Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "samaa.at"

Nazm MATCHES FOR "samaa.at"

Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

jaun-eliya se aaKHri mulaqat

vo ek tarz-e-suKHan kii KHushbuu
vo ek mahkaa hu.aa takallum
labo.n se jaise gulo.n kii baarish
ki jaise jharnaa saa gir rahaa ho
ki jaise KHushbuu bikhar rahii ho
ki jaise resham ulajh rahaa ho
ajab balaaGat thii guftuguu me.n
ravaa.n thaa dariyaa fasaahato.n kaa
vo ek maktab thaa aagahii kaa
vo ilm-o-daanish kaa mai-kada thaa
vo qalb aur zehn kaa tasaadum
jo guftuguu me.n ravaa.n-davaa.n thaa
vo us ke alfaaz kii ravaanii
vo us kaa ruk ruk ke baat karnaa
vo sho.ala-e-lafz aur ma.aanii
kahii.n lapaknaa kahii.n Thaharnaa
Thahar ke phir vo kalaam karnaa
bahut se jazbo.n kii parda-daarii
bahut se jazbo.n ko aam karnaa
jo mai.n ne puuchhaa
guzishta shab ke mushaa.ere me.n bahut se shaidaa.ii muntazir the
mujhe bhii ye hii pata chalaa thaa ki aap tashriif laa rahe hai.n
magar hu.aa kyaa
zaraa tavaqquf ke baa'd bole nahii.n gayaa mai.n
na jaa sakaa mai.n
suno hu.aa kyaa
mai.n KHud ko maa.il hii kar na paayaa
ye merii haalat merii tabii.at
phir us pe merii ye bad-mizaajii-o-bad-havaasii
ye vahshat-e-dil
miyaa.n haqiiqat hai ye bhii sun lo ki ab hamaare mushaa.ere bhii
nahii.n hai.n un vahshato.n ke haamil
jo merii taqdiir ban chukii hai.n
jo merii tasviir ban chukii hai.n
jo merii taqsiir ban chukii hai.n
phir ik tavaqquf
ki jis tavaqquf kii kaifiyat par garaa.n samaa.at guzar rahii thii
us ek saa.at kaa haath thaame ye ik vazaahat guzar rahii thii
adab-farosho.n ne jaahilo.n ne mushaa.ere ko bhii ik tamaasha banaa diyaa hai
Gazal kii taqdiis luuT lii hai adab ko mujraa banaa diyaa hai
suKHan-varo.n ne bhii jaane kyaa kyaa hamaare hisse me.n rakh diyaa hai
sitam to ye hai ki chiiKH ko bhii suKHan ke zumre me.n rakh diyaa hai
ilaahii tauba
samaa.ato.n me.n KHaraashe.n aane lagii hai.n ab aur shigaaf zehno.n me.n pa.D ga.e hai.n
miyaa.n hamaare qadam to kab ke zamii.n me.n KHiffat se ga.D ga.e hai.n
KHamoshiyo.n ke dabiiz kohre se chand lamho.n kaa phir guzarnaa
vo jaise KHud ko udaasiyo.n ke samundaro.n me.n talaash karnaa
vo jaise phir surma.ii ufuq par sitaare alfaaz ke ubharnaa
ye zindagii se jo be-niyaazii hai kis liye hai
ye roz-o-shab kii jo bad-havaasii hai kis liye hai
bas itnaa samjho
ki KHud ko barbaad kar chukaa huu.n
suKHan to aabaad KHair kyaa ho
magar jahaa.n dil dha.Dak rahe ho.n vo shahr aabaad kar chukaa huu.n
bachaa hii kyaa hai
thaa jis ke aane kaa KHauf mujh ko vo ek saa.at guzar chukii hai
vo ek saf.ha ki jis pe likkhaa thaa zindagii ko vo kho chukaa hai
kitaab-e-hastii bikhar chukii hai
pa.Dhaa thaa mai.n ne bhii zindagii ko
magar tasalsul nahii.n thaa us me.n
idhar-udhar se yahaa.n vahaa.n se ajab kahaanii ga.Dhii ga.ii thii
