Sher of Shahzad Ahmad
javāz koī agar merī bandagī kā nahīñ
maiñ pūchhtā huuñ tujhe kyā milā ḳhudā ho kar
jawaz koi agar meri bandagi ka nahin
main puchhta hun tujhe kya mila KHuda ho kar
tīrgī hī tīrgī hadd-e-nazar tak tīrgī
kaash maiñ ḳhud hī sulag uTThūñ añdherī raat meñ
tirgi hi tirgi hadd-e-nazar tak tirgi
kash main KHud hi sulag uTThun andheri raat mein
umr bhar suntā rahūñ apnī sadā kī bāzgasht
yā tirī āvāz bhī aa.egī mere kaan meñ
umr bhar sunta rahun apni sada ki bazgasht
ya teri aawaz bhi aaegi mere kan mein
guzar hī jā.egī 'shahzād' jo guzarnī hai
sambhālne se tabī.at kahāñ sambhaltī hai
guzar hi jaegi 'shahzad' jo guzarni hai
sambhaalne se tabiat kahan sambhalti hai
na maiñ ne dast-shanāsī kā phir kiyā da.avā
na us ne haath mujhe chūmne diyā phir se
na main ne dast-shanasi ka phir kiya dawa
na us ne hath mujhe chumne diya phir se
vīrān to nahīñ shab-e-tārīk kī fazā
har-sū havā-e-bāda se kuchh raushnī to hai
viran to nahin shab-e-tarik ki faza
har-su hawa-e-baada se kuchh raushni to hai
uTThī haiñ merī ḳhaak se āfāt sab kī sab
nāzil huī na koī balā āsmān se
uTThi hain meri KHak se aafat sab ki sab
nazil hui na koi bala aasman se
ḳhushā vo dard ke lamhe ki tere jaane par
hamārī anjuman-e-ġham meñ lauT aa.e haiñ
KHusha wo dard ke lamhe ki tere jaane par
hamari anjuman-e-gham mein lauT aae hain
ye samajh ke maanā hai sach tumhārī bātoñ ko
itne ḳhūb-sūrat lab jhuuT kaise boleñge
ye samajh ke mana hai sach tumhaari baaton ko
itne KHub-surat lab jhuT kaise bolenge
har taraf phailī huī thī raushnī hī raushnī
vo bahāreñ thiiñ ki ab ke baaġh meñ rasta na thā
har taraf phaili hui thi raushni hi raushni
wo bahaaren thin ki ab ke bagh mein rasta na tha
patthar na pheñk dekh zarā ehtiyāt kar
hai sat.h-e-āb par koī chehra banā huā
patthar na phenk dekh zara ehtiyat kar
hai sath-e-ab par koi chehra bana hua
ajab nahīñ ki isī baat par laḌā.ī ho
muāhida ye huā hai ki ab laḌeñge nahīñ
ajab nahin ki isi baat par laDai ho
muahida ye hua hai ki ab laDenge nahin
jahāñ meñ manzil-e-maqsūd DhūñDne vaale
ye kā.enāt kī tasvīr hī ḳhayālī hai
jahan mein manzil-e-maqsud DhunDne wale
ye kaenat ki taswir hi KHayali hai
jalte haiñ ik charāġh kī lau se ka.ī charāġh
duniyā tire ḳhayāl se raushan huī to hai
jalte hain ek charagh ki lau se kai charagh
duniya tere KHayal se raushan hui to hai
tumhārī aañkh meñ kaifiyyat-e-ḳhumār to hai
sharāb kā na sahī niiñd kā asar hī sahī
tumhaari aankh mein kaifiyyat-e-KHumar to hai
sharab ka na sahi nind ka asar hi sahi
shumār maiñ na karūñgā firāq ke shab o roz
vahīñ se baat chalegī jahāñ se TuuTī thī
shumar main na karunga firaq ke shab o roz
wahin se baat chalegi jahan se TuTi thi
tumhārī aarzū meñ maiñ ne apnī aarzū kī thī
ḳhud apnī justujū kā aap hāsil ho gayā huuñ maiñ
tumhaari aarzu mein main ne apni aarzu ki thi
