Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "vash"

Nazm MATCHES FOR "vash"

Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

yaaden

kabhii Ganiim-e-jaur-o-sitam ke haatho.n khaa.ii aisii maat
arz-e-alam me.n KHvaar hu.e ham big.De rahe barso.n haalaat
aur kabhii jab din niklaa to biit ga.e jug hu.ii na raat
har-suu mah-vash saada qaatil lutf-o-inaayat kii sauGaat
shabnam aisii ThanDii nigaahe.n phuulo.n kii mahkaar sii baat
juu.n-tuu.n ye manzil bhii sar kii is aabaad KHaraabe me.n
dekho ham ne kaise basar kii is aabaad KHaraabe me.n

Akhtarul Iman
Nazm

madrasa ali-gaDh

KHudaa alii-ga.Dh ke madrase ko tamaam amraaz se shifaa de
bhare hu.e hai.n raiis-zaade amiir-zaade shariif-zaade
latiif o KHush-vaz.a chust o chaalaak o saaf o paakiiza shaad-o-KHurram
tabii.ato.n me.n hai in kii jaudat dilo.n me.n in ke hai.n nek iraade
kamaal-e-mehnat se pa.Dh rahe hai.n kamaal-e-Gairat se pa.Dh rahe hai.n
savaar mashriq raah me.n hai.n to maGribii raah me.n piyaade
har ik hai in me.n kaa be-shak aisaa ki aap use chaahte hai.n jaisaa
dikhaave mahfil me.n qadd-e-ra.anaa jo aap aa.e.n to sar jhukaa de
faqiir maa.nge to saaf kah de.n ki tuu hai mazbuut jaa kamaa khaa
qubuul farmaa.e.n aap daavat to apnaa sarmaaya kul khilaa de
buto.n se in ko nahii.n lagaavaT miso.n kii lete nahii.n vo aahaT
tamaam quvvat hai sarf-e-KHvaandan nazar ke bhole hai.n dil ke saade
nazar bhii aa.e jo zulf-e-pechaa.n to samjhe.n ye ko.ii policy hai
electric light us ko samjhe.n jo barq-vash ko.ii kuude
nikalte hai.n kar ke Gol-bandii ba-naam-e-tahziib o dard-mandii
ye kah ke lete hai.n sab se chande jo tum hame.n do tumhe.n KHudaa de
unhe.n isii baat par yaqii.n hai ki bas yahii asl kaar-e-dii.n hai
isii se hogaa faroG-e-qaumii isii se chamke.nge baap daade
makaan-e-college ke sab makii.n hai.n abhii unhe.n tajrabe nahii.n hai.n
KHabar nahii.n hai ki aage chal kar hai kaisii manzil hai.n kaise jaade
dilo.n me.n in ke hai.n nuur-e-iimaa.n qavii nahii.n hai magar nigahbaa.n
havaa-e-mantiq adaa-e-tiflii ye sham.a aisaa na ho bujhaa de
fareb de kar nikaale matlab sikhaa.e tahqiir-e-diin-o-mazhab
miTaa de aaKHir ko diin-o-maz.hab numuud-e-zaatii ko go ba.Dhaa de
yahii bas 'akbar' kii iltijaa hai janaab baarii me.n ye du.aa hai
uluum o hikmat kaa dars in ko professor de.n samajh KHudaa de