samajh me.n aa.ii na is liye bhii ke darmiyaa.n se pa.Dhii ga.ii thii
samajhtaa kaise
na falsafii mai.n na ko.ii aalim
uquubato.n ke safar pe niklaa mai.n ik sitaara huu.n aagahii kaa
ajal ke haatho.n me.n haath Daale ik isti.aara huu.n zindagii kaa
itaab naazil hu.aa hai jis par mai.n vo hii ma.atuub aadmii huu.n
sitamgaro.n ko talab hai jis kii mai.n vo hii matluub aadmii huu.n
kabhii mohabbat ne ye kahaa thaa mai.n ek mahbuub aadmii huu.n
magar vo zarb-e-jafaa pa.Dii hai ki ek mazruub aadmii huu.n
mai.n ek bekal saa aadmii huu.n bahut hii bojhal saa aadmii huu.n
samajh rahii hai ye duniyaa mujh ko mai.n ek paagal saa aadmii huu.n
magar ye paagal ye niim-vahshii KHirad ke maaro.n se muKHtalif hai
jo kahnaa chaahaa thaa kah na paayaa
kahaa gayaa jo use ye duniyaa samajh na paa.ii
na baat ab tak kahii ga.ii hai
na baat ab tak sunii ga.ii hai
sharaab-o-sh.er-o-shu.uur kaa jo ik ta'alluq hai us ke baare me.n raa.e kyaa hai
sunaa hai ham ne ki aap par bhii bahut se fatve lage hai.n lekin
sharaab-noshii haraam hai to
ye mas.ala bhii ba.Daa ajab hai
mai.n ek mai-kash huu.n ye to sach hai
magar ye mai-kash kabhii kisii ke lahuu se sairaab kab hu.aa hai
hamesha aa.nsuu piye hai.n us ne hamesha apnaa lahuu piyaa hai
ye bahs chho.Do haraam kyaa hai halaal kyaa hai azaab kyaa hai savaab kyaa hai
sharaab kyaa hai
aziyyato.n se najaat hai ye hayaat hai ye
sharaab-o-shab aur shaa.irii ne ba.Daa sahaaraa diyaa hai mujh ko
sambhaal rakkhaa sharaab ne aur rahii hai mohsin ye raat merii
isii ne mujh ko diye dilaase sunii hai is ne hii baat merii
hamesha mere hii saath jaagii hamesha mere hii saath so.ii
mai.n KHush hu.aa to ye muskuraa.ii mai.n ro diyaa to ye saath ro.ii
ye sher-go.ii hai KHud-kalaamii kaa ik zariiya
isii zariiye isii vasiile se mai.n ne KHud se vo baate.n kii hai.n
jo duusro.n se mai.n kah na paayaa
haraam kyaa hai halaal kyaa hai ye sab tamaashe hai.n muftiyo.n ke
ye saare fitne hai.n maulvii ke
haraam kar dii thii KHud-kushii bhii ki apnii marzii se mar na paa.e
ye mai-kashii bhii haraam Thahrii ki ham ko apnaa lahuu bhii piine kaa haq nahii.n hai
ki apnii marzii se ham ko jiine kaa haq nahii.n hai
kise bataa.e.n
zamiir-o-zarf-e-bashar pe mauquuf hai.n masaa.il
samundaro.n me.n u.nDel jitnii sharaab chaahe
na harf paanii pe aa.egaa aur na us kii taqdiis KHatm hogii
to mai-kashii ko haraam kahne se pahle dekho
ki piine vaale kaa zarf kyaa hai hai.n kis ke haatho.n me.n jaam-o-miinaa
ye nukta-sanjii ye nukta-daanii jo maulvii kii samajh me.n aatii to baat bantii
na diin-o-maz.hab ko jis ne samjhaa na jis ne samjhaa hai zindagii ko
tahuuraa piine kii baat kar ke haraam kahtaa hai mai-kashii ko
jo diin-o-maz.hab kaa zikr aayaa to mai.n ne puuchhaa
ki is havaale se raa.e kyaa hai
