ek lamhe meñ bikhar jaatā hai tānā-bānā

aur phir umr guzar jaatī hai yakjā.ī meñ

ek lamhe mein bikhar jata hai tana-bana

aur phir umr guzar jati hai yakjai mein

ahl-e-havas to ḳhair havas meñ hue zalīl

vo bhī hue ḳharāb, mohabbat jinhoñ ne kī

ahl-e-hawas to KHair hawas mein hue zalil

wo bhi hue KHarab, mohabbat jinhon ne ki

ishq meñ kaun batā saktā hai

kis ne kis se sach bolā hai

ishq mein kaun bata sakta hai

kis ne kis se sach bola hai

ab us kī shakl bhī mushkil se yaad aatī hai

vo jis ke naam se hote na the judā mire lab

ab us ki shakl bhi mushkil se yaad aati hai

wo jis ke nam se hote na the juda mere lab

tanhā.ī meñ karnī to hai ik baat kisī se

lekin vo kisī vaqt akelā nahīñ hotā

tanhai mein karni to hai ek baat kisi se

lekin wo kisi waqt akela nahin hota

ye paanī ḳhāmushī se bah rahā hai

ise dekheñ ki is meñ Duub jaa.eñ

ye pani KHamushi se bah raha hai

ise dekhen ki is mein Dub jaen

patā ab tak nahīñ badlā hamārā

vahī ghar hai vahī qissa hamārā

pata ab tak nahin badla hamara

wahi ghar hai wahi qissa hamara

bhuul ga.ī vo shakl bhī āḳhir

kab tak yaad koī rahtā hai

bhul gai wo shakl bhi aaKHir

kab tak yaad koi rahta hai

rone lagtā huuñ mohabbat meñ to kahtā hai koī

kyā tire ashkoñ se ye jañgal harā ho jā.egā

rone lagta hun mohabbat mein to kahta hai koi

kya tere ashkon se ye jangal hara ho jaega

ik raat chāñdnī mire bistar pe aa.ī thī

maiñ ne tarāsh kar tirā chehra banā diyā

ek raat chandni mere bistar pe aai thi

main ne tarash kar tera chehra bana diya

tum aa.e ho tumheñ bhī aazmā kar dekh letā huuñ

tumhāre saath bhī kuchh duur jā kar dekh letā huuñ

tum aae ho tumhein bhi aazma kar dekh leta hun

tumhaare sath bhi kuchh dur ja kar dekh leta hun

bahtā aañsū ek jhalak meñ kitne ruup dikhā.egā

aañkh se ho kar gaal bhigo kar miTTī meñ mil jā.egā

bahta aansu ek jhalak mein kitne rup dikhaega

aankh se ho kar gal bhigo kar miTTi mein mil jaega

mil hī jā.egā kabhī dil ko yaqīñ rahtā hai

vo isī shahr kī galiyoñ meñ kahīñ rahtā hai

mil hi jaega kabhi dil ko yaqin rahta hai

wo isi shahr ki galiyon mein kahin rahta hai

ḳhair badnām to pahle bhī bahut the lekin

tujh se milnā thā ki par lag ga.e rusvā.ī ko

KHair badnam to pahle bhi bahut the lekin

tujh se milna tha ki par lag gae ruswai ko

maiñ ne kahā ki dekh ye maiñ ye havā ye raat

us ne kahā ki merī paḌhā.ī kā vaqt hai

main ne kaha ki dekh ye main ye hawa ye raat

us ne kaha ki meri paDhai ka waqt hai

ik zamāna thā ki sab ek jagah rahte the

aur ab koī kahīñ koī kahīñ rahtā hai

ek zamana tha ki sab ek jagah rahte the

aur ab koi kahin koi kahin rahta hai

na.e dīvānoñ ko dekheñ to ḳhushī hotī hai

ham bhī aise hī the jab aa.e the vīrāne meñ

nae diwanon ko dekhen to KHushi hoti hai

hum bhi aise hi the jab aae the virane mein

