Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "taa.nbe"

Nazm MATCHES FOR "taa.nbe"

Nazm

rishwat

is giraanii me.n bhalaa kyaa Guncha-e-iimaa.n khile
jau ke daane saKHt hai.n taa.nbe ke sikke pil-pile
jaa.e.n kap.De ke liye to daam sun kar dil hile
jab garebaa.n taa-ba-daaman aa.e to kap.Daa mile

Josh Malihabadi
Nazm

aasar-e-qadima

ek patthar kii adhuurii muurat
chand taa.nbe ke puraane sikke
kaalii chaa.ndii ke ajab se zevar
aur ka.ii kaa.nse ke TuuTe bartan
ek sahraa mile
zer-e-zamii.n
log kahte hai.n ki sadiyo.n pahle
aaj sahraa hai jahaa.n
vahii.n ik shahr hu.aa kartaa thaa
aur mujh ko ye KHayaal aataa hai
kisii taqriib
kisii mahfil me.n
saamnaa tujh se miraa aaj bhii ho jaataa hai
ek lamhe ko
bas ik pal ke liye
jism kii aa.nch
uchaTtii sii nazar
surKH bindiyaa kii damak
sarsaraahaT tirii malbuus kii
baalo.n kii mahak
be-KHayaalii me.n kabhii
lams kaa nanhaa saa phuul
aur phir duur tak vahii sahraa
vahii sahraa ki jahaa.n
kabhii ik shahr hu.aa kartaa thaa

Javed Akhtar
Nazm

fana

duniyaa me.n ko.ii shaad ko.ii dard-naak hai
yaa KHush hai yaa alam ke sabab siina-chaak hai
har ek dam se jaan kaa har-dam tapaak hai
naapaak tan paliid najis yaa ki paak hai
jo KHaak se banaa hai vo aaKHir ko KHaak hai
hai aadmii kii zaat kaa us jaa ba.Daa zuhuur
le arsh taa-ba-farsh chamaktaa hai jis kaa nuur
guzre hai un kii qabr pe jab vahsh aur tuyuur
ro ro yahii kahe hai har ik qabr ke huzuur
jo KHaak se banaa hai vo aaKHir ko KHaak hai
duniyaa se jab ki ambiyaa aur auliyaa uThe
ajsaam-e-paak un ke isii KHaak me.n rahe
ruuhe.n hai.n KHuub jaan me.n ruuho.n ke hai.n maze
par jism se to ab yahii saabit hu.aa mujhe
jo KHaak se banaa hai vo aaKHir ko KHaak hai.n
vo shaKHs the jo saat vilaayat ke baadshaah
hashmat me.n jin kii arsh se uu.nchii thii baargaah
marte hii un ke tan hu.e galiyo.n kii KHaak-e-raah
ab un ke haal kii bhii yahii baat hai gavaah
jo KHaak se banaa hai vo aaKHir ko KHaak hai
kis kis tarah ke ho ga.e mahbuub-e-kaj-kulaah
tan jin ke misl-e-phuul the aur mu.nh bhii rashk-e-maah
jaatii hai un kii qabr pe jis-dam mirii nigaah
rotaa huu.n jab to mai.n yahii kah kah ke dil me.n aah
jo KHaak se banaa hai vo aaKHir ko KHaak hai
vo gore gore tan ki jinho.n kii thii dil me.n jaa.e
hote the maile un ke ko.ii haath gar lagaa.e
so vaise tan ko KHaak banaa kar havaa u.Daa.e
ronaa mujhe to aataa hai ab kyaa kahuu.n mai.n haa.e
jo KHaak se banaa hai vo aaKHir ko KHaak hai
umdo.n ke tan ko taa.nbe ke sanduuq me.n dharaa
muflis kaa tan pa.Daa rahaa maaTii-upar pa.Daa
qaa.em yahaa.n ye aur na saabit vo vaa.n rahaa
dono.n ko KHaak khaa ga.ii yaaro kahuu.n me.n kyaa
jo KHaak se banaa hai vo aaKHir ko KHaak hai
gar ek ko hazaar ruupe kaa milaa kafan
aur ek yuu.n pa.Daa rahaa hai be-kas barhana-tan
kii.De mako.De khaa ga.e dono.n ke tan-badan
dekhaa jo ham ne aah to sach hai yahii suKHan
jo KHaak se banaa hai vo aaKHir ko KHaak hai
jitne jahaa.n me.n naach hai.n ka.ngnii se taa-gehuu.n
aur jitne meva-jaat hai.n tar KHushk guunaaguu.n
kap.De jahaa.n talak hai.n sapiida o siyah numuu.n
kim-KHvaab taash baadila kis kis kaa naam luu.n
jo KHaak se banaa hai vo aaKHir ko KHaak hai
jitne daraKHt dekho ho buuTe se taa-ba-jhaa.D
ba.D piipal aa.nb niib chhu.aaraa khajuur taa.D
sab KHaak ho.nge jab ki fanaa Daalegii ukhaa.D
kiyaa buuTe Dhe.Dh paat ke kyaa jhaa.D kyaa pahaa.D
jo KHaak se banaa hai vo aaKHir ko KHaak hai
jitnaa ye KHaak kaa hai tilismaat ban rahaa
phir KHaak us ko hotaa hai yaaro judaa judaa
tarkaarii saag paat zahr amrit aur davaa
zar siim kau.Dii laal zamurrad aur in savaa
jo KHaak se banaa hai vo aaKHir ko KHaak hai
ga.D.h coat top rahakla teG o kamaan-o-tiir
baaG-o-chaman mahall-o-makaanaat dil-paziir
honaa hai sab ko aah isii KHaak me.n KHamiir
merii zabaa.n pe ab to yahii baat hai 'naziir'
jo KHaak se banaa hai vo aaKHir ko KHaak hai

