پوچھ لیتے وہ بس مزاج مرا

کتنا آسان تھا علاج مرا

میں نے اس کی طرف سے خط لکھا

اور اپنے پتے پہ بھیج دیا

خوشی سے کانپ رہی تھیں یہ انگلیاں اتنی

ڈلیٹ ہو گیا اک شخص سیو کرنے میں

پریشاں ہے وہ جھوٹا عشق کر کے

وفا کرنے کی نوبت آ گئی ہے

جب تلک قوت تخیئل ہے

آپ پہلو سے اٹھ نہیں سکتے

خوں پلا کر جو شیر پالا تھا

اس نے سرکس میں نوکری کر لی

ٹہلتے پھر رہے ہیں سارے گھر میں

تری خالی جگہ کو بھر رہے ہیں

بدن کا ذکر باطل ہے تو آؤ

بنا سر پیر کی باتیں کریں گے

اسے لے کر جو گاڑی جا چکی ہے

میں شاید اس کے نیچے آ رہا ہوں

آپ تشریف لائے تھے اک روز

دوسرے روز اعتبار ہوا

آج پیوند کی ضرورت ہے

یہ سزا ہے رفو نہ کرنے کی

مر گیا ہم کو ڈانٹنے والا

اب شرارت میں جی نہیں لگتا

نگاہیں کرتی رہ جاتی ہیں ہجے

وو جب چہرہ سے املا بولتا ہے

کاش وہ راستے میں مل جائے

مجھ کو منہ پھیر کر گزرنا ہے

جو کہا وہ نہیں کیا اس نے

وہ کیا جو نہیں کہا اس نے

شہسواروں نے روشنی مانگی

میں نے بیساکھیاں جلا ڈالیں

کٹی ہے عمر بس یہ سوچنے میں

مرے بارے میں وہ کیا سوچتا ہے

پھولوں کو سرخی دینے میں

پتے پیلے ہو جاتے ہیں

لیلیٰ گھر میں سلائی کرنے لگی

قیس دلی میں کام کرنے لگا

بہت کہتی رہی آندھی سے چڑیا

کہ پہلی بار بچے اڑ رہے ہیں

مجھ پہ ہو کر گزر گئی دنیا

میں تری راہ سے ہٹا ہی نہیں

سخت مشکل تھا امتحان غزل

میرؔ کی نقل کر کے پاس ہوئے

اچھے خاصے قفس میں رہتے تھے

جانے کیوں آسماں دکھائی دیا

پھر اسی قبر کے برابر سے

زندہ رہنے کا راستہ نکلا

توڑے جاتے ہیں جو شیشے

وہ نوکیلے ہو جاتے ہیں

کہیں کوئی کماں تانے ہوئے ہے

کبوتر آڑے ترچھے اڑ رہے ہیں

ابھی چمکے نہیں غالبؔ کے جوتے

ابھی نقاد پالش کر رہے ہیں

مرے سائے میں اس کا نقش پا ہے

بڑا احسان مجھ پر دھوپ کا ہے

یار تم کو کہاں کہاں ڈھونڈا

جاؤ تم سے میں بولتا ہی نہیں

چھت کا حال بتا دیتا ہے

پرنالے سے گرتا پانی

میں تو رہتا ہوں دشت میں مصروف

قیس کرتا ہے کام کاج مرا

ترے موزے یہیں پر رہ گئے ہیں

میں ان سے اپنے دستانے بنا لوں

تری تصویر، پنکھا، میز، مفلر

مرے کمرے میں گردش کر رہے ہیں