ناز پر اشعار

آئنہ دیکھ کے کہتے ہیں سنورنے والے

آج بے موت مریں گے مرے مرنے والے

مرتا تری کج ادائیوں پر

لیکن وہ خمار اتر گیا ہے

ذرا دیکھ اس کے نخرے نہیں کھاتی دال روٹی

میں کھلاتا اس کو صدقہ جو یہاں مزار ہوتا

ریحانیؔ ان کو دیکھ کے محو خرام ناز

ہر گام پر بہار کا دھوکا ہوا مجھے

غرور حسن کا عالم تو دیکھیے راہیؔ

کسی سے بات بھی کرنا ہے ناگوار انہیں

حشر تک بے گنہی ناز کرے گی مجھ پر

وہ مرا تیری نگاہوں میں برا ہو جانا

تمہارا لمس معطر تمہارا جسم بہار

یہی تو بحث گلابوں کے روبرو ٹھہری

ضبط غم وفور شوق اور دل ناصبور عشق

مجھ کو تو ہے غرور عشق آپ کو ناز ہو نہ ہو

نازکی قامت زیبا کی بیاں کیا کیجے

پیرہن بھی جہاں اسلوب نزاکت مانگے