Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "turkii"

Nazm MATCHES FOR "turkii"

Nazm

hubb-e-watan

sunte ho saama.iin-e-baa-tamkii.n
sunte ho haazriin-e-sadr-nashii.n
jo hai.n duniyaa me.n qaum ke hamdard
banda-e-qaum un ke hai.n zan o mard
baap kii hai du.aa ye bahr-e-pisar
qaum kii mai.n banaa.uu.n us ko sipar
maa.n KHudaa se ye maa.ngtii hai muraad
qaum par se nisaar ho aulaad
bhaa.ii aapas me.n karte hai.n paimaa.n
tuu agar maal de to mai.n duu.n jaa.n
ahl-e-himmat kamaa ke laate hai.n
ham-vatan faa.ede uThaate hai.n
kahii.n hote hai.n madrase jaarii
daKHl aur KHarj jin ke hai.n bhaarii
aur kahii.n hote hai.n club qaa.em
mab.has-e-hikmat aur adab qaa.em
nit-na.e khulte hai.n davaa-KHaane
bante hai.n saik.Do.n shifaa-KHaane
mulk me.n jo maraz hai.n aalam-giir
qaum par un kii farz hai tadbiir
hai.n sadaa is udhe.D-bun me.n tabiib
ki ko.ii nusKHa haath aa.e ajiib
qaum ko pahu.nche manfa.at jis se
mulk me.n phaile.n faa.ede jis ke
khap ga.e kitne ban ke jhaa.Do.n me.n
mar ga.e saik.Do.n pahaa.Do.n me.n
likhe jab tak jiye safar-naame
chal diye haath me.n qalam thaame
go safar me.n uThaa.e ra.nj-e-kamaal
kar diyaa par vatan ko apne nihaal
hai.n ab in ke gavaah hubb-e-vatan
dar-o-diivaar-e-paris o london
kaam hai.n sab bashar ke ham-vatano.n
tum se bhii ho sake to mard bano
chho.Do afsurdagii ko josh me.n aa.o
bas bahut so.e uTTho hosh me.n aa.o
qaafile tum se ba.Dh ga.e koso.n
rahe jaate ho sab se piichhe kyuu.n
qaafilo.n se agar milaa chaaho
mulk aur qaum kaa bhalaa chaaho
gar rahaa chaahte ho izzat se
bhaa.iyo.n ko nikaalo zillat se
un kii izzat tumhaarii izzat hai
un kii zillat tumhaarii zillat hai
qaum kaa mubtadil hai jo insaa.n
be-haqiiqat hai garche hai sultaa.n
qaum duniyaa me.n jis kii hai mumtaaz
hai faqiirii me.n bhii vo baa-e.azaaz
izzat-e-qaum chaahte ho agar
jaa ke phailaa.o un me.n ilm-o-hunar
zaat kaa faKHr aur nasab kaa Guruur
uTh ga.e ab jahaa.n se ye dastuur
ab na sayyad kaa iftiKHaar sahiih
na barhaman ko shudr par tarjiih
hu.ii turkii tamaam KHaano.n me.n
kaT ga.ii ja.D se KHaandaano.n me.n
qaum kii izzat ab hunar se hai
ilm se yaa ki siim-o-zar se hai
ko.ii din me.n vo daur aa.egaa
be-hunar bhiik tak na paa.egaa
na rahe.nge sadaa yahii din raat
yaad rakhnaa hamaarii aaj kii baat
gar nahii.n sunte qaul 'haalii' kaa
phir na kahnaa ki ko.ii kahtaa thaa