Akbar Allahabadi
Nazm

badnam ho raha hun

faryaadii-e-jafaa-e-ayyaam ho rahaa huu.n
paamaal-e-jaur-e-baKHt-e-naakaam ho rahaa huu.n
sargashta-e-KHayaal-e-anjaam ho rahaa huu.n
bastii kii la.Dkiyo.n me.n badnaam ho rahaa huu.n
bad-naam ho rahaa huu.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
salmaa se dil lagaa kar salmaa se dil lagaa kar
us huur-vash ke Gam me.n duniyaa-o-dii.n ga.nvaa kar
hosh-o-havaas kho kar sabr-o-sukuu.n luTaa kar
baiThe biThaa.e dil me.n Gam kii KHalish basaa kar
har chiiz ko bhulaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
kahtii hai.n sab ye kis kii ta.Dpaa ga.ii hai suurat
salmaa kii shaayad is ke man bhaa ga.ii hai suurat
aur us ke Gam me.n itnii murjhaa ga.ii hai suurat
murjhaa ga.ii hai suurat kumhlaa ga.ii hai suurat
sa.nvlaa ga.ii hai suurat
salmaa se dil lagaa kar
bastii kii la.Dkiyo.n me.n badnaam ho rahaa huu.n
panghaT pe jab ki saarii hotii hai.n jam.a aa kar
gaagar ko apnii rakh kar, ghu.nghaT uThaa uThaa kar
ye qissa chhe.Dtii hai.n mujh ko bataa bataa kar
salmaa se baate.n karte dekhaa hai is ko jaa kar
ham ne nazar bachaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
raato.n ko giit gaane jab mil kar aatii hai.n sab
taalaab ke kinaare dhuume.n machaatii hai.n sab
ja.ngal kii chaa.ndnii me.n ma.ngal manaatii hai.n sab
to mere aur salmaa ke giit gaatii hai.n sab
aur ha.nstii jaatii hai.n sab
salmaa se dil lagaa kar
bastii kii la.Dkiyo.n me.n badnaam ho rahaa huu.n
kheto.n se lauTtii hai.n jab din chhupe makaa.n ko
tab raaste me.n baaham vo merii daastaa.n ko
dohraa ke chhe.Dtii hai.n salmaa ko merii jaa.n ko
aur vo hayaa kii maarii sii letii hai zabaa.n ko
ki chhe.De is bayaa.n ko
salmaa se dil lagaa kar
bastii kii la.Dkiyo.n me.n badnaam ho rahaa huu.n
kahtii hai rahm khaa kar yuu.n ek maah-e-tal.at
ye shahrii naujavaa.n thaa kis darja KHuub-suurat
aa.nkho.n me.n bas rahii hai ab bhii vo pahlii ra.ngat
do din me.n aah kyaa hai kyaa ho ga.ii hai haalat
allaah terii qudarat
salmaa se dil lagaa kar
bastii kii la.Dkiyo.n me.n badnaam ho rahaa huu.n
us sham.a-ruu kaa jab se parvaana ban gayaa huu.n
bastii kii la.Dkiyo.n me.n afsaana bin gayaa huu.n
har maah-vash ke lab kaa paimaana ban gayaa huu.n
diivaana ho rahaa huu.n diivaana ban gayaa huu.n
diivaana ban gayaa huu.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
un kii zabaa.n pe merii jitnii kahaaniyaa.n hai.n
kyaa jaane.n ye ki dil kii sab mehrbaaniyaa.n hai.n
kam-sin hai.n be-KHabar hai.n uThtii javaaniyaa.n hai.n
kyaa samjhe.n Gam ke haatho.n kyuu.n sar-giraaniyaa.n hai.n
kyuu.n KHuu.n-fishaaniyaa.n hai.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
har ik ke rahm kaa yuu.n iz.haar ho rahaa hai
bechaare ko ye kaisaa aazaar ho rahaa hai
dekhe to ko.ii jaane biimaar ho rahaa hai
kis darja zindagii se bezaar ho rahaa hai
naa-chaar ho rahaa hai
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik puuchhtii hai aa kar tum be-qaraar kyuu.n ho
kuchh to hame.n bataa.o yuu.n dil-figaar kyuu.n ho
kyaa rog hai kaho to tum ashk-baar kyuu.n ho
diivaane kyuu.n hu.e ho diivaana vaar kyuu.n ho
baa-haal-e-zaar kyuu.n ho
salmaa se dil lagaa kar
bastii kii la.Dkiyo.n me.n badnaam ho rahaa huu.n
jaa.uu.n shikaar ko gar baa-hamrahaan-e-sahraa
kheto.n se ghuurtii hai.n yuu.n duKHtaraan-e-sahraa
bijlii kii raushnii ko jaise miyaan-e-sahraa
taariik shab me.n dekhe.n kuchh aahuvaan-e-sahraa
hairat kushaan-e-sahraa
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik shoKH chhe.Dtii hai is tarah paas aa kar
dekho vo jaa rahii hai salmaa nazar bachaa kar
sharmaa ke muskuraa kar aa.nchal se mu.nh chhupaa kar
jaa.o naa piichhe piichhe do baate.n kar lo jaa kar
kheto.n me.n chhup chhupaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
goyaa hame.n hasad se kuchh naazniin nigaahe.n
salmaa kii bhaa ga.ii hai.n kyuu.n dil-nashii.n nigaahe.n
un se zyaada dilkash hai.n ye hasii.n nigaahe.n
al-qissa ek dil hai sau KHashmagii.n nigaahe.n
shauq aafrii.n nigaahe.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik shoKH taaza daarad sasuraal se ghar aa kar
sakhiyo.n se puuchhtii hai jis dam mujhe bataa kar
ye kaun hai to zaalim kahtii hai.n muskuraa kar
tum is kaa haal puuchho salmaa ke dil se jaa kar
ye giit use sunaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n

