Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".rizl"

Nazm MATCHES FOR ".rizl"

Nazm

daraKHt-e-zard

hadaf ho.nge tumhaaraa kaun tum kis ke hadaf hoge
na jaane vaqt kii paikaar me.n tum kis taraf hoge
hai ran ye zindagii ik ran jo barpaa lamha lamha hai
hame.n is ran me.n kuchh bhii ho kisii jaanib to honaa hai
so ham bhii is nafas tak hai.n sipaahii ek lashkar ke
hazaaro.n saal se jiite chale aa.e hai.n mar mar ke
shuhuud ik fan hai aur merii adaavat be-fano.n se hai
mirii paikaar azal se
ye 'KHusro' 'miir' 'Gaalib' kaa KHaraaba bechtaa kyaa hai
hamaaraa 'Gaalib'-e-aazam thaa chor aaqa-e-'bedil' kaa
so rizq-e-faKHr ab ham khaa rahe hai.n 'miir'-e-bismil kaa
sidhaarat bhii thaa sharminda ki do-aabe kaa baasii thaa
tumhe.n ma.aluum hai urdu jo hai paalii se niklii hai
vo goyaa us kii hii ik pur-numuu Daalii se niklii hai

Jaun Eliya
Nazm

ek laDka

ma.iishat duusro.n ke haath me.n hai mere qabze me.n
juz ik zehn-e-rasaa kuchh bhii nahii.n phir bhii magar mujh ko
KHarosh-e-umr ke itmaam tak ik baar uThaanaa hai
anaasir muntashir ho jaane nabze.n Duub jaane tak
navaa-e-sub.h ho yaa naala-e-shab kuchh bhii gaanaa hai
zafar-mando.n ke aage rizq kii tahsiil kii KHaatir
kabhii apnaa hii naGma un kaa kah kar muskuraanaa hai
vo KHaama-sozii shab-bedaariyo.n kaa jo natiija ho
use ik khoTe sikke kii tarah sab ko dikhaanaa hai
kabhii jab sochtaa huu.n apne baare me.n to kahtaa huu.n
ki tuu ik aabla hai jis ko aaKHir phuuT jaanaa hai
Garaz gardaa.n huu.n baad-e-sub.h-gaahii kii tarah lekin
sahar kii aarzuu me.n shab kaa daaman thaamtaa huu.n jab
ye la.Dkaa puuchhtaa hai aKHtar-ul-iimaan tum hii ho
ye la.Dkaa puuchhtaa hai jab to mai.n jhallaa ke kahtaa huu.n
vo aashufta-mizaaj andoh-parvar iztiraab-aasaa
jise tum puuchhte rahte ho kab kaa mar chukaa zaalim
use KHud apne haatho.n se kafan de kar farebo.n kaa
isii kii aarzuu.o.n kii lahad me.n phe.nk aayaa huu.n
mai.n us la.Dke se kahtaa huu.n vo sho.ala mar chukaa jis ne
kabhii chaahaa thaa ik KHaashaak-e-aalam phuu.nk Daalegaa
ye la.Dkaa muskuraataa hai ye aahista se kahtaa hai
ye kizb-o-iftiraa hai jhuuT hai dekho mai.n zinda huu.n

Akhtarul Iman
Nazm

lahu ka suragh

kahii.n nahii.n hai kahii.n bhii nahii.n lahuu kaa suraaG
na dast-o-naaKHun-e-qaatil na aastii.n pe nishaa.n
na surKHi-e-lab-e-KHanjar na ra.ng-e-nok-e-sinaa.n
na KHaak par ko.ii dhabbaa na baam par ko.ii daaG
kahii.n nahii.n hai kahii.n bhii nahii.n lahuu kaa suraaG
na sarf-e-KHidmat-e-shaahaa.n ki KHuu.n-bahaa dete
na dii.n kii nazr ki bai.aana-e-jazaa dete
na razm-gaah me.n barsaa ki mo'tabar hotaa
kisii alam pe raqam ho ke mushtahar hotaa
pukaartaa rahaa be-aasraa yatiim lahuu
kisii ko bahr-e-samaa.at na vaqt thaa na dimaaG
na mudda.ii na shahaadat hisaab paak hu.aa
ye KHuun-e-KHaak-nashiinaa.n thaa rizq-e-KHaak hu.aa

