mujhe ḳhabar thī mirā intizār ghar meñ rahā

ye hādsa thā ki maiñ umr bhar safar meñ rahā

mujhe KHabar thi mera intizar ghar mein raha

ye hadsa tha ki main umr bhar safar mein raha

muddat huī ik shaḳhs ne dil toḌ diyā thā

is vāste apnoñ se mohabbat nahīñ karte

muddat hui ek shaKHs ne dil toD diya tha

is waste apnon se mohabbat nahin karte

ye kyā tilism hai kyuuñ raat bhar sisaktā huuñ

vo kaun hai jo diyoñ meñ jalā rahā hai mujhe

ye kya tilism hai kyun raat bhar sisakta hun

wo kaun hai jo diyon mein jala raha hai mujhe

ik yaad kī maujūdgī sah bhī nahīñ sakte

ye baat kisī aur se kah bhī nahīñ sakte

ek yaad ki maujudgi sah bhi nahin sakte

ye baat kisi aur se kah bhi nahin sakte

ab ghar bhī nahīñ ghar kī tamannā bhī nahīñ hai

muddat huī sochā thā ki ghar jā.eñge ik din

ab ghar bhi nahin ghar ki tamanna bhi nahin hai

muddat hui socha tha ki ghar jaenge ek din

mujh ko mirī shikast kī dohrī sazā milī

tujh se bichhaḌ ke zindagī duniyā se jā milī

mujh ko meri shikast ki dohri saza mili

tujh se bichhaD ke zindagi duniya se ja mili

mujh meñ saat samundar shor machāte haiñ

ek ḳhayāl ne dahshat phailā rakkhī hai

mujh mein sat samundar shor machate hain

ek KHayal ne dahshat phaila rakkhi hai

ḳhudā ke vāste mauqā na de shikāyat kā

ki dostī kī tarah dushmanī nibhāyā kar

KHuda ke waste mauqa na de shikayat ka

ki dosti ki tarah dushmani nibhaya kar

vahī āñkhoñ meñ aur āñkhoñ se poshīda bhī rahtā hai

mirī yādoñ meñ ik bhūlā huā chehrā bhī rahtā hai

wahi aankhon mein aur aankhon se poshida bhi rahta hai

meri yaadon mein ek bhula hua chehra bhi rahta hai

tamām jism kī uryāniyāñ thiiñ āñkhoñ meñ

vo merī ruuh meñ utrā hijāb pahne hue

tamam jism ki uryaniyan thin aankhon mein

wo meri ruh mein utra hijab pahne hue

maiñ ne chāhā thā ki ashkoñ kā tamāshā dekhūñ

aur āñkhoñ kā ḳhazāna thā ki ḳhālī niklā

main ne chaha tha ki ashkon ka tamasha dekhun

aur aankhon ka KHazana tha ki KHali nikla

pyaas baḌhtī jā rahī hai bahtā dariyā dekh kar

bhāgtī jaatī haiñ lahreñ ye tamāshā dekh kar

pyas baDhti ja rahi hai bahta dariya dekh kar

bhagti jati hain lahren ye tamasha dekh kar

nāmoñ kā ik hujūm sahī mere ās-pās

dil sun ke ek naam dhaḌaktā zarūr hai

namon ka ek hujum sahi mere aas-pas

dil sun ke ek nam dhaDakta zarur hai

rāsta de ki mohabbat meñ badan shāmil hai

maiñ faqat ruuh nahīñ huuñ mujhe halkā na samajh

rasta de ki mohabbat mein badan shamil hai

main faqat ruh nahin hun mujhe halka na samajh

maiñ khil nahīñ sakā ki mujhe nam nahīñ milā

saaqī mire mizāj kā mausam nahīñ milā

main khil nahin saka ki mujhe nam nahin mila

saqi mere mizaj ka mausam nahin mila

vo mirī ruuh kī uljhan kā sabab jāntā hai

jism kī pyaas bujhāne pe bhī raazī niklā

wo meri ruh ki uljhan ka sabab jaanta hai

jism ki pyas bujhane pe bhi raazi nikla

