آبلہ پر اشعار

شکوۂ آبلہ ابھی سے میرؔ

ہے پیارے ہنوز دلی دور

اک آبلہ تھا سو بھی گیا خار غم سے پھٹ

تیری گرہ میں کیا دل اندوہ گیں رہا

تیز رکھیو سر ہر خار کو اے دشت جنوں

شاید آ جائے کوئی آبلہ پا میرے بعد

ابھی سے پاؤں کے چھالے نہ دیکھو

ابھی یارو سفر کی ابتدا ہے

کانٹوں کی زباں سوکھ گئی پیاس سے یا رب

اک آبلہ پا وادی پر خار میں آوے

میں سر بہ سجدہ سکوں میں نہیں سفر میں ہوں

جبیں پہ داغ نہیں آبلہ بنا ہوا ہے

آؤ تقریب رو نمائی کریں

پاؤں میں ایک آبلہ ہوا ہے

راستہ پانی مانگتا ہے

اپنے پاؤں کا چھالا مار

بے تکلف مقام الفت ہے

داغ اٹھے کہ آبلہ بیٹھے

آبلہ پا کوئی اس دشت میں آیا ہوگا

ورنہ آندھی میں دیا کس نے جلایا ہوگا

ہم آبلہ بن رہے ہیں ہم کو

اک جنبش نیشتر بہت ہے

جب اس میں خوں رہا نہ تو یہ دل کا آبلہ

ہو خشک جیسے دانۂ انگور رہ گیا

ظلم پر ظلم آ گئے غالب

آبلے آبلوں کو چھوڑ گئے

سفر میں ہر قدم رہ رہ کے یہ تکلیف ہی دیتے

بہر صورت ہمیں ان آبلوں کو پھوڑ دینا تھا

خاک صحرائے جنوں نرم ہے ریشم کی طرح

آبلہ ہے نہ کوئی آبلہ پا میرے بعد

اے مرے پاؤں کے چھالو مرے ہمراہ رہو

امتحاں سخت ہے تم چھوڑ کے جاتے کیوں ہو

خار چبھ کر جو ٹوٹتا ہے کبھی

آبلہ پھوٹ پھوٹ روتا ہے

جن کے ہونٹوں پہ ہنسی پاؤں میں چھالے ہوں گے

ہاں وہی لوگ تمہیں چاہنے والے ہوں گے

دونوں کا ملنا مشکل ہے دونوں ہیں مجبور بہت

اس کے پاؤں میں مہندی لگی ہے میرے پاؤں میں چھالے ہیں

بچے گا نہ کاوش سے مژگاں کے دل

کہ نشتر بہت آبلہ ایک ہے

ہے جب تک دشت پیمائی سلامت

رہے گی آبلہ پائی سلامت

مجھے یقیں تو بہت تھا مگر غلط نکلا

کہ آبلہ کبھی پاپوش میں نہیں آتا

جو مجھ آتش نفس نے منہ لگایا اس کو اے ساقی

ابھی ہونے لگیں گے آبلے محسوس شیشے میں

دل کے ہر جزو میں جدائی ہے

درد اٹھے آبلہ اگر بیٹھے

لگائی کس بت مے نوش نے ہے تاک اس پر

سبو بہ دوش ہے ساقی جو آبلہ دل کا

خوش ہیں تو پھر مسافر دنیا نہیں ہیں آپ

اس دشت میں بس آبلہ پائی ہے روئیے