Faiz Ahmad Faiz
Nazm

israfil ki maut

marg-e-israafiil par aa.nsuu bahaa.o
vo KHudaa.o.n kaa muqarrab vo KHudaavand-e-kalaam
saut-e-insaanii kii ruuh-e-jaavedaa.n
aasmaano.n kii nidaa-e-be-karaa.n
aaj saakit misl-e-harf-e-naa-tamaam
marg-e-israafiil par aa.nsuu bahaa.o
aa.o israafiil ke is KHvaab-e-be-ha.ngaam par aa.nsuu bahaa.e.n
aaramiida hai vo yuu.n qarnaa ke paas
jaise tuufaa.n ne kinaare par ugal Daalaa use
reg-e-saahil par chamaktii dhuup me.n chup chaap
apne suur ke pahluu me.n vo KHvaabiida hai
us kii dastaar us ke gesuu us kii riish
kaise KHaak-aaluuda hai.n
the kabhii jin kii tahe.n buud-o-nabuud
kaise is kaa suur is ke lab se duur
apnii chiiKHo.n apnii fariyaado.n me.n gum
jhilmilaa uThte the jis se dair-o-zuud
marg-e-israafiil par aa.nsuu bahaa.o
vo mujassam hamhama thaa vo mujassam zamzama
vo azal se taa abad phailii hu.ii Gaibii sadaa.o.n kaa nishaa.n
marg-e-israafiil se
halqa dar halqa farishte nauha gar
ibn-e-aadam zulf-dar-KHaak-o-nazaar
hazrat-e-yazdaa.n kii aa.nkhe.n Gam se taar
aasmaano.n kii safiir aatii nahii.n
aalam-e-laahuut se ko.ii nafiir aatii nahii.n
marg-e-israafiil se
is jahaa.n par band aavaazo.n kaa rizq
mutribo.n kaa rizq aur saazo.n kaa rizq
ab muGannii kis tarah gaa.egaa aur gaa.egaa kyaa
sun.ne vaalo.n ke dilo.n ke taar chup
ab ko.ii raqqaas kyaa thirkegaa lahraa.egaa kyaa
bazm ke farsh-o-dar-o-diivaar chup
ab KHatiib-e-shahr farmaa.egaa kyaa
masjido.n ke aastaan-o-gumbad-o-miinaar chup
fikr kaa sayyaad apnaa daam phailaa.egaa kyaa
taa.iraan-e-manzil-o-kohsaar chup
marg-e-israafiil hai
gosh-e-shanvaa kii lab-e-goyaa kii maut
chashm-e-biinaa kii dil-e-daanaa kii maut
thii isii ke dam se durvesho.n kii saarii haav-huu
ahl-e-dil kii ahl-e-dil se guftuguu
ahl-e-dil jo aaj gosha-giir-o-surma-dar-guluu
ab tanaa taa-huu bhii Gaa.eb aur yaa-rab haa bhii gum
ab galii kuucho.n kii har aavaa bhii gum
ye hamaaraa aaKHirii maljaa bhii gum
marg-e-israafiil se
is jahaa.n kaa vaqt jaise so gayaa pathraa gayaa
jaise ko.ii saarii aavaazo.n ko yaksar khaa gayaa
aisii tanhaa.ii ki husn-e-taam yaad aataa nahii.n
aisaa sannaaTaa ki apnaa naam yaad aataa nahii.n
marg-e-israafiil se
dekhte rah jaa.e.nge duniyaa ke aamir bhii
zabaa.n-bandii ke KHvaab
jis me.n majbuuro.n kii sargoshii to ho
us KHudaavandii ke KHvaab

Noon Meem Rashid
Nazm

agle janam mohe biTiya hi kijo

mirii jaa.n rizq kii taqsiim me.n
tafriiq kaa qaanuun to sadiyo.n puraanaa hai
viraasat baa.nTne vaalo.n ne jo bhii faisla likkhaa
use ham ne bajaa samjhaa bajaa likkhaa
hamaaraa alamiya ye hai
ki apnii raah kii diivaar ham KHud hai.n
ye aurat hai
ki jo aurat ke haq me.n ab bhii guu.ngii hai
ye aurat hai
ki jo aurat kii ummiido.n kii qaatil hai