Akhtar Shirani
Nazm

eid us pari-wash ki

phuuTii lab-e-naazuk se vo ik shoKH sii laalii
tho.Dii sii shafaq aariz-e-taabaa.n ne churaa lii
phir baam kii jaanib uThe abruu-e-hilaalii

Abdul Ahad Saaz
Nazm

jamuna

ai KHushaa qismat tirii jamunaa KHushaa tere nasiib
vaah-vaa tere muqaddar vaah-vaa tere nasiib
tuu ne dekhii hai bahut din murlii vaale kii adaa
dono.n-aalam ke hasiino.n se niraale kii adaa
aur sunii bansii kii hai barso.n sadaa-e-dil-navaaz
daastaan-e-dard-e-dil afsaana-e-soz-o-gudaaz
mahsharisataan-e-alam kambaKHt hai kar dil ko chaak
chiir pahluu ko ki nikle.n naala-haa-e-dard-naak

Suroor Jahanabadi
Nazm

KHwatin ka bank

sunte hai.n shahr me.n jo KHvaatiin kaa hai bank
parvez kaa nahii.n hai ye parviin kaa hai bank
rakkhii hai.n is liye yahaa.n KHaatuun manager
is mohkme ko chaahiye baatuun manager
ladies ittihaad jo begaanagii se hai
kyaa jaane KHauf kyaa unhe.n mardaangii se hai
nok-e-zabaa.n bhii chalne lagii hai zabaa.n ke saath
beTii bhii hai shariik la.Daa.ii me.n maa.n ke saath
har naaznii.n ke saamne ik beauty-box hai
baaqii rakhaa hai ghar me.n ye tho.Daa saa aks hai
baiThii hai.n apne saamne gesuu sa.nvaar ke
locker me.n rakh diyaa hai dupaTTa utaar ke
chaTKHaare hai.n zabaa.n pe nazar me.n ishaare hai.n
har maah-vash ke pars me.n imlii kaTaare hai.n
jo baat kar rahii hai.n kamaa.ii ke shobe kii
vo head hai.n lagaa.ii-bujhaa.ii ke shobe kii
kal saas se zabaan ke bal par la.Dii hai.n ye
ilm-e-lissniyaat me.n p.hd hai.n ye
khaate kii in ko fikr na ledger kii fikr hai
nando.n kii Giibate.n hai.n to devar kaa zikr hai
shaadii ke baa'd nuqta banii.n dash ho ga.ii.n
pahle jo check-book thii.n vo ab cash ho ga.ii.n
har naaznii.n kii umr bhii KHufiya account hai
kyaa jaane in kii umr me.n kitnaa amount hai
ye husn kaa KHazaana ko.ii kyaa dabochegaa
Daaku bhii Daaka Daalne se pahle sochegaa
naakaara shauharo.n ko bhii debit karaa.ii.e
nisvaaniyat yahaa.n se credit karaa.ii.e