yaar sab jam.a hue raat kī ḳhāmoshī meñ

koī ro kar to koī baal banā kar aayā

yar sab jama hue raat ki KHamoshi mein

koi ro kar to koi baal bana kar aaya

ye tanhā raat ye gahrī fazā.eñ

use DhūñDeñ ki us ko bhuul jaa.eñ

ye tanha raat ye gahri fazaen

use DhunDen ki us ko bhul jaen

tū ne hī to chāhā thā ki miltā rahūñ tujh se

terī yahī marzī hai to achchhā nahīñ miltā

tu ne hi to chaha tha ki milta rahun tujh se

teri yahi marzi hai to achchha nahin milta

roz milne pe bhī lagtā thā ki jug biit ga.e

ishq meñ vaqt kā ehsās nahīñ rahtā hai

roz milne pe bhi lagta tha ki jug bit gae

ishq mein waqt ka ehsas nahin rahta hai

gum rahā huuñ tire ḳhayāloñ meñ

tujh ko āvāz umr bhar dī hai

gum raha hun tere KHayalon mein

tujh ko aawaz umr bhar di hai

ham un ko soch meñ gum dekh kar vāpas chale aa.e

vo apne dhyān meñ baiThe hue achchhe lage ham ko

hum un ko soch mein gum dekh kar wapas chale aae

wo apne dhyan mein baiThe hue achchhe lage hum ko

vo jo raat mujh ko baḌe adab se salām kar ke chalā gayā

use kyā ḳhabar mire dil meñ bhī kabhī ārzū-e-gunāh thī

wo jo raat mujh ko baDe adab se salam kar ke chala gaya

use kya KHabar mere dil mein bhi kabhi aarzu-e-gunah thi

paanī meñ aks aur kisī āsmāñ kā hai

ye naav kaun sī hai ye dariyā kahāñ kā hai

pani mein aks aur kisi aasman ka hai

ye naw kaun si hai ye dariya kahan ka hai

khoyā hai kuchh zarūr jo us kī talāsh meñ

har chiiz ko idhar se udhar kar rahe haiñ ham

khoya hai kuchh zarur jo us ki talash mein

har chiz ko idhar se udhar kar rahe hain hum

balā kī chamak us ke chehre pe thī

mujhe kyā ḳhabar thī ki mar jā.egā

bala ki chamak us ke chehre pe thi

mujhe kya KHabar thi ki mar jaega

mujhe ma.alūm hai ahl-e-vafā par kyā guzartī hai

samajh kar soch kar tujh se mohabbat kar rahā huuñ maiñ

mujhe malum hai ahl-e-wafa par kya guzarti hai

samajh kar soch kar tujh se mohabbat kar raha hun main

hotī hai shaam aañkh se aañsū ravāñ hue

ye vaqt qaidiyoñ kī rihā.ī kā vaqt hai

hoti hai sham aankh se aansu rawan hue

ye waqt qaidiyon ki rihai ka waqt hai

dukh ke safar pe dil ko ravāna to kar diyā

ab saarī umr haath hilāte raheñge ham

dukh ke safar pe dil ko rawana to kar diya

ab sari umr hath hilate rahenge hum

nīndoñ meñ phir rahā huuñ use DhūñDhtā huā

shāmil jo ek ḳhvāb mire rat-jage meñ thā

nindon mein phir raha hun use DhunDhta hua

shamil jo ek KHwab mere rat-jage mein tha

maiñ bahut ḳhush thā kaḌī dhuup ke sannāTe meñ

kyuuñ tirī yaad kā bādal mire sar par aayā

main bahut KHush tha kaDi dhup ke sannaTe mein

kyun teri yaad ka baadal mere sar par aaya

jab shaam utartī hai kyā dil pe guzartī hai

sāhil ne bahut pūchhā ḳhāmosh rahā paanī

jab sham utarti hai kya dil pe guzarti hai

sahil ne bahut puchha KHamosh raha pani

maut ḳhāmoshī hai chup rahne se chup lag jā.egī