Altaf Hussain Hali
Nazm

aadhi raat

1
siyaah pe.D hai.n ab aap apnii parchhaa.ii.n
zamii.n se taa-mah-o-anjum sukuut ke miinaar
jidhar nigaah kare.n ik athaah gum-shudgii
ik ek kar ke fasurda charaaGo.n kii palke.n
jhapak ga.ii.n jo khulii hai.n jhapakne vaalii hai.n
jhalak rahaa hai pa.Daa chaa.ndnii ke darpan me.n
rasiile kaif bhare manzaro.n kaa jaagtaa KHvaab
falak pe taaro.n ko pahlii jamaahiyaa.n aa.ii.n
2
tamoliyo.n kii dokaane.n kahii.n kahii.n hai.n khulii
kuchh uu.nghtii hu.ii ba.Dhtii hai.n shaah-raaho.n par
savaariyo.n ke ba.De ghu.ngruu.o.n kii jhankaare.n
kha.Daa hai os me.n chup-chaap har si.ngaar kaa pe.D
dulhan ho jaise hayaa kii sugandh se bojhal
ye mauj-e-nuur ye bharpuur ye khilii hu.ii raat
ki jaise khiltaa chalaa jaa.e ik safed ka.nval
sipaah-e-ruus hai ab kitnii duur berlin se
jagaa rahaa hai ko.ii aadhii raat kaa jaaduu
chhalak rahii hai KHum-e-Gaib se sharaab-e-vajuud
fazaa-e-niim-shabii nargis-e-KHumaar-aaluud
ka.nval kii chuTkiyo.n me.n band hai nadii kaa suhaag
3
ye ras kaa sej ye sukumaar ye sukomal gaat
nayan kamal kii jhapak kaam-ruup kaa jaaduu
ye rasmasaa.ii palak kii ghanii ghanii parchhaa.ii.n
falak pe bikhre hu.e chaa.nd aur sitaaro.n kii
chamaktii u.ngliyo.n se chhi.D ke saaz fitrat ke
taraane jaagne vaale hai.n tum bhii jaag uTho
4
shu.aa-e-mahr ne yuu.n un ko chuum chuum liyaa
nadii ke biich kumudnii ke phuul khil uTThe
na muflisii ho to kitnii hasiin hai duniyaa
ye jhaa.e.n jhaa.e.n sii rah rah ke ek jhii.ngur kii
hinaa kii Tattiyo.n me.n narm sarsaraahaT sii
fazaa ke siine me.n KHaamosh sansanaahaT sii
ye kaa.enaat ab ik nii.nd le chukii hogii
5
ye mahv-e-KHvaab hai.n ra.ngiin machhliyaa.n tah-e-aab
ki hauz-e-sehn me.n ab in kii chashmake.n bhii nahii.n
ye sar-niguu.n hai.n sar-e-shaaKH phuul gu.Dhal ke
ki jaise be-bujhe a.ngaare ThanDe pa.D jaa.e.n
ye chaa.ndnii hai ki umDaa hu.aa hai ras-saagar
ik aadmii hai ki itnaa dukhii hai duniyaa me.n
6
qariib chaa.nd ke ma.nDlaa rahii hai ik chi.Diyaa
bha.nvar me.n nuur ke karvaT se jaise naav chale
ki jaise siina-e-shaa.ir me.n ko.ii KHvaab pale
vo KHvaab saa.nche me.n jis ke na.ii hayaat Dhale
vo KHvaab jis se puraanaa nizaam-e-Gam badle
kahaa.n se aatii hai madmaaltii lataa kii lipaT
ki jaise saik.Do.n pariyaa.n gulaabiyaa.n chhi.Dkaa.e.n
ki jaise saik.Do.n ban-deviyo.n ne jhuule par
adaa-e-KHaas se ik saath baal khol diye
lage hai.n kaan sitaaro.n ke jis kii aahaT par
is inqalaab kii ko.ii KHabar nahii.n aatii
dil-e-nujuum dha.Dakte hai.n kaan bajte hai.n
7
ye saa.ns letii hu.ii kaa.enaat ye shab-e-maah
ye pur-sukuu.n ye pur-asraar ye udaas samaa.n
ye narm narm havaa.o.n ke niil-guu.n jho.nke
fazaa kii oT me.n mardo.n kii gungunaahaT hai
ye raat maut kii be-ra.ng muskuraahaT hai
dhu.aa.n dhu.aa.n se manaazir tamaam nam-diida
KHunuk dhundalke kii aa.nkhe.n bhii niim KHvaabiida
sitaare hai.n ki jahaa.n par hai aa.nsu.o.n kaa kafan
hayaat parda-e-shab me.n badaltii hai pahluu
kuchh aur jaag uThaa aadhii raat kaa jaaduu
zamaana kitnaa la.Daa.ii ko rah gayaa hogaa
mire KHayaal me.n ab ek baj rahaa hogaa
8
gulo.n ne chaadar-e-shabnam me.n mu.nh lapeT liyaa
labo.n pe so ga.ii kaliyo.n kii muskuraahaT bhii
zaraa bhii sumbul-e-turkii laTe.n nahii.n hiltii.n
sukuut-e-niim-shabii kii hade.n nahii.n miltii.n
ab inqalaab me.n shaayad ziyaada der nahii.n
guzar rahe hai.n ka.ii kaarvaa.n dhundalke me.n
sukuut-e-niim-shabii hai unhii.n ke paa.nv kii chaap
kuchh aur jaag uThaa aadhii raat kaa jaaduu
9
na.ii zamiin nayaa aasmaa.n na.ii duniyaa
na.e sitaare na.ii gardishe.n na.e din raat
zamii.n se taa-ba-falak intizaar kaa aalam
fazaa-e-zard me.n dhu.ndle Gubaar kaa aalam
hayaat maut-numaa intishaar kaa aalam
hai mauj-e-duud ki dhundlii fazaa kii nabze.n hai.n
tamaam KHastagii-o-maa.ndgii ye daur-e-hayaat
thake thake se ye taare thakii thakii sii ye raat
ye sard sard ye be-jaan phiikii phiikii chamak
nizaam-e-saaniya kii maut kaa pasiinaa hai
KHud apne aap me.n ye kaa.enaat Duub ga.ii
KHud apnii kokh se phir jagmagaa ke ubhregii
badal ke kechulii jis tarah naag lahraa.e
10
KHunuk fazaa.o.n me.n raqsaa.n hai.n chaa.nd kii kirne.n
ki aabgiino.n pe pa.Dtii hai narm narm phuvaar
ye mauj-e-Gaflat-e-ma.asuum ye KHumaar-e-badan
ye saa.ns nii.nd me.n Duubii ye aa.nkh madmaatii
ab aa.o mere kaleje se lag ke so jaa.o
ye palke.n band karo aur mujh me.n kho jaa.o