Nazeer Akbarabadi
Nazm

naya sal

yak-ba-yak faasle taa.nbe kii tarah bajne lage
qadam uThte hai.n to zarre bhii sadaa dene lage

Ahmad Nadeem Qasmi
Nazm

ek sham

nadii ke larazte hu.e paaniyo.n par
thiraktii hu.ii shoKH kirno.n ne chi.ngaariyaa.n ghol dii hai.n
thakii dhuup ne aa ke lahro.n kii phailii hu.ii na.ngii baa.nho.n pe apnii laTe.n khol dii hai.n
ye juu-e-ravaa.n hai
ki bahte hu.e phuul hai.n jin kii KHushbu.e.n giito.n kii siskaariyaa.n hai.n
ye pighle hu.e zard taa.nbe kii chaadar pe uljhii hu.ii silvaTe.n hai.n
ki zanjiir-haa-e-ravaa.n hai.n
bas ik shor-e-tuufaa.n
kinaaraa na saahil
nigaaho.n kii had tak
salaasil salaasil
ki jin ko uThaa.e hu.e Doltii pankhu.Diyo.n ke safiine bahe jaa rahe hai.n
bahe jaa rahe hai.n
kahii.n duur in ghor a.ndhero.n me.n jo faaslo.n kii ridaa.e.n lapeTe kha.De hai.n
jahaa.n par abad kaa kinaaraa hai aur ik vo gaa.nv
vo ganne ke kyaaro.n pe aatii hu.ii Daak gaa.Dii ke bhore dhu.e.n kii chhichhaltii sii chhaa.nv