maiñ un se bhī milā kartā huuñ jin se dil nahīñ miltā

magar ḳhud se bichhaḌ jaane kā andesha bhī rahtā hai

main un se bhi mila karta hun jin se dil nahin milta

magar KHud se bichhaD jaane ka andesha bhi rahta hai

maiñ apne shahr se māyūs ho ke lauT aayā

purāne sog base the na.e makānoñ meñ

main apne shahr se mayus ho ke lauT aaya

purane sog base the nae makanon mein

tujh se milne kā rāsta bas ek

aur bichhaḌne ke rāste haiñ bahut

tujh se milne ka rasta bas ek

aur bichhaDne ke raste hain bahut

tum aur kisī ke ho to ham aur kisī ke

aur donoñ hī qismat kī shikāyat nahīñ karte

tum aur kisi ke ho to hum aur kisi ke

aur donon hi qismat ki shikayat nahin karte

log lamhoñ meñ zinda rahte haiñ

vaqt akelā isī sabab se hai

log lamhon mein zinda rahte hain

waqt akela isi sabab se hai

bujhe laboñ pe hai bosoñ kī raakh bikhrī huī

maiñ is bahār meñ ye raakh bhī uḌā dūñgā

bujhe labon pe hai boson ki rakh bikhri hui

main is bahaar mein ye rakh bhi uDa dunga

duniyā pe apne ilm kī parchhā.iyāñ na Daal

ai raushnī-farosh añdherā na kar abhī

duniya pe apne ilm ki parchhaiyan na Dal

ai raushni-farosh andhera na kar abhi

jis kī havas ke vāste duniyā huī aziiz

vāpas hue to us kī mohabbat ḳhafā milī

jis ki hawas ke waste duniya hui aziz

wapas hue to us ki mohabbat KHafa mili

qatl karne kā irāda hai magar sochtā huuñ

tū agar aa.e to hāthoñ meñ jhijak paidā ho

qatl karne ka irada hai magar sochta hun

tu agar aae to hathon mein jhijak paida ho

ek ek kar ke log bichhaḌte chale ga.e

ye kyā huā ki vaqfa-e-mātam nahīñ milā

ek ek kar ke log bichhaDte chale gae

ye kya hua ki waqfa-e-matam nahin mila

mujhe samajhne kī koshish na kī mohabbat ne

ye aur baat zarā pechdār maiñ bhī thā

mujhe samajhne ki koshish na ki mohabbat ne

ye aur baat zara pechdar main bhi tha

ḳhāmushī chheḌ rahī hai koī nauha apnā

TūTtā jaatā hai āvāz se rishta apnā

KHamushi chheD rahi hai koi nauha apna

TuTta jata hai aawaz se rishta apna

sub.h tak raat kī zanjīr pighal jā.egī

log pāgal haiñ sitāroñ se ulajhnā kaisā

subh tak raat ki zanjir pighal jaegi

log pagal hain sitaron se ulajhna kaisa

mujhe gunāh meñ apnā surāġh miltā hai

vagarna pārsā-o-dīn-dār maiñ bhī thā

mujhe gunah mein apna suragh milta hai

wagarna parsa-o-din-dar main bhi tha

aag ho dil meñ to āñkhoñ meñ dhanak paidā ho

ruuh meñ raushnī lahje meñ chamak paidā ho

aag ho dil mein to aankhon mein dhanak paida ho

ruh mein raushni lahje mein chamak paida ho

vo ḳhudā hai to mirī ruuh meñ iqrār kare

kyuuñ pareshān kare duur kā basne vaalā

wo KHuda hai to meri ruh mein iqrar kare

kyun pareshan kare dur ka basne wala

ruuh meñ reñgtī rahtī hai gunah kī ḳhvāhish

is amarbel ko ik din koī dīvār mile

ruh mein rengti rahti hai gunah ki KHwahish

is amarbel ko ek din koi diwar mile

maiñ apnī āñkhoñ se apnā zavāl dekhtā huuñ