Firaq Gorakhpuri
Nazm

sayyad se aaj hazrat-e-waiz ne ye kaha

sayyad se aaj hazrat-e-vaa.iz ne ye kahaa
charchaa hai jaa-ba-jaa tire haal-e-tabaah kaa
samjhaa hai tuu ne nature o tadbiir ko KHudaa
dil me.n zaraa asar na rahaa laa-ilaah kaa
ho tujh se tark-e-saum-o-salaat-o-zakaat-o-haj
kuchh Dar nahii.n janaab-e-risaalat-panaah kaa
shaitaan ne dikhaa ke jamaal-e-uruus-e-dahr
banda banaa diyaa hai tujhe hubb-e-jaah kaa
us ne diyaa javaab ki maz.hab ho yaa rivaaj
raahat me.n jo muKHil ho vo kaa.nTaa hai raah kaa
afsos hai ki aap hai.n duniyaa se be-KHabar
kyaa jaaniye jo rang hai shaam-o-pagaah kaa
europe kaa pesh aa.e agar aap ko safar
guzre nazar se haal re.aayaa-o-shaah kaa
vo aab-o-taab-o-shaukat-e-aivaan-e-khusravii
vo mahakmo.n kii shaan vo jalva sipaah kaa
aa.e nazar uluum-e-jadiidah kii raushnii
jis se KHajil ho nuur ruKH-e-mehr-o-maah kaa
daavat kisii amiir ke ghar me.n ho aap kii
kam-sin miso.n se zikr ho ulfat kaa chaah kaa
nau-KHez dil-fareb gul-andaam naaznii.n
aariz pe jin ke baar ho daaman nigaah kaa
rukiye agar to ha.ns ke kahe ik but-e-hasii.n
sun maulvii ye baat nahii.n hai gunaah kaa
us vaqt qibla jhuk ke karuu.n aap ko salaam
phir naam bhii huzuur jo le.n KHaanqaah kaa
patluun-o-koT-o-ba.ngla-o-biscuit kii dhun ba.ndhe
saudaa janaab ko bhii ho turkii kulaah kaa
mimbar pe yuu.n to baiTh ke goshe me.n ai janaab
sab jaante hai.n va.az savaab-o-gunaah kaa