KHud apni justuju ka aap hasil ho gaya hun main
tirā maiñ kyā karūñ ai dil tujhe kuchh bhī nahīñ aatā
bichhaḌnā bhī use aatā hai aur milnā bhī aatā hai
tera main kya karun ai dil tujhe kuchh bhi nahin aata
bichhaDna bhi use aata hai aur milna bhi aata hai
shab kī tanhā.iyoñ meñ yaad us kī
jhilmilātā huā diyā jaise
shab ki tanhaiyon mein yaad us ki
jhilmilata hua diya jaise
shāyad log isī raunaq ko garmi-e-mahfil kahte haiñ
ḳhud hī aag lagā dete haiñ ham apnī tanhā.ī ko
shayad log isi raunaq ko garmi-e-mahfil kahte hain
KHud hi aag laga dete hain hum apni tanhai ko
vo mirī sub.hoñ kā taarā vo mirī rātoñ kā chāñd
mere dil kī raushnī to thā magar merā na thā
wo meri subhon ka tara wo meri raaton ka chand
mere dil ki raushni to tha magar mera na tha
vo kaun hai use sūraj kahūñ ki rañg kahūñ
karūñgā zikr to ḳhushbū zabāñ se aa.egī
wo kaun hai use suraj kahun ki rang kahun
karunga zikr to KHushbu zaban se aaegi
maiñ chāhtā huuñ haqīqat-pasand ho jā.ūñ
magar hai is meñ ye mushkil haqīqateñ haiñ bahut
main chahta hun haqiqat-pasand ho jaun
magar hai is mein ye mushkil haqiqaten hain bahut
kuchh dekhne kī dil meñ tamannā nahīñ baaqī
kyā apnī bhī tāqat se sivā dekh liyā hai
kuchh dekhne ki dil mein tamanna nahin baqi
kya apni bhi taqat se siwa dekh liya hai
shāyad isī baa.is huiiñ patthar mirī āñkheñ
jo kuchh ki mujhe dekhnā thā dekh liyā hai
shayad isi bais huin patthar meri aankhen
jo kuchh ki mujhe dekhna tha dekh liya hai
udaas chhoḌ ga.e kashtiyoñ ko sāhil par
gilā kareñ bhī to kyā paar utarne vāloñ se
udas chhoD gae kashtiyon ko sahil par
gila karen bhi to kya par utarne walon se
mujhe bas itnī shikāyat hai marne vāloñ se
vo be-niyāz haiñ kyuuñ yaad karne vāloñ se
mujhe bas itni shikayat hai marne walon se
wo be-niyaz hain kyun yaad karne walon se
ghabrā ke āsmāñ kī taraf dekhtī thī ḳhalq
jaise ḳhudā zamīn pe maujūd hī na thā
ghabra ke aasman ki taraf dekhti thi KHalq
jaise KHuda zamin pe maujud hi na tha
bharpūr nahīñ haiñ kisī chehre ke ḳhad-o-ḳhāl
dekhā nahīñ vo chāñd jo puurā nazar aa.e
bharpur nahin hain kisi chehre ke KHad-o-KHal
dekha nahin wo chand jo pura nazar aae
jaise muñh-band kalī raat ke vīrāne meñ
saañs lenā mujhe dushvār huā jaatā hai
jaise munh-band kali raat ke virane mein
sans lena mujhe dushwar hua jata hai
musāfir ho to sun lo raah meñ sahrā bhī aatā hai
nikal aa.e ho ghar se kyā tumheñ chalnā bhī aatā hai
musafir ho to sun lo rah mein sahra bhi aata hai
nikal aae ho ghar se kya tumhein chalna bhi aata hai
log zinda nazar aate the magar the maqtūl
dast-e-qātil meñ ba-zāhir koī shamshīr na thī
log zinda nazar aate the magar the maqtul
dast-e-qatil mein ba-zahir koi shamshir na thi
manzil hai kaThin dil bahut ārām-talab hai
kyuuñ yaad mujhe aate ho ai bhūlne vaalo
manzil hai kaThin dil bahut aaram-talab hai