Khalid Irfan
Nazm

baDa shahr

ka.ii baar mai.n ne samundar kii bhiigii havaa.o.n se puuchhaa
ki ai KHush-nafas rahravo
tum is tarah begaana-vash kyuu.n guzartii ho
pal bhar ruko
ko.ii taskii.n kaa paiGaam do
aur apnaa ye amrit saa haath
dukhe dil pe rakh do

Zia Jalandhari
Nazm

shoala-e-tarab

rone kii umr hai na sisakne kii umr hai
jaam-e-nashaat ban ke chhalakne kii umr hai
shabnam kii buu.nd pii ke chaTakne kii umr hai
gulshan me.n phuul ban ke mahakne kii umr hai
sad-marhabaa ye gumrahii-e-shauq chashm-o-dil
haa.n raah-e-aarzuu me.n bhaTakne kii umr hai
ik jurm hai KHayaal-o-tasavvur gunaah kaa
ye umr sirf pii ke bahakne kii umr hai
diivaana ban ke najd ke sahraa me.n ghuumiye
lailaa kii justujuu me.n bhaTakne kii umr hai
bechain kyuu.n ho ruuh kisii ek ke liye
har maah-vash pe jaan chhi.Dakne kii umr hai
is daur-e-imbisaat me.n ba-haalat-e-junuu.n
har kuu-e-dilbaraa.n me.n bhaTakne kii umr hai
laazim nahii.n ki KHud ko bachaataa phiruu.n tamaam
shiisha huu.n choT khaa ke darakne kii umr hai
taskii.n vo de rahii hai.n par ai qalb-e-naa-subuur
tuu aur bhii dha.Dak ki dha.Dakne kii umr hai
jab chal pa.Daa huu.n ghar se to manzil kii shart kyaa
huu.n rah-navard-e-shauq bhaTakne kii umr hai
huu.n aaftaab-e-taaza hu.aa huu.n abhii tuluu.a
apne jahaan-e-nau me.n chamakne kii umr hai
aivaan o taKHt-o-taaj hai.n merii lapeT me.n
sho.ala huu.n mai.n ye mere bha.Dakne kii umr hai
'dauraa.n' mai.n bazm-e-dost me.n chhe.Duu.n na kyuu.n Gazal
ye zamzame ke din hai.n lahakne kii umr hai

Owais Ahmad Dauran
Nazm

dar-o-rasan

hazaaro.n zulf-e-parii-vash ke yaa.n the saudaa.ii
hazaaro.n mai-kash-o-mai-KHvaar-o-mast-o-sahbaa.ii

Mohammad Ali Tishna
Nazm

patal zamin aasman

kahaanii ke saare parinde
bahut duur shaayad ufuq me.n
kahii.n munjamid ho ga.e hai.n
shajar zard patto.n kii tasviir ban kar
alaamat kii tahriir ban kar
bikharne lagaa hai
kisii jhiil ke aa.iine me.n vo mah-vash
badan ke kisii zaaviye se nikalne kii KHvaahish me.n
palke.n uThaa.e hu.e dekhtii rah ga.ii hai