Akbar Allahabadi
Nazm

kachhwa aur KHargosh

ek kachhve ke aa ga.ii jii me.n
kiijiye sair o gasht KHushkii kii
jaa rahaa thaa chalaa hu.aa KHaamosh
us se naahaq ulajh pa.Daa KHargosh
miyaa.n kachhve! tumhaarii chaal hai ye
yaa ko.ii shaamat aur vabaal hai ye
yuu.n qadam phuu.nk phuu.nk dharte ho
goyaa uttuu zamii.n pe dharte ho
kyuu.n hu.e chal ke muft me.n bad-naam
be-chale kyaa aTak rahaa thaa kaam
tum ko ye hausla na karnaa thaa
chulluu paanii me.n Duub marnaa thaa
ye tan-o-tosh aur ye raftaar
aisii raftaar par KHudaa kii maar
bolaa kachhvaa ki ho.n KHafaa na huzuur
mai.n to huu.n aap mo'tarif ba-qusuur
agar aahistagii hai jurm-o-gunaah
to mai.n KHud apne jurm kaa huu.n gavaah
mujh ko jo saKHt sust farmaayaa
aap ne sab durust farmaayaa
mujh ko Gaafil magar na jaaniyegaa
banda-parvar buraa na maaniyegaa
yuu.n zabaanii javaab to kyaa duu.n
shart bad kar chalo to dikhlaa duu.n
tum to ho aaftaab me.n zarra
par miTaa duu.ngaa aap kaa Gurra
sun ke KHargosh ne ye talKH javaab
kahaa kachhve se yuu.n zi-ruu-e-itaab
tuu kare merii ham-sarii kaa KHayaal
terii ye taab ye sakat ye majaal
chyuu.nTii ke jo par nikal aa.e
to yaqii.n hai ki ab ajal aa.e
are bebaak! bad-zabaa.n mu.nh-phaT
tuu ne dekhii kahaa.n hai dau.D jhapaT
jab mai.n tezii se jast kartaa huu.n
shahsavaaro.n ko past kartaa huu.n
gard ko merii baad-e-paa na lage
laakh dau.De miraa pata na lage
rail huu.n barq huu.n chhalaavaa huu.n
mai.n chhalaave kaa balki baavaa huu.n
terii merii nibhegii sohbat kyaa
aasmaa.n ko zamii.n se nisbat kyaa
jis ne bhugte ho.n turkii o taazii
aaise mariyal se kyaa bade baazii
baat ko ab ziyaada kyaa duu.n tuul
KHair kartaa huu.n terii shart qubuul
hai munaasib ki imtihaa.n ho jaa.e
taaki aib o hunar ayaa.n ho jaa.e
al-Garaz ik maqaam Thahraa kar
hu.e dono.n hariif garm-e-safar
bas-ki zoro.n pe thaa cha.Dhaa KHargosh
tezii phurtii se yuu.n ba.Dhaa KHargosh
jis tarah jaa.e top kaa golaa
yaa gire aasamaan se olaa
ek do khet chauk.Dii bhar ke
apnii chustii pe aafrii.n kar ke
kisii goshe me.n so gayaa jaa kar
fikr ''kyaa hai chale.nge sustaa kar''
aur kachhvaa Gariib aahista
chalaa siine ko KHaak par ghistaa
suu.ii ghanTe kii jaise chaltii hai
yaa ba-tadriij chhaa.nv Dhaltii hai
yuu.nhii chaltaa rahaa ba-istiqlaal
na kiyaa kuchh idhar udhar kaa KHayaal
kaam kartaa rahaa jo pai-dar-pai
kar gayaa rafta rafta manzil tai
haif KHargosh rah gayaa sotaa
samra Gaflat kaa aur kyaa hotaa
jab khulii aa.nkh to saveraa thaa
saKHt sharmindagii ne gheraa thaa
sabr o mohabbat me.n hai sar-afraazii
sust kachhve ne jiit lii baazii
nahii.n qissa ye dil-lagii ke liye
balki ibrat hai aadmii ke liye
hai suKHan is hijaab me.n ruu-posh
varna kachhvaa kahaa.n kahaa.n KHargosh