ye KHud-parastii KHudaa-parastii ke darmiyaa.n kaa jo faasla hai
jo ik KHalaa hai ye kyaa balaa hai
ye diin-o-maz.hab faqat kitaabe.n
ba-juz kitaabo.n ke aur kyaa hai
kitaabe.n aisii jinhe.n samajhne kii koshishe.n kam hai.n aur ziyaada pa.Dhaa gayaa hai
kitaabe.n aisii ki aam insaa.n ko in ke pa.Dhne kaa haq hai lekin
inhe.n samajhne kaa haq na hargiz diyaa gayaa hai
ki in kitaabo.n pe diin-o-maz.hab ke Thekedaar ijaara-daaro.n kii dastaras hai
isii liye to ye diin-o-maz.hab fasaad-o-fitna bane hu.e hai.n
ye diin-o-maz.hab
jo ilm-o-hikmat ke saath ho to sukuun hogaa
jo dastaras me.n ho jaahilo.n kii junuun hogaa
ye ishq kyaa hai ye husn kyaa hai
ye zindagii kaa javaaz kyaa hai
ye tum ho jii jii ke mar rahe ho ye mai.n huu.n mar mar ke jii rahaa huu.n
ye raaz kyaa hai
hai kyaa haqiiqat majaaz kyaa hai
sivaa.e KHvaabo.n ke kuchh nahii.n hai
ba-juz saraabo.n ke kuchh nahii.n hai
ye ik safar hai tabaahiyo.n kaa udaasiyo.n kii ye rahguzar hai
na is ko duniyaa kaa ilm ko.ii na is ko apnii ko.ii KHabar hai
kabhii kahii.n par nazar na aa.e kabhii har ik shai me.n jalva-gar hai
kabhii ziyaa.n hai kabhii zarar hai
na KHauf is ko na kuchh KHatar hai
kabhii KHudaa hai kabhii bashar hai
hu.aa haqiiqat se aashnaa to ye suu-e-daar-o-rasan gayaa hai
kabhii ha.nsaa hai ye zer-e-KHanjar kabhii ye suulii pe ha.ns diyaa hai
kabhii ye gulnaar ho gayaa hai sinaa.n pe guftaar ho gayaa hai
kabhii hu.aa hai ye Garq-e-dariyaa
kabhii ye taqdiir-e-dasht-o-sahraa
raqam hu.aa hai ye aa.nso.o.n me.n
kabhii lahuu ne hai is ko likkhaa
hikaayat-e-dil hikaayat-e-jaa.n hikaayat-e-zindagii yahii hai
agar saliiqe se likkhii jaa.e ibaarat-e-zindagii yahii hai
ye husn hai us dhanak kii suurat
ki jis ke ra.ngo.n kaa falsafa hii kabhii kisii par nahii.n khulaa hai
ye falsafa jo fareb-e-paiham kaa silsila hai
ki is ke ra.ngo.n me.n ik ishaara hai be-ruKHii kaa
ik isti.aara hai zindagii kaa
kabhii alaamat hai shoKHiyo.n kii
kabhii kinaaya hai saadgii kaa
badalte mausam kii kaifiyat ke hai.n rang pinhaa.n isii dhanak me.n
kashish sharaarat-o-jaazbiyyat ke shoKH ra.ngo.n ne is dhanak ko ajiib paikar ataa kiyaa hai ik aisaa manzar ataa kiyaa hai
ki jis ke sehr-o-asar me.n aa kar
lahuu bahut aa.nkhe.n ro chukii hai.n bahut to biinaa.ii kho chukii hai.n
basaarte.n kyaa basiirate.n bhii to aql-o-daanaa.ii kho chukii hai.n
na jaane kitne hii rang maKHfii hai.n is dhanak me.n
bas ek ra.ng-e-vafaa nahii.n hai.n
is ek ra.ngat kii aarzuu ne lahuu rulaayaa hai aadmii ko
yahii bataayaa hai aagahii ko
ye ik chhalaavaa hai zindagii kaa
hasiin dhoka hai zindagii kaa
magar muqaddar hai aadmii kaa
fareb-e-gandum samajh me.n aayaa to mai.n ne jaanaa
ye ishq kyaa hai ye husn kyaa hai
ye ek laGzish hai jis ke dam se hayaat-e-nau kaa bharam khulaa hai