zindagī āvāz hai bāteñ karo bāteñ karo

maut KHamoshi hai chup rahne se chup lag jaegi

zindagi aawaz hai baaten karo baaten karo

jaise pau phaT rahī ho jañgal meñ

yuuñ koī muskurā.e jaatā hai

jaise pau phaT rahi ho jangal mein

yun koi muskurae jata hai

tū agar paas nahīñ hai kahīñ maujūd to hai

tere hone se baḌe kaam hamāre nikle

tu agar pas nahin hai kahin maujud to hai

tere hone se baDe kaam hamare nikle

milne kī ye kaun ghaḌī thī

bāhar hijr kī raat khaḌī thī

milne ki ye kaun ghaDi thi

bahar hijr ki raat khaDi thi

koī tasvīr mukammal nahīñ hone paatī

dhuup dete haiñ to saayā nahīñ rahne dete

koi taswir mukammal nahin hone pati

dhup dete hain to saya nahin rahne dete

dil fasurda to huā dekh ke us ko lekin

umr bhar kaun javāñ kaun hasīñ rahtā hai

dil fasurda to hua dekh ke us ko lekin

umr bhar kaun jawan kaun hasin rahta hai

are kyuuñ Dar rahe ho jañgal se

ye koī aadmī kī bastī hai

are kyun Dar rahe ho jangal se

ye koi aadmi ki basti hai

kaise aa saktī hai aisī dil-nashīñ duniyā ko maut

kaun kahtā hai ki ye sab kuchh fanā ho jā.egā

kaise aa sakti hai aisi dil-nashin duniya ko maut

kaun kahta hai ki ye sab kuchh fana ho jaega

vahāñ salām ko aatī hai nañge paañv bahār

khile the phuul jahāñ tere muskurāne se

wahan salam ko aati hai nange panw bahaar

khile the phul jahan tere muskurane se

sañg uThānā to baḌī baat hai ab shahr ke log

aañkh uThā kar bhī nahīñ dekhte dīvāne ko

sang uThana to baDi baat hai ab shahr ke log

aankh uTha kar bhi nahin dekhte diwane ko

ham apnī dhuup meñ baiThe haiñ 'mushtāq'

hamāre saath hai saaya hamārā

hum apni dhup mein baiThe hain 'mushtaq'

hamare sath hai saya hamara

mohabbat mar ga.ī 'mushtāq' lekin tum na mānoge

maiñ ye afvāh bhī tum ko sunā kar dekh letā huuñ

mohabbat mar gai 'mushtaq' lekin tum na manoge

main ye afwah bhi tum ko suna kar dekh leta hun

vo vaqt bhī aatā hai jab āñkhoñ meñ hamārī

phirtī haiñ vo shakleñ jinheñ dekhā nahīñ hotā

wo waqt bhi aata hai jab aankhon mein hamari

phirti hain wo shaklen jinhen dekha nahin hota

bahut udaas ho tum aur maiñ bhī baiThā huuñ

ga.e dinoñ kī kamar se kamar lagā.e hue

bahut udas ho tum aur main bhi baiTha hun

gae dinon ki kamar se kamar lagae hue

jis kī sāñsoñ se mahakte the dar-o-bām tire

ai makāñ bol kahāñ ab vo makīñ rahtā hai

jis ki sanson se mahakte the dar-o-baam tere

ai makan bol kahan ab wo makin rahta hai

dil bhar aayā kāġhaz-e-ḳhālī kī sūrat dekh kar

jin ko likhnā thā vo sab bāteñ zabānī ho ga.iiñ

dil bhar aaya kaghaz-e-KHali ki surat dekh kar

jin ko likhna tha wo sab baaten zabani ho gain

jahāñ Daale the us ne dhuup meñ kapḌe sukhāne ko

Tapaktī haiñ abhī tak rassiyāñ āhista āhista

jahan Dale the us ne dhup mein kapDe sukhane ko

Tapakti hain abhi tak rassiyan aahista aahista