Ismail Merathi
Nazm

hindi hindustani

faarsii kii sugha.D sahelii hai
aur turkii ke saath khelii hai

Chandar Bhan Kaifi Dehelvi
Nazm

jang ka anjam

bahuu kahe ye bu.Dhiyaa merii jaan kii laaguu ban ke rahegii
saas kahe gaz-bhar kii zabaa.n hai apnii mu.nh aa.ii hii kahegii
bahuu kahe jab dekho jab hii KHvaahii naKHvaahii baat ba.Dhaanaa
saas pukaare ai mire allaah tauba bhalii ab tuu hii bachaanaa
bahuu kahe apnaa ghar kaisaa yaa.n to apne bhii hai.n paraa.e
saas kahe jal-bhun ke use to raaj-mahal bhii raas na aa.e
bahuu kahe jis ke haatho.n hai Do.ii usii kaa sab ko.ii hai
saas pukaare jaa.o jii jaa.o paa.nv kii juutii sar pe cha.Dhii hai
bahuu kahe mujh janm-jalii ko kis ke palle baa.ndh diyaa hai
saas kahe ab kaun bataa.e aage jo aayaa hai kis kaa kyaa hai
bahuu kahe ye puut kii dardii bas jo chale to bis hii khilaa de
saas kahe vo baat hai apnii gaalii sune aur phir bhii du.aa de
bahuu kahe ab sar pe pa.Dii hai jaise bhii ho guzar jaa.egii
saas kahe jab dekho is ko duudh maliida hii khaa.egii
bahuu kahe jii jo aataa thaa saas ke saamne bol rahii thii
saas bhii lekin turkii-ba-turkii bhed bahuu ke khol rahii thii
nanhe ne ye mauqa.a taa.Daa jhaT baavarchii-KHaane pahu.nchaa
duudh pe aa.ii thii jo milaa.ii chupke se us ko khaane pahu.nchaa
khaa ke jo lauTaa raah me.n us ne kaalii billii jaate paa.ii
dekh ke us ko Dar ke maare zor kii us ne chiiKH lagaa.ii
ek hii chiiKH ne us kii pal me.n saas bahuu kaa jhag.Daa chukaayaa
dau.Dii bahuu mire laal hu.aa kyaa saas pukaarii haa.e KHudaayaa

Meeraji
Nazm

shah-e-daula chuha

ek kone me.n
himaaliyaa.ii silk route se
smugle kiye hu.e
bachchiyo.n la.Dkiyo.n aurato.n vaale
chiinii faulaadii juute
paloThii ke la.Dko.n ke intizaar me.n
pighal pighal ke
chhoTii chhoTii ulTe kaToro.n jaisii
be-phande kii aahanii
turkii Topiyo.n bane baiThe the

Saqi Faruqi
Nazm

mohabbat

shahiid-e-mohabbat na kaafir na Gaazii
mohabbat kii rasme.n na turkii na taazii

Majaz Jaipuri
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

KHizr-e-rah

kyaa sunaataa hai mujhe turk-o-arab kii daastaa.n
mujh se kuchh pinhaa.n nahii.n islaamiyo.n kaa soz-o-saaz
le ga.e tasliis ke farzand miiraas-e-KHaliil
KHisht-e-buniyaad-e-kaliisaa ban ga.ii KHaak-e-hijaaz
ho ga.ii rusvaa zamaane me.n kulaah-e-laala-ra.ng
jo saraapaa naaz the hai.n aaj majbuur-e-niyaaz
le rahaa hai mai-faroshaan-e-fara.ngistaan se paars
vo mai-e-sarkash haraarat jis kii hai miinaa-gudaaz
hikmat-e-maGrib se millat kii ye kaifiyyat hu.ii
Tuk.De Tuk.De jis tarah sone ko kar detaa hai gaaz
ho gayaa maanind-e-aab arzaa.n musalmaa.n kaa lahuu
muztarib hai tuu ki teraa dil nahii.n daanaa-e-raaz
guft ruumii har banaa-e-kuhanaa ki-aabaadaa.n kunand
mii na-daanii avval aa.n buniyaad raa viiraa.n kunand
mulk haatho.n se gayaa millat kii aa.nkhe.n khul ga.ii.n
haq tiraa chashme 'ataa kar dast-e-Gaafil dar nigar
momyaa.ii kii gadaa.ii se to behtar hai shikast
mor-e-be-par haajate pesh-e-sulaimaane mabar
rabt-o-zabt-e-millat-e-baizaa hai mashriq kii najaat
asia vaale hai.n is nukte se ab tak be-KHabar
phir siyaasat chho.D kar daaKHil hisaar-e-dii.n me.n ho
mulk-o-daulat hai faqat hifz-e-haram kaa ik samar
ek huu.n muslim haram kii paasbaanii ke liye
niil ke saahil se le kar taa-ba-KHaak-e-kaashGar
jo karegaa imtiyaaz-e-ra.ng-o-KHuu.n miT jaa.egaa
turk-e-KHargaahii ho yaa aaraabii-e-vaalaa-guhar
nasl agar muslim kii maz.hab par muqaddam ho ga.ii
u.D gayaa duniyaa se tuu maanind-e-KHaak-e-raah-guzar
taa-KHilaafat kii binaa duniyaa me.n ho phir ustuvaar
laa kahii.n se Dhuu.nD kar aslaaf kaa qalb-o-jigar
ai ki na-shinaasii KHafii raa az jalii hushiyaar baash
ai giraftaar-e-abuu-bakr-o-alii hushiyaar-baash
'ishq ko fariyaad laazim thii so vo bhii ho chukii
ab zaraa dil thaam kar fariyaad kii taasiir dekh
tuu ne dekhaa satvat-e-raftaar-e-dariyaa kaa 'uruuj
mauj-e-muztar kis tarah bantii hai ab zanjiir dekh
'aam hurriyat kaa jo dekhaa thaa KHvaab islaam ne
ai musalmaa.n aaj tuu us KHvaab kii taa'biir dekh
apnii KHaakistar samundar ko hai saamaan-e-vajuud
mar ke phir hotaa hai paidaa ye jahaan-e-piir dekh
khol kar aa.nkhe.n mire aa.iina-e-guftaar me.n
aane vaale daur kii dhundlii sii ik tasviir dekh
aazmuuda fitna hai ik aur bhii garduu.n ke paas
saamne taqdiir ke rusvaa.ii-e-tadbiir dekh
muslim astii siina raa az aarzuu-aabaad daar
har zamaa.n pesh-e-nazar laa-yuKHlif-ul-mii.aad daar