Tariq Qamar
Nazm

lahu ka suragh

kahii.n nahii.n hai kahii.n bhii nahii.n lahuu kaa suraaG
na dast-o-naaKHun-e-qaatil na aastii.n pe nishaa.n
na surKHi-e-lab-e-KHanjar na ra.ng-e-nok-e-sinaa.n
na KHaak par ko.ii dhabbaa na baam par ko.ii daaG
kahii.n nahii.n hai kahii.n bhii nahii.n lahuu kaa suraaG
na sarf-e-KHidmat-e-shaahaa.n ki KHuu.n-bahaa dete
na dii.n kii nazr ki bai.aana-e-jazaa dete
na razm-gaah me.n barsaa ki mo'tabar hotaa
kisii alam pe raqam ho ke mushtahar hotaa
pukaartaa rahaa be-aasraa yatiim lahuu
kisii ko bahr-e-samaa.at na vaqt thaa na dimaaG
na mudda.ii na shahaadat hisaab paak hu.aa
ye KHuun-e-KHaak-nashiinaa.n thaa rizq-e-KHaak hu.aa

Faiz Ahmad Faiz
Nazm

wahi narm lahja

vahii narm lahja
jo itnaa mulaa.em hai jaise
dhanak giit ban ke samaa.at ko chhuune lagii ho
shafaq narm komal suro.n me.n ko.ii pyaar kii baat kahne chalii ho
kis qadar rang-o-aahang kaa kis qadar KHuubsuurat safar
vahii narm lahja
kabhii apne maKHsuus andaaz me.n mujh se baate.n karegaa
to aisaa lage
jaise resham ke jhuule pe ko.ii madhur giit halkore lene lagaa ho
vahii narm lahja
kisii shoKH lamhe me.n us kii ha.nsii ban ke bikhre
to aisaa lage
jaise qaus-e-quzah ne kahii.n paas hii apnii paazeb chhankaa.ii hai
ha.nsii ko vo rim-jhim
ki jaise fazaa me.n banafshii chamakdaar buu.ndo.n ke ghu.nghruu chhanakne lage ho.n
ki phir
us kii aavaaz kaa lams paa ke
havaa.o.n ke haatho.n me.n an-dekhe ka.ngan khanakne lage ho.n
vahii narm lahja mujhe chhe.Dne par jab aa.e
to aisaa lagegaa
jaise saavan kii chanchal havaa
sabz patto.n ke jhaa.njhan pahan
surKH phuulo.n kii paa.el bajaatii hu.ii
mere ruKHsaar ko
gaahe gaahe sharaare se chhuune lage
mai.n jo dekhuu.n palaT ke to vo
bhaag jaa.e magar
duur pe.Do.n me.n chhup kar ha.nse
aur phir nanhe bachcho.n kii maanind KHush ho ke taalii bajaane lage
vahii narm lahja
ki jis ne mire zaKHm-e-jaa.n pe hamesha shagufta gulaabo.n kii shabnam rakhii hai
bahaaro.n ke pahle parinde kii maanind hai
jo sadaa aane vaale na.e sukh ke mausam kaa qaasid banaa hai
usii narm lahje ne phir mujh ko aavaaz dii hai

Parveen Shakir
Nazm

shahar-bano ke liye ek nazm

tumhe.n jab dekhtaa huu.n
to mirii aa.nkho.n pe ra.ngo.n kii phuvaare.n pa.Dne lagtii hai.n
tumhe.n suntaa huu.n
to mujh ko qadiimii mandiro.n se ghanTiyo.n aur masjido.n se vird kii aavaaz aatii hai
tumhaaraa naam letaa huu.n
to sadiyo.n qabl ke laakho.n sahiifo.n ke muqaddas lafz meraa saath dete hai.n
tumhe.n chhuu luu.n
to duniyaa-bhar ke resham kaa mulaa.em-pan mirii poro.n ko aa kar gudgudaataa hai
tumhe.n gar chuum luu.n
to mere ho.nTo.n par uluuhii aasmaanii naa-chashiida zaa.iqe yuu.n phail jaate hai.n
ki us ke baa'd mujh ko shahd bhii phiikaa saa lagtaa hai
tumhe.n jab yaad kartaa huu.n
to har har yaad ke sadqe me.n ashko.n ke parinde chuum kar aazaad kartaa huu.n
tumhe.n ha.nstii hu.ii sun luu.n
to saato.n sur samaa.at me.n samaa kar raqs karte hai.n
kabhii tum ruuThtii ho
to mirii saa.nse.n aTakne aur dha.Dkan thamne lagtii hai

