کس کے چہرے سے اٹھ گیا پردہ

جھلملائے چراغ محفل کے

ابر ہے گل زار ہے مے ہے خوشی کا دور ہے

آج تو ڈوبے ہوئے دل کو اچھلنے دیجئے

آئی کیا جی میں تیغ قاتل کے

کہ جدا ہو گئی گلے مل کے

جان اگر ہو جان تو کیوں کر نہ ہو تجھ پر نثار

دل اگر ہو دل تری صورت پہ شیدا کیوں نہ ہو

گلشن خلد کی کیا بات ہے کیا کہنا ہے

پر ہمیں تیرے ہی کوچے میں پڑا رہنا ہے

جو خاص جلوے تھے عشاق کی نظر کے لیے

وہ عام کر دیے تم نے جہان بھر کے لیے

ایک کہہ کر جس نے سننی ہو ہزاروں باتیں

وہ کہے ان سے مجھے آپ سے کچھ کہنا ہے

شیشہ اٹھا کر طاق سے ہم نے

طاق پہ رکھ دی ساقی توبہ

الفت ہو کسی کی نہ محبت ہو کسی کی

پہلو میں نہ دل ہو نہ یہ حالت ہو کسی کی

چوٹ جب دل پر لگے فریاد پیدا کیوں نہ ہو

اے ستم آرا جو ایسا ہو تو ایسا کیوں نہ ہو

او وصل میں منہ چھپانے والے

یہ بھی کوئی وقت ہے حیا کا

بولے وہ بوسہ ہائے پیہم پر

ارے کمبخت کچھ حساب بھی ہے

پوچھتے جاتے ہیں یہ ہم سب سے

مجلس وعظ میں شراب بھی ہے

دیکھ آؤ مریض فرقت کو

رسم دنیا بھی ہے ثواب بھی ہے

ہمارے گھر سے جانا مسکرا کر پھر یہ فرمانا

تمہیں میری قسم دیکھو مری رفتار کیسی ہے

کیا کہوں کیا ہے میرے دل کی خوشی

تم چلے جاؤ گے خفا ہو کر

دل کو جاناں سے حسنؔ سمجھا بجھا کے لائے تھے

دل ہمیں سمجھا بجھا کر سوئے جاناں لے چلا

آپ کی ضد نے مجھے اور پلائی حضرت

شیخ جی اتنی نصیحت بھی بری ہوتی ہے

عشق میں بے تابیاں ہوتی ہیں لیکن اے حسنؔ

جس قدر بے چین تم ہو اس قدر کوئی نہ ہو