Ishrat Afreen
Nazm

farogh farruKH-zad ke liye ek nazm

musaahib-e-shaah se kaho ki
faqiih-e-aazam bhii aaj tasdiiq kar ga.e hai.n
ki fasl phir se gunaahgaaro.n kii pak ga.ii hai
huzuur kii jumbish-e-nazar ke
tamaam jallaad muntazir hai.n
ki kaun sii had janaab jaarii kare.n
to taamiil-e-bandagii ho
kahaa.n pe sar aur kahaa.n pe dastaar utaarnaa ahsan-ul-amal hai
kahaa.n pe haatho.n kahaa.n zabaano.n ko qat.a kiijiye
kahaa.n pe darvaaza rizq kaa band karnaa hogaa
kahaa.n pe aasaa.isho.n kii bhuuko.n ko maar diije
kahaa.n baTegii lu.aan kii chhuuT
aur kahaa.n par
rajm ke ahkaam jaarii ho.nge
kahaa.n pe nau saala bachchiyaa.n chahal saala mardo.n ke saath
sa.ngiin me.n pirone kaa hukm hogaa
kahaa.n pe iqbaalii mulzimo.n ko
kisii tarah shak kaa faa.eda ho

Parveen Shakir
Nazm

KHizan mausam nahin hai

KHizaa.n mausam nahii.n hai
ek lamha hai ki jis kii aarzuu me.n
sabz patte
havaa kii aahaTo.n par kaan dharte hai.n
guzarte vaqt me.n saa.at-ba-saa.at
na.e pairaahano.n me.n
gulaabii aur gahre surKH unnaabii
dahakte KHushnumaa ra.ngo.n se le kar zard hone tak
kabhii dhiime kabhii uu.nche suro.n me.n baat kartii
KHushbu.o.n me.n bas-basaa kar
havaa ke saath mahv-e-raqs honaa chaahte hai.n
zamii.n kaa rizq ban jaane se pahle
vahii ik ajnabii vaaraftagii aur raqs kaa lamha
kahii.n par daur-e-aa.inda ke mausam kii samaa.at me.n
kisii so.e hu.e ik biij me.n
KHvaahish numuu kii sar uThaatii hai
bahut hii pyaar se har shaaKH ke patte se kahtii hai
ki ab rizq-e-zamii.n ban kar
kisii ik narm ko.npal kii numuu kaa aasraa ban jaa
KHizaa.n mausam nahii.n hai
ik masarrat-KHez taKHliiq-e-amal kaa aasraa hai

Pirzada Qasim
Nazm

ek sawal

mere aabaa-o-ajdaad ne hurmat-e-aadmii ke liye
taa-abad raushnii ke liye
kalma-e-haq kahaa
maqtalo.n qaid-KHaano.n saliibo.n me.n bahtaa lahuu un ke hone kaa ailaan kartaa rahaa
vo lahuu hurmat-e-aadmii kii zamaanat banaa
taa-abad raushnii kii alaamat banaa
aur mai.n paa-barahna sar-e-kuucha-e-ehtiyaaj
rizq kii maslahat kaa asiir aadmii
sochtaa rah gayaa
jism me.n mere un kaa lahuu hai to phir ye lahuu boltaa kyuu.n nahii.n?

Iftikhar Arif
Nazm

jo log raaton ko jagte the

sitaare jitne bhii aasmaa.n par
mirii tamannaa ke zau-fishaa.n the
zamii.n ke andar utar ga.e hai.n
jo log raato.n ko jaagte the vo mar ga.e hai.n
vo phuul vo titliyaa.n ki jin se
bahaar kii dilkashii sivaa thii
vo rizq-e-KHaashaak ban chuke the
tamaam manzar tamaam chehre jo dhiire dhiire sulag rahe the
so ab vo sab raakh ban chuke hai.n
mai.n raftagaa.n kii udaas yaado.n ke saa.e me.n din guzaartaa huu.n
agarche KHvaabo.n kaa pairahan taar taar saa hai
pa mai.n use kab utaartaa huu.n
mirii sadaa kaa javaab ab ko.ii bhii na degaa
ye jaantaa huu.n magar musalsal kisii ko ab tak pukaartaa huu.n
ajiib ye khel hai ki jis ko na jiit.taa huu.n na haartaa huu.n
mirii kahaanii me.n ko.ii shai bhii na.ii nahii.n hai
ye nanhe munne hasiin KHvaabo.n se hai ibaarat
mirii kahaanii me.n narm din KHush-gavaar shaamo.n
udaas raato.n kii ek rau hai
vajuud meraa kisii diye kii haqiir lau hai
mai.n yuu.n to kahne ko aql o mantiq ke daur kaa aadmii huu.n lekin
miraa ravayya hai zindagii ko guzaarne kaa bahut puraanaa
mai.n sochtaa huu.n ki ik sadii qabl paidaa hotaa to Thiik rahtaa
ki mujh se ko.ii bhii kuchh na kahtaa
jo KHaak kaa rizq ho chuke hai.n
mai.n un zamaano.n kaa nauhagar huu.n
visaal o hijraa.n kii daastaano.n kaa nauhagar huu.n
jinhe.n ye duniyaa hazaar-haa baar sun chukii hai