Rehman Faris
Nazm

tere baad

mirii nigaah ko ab bhii tirii zaruurat hai
dil-e-tabaah ko ab bhii tirii zaruurat hai
KHarosh-e-naala ta.Daptaa hai terii furqat me.n
sukuut-e-aah ko ab bhii tirii zaruurat hai
ye sub.h-o-shaam tirii justujuu me.n phirte hai.n
ki mehr-o-maah ko ab bhii tirii zaruurat hai
bahaar-e-zulf pareshaa.n liye hai gulshan me.n
gul-o-giyaah ko ab bhii tirii zaruurat hai
zamaana Dhuu.nD rahaa hai ko.ii nayaa tuufaa.n
sukuun-e-raah ko ab bhii tirii zaruurat hai
vo valvale vo uma.nge.n vo justujuu na rahii
tirii sipaah ko ab bhii tirii zaruurat hai
KHirad KHamosh junuu.n be-KHarosh hai ab tak
dil-o-nigaah ko ab bhii tirii zaruurat hai
bayaa.n ho Gam kaa fasaana dil-e-tapaa.n se kahaa.n
ye baar uTThegaa mirii jaan-e-naa-tavaa.n se kahaa.n
milaa na phir kahii.n lutf-e-kalaam tere ba.ad
hadiis-e-shauq rahii naa-tamaam tere ba.ad
jo tere dast-e-havaadis shikan me.n dekhii thii
vo teG phir na hu.ii be-niyaam tere ba.ad
bujhii bujhii sii tabii.at hai baada-KHvaaro.n kii
udaas udaas hai.n miinaa-o-jaam tere ba.ad
banaa hai harf-e-shikaayat sukuut-e-laala-o-gul
badal gayaa hai chaman kaa nizaam tere ba.ad
adaa-e-husn kaa lutf-e-KHiraam be-ma.anii
suruud-e-shauq kii lazzat haraam tere ba.ad
taras ga.ii hai samaa.at tirii sadaa.o.n ko
sunaa na phir kahii.n teraa payaam tere ba.ad
vo inqalaab kii ruu phir palaT ga.ii afsos
buland baam hai.n phir zer-e-daam tere ba.ad
misaal-e-najm-e-sahar jagmagaa ke Duub gayaa
hame.n safiina kinaare lagaa ke Duub gayaa

Saifuddin Saif
Nazm

nae sal ki pahli nazm

dukh kaa shab KHuu.n roz adhuuraa rah jaataa hai
aur shanaaKHt kaa lamha biittaa jaataa hai
mai.n aur meraa shahr-e-mohabbat
taariikii kii chaadar o.Dhe
raushnii kii aahaT par kaan lagaa.e kab se baiThe hai.n
gho.Do.n kii Taapo.n ko sunte rahte hai.n
had-e-samaa.at se aage jaane vaalii aavaazo.n ke resham se
apnii ruu-e-siyaah pe taare kaa.Dhte rahte hai.n
a.ngushtaa ne ik ik kar ke chhalnii hone ko aa.e
ab baarii a.ngusht-e-shahaadat kii aane vaalii hai
sub.h se pahle vo kaTne se bach jaa.e to!

Parveen Shakir
Nazm

tajdid

ab mire shaane se lag kar kis liye rotii ho tum
yaad hai tum ne kahaa thaa
''jab nigaaho.n me.n chamak ho
lafz jazbo.n ke asar se kaa.npte ho.n aur tanaffus
is tarah uljhe.n ki jismo.n kii thakan KHushbuu bane
to vo gha.Dii ahd-e-vafaa kii saa.at-e-naayaab hai
vo jo chupke se bichha.D jaate hai.n lamhe hai.n masaafat
jin kii KHaatir paa.nv par pahre biThaatii hai
nigaahe.n dhund ke pardo.n me.n un ko Dhuu.nDtii hai.n
aur samaa.at un kii miiThii narm aahaT ke liye
daaman bichhaatii hai''
aur vo lamha bhii tum ko yaad hogaa
jab havaa.e.n sard thii.n aur shaam ke maile kafan par haath rakh kar
tum ne lafzo.n aur ta'alluq ke na.e ma.anii bataa.e the, kahaa thaa
''har gha.Dii apnii jagah par saa.at-e-naayaab hai
haasil-e-umr-e-gurezaa.n ek bhii lamha nahii.n
lafz dhoka hai.n ki un kaa kaam iblaaG-e-ma.aanii ke alaava kuchh nahii.n
vaqt ma.anii hai jo har lahza na.e chehre badaltaa hai
jaane vaalaa vaqt saaya hai
ki jab tak jism hai ye aadmii ke saath chaltaa hai
yaad misl-e-nutq paagal hai ki is ke lafz ma.anii se tahii hai.n
ye jise tum Gam aziyyat dard aa.nsuu
dukh vaGaira kah rahe ho
ek lamhaatii ta.assur hai tumhaaraa vahm hai
tum ko meraa mashvara hai, bhuul jaa.o tum se ab tak
jo bhii kuchh mai.n ne kahaa hai''
ab mire shaane se lag kar kis liye rotii ho tum!