Allama Iqbal
Nazm

turk shaer nazim-hikmat ke afkar

jiine ke liye marnaa
ye kaisii sa.aadat hai
marne ke liye jiinaa
ye kaisii himaaqat hai

Faiz Ahmad Faiz
Nazm

aligarh

har ik sho.abe me.n paa.oge yahaa.n tum paarTii-baazii
yahaa.n rahtii hai aapas me.n hamesha tarkii-o-taazii

Syeda Farhat
Nazm

duniya mein jannat

baaGo.n ne pahnaa
phuulo.n kaa gahnaa
nahro.n kaa bahnaa
vaarafta rahnaa
duniyaa me.n jannat meraa vatan hai
bhuurii ghaTaa.e.n
laa.e.n havaa.e.n
baaGo.n me.n jaa.e.n
kaliyaa.n khilaa.e.n
duniyaa me.n jannat meraa vatan hai
ik jho.npa.Dii hai
sab kuchh yahii hai
kyaa saadgii hai
kyaa zindagii hai
duniyaa me.n jannat meraa vatan hai
'krishn' kanhaiyaa
raadhaa kaa rasiyaa
bachcho.n ke 'afsar'
thaa is zamii.n kaa
raushan sitaaraa
duniyaa me.n jannat meraa vatan hai
vo turk aa.e
bhaarat pe chhaa.e
jhanDe u.Daa.e
qur.aan laa.e
duniyaa me.n jannat meraa vatan hai
chishtii ne baKHshaa
dil ko sahaaraa
hamdard aisaa
kis ko milaa thaa
duniyaa me.n jannat meraa vatan hai
gautam kaa ghar hai
jannat kaa dar hai
'afsar' kidhar hai
kyaa be-KHabar hai
duniyaa me.n jannat meraa vatan hai

Hamidullah Afsar
Nazm

purana coat

banaa hai coat ye niilaam kii dukaa.n ke liye
salaa-e-aam hai yaaraan-e-nukta-daa.n ke liye
ba.Daa buzurg hai ye aazmuuda-kaar hai ye
kisii mare hu.e gore kii yaadgaar hai ye
na dekh kuhniyo.n pe is kii KHasta-saamaanii
pahan chuke hai.n ise turk aur iiraanii
ba.Daa buzurg hai ye go qaliil qiimat hai
miyaa.n buzurgo.n kaa saaya ba.Daa Ganiimat hai
jo qadr-daan hai.n vo jaante hai.n qiimat ko
ki aaftaab churaa le gayaa hai ra.ngat ko
ye coat coato.n kii duniyaa kaa baavaa-aadam hai
agarche hai vo nigah jo nigaah se kam hai
guzishta sadiyo.n kii taariiKH kaa varaq hai ye coat
KHariido is ko ki ibrat kaa ik sabaq hai ye coat

Syed Mohammad Jafri
Nazm

KHush-amdid

turk-e-shiiraaz ho tum hafiz-e-shiiraaz huu.n mai.n
ab samarqand-o-buKHaaraa hai tumhaarii KHaatir