Asad Badayuni
Nazm

an-paDh gunge ka rajaz

KHaamoshii meraa lashkar hai
lafzo.n kii daldal
aur us me.n palne vaalii jo.nke.n
ye muta.affin aavaaze.n
merii yalGaar ke aage saabit-qadam rahe.ngii?
kyaa tum vaaqa.ii aisaa samajhte ho
ki tumhaare maidaan itne faraaKH hai.n
ki mere asp-e-asiil ko thakaa de.nge
tumhaare samundar itne mavvaaj hai.n
ki meraa rizq ulaT de.nge
aur tumhaare pahaa.D itne sa.nglaaKH hai.n
ki meraa jhanDaa na thaame.nge

Ahmad Javaid
Nazm

qaid-e-azam

kuchh suuraj aise phir bhii
apnii apnii shaam me.n jo is dasht-e-ufuq kaa rizq hu.e hai.n
lekin ab tak raushan hai.n gahnaa.e nahii.n
phuul hai.n jin ko chhuune vaalii sabz havaa.e.n KHaak hu.ii.n
lekin ab tak taaza hai.n kumhlaa.e nahii.n
aisaa hii ik suuraj thaa vo aadam-zaada
TuuTii ii.nTo.n ke malbe se jaada jaada
Tuk.Daa Tuk.Daa yakjaa kar ke
ek imaarat kii buniyaade.n Daal rahaa thaa
saat samundar jaise dil me.n
un ke Gam ko paal rahaa thaa
jin ke kaale ta.ng gharo.n me.n ko.ii suuraj chaa.nd nahii.n thaa
phuulo.n kii mahkaar nahii.n thii baadal kaa imkaan nahii.n thaa
sub.h kaa naam nishaan nahii.n thaa
nii.nd bharii aa.nkho.n ke lawn me.n
vo KHud suuraj ban kar ubhraa
Dhaltii shab me.n puure chaa.nd kii suurat niklaa
sub.h ke pahle darvaaze par dastak ban kar guu.nj uThaa

Amjad Islam Amjad
Nazm

be-yaqin bastiyan

vo ik musaafir thaa jaa chukaa hai
bataa gayaa thaa ki be-yaqiino.n kii bastiyo.n me.n kabhii na rahnaa
kabhii na rahnaa ki un pe itne azaab utre.nge jin kii gintii adad se baahar
vo apne murde tumhaare kaa.ndho.n pe rakh ke tum ko judaa kare.nge
tum un janaazo.n ko qarya qarya liye phiroge
falak bhii jin se naa-aashnaa hai jinhe.n zamiine.n bhii rad kare.ngii
vo kah gayaa thaa hamesha zillat se duur rahnaa
ki bad-nasiibo.n kaa rizq-e-avval unhii.n zamiino.n se paidaa hotaa hai
jin zamiino.n pe bhuurii giddho.n kii nochii haDDii ke reze bikhrii.n
tum apnii raa.e ko istaqaamat kii aab denaa
jise pahaa.Do.n kii KHushk sa.ngii.n bulandiyo.n se KHiraaj bheje.n
Gulaam zehno.n pe aisii laanat kii rasm rakhnaa
jo terii naslo.n phir un kii naslo.n phir un kii naslo.n talak bhii jaa.e
tumhe.n KHabar ho shariif logo.n kii uu.nchii gardan lachak se aise hii be-KHabar hai
savaad-e-Gurbat me.n KHema-gaaho.n kii jaise gaa.Dii ho.n KHushk chobe.n
kabhii na shaane jhukaa ke chalnaa
ki past-qaamat tumhaare qadmo.n se apne qadmo.n ko jo.D de.nge
vahii nahuusat tumhe.n KHaraabo.n kii paasbaanii ataa karegii
saraab-aa.nkho.n ke raasto.n se tumhaare gurdo.n me.n ret phe.nke.nge aur siine ko kaaT de.nge
vo kah gayaa thaa yahii vo illat ke maare vahshii hai.n jin kii apnii zabaa.n nahii.n hai
ye jhaag u.Daate hai.n apne jab.Do.n se lajlaje kaa to ga.Dga.DaahaT kaa shor uThtaa hai
aur badbuu bikhertaa hai
yahii vo bad-baKHt be-hunar aur be-yaqii.n hai.n ki jin kii diyat na KHuu.n-bahaa hai
so in kii qurbat se duur rahnaa najaat-e-dil kaa sabab banegaa
vo ik musaafir thaa kah gayaa hai

