dariyā-e-husn aur bhī do haath baḌh gayā

añgḌā.ī us ne nashshe meñ lī jab uThā ke haath

dariya-e-husn aur bhi do hath baDh gaya

angDai us ne nashshe mein li jab uTha ke hath

furqat-e-yār meñ insān huuñ maiñ yā ki sahāb

har baras aa ke rulā jaatī hai barsāt mujhe

furqat-e-yar mein insan hun main ya ki sahab

har baras aa ke rula jati hai barsat mujhe

justujū karnī har ik amr meñ nādānī hai

jo ki peshānī pe likkhī hai vo pesh aanī hai

justuju karni har ek amr mein nadani hai

jo ki peshani pe likkhi hai wo pesh aani hai

ḳhud ġhalat hai jo kahe hotī hai taqdīr ġhalat

kahīñ qismat kī bhī ho saktī hai tahrīr ġhalat

KHud ghalat hai jo kahe hoti hai taqdir ghalat

kahin qismat ki bhi ho sakti hai tahrir ghalat

tang aa jab jab kahā maiñ ne ki mar jā.ūñ kahīñ

bad-gumāñ samjhā ki is ko ishtiyāq-e-hūr hai

tang aa jab jab kaha main ne ki mar jaun kahin

bad-guman samjha ki is ko ishtiyaq-e-hur hai