maiñ bevafā huuñ magar be-ḳhabar na jaan mujhe

main apni aankhon se apna zawal dekhta hun

main bewafa hun magar be-KHabar na jaan mujhe

ḳhaak maiñ us kī judā.ī meñ pareshān phirūñ

jab ki ye milnā bichhaḌnā mirī marzī niklā

KHak main us ki judai mein pareshan phirun

jab ki ye milna bichhaDna meri marzi nikla

ham tañg-nā-e-hijr se bāhar nahīñ ga.e

tujh se bichhaḌ ke zinda rahe mar nahīñ ga.e

hum tang-na-e-hijr se bahar nahin gae

tujh se bichhaD ke zinda rahe mar nahin gae

vahī jiine kī āzādī vahī marne kī jaldī hai

divālī dekh lī ham ne dasahre kar liye ham ne

wahi jine ki aazadi wahi marne ki jaldi hai

diwali dekh li hum ne dasahre kar liye hum ne

ajab ki sabr kī mī.ād baḌhtī jaatī hai

ye kaun log haiñ fariyād kyuuñ nahīñ karte

ajab ki sabr ki miad baDhti jati hai

ye kaun log hain fariyaad kyun nahin karte

merī ayyār nigāhoñ se vafā māñgtā hai

vo bhī mohtāj milā vo bhī savālī niklā

meri ayyar nigahon se wafa mangta hai

wo bhi mohtaj mila wo bhi sawali nikla

merī āñkhoñ meñ anokhe jurm kī tajvīz thī

sirf dekhā thā use us kā badan mailā huā

meri aankhon mein anokhe jurm ki tajwiz thi

sirf dekha tha use us ka badan maila hua

dil hī ayyār hai be-vaj.h dhaḌak uThtā hai

varna afsurda havāoñ meñ bulāvā kaisā

dil hi ayyar hai be-wajh dhaDak uThta hai

warna afsurda hawaon mein bulawa kaisa

Duub jaane kā salīqa nahīñ aayā varna

dil meñ girdāb the lahroñ kī nazar meñ ham the

Dub jaane ka saliqa nahin aaya warna

dil mein girdab the lahron ki nazar mein hum the

mere andar use khone kī tamannā kyuuñ hai

jis ke milne se mirī zaat ko iz.hār mile

mere andar use khone ki tamanna kyun hai

jis ke milne se meri zat ko izhaar mile

us ke vāris nazar nahīñ aa.e

shāyad us laash ke pate haiñ bahut

us ke waris nazar nahin aae

shayad us lash ke pate hain bahut

abhī nazar meñ Thahar dhyān se utar ke na jā

is ek aan meñ sab kuchh tabāh kar ke na jā

abhi nazar mein Thahar dhyan se utar ke na ja

is ek aan mein sab kuchh tabah kar ke na ja

miT jā.egā sehr tumhārī āñkhoñ kā

apne paas bulā legī duniyā ik din

miT jaega sehr tumhaari aankhon ka

apne pas bula legi duniya ek din

hādsa ye hai ki ham jaañ na mo.attar kar paa.e

vo to ḳhush-bū thā use yuuñ bhī bikhar jaanā thā

hadsa ye hai ki hum jaan na moattar kar pae

wo to KHush-bu tha use yun bhi bikhar jaana tha

maiñ to ḳhudā ke saath vafādār bhī rahā

ye zaat kā tilism magar TūTtā nahīñ

main to KHuda ke sath wafadar bhi raha

ye zat ka tilism magar TuTta nahin

mirā akelā ḳhudā yaad aa rahā hai mujhe

ye sochtā huā girjā bulā rahā hai mujhe

mera akela KHuda yaad aa raha hai mujhe

ye sochta hua girja bula raha hai mujhe

na.e charāġh jalā yaad ke ḳharābe meñ

vatan meñ raat sahī raushnī manāyā kar

nae charagh jala yaad ke KHarabe mein

watan mein raat sahi raushni manaya kar