Majeed Amjad
Nazm

unche darje ka sailab

zamii.n kaa husn sabza hai
magar ab sabz pate zard ho kar jha.Dte jaate hai.n
bahaare.n dair se aatii hai.n
jugnuu hai na titlii KHushbuu.o.n... se rang ruuThe hai.n
jahaa.n jangal hu.aa karte the aur baarish dhanak le kar utartii thii
jahaa.n barsaat me.n koyal, papiihe chahchahaate the
vahaa.n ab KHaak u.Dtii hai
daraKHto.n kii kamii se aa ga.ii hai dhuup me.n shiddat
fazaa kaa mehrbaa.n haala pighaltaa jaa rahaa hai
aasmaa.n taa.nbe me.n Dhaltaa jaa rahaa hai
is liye be-mehr mausam ab sataate hai.n
dhu.e.n ke, gard ke, aaluudgii ke, shor ke mausam
galii, kuucho.n, gharo.n me.n kaar-KHaano.n me.n bas ab
sa.Dak par shor bahtaa hai
sunaa.ii hii nahii.n detaa hamaaraa dil jo kahtaa hai
mohabbat kaa parinda aaj-kal KHaamosh rahtaa hai
parinde pyaas me.n Duube hai.n aur paanii nahii.n piite
ki dariyaa.o.n kii shiryaano.n me.n ab shaffaaf paanii kii jagah aaluudgii kaa zahr hai
hame.n jab bahr o bar kii hukmaraanii dii ga.ii hai to ye ham ko sochnaa hogaa
zamiino.n, paaniyo.n, maahaul kii biimaariyo.n kaa ko.ii mudaavaa hai
kahii.n in kaa sabab ham to nahii.n bante?
sabab ko.ii bhii ho aaKHir mudaavaa kuchh to karnaa hai
ye tasviir-e-jahaa.n hai rang is me.n ham ko bharnaa hai

Ghulam Mohammad Qasir
Nazm

bahaar

taa.nbe ke varaq ko ThanThanaane

Majeed Amjad
Nazm

mahbuba

merii mahbuuba to hai
granite kaa ek pahaa.D
jis ke daaman me.n phuul nahii.n rakhe jaa sakte
aur jis ke saamne ko.ii aa.nsuu nahii.n bahaa saktaa
merii mahbuuba to hai
taa.nbe kii ek kaan
jab vo sotii hai
to is ke ghar kii diivaare.n
baahar kaa farsh
aur ghar ke saamne lagaa hu.aa favvaara
surKH ho jaataa hai

Zeeshan Sahil
Nazm

la-hasil

malgaje se dhu.ndalke me.n jab tum university se
lauT rahe hote ho
vahii.n campus ke baahar
mai.n bhii to baiThii hotii huu.n
kabhii na KHatm hone vaale intizaar me.n
mai.n tumhe.n dekh rahii hotii huu.n
aur tum
paas se aise guzar jaate ho
jaise vaaqif hii na ho
mai.n vahii.n dahliiz pe baiThii rah jaatii huu.n
phir pul ke paas se jab tum guzarte hu.e
Duubte suuraj ko ek nazar dekhte ho
duur kahii.n us Duubte suuraj kii surKH taa.nbe aisii raushnii se tumhaarii dahaktii jabii.n par
jab daraa.De.n pa.Dne lagtii hai.n
mai.n tab bhii tumhe.n dekh rahii hotii huu.n
galii kaa bulb raushan karte hu.e
ek pal ke liye soch me.n pa.D jaatii huu.n
ab bhalaa mere liye mann-o-salvaa kyo.n utarne lagaa
mai.n darvaaza khole zindagii kaa intizaar kartii huu.n
magar vo mere haath nahii.n aatii