Amjad Islam Amjad
Nazm

sham ka pahla tara (2)

merii us shaam ke taare se mulaaqaat bahut gahrii thii
mai.n ne taare kii rifaaqat me.n shagun kitne liye
aaj dekhaa nahii.n taaraa mai.n ne
aaj kii shaam jo roz aataa hai shaayad nahii.n aa.e
raasta bhuul na jaa.e
aaj to jald nikal aayaa hai taaraa meraa
aaj kii raat mulaaqaat milegii mujh ko
an-kahe lafzo.n kii sauGaat milegii mujh ko
mai.n ne taare kii rifaaqat me.n shagun kitne liye
ab mai.n tanhaa huu.n
baras biit ga.e hai.n kitne
ko.ii taaraa nahii.n dekhaa mai.n ne
duur kii chiiz zaraa dhundlii nazar aatii hai
merii KHvaabiida samaa.at ko jagaane ke liye
sirf aavaaz-e-azaa.n aatii hai
ab shagun kaahe se luu.n
kis ke aane kii umiide.n baa.ndhuu.n
kis ke jaane se pareshaan rahuu.n

Zehra Nigaah
Nazm

mere purkhon ki pahli dua

itnii afsurda aavaaz mere KHudaa
merii pahlii samaa.at pe likkhii ga.ii
merii pahlii hii saa.nso.n me.n gholaa gayaa
in shikasta se lahjo.n kaa zahriilaa-pan

Ishrat Afreen
Nazm

meri ramaen adhuri hai abhi

merii raamaa.en adhuurii hai abhii
merii siitaa
aur mujh me.n haa.il duurii hai abhii
merii siitaa udaas hai
rishto.n kaa phailaa ban-baas hai
phirnaa hai mujhe abhii
ja.ngal jangal sahraa sahraa saagar saagar
meraa hamza vahii meraa lachhman hai abhii
zamaana to ayyaar hai
sau bhes badal letaa hai
saadhuu.o.n ke bahruup me.n hai.n poshiida abhii
na jaane raakshash kitne
aaj phir
zamaane ne chhal liyaa hai mujhe
merii siitaa ko
haalaat ke raavan ne
har liyaa hai abhii
duur bahut duur
merii nigaaho.n se ojhal
saahil samundar kii ret par
vo be-sudh pa.Dii ro rahii hai abhii
taaham
apnii shikasta haalii se
is ne haar nahii.n maanii hai abhii
vaqt ke lankeshvar ke aage
us ne aatm samarpan kiyaa nahii.n hai abhii
riit me.n dha.nsii apnii nannhii sii kashtii ko
vo tak rahii hai Gaur se
apne raam ke qadmo.n kii aahaT
kii muntazir samaa.at ko sameTe hu.e
saraapaa-bagosh banii
dukh kii bhaTTii me.n tap ke nikhar rahii hai abhii
milan kii shubh gha.Dii kaa use abhii hai yaqiin
is ke KHushk ho.nTo.n pe hai meraa hii naam
raam raam raam
saahibo
haqiiqat to ye hai ki raakshas baahar nahii.n hai kahii.n
raakshas to KHud apne andar
daruun-e-KHaana-e-dil me.n ruu-posh hai kahii.n
merii siitaa
merii bholii bhaalii siitaa ko
intizaar us sunahre pul kaa hai
jab meraa Gussa shaant hogaa
aur mere andar se
mariyaada purush raam utpann ho.nge kabhii na kabhii
tab raavan apne aap hii paraast ho jaa.egaa
tabhii raam jii apnii siitaa ko
apne pahluu me.n uThaa kar le jaa.e.nge
apne dil ke singhaasan par biThaa.e.nge tabhii
tabhii diip jale.nge
ghar aa.ngan me.n uupar niiche chaaro.n aur
tabhii din dasahraa hogaa
tabhii raat diivaalii hogii

Perwaiz Shaharyar
Nazm

depression

KHauf ke jaziire me.n.. qaid huu.n mai.n barso.n se
duur tak fasiile.n hai.n
aur un pe lohe kii uu.nchii uu.nchii baa.De.n hai.n,
nok-daar kiile.n hai.n
Daaltaa kamande.n huu.n... jail ke kinaaro.n par...
KHaar-daar taaro.n par
siiTiyaa.n sii bajtii hai.n der tak samaa.at me.n
pahre-daar aate hai.n
be.Diyaa.n sii sajtii hai.n
paa.nv ko uThaanaa, bhii haath ko hilaanaa bhii
jism bhuul jaataa hai
jurm bhii nahii.n ma.aluum, umr bhii nahii.n ma.aluum
kuchh pataa nahii.n mujh ko... us taraf fasiilo.n ke
kis qadar samundar hai
kashtiyaa.n bhii chaltii hai.n, baadbaa.n bhii khulte hai.n
nuur ke jahaa.n bhii hai.n, jism ke makaa.n bhii hai.n,
aadmii vahaa.n bhii hai.n
chho.Diye, nahii.n jaate
kyaa kare.nge baahar bhii...
Thiik hai fasiilo.n me.n
aa.nsu.o.n kii jhiilo.n me.n chaa.nd ko utaare.nge
be-hisii ke Tiilo.n par naqsh-e-paa ubhaare.nge
maut ke glamour me.n Duub Duub jaa.e.nge
qabr ke a.ndhere se raat ko sajaa.e.nge
maut kaa fasurda-pan kitnaa KHuubsuurat hai
ik jahaa.n udaasii kaa bas mirii zaruurat hai!