Ahmad Zafar
Nazm

kuchh nahin ke do pahlu

jinhe.n ishq se vaasta kuchh nahii.n
unhe.n husn se kyaa milaa kuchh nahii.n
jahaa.n zohd-e-KHushk aa gayaa us jagah
mohabbat muravvat vafaa kuchh nahii.n
KHudaa jaane kis dil se kahte hai.n log
hasii.n aur un kii adaa kuchh nahii.n
nahii.n hai.n jo tanviir-e-dil maah-vash
shab-e-maah me.n bhii maza kuchh nahii.n
sharar hai.n ye ha.nsmukh sitaare agar
to har KHanda-e-KHush-numaa kuchh nahii.n
nazar ke hai.n dhoke manaazir agar
to phir ye chaman ye fazaa kuchh nahii.n
hakiimo.n pe hairat na ho kyo.n mujhe
ba.Dhaa ilm to kah diyaa kuchh nahii.n
na saaqii na saaGar na shaahid na baaG
ma.aal in kii tahqiiq kaa kuchh nahii.n
vajuud un kaa merii nazar me.n bhii kyaa
adam hai adam ke sivaa kuchh nahii.n
kahuu.n kaise hastii ke gulzaar me.n
fanaa hii fanaa hai baqaa kuchh nahii.n
mai.n KHush husn se huu.n sivaa husn ke
mirii ziist kaa mudda.aa kuchh nahii.n
agar merii nazro.n se dekhe ko.ii
baqaa hii baqaa hai fanaa kuchh nahii.n
ye maamuura-e-husn hai to yahaa.n
KHushii hai KHushii ke sivaa kuchh nahii.n
nigaah-e-haqiiqat ras-e-husn se
ta.alluq Gam-o-ra.nj kaa kuchh nahii.n
maze ahl-e-dil ke liye hai.n bahut
kahaa mai.n ne kab yaa.n maza kuchh nahii.n
ye saaqii ye saaGar ye shaahid ye baaG
halaavat hai dil me.n to kyaa kuchh nahii.n

Ali Manzoor Hyderabadi
Nazm

ehsas-e-firaq

maah-o-anjum ka.nval sitaare suno
jab vo mah-vash nahii.n hai apne paas
baad-e-abr-e-bahaar hai be-kaif
chaa.ndnii muzmahil hai chaa.nd udaas
us kii furqat kaa kis qadar ehsaas

Pasha Rahman
Nazm

mujhse pahli si mohabbat meri mahbub na mang

mujh se pahlii sii mohabbat mirii mahbuub na maa.ng
mai.n ne samjhaa thaa ki tuu hai to daraKHshaa.n hai hayaat
teraa Gam hai to Gam-e-dahr kaa jhag.Daa kyaa hai
terii suurat se hai aalam me.n bahaaro.n ko sabaat
terii aa.nkho.n ke sivaa duniyaa me.n rakkhaa kyaa hai
tuu jo mil jaa.e to taqdiir niguu.n ho jaa.e
yuu.n na thaa mai.n ne faqat chaahaa thaa yuu.n ho jaa.e
aur bhii dukh hai.n zamaane me.n mohabbat ke sivaa
raahate.n aur bhii hai.n vasl kii raahat ke sivaa

Faiz Ahmad Faiz
Nazm

wa-yabqa-wajh-o-rabbik (hum dekhenge)

ham dekhe.nge
laazim hai ki ham bhii dekhe.nge
vo din ki jis kaa va.ada hai
jo lauh-e-azal me.n likhkhaa hai
jab zulm-o-sitam ke koh-e-giraa.n
ruu.ii kii tarah u.D jaa.e.nge
ham mahkuumo.n ke paa.nv-tale
jab dhartii dha.D-dha.D dha.Dkegii
aur ahl-e-hakam ke sar-uupar

Faiz Ahmad Faiz
Nazm

subh-e-azadi (August-47)

sunaa hai ho bhii chukaa hai firaaq-e-zulmat-o-nuur
sunaa hai ho bhii chukaa hai visaal-e-manzil-o-gaam
badal chukaa hai bahut ahl-e-dard kaa dastuur
nashaat-e-vasl halaal o azaab-e-hijr haraam
jigar kii aag nazar kii uma.ng dil kii jalan
kisii pe chaara-e-hijraa.n kaa kuchh asar hii nahii.n
kahaa.n se aa.ii nigaar-e-sabaa kidhar ko ga.ii
abhii charaaG-e-sar-e-rah ko kuchh KHabar hii nahii.n
abhii giraanii-e-shab me.n kamii nahii.n aa.ii
najaat-e-diida-o-dil kii gha.Dii nahii.n aa.ii
chale-chalo ki vo manzil abhii nahii.n aa.ii