Janan Malik
Nazm

dar-asl ye nazm likhi hi nahin gai

ba.az baate.n bahut ma.amuulii hotii hai.n
magar un ke daa.nt puure jiivan ko kaaTte rahte hai.n
ye ek nazm ke darmiyaan hu.aa aaGaaz thaa jo iKHtitaam tak pahu.nchne se pahle hii puurii nazm samet gum ho gayaa
shaayad ba.az bahut ma.amuulii baato.n ke daa.nt ek puurii nazm ke jiivan ko musalsal kaaTte rahne ke liye ho.nge
so tumhaarii nazm gum ho ga.ii 'hamesh'
so tum bhii gum ho jaa.o 'hamesh'
an-dekhii tahdaariyo.n me.n gum ho jaa.o 'hamesh'
is se pahle ki kisii aavaaz ke daa.nt adam-e-taariik me.n kau.nd jaa.e.n
kyuu.n na tum abhii ye jaan lo ki
ma.amuulii se ma.amuulii baat apne hisse kii aavaaz se guzar ga.e na jaan.ne vaale ke liye to baazgasht ban jaatii hai
magar jaan.ne vaale ke liye maut ke daa.nt
varna ye usii kaa to saundarya jahaa.n-guziida hai ki
dhuup itnii dhu.aa.n-dhaar gir rahii hai ki bijlii ke khambe aur chale ga.e hai.n
ab kabhii kuchh nahii.n sunaa.ii de sakegaa
pahle bhii kyaa sunaa.ii diyaa hogaa
ki ek abhaagii samaa.at ko ek ghanTe kii nasha gumaan zarb-e-naadiida
yaa tiin minute kii sukuut-e-KHush-gavaar Thokar par rakh liyaa hogaa
aur kahaa gayaa ki ab intizaar na karnaa ki ab bahut ho chukaa ki nahii.n chaahiye ki jo kabhii chaahiye thaa
so jis raah par aaj tum udaas maqsuum baiThe ho
is se tumhaare hisse kii ko.ii man-chaahii raah to ke nahii.n miltii
vo ko.ii aur zamaana rahaa hogaa
varna kahaa.n kii chambal nadii aur kahaa.n us kaa paanii
aur kabhii kinaare se Daalaa hu.aa puraanaa taa.nbe kaa paisa us kii tah me.n pa.Daa nazar aa rahaa thaa
to vahaa.n ab tak kitnii hii haasid sautelii parchhaa.iyo.n kaa nuzuul hu.aa hogaa
tumhaare aa.nsu.o.n ke sa.nkan ko an-dekhii miTTii me.n dabaa ke uupar se paaT dene ke liye
so gum ho jaa.o 'hamesh'
us kii nazar se aur apnii nazar se bhii
aisaa to kabhii nahii.n hu.aa hogaa
ki agar kisii ne KHudaa ko nahii.n dekhaa
to kyaa KHudaa ne bhii kisii ko nahii.n dekhaa
ki agar ko.ii KHudaa se nahii.n milaa
to kyaa KHudaa bhii kisii se nahii.n milaa
phir vo kaun hai jo apne jazb ke hissa kii aasmaanii ka.nghii mol le ke apne sar ke beach
maa.ng kaa.Dhtaa hai
us samay jab us ke Gam-diida hisse kii duniyaa me.n us ke lutf-e-naadiida kii baarish ho rahii hotii hai
yaa shaayad kisii jahaan-e-aasuuda kii ummiid me.n kisii jahaan-e-naa-aasuuda se guzarnaa pa.Dtaa hai
tab vaapas le jaane ke liye aayato.n se shukr ke ek daane ko sameT ke
apnii jagah le jaane vaalii chiyuu.nTiyo.n ke jamaav se puraanii yaado.n me.n mahfuuz rakhii
haathiyo.n kii qataar se e'tibaar-e-adam me.n zam honaa pa.Dtaa hai
bhuul jaa.o ki tum us ke liye siyaah guluu-band me.n chamakte tiin nago.n me.n se kisii ek nag me.n bhii shaamil ho sakoge

Ahmad Hamesh
Nazm

lafz paron ki tarah hote hain

tamaam din tumhaare messages mere dil kii mu.nDero.n par kabuutaro.n kii tarah utarte hai.n
safed duudhiyaa siyaah chashm sharbatii aur surma.ii maa.il ja.ngalii kabuutar jin ke siine ke baal
ka.ii rango.n me.n damakte hai.n
sabz-guu.n niilguu.n aur taabdaar tapte hu.e taa.nbe ke jaise