Mansoor Aafaque
Nazm

Tadfin

tadfiin
chaar taraf sannaaTe kii diivaare.n hai.n
aur markaz me.n ik taaza taaza qabr khudii hai
ko.ii janaaza aane vaalaa hai
kuchh aur nahii.n to aaj shahaadat kaa kalma sun.ne ko milegaa
kaano.n ke ik sadii puraane qufl khule.nge
aaj mirii qallaash samaa.at ko aavaaz kii daulat arzaanii hogii
diivaaro.n ke saa.e me.n ik bahut ba.Daa amboh numaayaa.n hotaa hai
jo aahista aahista qabr kii jaanib aataa hai
in logo.n ke qadmo.n kii ko.ii chaap nahii.n hai
lab hilte hai.n lekin harf sadaa ban.ne se pahle mar jaate hai.n
aa.nkho.n se aa.nsuu jaarii hai.n
lekin aa.nsuu to vaise bhii
dil o dimaaG ke sannaaTo.n kii timsaale.n hote hai.n
mayyat qabr me.n utrii hai
aur hadd-e-nazar tak log bilakte hu.e dikhaa.ii dete hai.n
aur sirf dikhaa.ii dete hai.n
aur kaan dharo to sannaaTe hii sunaa.ii dete hai.n
jab qabr mukammal ho jaatii hai
ik buu.Dhaa jo ''vaqt'' nazar aataa hai apne huliye se
haatho.n me.n uThaa.e katba qabr pe jhuktaa hai
jab uThtaa hai to katbe kaa har harf garajne lagtaa hai
ye lauh-e-mazaar ''aavaaz'' kii hai!

Ahmad Nadeem Qasmi
Nazm

KHizan mausam nahin hai

KHizaa.n mausam nahii.n hai
ek lamha hai ki jis kii aarzuu me.n
sabz patte
havaa kii aahaTo.n par kaan dharte hai.n
guzarte vaqt me.n saa.at-ba-saa.at
na.e pairaahano.n me.n
gulaabii aur gahre surKH unnaabii
dahakte KHushnumaa ra.ngo.n se le kar zard hone tak
kabhii dhiime kabhii uu.nche suro.n me.n baat kartii
KHushbu.o.n me.n bas-basaa kar
havaa ke saath mahv-e-raqs honaa chaahte hai.n
zamii.n kaa rizq ban jaane se pahle
vahii ik ajnabii vaaraftagii aur raqs kaa lamha
kahii.n par daur-e-aa.inda ke mausam kii samaa.at me.n
kisii so.e hu.e ik biij me.n
KHvaahish numuu kii sar uThaatii hai
bahut hii pyaar se har shaaKH ke patte se kahtii hai
ki ab rizq-e-zamii.n ban kar
kisii ik narm ko.npal kii numuu kaa aasraa ban jaa
KHizaa.n mausam nahii.n hai
ik masarrat-KHez taKHliiq-e-amal kaa aasraa hai

Pirzada Qasim
Nazm

ye jo tanhai

ye jo tanhaa.ii hai shaayad mirii tanhaa.ii na ho
guu.njnaa ho na samaa.at me.n sukuut
aur shab-o-roz kii na.ash
merii dahliiz pe ayyaam ne dafnaa.ii na ho
anginat phuul hii khilte ho.n
ik shajar molrii kaa ho kahii.n jis ke tale
yaar aGyaar gale milte ho.n
aan pahu.nche ho.n KHushii ke mausam
raah takte ho.n mirii
aur mujh tak kisii baa.is ye KHabar aa.ii na ho
ho ke KHush ha.nste hu.e ahbaab tamaam
bhejte ho.n mujhe kab se paiGaam
Dhuu.nDte ho.n mujhe betaabaana
raah takte ho.n mirii
aur mujh tak kisii baa.is ye KHabar aa.ii na ho