Ali Akbar Natiq
Nazm

safir-e-laila-2

nazar uThaa.o safiir-e-lailaa bure tamaasho.n kaa shahr dekho
ye meraa qarya ye vahshato.n kaa amiin qarya
tumhe.n dikhaa.uu.n
ye sehan-e-masjid thaa yaa.n pe aayat-farosh baiThe du.aa.e.n KHilqat ko bechte the
yahaa.n adaalat thii aur qaazii amaan dete the rahzano.n ko
aur is jagah par vo KHaan-qaahe.n thii.n aab o aatish kii manDiyaa.n thii.n
jahaa.n pe amrad-parast baiThe safaa-e-dil kii namaaze.n pa.Dh kar
KHayaal-e-duniyaa se jaa.n haTaate
safiir-e-lailaa mai.n kyaa bataa.uu.n ki ab to sadiyaa.n guzar chukii hai.n
magar suno ai Gariib-e-saaya ki tum shariifo.n ke raaz-daa.n ho
yahii vo din the mai.n bhuul jaa.uu.n to mujh pe laanat
yahii vo din the safiir-e-lailaa hamaarii bastii me.n chhe taraf se fareb utre
daro.n se aage gharo.n ke biicho.n phir us se chuulho.n kii haa.nDiyo.n me.n
javaan-o-piir-o-zanaan-e-qarya KHushii se raqsaa.n
tamaam raqsaa.n
hujuum-e-tiflaa.n thaa yaa tamaashe the bozno.n ke
ki ko.ii diivaar-o-dar na chho.Daa
vo un pe cha.Dh kar shariif chehro.n kii gardano.n ko phalaa.ngte the
Daraaz-qaamat lahiim baune
razaa-e-baaham se kolhu.o.n me.n jute hu.e the
KHraaste the vo zard Galla to us ke pisne se KHuun bahtaa thaa pattharo.n se
magar na aa.nkhe.n ki dekh paa.ii.n na un kii naake.n ki suu.nghte vo
faqat vo bailo.n kii chakkiyaa.n thii.n saro.n se KHaalii
fareb khaate the KHuun piite the aur niinde.n thii.n bajju.o.n kii
safiir-e-lailaa ye daastaa.n hai isii kha.nDar kii
isii kha.nDar ke tamaash-biino.n fareb-KHurdo.n kii daastaa.n hai
magar suno ajnabii shanaasaa
kabhii na kahnaa ki mai.n ne qarno.n ke faaslo.n ko nahii.n sameTaa
fasiil-e-qarya ke sar pe phe.nkii ga.ii kamande.n nahii.n utaarii.n
tumhe.n dikhaa.uu.n tabaah bastii ke ek jaanib buland Tiila
buland Tiile pe baiThe baiThe havannaqo.n-saa
kabhii to rotaa thaa apnii aa.nkho.n pe haath rakh kar kabhii musalsal mai.n uu.nghtaa thaa
mai.n uu.nghtaa thaa ki saa.ns le luu.n
magar vo chuulho.n pe haa.nDiyo.n me.n fareb pakte
siyaah saa.npo.n kii aisii kaayaa-kalap hu.ii thii ki merii aa.nkho.n pe jam ga.e the
so yaa.n pe baiThaa mai.n aane vaale dhu.e.n kii talKHii bataa rahaa thaa
KHabar ke aa.nsuu bahaa rahaa thaa
magar mai.n tanhaa safiir-e-lailaa
faqat KHayaalo.n kii baadshaahii mirii viraasat
tamaam qarye kaa ek shaa.ir tamaam qarye kaa ik la.ii.n thaa
yahii sabab hai safiir-e-lailaa mai.n yaa.n se niklaa to kaise ghuTno.n ke bal uThaa thaa
nasiib-e-hijrat ko dekhtaa thaa
safar kii saKHtii ko jaantaa thaa
ye sabz qariyo.n se sadiyo.n piichhe kii manzilo.n kaa safar thaa mujh ko
jo gard-e-sahraa me.n lipTe KHaaro.n kii tez noko.n pe jald karnaa thaa aur
vo aisaa safar nahii.n thaa jahaa.n pe saa.e kaa rizq hotaa
jahaa.n havaa.o.n kaa lams miltaa
farishte aavaaz-e-al-amaa.n me.n mire liye hii
ajal kii rahmat ko maa.ngte the
yahii vo lamhe the jab shafaq ke taviil Tiilo.n pe chalte chalte
mai.n dil ke zaKHmo.n ko saath le kar
safar ke parbat se paar utraa