Anjum Azmi
Nazm

saKHt-gir aaqa

ek be-tukii nazm
aaj bistar hii me.n huu.n
kar diyaa hai aaj
mere muzmahil aazaa ne iz.haar-e-baGaavat barmalaa
meraa jism-e-naa-tavaa.n meraa Gulaam-e-ebaa-vafaa
vaaqa.ii maaluum hotaa hai thakaa haaraa hu.aa
aur mai.n
ek saKHt giir aaqaa… zamaane kaa Gulaam
kis qadar majbuur huu.n
peT puujaa ke liye
do qadam bhii uTh ke jaa saktaa nahii.n
mere chaa kar paa.nv shal hai.n
jhuk gayaa huu.n in kamiino.n kii razaa ke saamne
sar uThaa saktaa nahii.n
aaj bistar hii me.n huu.n

Hafeez Jalandhari
Nazm

dastur sazi ki koshish

yuu.n to har shaa.ir kii fitrat me.n hai kuchh diivaangii
Gair zimmedaariyaa.n hai.n us kii juzv-e-zindagii
arz-e-sheristaan me.n ye shaa.iraana KHaasiyat
cancer kii tarah se jab phailne ba.Dhne lagii
muKHtalif school jab ja.ngii akhaa.De ban ga.e
fikr-o-fan me.n jab niraajii kaifiyat paidaa hu.ii
mumlikat me.n zaabta ko.ii na jab baaqii rahaa
har jagah qaanuun kii hone lagii be-hurmatii
ek ik tuk-band ustaado.n ke mu.nh aane lagaa
likh ke sub.h-o-shaam nazme.n be-tukii se be-tukii
kuu.De-karkaT kii tarah har suu nazar aane lage.n
Dheriyaa.n hii Dheriyaa.n diivaan-e-KHaas-o-aam kii
had to ye hai ahl-e-machhlii-shahr bhii karne lage
maahii-giirii chho.D kar din raat fikr-e-shaa.irii
jin se bohraan-e-Gizaa state me.n paidaa hu.aa
qaht-e-maahii se ba.Dhii har chaar jaanib bhuk-marii
chand qaumii dard rakhne vaale ahlurraa.e se
qaum kii naa-gufta-ba-haalat na jab dekhii ga.ii
ek dastuur-ul-amal tayyaar karne ke liye
ik kametii 'amn'-saahab kii sadaarat me.n banii
taaki is par chal ke nazm-o-zabt aa.e qaum me.n
taaki kuchh to mo.atadil ho shaa.iro.n kii zindagii
duusre kaamo.n me.n bhii qaumii energy sarf ho
tuk faroshii ke alaava bhii to maqsad ho ko.ii
daur-e-'aflaatuun'-o-'tulsii-das' se 'iqbaal' tak
history kal shaa.iro.n kii is kametii ne pa.Dhii
duusre mulko.n ke aa.iin-o-zavaabit me.n jahaa.n
jo munaasib baat thii vo chhaa.nT kar rakh lii ga.ii
raat din kii saKHt mehnat aur jaa.n-sozii ke ba.ad
is kametii ne report apnii bil-aaKHir pesh kii
KHaaka-e-dastuur-e-qaumii ya.anii vo she.rii report
'amn'-saahab ne raqam kii thii ba-sinf-e-masnavii
is pe raa.e-aamma ma.aluum karne ke liye
shaa.iro.n ko naql dastaavez kii bhejii ga.ii
muKHtalif ahl-e-suKHan ne apne apne taur par
raa.e dii dastuur me.n tarmiim yaa tansiiKH kii
masnavii me.n KHaamiyaa.n Dhuu.nDe.n zabaa.n kii jaa-ba-jaa
ek shaa.ir ne jo the shaagird-e-nuuh-naarvii
saik.Do.n misre badal kar rakh diye kuchh is tarah
nafs-e-mazmuu.n nazr ho kar rah gayaa islaah kii
un kaa kahnaa thaa ki bandish chust honii chaahiye
sher ke andar balaa se ho na fikrii taazgii
na.at-go hazraat kaa kahnaa thaa shaa.ir ke liye
shart avval hai ki ho jaa.e vo kaTTar maz.habii
aaqibat kii baat soche aur munaajaate.n likhe
us ke jan me.n kaar-aamad shaa.irii hai bas vahii
aise shaa.ir jo ki haamii the taraqqii-vaad ke
in kaa kahnaa thaa ki shaa.ir kaa suKHan ho maqsadii
ya.anii pahle se muqarrar-karda mauzuaat par
mumlikat me.n aam kii jaa.e shu.uurii shaa.irii
KHvaah sheristaan me.n is kaa na ho ko.ii vajuud
laaziman dikhlaa.ii jaa.e kashmakash tabqaat kii
ik qabiila jo muKHaalif thaa shu.uurii fikr kaa
thaa taraqqii-vaadiyo.n se jis ko buGz-e-lillaahii
is qabiile kaa ye kahnaa thaa ki shaa.ir kaa kalaam
laaziman ho ik mu.amma qaid-e-ma.anii se barii
jis ko shaa.ir KHud na samjhe nazm kar lene ke ba.ad
jis ko pa.Dh kar gum ho aql-e-maulvii-e-ma.anavii
dekh kar dastuur me.n nazm-o-nasq kaa tazkira
saKHt barham ho ga.e kul shaa.iraan-e-naksalii
in kaa nukta thaa ki shaa.ir fitratan aazaad hai
us pe lag saktii nahii.n paabandiyaa.n tanziim kii
zindagii me.n zaabta laane ke bilkul the KHilaaf
saath naksal-vaadiyo.n ke duusre hazraat bhii
muKHtasar ye hai ki sab ne rad kiyaa dastuur ko
saarii mehnat 'amn'-saahab kii akaarat ho ga.ii
dekh kar naa-aaqibat andeshii-e-ahl-e-suKHan
is tarah goyaa hu.ii un kii mohazzab KHaamushii
me.nDako.n ko taulnaa aasaa.n nahii.n hai jis tarah
shaa.iro.n ko bhii munazzam karnaa mushkil hai yuu.nhii