Fahmida Riaz
Nazm

an-paDh gunge ka rajaz

dushman ahmaq ho to meraa Gussa ba.Dhaa detaa hai
saqaahat merii mu.ayyana maqtuul hai
aur KHush-fahmii muqarrara mazbuuh
merii chi.nghaa.D suur-e-israafiil kaa pesh-aaha.ng hai
lafz kii minminaahaT se paak
andhe sayyaaro.n ke Takraa.o kii maafauq-e-samaa.at ga.Dga.DaahaT
aavaaz kii mukammal minhaa.ii kaa shor
likhe hu.e lafz ko bhii shaq kar detaa hai
ye ibaarate.n tumhaaraa saf-basta lashkar hai.n
farzii hathiyaaro.n se musallah ye lashkar
jise KHayaalii qilo.n ke brij giraane kaa ba.Daa tajraba hai
is kii naa-buudii merii ek chup ke faasle par hai

Ahmad Javaid
Nazm

mohabbat KHwab jaisi hai

kisii bhii aa.nkh kii putlii pe chupke se
utartii hai nishaa.n saa chho.D jaatii hai
yaqii.n ke rang dhu.ndlaa kar
gumaa.n saa chho.D jaatii hai
mohabbat kaa ko.ii kulliya ko.ii qaanuun
logo.n kii samajh me.n aa nahii.n saktaa
ko.ii bhii us ke gahre bhed hargiz paa nahii.n saktaa
chamaktii dhuup kii in chilchilaatii zard taaro.n se
banaa hai us ko fitrat ne
ye sab ra.ngo.n se bartar hai
magar har rang us me.n ghul gayaa goyaa
chhu.o to haath kii pore.n gulaabii ho.n
samaa.at me.n utartii dhiimii dhiimii chaap jaisii hai
kitaab-e-ziist ke bhuule hu.e se baab jaisii hai
mohabbat KHvaab jaisii hai

Fakhira batool
Nazm

tafsil masafat ki

kab duur talak dekhaa
larzaa.n thii zamii.n kis pal
kab suu-e-falak dekhaa
kab dasht kii tanhaa.ii
aa.nkho.n me.n utar aa.ii
kab vahm samaa.at thii
kab kho ga.ii goyaa.ii
kis mo.D pe hairaa.n the
kis raah me.n viiraa.n the
ijmaal haqiiqat ke
shaayad na raqam ho.nge

Fahmida Riaz
Nazm

chashm-e-be-KHwab ko saman bahut

chashm-e-be-KHvaab ko saamaan bahut!
raat-bhar shahr kii galiyo.n me.n havaa
haath me.n sang liye
KHauf se zard makaano.n ke dha.Dakte dil par
dastake.n detii chalii jaatii hai
raushnii band kivaa.Do.n se nikalte hu.e ghabraatii hai
har taraf chiiKH sii chakraatii hai
hai.n mire dil ke liye dard ke unvaan bahut

Amjad Islam Amjad
Nazm

mulaqat

baad ek muddat ke
ajnabii se chehro.n me.n
KHvaab KHvaab aa.nkho.n me.n
dard kii samaa.at me.n
be-dilii kii saa.at me.n
ek ajnabii suurat
aashnaa nazar aa.ii
KHvaab KHvaab aa.nkho.n me.n
raushnii sii lahraa.ii
dard kii samaa.at ne
dil kii kuchh KHabar paa.ii
us ne garm-joshii se haath bhii milaayaa thaa
baad ek muddat ke mai.n bhii muskuraayaa thaa
us ne mere shaane ko chuum hii liyaa aaKHir
mai.n bhii ek lamhe ko jhuum hii liyaa aaKHir
aa.o ik zaraa sii der lawn hii me.n Tahle.nge
jo bhii kahnaa sun.naa hai ho sakaa to kah le.nge
shaayad ek muddat kii bekalii bhii kal paa.e
aur hamaarii qismat se chaa.nd bhii nikal aa.e
ik udaas sannaaTaa aur shab zamistaa.n kii
be-suKHan kahii ham ne baat dard-e-pinhaa.n kii
chaa.nd ne bhii chupke se kuchh kahaa to thaa ham se
mere uljhe baalo.n se us kii zulf-e-barham se
vo thii chaa.nd thaa mai.n thaa
yuu.n to kitne chehre the
apnii zaat ke andar
ham sabhii akele the
sard sard ik chehra
zard zard ik chehra
gard gard ik chehra
dard-yaafta chehre hijr-yaafta chehre
jaise ruu-ba-ruu apne aa.iine se rakkhe the

Pirzada Qasim
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now