Ali Akbar Natiq
Nazm

kal jab daraKHt na honge

bayaa se chi.Diyaa
chi.Diyaa se tote
aur tote se kavve
niil-ka.nTh woodpecker
aur laalii tak
parindo.n jaanvaro.n
aur insaano.n kaa
rizq aur jiivan
baaham
aapas me.n ju.De hu.e hai.n
daraKHto.n paudo.n
phuulo.n aur phalo.n se
ham sab kaa jiivan hai
daraKHto.n kii hariyaalii tak
ham sab hariyal hai.n
kal jab
daraKHt nahii.n ho.nge
to
kuchh bhii na hogaa
bad-baKHtii ham par
kutte kii suurat bhau.nkegii

Ashraf Jawed Malik
Nazm

muhasba

mumtaaz espen me.n
jaa.ez aur naa-jaa.ez chiize.n
dar-aamad baraamad kar ke
rizq-e-halaal aur akl-e-haraam kamaataa thaa
us ke jaan.ne vaalo.n me.n
kuchh aise vaise log bhii shaamil the
magar apnii apnii pardesii duniyaa.o.n me.n
dono.n aaraam se the

Saqi Faruqi
Nazm

naya sal

aane vaale kal me.n shaayad KHvaabo.n kii ta.abiir mile
bhuukii KHilqat rizq ko dekhe insaa.n ko tauqiir mile

Sarfaraz Syed
Nazm

billi

dayaar-e-Gariibaa.n se aayaa hu.aa ik udhe.D umr chuhaa
jo bas rizq kii buu ko pahchaantaa hai
jo har vaqt biimaar har vaqt bezaar chuhiyaa se ta.ng aa chukaa hai
use dekh legaa to jii jaa.egaa
shauq-e-vaaraftagii tarz-e-aamaadgii
us ko billii ke nazdiik le jaa.egaa
lamha-e-qurb me.n
saa.at-e-vasl me.n
us hasiina ke naaKHun nikal aa.e.nge
us udhe.D umr chuuhe se shoKHii kare.nge
use haa.nptaa-kaa.nptaa adh-mu.aa chho.D kar
phir se malbuus-e-maKHmal me.n chhup jaa.e.nge

Zehra Nigaah
Nazm

catharsis

ham unhe.n paalte hai.n
apne bachcho.n kii tarah
apnaa KHuun pilaa kar
apne hisse kaa rizq khilaa kar
unhe.n sair karaate hai.n
mele Thele aur baazaaro.n kii
apnii u.nglii thamaa kar