Faiz Ahmad Faiz
Nazm

yaad

is qadar pyaar se ai jaan-e-jahaa.n rakkhaa hai
dil ke ruKHsaar pe is vaqt tirii yaad ne haat
yuu.n gumaa.n hotaa hai garche hai abhii sub.h-e-firaaq
Dhal gayaa hijr kaa din aa bhii ga.ii vasl kii raat

Faiz Ahmad Faiz
Nazm

itna malum hai!

naam bhuule se jo meraa kahii.n aayaa hogaa
Gair-mahsuus tariiqe se vo chau.nkaa hogaa
ek jumle ko ka.ii baar sunaayaa hogaa
baat karte hu.e sau baar vo bhuulaa hogaa
ye jo la.Dkii na.ii aa.ii hai kahii.n vo to nahii.n
us ne har chehra yahii soch ke dekhaa hogaa
jaan-e-mahfil hai magar aaj faqat mere baGair
haa.e kis darja vahii bazm me.n tanhaa hogaa
kabhii sannaaTo.n se vahshat jo hu.ii hogii use
us ne be-saaKHta phir mujh ko pukaaraa hogaa
chalte chalte ko.ii maanuus sii aahaT paa kar
dosto.n ko bhii kis uzr se rokaa hogaa
yaad kar ke mujhe nam ho ga.ii ho.ngii palke.n
''aa.nkh me.n pa.D gayaa kuchh'' kah ke ye Taalaa hogaa
aur ghabraa ke kitaabo.n me.n jo lii hogii panaah
har satar me.n miraa chehra ubhar aayaa hogaa
jab milii hogii use merii alaalat kii KHabar
us ne aahista se diivaar ko thaamaa hogaa
soch kar ye ki bahal jaa.e pareshaanii-e-dil
yuu.nhii be-vaj.h kisii shaKHs ko rokaa hogaa!

Parveen Shakir
Nazm

andesha

baat niklegii to phir duur talak jaa.egii
log be-vaj.h udaasii kaa sabab puuchhe.nge
ye bhii puuchhe.nge ki tum itnii pareshaa.n kyuu.n ho
jagmagaate hu.e lamho.n se gurezaa.n kyuu.n ho
u.ngliyaa.n uTThe.ngii suukhe hu.e baalo.n kii taraf
ik nazar dekhe.nge guzre hu.e saalo.n kii taraf
chuu.Diyo.n par bhii ka.ii tanz kiye jaa.e.nge
kaa.npte haatho.n pe bhii fiqre kase jaa.e.nge
phir kahe.nge ki ha.nsii me.n bhii KHafaa hotii hai.n
ab to 'ruuhii' kii namaaze.n bhii qazaa hotii hai.n
log zaalim hai.n har ik baat kaa ta.ana de.nge
baato.n baato.n me.n miraa zikr bhii le aa.e.nge
in kii baato.n kaa zaraa saa bhii asar mat lenaa
varna chehre ke ta.assur se samajh jaa.e.nge
chaahe kuchh bhii ho savaalaat na karnaa un se
mere baare me.n ko.ii baat na karnaa un se
baat niklegii to phir duur talak jaa.egii

Kafeel Aazar Amrohvi
Nazm

ye baaten jhuTi baaten hain

gar ishq kiyaa hai tab kyaa hai kyuu.n shaad nahii.n aabaad nahii.n
jo jaan liye bin Tal na sake ye aisii bhii uftaad nahii.n
ye baat to tum bhii maanoge vo 'qais' nahii.n farhaad nahii.n
kyaa hijr kaa daaruu mushkil hai kyaa vasl ke nusKHe yaad nahii.n
ye baate.n jhuuTii baate.n hai.n ye logo.n ne phailaa.ii hai.n
tum 'inshaa'-jii kaa naam na lo kyaa 'inshaa'-jii saudaa.ii hai.n

Ibn۔e۔Insha
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now