Raza Naqvi Vahi
Nazm

sham ka aKHbar

denaa bhaa.ii haa.n mujhe bhii shaam kaa aKHbaar ek
phir kisii ThanDe lahuu ne garm kii hogii KHabar
kaun se beTe hu.e hai.n stikato kii nazr
aaj kii shah-surKHiyo.n me.n KHuun-e-naahaq phir milaa
taaza taaza zard kaaGaz par gul-e-ahmad khilaa
kis galii maatam bichhaa hai
kyaa saro.n kaa hai shumaar
aaTh column kii KHabar ke vaaste hai.n sirf chaar?
KHaak me.n luth.Dii hu.ii suurat hai ye kis phuul kii
kahte hai.n diivaar-o-dar building hai ye school kii
aaj to tasviir bhii dhundlaa ga.ii maqtuul kii
naa-munaasib hai reporting
be-tukii manzar-kashii
kyuu.n nahii.n rakh paate hai.n parche kaa ye me.aar ek
ban ga.ii hai ab sahaafat jaise kaarobaar ek
denaa bhaa.ii phir bhii mujh ko shaam kaa aKHbaar ek

Mirza Mohammad Nayar
Nazm

KHush-amdid

aaj is bazm me.n aa.e ho ba.Dii dhuum ke saath
be-KHudii mahv-e-nazaara hai tumhaarii KHaatir
yaad aate hai.n vo ayyaam-e-judaa.ii ham ko
jinhe.n ha.ns ha.ns ke guzaaraa hai tumhaarii KHaatir
go mai-e-lutf se KHaalii nahii.n pindaar-e-junuu.n
yaa.n Gam-e-ishq kaa yaaraa hai tumhaarii KHaatir
ranj uThaanaa to ko.ii baat nahii.n hai lekin
zahr piinaa bhii gavaaraa hai tumhaarii KHaatir
haar aur jiit ke mafhuum me.n kyaa rakkhaa hai
jiit kar bhii ko.ii haaraa hai tumhaarii KHaatir
turk-e-shiiraaz ho tum hafiz-e-shiiraaz huu.n mai.n
ab samarqand-o-buKHaaraa hai tumhaarii KHaatir
tum jo aa.e ho to is ziist kii lazzat paa kar
ham ne aalam ko sa.nvaaraa hai tumhaarii KHaatir
aaj ham ne mah-o-anjum ko bhii zahmat dii hai
aasmaano.n se utaaraa hai tumhaarii KHaatir
laala-o-gul ko bahaaro.n ko saman-zaaro.n ko
diida-o-dil ne pukaaraa hai tumhaarii KHaatir
phir yahaa.n shiisha-o-saaGar se charaaGaa.n hogaa
phir ko.ii anjuman-aaraa hai tumhaarii KHaatir

Anjum Azmi
Nazm

aao KHat likhen

likhte hai.n baat be-tukii sab whatsapp par
is par lage lagaam chalo aa.o KHat likhe.n

Amaan Zakhirvi
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now