Nomaan Shauque
Nazm

ek gum-shuda shahar

ba.Daa shauq thaa
ki base.n shahr-e-lahore me.n
chho.D kar zindagii ye mazaafaat kii
chal rahe.n us nigaar-e-vatan me.n
ki jis me.n hai.n har-suu mahaktii fazaa.e.n
barastii hai.n maKHmuur kaalii ghaTaa.e.n
ye lahore thaa
mere KHvaabo.n kaa maskan
mirii chaahato.n kaa KHutan
guzaare the ahd-e-javaanii me.n mai.n ne
yahaa.n sai.nka.Do.n din
baras-haa-baras tak
rahaa mai.n muqayyad
bahut duur is ek chhoTe nagar me.n
vo chhuuTaa nagar jis ne aasuudgii dii
diyaa rizq bhii garche mujh ko faraavaa.n
magar mere dil me.n vo utraa nahii.n ek din bhii
zamiin chaa.nd mausam sitaare
sabhii ek se the
magar phir bhii mujh ko vo bhaayaa nahii.n ek din bhii
mujhe aaKHirash zindagii le hii aa.ii
isii mere KHvaabo.n ke ghar me.n
samundar kii suurat ufuq-taa-ufuq
duur phaile nagar me.n
va-lekin vo shahr-e-nigaaraa.n vo shahr-e-KHutan
merii yaado.n kaa maskan
na jaane kahaa.n hai?
use aaj tak Dhuu.nD paayaa nahii.n mai.n
na vo mall hai na vo shimla pahaa.Dii
na TamTam na Taa.nga na ik aadh gaa.Dii
jamaal-e-sahar hai na mahkii fazaa.e.n
samaa.at pe baar-e-garaa.n motoro.n kii sadaa.e.n
hai shor-e-qayaamat dhu.aa.n hii dhu.aa.n hai
miraa shahr lahore jaane kahaa.n hai

Syed Javed Akhtar
Nazm

mohabbat kya hai

mere nazdiik mohabbat ilhaamii shai hai
ye aasmaano.n se utartii hai
dil kii paak shaffaaf zamiin par
ye mohabbat azaan-e-fajr ke baad utartii hu.ii paak sahar hai
ye itnii paak hai jitnaa jis kaa taKHayyul paak hai
mohabbat is qadar paakiiza hotii hai jitnaa jis kaa KHuun paak hotaa hai
mohabbat us ko kahte hai.n jab roza-daar iftaar ke vaqt
ik paanii kaa gilaas saamne rakhe us aavaaz kaa intizaar kartaa hai ki kab hukm ho
us aavaaz kaa intizaar mohabbat hai
mohabbat vo manzil hai jis ke raaste pe chalne vaale dil aab-e-zamzam se dhule hote hai.n
mohabbat rizq hai un aa.nkho.n kaa jo mahbuub kaa diidaar baa-vazuu ho kar kartii hai.n
un logo.n ke chahaar-jaanib bahaar-e-mohabbat ke gulaab khilte hai.n jin pe KHizaa.n nahii.n aatii
mohabbat kaa gulshan
izzat kii KHushbuu se mahaktaa hai
ye mohabbat vo jazba hai jis ke tahat garmii kii shiddat pyaas kii hiddat me.n
chhaa.nv kii jagah par parindo.n ko paanii rakhaa jaa.e
ye mohabbat vo manzil hai jis pe pahu.nchne ke liye ik pyaase kutte ko paanii pilaanaa pa.Dtaa hai
mohabbat naam zabaan pe aane se pahle soch ko baa-vazuu ho jaanaa chaahiye
aur jinho.n ne naam-e-mohabbat ko utran kii tarah pahnaa hai
jinho.n ne mohabbat ko hii dhoka diyaa hai
un pe phir mohabbat azaab ban ke utartii hai
mohabbat ruuTh jaatii hai
kyuu.nki ye izzat hai
aisii izzat jo mohabbat se pahle dil kii sarzamiin pe utre
aur izzate.n buland rahe.n hamesha mohabbato.n se
jahaa.n izzat kii sar-bulandii rahegii vahaa.n mohabbat hamesha zinda rahegii
aur jin logo.n ne
mohabbat ko kaarobaar banaayaa hai
vo log mohabbat kii miim se naa-balad hai.n
un ke vaaste mohabbat naam ke chand din hote hai.n
phir bahaane aur apnii Galiiz fitrat ke pesh-e-nazar
kabhii ik dar kabhii duusraa dar
kabhii yahaa.n jhukaa kabhii vahaa.n jhukaa
are suno
mohabbat ke naam pe ta'alluqaat ko libaas se jald badalne vaale insaan
tauhiin mat karo mohabbat kii
is ilhaamii shai ko is paak jazbe ko paak rahne do
aur yaad rakho tauhiin-e-mohabbat ke murtakib
tum se to ab nafrat bhii mere shaayaan-e-shaan nahii.n

Omainuz Zahra Sayyad
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now