Janan Malik
Nazm

ahad-nama-e-imroz

aur phir yuu.n hu.aa
chaar aafaaq se ik ghanaa abr uThaa
aur vaadii pe ik saa.ebaa.n kii tarah tan gayaa
aur zamii.n jaise tapne lagii
aur vaadii ke sab log ghabraa ga.e
aisii aavaaz me.n jaise sakraat me.n saa.ns kii fasl ko
kaaTtaa ho ko.ii
ibn-e-aadam ko sab ne pukaaraa ki
ye maut ke kaale dhakne kii maanind aa.nkho.n pe rakkhaa hu.aa
abr kaisaa hai?
tannuur par ek taa.nbe kii thaalii kii maanind taptii zamii.n kis liye!
dekh ham log aise larazte hai.n siino.n me.n iimaan
jaise larazte ho.n
ye kaisaa aaseb hai!!
in kii aavaaz lauT aa.ii
phir kaa.npte tilmilaate dha.Dakte dilo.n se ye sab ne sunaa
''abr se zahr barsegaa
taptii zamii.n aur dahkegii
vaadii kaa har Guncha mar jaa.egaa
KHaak ke rahm me.n saa.ns letaa hu.aa aafriinash kaa har biij
mar jaa.egaa''
ye sadaa.e.n ufuq-taa-ufuq guu.nj uThii.n
aur sab ne sunii.n
un me.n daanaa bhii the
jin kii daanaa.iyaa.n tan-barhana ku.nvaarii kaniizo.n kii maanind
lab-basta thii.n
aur vo log bhii in me.n maujuud the
kashmakash jin ke dil kii gunahgaar jismo.n ke
ma.asuum bachcho.n kii maanind hairaan thii
aur kitne hii vo bhii the
ma.asuumiyat jin kii faulaad-paikar Gulaamo.n kii maanind
maqtuul thii
aur phir yuu.n hu.aa
sab kii nazre.n uThii.n jis taraf
apne ik haath me.n arz-e-mahkuum aur duusre haath me.n
jauharii bam liye
ibn-e-aadam kha.Daa thaa kisii aatishii.n pe.D kii chhaa.nv me.n
niiche vaadii me.n ik shor thaa
''vo hamaaraa KHudaa ham ko lauTaa.o
taskiin kii ko.ii suurat to ho
ko.ii chhat ko.ii saaya ko.ii saa.ebaa.n
kuchh to ho jis ke zulmaat me.n chhup ke ham
zindagii kaaT le.n
aur ye abr aa.nkho.n se ojhal rahe''
vo hamaaraa KHudaa ham ko lauTaa.o
vaadii kaa ye shor ba.Dhtaa rahaa
shor kartii hu.ii bhii.D me.n vo bhii the
jin ke iimaan mazbuut the
aur phir yuu.n hu.aa
ibn-e-aadam ne dekhaa ki
vaadii me.n sadiyo.n kaa buu.Dhaa KHudaa phir se maujuud thaa

Aziz Qaisi
Nazm

KHwab-tamasha(1)

ye taa.nbe kaa aakaash ujaale se KHaalii
aur ye lohe ke shahr dhu.e.n me.n Duube hu.e
ye niivan sign kii raushniyo.n me.n ghirii hu.ii taariik safe.n
ye shor sharaaba aane vaalii lambii raat kii haibat kaa

Kumar Pashi
Nazm

ma-baad jadid

mai.n ne apne likhne pa.Dhne ke kamre me.n
qalam binaa ik nazm likhii hai
nazm ko mai.n ne
kuchh aise tartiib diyaa hai
sab se pahle Tuk Tuk kartii
ek gha.Dii hai
phir hai calendar
is ke baa'd hai
piital kii ik sham.a-daanii aish-tray
phir beijing shaam aur singapore kii
chiinii aur taa.nbe kii plaTe.n
phir tho.Dii sii jagah banaa ke
shiishe kaa gul-daan rakhaa hai
us se aage
musavvirii aur theTar par
do tiin kitaabe.n
vahii.n pe tirchhii kar ke rakhii
qulqul kartii ek suraahii
sab ke biich me.n nanhaa saa
ik joker bhii hai
ye merii vo pahlii nazm hai
jis me.n ko.ii lafz nahii.n hai
bas paikar hai.n
merii pahlii nazm hai
jo qaarii aur saame.a
dono.n se aazaad hu.ii hai
aa.nkho.n kii hamraaz hu.ii hai

Zubair Rizvi
Nazm

hawa meri raaz-dan nahin hai

havaa mirii raaz-daa.n nahii.n hai
ki chatar is kaa
hazaar saayo.n pe mehrbaa.n hai
karo.Do.n logo.n ke soz-e-anfaas kaa dhu.aa.n hai
havaa faqat us nahiif lamhe kii daastaa.n hai
ki jis kaa aalam guzishtanii hai
jo ik nafas kaa hii mehmaa.n hai
havaa hii saarii mahak ugaltii hu.ii bahaaro.n kii tarjumaa.n hai
hamaare andar chhupe vajuudo.n
subuk masaamo.n kii raaz-daa.n hai
guzarte jismo.n ko nashr kartii hu.ii havaa raaz-daa.n nahii.n hai
magar havaa tere mere KHvaabo.n ke darmiyaa.n saa.ns
phuu.nktii hai
hamaarii saa.nso.n kii Doriyo.n ko
hamaare jismo.n se jo.Dtii hai
hamaare taa.nbe hamaare piital hamaare sab saagvaan chehre
hamaare apno.n ke tan kii ThanDii mahak ke Gaaze se
Dhaa.nptii hai
miraa havaa se faqat yahii ek raabta hai
use miraa raaz-daa.n na kahnaa
havaa se apne azaab-e-lamhaat kii ko.ii daastaa.n na kahnaa