kyun yaad mujhe aate ho ai bhulne walo
chhoḌne maiñ nahīñ jaatā use darvāze tak
lauT aatā huuñ ki ab kaun use jaatā dekhe
chhoDne main nahin jata use darwaze tak
lauT aata hun ki ab kaun use jata dekhe
ai sub.h kī kiran mujhe pyārī hai tū bahut
tujh se lipaT paḌūñgā agar jāgtā huā
ai subh ki kiran mujhe pyari hai tu bahut
tujh se lipaT paDunga agar jagta hua
baiThā hī rahā sub.h se meñ dhuup Dhale tak
saaya hī samajhtī rahī dīvār mujhe bhī
baiTha hi raha subh se mein dhup Dhale tak
saya hi samajhti rahi diwar mujhe bhi
shab Dhal ga.ī aur shahr meñ sūraj nikal aayā
maiñ apne charāġhoñ ko bujhātā nahīñ phir bhī
shab Dhal gai aur shahr mein suraj nikal aaya
main apne charaghon ko bujhata nahin phir bhi
vāqi.a ye hai ki rasta aur vīrāñ ho gayā
peḌ to apnī taraf se phuul barsāte rahe
waqia ye hai ki rasta aur viran ho gaya
peD to apni taraf se phul barsate rahe
maiñ sun rahā huuñ magar dūsroñ ko kaise sunā.ūñ
jo giit gūñjtā rahtā hai mere kānoñ meñ
main sun raha hun magar dusron ko kaise sunaun
jo git gunjta rahta hai mere kanon mein
ḳhvāhishoñ kī dhuul se chehre ubharte hī nahīñ
ham ne kar ke dekh liiñ ḳhvāboñ kī ta.abīreñ bahut
KHwahishon ki dhul se chehre ubharte hi nahin
hum ne kar ke dekh lin KHwabon ki tabiren bahut
is raah se guzre the kabhī ahl-e-nazar bhī
is ḳhaak ko chehre pe milo aañkh meñ Daalo
is rah se guzre the kabhi ahl-e-nazar bhi
is KHak ko chehre pe milo aankh mein Dalo
jab chal paḌe to barq kī raftār se chale
baiThe rahe to paañv kī zanjīr ho ga.e
jab chal paDe to barq ki raftar se chale
baiThe rahe to panw ki zanjir ho gae
ab jahāñ maiñ huuñ vahāñ mere sivā kuchh bhī nahīñ
maiñ isī sahrā meñ rahtā thā magar tanhā na thā
ab jahan main hun wahan mere siwa kuchh bhi nahin
main isi sahra mein rahta tha magar tanha na tha
tum hī kyā jazb ho ga.e mujh meñ
naam letā huuñ baar baar apnā
tum hi kya jazb ho gae mujh mein
nam leta hun bar bar apna
jhūTī bāteñ rahne do
kaun kisī ko yaad aayā
jhuTi baaten rahne do
kaun kisi ko yaad aaya
ye aur baat ise zindagī na kah paa.eñ
vagarna aaj bhī ham jī rahe haiñ jiine ko
ye aur baat ise zindagi na kah paen
wagarna aaj bhi hum ji rahe hain jine ko
na mile vo to talāsh us kī bhī rahtī hai mujhe
haath aane pe jise chhoḌ diyā jaatā hai
na mile wo to talash us ki bhi rahti hai mujhe
hath aane pe jise chhoD diya jata hai
ye chāñd hī tirī jholī meñ aa paḌe shāyad
zamīñ pe baiTh kamand āsmāñ pe Daale jā
ye chand hi teri jholi mein aa paDe shayad
zamin pe baiTh kamand aasman pe Dale ja
lete haiñ log saañs bhī ab ehtiyāt se
chhoTā sā hī sahī koī fitna uThā.iye
lete hain log sans bhi ab ehtiyat se
chhoTa sa hi sahi koi fitna uThaiye
maiñ gul-e-ḳhushk huuñ lamhe meñ bikhar saktā huuñ
ye bhī mumkin hai ki kuchh der havā rahne de
main gul-e-KHushk hun lamhe mein bikhar sakta hun
ye bhi mumkin hai ki kuchh der hawa rahne de