaade
ruko kahaa.n ujlato.n me.n jaane.n luTaa rahe ho
kahaa.n lahuu se charaaG raushan kiye kha.De ho
ye kaise logo.n se ‘ahd-e-ulfat nibhaa rahe ho
ye log vo hai.n jo tere zaKHmo.n ko ghaav kar ke
havaa.e.n de.nge sharar ko KHud hii alaav kar ke
tirii vafaa kaa junuu.n salaamat ho taa-qayaamat
ye log lekin vafaa.e.n beche.nge bhaav kar ke
suno mohabbat ke KHaanvaade ke shaahzaade
ye dhyaan rakhnaa ki tum se pahle hame.n junuu.n thaa
hame.n junuu.n thaa ki is qabiile me.n jaa.n luTaa.e.n
hame.n junuu.n thaa ki vahshato.n se sukuu.n banaa.e.n
vo ham the sahraa ko jo samundar banaa rahe the
vo ham the jo pattharo.n ko dha.Dkan sikhaa rahe the
magar ye kuufa-mizaaj logo.n kii 'aadate.n hai.n
imaam un kii vafaa kii KHaatir 'alam uThaa.e
imaam apne lahuu se sahraa me.n rang laa.e
to ye qabiila yaziid kii saf me.n jaa rukegaa
tumhii Galat the tumhii Galat ho tumhe.n kahegaa
suno mohabbat ke KHaanvaade ke shaahzaade
ye bevafaa.ii kaa silsila hai nahii.n rukegaa

Noman Badr
Nazm

talluq ab bujha do

mire jugnuu
ruko apne badan se merii KHushbuu jhaa.D Daalo
ta.alluq chand ghanTo.n ke liye mujh se bujhaa do
aur apnii aa.nkh me.n ujle dino.n ke naqsh khii.ncho
mirii baato.n kaa har ik lams dho Daalo
mire jugnuu
kabhii school me.n ye mat bataanaa
ki huu.n mazduur kaa beTaa
vagarna saare bachche bojh basto.n kaa
tumhaare kaa.ndho.n kaa.ndho.n gaa.De.nge
mire vo KHvaab jo mai.n ne
tumhaare zard maathe par bune hai.n
unhe.n ghar aane se pahle udhe.De.nge
mire beTe mire jugnuu
ta.alluq ab bujhaa do

nawed malik
Nazm

justuju ka ehtijaj

abhii ruko
shikaayate.n sunaane do
shaguufa-e-badan zaraa sii der me.n nikhaarnaa

Abdullah Saqib
Nazm

raqib se!

aajizii siikhii Gariibo.n kii himaayat siikhii
yaas-o-hirmaan ke dukh-dard ke ma.anii siikhe
zer-dasto.n ke masaa.ib ko samajhnaa siikhaa
sard aaho.n ke ruKH-e-zard ke ma.anii siikhe

Faiz Ahmad Faiz
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now