Ehsan Akbar
Nazm

apna apna rang

tuu hai ik taa.nbe kaa thaal
jo suuraj kii garmii me.n saaraa saal tape
ko.ii halkaa niilaa baadal jab us par buu.nde.n barsaa.e
ek chhanaakaa ho aur buu.nde.n baadal ko u.D jaa.e.n
taa.nbaa jaltaa rahe
vo hai ik bijlii kaa taar
jis ke andar tez aur aatishnaak ik barqii-rau dau.De
jo bhii us ke paas se guzre
us kii jaanib khii.nchtaa jaa.e
us ke saath chimaT ke maut ke jhuule jhuule
barqii-rau vaisii hii sur.at aur tezii se dau.Dtii jaa.e
mai.n ho.n barg-e-shajar
suuraj chamke mai.n us kii kirno.n ko apne ruup me.n dhaaruu.n
baadal barse mai.n us kii buu.nde.n apnii rag rag me.n utaaruu.n
baad chale mai.n us kii lahro.n ko naGmo.n me.n Dhaaluu.n
aur KHizaa.n aa.e to us ke mu.nh me.n apnaa ras Tapkaa kar pe.D se utruu.n
dhartii me.n mudGam ho jaa.uu.n
dhartii jab mujh ko ugle to paudaa ban kar phuuTuu.n

Ejaz Farooqi
Nazm

kasila zaiqa

mai.n ab kis ke liye
ghar ke kha.nDar me.n KHvaab ghar ke dekhtaa jaa.uu.n
zabaa.n par hai kasiilaa zaa.iqa taa.nbe ke sikke kaa
kahaa.n tak har kisii ke saamne kashkol phailaa.uu.n

Wali Alam Shaheen
Nazm

tanbe ki aurat

hathau.De ke haatho.n me.n sone kii kangan
jache kyo.n nahii.n
aur taa.nbe kii aurat
tapii tamtamaa.ii magar muskuraa.ii jamii hii rahii
kyo.n pighal na sakii
paa.nv jalte rahe vo ka.Dii dhuup me.n bhii kha.Dii hii rahii
us ke aane talak
lauT jaane talak
nahii.n us ko sach-much kisii baat kii bhii
ko.ii sudh nahii.n
tuu ne aaj mujhe un aa.nkho.n se dekhaa jo terii nahii.n thii
aur vo baat kahii jo saaraa baaG nahii.n jaane thaa
ek akelaa gul jaane thaa
cigarette kaa

Nasreen Anjum Bhatti
Nazm

al-ayazar mar gaya

bulb kaa jab.Daa khule aag baras jaa.e to
gar ye istaKHar abhii KHuun se bhar jaa.e to
yaa ye istaKHar
jahaa.n aab ke manshuuro.n se
rang-e-hastii se fanaa kii ye dhanak ubhrii hai
ko.ii istaKHar na ho kokh ho merii maa.n kii
aur mai.n mai.n nahii.n shaayad vo uchhaltaa paanii
jis ne saa.nso.n kii tanaabo.n ko paka.D rakhaa thaa
vaa.e qismat ki mire haath me.n rassii na rahii
aah meraa ye janii.n KHuun ugaltaa jaa.e
is qadar KHuun mirii maa.n kaa batn bhar jaa.e
is qadar KHuun ki surgeon kaa labaada mere
surKH ayyaam kii tanhaa.ii saa gaa.Dhaa ho jaa.e
aur taa.nbe ke kisii garm se bartan me.n abhii
mere laashe ke kaTe laKHt pa.De hilte ho.n

Razi Haider Gilani
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now