کوئی گھر ہی نہیں تو بے گھری کا زخم کیسا

سکونت کے لیے اک استعارہ ڈھونڈتے ہیں

پھول مہکیں گے یوں ہی چاند یوں ہی چمکے گا

تیرے ہوتے ہوئے منظر کو حسیں رہنا ہے

کام جو عمر رواں کا ہے اسے کرنے دے

میری آنکھوں میں سدا تجھ کو حسیں رہنا ہے

دل کی جاگیر میں میرا بھی کوئی حصہ رکھ

میں بھی تیرا ہوں مجھے بھی تو کہیں رہنا ہے

تلاش اپنی خود اپنے وجود کو کھو کر

یہ کار عشق ہے اس میں لگا تو میں بھی ہوں

تمہیں منانے کا مجھ کو خیال کیا آئے

کہ اپنے آپ سے روٹھا ہوا تو میں بھی ہوں

دن بھر کے جھمیلوں سے بچا لایا تھا خود کو

شام آتے ہی اشفاقؔ میں ٹوٹا ہوا کیوں ہوں

کھل کر تو وہ مجھ سے کبھی ملتا ہی نہیں ہے

اور اس سے بچھڑ جانے کا امکان ہے یوں بھی

کون ہیں وہ جنہیں آفاق کی وسعت کم ہے

یہ سمندر نہ یہ دریا، نہ یہ صحرا میرا

دل میں سو تیر ترازو ہوئے تب جا کے کھلا

اس قدر سہل نہ تھا جاں سے گزرنا میرا

لفظوں میں ہر اک رنج سمونے کا قرینہ

اس آنکھ میں ٹھہرے ہوئے پانی سے ملا ہے

وہ ہو نہ سکا اپنا تو ہم ہو گئے اس کے

اس شخص کی مرضی ہی میں ڈھالے ہوئے ہم ہیں

جو خواب کی دہلیز تلک بھی نہیں آیا

آج اس سے ملاقات کی صورت نکل آئی

ٹوٹے ہوئے لوگ ہیں سلامت

یہ نقل مکانی کا معجزہ ہے

بہت چھوٹا سا دل اور اس میں اک چھوٹی سی خواہش

سو یہ خواہش بھی اب نیلام کرنے کے لیے ہے

میں اپنی پیاس میں کھویا رہا خبر نہ ہوئی

قدم قدم پہ وہ دریا پکارتا تھا مجھے